2006 年 11 月 29 日 星期三 【微冷】

呢個係正o野o黎o架！

http://20061001.1daylove.com


記得o個時我仲早佐成兩個月apply o個個日子，但係結果因為週年記念o個排大家都忙冇乜時間見，又好似有o的鬧交，所以唔記得佐原來自己晨咁早book佐呢個日子，向人示愛…

好在今日個網站又send返個email畀我嗟，如果唔係永世都唔會記得返起…

>>September 10, 2008 at 1:20:20 AM GMT+8

2006 年 11 月 28 日 星期二 【微冷】

食佐餐垃圾同睇佐套垃圾…

見已經有一段時間冇食味千拉麵，今日經過特登入去試o下，點知情況都仲係令人失望，我尤其唔鐘意食味千拉麵o既麵，硬係覺得有好重鹼水味…不過佢個牛油金菇同埋燒帶子就ok o既，o的金菇仲多到好似食極都食唔晒咁，勁好味~

期待佐一段時間，又係由Woody Alan做導演o既Scoop（港譯︰《遇上塔羅牌殺手》），又係Hugh Jackman同Scarlett Johansson o既配搭，真係有o的期待，期待佢o既劇情比Match Point更曲折，比The Prestige更有戲味（不過期實以美國o既上映日期o黎計，Scoop比The Prestige更加早），點知都係通通失望…


仲要講講就係香港o的字幕真係譯得勁差，尤其係「舒琪」譯o個o的字幕，為佐迎合本地人o既口味，譯到o的o野不淪不類，好似「fans」譯做「粉絲」咁，九唔搭八，大陸咩？球員名呀？玩直譯，垃圾到不得了！我覺得中文唔係咁囉…

Woody Alan仲親自做埋戲裡面個老o野，其實演得最好o既係佢，老戲骨即係老戲骨，比男女主角做得更加自然，更容易令人接受。


呢句對白其實都幾灰諧o架︰
Sondra Pransky: Oh, you always see the glass half empty.
Sid Waterman: No, I always see the glass half full. Of poison!

>>September 10, 2008 at 1:18:12 AM GMT+8

2006 年 11 月 27 日 星期一 【陰】

今日上佐去探Vicky，佢早兩日o係醫院唔小心pk，跌穿佐個下巴，縫佐幾針，都唔知醫院o的人點睇住佢o既，咁都得！不過問佢︰「你個下巴做乜事呀？」佢即刻答︰「仆街囉！」然之後o係度笑… @_@ 頂o丫…真係畀佢吹脹…

我問佢︰「你幾時先出院呀？幾時先走呀？」佢一臉無奈咁答︰「我都唔知呀…」

我又問︰「我o地幾時去唱K呀？」佢就答︰「我估唔得喇…」我追問︰「點解唔得呀？」佢就答︰「因為我就o黎要死喇…」 @_@

我畀我新買o個電話佢睇，佢睇完就話︰「嘩！乜你條女咁樣訓o係度o架！」

雖然唔係咁肯啋人（尤其係屋企人），但係我同佢講o野佢有晒反應仲有表情喎！望就望佢快o的好返啦…

>>November 28, 2006 at 3:43:05 AM GMT+8

2006 年 11 月 26 日 星期日 【陰】

星期日返工，靜靜o地做o下自己o野，不過進度都係一般，都仲有幾多outstanding o既o野…呀Man又開始放產假，真係唔知個新丁搞唔搞得掂o的工程o野，諗起就有o的灰，只希望十個星期時間快o的過…好在又冇乜舖要handover嗟…呼…

最近發覺有好多人問我借錢，多到差唔多借佐我一半o既儲蓄，令我開始都有o的擔心。雖則呢班人都係會還錢o個類人，但係以我一向唔追人還錢o既性格，真係好難講得埋幾時先可以收返o的街數，嗯…係咪真係要檢討o下呢？！

朋友有疏財之道嘛，正所謂「江湖救急，銀兩輪流用」，不過我真係唔太識拒絕人喎…點搞好呢？

>>November 28, 2006 at 3:40:47 AM GMT+8

2006 年 11 月 25 日 星期六 【暴雨】

一年一度o既新地商場聖誕新年大抽獎聽日開始喇，今朝成朝都o係度點算o下o的禮品，有差唔多千二份咁多，不過有超過四份一係o的無聊coupons，就係送都唔會要o個隻。仲有紅酒、乾花禮盒、朱古力、洗頭水試用裝、鬚刨同埋一大堆唔知係邊度送出o既贈品匙扣，o的禮品真係超唔掂，頹爆…（年年都係咁，好似屋村商場咁，一o的都唔impressed…）

