2003 年 10 月 29 日 星期三 【炎熱】

週三．補習日。朝早起身 "lea 咁 hea"，又執唔切野，被逼補完第一個又返番黎。
買左粥。爹爹醒左，同我討論我飲食既問題。唔係我咩都唔食呀！係我咩都唔食得。
都叻架喇！早左出門口，總算可以返去搵阿媽食 Lunch。我驚佢等我嘛 ^^"

其實都飽架喇～ 但都聽阿媽話，買左個沙律食。哦？原來都有我唔識既 Miss 識我架！

都唔知做乜咁眼訓既，聽人讀英文都聽恰眼訓，都幾唔好意思。好彩冇出醜 @@"
上車食埋半個沙律 ^^" 去沙田找埋條卡數。跟住就撘火車，過九龍塘補習。
丫！落到月台先接到電話話補晏 D，於是我就遊火車河，由沙田撘到紅磡再返沙田。
最後都係由沙田去九龍塘。係好無聊架～ 但訓下都好丫，一唔係就玩 Diamond ^^"

頭半堂都仲係好眼訓，後半段好 D。今日出糧，條數有出入，佢計少左時我又計多左。
本來（如果真係冇計錯）佢應該俾多一百九十蚊我，點知佢一俾就俾三張紅衫魚！
我話找番俾佢，佢又猛話唔駛，話我平時成日遲走。開心都開心既，但都會有 D 唔好意思。
難得人地對我咁好，我真係要俾 D 心機。又拿拿聲返馬鞍山補埋跟住個兩個。連續兩個。
點知其中一個出糧俾我，又齊頭俾多廿蚊，又係唔駛我找 @@" 今日似乎有 D 財神呀～
沿途見到有議員響度拉票；咳！我都唔係呢個選區既，唔好煩我。見到劉ｘ華就唔開胃。

返到黎計下數，今個月岩岩搵到四千大元，又冇乜卡數要找，實在係唔錯既成績 ^^
我要努力儲錢讀書嘛！辛苦少少都值既。都響度諗，自己有冇能力個個月俾 D 錢屋企。

計劃錄音功課 D 野。有 D 不滿有人大安旨意我搞掂晒 D 野咁囉：「搞成點？你搵左人未？」
點解唔可以係你講俾我聽你搞成點，咁你又搵左人未呢？「等我問下先！」好野～ 而家先問。
都冇乜建樹，劃花左個額頭囉 ^^" 功課又冇做過，電視又冇乜點睇，但都成三點幾先訓。

哈！睇網頁發現三文魚所含既膽固醇係「好膽固醇」，有助消除「壞膽固醇」架～ YEAH！

>>October 31, 2003 at 12:02:49 PM GMT+8

2003 年 10 月 28 日 星期二 【炎熱】

今日朝早補完習，撘巴士慢慢搖出去佐敦拎報告，之前仲食左個豐富早餐 o^^o
結局出人意表：我膽固醇偏高。難以致信。我有運動架喎，又唔係食得好肥膩嘖！

Below 5.2 = Normal
5.2-6.2 = Borderline
Above 6.2 = Danger

最慘我唔係僅僅高少少．．．我已經去到 5.9 喇 >< 點解會咁架～ 好難相信。
離開化驗所個陣，個人渾渾噩噩咁，我諗同 D 人得悉自己患左絕症不徨多讓 @@"
雖然並唔係咩絕症，但我而家先廿歲咋！咁後生就咁，幾時得黎戒口戒到老？
睇住張飲食 Guideline，好似乜都唔食得咁，唔係食得蛋黃、牛油，唔飲得全脂奶先慘。
我都算係鍾意食野既人，咁後生就要忍呢樣、忍個樣，點忍喎 >< 咦也，我唔制呀！

嘿～ 真係諷刺。唔知下次再響澳洲牛奶公司食野要係幾耐之後既事喇．．．

Send 左 SMS 俾好多人，再打俾魚魚。佢聽到都「下？」一聲。真係唔係咁易相信。
好彩佢都算關心我，問左好多野，又話幫我問下媽媽有咩野食或者湯水岩我飲。
跟住仲同我傾左好耐電話，陪到我返 City，又同我研究佢個 D 甚麼極速瘦身餐單 ^^"

