2006 年 12 月 19 日 星期二 【颳風】

心力交瘁o既我，琴日中午洗完牙之後，局佐郵差、Kenji、呀宏陪我過澳門散錢。

老婆走佐佬，當日為佐慳o個一個幾毫凍冰冰都要行落山搭小巴，過海唔坐隧巴走去坐天星小輪o既我，一切為B而做、而儲o既錢，已經變成廢紙。

您話您仲好關心我，如果真係o既話，當初您又要做出個咁傷害我o既決定？我都唔知我係咪應該憎您先o岩，搞到由去澳門上船一直喊到臨走前食晚飯。一上到船，聽到Love of My Life o既其中一句歌詞︰「Back, hurry back! Please bring it back home to me because you don't know what it means to me...」就喊到收唔到聲，o係賭場裡面諗起您又喊，o係(乙水)仔坐車出o黎o係車上面又喊到收唔到，食飯時好掛住您又喊，好似癲佐咁，終身不能安寧……

您o既關心，只係一句「take care」、「會心痛」，您心痛就唔會不明不白一走了之…或者您o既離開反而令我得到解脫，因為我唔駛再死慳死抵咁去為達成您o既結婚夢而一個人o係度儲錢，一直諗住買個burberrys畀您，您又無福消受。星期日我自己一個人走佐出去買佐個畀自己，但係其實內心好苦…

您真係任性到不得了，我真係唔知點樣先可以滿足到您，可能好似Josephine話齋，我畀自由您根本唔係滿足您，或者您唔係要我畀自由您，而係您需要一個人管實您先o岩…

我尊重您o既私隱自由估唔到您咁識利用，好多o野我都看在眼裡放在心中，講出o黎又怕打激您…愛您反而變佐害您。而您就好好利用我容易信人o既最大弱點…

為佐維護您，冇人幫我…而家畀您搞到餓又食唔到，訓又訓唔著，玩又冇快感，仲要隨時好似癲佐咁爆發情緒失控，返工又要對人歡笑背人愁，真係唔知點死…

張國榮o既《玻璃之情》話︰「不信眼淚，能令失樂的您愛下去，難收的覆水，將感情慢慢盪開去，如果您太累，及時地道別沒有罪，牽手來，空手去，就去…」我放開手…

其實我一直都唔可以進入到您o既圈子，又或者根本係您唔想畀我進入您o既圈子。我知道，您根本就唔喜歡我進入您o既生活圈子，例如您同o的咩人來往我根本就唔識、亦唔知，我亦唔問。懶係以為尊重您，結果就搞成咁…

其實一切都係由於我太縱您，結果害佐我自己。好似我唔想您去同o個班人唱k，我明知有o野，都唔出聲制止，由得您去玩，畀自由您，畀機會您，其實一切都係我自己種出o黎o既禍，結o既果。第一次去接您我已經覺得有o的唔係好妥o既感覺…不過…我又自問，乜我可以制止到您唔去咩？您自主性咁強，為費事嘈交，所以最終我都係no say…之後您連畀我接您o既機會都唔畀我，o係o個時已經變緊，所以您變成咁其實最大責任o既人係我自己，係我一開始就冇去阻止一o的事發生、惡化落去…

您老實o的同我講，我都冇咁傷心，不過太多隱瞞o既事，係由自己去揭破，最令我傷心透絕。好多o野唔出聲唔代表冇人知，我都係人我都會感覺到，尤其係我呢o的之前偷食過o既人，又點會唔比您清楚？

唔關您事o既，一開始我都已經遇佐會有呢一日，只係呢一日太早發生…係我已經預佐。而我只得一個希望，就係您快o的返o黎我身邊。

>>December 23, 2006 at 9:48:10 AM GMT+8

2006 年 12 月 18 日 星期一 【颳風】

連續兩晚都訓唔到，一合埋眼，就只係見到您…好多好多朋友同我講o的咩「大把女駛乜愁」、「時間會醫好一切o既傷」之類o既安慰說話，但係呢o的係人見朋友失戀都會講o既說話，對我o黎講，並唔係安慰。或者佢o地仲未放低對您o既偏見、仇恨，雖然我內心亦都有，但係口硬又心軟…

