2003 年 7 月 23 日 星期三 【晴】

好野～ 今日係魚魚叫醒我架～ｙeａh！叫我起身睇波 ^^" 都冇乜用心睇．曼聯。
張開眼見到個天咁清就怪自己點解唔早 D 起身 >< 咁好天，去曬太陽丫嘛！
結果上左一陣網，煮左個烏冬，拿拿聲食完就起行去泳池喇～ 玩完先去買書。

自己拎漏野，架車又慢，出到去都過左一點咯～ 好快就搞掂可以出場 =P
好恐怖～ 泳池幾乎係冇人架囉！搞到我都費事落水，響池邊曬住有限既太陽就算。
不過都好開心架！事關我出門個陣就係天黑之時，我同上帝講，俾多兩個鐘頭太陽我啦～
結果，落左廿九層樓出到去就見到好猛太陽 ^^ 我同上帝講左好多句多謝架 =D
雖然都係時晴時陰，不過打住風都有太陽曬已經要感恩啦！曬左一個鐘。掛左三號。
自己知自己事啦！又冇人陪，最唔想兩個救生員望住我一個傻婆響度蛙下蛙下 XD
所以嘛～ 游就只係游左三個字咋 ^^" 跟住開始好大風，又見冇乜太陽就走 lu...

走個陣有個員救生員同我講野喎～「小姐，掛左三號風球喇喎！」「嗯～ 我知呀！」
「妳小心 D 喎～」「嗯！」「拜拜～」「拜拜！」哈哈哈哈．．．

ｙo！又用蜜瓜味喇～ 沖完涼先發現唔見左條橡根，最慘係唔見左個十字架 ><
接到魚魚電話，話我知 3-5 喎 O_o" 我一路都以為係 5-7 囉！你係冇話過俾我知囉～
等我拿拿聲趕住走咁，出到去你又話俾我聽係 5-7 至岩 @@" 你好烏龍呀！
冇啦～ 5-7 肯定橫風橫雨，唔駛去啦！哎～ 都唔知幾時先見到你 lu...

去左大眾搵書俾兩個補習學生，睇左好耐。跟住買左少少野食，再撘巴士返屋企。
響車都感受到出面橫風橫雨～「妳有冇驚呀？」好彩冇行雷閃電咋 ><
返到黎就冇停喇！首先要執番晒 D 游水既野出黎洗，然後執左書櫃其中一個窿 O_o"
多塵到哩～ 搞到我勁打乞嚏。總算執晒勒 ^^" 發掘左 D 以前既作文，睇番覺得幾得意 =)

今晚打八號風球。我覺得呢個風都算溫柔啦，時強時弱，落大雨都唔係落好耐之嘛！
大風 D 我又冇所謂喎～ 熱辣辣先唔好。而家咁都幾舒服丫！雨就唔好落咁多喇 ^^"
希望佢快快打完快快走啦！我星期日要睇利物浦架 @@" 唔可以因為打風落雨而燒焦架 ><

突然響電腦開左「佢」張相黎睇。望左分零鐘，已經諗左好多野～
呢個人，本來願意陪響我身邊，但我當時冇好好珍惜，到我想珍惜個陣已經太遲。過期。
但我相信問題唔係完全來自我丫！我諗都有 D 外來因素掛？！又或者．．．
當時既一切都只係假像，有人要同我開個大玩笑啦！玩玩下又覺得唔好玩掛～

我醒目得黎亦都好蠢，細心得黎又好大頭蝦，自問真係一個好好好好既女朋友。
丫～ 點解我鍾意既都唔鍾意我，鍾意我既最後又要離開我呢？命運吧 ^^"
不過我要重申一點，我從來都冇當過邊個係傻仔，只有人地當我係蠢女人。
誰人待我好、待我差，太清楚～ 只係感覺呢 D 野，唔係完全在我控制範圍以內。

