2005 年 12 月 24 日 星期六 【微冷】

聖誕前夕，難得聽日調佐假，一於同BB玩返夠本！

今日繼續畀租務部糟質，簡直體無完膚！不過事實證明Pheobe真係好唔掂，又驚青，自己搞唔掂就發老爛去迫人幫佢做o野！對於租務部o既人處事o既無知，真係深表同情。

琴晚出街都已經夠得人驚，今晚更加係難以想像…好憎多人，好憎要迫，好憎要等。等到有時間安排今晚o既節目o既時候，其實已經係下晝o既三點幾…好在，真係有錢駛得鬼推磨，銀紙多，性本善…

估唔到仲可以o係老蘭搵到間日本餐廳，鬼咁容易就訂到位，睇佢個網頁o的o野食應該幾得，一於同BB去試o下！但係搞掂餐飯之餘都仲要諗埋之後o既節目。灣仔影藝o岩o岩上緊德文套戲，叫Gloomy Sunday（港譯︰《布達佩斯之戀》），睇個簡介好似幾好睇咁，而且仲有位，又即訂，哈哈，搞掂食碗麵！

呢間叫做「花串」o既餐廳，o的o野食都幾得，好新鮮！我o地唔小心叫佐煲好大煲o既牛肉火鍋…真係大到呢…我估係四人份量，好在一開波唔算叫得好多o野，如果唔係我o地兩個實擦唔晒！o的牛肉好好味，湯又有好濃菜味，非常之咁好食！

食完急急趕落灣仔睇佐套冷門戲，真係估唔到BB都有興趣陪毛毛去癲，睇埋o的冇乜人鐘意睇o既戲。好o野，以後有BB陪毛毛去睇，毛毛唔駛自己一個人做「戲精」喇！套戲個題材都幾大膽，但並唔算創新。不過講到個女主角好似好淫賤咁，但係o的男人又死蹤埋去喎，你情我願，感情事又唔到其他人去干涉。不過最終都係一個都冇，唉…

以戰爭為背影，毛毛最鐘意睇呢戲，曲折o既劇情總算冇一刻係悶場。嗯…唔錯唔錯。

睇完戲過佐尖咀，感受o下節日氣氛，之後返屋企。

出佐雙糧，好o野！

>>December 28, 2005 at 12:02:44 AM GMT+8

2005 年 12 月 23 日 星期五 【微冷】

今日真係謝晒…人都癲…辛苦死…

遇著新鴻基租務部o既瘋人…佢o地真係以為自己大晒，o係度呼呼喝喝！不過為佐個site，唯有硬食晒…唉…又要錢又要貨，班人真係奸到出汁…痴線！

放佐工謝晒，得返個毛毛殼陪BB出街… @_@

BB買佐聖誕禮物畀我喎，係PC o既咭片套，間舖仲要吹晒水話係限量版喎，都唔知係真定係假…不過居然有保用卡喎，真係買咁多個PC袋o既第一次。

多謝BB！個咭片套好正，尤其係o的凸紋PC logo！不過毛毛真係唔想BB駛錢呢~

>>December 27, 2005 at 11:21:29 PM GMT+8

2005 年 12 月 22 日 星期四 【颳風】

朝早自己一個人去開CCC Meeting，好在何力天今朝又唔得閒開會嗟，得返Kenneth Ho，佢都幾好人o架，起碼唔會串你。

元朗廣場又係得Tommy o黎開會，我o地兩個雙依為命喇…開到一點，個個都好似趕住走咁，頹頹咁又完佐，唔知係咪個個都趕住今日冬至收四點走人。

我o地MSO就冇得收四點o架喇，搭車返柴灣，因為有個contractor過佐o黎請食飯呀，哈哈，又賺佐一餐！

平安過渡一天，好有聖誕mood！

>>December 27, 2005 at 10:45:41 PM GMT+8

2005 年 12 月 21 日 星期三 【颳風】

今日返工，廿五號先放假，勁忙，搞到冷落佐BB，對唔住呀BB，但毛毛好愛您~

終於正式完成佐份年報，老細睇完我又edit完，可以畀regional I/C睇，勁花時間，但係做完之後勁有成功感！

聽日要去開會，但係只係準備佐o的頹o野，希望可以過到骨啦…希望聽朝何力天唔會刁難我呢個小人物啦，我點都冇老細咁好口才同高轉數嘛…

下晝老細又brief佐我幾句，原來我畀人告枕頭狀，老細叫我唔好o係o的靚面前一齊談論英姐o既不是，畀面佢係行動組主管喎。正所謂「錯就要認，打要企定」，英姐真係…唉…唔識講…佢衰就衰在冇義氣囉，如果唔係點會全世界唔妥佢o丫！到我離開新翠o個日我一定會KO佢至體無完膚為止！

放佐學之後去佐買surpise畀BB，仲送到佢門口添喎，不過點都冇機會攬攬BB，悶佐BB成日，毛毛真係唔想，但老細聽日開始放十一日假，o的o野唔o係佢放假之前死掂去就真係死得，所以揀佐今日返工。

