2003 年 8 月 22 日 星期五 【雨】

頹廢第二天。今日起身冇即刻摷野食喇 ^^" 要收儉下喇！都係上下網、無無聊聊咁。
睇《金裝四大才子》。今日爹爹打波，唔想又買飯食，唯有自己煮俾自己食啦～
呵呵呵！有雞翼 ^^ 醃左幾隻黎煎，另一邊就蒸番 D 冷飯，再清蒸 1/3 條絲瓜 -- 要食瓜菜嘛！

真係上網都上到悶，電視又冇野睇 O_o"《賭神大戰拉斯維加斯》係睇左幾廿次囉 ><
竟然突然醒起可以錄下歌仔～ 好耐冇錄過呢！自從上次唱起上黎冇乜中氣開始就冇錄 lu...
於是就開壇錄音！不過我都係時候換電腦架喇～ 連 Ear-pieces 同 MIC 都就黎虧晒 @@"
錄一隻嘖：《想得太遠》。拎左四隻出黎揀。其實都唔駛點揀啦～ 好明顯．．．
不過算好滿意架喇～ 總算見得下人，唔駛又出半首做 Demo 咁。今次唔 Post Link 出黎喇！
我諗呢度都冇人真係會聽架啦 ^^" Heehee！同埋今次又唔係唱得好 ^^" 不過再錄番都幾開心。

Hea 到六點就洗頭沖涼，準備出去。魚魚踢波呀～ 部機整番好，我既任務又黎喇！
有凍鴛鴦飲 ^^ 因為傻爹爹飲左兩啖就唔記得飲埋佢先行，益左我。七點一撇～ 都係遲喎 O_o"
去到車站見到冇人排隊都心知不妙，結果等左四個字先有車，仲要經歷「腹背受敵」！
實情係咁～ 話說魚魚打俾我，講左兩句就突然落起雨上黎。企響有蓋巴士站係冇用架囉～
事關 D 雨係打橫撇埋黎既。有個阿叔好似好醒咁，哩左響車站個廣告排後面，唔開遮都唔濕。
其實呢 D 打橫撇既雨好明顯係受風向影響，佢都傻既～ 結果風向一轉佢咪成日濕晒囉 @@"
不過冇所謂啦！因為點都係會濕半身既。我護得住頭黎又護唔到腳，最慘係護唔到個袋。

好彩濕晒身之後就有車，不過上車真係凍到傻 >< 架車又冇人喎！冇乜人氣咁．．．

怕行行下落雨啦，又費事遲到，結果明明可以去到聖家先落，都響四美街落左轉的士。
都成三十蚊架！不過真係唔知個司機有冇兜路，問我係咪行太子道喎，我點知嘖 ><
上到去見到魚魚著左橙色衫～ 好怪喎 ^^" 睇唔慣。其他人全部都唔識既 @@"
影影下聽到後面有人話「靚女響度做乜？！」冇戴 Con.，擰轉頭望完都唔知佢係邊個。
原來係遲鈍。哈哈！估唔到佢又黎喎～ 佢又響度搞笑，無啦啦用國語做「旁述」XD

場波一般悶啦～ 兩邊都久攻不下，中柱中楣既次數又真係多到離晒大譜，SOT 都冇咁多。
可能係一段時間冇影啦！覺得自己影得唔好，有 D 就住就住咁，既追唔到波，又唔夠專心。
不過臨尾真係好搞笑：「要入好快 D 入喇！得番 2 分鐘帶咋．．．其實一陣先入都得既～
不過我影唔到之嘛．．．嘩！入左喇．．．我覺得係因為我囉！勁呀～ 呵呵呵呵呵．．．」

等佢地換衫既時間就係我餵蚊既時候 @@" 成 11 點先走，去左許留山食多芒果 ^^
跟住就去等巴士返屋企。全日最有建設性既節目就係咁完左。上車打左幾個電話～ 好悶。
結果有個煩人打黎煩足我半程巴士。我都幾欣賞 D 人咁厚面皮，明知會俾人寸都仲敢打黎！
傾到落車都唔肯收線，好彩有哥哥打黎救駕，但 D 人都仲係 Hold 住響隔離唔肯收線囉 ><
去七仔買埋燒夜（其實係晚餐黎架～）就返屋企。同哥哥傾到入 Lift．斷線．好野！

