2006 年 7 月 19 日 星期三 【晴】

今朝起身見到老公琴晚既sms!
見到其中一個話揸左車出去,攪到架車冒哂煙泊左係強家車房下面!
我仲知老公攪到3點幾先返家,send左個sms俾我!
今日你同我講因為我琴晚,所以先揸車出去飛!
我同你講!無論下次發生咩事都好!
架車有問題就唔可以揸出去,知道未?
返工!~熱.......呢幾日個天都好猛太陽!
好多野做!做唔完~
手頭上有成十幾樣野要我去完成!要快點先得!
我知我諗野唔係咁得,做野又慢!
不過我做野已經細心過以前好多!
錯處比以前少了很多!做事又會翻check兩次!
今日有點燥燥地!
老公打0黎問我今晚去邊!
我仲以為佢叫我去佢度啦~
呀!難得放假都唔想同我一齊?!
有冇攪錯!!!!!???
佢話搵肥雞!
之後我真的燥哂了!
放工佢0黎接我收工!但係我唔多想見到佢!
原本打算走人!下星期三先再見!
今日我又遲左點收工!
而佢又係send左幾個sms 0黎話不見不散同埋一定會等我!
結果我冇經1樓經左G走!
肥雞同亞業都一齊等!亞業今日放假!肥雞0岩0岩收工!
老公驚我經1樓,所以出左去等我!
老公因為琴晚架車有問題,所以泊左係強哥車房下面!
今日收左搭小巴過去啦!~
勁多蚊囉!!!咬死了!好辛苦!
老公揸左一陣車,見又冇咩野!
知道架車都冇得救,強哥都唔理了!~
叫老公揸走,又唔敢試下架車先攪笑!
係人都知架車有好大問題啦!
揸到成架車冒煙喎!點知幾時爆0家!
之後揸返老公停車場!肥雞去平田搭小巴返家~
同埋亞業一齊去welcome加送!
咁急先話返去食飯,老公媽買唔夠送!
5個人食果少少送="=.................................
老公知唔夠送蒸左水蛋!不過失敗了!
我記得初初同佢一齊佢已經話有個亞婆教佢蒸的!
又話試過真係掂!
雖然今次失敗,不過唔梗要啦!~
其實今次都係因為唔夠送先蒸水蛋!
0岩0岩同老公一齊果時已經話蒸俾我食,蒸到而家都未蒸到!
同埋以前話整咩整咩俾我食!但係都冇做到...
你叫我煮飯俾你!其實我會煮!
而家唔識,唔等於將來唔識!
將來有家庭既我一定會煮!我唔會餓親大家!~
食完飯食左點朱古力!
勁耐冇食!其實我因為冇咩送,都唔多想食了!
亞業同老公落左去買野食!因為唔夠食...
我沖涼!~沖完涼hea多陣!
點幾兩點就訓了!明天又返工~!

>>July 21, 2006 at 4:01:05 PM GMT+8

2006 年 7 月 18 日 星期二 【晴】

唉~原本打算明天唔返工,但係lunch之後Willy彈左好多野俾我做!
而家手頭上有好多job要跟!
所以我決定明天都係返工了!
打算連續返4日工!
老公明天放假都唔可以一齊添~
不過算吧啦!佢有佢既朋友~
放假都未必要我!
唔知等到幾時我0地先可以用一日放假呢?
以前唔會有咩期待!
而家會期待大家有一日可以開開心心咁出街拍下拖~
但係我同佢放假既日子都唔同!
所以真係好難就!佢好多時放平日!
而我必定放星期6,日!
um...老公都好耐冇接過我收工了~!
不過冇法啦!返工要梗!
Willy5點左右就出左去見客!
佢走前同左佢講轉全職!
跟住我問人工方面點樣!
之後佢話同大老闆傾!
又話工作量係同人工乘正比!
真係FUCK呀!識咁講就0岩啦~
講真,我而家PT,人工咁少,返工又少!
工作一定冇咁好!
遲下轉全職返足唔同講法囉~!
我同左佢講如果得5千蚊糧,初初入0黎做果時就係!
但係而家應該唔係呢個價!
同埋我供埋MPF得番好少!
我都估到佢講果D人工同工作點樣果D 0家啦!~
唔多唔少我已經對左佢差唔多成年!
佢大約係咩人都知點!
之後我6點走人!去MK食飯!亞爺生日!
不是太多人,一有一圍0者!
有D飛左去工幹!
食到10點左右先走人!返到家成11點!
沖埋涼打俾老公!佢0岩0岩收工!GOOD~
之後點幾先準備訓覺!
老公成日話都未講完,bye都唔講就勁快cut線!
唔通真係咁多電話打俾朋友?
真係咁急到唔想同我傾就快快收線急住打俾朋友?
我真係唔知囉!~
今晚.....收線,打返俾我,電話...我唔會聽!算吧~
有咩,第2日再講!
不過,講得多都冇用,快快的收線!
真係好討厭!不如唔傾好過了!~
明天又返工!
我要慢慢習慣下~!努力!

