2005 年 11 月 16 日 星期三 【微冷】

起身返工,make up時係咁打俾老公叫佢起身返工!
差唔多8點先出門!9點3前返到去!
Um.........遲左出門!不過唔梗要啦~!佢0地點都好遲先返到!
返到去hea到唔知點講,有點悶!
跟住打日記,因為家部腦俾大果個仆街lock左!屌佢老味呀!
係公司打日記好煩,因為公司打字好唔同!太慢,太慢了!同pc好唔同!
Willy10點幾打0黎叫我拆左個文件包出0黎!
o.............原來入面有成渣野要改!仲係做緊果本書!
攪左成個月有多了!進度太慢!
老公今日要返工!Carly今日冇返工,所以下晝一個人食!
Lunch同EVA傾左陣電~專登食慢點,唔想咁早返到去!
點知Willy成兩點幾先返到!
下晝改下D客既圖,又做下我要做果本書,又改下野咁!
攪到6點多少少Willy走人先!
老公果時搭緊車返0黎,所以我都未走住!
做多陣先走人!同kiki傾左陣電!老公係地鐵站等我!
佢成身油呢~跟住我又唔想返家住,所以跟左佢去康寧!
睇左陣佢0地踢波!到8點幾就走人!
老公送我去搭bus!大家都覺得返工好累!
我清楚知佢勞動工作一定更加累!
但我對眼對住部腦成日都好累好累,加上唔夠訓.....
其實我冇嬲佢,冇發佢脾氣!可能我累個樣好似眼啤啤掛!
跟住佢就發我脾氣甩開我隻手!
每次....都係咁!每次都甩開我隻手!明唔明俾人甩開隻手感覺有幾難受?
以前從來唔會有人甩開我隻手!
事實原本我真係冇發脾氣!
見到佢咁,真係有點燥,我冇發脾氣,亦冇話d咩野,仲咩事發咁大脾氣?
之後係馬路佢話走返番去!我唔理佢!
其實.......我只想你泵下我!明唔明?每個女仔都想有男仔泵下錫下!
正常一個女仔會唔會返番專頭行番去泵番個男仔?仲要係街上...
事實原本我根本就冇發脾氣!我覺得自己真係冇錯,所以我先唔理走人!
唔係因為我唔愛!而係我太愛,想我愛既人都好愛我!想愛我既人泵下!
係條街上,佢第1次係街上係咁話我!
我好討厭!我講過,我絕對唔會係街上同人嘈!家人,男友更加唔會!
無論遇到咩事,我點都唔會係街上嘈!我都要面的!
唔嘈,只想留番面俾大家!街上會好多人望.............我唔鍾意!我唔鍾意俾人望!
行到去APM等車果邊...大家停左係度...........
我忍唔住,喊了!我每次到呢一刻我都變得軟弱,什麼說話都不懂說........
或者......我太懦弱,仲係唔成熟!只懂得喊!
呢個係我既缺點!每次都唔聲唔聲!
老公問駛唔駛俾時間考慮大家應唔應該一齊!
果刻.....我諗左陣.........因為我知我講左要俾時間,我要承擔呢個答案既責任!
每次我遇到呢D問題,我都會答唔駛諗,唔駛要時間諗.....
只因我可能太愛.......我知一但失去,我會好傷心.....
我一講,我就要承擔答案既後果,責任...
老公問我只係試我,但係其實.....係咪真係想放開我先問我呢問題?
我真係唔想再聽到第2次,因為.........如果我再聽到,可能...我會答需要時間考慮!
因為...問得出呢d問題,俾我感覺,已經唔在乎我咁...........

?

Um.........或者...我真的太愛.........愛得傻了!
其實.....我係咪唔識拍拖?





之後我0地傾左陣,最後老公都泵番我!
陪我等bus時仲係我耳邊講左樣野我知!
夜晚傾電時你叫我記得呢一日!要寫抵!而家,我打係日記度啦!
我會記得呢一日!--->十一月十七日!
你同我講過呢番說話!XXX



不過我仲未答你喎!等你將來有機會再同我講時,我先答你啦!~
你第1次講,咁大個仔第1次講!唔知係咪真呢?
雖然我唔知你講呢句野係真定假,但係我聽到好開心!
我覺得我下一次聽到呢句話,亦都係最後一次聽到!
係我人生內面只能夠聽兩次...唔知可唔可以呢?
我10點左右返到家!之後食飯,沖涼!
攪到11點幾12點同老公傾左幾句電就準備訓了!






sorry老公,今日我兩都有問題!
或者.....我唔了解你既脾性........
你話你鍾意D人講野夠直,我...講野唔夠直................
如果我講野太直,只害怕傷害別人.....
不過....我仍然想聽你講更多更多直話直說既說話!




