2005 年 12 月 4 日 星期日 【微冷】

呢兩日同BB一齊放孖day，真係好，但係時間過得好快…

一起身就見到BB，好開心。同BB一齊賴床賴到十二點幾先起身，感覺溫馨。

琴晚同BB、Angel兩婆公、Carol同佢個大隻friend，本來去淺水灣BBQ，但係原來大隻friend係石澳土著o黎o架，有晒face，book定爐，六條友仲包晒個場玩，過癮！

BB想BBQ好耐啦，之前佢o的同事仔又搞唔成，上個禮拜又去唔成，今個禮拜終於都成事喇，不過中途又因為食煙o既事有o的爭論。其實大家都明白大家o既立場o既，總希望呢件事唔會成為我o地兩個之間爭論不停o既話題。

雖然唔知自己會有幾大o既恒心，但係十二月我會盡量食少o的o架喇，暫時都仲係隔日買一包煙，因為煙實在貴，成40蚊一包Cartier，其他煙又唔好食，所以買時都有o的肉痛o既感覺。決定佐一月開始儲錢娶BB，所以要開始慳返o的出糧後找卡數o既錢，要stable返自己個財政狀況，所以我畀佐三個月buffer自己，之後真係要努力做人喇…

>>December 5, 2005 at 2:30:51 AM GMT+8

2005 年 12 月 3 日 星期六 【微冷】

抄人o既日記，值得一睇，提醒自己。

----------------------------------------------------------------------------------------------------------------------------

自我

自我既是自我之友，自我又是自我之敵。如果自我克制自我，自我便是自我之友，倘若不能克制自我，自我如敵而結冤仇。（薄伽梵歌）

誰如命運似的推著我向前走呢？那是我自己，在身背後大步走著。（泰戈爾）

想左右天下的人，須先能左右自己。（蘇格拉底）

我並不為別人的意志所束縛，而我自己的意志卻如鐵鍊一般的束縛著我。（奧古斯汀）

世界上最重要的事情就是認識自我，一個人最壞的狀態是失去了對自己的認識和支配。（蒙田）

唯有強烈自我反省的人，才能透澈地了解自己。（松下幸之助）

http://diary.sitelala.com/?id=28313&diaryid=509076

>>December 5, 2005 at 12:34:48 AM GMT+8

2005 年 12 月 2 日 星期五 【微冷】

I'll Be There
Mariah Carey

You and I must make a pact
We must bring salvation back
Where there is love
I'll be there (I'll be there)

I'll reach out my hand to you
I'll have faith in all you do
Just call my name
And I'll be there (I'll be there)

And oh, I'll be there to comfort you
Build my world of dreams around you
I'm so glad that I found you
I'll be there with a love that's strong
I'll be your strength, you know I'll keep holding on

Let me fill your heart with joy and laughter
Togetherness is all I'm after
Just call my name
I'll be there (I'll be there)

I'll be there to protect you (I'll be there)
With an unselfish love I'll respect you
Just call my name
And I'll be there (I'll be there)

I'll be there to comfort you
Build my world of dreams around you
You know I'm so glad I found you baby
I'll be there with a love so strong
I'll be your strength (be your strength), you know I'll keep holding on

If you should ever find someone new
I know she'd better be good to you
'Cos if she doesn't
Then I'll be there

Don't you know babe I'll be there
I'll be there
Just call my name
And I'll be there

I'll be there babe
You know I'll be there
Just call my name
And I'll be there

Just look over your shoulder
Just call my name
And I'll be there...