多謝郵差、Kenji、呀宏、家姐、健健、超人、等等一干人等對我o既關懷。

琴晚即時要搵Josephine同我急救，唯有佢就知道我o既內心，係幾咁軟弱，因為我係一棵只需要用愛去灌溉，就可以生長o既植物。

佢收得好夜，但係都冇食言講大話，返到柴灣點都搵埋我傾偈先訓覺。事實上，我同佢呢一年o黎亦傾佐唔少點樣解決我同您之間出現o既問題o既解決方法，我亦有試過用佢所提供o既方法去嘗試，可惜最後都失敗收場。佢同愛B只係見過一面，但係佢話直覺話畀佢聽B唔o岩我，佢亦唔鐘意B。

我話，其實冇乜邊個朋友係支持我同B一齊，但係佢o地都支持我去努力做，愛到底，佢o地亦明白今次我唔會好似以前咁輕易放棄，佢o地亦多番警告我如果我繼續對B好，一定會受傷害，係我自己唔聽，我唔係唔信，而係我覺得愛一個「我愛佢比佢愛我」更多o既人，對我o黎講，比以往一直係愛一個「佢愛我多過我愛佢」o既人o黎得更加幸福，受傷害其實我都遇佐，而且由始至終都一直受傷害，但我有個信念，我覺得，終會有感動o既一天…

Josephine係咁說服我唔好咁蠢，去等一個唔會返o黎o既人，但我只愛佢一個，亦從來冇畀機會我身邊o既任何人去損害我對您o既愛，我又點可以去愛另一個人呢？佢話如果您返o黎我身邊，我只會再一次受到傷害，您會再一次離開，我唔信，我係要等。

傾到成五點幾，唔阻住佢訓喇，因為我今日約晒人，再請佢o地過澳門幫我賭（倒）晒o的錢。

>>December 21, 2006 at 9:11:20 AM GMT+8

2006 年 12 月 17 日 星期日 【乍雨乍晴】

琴日係咁求愛B唔好離開我，結果都係冇用。我明白，一個心意已決o既女人，你點同佢講都冇用…

琴晚好辛苦先求到愛B出o黎見我最後一面，估唔到連見您最後一面o既機會都咁難得…您已經冇戴我送畀您o既戒指，我o地o既定情信物，只係一日，您已經咁狠心，傷透心…

您話您任性，又話我已經做得好好，咁點解做得好，都係分手收場？好多問號o係個心裡面，您就只係畀都一個「我自己都唔知」o既分手理由畀我…點解？點解您要咁傻？就係因為我o地之間o既問題用佐一年時間未解決到，您就要放棄，就要去再試另一個？點解您會對毛咁狠心？唔通一年o黎大家一齊經歷o既開心、煩惱、傷心、分享等等o既事情，就咁一下子就抹得一乾二淨？

您得，我唔得。因為我拍佐拖咁多年，從未試過好似今次咁認真去為一個人著想，初初同您開始o既時候，知道您飽受情傷，一時間結婚希望幻滅，o係您面前提起過兩次都喊住收場，我知道我唔可以再令您傷心難過。今日，我對您充滿住您當日憧憬o既結婚夢想，再加埋一直唔鐘意小朋友o既我，都開始覺得同自己深愛o既人擁有愛情結晶品o既甜蜜…我已經失去晒我o既一切一切，我o既夢想、我o既希望、我o既將來…通通都係圍繞著您而建立，希望用一生去保護您，倒頭來，居然係一場空，我o既心，已經畀您挖空，我已經唔再係我自己。一時間，兩個甜蜜相擁的人，變成陌路人…

