2006 年 3 月 4 日 星期六 【微冷】

英研究︰汽水致癌物超標8倍　食環署︰本港樣本無驗出
3月3日《明報》

汽水等軟性飲品（soft drinks），原來早於15年前已由美國食品及藥物管理局（FDA） 證實含有第一類直接致癌化學物「苯」（benzene），惟事件一直未有公開，至近日FDA作再跟進化驗始被揭露。英國食品標準局（FSA）最新的公布顯示，230種汽水等軟性飲品中，部分苯含量超出當地標準8倍，事件已觸發德國作出跟進調查。

防腐劑遇維他命C產生苯

美國專家1993年的另一調查發現，汽水選用的防腐劑苯甲酸鹽（sodium benzoate）和抗壞血酸鈉（ascorbic acid，即添加的維他命C），相遇時形成苯。令人憂慮的是，這兩種物質至今仍廣泛用於全球多個牌子的汽水飲料。

包括百事芬達新奇士

英國環保組織「環保工作組」上周分析當地市面汽水的成分，亦發現多個暢銷品牌，包括百事、芬達、新奇士、Tropicana等等，俱含有相信可產生苯的防腐劑苯甲酸鹽和抗壞血酸鈉（維他命C）。

本港食環署表示，本港並無法例規管汽水等飲品中的苯含量，署方根據世衛就飲用水訂出的上限標準每千克含10微克，去年在市面抽驗了20個飲品樣本，發現全部樣本都不含苯。

外電報道，美國FDA早於1990年已得悉汽水含苯的問題，但當時只是私下與汽水製造商討論處理方案，要求製造商更改汽水成分（見另稿）。近日FDA化驗市面汽水的苯含量，再發現超出當地每千克含5微克的法定上限標準。部分在拉丁美洲出售的汽水，苯含量甚至較世衛所定的每千克含10微克上限，超出6倍。

英國FSA亦有跟進同類問題，要求當地的汽水製造商化驗其產品，結果發現，230種在英國和法國有售的汽水飲料，部分苯含量超出當地法定上限（每千克含1微克）8倍，但仍未超出世衛標準，不過，當局並未進一步公開有關問題飲料名單。

生物化學家警告，苯是已證實可直接令人類患癌的化學物，可透過呼吸系統吸入、皮膚接觸、腸胃攝取等，會引致肺癌、皮膚癌、肝癌、腸癌甚至血癌等，應盡量減少接觸（見另稿）。

可口可樂︰苯含量微毋損健康

在本港設廠生產汽水的可口可樂表示，他們仍須向阿特蘭大總公司了解事件，昨日未有回應，發言人亦提供了歐洲餐飲聯會（Union of European Beverages Associations）的聲明指出，汽水飲料中的苯含量極低，無理由會威脅健康，反之，市民每日由汽車廢氣中吸入400微克苯，分量等同飲用40公升含苯量達世衛最高上限的飲料。

本港消委會研究及商營手法事務部總主任鄭躍年稱，過去曾化驗汽水內的咖啡因含量，但並無進行類似英國的研究。他表示會與食環署商討，是否在港進行相關的抽查測試。他補充，任何食物都可能含例如重金屬等污染物，市民要做的是盡量不要偏食。

----------------------------------------------------------------------------------------------------------------------------

美15年前發現　未公開捱轟
3月 3日 《明報》

只私下要求製造商改成分

美國食品及藥物管理局（FDA）1993年於國際科學雜誌《Journal of AOAC International》發表研究，指食物和飲料若含同時有防腐劑苯甲酸鹽（sodium benzoate）和抗壞血酸鈉（ascorbic acid），會含有較多的致癌物苯。有監察事件的「餐飲新聞網」指出，FDA早在90年代已就事件要求汽水製造商更改汽水成分，但有關內容一直未公開。

據英國廣播公司（BBC）報道，美國長島大學教授Glenn Lawrence表示，他們於90年代已發現市面汽水含有苯甲酸鹽和抗壞血酸納。93年他發表研究，指此兩種化學物相遇時，會產生致癌物苯。他當年是協助FDA進行有關實驗的一員。

