2003 年 11 月 29 日 星期六 【乍雨乍晴】

朝早起身去補習，好彩有車，唔駛遲到 ^^" 點知下一個要改時間，咁我咪有空檔囉？
唔制～ 即時打俾再下一個補上。呵呵！雖然要沙田．馬鞍山．沙田咁樣走 @@"

都唔知自己今日發咩神經，咁凍走去著裙，又唔知咁俾心機打扮做乜，不過真係幾好睇 =P

補完第二個返左屋企一陣，舞完一輪又出番沙田補。原來個學生唔舒服。傻妹又唔話我知。
響街市買左支水，因為 "Bonaqua" 一字就俾老闆話我係靚女 Miss ^^" 又撞到恆商個阿姐。
下一站排頭村。咦？我仲早過魚魚到添！去中央廣場個洗手間打左個轉再返去就岩岩好勒！
不過我既衣著似乎嚇左魚魚一跳 @@" 咩喎，間中貪靚 D 嘖！唔靚咩？「不得了咯！」

今日魚魚不在狀態，又冇乜波到，結果冇乜表現地被換出。不過佢地最終贏 2:0，都幾開心 ^^

以為今晚睇片，點知冇得睇，仲話去源禾繼續。魚魚怕我凍，又話源禾雜，想我返去先。
最後議案係大家都唔好留咁夜，我走．佢走。呵呵！我都唔夜得啦～ 聽日要比賽嘛 ^^"
行去個陣接到哥哥電話。真係俾佢激死，窒左我成晚。連我去 let 都唔放過，唔俾我收線！
呵～ 似乎有人擔心我去 let 既安全 o^^o 其實都唔係好凍嘖，因為有件大褸俾我「蓋」^^

不過俾人「喝」左兩聲．．．ｂ都要乖先至得人鍾意有人錫既，我以後要乖 D 聽話 D 至得。

未夠十點就走勒！因為魚魚都知累喇 ^^" 又去仙蹤林（尋日唔記得講：沙田店重開喇！）
不過今次係外賣青蘋果綠茶！傻傻下唔記得嗌熱，結果想飲杯熱野就買左杯凍野．．．蠢。
跟住就行去撘巴士返屋企。部電視俾人霸左，冇得睇四個女人。結果都成四點先訓 @@"

發現魚魚個 Info 又唔覺意改左少少。有 D 係以前見過既，有 D 係新野。唔～ 係咩意思呢？

>>December 2, 2003 at 5:54:51 PM GMT+8

2003 年 11 月 28 日 星期五 【微冷】

一起身就要執屋，因為今日 Mr. Physiotherapist 又會黎。請佢試阿爺整既蘿蔔糕 ^^" 唔～ #2。
Mr.P 走左我就乖乖地做功課，不過做得好慢。四點幾開始就響同我女友約今晚食飯。
真難搞～ 搵極都搵唔齊人，又累喎，坐響度都恰著 @@ 唔去．去．唔去．去，最後都去。

終於都輪到我姿姿整整，搞左好耐先出到門口。今日個頭幾貼服，可以唔駛扎頭髮喇 =)
約左艾花響人體店等。唔～ 好耐冇見個衰婆。呵呵！有禮物收：Bugs Bunny "B" 匙扣 + 爆谷。
好靚呀個匙扣！Nike 袋又有新野掛喇 ^^ 突然間好想食糖蔥餅，特登走去好運買左件黎食。
跟住同個女人行黎行去，行黎行去，行黎行去．．．響呢度講：我覺得妳而家咁幾 Fit 丫！

終於等到我女友，就去第三期 Pizza Hut 羅位。估唔到咁鬼多人喎 @@" 要等，於是又周圍行。
三個人食左一個普通批 + 兩個焗飯/ 闊麵。等極都等唔到阿 Neth 電話，原來有人唔聽留言。
四個去左仙蹤林飲野，我嗌左杯珍珠奶茶 ^^ 好耐冇飲過。傾偈、發癲．．．趕上尾班火車。