有人話打俾我同我傾下偈。等左幾晚，都等唔到一個電話。或者，對方根本唔需要我。
都岩既 ^^" 我都係無謂高估自己既存在價值．．．都係算吧啦！祝～ 幸福、快樂。

>>July 23, 2003 at 11:41:30 PM GMT+8

2003 年 7 月 22 日 星期二 【雨】

忽爾想起了：《傳聞》
一首我在中學時代頗喜歡的歌。
仍然很喜歡它的歌詞．．．

你回港了　聞說你的風采如昔　你回港了　近日我心似半吊
我忘不了　和你那些精采往昔　也忘不了　誰曾為你哭不少
為什麼願別離　為何抓不緊你　已百多星期　為何尚不懂我應心死

聞說你開心　聞說你歡欣　傳聞人皆稱許身邊的那新戀人
聞說你一心　聞說愛得真　傳聞和他真的天生一對　我替你開心
傳聞中只得我傷心

你回港了　人說我依戀你如昔　你如聽了　但願都只當說笑
我忘不了　和你那些絲絲記憶　卻無需要　前來亂惹起騷擾
獨自走獨自愁　完全不打擾你　過數千星期　頑石亦必可變得心死

其實很好聽～

繼續係唔駛返工都早起身，就係為左去玩 ^^" 到底會唔會玩貓貓呢？
就係為左怕玩貓個陣被 D 貓貓抓爛件衫，淨係衫都換左三四次 XD 好低能～
結果係冇貓玩，玩唱 K。11 點半出到去開著個有陽光既 K 房．．．
同寶肥兩個拆住天等 Desmond。D Lunch 係好難食囉 ><
最開心係《我不難過》唱得幾好，最衰唱錯歌詞 ^^"《哭了》都好 =D

Des 唱完就逃走左，得番我同寶肥煩去邊，最後去左樂富乞衣島。
丫！竟然得咁少泳衣～ 都係西田好。跟住去左食野/ 飲野，再去埋冒險樂園。
買左六合彩呀！頭獎四千萬～ 中左就發咯！下年可以去英國升學。
寶肥又胃痛，陪佢買左胃藥食埋就踢佢去撘地鐵了，自己就撘巴士上竹園。

竟然被我響地鐵站見到個隻林 Bad-bad 既 Cushions，仲要好平好靚 ><

上到爺爺度就即刻整子羌，原來都唔難整喎！不過事實我根本係唔鍾意食薑既 @@"
但我知魚魚鍾意食，我又應承左整俾佢食，咁咪整下囉～ 當學多樣野嘖！
整完就同阿菲傾下偈咁，跟住就入左房發呆。打電話俾魚魚，佢 D 聲氣怪怪咁 =(
呆下呆下就恰眼訓 ^^" 攤低縮埋就恰，恰左半個鐘唔夠就起身食飯喇～
爺爺整左魚頭、通菜同埋西蘭花炒雞球～ 正！食得最多係通菜 =P
食飽就食住哈蜜瓜睇新聞 -- 都唔知幾耐冇試過坐定定睇新聞，仲要睇晒兩個台！
睇完 Hea 左陣就起程返屋企喇～ 好重呀袋野 O_o" 等左好耐車，好彩有位坐。
返到屋企先發現爺爺俾我裝子羌個樽蓋係漏水架囉！好彩個袋冇爛嘖 @@"

開左電視睇 Amazing Race... 終於完左 lu！俾對後生仔女贏左～ 好開心呀佢地 ^^

六合彩開彩～ 激死我啦 O_o" 聽到 2、6、9 已經眼都凸埋出黎，特別號碼仲要係 22！
唉！算。要中既，我買一注都會中。廿蚊嘖，冇所謂啦！當做善事囉～
但中三個半字都有 $160 呀～ 嗚 >< 好彩冇人中頭獎嘖 XD 星期四要加倍努力！

今晚有《E.R.》，Gｏoｄ!！! 星期二 Pearl 好多野睇，遲 D 仲有《24》添～Yeah =D

是日功課：http://www.lfc.org.hk/news/index.php?party=news_detail&nid=983
　　　　　（原文）http://217.204.41.132/cgi/NGoto/34038823?369
　　　　　http://www.lfc.org.hk/news/index.php?party=news_detail&nid=984
　　　　　（原文）http://217.204.41.132/cgi/NGoto/34071212?369
　　　　　http://www.lfc.org.hk/news/index.php?party=news_detail&nid=985
　　　　　（原文）http://www.liverpoolfc.tv/news/drilldown/N141060030722-1339.htm