>>July 21, 2006 at 4:03:48 PM GMT+8

2006 年 7 月 17 日 星期一 【微雨】

返工啦~
終於返番工啦!
不過.......Carly個姪女lunch之後0黎左!
原來佢而家逢二,四定係唔知幾時會0黎跟Willy學野!
Willy教佢野喎!~
其實...我唔知想多個人係度做野呀定點!
又會咁0岩大家都係讀設計!
讀設計既人真係太多了~
而家終於見到個個樣細過我既人!
佢好似係大過我一年定係點樣!
但係個樣勁似讀書果D樣!
真係幾細個下~
原本朝早都係hea下咁樣!
lunch之後都係改下野!
好快收工~
去了老公家!
老公媽打俾我叫我去食飯飲湯!
o......佢煮飯真的很慢=.="
等到9點左右先有飯食!
我7點左右就上到去...
我記得我以前煮飯只係用1小時左右就攪掂好!~
煮唔夠飯/_\ 每人得細半碗渣...
食完飯hea陣沖涼!
等老公返0黎!~
好幾日冇見了!missing u~

>>July 21, 2006 at 3:31:17 PM GMT+8

2006 年 7 月 16 日 星期日 【乍寒還暖】

3天....3天既展覽已經擺完!
今朝訓到11點幾起身~
hea陣煮野食!之後make up打俾亞星!
約了3點幾係沙田!佢老豆架返工車係沙田!
呀~幾天沒有見老公了!
咁0岩我今日又搭KCR!
於是佢係九龍塘話佢搭KCR!
而我就出門!睇下就唔就0岩見一見!~
原本我打算佢0地一定遲所以想一條友係大廣行下!
最終都係冇,因為想見下老公~
去到我仲早少少,陪佢等公司bus!
勁快到!kissing~~~~~
跟住我就走了!
如果唔係亞星話車埋我0地...
我原本都打算今天一條友出去行下,去TST較番好隻錶帶!
買左成個星期都冇wear過!好想wear囉!~
唉~又唔知等到幾時了!因為過埋今天之後幾日我都要返工!
係沙田KCR間7仔等亞星同亞君,之後拎車!
嘩~架車好嚴重!嚴重惡劣!!!
原本唔打算坐車頭,結果都係坐了!
因為後面真係唔坐得人囉~
去到尖咀亞星去利時整鞋,點知間野未開!
跟住我0地去味千食住野等濕東!
有米錶!但係過唔到八達通!
亞星爛命唔理走人!
結果真係俾人抄牌,多謝$320呀~!
原本亞星唔收我0地錢車我0地!
因為抄左牌,結果每人夾番40蚊俾佢!
不過算!~我來回車錢都係番度!
去到收場,因為我0地遲左點,D野差唔多執完!
現場好混亂!!!成地紙皮!
好多板都拆哂!我0地勁快手咁收自己個地頭!
大佬見到我一個人執!跟住問我駛唔駛幫手!
之前同佢冇咩野講!估唔到今次擺展因為斜對角關係熟左~!
原來佢都幾nice幾好人的!
執完哂佢0地先0黎,差老公果個未執!
執完我0地就拿拿聲走人!
唉~見到好多都有男友幫手開場收場......
我都冇既="=.............................
冇法...老公兩日都有野要攪同埋返工!
我0地快手同埋唔夠手拎,於是紙皮都唔拎就走人!
老公果D架好重!拎到亞君死死下!
亞星唔識路,我0地中環一日遊!
繞左幾個字先出番去!差點上左山呀!
好似行番之前同老公去沙灘好條路咁...
終於過左海啦!~點知呢佢0地貪平唔肯經大佬山!
結果,迷唔了!
九龍城,黃大仙,竹園!
突然記起亞wing係竹園住!打俾佢!
我0地都唔知用左幾耐時間先可以出番去!
次次指去沙田路牌都唔0岩既!
攪到我0地行錯哂路!
佢0地0黎大埔打機!因為佢0地唔想返家住!
真係好彩呀今日!次次落大水時都係架車度!
車到我返家時都落大水,點知我一落車就冇落大水了!真好~!
原本今晚打算出去搵老公!但係老公唔多想!
原本又係佢琴晚叫我收完場去佢家等佢返!
真係神又係佢鬼又係佢!!!
燥哂~叫我0黎就0黎咁!
唔等啦!下次我唔會咁樣等之後出去!
9點幾果時累得濟,訓著左到11點多先沖涼!~
早知我一早沖涼訓覺好了!
唔知係咪慣左幾天夜訓,再加上之前又訓左陣!
今晚覺到兩點多先訓得著!
之後仲要訓下醒下!真辛苦..........