汽水廠前化驗員揭發

監察食品安全消息的餐飲新聞網（Beverage Daily.com）更指，事件得以揭發，是當年涉及事件的其中一間汽水廠前化驗員與美國一名律師，聘用紐約一獨立化驗所化驗市面汽水含苯量，超標結果促使FDA須重提事件進行化驗。

BBC則將美國有關化驗結果向英國食品標準局（FSA）查詢，當局跟進當地市面有關汽水化驗結果，亦發現苯含量超標。

英國環保組織「環保工作組」批評，FDA於1990年已得悉問題，卻不向公眾交代，而是私下與汽水飲料製造商協議，是漠視消費者的知情權，要求當局公開致癌飲料名單。

----------------------------------------------------------------------------------------------------------------------------

港部分暢銷汽水　包裝標明可致癌成分
3月4日《明報》

汽水中的防腐劑苯甲酸鈉（sodium benzoate）與飲品內的維他命C（ascorbic acid）產生化學作用，形成致癌物「苯」的問題令人關注，本報翻查市面汽水，亦發現「新奇士」檸檬汽水和雲呢拿梳打汽水，包裝清楚標明含有上述兩種成分，而標明有檸檬口味的百事可樂和可口可樂汽水，亦是使用苯甲酸鈉作防腐。

3飲料公司沒正面回應

「新奇士」生產商屈臣氏、可口可樂和百事3間飲料公司，均沒有正面回應其產品的製造過程會否產生致癌物「苯」，只強調產品飲用絕對安全，有關成分使用亦合乎本港的法定標準和標籤法。

本報昨日翻查市面上各品牌汽水飲料，發現多個暢銷品牌，包括可口可樂、芬達、百事、七喜、新奇士，均選用苯甲酸鈉（sodium benzoate (E211)）作為防腐劑，當中標明以「真正果汁製造」的新奇士檸檬汽水，和以「天然雲呢拿製造」的雲呢拿梳打汽水，更清楚列明含有維他命C。

而近年新興在汽水中加入檸檬味，不過，百事Twist檸檬味汽水、可口可樂健怡無糖青檸汽水、芬達提子味梳打汽水，均沒有在標籤上列出是否含有檸檬、青檸和提子應有的維他命C。

「苯」證實第一類致癌物

中大生物化學系副教授陳竟明指出，外國研究顯示，汽水中發現含苯相信與飲品中的防腐劑苯甲酸鈉（sodium benzoate）和維他命C產生化學作用而形成的，而化學品「苯」，已證實是屬於第一類致癌物，可直接令人患癌，攝取愈少愈好，但因汽車廢汽亦含苯，飲品中的苯含量多寡則不詳，市民飲用多少才對健康有害有待跟進。

「新奇士」生產商屈臣氏發言人指出，剛獲悉有汽水含苯的消息，仍須跟進了解，並會由品質檢定部門研究後才決定是否需要作跟進化驗。

指苯可被飲料糖分抑制

可口可樂公司發言人則說，飲料中的苯甲酸鈉及維他命C，是在「非常特定的情況下」產生化學作用才會形成苯，而苯的形成卻可以被飲料中的糖分抑制，故維他命C和苯甲酸鈉共存，並不一定產生苯，他們的產品絕對安全。但有外國專家指出，無糖健怡汽水缺了有關「抑制」作用，變得更高危。

百事可樂相信，其產品飲用安全，並已符合任何規管苯含量的標準，而他們所有防腐劑和添加成分，均是符合法定標準。

----------------------------------------------------------------------------------------------------------------------------

有o的咁o既事？今日先o岩o岩入佐貨咋喎… @_@

>>March 4, 2006 at 8:54:46 PM GMT+8

2006 年 3 月 3 日 星期五 【微冷】

今日新老細無端端o係我食完煙仔返到office之後捉住我，o係度教我做o野…

佢話好多o野我o地MSO o係某o的事情上（例如有商戶申請加個signage），可以將多o的關於management issue o既information同proposal連埋個客o既申請交畀Leasing Dept，佢話咁樣可以慳o的時間同人o地覺得你useful。