點解我幫您諗緊五年之後o既o野，您仲係諗緊聽日o既o野？點解您突然之間變得咁快？我無辦法接受，六神無主，可以做o既o野，就係喊。

出o黎見您並唔為佐挽留您，只係好似臨終o既病人，想見自己最愛o既人最後一面。我冇憎您，冇怨您，口硬，其實心軟。

畀佐預早買畀您o既聖誕禮物您，畀埋訂佐o既戲飛您，我o地就離開坐低o既地方。您連手都唔肯拖住，一對話過一生一世唔會分開o既手…我喪求，亦只能得到一隻貌合神離的左手。我再三喪求…

走著，您問我日後會否再見面，我答︰「不會，除非您回來我身邊。」因為即使遇到和您有關的事，陪您走過的路，我都會悲傷得不能自控，我怕再見您，真的很怕、很怕。我沒有勇氣再面對您了，您已奪去我的一切…

小巴站，我努力去認得您o既氣味，我努力去記住您的輪廓，因為我已經沒有可能再遇上。想抱抱您，已不是惜日的您，您不再緊緊擁抱我。用著我們最親密的抱，加上互擦耳仔，眼淚又再不由自主的流出來，這就是我們之間最獨突的親密方式嗎？至少對我o黎講一定係。但係，您會和他做同一動作嗎？只是輕輕想到，心也陣痛…

小巴上，您也不再睡在我的膊上，更加唔駛指望您會睡在我的大腿上，我的一切，失去了。

走著最後的一段路，很冷，風很大。心裡只想時間停住，卻不忍您受到寒風的侵襲，我選擇加快腳步。以後，會有他代替我送您回來。沒有了，我的一切。

記得當初亦用了很多時間，去說服自己要有信心，去令自己強壯，好好克服您過往的情史，去克服內心的嫉妒，克服您每次提起寶寶也很開心，對他表現無微不至的關心，就像比關心我更加關心他。但我用心去克服，去建立對您的信心，去克服自己的自卑感。克服的過程已經有一半，但已枉然，因為我已我去我的一切…

送您上電梯，擁著。當天，我們就是這樣的開始。我愛您。

在您家門前，對您最後的叮囑，祝您幸福。有天，他不愛您，而您又決定不再離開我，請您立即回到我的身邊。即使我已有了另一半，我也會義無反顧的去接受您，因為，我愛您。

沒有了，一切都沒有了，我已輸掉我畢生的賭注，我已不再是我。我的心，已經給您埋葬了。

>>December 21, 2006 at 2:22:03 AM GMT+8

2006 年 12 月 16 日 星期六 【乍雨乍晴】

今日係德哥入院o既第三日，我o地一班馬騮收佐工之後上去探佢呀！佢左邊面無端端腫佐，醫生都講唔出係因為乜事，好在今日見佢都仲玩得講得笑得，咁即係冇事啦！

但係我就大件事喇…

----------------------------------------------------------------------------------------------------------------------------

一切都輸晒…冇喇…輸佐我o既將來…

琴晚我o地sms又討論我o地一向解決唔到o既問題，最終都係冇解決辦法，結果以「分手」收場…但係我估唔到我o地兩個真係會走到咁o既一日… :'(

今朝o係電話中，您話︰「我已經唔可以再愛您更多喇…我做唔到呀…」一句夠晒，已經傷透了心。您又話︰「你同我以前o的男朋友都一樣…」係咩？我真係一樣咩？原來o係您心目中，我真係差成咁，我所做o既一切都係徒然，只係一個未達到您心目中標準o既普通男人…您等佐咁耐，就讓我先提出分手罷，我做衰人總好過您做，係我自己提出先o既，您只需要食住上就夠喇…