>>July 18, 2006 at 3:26:35 PM GMT+8

2006 年 7 月 15 日 星期六 【乍寒還暖】

今天終於可以訓晏點!
訓到11點幾12點起身~
係家煮公仔麵食!
下晏係家上下網等等...
老公返工,冇見面!
而我今日要睇black eyed peas演唱會!
終於到了今天!~
不經不覺嗡就16號!
第2果個送俾我既生日禮物就係呢份!
我0地5點2左右就出門,一去到巴士站就走左架!
等左陣就到!~太好,一直都冇落水!
架bus足足行左1粒鐘囉~
原來搭bus去機場真的很遠!
經過才7未去過既既地方!
東涌,大嶼山消防局!度閘係粉紅色的?!
好耐....好耐........好耐冇見過藍色的士!
唔知幾多年了~!
見到呢架的士我知道自己到了大嶼山!
我0地係機場落車,因為時間仲早,係機場行陣食下野~
最衰JOJO放左工啦!~
不過...我0地最終都係食M記!
因為唔知食咩,又驚貴!~
食完去完廁所就搭機場快線去博覽館!
第1次....第1次...第1次搭!
感覺好新鮮!同平時搭MTR,KCR好唔同!
舒服好多,又唔嘈,隔哂音!GOOD~
不過座位就少好多...
去到唔識路,見邊度多人行就行果度!
哈!~中了!入去!~嘩~~~幾大下!
好多人買企位!遲左半粒鐘先開場!
見到好多西施同埋半唐番既人!
半唐番既女好多既男友都係鬼佬!
不過果D女就係果D懶索好有國內味道既姑娘!
通常外國人都係鍾意同呢女子一起!
因為夠哂中國味道!
等緊期間我0地外面果幾條仔係咁講波經!
呀!?世界盃熱潮仲未過嗎?!
終於開始!幾好幾好!
女索!我0地企位既所有人都跳哂舞!
果種感覺真係難以形容!
現場聽不但沒有走音,d聲仲好正添!~
因為場show得兩小時,每首歌都係改左少少版!
唱都唔係唱哂全首!
最好聽果D都有唱到!唔錯唔錯~
如果我轉左全職穩定我都打算學番跳舞!
再唔學番,我覺得到我死,我都覺得有心願未了!
雖然事隔左咁耐冇跳過!
希望唔會生疏啦!~
太多人,我生得矮,攪到要睇銀幕!
不過能夠係現場睇已經好好,難得0黎HK!
佢0地係咁講HK好!~
跟住又唱左D歌關於HK既!~
5百幾蚊飛一樣野都冇!
唱唱下叫我0地開手機個頂燈!
成場閃哂,好靚,好似滿天星咁呀~
足足睇左兩粒鐘show,走時勁多人!
咁0岩趕到班bus!~12點先返到大埔!
口渴買了許留山飲!B3~
期間老公收工打俾我,返到家等第2果個沖完我先沖!
沖完之後打俾老公!~兩點先訓......
呢期又夜左訓了!