雖然佢所講o既o野我其實一早都已經做晒，但係箇中o既道理其實又好o岩，好有用，第日我都會留意，起碼唔駛上面o的人係咁打電話落o黎問埋晒o的芝麻綠豆o既小事。不過咁，以我呢一年來o既經驗，同埋Man姐多年o既經驗，同埋Selina o既教悔，坐新鴻基o個班人個個都自己以為自己高高在上，根本就唔信我o地下面MSO呢班賤民所講o既o野，永遠都係佢o地話乜我o地就做乜，我o地只係佢o地隻棋，佢o地話咩我o地就要即刻交貨，冇選擇權。

新老細，希望你快o的明白呢個道理啦…唉…

>>March 4, 2006 at 9:05:41 PM GMT+8

2006 年 3 月 2 日 星期四 【颳風】

繼續返工放工，冇佐Selina o既生活真係比想像中悶好多，最少冇佐老細o係房裡面細聲講大聲笑，傾完笑完之後又出o黎講o下佢笑o的乜…唉…而家個office真係悶氣十足！

唉…真係好死…好在今日都仲係月頭，有好多report要趕住交，咁先冇咁苦…時光匆匆，話咁快又做到收工。

BB今日返晝放晝，放工仲要去做gym，毛毛唯有去接佢放gym啦。上佐Comma飲o野，之後波子棋大戰真到兩人筋疲力竭…

毛毛明白BB內心o既鬱結o既，不過唔駛怕，毛毛支持您，錫住您~

返屋企攬住BB覺覺豬…zzz…

>>March 3, 2006 at 10:06:30 PM GMT+8

2006 年 3 月 1 日 星期三 【颳風】

聽講話今日o既溫度終於達到個位數字喇，不過我今日上晝放假喎，恕我不知民間疾苦喇…

不過十點幾都醒佐喇，呀Mi又打o黎話新老細請食飯，叫我返去，咁咪早o的出門口囉。

呢個新老細原來都唔係啞o架，我估佢之前唔出聲都係因為剝佐兩隻大牙o既關係嗟！而且做o野唔好講o野，佢o既行徑都好正路。不過呀Man姐就慘o的，send晒sms畀我話頂唔蒲叫我快o的返去…冇法子o既，三個女人一個墟嘛，少佐一個，就梗係靜焗o的o架喇！

食飯時新老細都好多o野講o丫，分享o下佢o的經驗，當我o地提到Leasing o個邊成日係咁逼我o地交o野，佢就話o的客唔交都冇辦法，再講o下都係急大老細所急，轉化壓力咁。見佢個人都好似冇乜o野嗟，係靜o的囉，我估都係未熟嗟。我o地呢o的做細o既就梗係要適應唔同老細o架啦！

忙忙碌碌又一day…好掛住BB！

>>March 2, 2006 at 1:05:29 AM GMT+8

2006 年 2 月 28 日 星期二 【雨】

出佐糧，但全數冇晒仲要嘔凸去還卡數，都幾慘情…

為佐落實儲錢結婚計劃，決定要縮緊一o下o的開支，唔可以畀BB白白咁等落去。

最近發現佐藍田返屋企o個程仲有得慳喎。之前都係行落山搭紅van返屋企，慳返$3.8綠van錢，因為我發覺夜晚等綠van等極都冇車，既然白等o徙時間，不如行落去都差唔多。今晚早佐送BB返屋企，行過去啟田搭694，結果發現架車好快，而且同比紅van兜o既路更加少，唔駛半個鐘就返到屋企，仲比以前慳佐$5.4，不過只適用於12點尾車開出之前呀，但係都係一個大發現！