>>December 2, 2003 at 5:37:23 PM GMT+8

2003 年 11 月 27 日 星期四 【微冷】

今日返學既時間都係快樂既，其餘時間都係唔快樂既。講完。講完？未有咁快。
本來以為今日有老婆餅食，不過 Jessie 話未出爐，冇得食。嗚～ 唯有等下星期一啦！

又係派功課既時間勒！上次 A- 既今次 B+，上次 B 既今次 A-，所以拉番勻係開心左既 =D
不過 Present 個分就慘喇～ 見到 A- 都好驚喜，但仲有好多 Group 有 A，仲有 A+ 添囉！
唉～ 冇得怨呀！鬼叫自己做得唔好。上 Enrichment 冇驚喜。空堂自己上左 CityTop 食 Tea。
呵呵呵！咸書拼吉列豬扒沙律 =D 其實今日好想食 Delifrance 架！不過冇人陪丫．．．

是日重點：Interp Test！我不斷咁叫自己唔好緊張，結果我都冇好緊張丫？我覺得幾好喎！
不過有 D 野記低又記唔切，個腦又唔記得，聽到其他人講 D 自己冇講既野又想補鑊 ^^"
但總括而言我覺得都幾好啦！諗起自己講到手舞足蹈就好笑。希望今次 A 到啦～ 阿 Jim...

落堂前 Send 左個 SMS：「我想唱 K 呀！」今日 Last Day 嘛！結果？梗係冇得唱啦！
威起上黎，決定習都唔去補，拎埋 D VCDs 俾大邦就返屋企喇～ 錄左隻歌，tum 下自己。
行返屋企個陣諗左好多野．．．基本上五點半打後，成晚諗左好多野，好多好多野。

I have said something over 10 times in recent months, and the responds have always been negative...
I shall never say that again... Don't be silly! It's no "I love you - do you love me" stuff. Damn it.

記得細個個陣有人問我：「點解妳成日都咁開心既？同你一齊都會好開心架喎！」
我既答案係咁樣：「可能我係上帝派落黎凡間既，任務係帶俾其他人歡樂。」
注意：我冇講過我係天使呀下！我都有自知之明架～ 我知道自己唔夠白，又唔夠靚。
咳！唔好以為我睇左《薰衣草》玩抄襲，我細個真係咁諗過的。套戲抄我就真 ><
不過咁，睇完《薰衣草》我就知道原來天使都會因為接觸到太多既唔開心而變得憂傷。
二十歲女，可能頭十二年都過得幾順利，入左中學開始遇到挫折，個人就愁左好多。

　　　　　　　　　　　我以前好開心架！點解會搞成咁既？

讀幼稚園個陣咁細個，冇得好講啦！小學同學呢？話我讀名校唔識人喎！佢地唔識我就真。
中學咩？中一二好似都冇乜邊個 Friend，中三四被人搶左個男朋友仲要冇晒班 Friend 添～
中五好 D 啦！仲有田徑隊既隊友，不過一個二個走既走，忙既忙，考完 Cert 已經冇見面 lu...
響恆商又識左一班；不過入左大學少見左。開頭都幾好既，而家各有各忙自己既野啦！

丫如果我都可以忙下就好喇！點解人地忙到死個陣，我硬係兩手 FingFing 好得閒咁架呢？
佳節將至，個人寧舍多野諗嘖！丫上年聖誕我係咪自己哩響屋企呢？好似係喎～ 真係威 ^^"

誰要和你潛入深海巨浪　願望若過多才會絕望
親我話留住我一點不稀罕　未能忘掉我才絕不嚮往
即管拋低我．．．

上星期五講既，星期一講既，前日講既，尋日講既，今日晏晝講既．．．乜都假既。
一日之內喊左兩次，犀利。而家既我，應該隨時可以響三十秒之內喊得出。唔好引我喊。

>>November 28, 2003 at 3:11:29 AM GMT+8

2003 年 11 月 26 日 星期三 【晴】

見工篇。
　　　　　　　　　　地點：Yuen Long Public Secondary School
　　　　　　　　　　職位：Teaching Assistant（English）

為左見呢份工，同唔到阿媽食飯，恆商個度又講左假。單人匹馬殺入人跡罕至既元朗！
講笑嘖～ 冇咁誇張，不過一個人殺入去就真既，好彩我度定晒點答車，又睇過下地圖王。
響沙田撘 269D 入去轉的士（費事行到身水身汗嘛！）早左足足半個鐘去到 ^^" Hee...