>>November 19, 2005 at 6:19:54 AM GMT+8

2005 年 11 月 16 日 星期三 【微冷】

謝謝關心過我既朋友!
或者...........我真的很任性...

>>November 18, 2005 at 2:07:43 AM GMT+8

2005 年 11 月 15 日 星期二 【晴】


今朝７點７就起身,８點幾出門搭車去老公家!
好彩佢知醒起身!買左Ｍ記上佢家食!
１１點左右亞星打０黎!叫老公返工!幫佢老豆手!
之後叫醒埋亞業沖堆涼就去大圍!好彩亞業放假!唔係我都唔知可以去邊!
搭到去亞星係巴士站等我０地!去買野飲坐左陣公園!亞星話hea陣先去做野!
佢而家係咁搵女友!勁問我有無女識下!
um.......我點都覺得要放抵哂之前既,先可以接受到第2個!
唔係既話第2個一齊,會諗番起之前果個,會有個對比.....
咁樣....可能會掛住之前果個,令到唔能夠投入第2段感情!
我唔能夠............真的唔能夠!
同佢地行返去做野果邊我同亞業就行去搭ＫＣＲ落沙田!行去路程都幾遠下!
我同亞業行沙田！勁耐無試過同唔係自己男友單對單行街!
沙田好多舖都未開,仲裝修緊!
兩點幾我０地去左ＧＯＧＯ飲野！坐左兩粒鐘!
我問左好多關於老公既野！傾左好多野!
４點幾我０地再行多陣去堆廁所就走人!
去番大圍搵老公！佢地５點７就走得人!好!!!
之後又行返去搭ＫＣＲ!不過我０地去ＭＫ!
因為老公要買車既塵機!但係最終都買唔成!
去左報英文果度聽果個女人講解!因為我想報英文讀!
聽完走人,亞東０黎左!跟住我０地去九龍灣食飯!
唔知點解佢地叫果間野做龍記!話中學時改!
食完我０地去左德福睇下ＣＤ就上去打機!我同老公玩左舖!果個我以前都有玩過!
實在太耐無打機!由我返Ｂaleno已無點打機了!都唔係咁識打!
撞到子文同佢女友０黎打機!佢女友好恐怖咁!
打到１０點多少少老公送我搭車先!之後去搵番佢地!
德福整果Ｄ聖誕裝飾幾靚!好多波波呀!我即影了相!
老公偷了俾波波我＞３＜ 靚靚!
我想間房吊哂Ｄ波波呢~~一定好靚!
上到車無耐老公叫我開個袋!原來佢剛剛買左ＮＡＮＡ ＣＤ俾我!
偷偷地放左係我袋度!謝謝老公!老公自己本身都好耐無買ＣＤ了!
返到家飲堆湯即沖涼,吹埋頭打俾老公傾左陣電就收線訓!
好眼訓好累呢!唔夠訓,又行左好多路!
太耐無企得耐,要我企同行番咁耐,對腳有點累!
而家出街見到好多聖誕裝飾!聖誕節漸近!感覺好溫馨...暖暖的......
兩年無好好渡過這個節日了!