個個都話我咁後生，唔駛睇到咁灰，唔駛特別戒口。計我話，我寧願乖乖地戒幾個月勒！
戒幾個月之後後再 Check，如果 Cholesterol Level 低番 D，到時先慢慢食番 D 野都唔遲。
我唔想一個唔覺意過埋 Borderline。如果搞到要睇醫生同食藥，咁就真係一世架喇～
我都知自己後生，但我夠估都夠唔到自己 5.9 啦！原來爸媽都係偏高，咁可能係遺傳。

響 Marathon 買左個水壺俾自己，算係 tum 下自己開心。返到去都冇乜心機上堂。

今日冇買排包，因為成份有牛油同蛋。買左兩蚊蕉 ^^" 好早就過左 JSC 坐響觀眾席食蕉。
食完就換衫 Jog 圈。跑得快，所以只係跑左三個，跟住就拉筋。Gloria 都好早到，有偈傾 =)
最好係有佢幫我捽背脊；最唔高興就係戴太一黎就話我。我五點半已經開始練囉唔該！

隊長黎到同我講揮手講 Hello，奇奇怪怪咁 O_o" 做左十零下動作就拎餅過去練勒！
開頭都幾好既，一多人一嘈呢，我集中唔到又越掟越衰勒 @@ 立定、轉身都咁核突。
都唔想勉強自己太多，我想每次練習都做到比賽既心情，每次練習都唔俾自己做太多擲。
做夠就去跑。菜菜終於有黎喇～ 終於有人陪。衝左 6 x 30m，好過上次啦，冇咁求其 ^^"
拎槍練槍。我諗我響田徑隊度淨係同 Cori、謝立同 Ryan 有幾句架咋！仲有 Vincent，冇喇～
我諗 Ryan 都係好人黎既～ Heehee ^^ 最好係肯教我（唔學似 D 張ｘｘ人咁自大！）
佢出槍個陣猛到個口咁大，有烏蠅飛入去就弊傢伙喇～ 點知佢跑跑下笑到停唔到 @@"

阿毛話我有進步喎 ^^ 我要繼續努力。都係鍾意得番我一個女仔練既時間，認真 D、靜 D。
其實我練習可以好認真，完全唔講無謂野架！響 MCS 個陣，Miss Sit 對我就最放心勒～

練到俾人趕先肯收檔 ^^" 涼都冇沖，著番件褸就走。好肚餓囉～ 好彩仲有半樽葡萄靈橙 ^^
返到屋企想做野架！不過坐左一陣已經夠鐘睇《 E.R. 》，睇埋都冇精神做野咯！訓 lu...

>>October 31, 2003 at 5:17:39 PM GMT+8

2003 年 10 月 27 日 星期一 【炎熱】

今朝上少兩堂 Lecture，不過都要返去補番堂。傻婆 Jessie 唔知唔駛上，返左去吽。
本來諗住中間個兩個鐘出去拎報告，但化驗所打黎話醫生有事，叫我改聽日喎～ 改囉！
不過都照同 Jessie 出去食澳洲牛奶公司 ^^" 傾下偈咁。食完就返 City 坐梳化睇雜誌。

又 Hea 左堂 Discourse。全日唯一聽得入耳既就係 Tutorial 有咩要做，其他完全聽唔到 XD
最有建設性咪去左影左 D ppt 囉！跟住上番 Canteen 搵 Jessie 同 Phillis 去行 Mega Sales。
見到條幾靚既電話繩，但我冇理由捨棄我而家呢條嘖～ 同埋我覺得 $80 條電話繩係好貴囉！
跟住再去楊仲儀問一問驗血既收費就返屋企勒！返到黎都係 Hea。Connect 唔到 ICQ？！
Connect 極都唔得，花左兩個幾鐘做 DB Reindex 都唔得 >< 阿哥個 a/c 又即刻 Connect 到喎～
同一部機、同一個 ICQ Programme 嘖！唔係我個 DB 有事嘛？唔好嚇我。入面好多野架 ><
裝埋 ICQ pro2003a 都仲係唔得，結果憫住咁用 icq2go，搞到半夜先終於 Connect 得番。