返到黎開著電腦就即刻叮野食。嘩～ 好油。一晚半晚嘖！冇野食呀 >< 冇計～

>>August 23, 2003 at 1:56:25 AM GMT+8

2003 年 8 月 21 日 星期四 【雨】

九點起碌到十一點幾先肯起身。今日唔駛去畢架山，但就要過錦豐苑。落住毛毛細雨。
一個鐘頭一 D 都唔難過丫，尤其是當個學生係聽話既時候。有少少趣事發生～

原句係咁：The photographs are nice. May I look at them?
個學生將 photographs 讀左做 potatoes，look 又唔知點解讀左做 talk．．．
成句變成：The potatoes are nice. May I talk to them?
中譯變成：D 薯仔好好人（好靚都得～）我可唔可以同佢地傾下偈？！

笑鬼死我～ 虧佢又錯得有紋有路 ^^ 不過最開心真係見到佢聽教聽話，好肯學野。

補完就慢慢踱返屋企，又係睇電視、上網咁，頹廢到不堪。空墟呀～ 所以食左好多野。
五點幾食左七條中蛋卷（癲架！）跟住覺得有 D 頭痛（梗係啦！對電腦對成日）就走左去訓。
難得訓著，又俾娘親嘈醒 O_o" 又係響我留響屋企想同佢食飯既日子話我知佢唔返黎食飯 ><
雖然我係同小傑佢地食唔成和民先留響屋企，但我全日都冇出去，全日都冇約人啦？！
望番轉頭，我好似真係好耐冇響屋企食晚飯喇 @@" 由去澳門到而家，好耐都冇。

小傑：終於甩難咪好囉 ^^" 我月底個 Dept OCamp 搞到好唔愉快呀！可能唔去添呀 ><

未夠十點就醒左，都係時候落街買 D 野食喇！一開門就見到娘親～ 都係要自己落街買。
買左碗碎牛粥 ^^" 好耐冇食過喇～ 返到黎就對住部電腦食野，食飽又夠鐘睇電視。
今晚《同２》大結局呢！本來直落睇埋《X-Files》既，不過阿 Ken 打黎，傾電話就睇唔到喇！
聽見佢講佢做野就辛苦咯～ 都唔明佢點捱。應該可以唔駛咁辛苦囉，係佢太抵得諗喇 =(

魚魚失左蹤成日，原來哩響屋企整電腦「喎」．．．好丫！整電腦係好事黎既～

>>August 22, 2003 at 2:33:50 AM GMT+8

2003 年 8 月 20 日 星期三 【雨】

Happy Birthday to YOU, BERNARD!

八點知醒叫醒魚魚，自己就唔肯起身，醒下訓下、醒下訓下咁，碌到十二點先落床。
起身第一件事係整野食 ^^" 今日又玩食肉食蛋，肥就不在話下，蛋白質都唔少。
開埋電視睇《金裝四大才子》，開埋電腦吼下有冇得執番個 T03 -- 邊有咁多次好彩丫！

點三開始執野，兩點先出到門口 O_o" 遲硬到啦～ 仲要發生左超無奈事件．．．
三點鬆 D 先到麥花臣，再配合我招風雨既神秘力量，將雨雲帶到旺角，冇耐就落起雨上黎。
呆企十分鐘等大家換番晒衫，結果都係四散；同魚魚去鑽石山睇下有冇佢鍾意個對鞋。
結果都係冇 ^^" 跟住去左麥記食番個芝士漢堡包，塊肉竟然唔熟！我仲要食左半個 O_o"
換完第一次都仲係見唔熟，應該係同一批「上碟」肉黎啦？！換多次～ 都係乾身 D 先似樣。
食完去埋打簿就等車返屋企。我咁既高度又係幾好 "Long" 既 ^^" 其實咁我已經好滿足～