浪漫...係冒險,唔實在,唔認真,出軌,
浪漫........係要記一世

>>November 18, 2005 at 2:20:51 AM GMT+8

2005 年 11 月 14 日 星期一 【晴】

今朝出門前係老公身邊望左佢好陣子先走!佢仲未起!
返工﹐係老公家返可以８點８出門!
返到去ＨＥＡ!跟住又懶得做野!亞媽有打０黎!
lunch時早左半粒鐘落去！因為老公今日下晝要北上幫佢老豆!
唯有早點食飯!無約到肥雞食!
食完返去又多野做!每次willy返０黎就好多野做!
做做做,好彩今日只ＯＴ半粒鐘!今日終於出左糧!
不過仲差我５日糧過幾日出番俾我!
收工老公行到我樓下等我收工!有點意外=﹏=
老公好少行到我公司樓下等我呢~!肥雞都係度!
不過佢過馬路就走了!跟住我同老公去左ＡＰＭ Ｋ﹣２買埋我之前想買果件衫!
之後送我搭車佢就即去搵番佢老豆食飯!
返到家佢地留左飯俾我!食完飯上左陣網打算hea陣就沖涼!
點知我玩玩下電腦大果條仆街小我!
我又唔理佢!跟住又熄我部腦話裝左密碼!
我屌呀!我今個月仲要交番哂Ｄ功課家!
之後佢又想打我!癩０家!點解Ｄ脾氣會咁大?
亞媽跟住又小我!夠了!好討厭!我唔係反叛囉!
可能大家定義唔同!你地同以前年代比而家係無得比！
同埋睇人唔係只睇外表囉!有Ｄ外表好斯文,但反而果Ｄ衰到仆街!
點解成日管我拍拖Ｄ野?呢Ｄ係我既私事!
同埋將來點都好都係我自己既事同問題!
別人講既野只係意見!
唔該你地唔要面我都要面呀!已經夠了!我唔想成日因為呢Ｄ少事嘈!
呢Ｄ根本就唔係一個問題!
今晚我０地又嘈得好勁!原本我想落落街散下心!
跟住佢地唔俾我出去!FUCK!
嘈左成兩粒鐘我先去沖涼!沖完打俾老公傾左兩句就收線打堆日記就訓!
打算聽朝晨早去搵佢!
今晚真係好唔開心............
um........................唔通我真係比以前幼稚了?


>>November 19, 2005 at 5:28:11 AM GMT+8

2005 年 11 月 13 日 星期日 【晴】


今朝老公早過我起身,好少可...我12點先起身!
之後慢慢make up1點多D出門!打算食野,但係最終都係出去先食!
去到灣仔首先食既係M記薯條!因為我想食!早餐,lunch都未食=___=
跟住食完我0地行去CWB,原本打算食30蚊飯,但係我唔想成日去果度呢~
去到CWB諗唔到食咩,都係拎左ipod同幫JOJO整ipod先!
果個男仔好勁!D英文好掂!我都好想好似佢咁!
老公話佢型喎~都OK型既!不過可能留鬚會更加型!
攪掂好哂係times等埋亞業先去食野!亞業0岩0岩收工!
去左味千!子文係CWB果間做!
行去時居然見到YOYO!佢係人群中唔係咁突出!
我第1眼見到就覺得好似,之後老公話YOYO 0黎,咁即係冇睇錯!
佢真人唔高,好瘦,對眼好大!不過佢D皮膚好差,D粉浮哂上0黎!胭脂打得好勁!
去到味千好多小食,我0地食唔哂,亞業日日對住都唔會食!
我個拉麵好多,食唔哂~不過我覺得係亞業同亞東果間度食好D!因為會有更多好野食!
食完之後去第2果個做果間K-2度簡衫!簡好叫佢幫我買!
簡左之前係APM睇中既外套!就咁睇好平凡!但係著上身我覺得幾好!
之後買埋個袋,因為平同埋夠大個!得閒用0黎襯下衫!
行完之後就搭603去老公家,因為佢老豆返左0黎,所以我0地都唔可以太遲返去!
返到去hea左陣又落去,老公個老豆話要食飯,佢冇食lunch!
落到去德田首先去藥房度量血壓!老公都有量,佢正常呀~
量完去食野果個地方同老公媽一齊食飯!
o..........我食左唔多,因為3點幾食既野都未消化好!
6點幾又食過,唔多掂!食完上左老公家!好眼訓,想眼覺!
老公想留我係佢家訓,不過如果我真係要走就要快點!廢事攪到咁夜!
佢話我著裙驚走光,要車我返去!
跟住我唔小心插到佢隻眼,第2次了!好對唔住呀老公!
我唔係專登!當我想問佢有冇事時,佢甩開我,仲用粗口屌我!
燥哂!又話我冇心講對唔住!其實我唔係,我連去問候都甩開我,咁我仲可以講咩野?
我真的有點嬲,橫掂都要返家,決定自己走!
老公跟住我!佢唔俾我一個人搭車走!
係佢家樓下拉扯左一輪,最終都係坐左佢車返大埔!
返到大埔我知大果個今日收工,我唔想見到!
原本都已經唔想見!因為佢0地成日係咁勁打0黎!好煩!我知佢0地著緊我!
但係.............我唔知點講!總之我一聽就會嘈哂!我唔想咁!不如唔好聽!
老公車到我去家樓下,跟住聽留言,聽到大果個既留言!
燥了!最後諗左一輪都係唔返家!跟住佢0地去廁所同買野飲就返番藍田!
返到去,去左平田去廁所同去welcome買左D朱古力就行返去!
行返去途中撞到老公個fd!我第1次見佢!
不過感覺極度唔良好!一拖三,佢話最勁一拖四!
其實咁樣代表咩?代表溝死女,好勁嗎?
我都唔明咁MK,又矮既人都可以溝到咁多女!
D女其實應該會知囉!但係如果知又點解仲可以一齊?
呢D愛情我真係唔會要!一拖二已經好過份了!仲要拖三拖四!好唔掂!
咁樣我覺得好唔自愛!好易有性病!自己有算啦!唔好連累身邊既人!
佢0地傾左陣計之後就返老公家!
老公媽見到我返番去即同老公個老豆講!
跟住佢0地話我0地灑花窗!跟住老公媽好嗲咁同老公個老豆講又要落街灑!
其實老公媽係一個好嗲既人呢~
um..........可能我生於一個好認真既家庭!由細到大都見唔到呢D野發生!
亦都好少見到老豆老母會拖手等等!
唔知由幾時開始已經冇一家人出街!唔知幾時開始已經冇同過老豆出街!
好耐.......都冇試過一家齊齊整整咁食飯!
今晚....成日晚我都冇聽到屋企電,淨係識到飛線!
其實........我知我真的很任性!
咁樣做,會攪到家人對老公更加壞印象!好對唔住呀老公!
如果要變番好,相信一定要更長更長既時間先得了!
一日...最衰都係自己!我唔識得點樣處理任何事!或者要經歷過先識得點做吧!
沖完涼之後洗埋頭,點幾左右就訓著了!
聽日仲要早起返工!返工返工.............................為了將來我要努力!
PS:7個月啦~!老公我愛你!




