>>July 24, 2003 at 1:58:05 AM GMT+8

2003 年 7 月 21 日 星期一 【雨】

八點幾鬧鐘響，始終都係要碌到九點先肯起身。諗諗下．．．
要轉車架喎！我預一個鐘可能係有 D 憫架喎 @@"
但都係去左買薯餅同 Qoo，慳家撘巴士，結果咪又係早到十分鐘？！

見番隻豬，見佢好似都幾開心，我個心都欣慰 D ^^" 不過時間就難過左 D。
衰仔竟然又詛咒我 >< 實在係太可惡喇！佢仲話我知屋企買左 TOYOTA 七人車 ＠ｏ＠
跟住同家姐補，D 時間竟然仲易過 =D 不過都係要買 D 書俾佢地兩個架喇～
臨走個陣陳太話細佬豬今次考試英文退步左，仲強調左幾次係「從來未試過咁」既。
嘩！忽然有 D 壓力。我唯有同自己講，佢今次考試唔係我跟架啦 ^^"
我只係跟左佢兩個禮拜，白補完（俾晒 D 錢 Agent）就交低左俾 Gloria...
咁我又唔係話 Gloria 唔得，我又唔知陳太係咪怪佢啦！總之我會盡力做番好 D。
個暑假仲好漫長，細佬豬又唔係蠢，我擺多 D 心機落去應該都冇問題既～

補完習出路口截小巴，唔覺意造成左一宗交通意外：小巴撞車，冇左塊鏡 o_O"
唔關我事架．．．我見車就截咋！我點知佢交更/ 休息唔載客嘖？！
我就更加唔會估到佢會擰轉頭望住我又繼續轉彎，仲要高技術到撞左埋去架嘖？
好彩係小意外，冇左塊鏡咁嘖！如果個司機有咩事我就十萬個過意唔去喇 ><

順利返番落九龍塘，先返 City 找卡數。本來想印埋張 Transcript，不過冇 Folder。
之後上左 Royal 睇下有冇魚魚想買個件白色背心（冇喎！）再行埋 Marathon...
又見到個條褲喇 >< 三百雞啊！買唔買好呢？但我真係想買番條著得舒舒服服既褲 @@"
接到寶肥電話就飛落火車站，由於上左個洗手間既關係 XD 結果都係要佢等我。
坐火車出旺角，打電話去 Neway City，發現收費/ 時段太過份，結果決定唔唱 K lu...
去左 Pizza Hut 食 Lunch，飽到笑～ 凍到喊 O_o" 最後有兩件迷你批要打包 XD

行左好耐新世紀（六樓冒險樂園丫嘛．．．）再行落旺角，走云幾個商場。
行到頭又痛、腳又累，去左仙跡岩飲番杯珍珠奶茶～ *正* 行埋旺中就行晒勒！
送番寶肥去 Pizza Hut -- 由妳自己一個行左返去新世紀就慘咯 XD
花左四個字就係為左去個洗手間 @@" 跟住撘巴士返屋企。魚魚去渣車 lu...
好彩係冷氣巴咋～ 塞車囉！企左起碼八個字，累到死 >< 返到屋企已經八點幾。

今晚除左上網 Hea 同食飯之外，仲多左一樣好有意義既工作喎～

超級開心：http://www.lfc.org.hk/news/index.php?party=news_detail&nid=982 <=== 我譯架～
　　　　　　（原文）http://217.204.41.132/cgi/NGoto/33962764?369
雖然都係被人執左少少野，但都係一 D 我唔熟既內容/ Term，都唔怪得我架 ^^"
呢篇野有至少八成係出自我手筆，講真我已經好開心喇！雖然冇錢收，但好有成功感！
希望以後都有機會客串做下呢 D 野啦～ 當做 Practical 都唔錯喎 =D

同傻左既寶肥講左好多說話 -- 幾乎係教訓左佢一頓呀 .\_/. 又有一個感覺～
唉！唔怪得我 14 歲被人話似 24 歲、17 歲被人話似 27 歲啦！話咁快就 30 歲喇．．．