響樓下買左盒買一送一既香芋雪米茲 ^^ 跟住連續撞到兩個小學同學～ 又會咁岩既？！

又係上網 + 睇電視，仲有雪米茲。做《Rave Fever》。如果我有八成似 Nicole/ 蒙嘉慧就好喇！
六點半沖埋個涼，執齊野就出門口勒！約左阿 Ken 八點響銅鑼灣～ 好遠啊．．． @o@
為慳錢兼大把時間，有 681 都唔撘，走去撘巴士轉地鐵 ^^" 撞到 Miss Kong 同佢老公～
呵！畢業三年，我只係返左去唔知一次定兩次，佢都記得我讀 Translation 喎 ^^ 準時到達！
不過約 SOGO 門口真係玩～ 咁多個門口，我點知邊個？我呢 D 新界人好少去市區蒲架嘛 XD
去左世貿附近一間食日本野既，兩個人食左個二人前套餐，唔夠飽加左四件壽司 ^^"
D 野就唔係特別好食架勒！D 三文魚係尤其差～ 不過同阿 Ken 有講有笑，食得好開心 =D
不過狂俾佢笑囉！人地唔知點樣撞瘀左個頭佢又笑 >< 無啦啦生飛滋佢又笑．．．

真係好多野笑～ 又講番尋晚講電話最精警既對白：「『反打劫』．你捉住佢，我搜掠佢！」

跟住去番 SOGO 行 Sportswear 個層，完全冇斬穫，不過有 D 心郁想買番對 MIZUNO。
玩具都唔放過 ^^" 不過咁樣行街都幾開心。臨走落埋 B2 買巴夫食，丫，原來都幾好食架喎！
轉頭俾我發現有生日熊賣，即刻死摷爛摷，結果摷到 D 野亂晒兼跌左幾次都搵唔到 =(
摷到人地 SOGO 都打鐘收舖咯，我地先肯走去撘地鐵～ 響北角站拜拜左 lu...

轉車個陣見到個人（我唔係歧視佢丫！）好核突 >< 以下內容有可能引起不安，敬請留意。

佢個咀腫晒，咀唇超大片，條利又係腫到成舊野咁，仲要係外露既，個咀合唔埋既 ><
個咀望落去係兩舊野，咀唇同條利就好似兩舊內臟咁既東西囉．．．超超核突！
咁都唔緊要～ 我當佢有病之類丫！但更核突既係，佢拎塊鏡出黎不停照兼不停摸．．．
嘩！食飽 D 既話真係咩都嘔番晒出黎～ 死頂頂到轉左車就唔駛再見到佢喇！

等巴士個陣遇到個好長氣既師奶，好彩有 286M 嘖！佢跟我上左 85M 我都唔知點算。
上車聽住歌，好快就返到黎勒！第一時間睇《同２》，跟手追埋《X-Files 1》=D

多謝阿 Ken ^^ 一盒杏仁餅換到餐飯，我覺得抵到爛囉！你都要真係開心至好呀～

>>August 23, 2003 at 2:02:19 AM GMT+8

2003 年 8 月 19 日 星期二 【雨】

訓到懵下懵下，魚魚打俾我，我仲問佢咁早去邊 ^^"「補習囉～ 今日星期三嘛！」
竟然十點幾就肯起身，早睡早起身體好嘛！起身煮左個公仔麵．．．咁點身體好呀？！
等魚魚電話，約左三點四、五。出門口之前陪爹爹食左飯先，係咁以食左兩啖 ^^"

點知大白痴訓過龍，泳池冇落，去左火車站 O_o" 見到天氣都唔好，咪撘的士去囉！
嘿～ 咁都未夠白痴，最白痴係換好晒衫準備上去先發現冇帶 Goggles >< 有冇搞錯呀我？！
都唔係第一次啦！之前又係試過唔記得，不過落到樓下就醒起，可以返上去拎番。
可惡呀．．．冇 Goggles 點游喎 >< 我又唔係咩高手！咦也～ 超級大白痴呀！
想曬太陽都唔得啦～ 我去到泳池，個天就即刻黑起上黎勒，太陽伯伯都走埋勒 ><
唯有玩浸水囉！魚魚都話我有乜理由唔記得帶．．．唯有等佢游完借俾我用、我游啦！
咁樣佢就睇唔到我游成點，教唔到我喇～ 同埋總要係一個游一個企咁，好冇癮。