等既期間黎左另一個 Interviewee。佢約三點架！遲到啦～ 不過佢好彩，再對上一個未 In 完。
睇佢既樣同衣著，我諗佢地都係大我少少嘖～ 兩個都著西褲，咁我係咪 Casual 左 D 呢？
但我已經好努力打扮架喇～ 我都冇西褲，亦唔會想著。著得「整齊．舒服」就得啦！

個男既 Interviewer A Check 我 D Cert 個陣先知我仲讀緊書。原來佢地請既十二月就要返工。
我心諗：我張 Form 又唔係冇寫我讀緊 City，你地究竟有冇睇過張 Form 先叫人黎 In 架？
跟住佢同兩個女既 Interviewers（B & C）密密斟完就照話 in 我勒～（好彩唔係白行一趟！）

（以下對過程全為英語問答）

Ｂ：「妳初頭係咪唔知下星期就要上班？（係。）咁妳幾時先知道自己估計錯誤呢？」
我：「你地咁快打黎話要 Interview，我都估到既～（咁妳仲黎既？）
　　　咁我唔想冇左個面試既機會嘛！
　　　或者你地今次揀唔到適當既人選，下學年先再請人，到時會考慮我呢？（笑）」

跟住就係 D 例牌野，例如要我介紹自己咁啦！
我都係話自己響邊度讀書、修咩科、有咩相關工作經驗、點解會有興趣返呢份工咁。

Ａ：「妳擔唔擔心學生既紀律問題呀？」
我：「ｅｒｒ．．．少少啦！因為我個樣咁後生，我都怕 D 學生未必聽我話。
　　　不過我都有唔少教學既經驗，都有 D 幫助既。我諗我都應付得黎～」
Ａ：「如果要用電腦工作，有冇問題呢？」
我：「冇問題！因為我有修 CA 丫嘛！
　　　雖然我 CA 既 A-Level 既成績唔係咁好，但都係因為我某 D 方面比較弱，
　　　但一般既操作同 MS Office 我係完全冇問題既。我小學已經開始用電腦做功課架喇！」
Ｂ：「如果要妳對電腦工作，妳唔會覺得恐懼（Phobia）丫嘛？」
我：「唔會～ 我好鍾意用電腦架！」
Ａ：「咁妳識唔識操控一個 Language Lab 呢？」
我：「ｅｅｒ．．．呢樣我諗我要學 =) 」
Ｂ：「妳覺得妳邊方面令妳適合做呢份工呢？妳覺得自己有咩優點，我地應該揀妳呢？」
我：「ｅｒｒ．．．都係我幫人補習既經驗啦！私人補習同響補習社教都有。
　　　而我自己本身對教育方面既工作都好有興趣 =)
　　　同埋呢份工要求我設計活動俾學生參加，我比較年輕，同學生既年齡差距比較細，
　　　我或者會比大個 D 既應徵者更加清楚乜野活動先可以引起佢地既興趣，
　　　從而設計一 D 受同學歡迎既活動。
　　　同埋我覺得自己都幾友善，應該可以同ｄ同學融洽相處．．．」

我兩次提及自己後生，佢地都有笑架 ^^" 唔知呢～ 輕輕鬆鬆咁，真係 in 得幾好幾開心。
我自己幾滿意架！佢地最尾都話，如果下個學年真係仲要人，佢地會優先考慮我囉～
可能係咪都係咁講，不過聽落真係好開心，而且自問真係 In 得好丫嘛～ 好野！Keep it up ^^