>>July 18, 2006 at 3:00:28 PM GMT+8

2006 年 7 月 14 日 星期五 【乍寒還暖】

今朝9點幾10點起身!10點幾叫老公起身!
佢約了人睇車!約了11點!
但係時間關係,改了約1點~
咁我0地攪掂好哂就揸車落去拎卡片同食野!
我同亞希去食先!~老公拎完卡片過0黎搵我0地!
佢又發脾氣!一支箭咁走左去!
又怪我食得慢果D!其實我0地已經食得快!
12點半坐抵,12點10左右就走人!
今朝又因為食野拎卡片事佢又發脾氣!
我真係唔想嘈交,唔知為咩發脾氣!
時間係趕,唔駛咁?!
為咩呢?任何事情都有解決辦法!
呢D只不過係少事!!!
都要咁?琴晚已經俾佢冇啦啦兇左兇0家啦!~
今朝又係咁...我真係頂唔順!~
琴日係海港城又係咁!
又話我唔拖!大佬我隻手真係好痛!係你自己甩開我先!
唔好講到好似我唔0岩,我甩開你!
拎住4本野走,好鬼重!
連續兩天拎住重野,好辛苦!
問候一句都沒有,只有責罵!真的受夠!
所以琴晚係海港城我先講唔想嘈交!
一0黎我真係好唔鍾意係街咁樣!
二0黎我已經冇也心機去嘈了!
終於點幾鐘條友打0黎睇車!睇左陣!
期間wing打0黎!呀...好耐冇見佢啦~
唔知幾時有機會見到佢呢?
我知佢而家係邊度返工!希望搵日出MK過去探下佢先!
兩點多就走人!返去老公果個停車場!
老公爸返左0黎!之後我同老公行落去地鐵站落地鐵!
我去中環佢返工!
一去到已經3點多了!擺卡片!
因為果度咩開幕禮!咁我拿拿聲放哂D卡片先啦!~
睇完開幕禮轉個頭都係果半粒鐘都冇!
行番去自己果度,呀>0<我D卡片冇哂~一張都冇哂!
我冇派過俾朋友同學囉!~
有冇攪錯!!!唔知邊個玩野!唔知自己得罪咩人!
我只知下晏好多中學生!唔知係中學生拎定咩野!
唉~咁其他人想拎都拎唔到啦~
早知就唔印100張咁少!
早知就唔放哂所有卡片咁多!
唉..............我真係蠢了!
係呀!我根本就係唔聰明!正如妳所講一樣!
我隔離果個女仔成家都好衰!
佢0地寫名簽名留字時居然用老公果張台當係台咁用!
人0地放作品佢0地就用0黎晾住寫野!真係好過份呀!!!!!!!!.\ /.
我同亞倩係會場hea下影下相!佢D同事0黎到!
跟住我就一條友坐,等佢帶住D同事睇完野先!
期間亞業打俾我傾左陣計!
嘩~勁耐冇搵過我!原來佢而家係CWB SOGO做野!
爆冷賣泳衣,泳褲果D!完全好少男子會簡呢行入囉我覺得...
5點幾亞倩D同事走了!跟住我0地去食野~
搵搵搵....搵左好多地方!行到好遠囉!~
原本去ifc睇下!但係名店地方,一定唔會有咩平野食!
除左大眾化既M記之外...
最終我0地行到差唔多到上環果邊,食了50蚊野!
!呢兩日食飯真係貴了~!
食食下濕東0黎到!佢搵左ok耐!唔識路!
之後佢話貴!最後去左好好粥麵食!
點知呢個餐好似下午茶咁,勁少野食囉~!
佢話只係覺得個胃暖暖地渣喎!~
我0地去左M記買雪糕食,慢慢行返番去!
因為濕東要放卡片!
今次佢只係放左一大半!留番一少半自己,派俾人等等!
我日後都唔想係中環返工!就算搵萬幾蚊個月都係咁話!
講就講中環個名好聽呀!
D野食貴到仆街!又行得遠!又冇咩簡!
果D好多都係for外國人多!未必0岩我0地胃口!
我0地返番hea多陣就走人!
濕東話佢今晚去玩落bra!
唔知去邊好,要hea成3鐘!
但我同亞倩都打算返家,累了~
所以陪唔到佢!我同濕東搭船落尖咀再轉bus返家!
嘩~難得佢送埋我搭車!
佢話驚俾亞富話唔送我喎!~
其實我覺得佢太多時間唔知去邊先咁講0者!~
返到家好累好累~!hea左陣!成11點多先沖涼!
老公成11點先食飯!真係慘慘~!
沖完涼打日記,太耐冇打了!一次過打左成個禮拜既日記!
叫埋秋然send歌!
同老公傾左幾句電~
點半左右先返入房訓!