之前又掘到去尖咀湊BB放gym可以搭788去中環轉船，比搭地鐵慳$3.9呀！我覺得自己真係越o黎越婆仔，但係應慳則慳嘛！

我要o係五年達成個結婚夢，除佐之後再搵份人工高o的o既工之外，仲要唔好亂咁用o的無謂錢呢…要努力要努力！

----------------------------------------------------------------------------------------------------------------------------

今日係老細o係新翠o既last day，大家都好唔捨得，下晝老細只係返o黎一陣又要出去開會，係夜晚先可以一班人食餐飯。天下無不散之筵席，所以只有默默咁祝福佢事事順境。他日或者仲有會機會合作嘛！

「知遇之恩，畢生銘感。」多謝兩位姓吳o既舊老細。

>>March 1, 2006 at 4:08:50 AM GMT+8

2006 年 2 月 27 日 星期一 【微冷】

一生何求
古巨基

若有你　若有我　還有十塊
這樣我　便可以　約你去街
只有十塊　甚麼信物平便買
甜蜜蜜吃些燒賣

沒老友　沒女友　如何愉快
生命要　用把尺　透徹了解
得到　沒有　或者當做還舊債
事業完美得不解

大概天要我兩者挑選
跟你兩個　寧願缺少了人緣
對我　你偏庇護縱寵　事業仍為我捐

若要的通通也沒有　然而仍可手挽手
剩下溫柔　問我一生復何求
庸才　仍可得到你問候
無限滋油　慢慢細賞星宿

沒有錢不要走　到了有錢通處走
樂在心頭　問我一生復何求
庸才　難得找到你願受
情在心靈　在身外　任一切　沒有

命數轉了又轉　其實始終不自願
跟你兩個　寧願缺少了人緣
對我　你偏庇護縱寵　事業仍為我捐

若要的通通也沒有　然而仍可手挽手
剩下溫柔　問我一生復何求
庸才　仍可得到你問候
無限滋油　慢慢細賞星宿

沒有錢不要走　到了有錢通處走
樂在心頭　問我一生復何求
庸才　能與你一起墮後
落魄溫柔　那溫柔　將火化　萬有

情在心靈　你生存　任一切　沒有

----------------------------------------------------------------------------------------------------------------------------

古巨基，點解你成日唱o的歌都咁好聽？點解你把聲可以咁溫柔？林夕，點解你成日寫o的詞都咁感人？點解你支筆可以咁細膩？

>>February 26, 2006 at 11:09:14 PM GMT+8

2006 年 2 月 26 日 星期日 【微冷】

繼續努力返工，雖然ISO forms o既任務已經完成，但仲有一份dry drill、三份minutes、客戶問卷o既計分同埋KPI…好多o野做呀！通通都趕住28號老細下晝返一返o黎新翠畀佢簽…

琴日妹妹生日，今日爸爸生日，放工去佐杏花村食別府，覺得好難食，不過唔係我出錢，所以都冇乜聲好出。爸爸媽媽唔多鐘意食生o野，怕有菌。第日我一定要帶佢o地去食o的又乾淨又好食o既日本o野。

今日返工繼續《斷背山》後遺症，係咁叫人去睇，但係o的同事仔個個一聽到係兩個男人相愛o既故事，就冇晒癮話死都唔睇，都唔識欣賞！

諗起Jack其實由始至終都只係想同Ennis返老家搞個牧場，兩個人從此生活落去，當初我以為佢吹水，原來佢已經同佢老豆老母交待晒想咁樣做，而佢老豆老母亦都接受（忍受）佢呢個諗法，偏偏「愛不對時間」，佢愛佢時佢就唔想佢咁愛佢，到佢想愛佢時佢已經不在人世…唉…悲情…

「無法改變現狀，就只好默默忍受。」

>>February 27, 2006 at 12:46:21 AM GMT+8

2006 年 2 月 25 日 星期六 【微冷】

星期六，琴晚大家都已經要夜訓，之前一個做完gym一個又踢過波，今日兩公婆都要早起返工，真係慘…

執ISO forms快將完成，但要襯老細last day前做埋o的文件畀佢簽，真係要加把勁。BB今日都叻叻，KO佐個煩人收樓客，仲要做埋份星期一交o既OC文件，勁！