>>July 24, 2003 at 2:05:26 AM GMT+8

2003 年 7 月 20 日 星期日 【雨】

10 點幾 11 點先後幾個電話響，最灰係有個私人號碼既打黎唔出聲！
十二點醒左，打俾魚魚同佢講話我而家先至起身～ 結果？
嘿！又訓多成個鐘，點幾鐘先起身，對住部電腦食左碗烏冬，兩點先捨得去沖涼。

T1: 一號戒備訊號現正懸掛（「天鵝」呢個名真係好醜怪～）

三點要去到大角咀，我兩點半先出門口囉 O_o" 樓下仲要冇綠的！死死地氣去撘 87K。
蠢晒啦～ 上左車先識得打俾魚魚，早 D 打俾佢，知道佢唔等我既我就撘 85M 轉地鐵算啦 ><
不過有時 D 野又真係話唔埋既 ^^" 結果魚魚都係等埋我～ 呵！佢又係掛住打機啦 XD

今日都唔係影得好架喇！不過叫做好過上次，遲鈍都話我影得幾好 ^^" 但起晒格仔既～

影完就撘地鐵火車巴士返屋企。唔知哪來咁大決心，返屋企換左條跑褲就走落街 @o@
1. 我好似未試過著得咁 Yeah 走落街既～ 真係一件 Tee 加一條好褲既跑褲！
2. 我真係擺低個袋、換過條褲、換過對鞋就出門口喇～ 完全係突如其來既決心。
3. 原來我對舊跑鞋著黎跑步都仲 OK 喎 ^^ 咁我就唔駛將佢塞埋一二邊咁慘。

跑左差不多一個鐘就返黎勒 ^^ 沿住海皮跑，都幾舒服。如果大風 D 就好囉～ 跑到天黑。
返到黎就上網、睇電視（Fｒiｅnｄs！!！）竟然又動手煮送俾自己食 ^^ 好味道。
跟住都係上下網、睇下電視咁 -- 《Independence Day》，而同阿哥講下電話咁，仲有雪糕涼粉！

聽日開始冇工返，但又補番習喇～ 畢架山。好鬼死眼訓啊．．．

>>July 24, 2003 at 1:59:50 AM GMT+8

2003 年 7 月 19 日 星期六 【晴】

九點幾鬧鐘響，十點幾電話響。再訓就訓到十二點幾，起身洗頭、上網。
睇左大半套《九個女仔一隻鬼》，我只能夠講句：陳冠希真係好靚仔（歪咀另計！）
媽媽打番黎話落樓下飲茶，凳都未坐熱就要飛入大埔搵寶肥拎番個電話。

衰妹又聽唔到電話響，十幾個 Missed Call 都夠膽死，枉我行到咁鬼遠搵電話 ><
終於都俾我搵到佢～ 陪佢去左麥記食野。樓面個兩個男仔傻架 @@" 一唱一和咁。
經我唆擺，寶肥決定同我行街 ^^" 行云大埔幾個連接既商場，乜都行得一餐。
發現魚魚買左個件黑色 Nike 原來有白色既 @o@ 又再同我睇中個條褲相遇～ 貴。

丫你尋日撞車，你今日先話我知既 >< ？！

到接到媽咪電話問我返唔返屋企食飯，我就決定同寶肥買送煮飯食勒！
哈哈．．．同佢響吉之島左兜又兜，最後都係落 Superstore 買，然後撘小巴返屋企。
一入屋就直入廚房煮野食喇 ^^ 原來個傻婆唔識用刀仔刨節瓜既 XDDD
咁樣整雞翼我就未試過～ 都唔難整，等得得閒自己試下整先 ^^" 但冇人食囉～

其實我自問自己煮野食都唔差架！係我個樣唔似識煮野食，大家又冇機會試之嘛！

今晚有節瓜湯 + 鹽焗雞翼 + 蕃茄蛋～ 都 OK Balance 又豐富丫 ^^" 真係幾好食。
其實咁樣煮飯都幾開心，洗好多碗我都唔介意架！寶肥肯黎多 D 都唔錯～
難得我媽又好似幾 Happy 咁．．．梗係啦！唔駛做喎～ 不過佢開心唔鬧人就最好啦！
竟然係屋入面四個人一齊聚精會神睇《三更之回家》XDDD 難得～ 真係難得。