嘿～ 浸左水都唔夠十分鐘就發現左 Des，係佢見唔到我囉～ 反而阿生一黎就見到 =)

今日游得唔好呀！可能係上次覺得學到 D 野，今次做唔番出黎就會覺得自己好冇用～
有一轉係游左兩步即刻企番響度，好似個傻婆仔咁拍 D 水發小脾氣，因為真係唔開心架 =(
唔開心既另外一個主要因素就係魚魚。我知佢唔鍾意游水，佢知我鍾意先陪我架！
佢都叫有心機教我丫，所以我先唔想學極都學唔識咁。自己又大意呢～ 帶漏野．．．
游左冇耐就雷暴警告（都話我勁架啦！）我地都懶理架喇～ 沖埋涼出番黎剛剛六點正。

「．．．你冇答我喎～ 唔答我即係鍾意啦？！」我只可以話，我覺得好 Secured。

撘巴士返屋企。接到媽媽電話話我今晚要食自己～ 妳早 D 講丫！魚魚話可以陪我食架 O_o"
等我仲一心諗住好耐冇同妳食飯，今晚做乖乖女陪下妳添～ 點知輪到妳走左去玩。
結果自己煎超瘦去骨豬扒～ 淨食肉，冇食飯。肥死 >< 跟住睇《E.R.》，飲埋碗湯咁。

P.S. 響廚房見到四腳蛇，整佢唔死，仲要一條走去針板後面，兩條走番出黎！嚇死我 ><
P.P.S. 赫然發現 R T03 有位！咁都俾我執到～ 嘩哈哈哈哈．．．以後 off 三、五喇～

搞多一陣電腦又同阿 Ken 講電話。又話好多野同我 Share 既？累啦你 ^^" 講左好少野咋喎！
不過自從響 UST 經歷左兩晚 5am-8am 既睡眠之後，我而家都夜唔到，晚晚兩點就謝晒．．．

>>August 21, 2003 at 3:08:06 AM GMT+8

2003 年 8 月 18 日 星期一 【晴】

肥花生日快樂～！！！！！

響畢架山補完習就返 City 找卡數，跟住撘地鐵去銅鑼灣金百利換戲飛～ 呵呵！
竟然見到 Jacq. Choi。我記唔起佢咩名，我估佢都唔記得我個名，但認得囉～ 淨係識笑 XD
跟住撘番落旺角去麥花臣睇魚魚。Heehee!「下一球一定入架！」結果就入左 ^^
有球響龍門擺入去咁滯既，有球就係好靚既單刀 @o@ 哎！最衰部機壞左，今日冇影到啦！
跟住四個去左許留山，我同魚魚夾份消滅左兩個芒果野～ 其實都係佢食嘖！哈哈．．．

接到大邦電話，問起我一 D 唔太關我事既野。我只可以話，人地既野我地唔理得咁多。

跟住魚魚陪我過左又一城，順便去 Royal 睇下買唔買到野。佢想買件衫，仲睇中左對鞋。
點知件衫冇佢 Size，對鞋又係爭少少，仲要得番一千零一對，兩樣都話第二間冇喎！
於是就算數，去左麥當奴飲杯野，響 LG1 就拜拜勒～ 佢返屋企，我就返 City 開會。
買左個飯盒食～ 好耐冇食過 City 既燒味飯喇 ^^ 不過慶囉！之前話唔要 Helpers，而家有囉！
算。講完一輪廢話就跳 Camp Fire D 舞，我真係好憎 D 人唔識變通，明明跳錯又唔認。
算啦！個 Camp 你地搞，你地搞得衰，我理得你死。我只會盡力響組入面倒你地米。