P.S. 我心諗：唔識 Phobia 呢個字就死咯！好彩我有睇 AXN 既《Fear Factors》嘖 XD

In 完就撘車出番上水，行左一陣，等電話咁。不過等到我對腳 D 水泡話唔想等．．． /_\
咁就返屋企啦～ 影左兩張打格仔既相 XD 俾人睇下我今日個 Look 嘛～ Soooooooo Lady-like！

>>December 2, 2003 at 3:17:50 PM GMT+8

2003 年 11 月 25 日 星期二 【微冷】

Mr. Physiotherapist 話今日可能黎，結果都係冇黎。結果我竟然溫書！今日普通話測驗。
響梳化攤到好眼訓，咁既款點測驗呀 ^^" 返學測驗喇！全軍覆沒。臨急抱佛腳係冇用架 ><
Discourse 又回覆番去 Hea 既景況。算啦！根本成個 Sem 都係咁架啦 ^^" 咁就放學 lu...

自己出去拎眼鏡。「咁早既？」「係呀！我幫個女學生補丫嘛！早 D 補完唔好咩？！」
唔知係個樣殘左定咩呢！今日覺得副眼鏡冇咁靚咁。臨落車接到電話：幫 Vincent 羅鞋。
本來唔經又一城既，多得呢個「特殊任務」，俾我見到今年棵 Swakovski 聖誕樹！
完全係 Can't take your eyes off it >< 望住佢係會眼花架囉！水晶配射燈。靚到喊．．．

終於去到 JSC，今日晏左好多好多。都盡快 Warm up 架喇～ 靜雞雞做左幾下轉身。
有幾下都落裝或者擦柱（好彩冇巨響嘖！）雖然都係衰，但見到個餅快番喇 ^^" 終於。
都係因為呢幾下轉身，好快就好累。不過今日總括黎講掟得好左，雖然 Foul 晒左邊 @@"
阿武終於練槍喇！佢話我進步左。但都仲係用左手力，而家手爭位痛添 >< 要小心。
哈！陪 Gloria 坐無影凳（其實係我無聊要坐，仲要佢陪。）邊坐邊玩「小明」XDDDDD
繼續練槍啦～ 跟住開埋會，今個 Sem 既練習就到此為止勒！明年請早。我要努力！

Yeah！利物浦月曆經已到手 ^^ 拿拿聲沖埋個涼就撇，決定唔同菜菜佢地食飯 lu...
乖乖地返屋企食飯。食得好飽添～ 嗚！聽日去元朗見工呀～ 好緊張呀 =D 唔識去呀 XD
響 KMB 網頁度 Search，睇埋地圖王，仲要打搞 Jessie ^^" 搞掂又睇埋《E.R.》就訓 lu...

「妳做咩行咁快呀？妳好似好趕咁喎．．．我唔趕呀！我特登行慢 D 陪下妳架～」
有人話發夢夢見我呀！哈哈．．．但又唔肯講夢見我做乜喎 O_o" 事但啦～ Heeheehee o^^o
又有人陪我去睇 Swakovski 聖誕樹呀！好似好開心咁喎 ^^ Yeah yeah yeah．．．

>>December 2, 2003 at 6:00:52 PM GMT+8

2003 年 11 月 24 日 星期一 【微冷】

結果尋晚冇訓．．．鬼咩～ 仲掛住同阿 Ken 玩 MSN ^^" 開左眼仔仲要慢到冇人有。
不停做做做做做都唔掂，都唔明點解寫極都仲係爭三段 >< 結果走晒所有堂 -- "Day Off"。
但都要特登返去交功課丫！同 Sammy + Marco 傾左陣，去百佳買完燉奶就去補習。

都勞氣架喇！不過文哥響度，唯有收收火啦！補左兩個鐘，食埋飯、睇埋電視先走 ^^"
尋晚冇訓之餘仲要做 D 令人心力交悴既野，又要勞氣呢？實在係好累呀 *exhausted*
累到睇《E.R.》都睇到中下中下，後半個鐘幾乎訓著左冇睇過。涼都冇沖就走左去訓 lu...