送返寶肥去撘車，我返黎對住部電腦又一晚 lu... ^^"
今晚師傅佢地幾個去左釣墨魚，我唔去啦！都水尾咯～ 實釣唔到。
二來 D 人我怕且都唔識啦！細路女，去到戇居居咁，我至怕。

有朋友 ICQ 問起我近來點～ 咪返工放工，下星期開始冇工返囉！
想去街都唔知去邊度、搵邊個陪啦！好哥哥見我唔返工佢就即刻走去返嘛～
想做番多 D 運動減減肥，但真係要搵 D 恆心同毅力出黎至得 .\_/.
不過都會補番習架喇！畢架山。另外就係想練習啦～ 想早 D 開始練番餅同槍。
但我驚我一出現就被人捉去練跑囉～ 我真係想練好 D 自己既項目先呀 =(

感情生活？冇啦！睇黎我都係走唔甩要做老姑婆架喇 *慘*

>>July 27, 2003 at 9:17:15 PM GMT+8

2003 年 7 月 18 日 星期五 【晴】

尋晚又搞呢樣搞個樣啦！夜訓到死～ 今朝又唔願起身喇．．．
最乞人憎仲要係尋日買左 D 禮物全部未包，送俾 Fanny 個 "Mouse Pad" 又未整 ><
拿拿臨整啦！又晏左出門口，趕頭趕命，我真係唔想 Last Day 遲到囉！

結果係 9:00 返到～ 又係冇早餐食 ^^" 算啦！總算趕得切。
首先係幫 Fanny 黐好個 "Mouse Pad"。都 OK Work 喎～ Fanny 好似都幾開心。
跟住就做野啦！可能係 Last Day 既關係，個人反而有 D 懶懶閒。
今日做既野係幫我呢個幾月黎做個 Copy，摷番晒 D Files 出黎 Cop 俾老細。
嘩！搵死我丫又係 @@" 最慘係有 D Adjustment 明明做左，但唔知 Save 左去邊 O_o"
結果我要做過晒個幾個 Adj 囉～ 好彩唔係多，多就慘喇！

Lunch 應 Brenda 邀請一齊食飯。食飯之前我已經送左禮物俾佢地喇 ^^
我見到佢地好似真係好開心，尤其是 Brenda，對個鉛筆刨好似真係愛不釋手咁～ 太好喇！
一行四人去左大魚豐作，等都唔怕啦！多得 Brenda 教我地既古惑嘟卡方法 XD
食左唔係好多野，不過就好飽。Brenda 同 Iris 原來都幾健談，同我地講左好多野。

哎～ 如果我有錢去旅行就好喇！我好想去旅行呀．．．

食完返去就開始派野食，基本上 Hotline 呢邊同我有溝通過既我都請。
但係 Dennis 就冇喎～ 冇啦！佢咁岩出左去食飯。最緊要係我要 Brenda 拎四件！
之後都係做埋 D 濕碎野嘖（真係好濕好碎～）終於都六點要執包伏走 lu...
交番晒 D 野之後同 Brenda 同 Iris 傾左一陣。唔 >< 我真係唔捨得架！

終於都要離開。出左新世紀，就係為左 HOSO 個袋。竟然估唔到咁既價錢！
不過又係淨番最後一個（拿～ 我都話架啦！）左睇右睇，最後都係買左！
跟住睇多一間賣衫既就走勒！約左師傅佢地食大檔排丫嘛 ^^" 原來要行咁遠既。
行到去都成身汗咯 @@" 坐左好耐先叫野食。哦～ 原來係孖生兄弟．．．
七個人就叫左七個送。可能熱啦！五男二女既組合食七個送，竟然都嗌飽 ^^"
食完坐響度吹水，我就不停咁被人寸我「月巴」O_o" 真係咁嚴重咩？唉～

唔係嬲，係唔開心。講幾句咪算囉～ 成晚不停講，仲有自尊既都會覺得 Hurt 架？！

送左寶肥去撘車，就到大家陪我等車。真係冇乜心機～ 唉！
個人完全係頹到心不在焉：有 40X 唔撘，走去撘 85C，擺明就係嫌 40X 快。
上到巴士先醒起個電話響寶肥個袋度！激死～ 煩喇今晚，冇電話用 ><