開完會一個人去左又一城行 Marathon，都叫睇中左個兩用既 Nike 袋，諗得過喎！
跟手去屈臣士買埋支 Spray，再響火車站禁埋錢俾媽媽（家用），然後撘火車去沙田。
魚魚又約左我呀 ^^" 又陪佢去 Royal。啊！原來又一城間 Royal 係黑店黎架 ><
之前話冇碼個件衫絕對係有碼囉！仲要係唔止一件，有新架囉～ 太可惡喇！
不過對鞋就真係冇，Show 都冇 show 到出黎。結果魚魚就買左件衫加對襪勒 ^^
行埋 Marathon、運動家同埋八折店，不過搵唔到個袋。之後佢就送我去撘火車返屋企 lu...

發生左八達通增值事件．．．都怪自己手多。望到 D，但完全睇唔到樣。算啦！唉～

>>August 21, 2003 at 11:34:14 AM GMT+8

2003 年 8 月 17 日 星期日 【晴】

捱到第二日，完全唔想起身．．．唯一既動力係知道今日又有得食麥當奴早餐 ^^"
食飽就去 LTA 開無聊大會．揭 SPY 喎！冇我份 XD 跟住就係聽個低能兒童宣讀佢既內定結果。
你咪罰囉～ 連大懲罰都頹過人。係又 Con. 唔係有 Con.，Con. 既唔悶，睇既都悶啦！

響 Concourse 等左十世先影到大合照。見到阿威呀～ 佢個樣冇乜變，但做 D 野就十分出位。
影埋相，終於都甩難喇．．．走淨我同 Carol 兩個 Leaders，加埋 Exco 帶隊去南北小廚。
係時候自揭身份～ 不過大家都冇乜反應既？！難怪既！佢地都唔多似好需要我地幾個咁 ^^"
騎呢怪又講「鬼故」。今餐終於要盡番組媽既責任．夾錢～ 不過仍然有 Exco 包底。
食埋就訓，一齊去撘巴士。上車少不免要訓下啦！撘到近斧山道突然停晒車～
原來樓下有個阿婆嘔到一地都係 @@" 大家要轉車咁。我就轉架車繼續去鑽石山再轉車。

幾經辛苦，終於返到屋企喇！入屋第一件事就係開冷氣、執埋 D 野，跟住就上網。
頭先撘車明明眼訓到癲，而家返到黎又唔眼訓喎！睇住電視食左八條中蛋卷 ^^"
魚魚夜晚去左踢波。大圍，危險喎～ 叫我唔好去喎。唯有好啦！HEA 到八點先有飯食。
食住飯睇《Fear Factor》。今集玩食虫同執臭鼬屍，都幾核突 O_o" 點可以擺 D 虫落口架 ><

夜晚有波睇 ^^ 先黎列斯 vs 紐卡素，估唔到咁好睇，不過睇到尾段就恰眼訓。
為左再夜 D 夠精神睇利物浦，未完場都要恰陣先。唔該晒阿生～ 真係打黎叫醒我喎 ^^
利物浦對車路士，預左輸啦其實。先失一球～ 唉。迪奧夫叻仔搏左個十二碼 ^^"
不過奧雲哥唔爭氣．．．又竟然俾佢咁好彩可以射多球。不過注定要輸又點會贏丫？！
睇完都成點鐘～ 上多陣網、沖個涼，再 Hea 多陣就頂唔順要訓喇！張床好舒服 =)

>>August 21, 2003 at 6:11:37 PM GMT+8

2003 年 8 月 16 日 星期六 【晴】

唔多願起身 ^^" 好彩早餐有人送到上門：係勁咸三文魚同勁油既腸 + 蛋 + 火腿。
食飽就上 Sport Hall 玩天才表演，我地組抽到做《無間道》，我覺得大家都做得幾好。
跟手選埋 Camp 花 Camp 草，頹到爆燈。賽果合理既～ 但玩 D 野係超無聊囉 O_o"