我討厭煙花；討厭中大；討厭排頭村。對唔住。但我就係覺得佢地好討厭。好討厭。

>>October 31, 2003 at 12:21:42 PM GMT+8

2003 年 10 月 26 日 星期日 【炎熱】

五點鐘就醒左。右小腿抽筋。唉！唯有敷冰啦？左腳都想抽想抽咁，敷埋囉～
條頸又唔知幾時拉親下喎，又敷埋囉！六點幾都未有得訓，叫醒寶肥同魚魚都仲得 @@"
六點幾先訓番，七點幾寶肥打黎叫醒我，不過我又訓番 ^^" 好彩仲有魚魚又打黎。

等車個陣接到哥哥電話。由馬鞍山傾到出九龍塘 ^^" 哥哥，你好自為之啦！

九點鐘去到 JSC，換左衫就過去睇男仔掟槍，Warm up 左心情先 Warm up 個人。
心情都唔算十分緊張啦！不過都係懶，圈又冇跑、筋又冇拉；除左隻腳。抽筋嘛 ^^"
得八個人玩槍，Straight Final。又幾好喎！表現好過平時練習喎 ^^ 可能係因為冇咁累。
上身動作我覺得 OK 喎～ 鎖住唔俾自己用腰力都有 D 成績；心情亦都唔算緊張。
頭五擲都冇 Foul 喎，仲越掟越遠添！不過最尾一擲就 Foul 左 -- 俾徑賽槍聲影響到。

其實我以為自己第四架囉：都有少少失望架！但練左兩課就有 D 成績，已經好安慰 ^^"
知道第三就梗係開心啦！想玩大專賽？我諗我真係要努力 D 學、努力 D 練習喇！

跟住掟餅，心情難免會有 D 緊張，但都比我上年任何一次比賽好。不過．．．
都係發揮唔到。唯一值得高興既係六擲都冇 Foul 囉！包括轉身。轉得好核突呀 ><
其實都有 D 覺得自己兩頭唔到岸。初初就立定好，跟住就轉身好過立定 @@
到入左 City，執番好立定，又好似唔識轉身咁。戴太既做法真係「影響」左我好多。
結果？核核突突咁比完個賽囉！第三，不過成績就強差人意啦！咁樣點爭玩大專賽呀？

比完賽就即刻沖涼洗頭，好乾淨 ^^ 跟住上去搵隊長同寶肥，坐下 Hea 下咁。
佢地要做野，我就做孤兒喇！拉 Cori 陪我出去買野食，估唔到百佳會晏晝閂門架囉！
冇野食，又悶，好慘咁。起碼都要等佢頒埋個牌俾我先走得。等左好耐．．．
拎完個牌又要等埋隊長先走，悶到人都癲。好彩有寶肥同 Cori 先後陪下我咋！
魚魚又話唔去踢波勒，搞到我下晝冇節目啦～ 又唔想咁早返屋企悶嘛 @@
孤伶伶咁睇 Relay。最開心既一刻都莫過於有人扮鬼臉喇 ^^" 仲有飯盒食 *感動*

散場．走人。返到大圍就自己行去撘車。丫，返到屋企又唔眼訓喎！上網。
收到條 93 年九鐵廣告既 URL，睇番，數下 @@" 真係有 D 心寒。當年都唔覺既。
夜晚魚魚又話去踢波．．．晏晝又話累，而家又話踢。哼！我留守家中。

>>October 31, 2003 at 11:39:14 AM GMT+8

2003 年 10 月 25 日 星期六 【炎熱】

尋晚訓左唔夠八個鐘，算多咯！但對一個通左頂既人黎講又唔係咁多嘖 ^^"
不過好似幾精神喎！今日做補習天王，日補五份習。仲要冇預時間食飯架喎！
都幾辛苦：沙田．沙田．馬鞍山．九龍塘．樂富。淨係車錢都唔少。

本來 Lunch 食芝士漢堡既，要等嘛，要左孖芝。點知要等車．．．早知等啦 O_o"
呵！有七人車撘 ^^ 佢地兜埋我。仲有粟米食添 ^^ 逐粒搣。補耐少少又有乜計丫！
心情好，撘的士過樂富。今日全日都好精神，係補表弟仔最勞氣。唔專心 ><