今晚要開OT呀，因為要去佳翠苑幫手搞業主大會，今次係傾搵邊間contractor換升降機門同埋做之後o既保養合約，其中一個contractor present完後，居然畀o的居民局佢免費裝多十二個panels o係o的lifts裡面，而間o野居然又「口行行」大隻講話送埋（唔o係保養合約內列明o既項目），真係好搞笑，結果又係你嘈我、我嘈你咁，超無聊。

所以話幾時都係做商場好，唔駛對住呢o的咁o既無聊業主。

>>November 26, 2006 at 3:45:32 AM GMT+8

2006 年 11 月 24 日 星期五 【陰】

今日預定放假，目的係同媽媽一齊帶婆婆去換智能身分證。

其實我一個人都得o架喇，但係媽媽都係驚我一個人搞唔掂，咁我唯有做開路先鋒同埋拎o野工人啦…

o係銅鑼灣換身份證度影o既。


媽媽同婆婆的背影。


換完證再去食飯預祝婆婆生日…嗯…辛苦晒喇婆婆，您今日行佐好多路喇…

>>September 10, 2008 at 1:16:15 AM GMT+8

2006 年 11 月 23 日 星期四 【暴雨】

因為去旅行，所以上佐成個月先去睇The Prestige（港譯︰《死亡魔法》），呢套戲真係勁正，比Match Point、The Black Dahlia更有戲味，更懸疑！

套戲o既引言︰
'Every great magic trick consists of three acts. The first act is called "The Pledge"; The magician shows you something ordinary, but of course... it probably isn't. The second act is called "The Turn"; The magician makes his ordinary some thing do something extraordinary. Now if you're looking for the secret... you won't find it, that's why there's a third act called, "The Prestige"; this is the part with the twists and turns, where lives hang in the balance, and you see something shocking you've never seen before.'


講真，真係套戲開始佐我都唔知…比較憎呢o的引言。


Piper Perabo（演Julia Angier，Rupert老婆）唔知佢係乜水，之但係就係呢個女人o既死，帶出兩兄弟反目成仇、互相鬥法。


Christian Bale（演Alfred Borden），就係Batman Begins裡面o既Bruce Wayne，覺得佢個樣有幾分似靚佬湯，尤其係呢套戲裡面有鬚o個個樣。


論計謀同行為表現，Alferd比起Rupent更機智同冷靜，所以抵佢最後勝利。


佢老婆Rebecca Hall（演Sarah Borden）其實都幾靚o架，但係唔知點解無端端Alferd會走去搞另一個女人Scarlett Johansson（演Olivia Wenscombe），劇終前交代原來佢冇不忠，鐘意Scarlett o既人原來係佢個孖生兄弟（真係大飽戲癮！）


Hugh Jackman（演Rupert Angier）個樣好易認嗟，咪係X-men裡面個人狼囉，認得佢對眉同眼！呢條友仔好鬼賤，成日都諗住同佢老婆報仇，結果咪害死佐無限咁多個自己囉…


Rupert Angier: Would I be the man in the box? Or the man in the prestige（聲望）?
Alfred Borden: Does he enjoy taking his bows under the stage?


Scarlett Johansson o既戲越睇越多，不過唔明點解佢次次都要做第三者。
Olivia Wenscombe: No more lies. No more secrets.
Alfred Borden: Secrets are my life.


Michael Caine（演Cutter）就係Batman Begins個管家Alfred Pennyworth。佢係Rupert o既道具師，原來每個魔術師都有一個跟身o既道具師為佢o地精心設計佢o地o既表演工具。
Cutter: Remember when I told you about the drowning sailor?
Rupert Angier: Yes, he said it was like going home.
Cutter: I lied. He said it was agony.


David Bowie（演Nikolas Tesla）係個幕後人，搞soundtracks o既。今次做瘋狂科學家，居然發明到複製機，係真唔係呀？！整體o黎講除佐兩個男主角，一堆配角亦做得唔錯，好在最終都有去睇嗟，愛B眼光一流呀！=D


>>September 10, 2008 at 1:14:16 AM GMT+8

2006 年 11 月 22 日 星期三 【陰】

今日下晝要去開CCC Meeting，但係諗佐幾日都諗唔到有乜site visit o既貨可以交差，結果搞到十二點幾要出去杏花新城睇o下人o地有乜可以抄同埋學，點知冇料到，又時日無多，唯有再搭車入去藍灣半島睇，好彩都畀我搵到o的值得抄o既o野嗟…