只係短短442日，教我心死…

>>December 21, 2006 at 6:34:06 PM GMT+8

2006 年 12 月 15 日 星期五 【颳風】

我等到花兒也謝了
張學友

每個人都在問我到底還在等甚麼
等到春夏秋冬都過了難道還不夠
其實是因為我的心有一個缺口
等待拿走的人把它還給我

每個人都在說這種愛情沒有結果
我也知道你永遠都不能夠愛我
其實我只是希望你有時想一想我
你卻已經漸漸漸漸甚麼都不再說

我睡不著的時候　會不會有人陪著我
我難過的時候　會不會有人安慰我
我想說話的時候　會不會有人了解我
我忘不了你的時候　你會不會來疼我

你知不知道　你知不知道　我等到花兒也謝了
你知不知道　你知不知道　我等到花兒也謝了

每個人都在說這種愛情沒有結果
我也知道你永遠都不能夠愛我
其實我只是希望你有時想一想我
你卻已經漸漸漸漸甚麼都不再說

我睡不著的時候　會不會有人陪著我
我難過的時候　會不會有人安慰我
我想說話的時候　會不會有人了解我
我忘不了你的時候　你會不會來疼我

你知不知道　你知不知道　我等到花兒也謝了
你知不知道　你知不知道　我等到花兒也謝了

你知不知道　你知不知道　我等到花兒也謝了

>>December 17, 2006 at 5:21:11 AM GMT+8

2006 年 12 月 14 日 星期四 【颳風】

如果您以為食煙、玩馬仔機、同朋友仔出街玩或者傾電話、賭波、打麻雀、download咸片睇、升職加人工、有人收我讀書等等可以令我快樂，咁您就大錯特錯，其實還未可以帶起我o既情緒。

事實上，無一件事比得上同您一齊過生活，因為您就係我o既一切一切，心肝寶貝、命根。我o既每一絲情緒都畀您牽引住，同您討論兩個似乎冇結果o既問題，總會令我傷心難過。您快樂，所以我快樂。您覺得做o野好煩惱時，諗方法去解決o既我比您更煩惱。您唔舒服時，我比您更擔心您唔去睇醫生。您怕肥時，我更加怕您去食葯減肥。

我o地o係上一次討論同一個問題時，唔係o係小巴上面已經諗到一o的安排，一個可行o既解決方法咩？點解您好似從來都冇努力過，用行動去證明您真係願意去為我行出呢一步，而一直話自己做唔到？您愛自己多過愛我，我絕對認同同接受，但係可以拖捨多一分分o既愛畀我，唔駛我去乞求？

我變了，我為我哭了…您沒變，我為您哭了…您要騙我騙到幾時？您是否還愛著那個他？

>>December 16, 2006 at 5:38:19 AM GMT+8

2006 年 12 月 13 日 星期三 【颳風】

連續執佐三日掣房、L2倉同埋更衣室出面條走廊，真係成身散晒，人都癲！

1號、3號同4號掣房基本上已經清理完成，但係更衣室走廊o的o野就要等德哥放完假返o黎先可以睇o下可唔可以整到層架。L2倉o的o野多到不得了，我同Kenji都只係可以將o的o野疊高，先可以有o的空位放o的新o野…吹到有三棵寫住1999年o既聖誕樹囉！我都唔知推廣部搞乜，呀英姐又唔知做乜成個垃圾婦咁…足足丟佐十幾車垃圾都有，真係頂佢不順。

另外有o的陳年推廣部送過o黎o既禮物，居然仲長期放o係更衣室出面冇人理，我決定將o的過期禮品分畀o的兄弟，等大家都有個快樂聖誕，而冇人要o既就即丟。

好累，食完飯十點幾就死佐上床，狂訓到飽，勁開心！zzz…

>>December 16, 2006 at 5:39:26 AM GMT+8

2006 年 12 月 12 日 星期二 【微冷】

好難得先約到愛B出街，因為佢呢排因為今個星期六o既業主大會而好忙好忙。今日又o係度瘋強執o野，做完「新翠物流」之後，成個人都散晒。愛B亦都係，一個人兩隻手係咁做「港灣印刷」搞佐個幾禮拜都未搞掂…我o地o係太子食佐個唔好食o既酸辣麵（其實叫錯佐，應該食粉絲先o岩）之後，就落佐電影中心睇Paris, je t'aime（港譯︰《我愛巴黎》）。

呢部戲其實好似以前睇過o既Love Actually一樣，係由好多個短篇故事組成o既一套戲，當中o既人物亦冇需要特別串連埋一齊，總之每個故事都係獨立製作，好似睇散文咁。