又係「去唔去？」呢個問題。又係排頭村。都係怕見到唔想見既人喎！唔去。
決定同阿姨佢地食飯。落左樓接到電話。守龍？唔。猶豫左一下，不過都係唔去。
應承左同阿姨食飯丫嘛！同埋真係好怕好怕見到 D 我唔想見既人囉！免得就免。

又坐七人車 ^^ 全程不停打電話約補習。真辛苦。去左紅磡食泰豐 =) 泰國菜。
有我最愛既豬頸肉，仲有咖哩炒蟹！個汁好好味，不過食得好麻煩囉！少食少食。
跟住自己撘火車返屋企。又諗左好耐，去唔去搵佢好呢？都散啦～ 唔去喇！
結果夜晚通電話知道佢都好夜先走，仲守足全場添！不過我冇後悔架～
好多跌跌撞撞．．．「妳睇到一定好痛嘖！」咁你又講得岩。我聽到都痛。
未講到內容就有電話入，轉頭打俾我喎！一轉就轉左兩個半鐘，影都冇埋 @@

等。無無聊聊睇左個幾鐘《Meet Joe Black》。冇心機睇個結局 ^^" 因為冇睇個開頭。
Brad Pitt 唔懶型個陣反而幾靚仔，把聲仲幾好聽。唉！兩點喇～ 聽日比賽。訓了。

>>October 31, 2003 at 11:34:25 AM GMT+8

2003 年 10 月 24 日 星期五 【炎熱】

通左頂。唉！又係一個禮拜通兩晚頂。仲要懶精神咁出去補習，補到聲到變埋 O_o"
補完習返到黎，響樓下撞到個自修室既朋友。我唔記得佢叫咩名喇，不過大家都認得對方。
「咦？差 D 唔認得妳喎～ 妳靚左咁多既？」我心諗：咁我以前一定好醜樣喇．．．^^"

中午先至沖涼洗頭 ^^" 然後繼續努力。到 Mr. Physiotherapist 黎就整腰勒！
我背脊個兩條 Muscles，好明顯右邊係硬過左邊好多。點算好呢．．．
整完腰繼續做功課，終於四點就搞掂勒！絕對係激戰十五小時 @@"
扣番 D 恰眼訓呀、食野、補習同沖涼時間，份功課花左我起碼十一個鐘。

訓左兩個鐘。起身上左陣網就換衫。出唔出去好呢？一直等電話。

「妳要特登出黎喎！我又冇帶機，其實妳都可以唔出黎既。妳想呢？
　如果妳想出黎，我都會想妳出黎架！妳睇下點啦？妳想黎就黎啦！」

諗左好耐。衫都換埋，話唔想出就好明顯係自己呃自己啦！去左聯合道。
咦？！我認得公園個水池囉！我細個個陣好似成日黎架，有相為證 ^^
雖然我唔識其他人，又大部份時間都一個人坐開睇，但今晚我都睇得幾開心。
你好耐都冇踢踢下波對我做 D 趣怪既表情；你好耐都冇踢踢下望住我笑了。
今晚我見番晒 ^^ 雖然只係訓左兩個鐘，仲要特登出黎，但我都好開心。

終於識笑番。好似搵番一年前睇波個種輕鬆、自在既感覺。其實，就係咁簡單。

今日既矛盾，矛盾得有 D 過份，到我幾乎要問自己：妳知唔知自己做緊乜？
我知，我知架！我真係知。問題係，我可能唔太肯定條底線 Set 到去邊。
我知道自己一次又一次咁將條底線褪後，雖然暫時都未有咩大問題出現 @@"
但我真係好矛盾。1 號話咁樣唔多好；2 號覺得進退兩難；3 號話唔好諗咁多。

或者，我真係唔怕承受相當既心理壓力。我要既係開心。我想自己開心。

>>October 31, 2003 at 11:42:00 AM GMT+8

2003 年 10 月 23 日 星期四 【炎熱】

今日唔駛上頭兩堂，又冇乜特別野做，feel so FREE... Yeah!!! =)
不過開心得滯，唔捨得出門口，搞到上 Enrichment 遲到 ^^"
呵！Duncan 似乎認得我喎～ 翕得出我個名。弊！認得我遲到 XD