今晚去佐睇Brokeback Mountain（港譯︰《斷背山》），李安執導，唔錯唔錯。一段兩個男人o既愛情，我覺得都只係一段普通o既愛情，同其他人都一樣。好唔明點解去到o的情慾鏡頭o的人會嘩嘩聲！如果真係接受唔到就咪買飛入o黎睇啦，自己好奇睇又要嘈，都唔知咩心態。

其實成套戲要去到最後先有o的比較感動o既位，睇到BB流晒眼淚…

兩個主角維持佐呢種大部份人認為唔正常o既愛情二十年，兩個人其實亦有好多自我o既掙扎，其中比較懦弱o既Ennis因為覺得辛苦，要求了結同Jack o既呢段關係，佢唔明其實Jack亦都有佢o既辛苦、佢o既付出，其實兩個人o係內心裡面都係深深咁愛對方…

Ennis一直唔知道，對方外表剛強，其實內裡柔弱，只希望可以永遠同佢一齊，廿年如一日不變，但要到Jack死佐，先由Jack屋企人得知Jack係有幾愛佢，仲收埋佐佢o地當年希望以打交而了結關係o既血衣…不過一切都已經太遲喇！

究竟兩個人o既愛，係咪真係幾辛苦都仲要o係埋一齊呢？我以前一直覺得合則來不合則去，或者呢個觀念係錯o既。幾辛苦都要o係埋一齊o既原因，其實係因為兩個人之間o既愛o既深厚、忠誠，執著咁去追求美滿o既結果。

如果大家都搵到愛o既對方，外加o既痛苦比起互相思念對方o既痛苦，又算係o的乜呢？愛，還是單純o的好，要好好珍惜，唔好諗得太多，加入太多雜質。

大綱不會變化，愛意不改，細節願精彩…BB，我愛您呀！

>>February 26, 2006 at 11:34:20 AM GMT+8

2006 年 2 月 24 日 星期五 【微冷】

大家忙，各有各活動。

今晚有波踢，好開心，又可以運動一o下，之前夾開o既呀Ken亦都有去！一開始佢打中堅我打左閘，但係太耐冇夾過波，冇晒默契，成日走埋同一樣o既位，唯有我o地分開o的企，佢打左閘我打右閘啦。

今日可以捱足成場冇抖過，自己都覺得自己堅！踢完勁精神，但係對腳就好死累…

BB今晚同同事食飯直落去埋飲酒，諗返自己好耐都冇去過擘酒，近期都只係飲少少就算，對上一次擘到wing都已經要算返去半年前Ken仔返o黎，痴線！好懷念以往o既頹廢o既某些日子…唉…苦無對象出去擘！Ken仔，您幾時又會再返o黎？

踢完波返屋企沖乾淨涼再出去接返BB返屋企，見今次BB o既狀態都仲好ok，毛毛都放心o的。

毛毛要同BB永遠緊扣住一齊唔分開。

>>February 26, 2006 at 3:40:47 AM GMT+8

2006 年 2 月 23 日 星期四 【微冷】

調佐假放今日，無無聊聊咁…

橫掂都夾唔o岩BB o的假，索性約埋郵差去換智能身份證。不過上晝首先同佢同埋郵姐去佐會展個升學就業展。勁無聊，工種少，好垃圾。

換個智能身份證原來好快，都唔駛半個鐘。今日個樣殘殘o地，影到張相樣樣衰衰咁，不過可能只係我不嬲都咁樣衰o既關係，冇辦法會影得好。

部電腦越來越唔掂，都唔知點整，有時間先format佐佢…

今日去佐好多地方，柴灣、筲箕灣、灣仔、銅鑼灣、康山、太古、西灣河、尖沙咀、旺角、藍田…但係都仲係覺得好悶…唔知因為o的乜…

>>February 24, 2006 at 2:38:24 AM GMT+8