(1) 全部朦眼，女幫男搽唇膏 = 6 淨 4；（十個無聊。被 Foul 個兩隊肯定好冇癮～）
(2) 男 Press-up、女 Sit-up，輪住一人一下，一分鐘內鬥多 = 4 淨 3；（Fitness Test 咩．．．）
(3) 將男打扮成女，只提供化妝品、垃圾膠袋 = 3 淨 1。（咁個女既響度做咩好呢？）
我按捺不住，始終都係要大大聲單打佢：「係 D 人自己要發癲又唔放人走囉！」

Lunch 響 Cafe -- 傳說中科大最貴既餐廳。都係不外如事嘖 O_o" 都唔知佢憑咩收咁貴。
肉醬餐肉長通粉，可以賣得幾貴呢？D 餐肉仲要係幾難食囉！我食左好多長通粉。
食飽就玩 Orienteering。我守個 Station 本來都幾好玩，但落雨變左要哩埋響垃圾房側邊。
D 組仲要慢呢？得個六組，五個鐘頭真係攤到開一開咁，一個鐘先有一組黎 @@" 悶到喊～
我同 Des 雪糕食過、歌又唱過、行又行過、訓又訓過，到小傑落埋黎，豆腐花都食埋。
佢兩個仲 Happie 到拎縮骨遮同乒乓波黎玩「棒球」^^ 五點終於可以收檔返 LTA lu...

聽個低能兒童廢翕（呢個 Term 已經好文雅架喇！）左一輪之後，終於可以去食 Pizza ^^
雖然個飯同個鏍絲粉都好齋，不過個 Pizza 就幾好。成餐飯，大家都幾不留餘地咁寸騎呢怪。
返去換完衫（我笠左阿哥條籃球褲 ^^" ）去左組爸房吹水，騎呢怪講鬼故：照鏡事件 XDDD
落 Soccer Pitch，差 D 行錯路 XD 落到去就開始餵蚊，未玩已經俾 Des 射左幾槍。
Oh Yeah！唔駛落組玩。無啦啦由 Leader 變左渣水槍既 Helper，幫手罰人實在係好過癮 =D
不過我自己都好慘，著著件濕左都唔覺既衫，搞到個個行埋黎見到都話：「咁乾既？」就淋。
淨係 Enrico 都淋左我三鑊．一桶一鑊 @@"「見到妳我就忍唔住要淋～」真係啤一聲 ^^"

玩到濕晒都有份幫手執野架 =) 沖左個身就仆返去沖涼。走上走落 XD 唔見左 Pack Dove 添！

沖完等齊人就起行去滿記食糖水，點知一出去就落起大雨上黎。Flora 姐叫我地坐下先喎～
嘿！原來係有人作大，等我地坐響度白等，佢地就想自己出去食先。超．級．賤．格！
好彩阿 Neth 醒，Book 定位，唔似得 D Cheap 女人騰晒雞話冇位，仲出埋晒 D「那渣招」.\_/.

發生爭的士事件。好心你冇常識就出少句聲啦：「唔好意思喎！架的士係我地 Call 架～」
超白痴～ 電召既的士係會 "Kaam" 旗架喎，而且你仲會知道你召個架的士個車牌架添！
唔係求其指住一架就可以話係你召既，仲要咁厚面皮開人地車門請人地落車架喎～
抵你死啦！下場係俾個司機寸到一棟都冇之嘛～ 你受得起既！識電召的士喎，好巴閉喎！

飲左杯都幾酸幾難飲既芒果鮮奶 ^^" 之前好似中過招架喇～ 太耐冇去滿記，醒唔起添！
不過個芒果班戟依然係咁正！唔覺意又屈左兩個 Exco 找數 ^^" 不過算啦！SU 肯定袋唔少。
食埋就行去撘小巴，點知冇喎～ 響七仔買左 D 小食就撘番的士返去。唔見左騎呢怪。
真係麻鬼煩。咁大個人都唔知行行下行左去邊，要咁多人搵佢。結果響 Hall 搵番佢啦！
其餘人等就去左 Sports Complex。講鬼故喎～ 其實邊有人聽嘖？！我越聽越眼訓。
聽完肥聰吹，又輪到佢大佬，真係好悶。仲叫我行咩 LG2 喎！唔好喇掛？！好眼訓喎～
不過唔講唔知原來肥聰知道我係 SPY Leader！可惡丫～ 都唔知係邊個 Cheap 人爆響口呀 ><