我知道BB需要毛毛o既擁抱，因為毛毛此刻都好需要BB o既擁抱！

「願承載昔日的您，共仰望未來的路。」佩戴在您手中的錶，將記下我們的日子…

>>December 22, 2005 at 2:08:52 AM GMT+8

2005 年 12 月 20 日 星期二 【微冷】

琴日完成佐份年報，今日又要預備星期四CCC meeting o既o野，o個朝得我一個上新鴻基，真係作死…

本來聽日將會放埋呢個月最後一日假，但係咁o岩唔得咁橋呀Man姐要調假，咁我就同佢調佐，放聖誕正日，可以陪BB過第一個聖誕，真係好開心。

哈哈，我知BB想要o的驚喜，不過毛毛係一隻悶蛋o黎o架咋，最怕就係去做o的o野唔o岩BB口味嘛…一齊計劃o下都好開心嗟… =P

毛毛愛BB~

>>December 21, 2005 at 12:36:40 AM GMT+8

2005 年 12 月 19 日 星期一 【微冷】

《孔融讓梨》

孔融生於東漢末年，他除了文學了得，自小已有一種難得的美德——不拘小節。

孔融在家裡排行最小，他有四個哥哥。一天，孔融爸爸的朋友到訪，還買來了一些又甜又多汁的梨子，孔融爸爸把梨子洗乾淨，叫了他們五兄弟出來一起吃梨。孔融的四個哥哥見了梨子，立即爭先恐後的去搶著吃，你說他的梨子大些，他說你的梨子大些，似乎爭執起來。唯獨孔融一個站在一旁。

孔融爸爸感到很奇怪，便問道︰「你不喜歡吃梨子嗎？」孔融答︰「我很喜歡吃梨子！不過我年紀最小，還是先讓哥哥選好了，我再選一個最小的吃。」孔融爸爸聽了很高興，於是選了一個最大的梨子來獎勵他。

節錄自某免費報紙某親子專欄名為雅茵的筆者

----------------------------------------------------------------------------------------------------------------------------

呢條古惑仔果然係攻於心計，以退為進，高招！係有o的賤，不過我鐘意！

>>December 21, 2005 at 12:38:13 AM GMT+8

2005 年 12 月 18 日 星期日 【颳風】

我同BB住得咁近，毛毛每次都可以送BB返屋企。

雖然吻別係好唔願意，但係眼見一對男女，男o既送完個女上柴灣小巴後，就過對面上荃灣小巴，佢o地分別o既地方，就係小巴站，頓時覺得自己真係好幸福！

由開始拖住BB隻手，送您返屋企之後，毛毛就知道，呢一世，都唔可以再同BB分開！

>>December 19, 2005 at 2:32:24 AM GMT+8

2005 年 12 月 17 日 星期六 【颳風】

"If you think you can, YOU CAN!"

我自信心爆棚啦，但係唔識點樣教人增加自信。其實我o既自信心係點樣得o黎o既呢？我真係唔知。

不過有一點我要成日提醒自己。自己認為好容易做到o既事，o係另一個人身上，好有可能係一件難事，唔可以間硬將自己o個套套落人o地身上去用，要有同理心。

我份人成日都欠缺呢種感情，或者係因為我係一個理科人，凡事都要睇證據，做o野要有邏輯，否則好難令我信服。

嗯…要改改…嗯…凡事唔好先入為主，落晒判斷…如果唔係成日聽我講o野又要我聽佢心事o既另一半會好辛苦…

聆聽！

>>December 19, 2005 at 4:10:14 AM GMT+8

2005 年 12 月 16 日 星期五 【颳風】

今日BB見工，係家姐公司份工。

過程都算順利，人工唔係高，不過最大問題係興趣唔係o係o個度。

如果去做一份全新o既工，唔知頭唔知路，要貼錢走同冇花紅，風險太大。

BB暫時o係prop. man.只係搵過兩份工，仲有大把未見o既工，搵到o既話人工一定唔止而家個數。

講發展兩邊都係未知數，未來o既o野冇得估，所以我現實o的，只比較而家有o既o野。

諗一諗，當年都好有勇氣，決心離開化學界，因為我真係好憎好憎化學，憎到一個地步係我一生都唔願意再接觸呢一樣o野，食呢行飯，永不走回頭路。

到今日，我覺得自己o既決定都仲係o岩，至少，我識多佐一班朋友，眼界亦都闊佐。而且，我認識到我最愛o既BB，不枉此生喇…

所以，我估我會明白轉行o既心理狀況。記住，要真係好憎好憎做緊o個行，先好轉工，否則，一定會後悔。

>>December 19, 2005 at 2:40:17 AM GMT+8

2005 年 12 月 15 日 星期四 【颳風】

熟人介紹

出o黎做o野，或多或少有熟人介紹，真係搵工都易o的。如果係我，我就會有兩個擔心o既方向。第一個就係請佐我，第二就係唔請我。

請佐我喎！理應好開心o丫，有乜好擔心喎！但係請我o既原因，會唔會係因為畀面介紹我o既人，所以先請我呢？而且自己又可能經驗、學歷唔夠，未夠料就上位，畀人當係o的王親國戚，加以討好或者歧視。一但做得唔好，又會有負於介紹人同老闆，又怕會畀o的同事笑唔夠料…嗯…好大壓力！

如果唔請我，心情一樣好矛盾。因為自己唔夠料，唯有認命。但係又會o徙佐介紹人o既一番穿針引線，兼且浪費一個大好機會…

或者唔應該畀咁大壓力自己！真係船到橋頭自然直，唔諗得咁多。只要有誠意，而且肯學肯捱，總會有出頭o既一日。得或者唔得，都可以從中得到o既經驗同知識，係異常寶貴！盡力而為囉，有冇出過力人o地睇到o既，如果我真係一出世就咁叻乜都識晒o既話，咁根本就唔駛做，發到豬頭咁好耐啦！

有機會，就要爭取，享受個過程。得與失，變得唔再重要喇！

>>December 16, 2005 at 3:12:51 AM GMT+8