>>December 5, 2005 at 1:44:26 PM GMT+8

2005 年 12 月 1 日 星期四 【微冷】

《我的最愛︰日本料理餐廳排行榜》（下）


21) Beppu Menkan Japan Noodle Restaurant（別府）

去過好幾間，包括奧海城同銅鑼灣，但係以杏花村o個間最最最差，差到夠擔死叫乜冇乜，真係離晒大譜！好心佢假日就入多少少貨啦！唔係生意多到唔休做呀嘛？！

壽司平平無奇，而且雪都未溶晒就畀客食，真係不知所謂！差劣！蟹子就係蟹子，唔係我o地鐘意食o既飛魚子，熟食ok啦，但係o係連鎖店之中佢o既排名都算低，搞到我同BB埋單之後再去幫襯佢對手「元綠」。

----------------------------------------------------------------------------------------------------------------------------

22) Tekkosakuin（鐵匠）

位於銅鑼灣恒隆中心地庫。以前食過一次，係咖哩雞扒烏冬（定係麵？）。見冇乜記憶，今日走去食多次，點知搞到我BB肚仔痛，本來都可以排高幾個位，不過食到肚痛就唔駛我再去幫襯佢！

呢間o野o的壽司同刺身勁大件，價錢亦公道，但係千祈唔好食貝類，因為食過赤貝同北寄貝，o的味都好似怪怪o地咁… @_@ 叫蟹子又唔知點解畀佐三文魚子，仲死唔認話佢o地o的蟹子係咁大粒，我估o個個waiter係新o黎o既，仲要唔多食日本o野添。熟食方面就麵豉湯偏咸，飯偏硬。

整體o既服務水平都ok，值得欣賞o既係佢窄身厚切o既三文魚魚生同埋唔知點解咁大隻o既甜蝦。仲有件奇怪事，就係佢o的魷魚係原隻上o架，有埋o的鬚，好搞鬼。

仲有佢o地唔分吸煙、非吸煙區，係好傳統o既日本餐廳。因為日本人大部份都食煙o既，我最鐘意就係用煙趕走坐隔o黎位o既人o架喇！唔關我事o架，係間o野唔分區咋！

----------------------------------------------------------------------------------------------------------------------------

23) Akasaka Hyakunin-Issyu（百人一朱）

同畀屎客人食冇分別！

o的waiters又老又醜，又唔理客。o的飯硬到18樓丟落街都唔爛，o的魷魚超級「咬口」，o趙都唔爛。三文魚仲要「梅」添呀！好在叫佐少少壽司試o下先咋，如果唔係我一定會叫佢個經理o黎x佢個喇叭！

真係百佳o個o的都好食過佢呀！火！

食到肚屙！把幾火！

----------------------------------------------------------------------------------------------------------------------------

合

我自己唔係咩食家，但係做客戶服務呢行，多多少少總係對服務有o的執著，或者係平時畀o的客賤得多，搞到心理唔平衡，硬係個人厭厭尖尖咁囉。所以食物o既質素都係其次，服務好與壞同埋氣氛佔分點都會重o的。「食得是福」，辛苦搵o黎，冇理由唔嘆返o下！

日本o野，生o既最愛係三文魚、北寄貝、赤貝、蟹子（飛魚子），熟o既最愛係牛肉火鍋，同埋烏冬。講真，而家越o黎越多日本料理玩cross over，我並唔係咁欣賞，有時弄巧反拙，出晒事，唔知似乜。我個人對於新事物o既接受能力比較低，雖然唔怕試，但係傳統o野多數都係比較好。

>>December 5, 2005 at 1:22:50 AM GMT+8

2005 年 11 月 30 日 星期三 【微冷】

《我的最愛︰日本料理餐廳排行榜》（中）

11) Sushi Tei（壽司亭）

終於都排到一o的連鎖性較高o既日本料理喇。我成日都覺得o的日本料理開得越多，巿場佔有率或者認知性越大，o的o野就越頹越唔好食，而且價錢往往都同味道、環境、氣氛、服務等唔成正比。

呢間舖係食氣氛喎，其實佢o的裝修同設計都ok，食味亦唔算差，價錢定得高少少，不過佢想走高檔路線，焗住畀錢佢駛。

----------------------------------------------------------------------------------------------------------------------------