Je t'aime即係法文o既「我愛您」咁解，呢個字對我o黎講一o的都唔陌生，因為o係早o係四年前有位學過o下法文o既歷屆教過我。


一個字講晒，套戲就係講「愛」呢樣o野，但係冇o的影評所講咁好睇。片中講述o既大部分都係男女關係，而且好玄妙咁包括佐拍拖、婚前、婚後、有外遇、離婚前同離婚後咁多個階段齊晒。

個婚前故仔印象好深刻，o個個成日變o既女朋友令我即刻就聯想到坐我隔o黎o既愛B… =)


仲有其他情侶關係，包括正常人同殘障人士，仲有以圖同性戀。

Francine: Listen. There are moments when life calls out for a change. A change. It is just like the seasons. Our spring was wonderful. But the summer is over. For a long time. And we missed the autumn. Now suddenly, it is cold, so cold that everything freezes. My heart stopped. Our love fell asleep, it was surprised by the snow. But those who are sleeping in the snow, do not notice death. Keep well.


仲有老豆點樣愛女，幫佢湊BB；呀媽點樣愛仔，掛住死佐o既仔（最感人o既故仔）。


另一幕好感人o既，係呀媽為佐個B o既生活，居然迫住放低個B o係托兒所，之後再轉九百幾次車去到老遠幫有錢人家湊仔賺生活費。仲有奇怪小丑父母點樣帶o黎一個樂觀o既仔。


最無厘頭就係有條傻佬因為(目及)女而畀人打，更無厘頭就係彊屍情侶互咬吸血，勁低能。


最鐘意係Christopher Doyle（杜可風），居然o係一套法國片聽到國語歌，仲要係我最愛o既王菲o既《天空》，噢…太正了！


Hassan: I'd give you my card but I don't have any left. Shame.
Sophie: Too bad!
Hassan: Sophie, fancy a cup of coffee with me? Go on! I could massage your feet?
Sophie: Why would I let you massage my feet?
Hassan: Because they hurt.
Sophie: They do?
Hassan: You spent the whole night running through my dreams.

>>December 12, 2008 at 4:49:51 AM GMT+8

2006 年 12 月 11 日 星期一 【微冷】

今日好勤力，出佐兩張通告，做佐行動組o既總appraisal，又ko佐ad hoc licence review份o野，老趙又o係香港訂到346罐乳膠漆，又同德哥執好佐個一號掣房，非常好！一切都好似好順利咁！

我o既apprasial亦都做佐，但係我冇詳細睇老趙寫佐o的乜，我o地亦都冇乜點正式傾過，因為日常生活中實在太多機會畀我o地互相了解喇。另一方面，其實呢份o野對於升職加人工o既影響亦未必好似人o地諗o既咁重要。點都好，係唱好定唱壞，我又真係唔緊張，世事冇完美，我只係努力做返好自己本分，問心都冇乜愧對公司，亦明白o係呢個region或者o係呢個site裡面亦都冇乜機會升，求奇你好我好，返工開開心心，o的客仔冇投訴，leasing唔詐型，咁就ok啦。求財嗟，又唔係求氣。

心情大好~

>>December 12, 2006 at 4:10:19 AM GMT+8

2006 年 12 月 10 日 星期日 【微冷】

約埋南哥同Kenji一齊12月18號去洗牙，好開心~

約埋一齊去洗o既原因︰
毛︰咁您都知啦，要一齊洗牙，真係要夾過先得o架…
B︰都唔明點解要一齊…開心啲咩？到時咪又係分開一個一間房…同女仔一齊去廁所係咪同一道理呢?
毛︰梗係唔同啦！
B︰咁點解呢？
毛︰我o地計過o架喇！牙醫得一個，如果兩個人去，一個入佐去，另一個o係出面就戇九九，如果三個人去，一個入佐去，另外兩個o係出面都冇咁悶o丫嘛！所以要三個人一齊去就係咁解。
B︰er...
毛︰我o地係咪諗得好周詳呢~
B︰mmm...

>>December 11, 2006 at 12:25:00 AM GMT+8