>>July 17, 2006 at 3:13:06 AM GMT+8

2006 年 7 月 13 日 星期四 【綿綿細雨】

到了擺展第1天!
6點半起身,等舅父0黎等到成8點,唉~
早知係咁我就唔咁早起身啦!
不過我真係幾多野拎下,好重!
好彩就拎去樓下0者!等左陣就0黎到,細細係架車度!
成程車佢都訓左係我隻腳度!
去亞君度再去濕東再去老公度!
朝早一定會有塞車!
準時10點前去到!
唉~場地仲未攪好!D板仲未整好!
我0地等到成12點先有得入去!
又早知唔咁早啦!唉~勁唔夠訓囉!
琴日又做左咁多野...
老公同亞星去左火炭追番之前D糧!
我,亞君同濕東攪個場!
我隔離條女行錯左我個地方!
之後我咪話我係擺呢度囉!~
可能我言語上有點串!之後我0地問佢借撜貼poster佢都唔肯!
明明佢係貼好哂都話自己未攪掂好未用完!
結累我0地白等,等到H11班佢0地幾個用完我0地先用!
佢0地幫我整左先,先再整自己果d!
打算幫老公整個架!點知佢個架仲差點野先可以砌!
但係我0地整自己野關係一時間行唔開!
好彩亞業幫老公買左果D野!
冇耐老公就0黎到,最終老公返0黎有份砌!
亞星佢貼好哂d poster先知貼錯位囉!~
等埋亞星攪掂好哂先出去食野!~
我0地係碼頭果條隧道一出就見到有個好爆既男人!
佢帶住牛仔帽,吊腳褲再加上長袖風褸!
當時咁熱佢都仲可以著長風褸!勁呀!!!
不過我見到佢拎住部相機,好似係度搵緊有咩地方好影咁!
中環真係大,我好日都唔0黎一次,完全唔識路囉!
果度D野食又貴!我0地淨係地鐵站都行左好耐,唔知邊個出口出先好!
湯威0黎到,等埋B仔先去食野!
行去搵食野途中有free ice-cream拎!
老公拎左俾我,仲要係朱古力味0家!好好味呀!
好濃味,如果要買應該最少十幾蚊杯仔!
去食野...果間野平就平,但係好似好唔乾淨咁!
亞業個抄烏東冇啦啦有幾隻野飛左入去!
前後幾隻囉!攪到佢食食下都唔食了!
我塊豬扒都唔好食既="=
食完去左HMV行左陣我0地就返去大會堂!
等評審!我居然叫名第1個囉~
咁快=_______________=
完全冇準備!不過我又唔驚!可能只係覺得好累同眼訓!
果刻淨係想快點走!等哂所有同學評審完先走!
時間過得OK快!單對單咁評審!又唔係用好耐時間渣喎!~
K.K今日有0黎,同我0地傾下計!
原來佢冇係MK成10個月,唔怪得冇見佢咁耐啦!
仲以為佢唔再教添~
8點左右我0地搭船去TST city super食飯!
食左我成60蚊/_\....不過我諗唔到食咩!~
但係個炸蝦真係幾好味!
一個烏東一個飯,好多野食下!
真係幾好味既咁又...
食完野都冇行街就搭bus走了~
係新港門口見到汁yin男友!老公話係街上見過佢幾次!
但係唔熟,所以冇同佢say hi!
廢事驚人話扮熟喎~!
返到老公家一陣就沖涼,12點幾就訓!
好累,老公又鼻敏感!兩點多醒!
佢醒我又醒一醒去廁所!
返0黎佢成個人訓哂成張床!
我都叫訓落去0者,佢勁惡對我好似想殺左我咁!
好恐怖囉!~之後我唔理佢!我眼訓,訓覺!
我冇做錯野,唔知點解要咁對我!對我咁惡!
鼻敏感唔舒服好辛苦我知道,但都唔駛對我咁惡呀?
訓.........................