派左功課。做得咁辛苦先拎得 16/20，著實係有少少咁多多失望。
最開心係 Comment 寫我有個 Good Introduction，不過真係有頭威冇尾震 ^^"
佢唔同意我個 Conclusion 囉．．．算啦！我總算盡左力。千七字喎～

落堂去左睇醫生。傷風喎！拎左傷風藥 + 咳水 + 鼻敏感藥 + 敏感藥膏。
同 Jessie + Sandy 去 City Top 食Tea Buffet。我上次見好多野食架！今次冇乜。
食飽就去做 Interp Test，死得都幾慘。準備個陣明明覺得掂架．．．
次次都係咁，做乜都係咁，都唔知咁緊張做乜，又冇獎既 O_o" 要改喇 ><

夜晚冇咩做過，掛住睇電視，做唔到野 ^^" 今個禮拜都唔好睇既。

>>October 31, 2003 at 11:33:28 AM GMT+8

2003 年 10 月 22 日 星期三 【微冷】

星期三係補習日。朝早補完，返屋企「得」左一陣又返恆商聽英文，跟住又出九龍塘。
好累呢～ 補完又返馬鞍山補多個（好彩係優差嘖！）跟住就係今日既唯一娛樂：《無間道 II》
呵！我都真係等得耐喇 ^^" 應該擺多兩個禮拜就差唔多落畫。全場得廿個人唔夠之嘛！

比我想像中好睇。可能因為自己冇好專心咁睇第一集，所以亦唔會對呢套有咩大期望。
冇咩特別值得深思既地方，不過有兩幕黎得幾震憾，就係陸 Sir 同 Mary 姐死個兩幕。我呆左。
另外，我發現我最鍾意既影帝應該係吳鎮宇，佢真係好型。阿 Yu 扮 Sammi 都算有幾分似。

魚魚傻架．．．由開場到完場一齊撘車，不停扮鬼/ 扮驚嚇我 O_o" 搞到我真係有 D 慄～

講番響馬鞍山補習，笑鬼死。我呢個學生真係好搞鬼，佢成日讀錯 D 字，鬧出好多笑話 XD
今日再問佢一次：「一個月有幾多日？」「32！」XDDDDD 我信佢係真係唔知架囉～
跟住呢，又無啦啦問我怕唔怕鬼喎！落堂又問我去唔去廁所喎～ 原來個傻仔裝左「機關」！
就係將佢將個面具（"Scream" 系列個款）擺左響熄左燈閂左門既廁所地下！想嚇我？嘿～
咁我當然冇俾佢嚇到啦～ 個面具撻左響地下咁，有咩好驚嘖？！不過就笑死左．．．

輕撫我的臉？Heehee ^^" 唉也！塊面仲係鞋烚烚呀 >< 個鼻又仲係有好強勁既血絲喎 @@"
右腳拗柴個個位冇咁痛喇，可能敷冰敷得好；不過左膝頭又發神經個下弊呢～ 可惡呀！

睇完戲聽番留言，原來 Bernard 打過俾我。突然間，我知道原來佢對我仲係好重要。好重要。

>>October 23, 2003 at 11:15:08 PM GMT+8

2003 年 10 月 21 日 星期二 【微冷】

又係「好彩」知醒。補完習返黎冇咩特別野做，又唔想做普通話功課 ^^" 錄歌囉？！
好晏先出門口 ^^" 沿途仲掛住打機。普通話堂派測驗卷。唉！一入 Lab 就俾人鬧喇．．．
雖然我拎到盡都係 70，不過唔小心審題都唔係一個好既習慣，下次小心 D 係啦～ @@"