結果好順利咁開完個會，鬆一口氣…呼…

放佐工因為o係灣仔散band，所以索性落去百老匯買新電話。自從用佐V3之後，我就開台鐘意佐薄o既摺機，而Dopod出開PDA電話又走佐去出部摺機S300，咁o岩technical I/C馬生又買佐部，上上個禮拜六又過佐o黎話部機幾好又冇hang過機，於是我就決定買第一部smartphone。

走佐上去百老匯二樓o個度，問電話o個邊條友，佢check佐一陣話冇，叫我過去PDA o個邊問，點知PDA o個邊又老點我過返電話o個邊，火火o地，明明個網頁話只有百老匯同數碼通有得賣，唔甘心，走返落地下問，個Senior Sales Felix Fong勁醒，一問就答得出有得賣，仲要返放佐o係二樓！！不過拿部機o既時間就真係耐佐o的，結果等佐成半個鐘先拿到，吹脹。

部電話個樣係笨笨o地，而且亦超過我可以接受o既厚度，不過佢係行Windows Mobile，我就即管試o下o的新事物，因為Palm OS已經末落，再過佐三、五年可能要轉部行Windows o既PDA，試一試呢個OS，睇o下第日值唔值得轉。


>>September 10, 2008 at 1:08:12 AM GMT+8

2006 年 11 月 21 日 星期二 【雨】

行動組o既新制服o黎佐喇，佢o地將會個個變晒做紫色乳牛… @_@ 不過老實講，又冇想像中咁差喎，反而睇落好醒神，好過而家著緊o個套，橙橙啡啡咁冇o黎神氣。

橙皮蕉變紫色乳牛！


放佐工同Kenji出去銅鑼灣宜家買燈佈置廁所，為o既只係交CCC Meeting o既其中一樣功課…買完o野之後去佐打一陣機，點知走o個時先發現自己部電話唔見佐…可能又係好似之前幾部電話o既死因一樣︰跌佐…頂…

不過我又唔係好難過，反而Kenji同愛B好似比我更關心跌佐電話呢件事。可能係因為我都跌電話跌到慣佐，所以冇晒感覺，又或者係因為經歷過馬來西亞九霄驚魂，所以都冇乜o野值得再執著落去，化喇…

再見了，我的V3…


>>September 10, 2008 at 1:14:45 AM GMT+8

2006 年 11 月 20 日 星期一 【晴】

「熱戀男女同居101協議」(2)
《Marie Claire》
2006-09-29 更新

What Man Says:

1.同居是分享，不是分家，在小事上，譬如幾毫子的數，便不要斤斤計較。
2.屋租水電洗衫飲飲食食的洗費，除非事先講明由男人全包，否則人人夾一份，無論大份細份，還是 AA 制，大數目一開始便要清清楚楚，免生爭拗。
3.吵架時不要口口聲聲叫人搬走，後果可能一發不可收拾。
4.另一半去夜街，最好事先知會一聲，免得一時情急，報錯警。
5.帶朋友回家，最好事先知會一聲，讓另一半有時間執好間屋，又或者選擇留低或迴避。
6.每星期，甚至每日都要打電話返自己屋企，每個月最少有幾天返自己屋企食飯，要加倍關心家人。
7.如果另一半是儲物狂，兩人便要坐低慢慢傾，地方是共用的，不能太霸道。
8.如果另一半是購物狂，兩人更加要坐低慢慢傾，如果想換大屋、結婚、組織一個真真正正的家庭，除非你是富家子弟，現在便不能太揮霍。
9.同居不等於無私隱，如非必要，不要替對方拆信，聽電話，覆 email，甚至代對方發言。
10.男性的私隱還包括︰女人不要特登翻箱倒籠去搵男人珍藏的寫真集及 AV。就算「唔覺意」見到，都不要大驚小怪。
11.不要摷女人手袋，更不要摷女人抽屜。
12.人人品味嗜好不同，遇著自己喜歡的東西，亦不要勉強另一半接受。
13.同居意味兩人相處的時候多了，很多懷習慣將會無所遁形︰咬手指、亂發脾氣、大懵失魂、身材走樣……，除了「激勵」對方一改陋習外，更要記住「愛屋及烏」，看開一點。
14.無論兩個人幾夾，taste 都可能會不一樣。同居就是要學習互相遷就共融。
15.無論你有多不願意見家長，都要尊重對方的家人。兩個人同居，預了要見家長。
16.無論發幾大脾氣，都不可以掟東西，小至一個水杯，大至一迎張摺椅暴力，無論大小，都好恐怖。
17.無論發幾大脾氣，都不可以打女人。女人咬男人還可以接受，但最好事後識做，呵番！
18.記得另一半生日，利用屋企地形裝置佈下重重驚喜，精心炮製心形牛扒燭光晚餐，好過花一千大元去高級餐廳。
19.同居切忌習慣成自然，對多幾年，一日悶過一日，愛情好易自然流失。
20.女人對自己身材的變化天生敏感，女性更會當朝見口晚見面的另一半是一面鏡子。作為同居蜜友，有時候要懂得做一塊只會說「你最靚」的魔鏡，讓她在無壓力的情況下客觀地注意自己的體重。
21.性生活不能太頻密，亦不能太疏懶。
22.大男人主義在同居生活不適用，同樣，過份小男人亦會使另一半懷疑自己有沒有揀錯。
23.組織二人「政府」，共同立法執法行政，財政獨立，一個管外交，一個管內政，互相鼓勵，不妨每年發表施政報告，年終同居大事回顧，讓這段同居關係更加充實。
24.吵架的時候，男人盡量保持沉默，待女人冷靜後，才和她講道理。90% 女性都會在冷靜之後承認自己脾氣差。
25.不要令同居變成一潭死水，大家都要有進步，這樣同居才有意義。
26.給大家多一點空間。無論是識朋友的空間，還是儲物的空間。
27.男人不能把同居蜜友當成是妻子，一日未結婚，同居蜜友仍然是同居蜜友。
28.家務不一定要由女人來做，男人亦不應以「這都是家庭主婦的工作」來推卸責任。
29.二人共處一室，有人放屁對方一定知，但是放屁唔一定要認，這樣一個說有一個說無，尷尷尬尬，推說是喵咪口臭，放屁便成為了同居的小情趣。
30.任何一方財政走下坡，大家要互相鼓勵，不要互相抵譭。
31.同居容易有惰性，如「夜晚唔願瞓，朝早唔願起身」。同樣，同居容易激勵對方，如一個早起身，另一個都會唔好意思瞓得太晏。正所謂「近朱者赤、近墨者黑」。
32.間中一齊早起身煮早餐，一早有個好開始。
33.要學識煲湯煮幾味，「煮飯仔」是同居的生活調劑。
34.同居前要想清楚，忌與之前的生活比較。吵架的時候，更不要用「和你同居，我覺得好委屈」做彈藥，對方（尤其是男性）會好 hurt。
35.男人不願受束縛、監視，不宜結婚，更不宜同居。
36.請勿騷擾另一半入睡。如另一半的鼻鼾聲擾人清夢，臨時的解決方法是出廳瞓，長遠計最好還是去看耳鼻喉專科。
37.有心事，不要收收埋埋，朝見口晚見面，大家挑通眼眉一定知，要坦白。
38.偶爾放大家一天假，透透氣。各自去見見自己的朋友，做些讓自己愉快的事，refresh 一下。
39.正在使用的洗手間或浴室，是私人禁地，除非有 pass，否則非請勿進。
40.廁紙用剩一格時，要為對方設想，開定一卷新廁紙下一位用。
41.如果鄰居臭味相投，不妨做個好朋友，多一個照應，就算三缺一，無帶鎖匙，借油借鹽借貓沙都較方便。
42.交租，交水電煤氣費都要準時，免得沖涼沖到一半無水無電。
43.不懂得分享的男人，不宜同居，更不宜戀愛。
44.若有單身異性朋友單獨到訪，切記要事先知會對方，以避免不必要的誤會。
45.為激烈吵架及真的發生火災時做好準備，預備好「求生用品」、計劃好「逃生路線」、不妨有時進行「火警演習」。
46.工具箱、急救箱、日用補給物資要妥善存放，不要亂放，確保大家都知道各種物品的擺放位置，用完要有手尾放回原位。
47.萬一不幸分居，亦要有君子氣量，執好行裝，好來好去。
48.如果大家都想結婚，便要訂下進程表。一旦同居生活成為習慣，便會懶得去計劃將來。
49.對另一半的男性朋友，態度要客觀，要相信能夠成為另一半的朋友，總有他們特別之處。你看不到，只是你對她的朋友未夠瞭解。
50.戒妒忌，男人要有大將之風，小心眼，容易轉牛角尖，疑神疑鬼，只會令本來甜蜜蜜的生活變得又酸又澀。

後記︰第 101式常懷感激之心

感激我們沒有生於戰亂中，感激我們吃得溫飽，感激我們沒有生離死別的悲痛，還有甚麼好得過像現在兩個人在一起，你照顧我，我照顧你？

>>November 23, 2006 at 4:02:19 AM GMT+8