>>July 17, 2006 at 3:11:50 AM GMT+8

2006 年 7 月 12 日 星期三 【綿綿細雨】

返工,今早又係hea!下晏多點野改!~
Lunch原本同Carly去DHL拎紙箱打算明天用!
點知條友話有人落左訂,頂多一個size俾一個我0地!
最終冇拎到就走了!
買左cardbroad!都ok重!
5點幾D野做得7788!改埋最後就可以走!
但係我cut埋 D cardbroad先走!
因為廢事咁大塊咁拎住好麻煩!
Willy早我少少走!
落到公司樓下,有警察!
有個女人坐左係度,唔知仲咩事,好恐怖..................
但係我太趕時間,又印野,冇理到直行直過走了!
去到王子大廈印,幫老公印左兩張!
都係因為濕東我先知呢度有得印!
印完拎卡片!點知條友搵唔到,之後就話部機有問題!
成渣都未攪掂!
但係明明果條女應承左我話第2日最快可以俾到我0家ma!
都唔知有冇攪錯!唔得咪出聲囉~
跟住我話部機有問題印唔切出唔到俾我唔一早打俾我同我講聲!
跟住佢就話同事疏忽!同我講對唔住!
我嘈左陣,跟住佢就話明天拎去中環俾我!
打發左我走了!算啦~起碼佢有咁講先!
做唔做就唔知了!我叫左佢有就打俾我!
拎poster!等左好耐囉~唔知有冇攪錯,亞君遲過我0黎都拎到!
因為張單冇寫明要將我同老公3張海報分開!
所以我一人拎住一渣cardbroad同6張poster返家!
幾重下,好累................
返到家9點幾先食飯,好肚餓...
食完hea左陣先沖涼!
打左俾舅父,叫佢明天幫手車我0地幾個去中環!
因為多野拎關係...
好彩亞媽今日幫我去郵局買了最大既紙箱同埋買左布!
我返工唔得閒,又印野又拎poster!
我知自己一定趕唔切買呢d野!
唔係因為有亞媽係度,我明天都冇野放我既作品!
夜晚又係等老公電,不過一知佢收工冇耐我就訓!
冇等到佢返家先訓,因為我要6點半左右起身!
約左舅父7點半,佢話起碼要早兩粒鐘!
因為驚塞車同埋要去四撻地方咁多!
舅父話去咁多地方最少收300蚊!
我知佢要搵食,所以我叫街車,不過搵番自己人好過!
同埋舅父已經收平了我!
今天終於出左糧!.......

>>July 15, 2006 at 4:59:28 PM GMT+8

2006 年 7 月 11 日 星期二 【微雨】

哈~連放兩日假我都!老公一樣!~~
因為我知琴日生日,驚玩得夜,今早冇精神返工!
於是一早請了兩日假!
不過呢,要印野啦今日!
拎poster同卡片去印!
老公未攪掂好~所以佢係家整,我同亞希落街買野食!
大家樂勁多人!好熱呀!~好曬!!!
買完返到去,好熱好熱好熱...........
唉~平日係家都唔駛我落街買野食!
不過算了!老公返工冇時間功課!唯有我落去買野食上0黎!
食完之後老公做功課!
佢成日鼻敏感呀!~好辛苦!可能作病掛~!
跟住我見仲未到我做功課!
於是幫佢家拖地同幫佢間房抹下塵囉~
佢果度可能山區大風佢家又冇人打理,好多塵囉真係!!!
個地踩落去好辛苦!
上次整冷氣機都未抹得好乾淨!
拖完舒服哂~不過我就好熱!
老公鼻敏感關係,冇得開冷氣!熱死人了!
有點燥燥地!
佢家又冇水,又要煲!真係咩都冇...
冇耐亞君上0黎~因為打算一齊去印poster!~
我用左15分鐘攪掂好張卡片,5點左右我0地就落去小萍做果間印poster!
30幾蚊張真係好平呀!!!!!!下次印野都去返果度先!~
去對面印卡片啦打算,點知條友話我未做出血叫我返去攪掂先好0黎整!
唉~~攪到我白行!
結果老公陪我搵左第2間肯我幫整埋出血!
但係我就好燥囉成日都!
老公幫我拎哂D野,袋呀等等...
之後又陪濕東攪埋poster同印野!
6點8左右先走人!約了TOTO&JOJO去大埔和民食飯!
訂了台7點!我趕唔切去,遲到了!7點7左右先到!
老公都去了MK踢波,踢7點!
今餐又係好豐富!好味呀!又有甜品!
JOJO杯醉好苦.............=_____________=
我真係唔飲得酒!
我覺得JOJO好飲得咁!
9點幾食完飯我0地係行左陣先走人!~
係姐姐度睇中左衫!不過冇買到!
打算明天先買!不過都係睇下有冇時間先!
有時間就去買!~就咁決定!嗯!!!
回家,老公去觀塘食完飯又去食糖水!
等老公電,傾左陣就訓了!明天返工!
行程好緊迫!收工拎poster~!