>>November 27, 2003 at 2:07:42 AM GMT+8

2003 年 11 月 23 日 星期日 【微冷】

嗚～ 星期日既早上，完全唔願起身。接到魚魚電話就起勒！不過灰左，因為冇相影 =(
拿拿臨打俾 Gary 同阿 Ken，通知佢地冇相影．．．起身做功課啦！點知搞搞下變左印日記。

阿公入左黎，我要請佢飲茶喎～ 其實我要趕功課囉 >< 聽日交既功課，我今日先睇點做。
著新裙、新鞋 ^^ 已經唔早，但仲係勁多人等位。蘿蔔酥．正！不過今餐我咬左自己兩次 ><
飲完又兜番返去票站投我神聖既一票。跟住就拎條褲出沙田換，因為發現佢甩線呀！
換完就上番車出竹園。呵！電話到，不過響車度，語氣同平時好唔同，聽落有 D 惡添 ^^"

阿媽又問起讀書 D 野，講黎講去都係個三幅被。有得讀你估我唔想讀咩？唔好俾壓力我啦 =(

上到竹園，我竟然真係好認真咁睇份功課要點做，又好用心咁響 Text 度抄 D Points 出黎。
哈哈～ 個個都問我今日做乜扮淑女 ^^" 電話度解決左阿 Ken 份補習，Winny 個度傾唔掂數。
跟住食飯啦！開左電腦諗住繼續做功課，點知有 D 人阻住晒，仲要勁無賴．．．討厭。

「我今日著左件好型既衫呀！妳一定要睇下．．．」
「我今晚會出黃大仙拎野，睇下會唔會見到面丫？」
「噢撈！我仲響沙田未出黎呀．．．咁冇辦法啦！」雖然有少少失望，但有心已經好夠 o^^o

返屋企個陣，阿媽 又 講讀書既問題 >< 好煩囉！This topic is strictly prohibited from now on！

>>November 27, 2003 at 2:09:44 AM GMT+8

2003 年 11 月 22 日 星期六 【暴雨】

星期六就最好架勒！我已經捱到冇辦法六點鐘起身叫醒魚魚，而家調番轉佢 Morning Call 我 ^^
好似第一次星期六補習早到。補埋廣源要返一返屋企拎本 Ex. 俾個學生，拎埋相機添～
遲左少少，不過今日唔駛補九龍塘，所以補左兩個鐘。呵呵！仲幫「師傅」影左張相 XD

因為收到電話話本書已經到左，補完習見冇乜野做就出左新世紀，響大眾買左本書。
呵～ 仲買左花紙黎包書，順手買埋聖誕卡。想揀禮物俾 11 月生日既學生，不過揀唔落手。
成日都冇個電話。返屋企包書、Post 相。終於電話響。決定自己去，費事要魚魚等我。
整左隻雞髀，本來諗住食埋先出去，點知又有人發爛渣。我都識發架嘖！買個孖芝算數。

兜左個大圈先去到球場，不過都算叻架喇！咁都俾我搵到。乙明村既糖蔥餅～ 呵呵！
魚魚今晚入左七球咁多喎 @@" 哈哈～ 好開心咁。阿陳同阿誠想我負責做記錄囉．．．
踢完傾野個陣發生左電話響事件。我覺得有人好惡囉！又係既，我應該咩都唔好理。

「做咩呀？」「冇野額！」「做咩呀？」「冇野額．．．」
「做咩苦埋口胞腮呀？」「因為有人惡囉！」「冇惡額～」「有呀！」
「冇額！唔係惡呀．．．哎也，搵唔到個電話添！『哼，搵唔到就好啦～ 抵你呀！』」
「哼 >< 我先唔理你呀！以後都唔理你。」「唔好啦～ 唔好唔理啦！」
「．．．好啦！ 唔好唔理啦 ^^" 」真係輕易 O_o" 直頭係輕易到離晒大譜 ^^"