>>November 18, 2005 at 2:17:42 AM GMT+8

2005 年 11 月 12 日 星期六 【晴】

今日居然訓到成點起身!好耐未試過!可能琴晚太夜訓關係!.....
起身冇耐就同老公電!係廚房見到有草猛!嚇死=___= 好彩佢係好高好高,冇點跳!
之後我煮野食!老公同佢媽飲茶!
到3點幾4點make up!同EVA聯絡!今日佢話約今日去睇戲!
咁約早左少少!5點幾出門,禁錢搭車!係大廣見到TOTO!
佢食飯,去左姐姐度買衫,我之前訂果件都未買添!得閒要去買番!
發覺...而家好少左同TOTO見面!miss u~!
其實我估都估到星期日一定買唔到飛如果唔預早買的話!
去到等左陣EVA同shan 0黎!真係如我所料買唔到飛呢~
最終我0地等埋美玲就去食飯!
搵到美玲時亞敏打0黎!前幾日佢凌晨打過俾我!
但我第2日要返工,所以佢搵唔到我!第2日搵番佢,飛左去留言!
原來佢一個人自由行身份去左韓國旅行!
佢真係夠造呀!最近同男友散了!果個男人真係衰呀>0<
呢個世上好多衰男人!FUCK!!!!!!!!
當亞敏係水泡!希望亞敏你唔好咁唔開心啦!
我永遠深信一個比一個好的!所以下個一定會更好!
今日等佢0地果時同老公傾電時我話想打邊爐!
點知今晚就同佢0地打邊爐!因為大家都諗唔到食咩飯!
而我又想打邊爐!跟住我0地去左兆萬11樓果間度食!
88蚊任食兩粒鐘!其實我覺得100蚊內都算平0家啦~
行去時撞到朱仔!勁耐無見佢了!
問我去邊!見到佢同出面Ｄ朋友一齊!
佢好似高左咁!我係MK撞過佢幾次了!估唔到今日又撞到!
上到去打邊爐果度!大家傾下計,um.........好耐冇見過美玲了!
佢而家俾我感覺冇以前咁男仔頭了!女性化左!
亞shan仍然係咁慘...佢男友實在太差勁了!
原來決定今晚去老公家,點知佢家水渠塞左都未整好!
又叫我唔好去,之後我話好,但係佢又話我好似去唔去都得咁!
其實我一早就決定左去佢度,我拎定左條裙果D打算聽日著!
如果我唔想去我就唔會一早拎定啦!~
不過最終我食完冇同佢0地行街10點幾就搭小巴去搵老公了!
因為要去家強度沖涼!襯家強老豆未返到家就沖左先!
係平日老公同家強接我!上到家強家老公媽0岩0岩沖完涼!跟住佢返家先!
原本我自己一個沖涼,點知老公話一齊沖!佢驚我攪唔掂!
因為家強家都幾烏漕,浴室好細!
我又未落妝,D野係老公家~!於是老公幫我洗頭! >﹏<
沖完等埋亞業沖埋涼就走人!去左7仔買左野飲就返老公家!
返到去落妝,之後同佢0地睇左陣TV,佢0地睇波!
跟住我睇下亞業買果本雜誌就返入房準備訓了!
今晚...屋企都有打爆我手機!