「唔好唔開心啦！咁我今晚咪打唔到俾你囉？丫！你飛線返屋企咪得囉～」但你冇打黎。

>>July 21, 2003 at 2:27:01 AM GMT+8

2003 年 7 月 17 日 星期四 【晴】

嘩！尋晚發夢夢見魚魚呀～ "3 更驚既係同一個夢入面仲有 Bernard！
Wｏwｗwｏoｗwｏ！完全係有唔願起身既感覺呀 XD 結果咪又遲到囉：9:04a.m.
一晏左就弊勒！又係卅幾四十人排隊等兩架 Lifts 囉 @@" 唔遲就假。

不過我明知橫遲掂遲，仲買左個豬柳蛋漢堡 XD 又擺左支檸檬 Qoo 響冰箱～ 正！

其實尋晚要睇利物浦作客科隆，四點幾先訓呀～ 不過好好睇！成晚出左 21 個球員～
最開心係見到史米沙同懷斯分別射左兩球一球超靚波 ^^ 雖然唔入，但真係好靚。
最唔開心就係到史米沙著 11 唔係咁好睇。我咩都唔望，就係望佢唔好咁快離隊咋 ><

承蒙各位傾力支持，我個谷既排名再創新高：46！升左 9 位呢～

本來諗住今日放工返 City 做占架！不過公司入唔到 e-Portal，Book 唔到 @@"
又唔知做咩扮勤力，自己加班加到六點半。本來諗住去太子都冇去。
放工直接撘 89X 去沙田，眼訓到傻 @@ 搵左 Desmond 陪我睇袋同埋揀禮物俾同事。
咁岩見到靚就想穿番條電話繩，不過我睇中個條帶又賣晒～ 買親野都係咁既 ><
買左個 Pooh 鉛筆刨俾 Brenda、一個大口仔坐檯 Memo 夾俾 Iris，兩個都好得意架！
再響西田買左包日本野食，諗住請 D 同事食啦～ 仲買左包青豆俾自己 =P

跟住一行三人去左好運食麵，仲叫左魚皮同蠔餅 ^^ 都幾好食啊！
寶肥冇再唔開心就好勒～ 大排檔就留番聽晚至食啦！

>>July 20, 2003 at 1:43:10 AM GMT+8

2003 年 7 月 16 日 星期三 【晴】

今日遲到三分鐘 O_o" 早餐都唔得閒買。
"7000+ 中搵 2000+" 既工作基本上己經完成，最緊張既時刻就梗係對數既時間啦～
Sum 一 Sum 個 Total 睇下做左 Adjustment 之後岩唔岩數，結果．．．

竟然係爭 $2.65！我想死～
為左呢 $2.65，我需要印 51 頁紙，由第一個 Adjustment 開始由頭對一次 ><
更慘既係我對完第一次，搵到既只係 $0.1 既 Error，仲係爭 $2.75！
最後結果係我再對多兩次都仲係搵唔到，放棄了！我要食飯～ 又去食 Tea。
俾左同事乙幫我對。我同 Brenda 都認為一個人對住同一堆數對十次都係冇用既～
事實證明個 $2.75 係真係唔知去左邊，話唔定真係份 Adjustment 有問題。
事但啦～ Brenda 話：斷估個客唔會七千幾個數逐個篤機計掛 XD

今日真係多事幹～ 先後傳出兩個司長辭職既消息。
坦白講，其實我對政治唔係十分關心，不過我覺得 D 政客好多時都身不由己。
至於你話係咪要響蘭桂芳攬住兩個靚女，又或者對住 D 人歪口歪面呢？
呢 D 野就絕對可以控制到既！希望佢兩個走左，唔會係 D 更衰既人上位啦！