出番大圍撘車返去。嘩～ 大口仔毛巾 o^^o 雖然唔係真野，但我都好好好好好好好開心呀！
如果可以有埋．．．就好勒 ^^"「都得架！收埋響枕頭下面幾日囉？！」哈哈～ 真既？

返到屋企食住雞髀睇《Sex And The City》，時間岩岩好。好累，睇完就訓喇！又做唔到野。

>>November 27, 2003 at 1:08:24 AM GMT+8

2003 年 11 月 21 日 星期五 【乍暖還寒】

起身就開電腦，沖番個靚沖 -- 而家成日都日頭沖涼 ^^" 跟住執屋，因為有人上黎啊！
Mr. Physiotherapist 黎幫我整腰嘛！跟住一齊睇左一條片。唔，真係睇左咁多次都覺得好睇 =)

其實整完腰我應做功課既，不過搞下電腦又睇下電視咁，仲睇埋《不速之嚇》VCD 添 O_o"
呢部戲真係幾得，我睇第二次都仲係有幾個位嚇到毛管戙 @@" Nicole Kidman 好靚～
睇完都做左一陣野既，不過我女朋友鍾意玩即興，之前死都唔肯去，突然間又話去睇戲喎！
咁就飛左出沙田睇《Scary Movie 3》，不過冇人買定飛，結果睇唔到畫頭。《魔戒》呀 ><
套戲都算爆笑。我好似冇響戲院睇過笑片，所以今次都睇得幾開心，仲要隔離個個笑唔停哩～

晚飯貪就腳響戲院出口對住既麗都食，服務竟然係差到不知所謂，成晚就係不停等等等！
連大王都發火，黑口黑面喇！唉～ 都係奴婢唔好，提議去呢間野啦！以後都唔駛旨意。
離晒譜。我未試過等擺位等到要拍檯架；遞張火窩紙又要等；賣單都等成三個字！數手指牙？

由於大王要練武，女主人既安全就落在我同我女朋友身上。我地先去 a.y.k. 睇衫～ Heehee =)
試埋細碼我就俾錢買左件 Cardigan 勒～ 竟然有半價！呵呵呵 ^^ 跟住再行西田，超多人。
隻七十蚊唔駛既哈姆 Cushion（仲有佢 D Friends）真係好抵，結果攬左一輪又買左 lu...
逼完就飛奔上 Royal，好彩未閂門嘖！試左條 3/4 俾女主人過目，佢話 OK，咁就俾錢喇～
女朋友買左 $2 雪糕都仲係俾我地拉左去許留山。燉蛋白賣晒，食左個唔凍唔熱既燕窩燉蛋。
食飽我就同女朋友玩「欖球」，仲搞到哈姆個 Friend 面部著地添 XD 最後係撘火車返屋企。

「你返幾點呀．．．唔返得唔得架？」「唔得呀．．．」我好似係第一次有類似既要求。
雖然答案係 Negative，不過我仍然覺得好開心，因為我知你已經為我留耐左好多好多．．．

>>November 27, 2003 at 1:05:54 AM GMT+8

2003 年 11 月 20 日 星期四 【微冷】

準時返學（僅僅早過 Elsie ^^"）第一堂睇人 Present，第二堂都唔駛譯野，淨做 Analysis。
再完全冇睇過篇 Text 地上 Duncan 堂，好彩冇乜講錯野。同 Jill + Catherine 去 Garden Cafe。
呵～ 我好背架！今日先第一次去 ^^" 食左燒雞三文治，睇落乾渣渣，估唔到又幾好味喎！

上 Interp 總算無驚無險。補習之前響百佳買左幾兜 Jelly ^^" 補習要出動到零食黎收買人心 =(
食埋晚飯、睇埋電視先走。撘 85C 返黎；沖個涼，上下網，睇埋《E.R.》就訓喇！好似。

>>November 29, 2003 at 1:30:13 AM GMT+8