結果都係頂唔順，我地四個 Leaders 一齊摺，四點就嗌返 Hall，幫 D 組仔組女洗衣乾衣。
留低班組仔組女去行咩 LG2 啦！我又唔係科大人，冇乜需要睇會呢 D 科大文化。
講到底，我驚囉！唔眼訓都俾你地講到眼訓。我想同班組仔組女傾偈格！但我唔想行囉～

>>August 21, 2003 at 10:46:53 PM GMT+8

2003 年 8 月 15 日 星期五 【晴】

第一日入 Camp。哈哈哈哈～ 我地四個 Leaders 約埋遲到 ^^" 不過我真係塞車架！　
遲左都仲要食埋麥記早餐先出現。不過早又點嘖？咪又係呆等？！等極都冇人黎第三組既 ><
聞說阿 Neth 揀晒 D 靚女入組，響 Camp 入面的確係數一數二。不過 D 仔就．．．咳！

先係係咁以燒下炮仗，跟住就玩「拍七」。唉～ 我真係一個數學白痴 -- 竟然輸三。
跟住拉大隊去左 LTA 聽個低能兒童廢翕，再去鏡房諗口號同 Dem Cheers。
無聊完一輪，終於可以過 Hall 掉低 D 野勒！D 房都唔係想像中咁細嘖，我覺得 OK 啦 ^^"
搞掂好似就落 Sports Complex 玩 Mass Games（我唔知我有冇數漏野呀！失憶嘛～）
我地組既表現都算 OK，係隔離組茅到七彩之嘛！加埋個 PIC 蠢，諗埋晒 D 唔 Work 既野嘖！
癲到咁上下我就同 Carol 走左去幫手霸檯。其實 Book 左既野，霸乜嘖？我真係唔明。
霸完個度，結果咪又係坐去第二度？！多鬼餘。所以話真係唔知佢地點做野架！
好彩餐飯都叫幾好食。我又唔知做乜喎，無啦啦唔想食飯，淨係食送。夜晚又嗌餓喇 ^^"

跟住既節目係條 Camp Fire。我地組都算玩得，教佢地又好肯學，仲學得好快添！
冇幾耐就可以 join 埋隔離 Group，個圈越圍越大 ^^ 好快就好多人跳喇！最爽係唔駛出室外。
不過跳到咁上下我就發現我對手又開始鬆散，D 骨又響度 Fing 黎 Fing 去，都幾得人驚。
唉～ 結果係睇人跳多過自己跳。淨係跳 D 簡單既，D 大動作又走黎走去既就唔玩 lu...

下一個節目係響鏡房開 Disco Night。留番俾你地 D 後生仔啦 ^^" 我都係坐埋一邊罷啦！
有啤酒 Sponsor 喎～ 但搵 Diamond Black 之類得唔得呢？點解要係生力清啤．．．
Des 同小傑又唔飲得，唯有唔飲啦！我都唔鍾意飲生力既。成晚就係睇住 D Camper 發癲 ^^"
睇啤酒勁飲大賽一知道原來 Dicky 咁飲得，倒落去一樣 @@" Vicki 仲勁～ 都話你 Wet 妹架啦！

夜晚返 Hall 就真係肚餓喇！食左個杯麵都唔夠 ^^" 沖完涼出黎仲食左包薯片 =D
跟住吹下水、洗下衫，乾埋，搞到差唔多五點鐘就返自己房訓覺 lu... 個冷氣好凍呀！