今日見番中學幾個朋友,發覺......好耐冇見過班中學朋友!
好掛住各個朋友!最近大家好嗎?有冇想起我?
以前返工既朋友又好嗎?生活好嗎?還在努力工作嗎?
想念以前返工既日子!是甜甜酸酸的!永遠都記得那些日子!
MISS ALL FDS

>>November 19, 2005 at 6:54:05 AM GMT+8

2005 年 11 月 11 日 星期五 【微雨】

今天訓到9點幾起身,之後make up!
因為老公話今日同佢亞媽飲茶!So我要早點起了!
原本打算差唔多出門時亞媽返到,跟住同亞媽嘈左幾句!
講返工D野,我返工到而家都仲未出糧!亞媽屌9我話搵工靠自己實力!
跟住我就答佢:份工我冇叫到玲E搵,係你叫玲E搵的!
當時我真的很燥!忍唔到講左呢D說話!事後我覺得自己好唔0岩!
條路...係自己簡!我成日望番去以前,冇用!
以前人工係比而家多!比而家開心!但係長遠計,返呢份工並唔係一件壞事!
但係..........而家真的有點難捱!咩野都靠自己!冇錢點生活?
再咁落去,我將來既夢想就會幻滅!
跟住我好燥咁出門,比第2果個早少少,但係等K巴開車等左好耐關係!
點知居然係K巴撞到佢,跟住一齊搭KCR!
同佢傾左好多野!傾大果條仆街啦~而家...我0地都冇野同佢講了!
話哂一家人,大家就大家0者!脾氣唔駛咁大呀?實在忍受唔到!
去到藍田老公係MTR果邊接我!
庬係識去美心的,但係我入到去未必搵到佢0地!
返左呢份工之後我都已經冇戴con了!
其實睇野係好蒙,但係份工對住部腦太耐,做既野太費神!
所以我對眼真係好累,冇辦法戴con!
坐抵冇耐老公媽出去話打電話!跟住同老公傾左陣計,忍唔住又喊了!
其實真係好少事,但係發覺自己越0黎越懦弱!
覺得自己好多時都經唔起考驗!人....係要捱先學懂成長!
要捱過先知咩野係重要!唔捱下,將來又點會有更好生活呢?
其實我只係發洩下,一陣就冇野!
飲完茶之後同老公落官塘搵肥雞,傾左陣計陪佢0地行到去花園我0地就去APM睇戲!
買爆谷果度勁耐囉!D人做野超慢!拉哂龍了!
準時入去睇!Um...............一定有第2集的!
因為而家NANA出左13期,佢播都係播得果5期都唔知有冇!
仲要cut左好多!我覺得漫畫睇好睇好多!
而且套戲個男主角真係好唔掂呀!個樣唔掂,身形超唔掂!總之就好唔掂!
最好都係兩個女主角,其他都冇!
劇情冇交代奈奈對愛情既睇法!冇講到奈奈之前點樣俾人呃!
冇講到佢點樣識章司佢0地!總之冇睇過本漫畫既人未必知套戲講咩野!
睇完之後我0地返左工廠區搵肥雞!買埋野飲上去!
傾左陣計,坐左陣hea左陣5點幾6點走人!
亞魚同肥雞家人食飯!我同老公行左去牛頭角剪頭髮~陪老公剪!
剪出0黎個頭都幾好呀!~亞聰話我個頭唔可以拉直,只有修剪!
呀~~~咁攪法咪要等成年先可以再電個頭囉?
好彩我本身D頭髮唔係生得慢0者!唔係就PK了!
剪完亞業打0黎又話等埋佢先,但係等左半粒鐘佢都仲未0黎!
之後我同老公唔等佢了,各自返家!
去左老公家食飯,老公媽煮飯,但係佢家有問題!
個渠塞左!由7點攪到10點先食到飯!仲未整好!
樓下果戶唔肯開門俾我0地整!攪到老公媽同老公今晚要去家強家沖涼!
老公車我返家先返0黎沖!返到家11點幾!
我等埋老公返0黎先沖!大果條仆街真係好仆街!
扮哂野又叫亞媽星期一煲湯,又話返0黎陪亞媽食飯!
食屎啦,次次都係咁!咩野都係口講,口講扮到幾好幾好!
我真係好唔鍾意佢呢點!食屎!!!!!!!!
沖完涼之後如常玩電腦,織左幾行頸巾!
同老公傾左幾句電之後又上下網!
同wing傾MSN!跟住老公打0黎就冇同佢傾MSN了!
同老公傾..........um.........其實我知係我唔0岩!
喊左好耐...我又喊了!其實我唔著緊我唔會驚你以前女友搵番你!
我知一齊得就要信任,咩野都要講出0黎!
但係有時D野你知我都知,唔駛下下咩野都講到出面我覺得...
可能係我性格問題!我可能真係咩野都收收埋埋.....
其實........我都付出左好多!我從來未試過付出咁多!
我覺得自己咩野都冇哂,但係我冇後悔過!
愛唔愛我覺得唔需要諗!愛就愛,唔愛就唔愛,唔會有中間!唔需要時間諗!
所以我唔想聽到咩駛唔駛俾時間我去諗!
如果我話要咁即係點呀?即係唔知愛定唔愛?唔知即係唔愛!
難道你想聽到我講要時間去諗嗎?
我唔係覺得朋友比你重要!我覺得兩樣都重要!
EVA叫我去飲酒我都冇去,因為你唔鍾意!
同班朋友唱K,只得男仔,你唔鍾意,我冇去!
如果我唔著緊,你唔鍾意,我可以唔去做!
朋友同你同時間在場,故唔到一邊呢個情況一定會出現!
雖然我係明白,但同時我會感到唔開心!
因為必定會怪對方你應左邊個邊個先,先應我!
好多時呢個情況都發生係我身上,你會應左朋友先應我!
其實我會唔開心,係因為你應左朋友先!
但係都冇法!朋友同情人都在場,呢D情況一定會發生!
傾....................攪到4點幾先訓到!