Discourse 繼續頹 O_o" 不過一上完就去佐敦嘆美食～ Yeah！雖然又係一個人食野。
食完返番九龍塘再行過 JSC。仲係日光日白，感覺上唔想練住，玩陣 Lemonade 先啦 ^^"
發生左 D 無奈既事。換完衫出黎 Jog，由「一般慢」至「唔太慢」跑左五個圈 XD
拉完筋就過去做動作。原來個邊條直線可以轉到 15 個左右。200m？講笑好，累死都似。
但今日做乜都做得唔好，諗住立定唔好就轉下身啦，點知又係死。唔係 Foul 就係發唔到力。
大家嘻嘻哈哈咁，我已經好努力要自己集中架喇！但都係做得唔好。唉～ 好沮喪囉 =(
「柄埋」一輪之後再做番，仍然係自己令自己失望。我仲未克服到對比賽既恐懼。

個 Camp 似乎唔去唔得，但我真係唔想去喎！我同田徑隊．．．唉！ D 補習又點算呢？

阿 mo（師傅？Hee！）黎左我就可以練標槍勒！今日學交叉步，其實都係係咁以行幾步。
我已經好努力．好努力．好努力學架喇 .\_/. 不過個 Body 對個動作既 Coordination 做得唔好。
我玩餅既席位已經危危扶架喇！如果我再練唔好槍，我真係咩都唔駛玩。我要努力！
但我背脊/ 腰又唔掂，今日隻右腳又痛番，都唔知星期日點比賽。之後練落去又唔知點。

人既態度真係可以轉變得好快。無奈。如果成日都係維持係善解人意既境界就好 lu...
短短既五分鐘，簡單既幾句，其實我已經好開心；誰不知十數分鐘後，你又係另一個樣。

又練到俾戴太趕 ^^" 極速沖完涼就走勒！上車食埋個排包，返屋企淥左幾條菜食。
接到 Alva 既長途電話。嗚．．．妳快 D 返黎啦～ 講完電話食埋野就聽住歌上網無聊。
跟住一邊睇《E.R.》一邊敷冰（腳），跟住 "re-Record" + Edit + Upload 再狂聽 XD
幫魚魚搵網頁已經係全晚最有意義既事。其實我今晚冇咩做架！有都做唔到啦 *累*

另：今日「係咁以」流過鼻血黎，事實其實係我兩邊鼻鼻都損晒，有血絲．．．

>>October 22, 2003 at 11:11:16 AM GMT+8

2003 年 10 月 20 日 星期一 【陰晴不定】

又通頂。三點幾恰著左一陣，醒番又繼續。都唔算好累，只係 Function 唔到。
同埋篇野真係好難譯，完全唔知做乜咁。終於天光先做完，但都唔係做得好囉！
六點半先搞掂晒，七點鐘先訓。九點幾責醒左 ^^" 再訓就冇早餐食架喇～

特登早 D 出門口落樓下食粥，因為今日要做 Body Check，Check 之前六個鐘唔准食野。

食飽咪返學囉！拎住支屈臣士渡日。可能越唔俾食就越會想食啦 ^^" 食左早餐都好肚餓。
去「食飯」之前睇左 Mass Dance，跟住打左十幾個電話，分別打俾三個人，全部都冇人聽。
響又一城同大邦傾左陣偈，影左兩張相（竟然係咁～）跟住就上 Foood Court 搵阿 Jill。
睇住阿 Jill 佢地食，自己又冇得食喎，餓到丫！上 Eddy 堂冇野食又恰眼訓架啦嘛 XD

一堂落就即刻撘車去佐敦。YEAH～ Jessie 陪我 ^^ 其實只係上去填張野同抽 4cc 血咁大把。
其實．．．哈哈哈哈！我只係借 Body Check 黎過橋 XD 我根本就係為左去澳洲牛奶公司食野！
真係好好味啊 o^^o 好滿足。食完就撘巴士走喇！有個都幾得意既 BB 坐左響我離 =P

想錄歌，不過錄唔成。結果都係睇電視、食飯、上網咁過。其實我覺得我應該早 D 訓囉～
都幾難喇～ 淨係要晚晚追《E.R.》都夠死啦！不過係真係好睇喎 ^^" Carter 好得人鍾意。

愛人莎莉：原來妳有黎睇啊？多謝妳呀～！！！＊啜～～～～～卜＊

>>October 22, 2003 at 2:55:28 AM GMT+8