12) Genryoku Sushi（元綠）

雖然可以話係最早打入香港巿場o既連鎖日本食店，但係佢o係我心目中永遠都只係二奶命，冇得選擇之下o既選擇。

老實講，呢間舖o既o野食真係麻麻，又多人等位喎。不過佢真係好好彩，成為對上兩次都係o係我同BB食完兩間頹o野之後o既救星。不過亦係肚痛嫌疑犯之一！

----------------------------------------------------------------------------------------------------------------------------

13) Kumamoto（大熊本洋風料理）

銅鑼灣同旺角兩間都去過，以銅鑼灣o個間坐得舒服o的。

值得提o既係令佢排得比較高o既原因，並唔係佢o的日本o野，而係佢曾幾何時sell過o既芝士火鍋。價錢公道又好食，好充足o既芝士味呀！比起意粉屋o個o的加勁重cream o既所謂芝士火鍋好食多多聲！當時食過o的乜我就真係唔記得喇，淨係記得成煲芝士飲鬼晒，唔好o徙！

----------------------------------------------------------------------------------------------------------------------------

14) Azabusabo Tokyo（麻布茶房）

有日本o野，亦有fusion佐其他地方特色o既o野食。

佢o的o野賣相都幾好o架，坐都坐得舒服，味道冇乜太特別，一般水平。不過令佢排名咁低，係因為幫襯海港城o個間舖，居然唔畀食煙，有冇搞錯！差矣…

----------------------------------------------------------------------------------------------------------------------------

15) Masaka Japanese Restaurant（和庭）

畀我o係新世紀o個間見到佢將杯倒佐出o黎o既茶再倒返佐個壼度再沖畀人飲！頂！

又係冇乜特別好食，但係o的waiter就好似癲咁樣，個個都左穿右插，橫衝直撞，好似好忙咁。好搞笑，見到有其中一個人拿住個熱鍋定晒格咁企佐三十秒，都冇人過o黎幫佢，真陰公。

蟹子亦係蟹子。三文魚一般。唔會再去。

----------------------------------------------------------------------------------------------------------------------------

16) Matsue Japanese Restaurant（松江日本料理）

新翠o既舖，o係柴灣市中心唯一o既日本料理。

老實講，我做佐半年，都係上個禮拜先第一次入去食o野，因為我知道佢o的o野食應該好味到有個譜…

果然係冇錯，o的三文魚淡茂茂，冇厘味道，o的烏冬亦都一般。我估只係因為呢頭只係得佢一間舖，所以先至有咁多人幫襯佢個飯巿。

----------------------------------------------------------------------------------------------------------------------------

17) Watami Japanese Casual Restaurant（和民居食屋）

連鎖舖，一般。食過始創o個間，次次去到都要等晒位咁，入到去都唔發覺佢o的o野食特別好食嗟…

頹o野，同上述咁多間都一樣…冇乜好講喇…

----------------------------------------------------------------------------------------------------------------------------

18) Genki Sushi（元氣）

貴夾唔好食！

其實我一生人只係幫襯過佢一次，唔知係咪o個次同擁有「狗屎咁o既手」o既朋友去食，影響佐食慾，所以先覺得佢唔好食。不過迴轉o野不嬲都係一般貨色，冇乜需要都唔多想幫襯。

唔明點解香港人咁鐘意食迴轉壽司，擺到明係頹o野，o的飯舊舊用機印出o黎，就算唔係坐bar台再order都只係o係條迴轉帶上面執o的轉佐九百幾個圈冇人食o個碟畀你，價錢有o的好唔合理，坐又坐得唔舒服喎…或者香港人誤會佐食日本o野o既真諦都未定… @_@!!!