家人,愛情,事業,朋友....................
原來人大左真係要學習點樣去處理各種問題!
問題不斷咁煩擾我!唔可以逃避問題!問題最終都要解決!
現在......我有好多野都要去學習!
學習點樣做人!




世上的另一個我(Nana)
導演: 大谷健太郎(Kentaro Otani)
主演: 中島美嘉(Mika Nakashima), 宮崎葵(Aoi Miyazaki)
片種: 劇情
級別:
日期: 2005-11-03


小松奈奈（宮崎葵飾）前往東京，希望能與男友多點見面。
在火車上，她剛好坐在新晉搖滾主音大崎娜娜（中島美嘉飾）身旁。
二人於東京車站各走各路，但命運叫她倆因爭奪同一層房子而再遇，還成為了同屋主。
雖然性格迥異，但內向的娜娜與外向的奈奈相處融洽，成為好友。
娜娜遇上一位低音結他手，並為她的舊樂隊「黑石」帶來嶄新風格。
天真的奈奈終於發現愛情道路其實十分崎嶇。
失落中她得到一個好消息，就是贏得一張觀看她心愛樂隊TrapNest的演唱會門券。
豈料，娜娜竟拒絕與她一起看。
奈奈這才得知好友的秘密－－娜娜原來一直愛TrapNest 的結他手本城蓮，
亦即是她的前度男友兼黑石樂隊的前低音結他手。TrapNest 的演唱會掀開序幕，
本城蓮在樂迷歡呼聲中踏上舞台。娜娜靜靜坐到前排的位置上，眼淚隨記憶緩緩流下。
到底她和蓮的結局會是…