早走去左大角咀。今日 D 波係好快囉！大家又踢得好兇狠，魚魚仲跌親，擦損晒 ><
重點係我覺得自己影得唔好囉～ 有 D 唔開心添！完左同魚魚、Gary、Ken 去左茶軒飲野。
睇到對面 HOSO Place 有個白色袋好似幾靚～ 不過走個陣唔記得左入去睇 ^^"
夜晚返到屋企又同阿媽嘈。唉！都唔係咩嘈既，駁左兩句我已經冇興趣同佢講落去。
天氣熱，唔想食飯嘖～ 我都烚左隻蛋、滾番熱 D 熱黎飲丫！但原來咁都叫懶。

既有心亦無意地扭左隻手好多下，結果係痛。嘿～ 醫生話我冇事架嘛！
我諗我隻手（其實係對～）都係咁先架喇！應該唔可以完全康復 =(
可能真係打排球累事啦！右手跌過，左手 chok 過，兩隻手都．．．唉～
其實我都真係幾多損傷架喎 @@" 右半身基本上由頸到腳都傷云晒。
右：頸、膊頭、背脊、手指、手腕、腰、盆骨、膝頭、腳；
中間：尾龍骨；左：手腕、腰、腳趾！心口痛係大敵 =(
咁我當然知道大把運動員多損傷過我～ 不過人地受傷得黎有成績，我呢？

最恐怖都莫過於屋企唔知邊度有個隱形既兇器，次次都響我沖涼之前界損我隻腳既。
今晚又黎喇～ 同上次一樣，沖緊涼先發現。痛到我丫 >< 今次仲流勁多血添！
重點在於個傷口好細，唔知哪來咁多血可以流咁耐。我既 Blood clotting 有問題囉～

>>July 20, 2003 at 1:46:51 AM GMT+8

2003 年 7 月 15 日 星期二 【晴】

今日早餐食麥當奴～ 好耐冇成個餐咁食喇！飽到呢．．．
咁開心都係因為今日終於唔駛聽 Calls，可以做番 Brenda D 野 =) 開心得多～
不過 Lunch 完諗住食個雪糕，點知～ 唉！以後都唔響 OK 買 Dreyers。

頸痛添！都唔知係咪訓ｘ頸～ 尋日已經覺得痛架喇！今日更見明顯 ><

終於可以逃離 Hotline 既魔爪，我可以笑住、輕輕鬆鬆咁做野喇～ Yeah！
不過響七千幾入面搵二千幾出黎都唔野少 @@" 睇到眼花。不停地恰眼訓 ^^"
我 18 號 Last day 喇～ 又係 18。丫我同 18 呢個數字都幾有緣 ^^"
都唔知係開心定唔開心。唔 extend 都好既～ 要放下假喇！

今日最神奇事件係公司黎左個神秘師奶，都唔知咩人黎既～
企響 Hotline 房門口喎！亦即係本層出入口（已進入 Office 範圍），唔知佢等人定點。
根本就係一個師奶，不過就電鬈左頭髮，仲要係金色兼 High-light @@"
身穿粉紅色衫 + 四個骨褲 + 黑色襪，作為一個師奶，佢都算十分騎呢囉！
騎呢都唔緊要喎，都唔知佢講電話做乜要講得咁大聲 o_O"
拎住本類似 Schedule 既東西響度左揭右揭，袋同筆袋就攤晒響地下。
講電話講咩呢？不停咁鬧話咩呢個價做乜同佢賣，蝕左好多呀乜乜物物～
．．．妳有錢買 Stock 嘖，都唔好響度嘈丫！公司黎架！！！
嘈唔緊要喎！妳嘈住我做野就唔得囉～ 仲要咁岩係我對緊數既時候 ><
我戴住 Hand-free 聽森美小儀（呵！）都聽到咁多野，可想而知妳係幾大聲囉！
蝕左六十幾萬喇下嘛～ 好巴閉啦下嘛？！妳唔企響地下電梯大堂講？

放工同阿 Des 去旺角睇太陽眼鏡，唔太高興地買左副。衰 Sales！臭 Sales！哼～
之前去左新世界傳動網既門市問野～ 日日響 Mobility 個 Office 隔離出出入入都唔問 XD
重點都唔係呢 D，個店員長氣個乜不特止，我走個陣佢要同我握手先嚇得我死 @@"
跟住逛左一陣，再去埋菓留香食左個甜品就返屋企。響火車站撞到狒鵬。