----------------------------------------------------------------------------------------------------------------------------

19) Ming General Sushi Restaurant（明將壽司）

食過兩次，一次沙田一次新世紀。呢間o野好似曾幾何時出名過，我記得以前《婦女新知》好似送過佢o的coupons，我估佢有一定認知性。

迴轉壽司，頹頹o地，冇乜好食。唯一可取之處係夠平，但係要同o的師奶鬥耐性等位等得耐，就冇乜癮幫襯佢喇。我記得食兩次都要等位等足半粒鐘以上，非常冇癮。

----------------------------------------------------------------------------------------------------------------------------

20) Ita Bashi Sushi（板橋）

位於天水圍銀座o既日本料理，價錢唔多公道，食物只屬ok。坐得都幾舒服o既，不過就冷氣過凍啦…

唔通o的鄉下地方真係冇好o野食？窄。

>>December 3, 2005 at 1:57:00 PM GMT+8

2005 年 11 月 29 日 星期二 【微冷】

《我的最愛︰日本料理餐廳排行榜》（上）

起

其實一開始我係唔食日本o野o既，一來係自己本身唔鐘意食魚，二來係嫌佢生，怕唔乾淨，咁個玻璃肚就有排屙。後尾開始鐘意食煙三文魚，發覺原來魚係可以生食得o黎唔會腥o既，就慢慢接受佐食日本o野。對上兩任歷屆亦都頗接受日本o野，令我越食越鐘意…

到今時今日，遇到個日本o野痴o既BB，我o地就食到好似癲佐咁，唔食刺身壽司好似會死… @_@

以下有一堆我幫襯過o既日本料理餐廳o既名稱同排名。有o的去過一次，又冇難忘經歷，我連名都唔記得而又唔係碌卡找數o既餐廳，真係唔好意思喇，今次你o地out佐。另外，要有刺身壽司食o既舖先計，尤其係以最普通o既三文魚刺身為基礎，而且排名高唔一定係o的o野超好食，亦會有可能係「物有所值」（價錢低但品質唔算太差），不過吉野家同味千都sorry喇，冇排名，唔該行埋一邊先。

----------------------------------------------------------------------------------------------------------------------------

1) Wasabisabi（山葵）

只可以用四個字o黎形容︰「冇x得比」！（其實用「無語論比」都得o既…）

被我Nic Nic封為「御食」o既地方，梗係有返咁上下。成為八、九、十月連續三個月o既人氣首選，一共幫襯佐三大次，今我不知不覺之中損失二千蚊左右… @_@

點解咁吸引？氣氛囉。

初初認識呢間o野，係佢搵人o係街度派卡片，見o係Times Square，一定貴，所以冇上過去。第一次上去係同Josephine，一入到去，發現呢間o野個裝修真係超特別，好high class，好酒吧feel（事實上亦附設酒吧）。Jose唔食生o野，我自己食。

唔食由自可，一食就真係好似以前套《伙頭智多星》卡通咁，「味王」彈晒上天咁；又好似《伙頭仔昆布》o的人咁，食佐好o野個人會飄飄o下，兩個面珠會有心心咁…太正喇！o的海鮮太新鮮喇！所以以後都要追住幫襯…

BB亦都好鐘意呢間餐廳，我估以後一定會keep住幫襯。佢o地o的waiters太nice喇，無論食物、服務、環境、氣氛都係暫時冇其他地方可以取代o既！

記住︰一定要食北寄貝、赤貝刺身呀！

----------------------------------------------------------------------------------------------------------------------------

2) Restaurant Ichikawa（巿川日本料理）

一試難忘，再食破產…哈哈！

間舖好nice，亦都唔會奢侈麵豉湯、雪糕等等唔值錢o既o野送畀o的客食。佢正就正在佢o的刺身，可能開o係o的真係有幾多日本人住o既地方︰太古城，所以o的水準都唔敢馬虎，交足貨。

試過甜蝦、北寄貝、牡丹蝦同象拔蚌等刺身，一生起碼豪一次，真係好鮮味，食到唔停得口。結果埋單用佐10% o既人工，都值，因為真係值呢個價，而且仲食到BB lam lam利添！

----------------------------------------------------------------------------------------------------------------------------