>>November 19, 2005 at 6:52:47 AM GMT+8

2005 年 11 月 10 日 星期四 【晴】


今朝冇返到工,10點幾就醒了,見訓唔翻11點就起身!
老公訓到12點先肯起,真係好,我都想訓耐點/_\
老公起身就發脾氣了!跟住佢晾衫,而我跟住做下功課!不過冇心機做="=
咩野都諗唔到,呆左....望街!
老公做功課時我make up,兩點幾3點就走人,搭出灣仔打算去地產舖印!
我0地去到買左個包係地產舖等濕東0黎!
但係我去到禁錯制,攪到份功課有問題,之後又決定左唔交了!
老公份功課D字pt太細了,之後又唔知點樣佢又冇交!
等埋濕東攪掂好買埋樣好重要既野之後就返school!
男仔君係樓下等,佢交果份野根本唔係自己做!
就咁copy網上而一段野就印出0黎交,想俾人小咩...
濕東果份都俾Raymond話唔好!
其實都唔知想點做既!又唔俾著相,得字同埋D形狀可以整落去之外...都幾難下!
一線..............好事!
攪掂好哂D野就入去3號班房執番好D功課拎番走哂!
原來我真係唔係好多!見到人0地果D做得好整齊呢!~
我決定左星期一開波做功課!至少都畫下layout,諗下應該要點攪先!
唔係我唔夠時間做功課!我要交番哂D包裝同埋Raymond呢兩份功課!
有時間先做番廣告!唉~~~~鬼叫之前自己一直懶,D野遲遲都唔肯做!
做最一日做梗係唔夠時間做啦!
而家得番十幾日,唔知夠唔夠添得0家!
我承認自己唔夠人0地咁勤力,D野一定做得冇人0地咁好!
但係我真係唔想畢唔到業,唔想白廢事呢兩年幾三年既時間!
就算我搵到設計呢行,我都要有個証書証明俾人0地睇下0家!
攪掂好哂D野之後陪佢0地打左陣機就搭bus返藍田!
同埋老公媽食飯!EVA打0黎問我今晚去唔去飲酒,其實都幾想去!
因為真係超耐冇去過after 5果D了!不過老公唔鍾意,算了~
問我星期日去唔去睇戲!當然去,好耐冇見過班朋友,雖然得果幾個去!但都好呀!
食完飯老公同我搭小巴落APM,買定飛聽日睇NANA

LOVE FOR NANA

2005 年 11 月 9 日 星期三 【晴】


今朝返工遲到,遲了4,5個字,出左隧道之後居然塞車!唔知咩事...
落車後買個包返公司食!朝早超hea囉我!仲可以同老公傾左幾句電~
Willy淨係叫我排版!不過今朝老公又發脾氣.........
lunch早左少少落去!男仔君都係度,佢0地今晚去踢波!
食完送到我返樓下就走人了!一上到去Carly返左!佢今朝成朝唔見人!
Willy4點幾差唔多5點先返到!所以下晝冇野做係咁同Carly傾下計!
um...................平時好少同佢傾計的!
而家終於知佢份工做咩野!原來係做關於電既工作!
月入過萬,不過佢好free!同埋佢只讀過短期既出入口課程!
係果間公司做左8年都有!太free了!佢鍾意自由自在!
原來佢流過兩次產,生唔到小朋友,但係佢好鍾意小朋友的!
佢又講下佢以前拍拖,原來佢初戀就到而家結婚!仲拍左好耐!27歲先結!
wo~~~以前果D年代既人係唔同D!好多愛情都係純潔好多!
傾傾傾......到Willy返到之後我就好多野做!
佢要我改兩個圖!又要我整呢樣果樣!
原本要我寄信!好彩Carly佢間公司有人送野果D!所以可以幫手寄信!
唔係又要我白行去寄!FUCK!
遲左成粒鐘收工!7點多D先放我走/_\
老公一直都係度吹我!但係佢唔肯放我,我都冇法="=
唔好意思呀老公要你等我咁耐!知你企到腳累,但係我返工都好累!
對唔住...要你等左我粒幾鐘!
一落到樓下就見到湯威同佢女友係度,佢0地0岩0岩0黎到!
之後我就跟左佢0地去康寧睇佢0地踢波!
期間同湯威女友嘉兒傾計!佢好多野講的!
睇睇下我0地決定左去行陣,行左去APM,不過就咁行左個圈就走人返去!
佢0地仲未踢完!今晚佢0地錫波好齊人!
見到佢0地玩好攪笑!果個亞天我第1次見,佢側面笑果時幾似黃宗澤!
只不過佢單眼皮的!原來佢係爬龍舟的,真係勁呀!!!
仲見到亞靜,睇相我以為亞靜係幾高果D人!原來唔係!
可能因為相中既佢係坐係度,同埋佢個樣唔細個啦~
不過佢對佢亞妹好好呢,返家前又買埋野食俾佢!真係好亞哥呀!
um.............原來男仔呢個年紀都仲係好鍾意玩打架呀果D~
睇到佢0地10點幾先可以食飯/_\ 我成日未食過野除左下晝點幾食左!
餓死人啦!食完同埋佢0地搭小巴返老公家!亞君上埋0黎換衫拎野走!
仲借左我100蚊話打的喎!佢走左冇耐我就打電俾Willy!
我決左聽日唔返工,因為我要返school交功課!我太累了,借D易唔返!
因為我下個月就轉全職,到時一定辛苦過而家好多!
而家有得休息都盡休!唔想聽朝又咁早起!
我已經冇返家訓,原本諗住第2日返工係老公家訓唔駛咁早起身!
但係諗諗下都係唔想咁早起!所以都係話聽日返唔到!
呀............我到今日都仲未出糧呀!咩公司0黎0家!咁耐都仲未出糧!燥了!~
老公,亞業佢0地沖完涼我先沖!
好累呢~~~但係我又唔可以即訓著!同老公傾左陣計!
兩點多少少就訓著了!


