>>July 15, 2006 at 4:47:25 PM GMT+8

2006 年 7 月 10 日 星期一 【綿綿細雨】

生日快樂TO ME~~~~~~
終於,終於到了我20歲生日!20歲,我終於到20歲了!
完全唔似20歲的我!唉~~~好嚴重!
樣子生得小,冇辦法!
今朝訓到11點幾12點起身啦~
跟住老公媽搵位飲茶!
飲完茶我同老公分頭行事!
我搭出去MK買藥!
搭果架小巴呀,個小巴佬...
搵食0者,唔駛咁呀?!
我唔知佢想點樣,唔知佢係咪俾我上車!
又話有八渣係後面!
又叫我快點!
我見佢度門開得一小半,仲要想夾住我咁!
幾驚佢夾親我!架車呢又未停定!好危險囉我覺得!
唔係咁夠膽上車!上到車仲要俾人話我快D啦亞姐!咁樣!
我真係燥哂呀!!!!!!!!!!
買完藥食完老公仲未出到TST,塞車!
跟住我慢慢行去搭bus,去美麗華行陣!
因為老公叫我唔好行海港城!
行行行,行無印,行左好耐,四圍行!
IT睇下衫~B+AB!都兩件衫想買!一件都係百幾蚊0者~
但係未出糧,唔買了!
老公終於打俾我叫我係新港等!
慢慢行去,佢仲未到,等多佢兩個字!
佢買左禮物俾我!仲有雪糕cake!
老公話知我鍾意食雪糕cake!仲要係朱古力味添~!
同了我講左句生日快樂!
搭215X返佢家,因為拎住個雪糕cake好麻煩!
乾冰只維持兩小時!所以返家食左佢先夜晚出九龍城食飯!
上到bus,拆禮物!是我一年前睇中既CK錶!
我好多年冇帶錶了!
原本仲以為呢隻錶可以做情侶錶!
不過如果一對買就要用成3千幾蚊了!
老公冇咁多錢!不過佢買了隻黑色俾我,話易襯喎!
其實原本想做情侶錶呢我想要白色多點0家!
其實白色係靚點囉我覺得~
Anyway Thx老公送俾我既禮物!
我知老公出左糧都冇買過野俾自己!
8號果晚又買左套衫俾我!用左成600蚊!
今日,舊cake 2百幾蚊!隻錶千6百幾蚊~
老公出得果5千幾蚊糧都俾我用左成半了!
你錫我,我是知道的!
不過希望你唔好成日好話,發我脾氣就好了!
返到去老公家,等老公媽返0黎,湯威同家強0黎就食cake!
好好味呀~ =﹏=
老公真係知我心意 >﹏< 我愛你呀豬!!!
成8點我0地先搭bus出去!
訂了8點半台!唔怪得呢間成日咁多人等位!
D野食真係唔錯0家!我覺得幾好食!
亞魚送了一大盒M&M朱古力!THX~
食完飯我0地打的返觀塘食糖水!
嘩~呢期食左好多肥野!
不過實在忍唔到口!
食完糖水,去左M記去廁所等亞東0黎!
等到亞東0黎傾左兩句我0地就回家!~
最衰老公架車有問題唔揸得!
唯有又等,等到有一天可以去赤柱過一晚開心既晚上!

>>July 15, 2006 at 4:36:27 PM GMT+8