3) Todai Restaurant

另一間非常正o既舖，位於尖沙咀美麗華地庫。衰在早排話食到人肚屙集體食物中毒，不過遲早會再去幫襯。

幫襯呢次係食自助餐，如果您係夠擦得o既，絕對抵食首選。根本o的海鮮就多到您食唔晒，您唔想食生o野，亦有大量熟食、甜點供應，實要食到您死為止。

不過好味首選唔係海鮮喎，反而係佢新鮮出爐o既梳乎厘，其次係一定要食生豪（好驚中毒，但太正！），仲有o的北海道長腳蟹。

要小心o既係，四圍會有好多好似前世未食過o野o既餓鬼大陸x o係您身邊左穿右插，同埋大大聲咁講o野。仲有，吸煙區超近廁所，方便之餘亦傳來陣陣人造香精味，唔多爽。

----------------------------------------------------------------------------------------------------------------------------

4) Sui Do Bashi Cafe & Japan Fusion（水道橋）

西洋菜街兆萬對面其中一間日本料理，價錢唔算貴，但o的o野幾好食。呢間舖o既吸引之處，係佢個魚生飯。

其實我好唔鐘意食飯，不過珍珠米令我改觀。食刺身當然過癮，但係冇飯底始終食極都唔會飽。由於BB唔鐘意食吞拿魚（我都係，硬係覺得佢o的肉質「梅梅o地」…），所以特別要佢o地個師傅走吞拿魚生，就係因為咁我o地就識佐其中一個waiter呀Lok。

估唔到我o地上佐去一次，佢就認得我o地呢兩個麻煩友鐘意食魚生飯走吞拿魚，之後再上去仲幫我o地同師傅order o的正o野，一碗都係一百蚊左右，真係又好食又抵玩又有服務，非常之正！

最抵死係有次佢o地飛身送ashtray，仲要爆機話係urgent o個隻，真係笑死我o地。呢度o的waiters整體上都幾醒，令您食得好舒服同有被人重視o既感覺。因為，佢記得您。

值得一提o既係呢間o既牛肉鍋都唔錯，o的湯好甜。對於我呢個甜o野精，實在太過吸引…點可以唔複桌？

----------------------------------------------------------------------------------------------------------------------------

5) Iccho Japanese Restaurant（魚一丁）

分店越開越多，之前都只係得世貿一間，不過反而呢間舖我以後都唔會去，因為佢o地o的waiters好似食佐甜筒咁！

勝在夠大夠多位，係知己朋友聚首一堂o既首選！佢o地o既菜式一路都有更新，變佐有o的以前好食o既o野變佐冇得食。第一次（pk o丫！點解會畀佐咁多第一次佢！）上去食亦係同Jose分手後再聯絡返o既時候，之後都密密有同人上去食，亦係我、Angel、Carol聚腳o既好地方。

食物就比一般好，但係佢勝在款色多，不妨試o下佢個尤魚餅、腸仔餅圈（唔記得正名，但係次次都看圖識食！）。三文魚就ok，但比佢o岩o岩開o既時候又鮮又肥就已經差佐，一水水好食。

o係魚一丁o既回憶實在太多…不過佢衰在太well known，飯巿唔訂位都唔駛旨意即刻有得食，同埋食煙位越o黎越少（過份！），服務質素亦都冇以前咁好…不過仍然係一個食日本o野係好選擇。

----------------------------------------------------------------------------------------------------------------------------

6) Teppan Steakhouse（鐵板）

三文魚正，仲有其他熟食都好好味、好吸引！不過最正o既地方，仍然係氣氛。佢唔算係好多人排住隊去幫襯，不過我發覺佢已經開佐分店o係apm，可以想像食物質素可能會下降。想再去羅素街o個間，但係裝修佐好耐，唔知做乜。

呢間唔係淨係食刺食壽司，佢o地玩同其他地方o既煮食方法o既fusion，係新派日本菜。不過上菜比較慢，可能係佢想整得好食o的呱…o的o野食係好有心思咁排列好晒先上台畀客食，整體上都唔錯，但係我覺得佢o既價錢稍為貴佐少少。