>>November 11, 2005 at 5:21:05 PM GMT+8

2005 年 11 月 8 日 星期二 【晴】

今朝差唔多成8點先起身!朝早仲聽到老公媽同老公個老豆勁快手咁出門!
亞業出左門老公都仲未起身,我叫左好耐佢先起身!
9點半先返到school,基本上我平時又屋企出發都成9點半先返到去!
我仲要7點起身=_____= 係老公家出門真好,遲成粒鐘起身都係咁上下時間返到去!
又係上排版堂,唔識.............覺得呢幾堂都白費了!
今堂仲要係最後一堂,以後都冇堂上了!
係正形上完哂所有堂,而家等做畢業作品.........
Raymond講番中期評審有咩人好同有咩人唔好!
我...係唔好既其一個!
Raymond同校長一齊評審!但睇張紙Raymond冇話我唔好!
話我唔好只有校長,我承認我交唔齊功課!
包裝我交唔齊!但係我平日做D野唔係真係太差0者?
仲咩講到我真係爆差!我覺得校長唔係咁鍾意我!
因為每次我都扮見唔到佢,同埋佢成日黑面果D!佢好9!
11月28號我要補番包裝返school!又要做功課了!
仲打算下星期轉全職,而家轉唔到!要等下個月先得啦~冇錢冇錢!
今日可以拎番走D野,但我冇拎,打算得閒先返去拎番!太重!
放左學同亞倩食早餐!好似有一排冇同亞倩食早餐!
佢話我肥左.............呀~~咁我要食少D野先得啦!
可能最近成日食垃雜野關係吧?
同埋佢話我隻眼腫,眼黑圈黑左!
我唔知係咪水腫呢?不過我而家返工成日都唔夠訓,成日訓5粒鐘左右就返工,好累!
對住部腦成日好辛苦,攪到眼腫腫!
食完之後去機舖搵老公,跟住陪佢拎完錢去完廁所搵番亞星佢0地去食野!
佢0地食完之後我同老公行番去搭bus!
返到佢家幫佢手晾衫收衫!3點幾亞業收工返到!
原本我0地打算去睇NANA!我真係超想睇,由知佢開始拍攝果時我已經好期待!
不過當我0地搭地鐵時先知老公媽收5點!
我0地打算去九龍灣睇的,但老公同佢媽要出MK報英文!
老公媽收咁早,而且拖左好幾日,咁唯有睇戲改星期6啦/_\.....
老公,你話果日買定飛0家!哈~!
跟住同佢0地去食左個下午茶就送我搭bus走人!
搭bus訓死左,好累好眼訓!落車即打俾老公,佢果時先0岩0岩上小巴!
等老公媽等左幾耐下!行返家6點左右!
7點未到就食飯!都係得我同亞媽兩個食!
食完上下網,打下日記,期間同老公傾左陣電~之後沖涼!
沖完涼再上左陣網就返入房織左幾行頸巾,漏左針,好彩救得番!GOOD~!
老公今晚去肥雞度jpge file!send e-mail!
所以我訓前打俾佢傾左幾句先訓,12點半左右就訓著了!
返工唔可以太夜訓,而且呢兩日都好唔夠訓,兩日夾埋訓得果9粒鐘渣!累爆!









>>November 11, 2005 at 5:23:33 PM GMT+8