>>August 21, 2003 at 5:18:43 PM GMT+8

2003 年 8 月 14 日 星期四 【雨】

又唔知醒 ^^" 拿拿聲執野就出去勒！落到樓下發現拎漏左 Goggles，搞到要撘的士去大學。
今日補畢架山，落大雨添～ 好彩有遮。補完過左沙田，去西田買完野，再去萬寧買 Dove ^^
跟住響麥記食左個 Cheese Burger，等埋魚魚就去行 Royal、Marathon、八折店。

其實今日既重點節目係去賽馬會公眾泳池游水！學生價，八蚊游三個鐘，抵到爛呀 =D
不過我都係有 D 低能架喇～ 游起水上黎會手腳唔協調 O_o" 唔識得淨係做手或者做腳架喎！
唔知想點咁。不過魚魚咁好陪我，又咁好心機教我，我要努力呢 o^^o 好開心～
Well-protected + Supported + Safe-guarded。Feel so close... "ien sei hai ias rogn sor ge es"

No one else comes close to you. No one makes me feel the way you do.
You're so special to me, and you'll always be eternally.
Everytime I hold you near, you always say the words I love to hear.
With just a touch, you can do so much. No one else comes close...

跟住返沙田撘火車。「今日游水開唔開心呀？」「開心呀！」返到馬鞍山，買埋鮮奶就返屋企。
今晚食米粉。又係 D 好頹廢既生活 ^^" 上網、睇電視。最有為已經係睇《同一屋簷下２》lu...

>>August 22, 2003 at 2:10:00 AM GMT+8

2003 年 8 月 13 日 星期三 【晴】

完全唔願起身。去完澳門返黎，超累呀 >< 但要去補習。補完即返屋企上網。
Heehee ^^ 揀左 D 相 Resize 左就 Post 上 Newsgroup，又 send 晒俾 Des 同小傑就出去喇！
走左架 89D，結果 682 黎先就撘啦～ 去邊？去太古城中心．Kitty 契媽屋企 ^^

本來都諗住上姑媽屋企「得一得」，但打上去冇人聽丫 O_o" 我都唔想。
小傑又未到喎～ 要自己一個人行 UNY 買野整沙律。買完、搵埋小傑就上去勒 ^^
Coffee 好似冇咁癲，不過都係好 High。魚魚就打黎勒～ 講完電話就玩狗。
因為由今朝到個陣，只係飲左包熱情果果然系茶！結果食晒媽媽整個 D 壽司既頭尾。
仲有要用鎖匙開既夏威夷果仁同埋要點醬既 Rice Cracker ^^" 我唔好架其實。
搞掂呢 D 就切生果撈沙律。嘿～ 邊切就邊傾偈，阿媽聽我爆大鑊聽得好開心 XD
雪好兜野就幫手開檯，大家都陸續出現，齊人就食野喇 ^^ 好好味呀～ ^^

食食下飯 Kitty 話我瘦左．．．XDDDDD 實在係全晚聽完最開心既一句說話呀！
本來驚太大兜既沙律竟然係清盤，實在係有賴大家咁捧場 ^^ 好味。好飽。
但唔知佢地講緊乜，講講下竟然講到話我有左個新既男朋友喎？！哪來～？Huh！
之後就係睇電視同吹水，竟然人十幾個人一齊坐響度睇「破冰轉身」><
仲食左件 Sara Lee 既 Cheesecake，大家吹多陣水就走喇～ 仲有打包既焗雞翼。

響地鐵站散左就去西灣河等阿 Ken 電話，約左佢食糖水。佢好慘丫！十點幾都未放工。
等等等等等．．．去左麥當奴坐。等到就去左間區內好旺既上樓舖食糖水 ^^
我嗌左個蜜瓜西米露，個蜜瓜唔甜囉～ 但都唔難食。仲 "Tark" 左人地幾粒珍珠 XD
邊食就邊吹水，佢講左好多返工 D 野俾我聽，食完就送左我去撘 682 返屋企。超累。

返到黎開電視，又有《X-Files 1》睇 ^^ 跟住都係離不開上網、沖涼．．．訓覺～

>>August 17, 2003 at 10:35:26 PM GMT+8