記住食o野o個時要嗌埋熱o既sake喎，一路食一路飲會食得開心o的！同埋唔覺得佢o的o野要等咁耐先到… @_@

----------------------------------------------------------------------------------------------------------------------------

7) 京都居食屋

大角咀眾所周知雖然食肆奇多，但係正如呀Ken話齋︰「大角咀淨係賣鐵，想搵打西餅都冇！」可想而知，大角咀真係冇啖好食。但係自從BB帶我去食過之後，終於發現佐大角咀o既綠洲，有如鬧市中o既草原，成為如果毛毛放假，過去陪BB食晏o既「唯一」首選。

又有魚生飯喎，不過一分錢一分貨，只係水道橋o既50%價錢，就真係唔好要求咁高。同埋，要bear in mind︰「您而家o係大角咀呀老細！」

由紿至終都只係食過魚生飯，但係佢o的三文魚都ok肥同好食，算係不過不失。加上冇乜熟人會去，o岩晒我同BB o係o個度「偷情」！嘻~

----------------------------------------------------------------------------------------------------------------------------

8) 夏雪日式料理

又係食氣氛，同埋打開份menu先發覺有驚人發現︰蟹子刺身。o下？！蟹子（賣o既係飛魚子）都可以刺身？唔係fa？！係，冇睇錯。由於我同BB都好鐘意食蟹子，鐘意佢o係個口度擘擘卜卜，加上仲係啖啖蟹子放入口，直頭過癮死！好似拿住塊防撞爛o野係卜卜膠袋咁係咁用力壓爆o的卜卜咁過癮！

其他o野都ok，過佐唔記得十點定十點半之後宵夜時段上去食比較抵，不過坐窗邊望o下旺角o既街景又係另一番樂趣！

----------------------------------------------------------------------------------------------------------------------------

9) Ichiban（金太郎）

呢間就擺到明係頹食o架喇！亦係唯一一間迴轉壽司店成功打入十大。賣點係平平o地，大食一番最o岩。

唔好睇佢係頹食，呢間o野都超多人幫襯，但係吸煙區奇細，好唔方便，o的位又窄。但係分店遍佈旺角，三步兩間，總算方便。

三文魚都ok喎，夠晒肥，又唔係貴，食到您飽為止。尤其係有會員卡，有優惠，純粹為食想食三文魚食到飽食到滯，呢間都係幾好o既選擇。不過氣氛就欠奉o架喇，食完您好走添呀，唔好阻住地球轉！

最緊要食埋個燒三文魚尾！三文魚骨都ok，其他熟食可免則免。試過食個咖喱雞飯，實在難食到死，不知所謂。

----------------------------------------------------------------------------------------------------------------------------

10) Aoba Japanese Restaurant（青葉日本料理）

唔知執佐未，呢間o野o的三文魚勁肥勁大件o架！

係無意間搵到呢間舖，又係o個o的諗到冇得再諗，見佢派街召，上去試o下o個隻。o個時做緊order到某個價錢之後，就可以三文魚刺身任食，真係食到頂到上喉嚨頂我都仲要食落去o個隻！因為佢o的三文魚實在係平、靚、正、快！yumi yumi！