返黎見到有百幾個 Unread，真係好開心 ^^ 如果個谷成日都咁熱鬧就好喇！
我個 Newsgroup 多少已經成為大家響 Office 做做下野悶悶地黎吹下水既地方。
如果 Keep 住係咁就好勒～ 識到呢班朋友都唔錯，真係多得師傅唔少 =)

權威睇完我尋日影個 D 相，話其中一張相既構圖一流呀 ^^ 我要繼續努力～

不過響屋企就唔多開心：媽媽又玩搵野黎鬧。妳真係唔怪得我唔黐家架喎！
最估唔到係連魚魚都叫我好好準備同妳吵一次勁既 @@" 唉！我真係唔想同妳嘈。
但當我一諗到下星期可以陽光海灘，我既心情就豁然開朗勒～ XD

>>July 19, 2003 at 11:52:49 PM GMT+8

2003 年 7 月 14 日 星期一 【晴】

都唔係唔知醒架～ 不過手腳慢，結果又係趕頭趕命。冇遲到囉 ^^"
九點鐘坐響個位度已經拿拿聲拎晒 D 野出黎做，但結果都係逃唔過厄運～
當 Nora 走過黎企響我個位前面，我已經知道自己難逃劫數喇 ><

幸好只係聽一個早上；幸好今日 D 客唔係太癲；幸好我仲應付得黎。
明明話我食一點架！無啦啦又要人地食一點半丫 >< 林韋辰你係太可惡喇！
「好彩」我咁岩約左個遲到既寶肥嘖？如果寶肥早到就唔係咁好啦～
都唔緊要喎～ 我食完返黎執野返埋自己位，你竟然懶驚訝咁問我做乜執野？
明明係話幫你聽一個早上架嘛！冇架喎～ 我係完全表現晒我 D 不滿同唔願意出黎囉！
我最唔妥有人即時打電話俾 Brenda，講唔掂又即刻打俾 Elaine（HR）囉～ 算點先？
死 lur 都冇用架喎！我幫你三日，仁至義盡啦！淨係你地 Hotline D 野 Ur 咩？！

結果係 Brenda 企硬，大老細又上左大陸，Elaine 唯有又拉個 Temp 過黎做替死鬼 @@"
嘿～ 我都凳呢個 Temp 慘，因為佢 mon. 左一個鐘都冇，仲要返工以黎連 Edge 都冇掂過！
我都好佩服佢總算淡淡定 -- 除左唔識答會蠢到走幾個位黎問我（我？！）之外 ^^"

但我同 Harris 真係同 Brenda 講：如果仲要我地聽 Hotline，唔好話 extend，聽日已經唔做了。
當然～ 我絕對唔想一走了之，留低晒 D 爛攤子俾 Brenda 自己一個好慘咁埋尾啦！
問題係佢再要我地咁樣聽電話都唔係辦法，好似 Carol 話齋，一個循環嘖～ 仲多左野做。
Brenda 都好明白，佢都唔會再俾 HR 拉我地去聽電話了。不過同時間我地都唔駛旨意 extend --
Extend = 要聽電話。換句話說，我淨番四日時間幫 Brenda 做好晒手頭上既野 ^^"

做就實做得晒既～ 不過我真係有 D 唔捨得 ^^" 好難得遇著 Brenda 同 Iris 咁好既上司。

放工撘 89X 去沙田，沿路影左幾張相～ 好耐冇周街影相喇 ^^" 今日個天都幾靚。
即係咁～ 其實係約左阿哥唱 K，不過有人遲到囉！搞到我要等囉～ 都好既，影下相。
跟住就兩個人去左大迴音，收費一般合理啦 ^^" 兩個人唱四個鐘都好夠咯 =D
不過大迴音真係冇咩新歌可言。等我下個禮拜開始唔駛返工就可以去唱 Lunch K 喇～
今晚都開心既，唱 K 可以係一種發洩嘛 XD 阿哥又唱得咁好聽呢？！多謝哥哥。

唱到十一點半就埋單走喇～ 撘 86C 返屋企。又落錯車 ^^"（鄭秀文？！）

>>July 17, 2003 at 1:42:48 AM GMT+8