後尾佢冇再搞任食，三文魚質素亦跌佐少少。對上一次想上去食，居然唔知做緊裝修定係執佐…希望佢仲o係度，可以再上去試o下啦…

>>December 2, 2005 at 2:44:30 AM GMT+8

2005 年 11 月 28 日 星期一 【微冷】

「點解拍拖o的男女會想一齊訓o既呢？」

因為想依偎o係齊？呢種現象好似唔駛人教咁，拍佐咁耐拖都好似不嬲都係咁。

鐘意一個人，梗係成日都想見到佢，亦唔單只係一齊訓咁簡單。

兩公婆日日見之餘仲要訓埋一齊，BB話係佢o地兩個毫無血綠o既人之間，已經昇華佐做無o野可以代替o既親情。嗯，好深奧。

或者我o地呢世人，就係要學呢樣深奧o既道理。

但係，如果係親情，點解又會有離婚、包二奶或者外遇？

經唔起考驗？親情唔係冇o野可以取代o既咩？即係佢o地未到有好深親情o既地步？咁點先算深？有o的十幾廿年o既夫妻都有o的咁o既事發生o架喎…

令我對愛情、婚姻冇信心，一直抱住玩o既心理去拍拖，就係咁o既原因。太冇保障喇，如果成份感情擺晒落去，倒頭來得個桔，我可唔可以受到呢種打激呢？我估我輕輕o地都叫做試過半次，如果係一段三、五、七年o既感情，話冇就冇，我會死的。

失敗或成功o既case都有可以學習o既地方…兩個人一齊要靠雙方維繫o既！

>>November 29, 2005 at 2:29:57 AM GMT+8

2005 年 11 月 27 日 星期日 【微冷】

「一種心靈上o既滿足。」

每個人o既心都會受到自己以往o既生活或者遭遇而或多或少有o的心結，我明白。

兩個人相遇o既時候，互相滿足對方心靈上o既不足，好美妙。

從此，我唔再要同BB，您，我o既另一半分開。或者我唔可以做到o的乜去治療埋藏o係您內心之中o既傷痛，但至少，畀我好好咁去愛您，令您將來幸福。

>>November 29, 2005 at 1:48:31 AM GMT+8

2005 年 11 月 26 日 星期六 【微冷】

放假喇！好o野！

訓到十點就自己醒佐喇，真係作死！

我o地好似做佐日本人咁，下晝又食多餐日本o野，夜晚o個餐又係喎，真係癲癲o地呢！

食完飯行佐陣街再搵佐間細o既上樓cafe坐。留意到一樣o野，就係好幾間o既佈置同裝修，仲有間格，都係差唔多，o的咖啡亦未發現有邊間係好expert，不過我o地都只係想有個空間可以依偎一o下，外在o既o野並唔係最重要，最重要係兩個o既心。

今晚BB再次挑戰毛毛玩波子棋，面對住我呢個「全國少年波子棋大賽」o既冠軍，BB梗係唔夠砌啦！雖然玩遊戲會有輸贏，但係今晚唔同o的。或者係心情影響到啦，大家都enjoy呢個時刻，BB仲要玩到唔停手咁！

三點先返屋企…

如果每次訓醒第一眼就可以見到自己最愛o既人，您話幾好呢？！毛毛攬攬BB~

>>November 29, 2005 at 2:15:50 AM GMT+8

2005 年 11 月 25 日 星期五 【晴】

BB見工日。

老細果然冇吹水，直接上人事部一個禮拜就安排到interview，BB覺得自己今日o既表現唔夠好，但我覺得呢個世上邊有prefect interview o架，不至於冇o野講或者亂咁吹都已經ok o架喇，就算今次唔得，咪當係一個經驗囉，點都好，毛毛一定會陪您行呢條轉公司o既路o既！BB畀心機，我知道您實得o既！

BB見完工仲過o黎陪毛毛食lunch，點知o的同事仔又話要同BB一齊食飯，真係唔知點拒絕佢o地好，幾個女人仲好似細路咁… @_@ 第一次幫襯新翠間日本o野，都唔好食o既，定係個咀刁佐？

晚間再去佐太古城，食佐餐貴o野，但係值o丫，o的海產都好有鮮味，間o野係服務有好，同價錢成正比，好公道。仲食佐象拔蚌刺身，相當之爽口鮮味，BB食得好開心呢！只要BB開心，咁就夠啦，就當係減壓囉，BB呢排壓力係大佐o的o既，公司o野又做得唔開心，一於食晒落肚，開心返啦！

好想攬住BB訓，但今晚唔得… =(

>>November 29, 2005 at 1:30:27 AM GMT+8