2006 年 5 月 23 日 星期二 【雨】

借酒消愁夜！好耐都未試過咁high！

確實係好唔開心喎，為佐儲錢o既事，一直都冇好好咁出去癲過，今晚一於玩餐飽！

另一個「愁」人係郵差，自從佢返佐香港之後，都仲未搵到一份合適o既工作，我知道如果唔係生活迫人，都唔駛揀保險o黎做，但係佢份人唔夠奸，成日諗住要同個客諗個周全o既plan，又o係美國住佐咁多年，點都冇可能一時三刻突然開到好多單、賺到錢。

正如Warren一年前咪又係雄心壯志咁話保險係佢o既終身職業，保險點樣可以幫到人（雖然呢個係事實），但係都係要quit呢一行。佢人際網絡唔係闊，個人又唔夠so so，入行前亦都勸過佢，一早知佢遲早唔掂。上個月問佢都仲係一個月搵一皮o野鬆o的，比佢以前做prop. man.仲要低三份之一人工咁滯，點生活o丫…

講返正題。屋企食完個飯落銅鑼灣老地方搵佢，雖然今日一起身已經好頭痛，好想食完飯即訓，但係見聽日放假，都可以陪o下條友仔，玩o下馬仔機，不過長遠o黎講咁樣都唔係辦法…唉…人生就係咁荒謬，有邊個想咁樣過生活？我唔想，我知道佢亦都唔想。

但係人生總有好多難關要過，今時今日際遇唔好，唔代表成世都係咁，我總唔信個天要咁玩人。好似買基金咁，個價位梗係有上有落，成日畀你低位入貨拿晒著數，你咪好發？哈哈…真係邊有o的咁爽o既事o架…不過整體上都係會升會賺o既，而家只係時機唔成熟嗟，即係所謂︰「無法改變，就只有忍耐。」

玩佐陣，因為真係心情真係奇差，就提議去飲o下酒。本來諗住豪飲幾杯心愛o既tequila就算，但係一上到去，佢居然話做緊promo 108蚊兩個鐘任飲，兩個人即時癲喪起上o黎！超級抵！呢個價，平時o係香港o的bars都只係飲到兩杯丁屎咁多o既spirits，而家又有成個表廿幾隻cocktails、tequila、rum、gin、brandy、vodka、whisky、red wine、white wine…

兩條友都兩眼發光，一坐底就係咁order，玩o下骰仔、吹o下水、講笑…乜都可以笑一大餐！係咁灌係咁灌，互相點o的唔知係乜o既cocktails畀對方…頂佢個肺，左邊o個行有成五六七隻whisky，我同佢都唔鐘意飲，一入口就即時x口x面…但係叫佐都要「good good」聲咁飲晒去o架喇。因為我o地今晚要買醉！

兩個人飲佐十rounds以上，兩個鐘頭好relax，但亦好唔夠喉，不過都要埋單走。真係好耐都冇試過wing成咁，勁high！兩條友行去搭車，不過為佐可以坐同一架車，上佐N8。頂…架車真係搖得仲勁過舢舨！仲要兜來兜去…坐極都唔到柴灣… @_@ 勁wing、勁想嘔，結果就嘔到成車到係…都唔止咁，落車又再嘔，返到屋企仲可以嘔多次，係咁嘔，真係high！飲酒有埋嘔呢一part，先至係high o既至高境界！

唔知點解自己會開到熱水爐，但係坐佐o係我馬筒上面，wing到呀媽都唔認得，幾乎仲訓著埋咁滯…真係好耐好耐好耐都冇試過high成咁，個人好似冇晒知覺咁，乜都唔記得，淨係知道自己好wing，嘔到成個企缸都係o野，個肚突然又好痛係咁屙…生理同心理上都有一份解脫…

唔知點解自己會爬到上張床，一攤落床就訓得著…超爽！爽就係爽在wing到爆o個時個腦再冇空位畀你諗o的唔開心o既o野，唔駛再煩一o的自己無謂o既執著…呢o的唔係我想要o既生活，但係可以暫時o係現實之中抽身出o黎，放縱一o下，都未必係一件壞事…

我估…我可能會幾個禮拜，又或者幾個月，唔再豪飲住。冇胃痛，只係唔想成身散晒，冇一部分肌肉係屬於自己…

>>May 26, 2006 at 3:05:06 AM GMT+8

2006 年 5 月 22 日 星期一 【雨】

唔開心，因為感受唔到被愛o既感覺…再次讓自己陷入2月11日以o黎o既情緒低潮。

或者係我自私啦，失去愛情推動力o既時候，總會諗起付出同收獲o既問題，但係內心係完全明白玩呢個遊戲，計較呢o的咁o既o野，係必定會失敗。

大部分朋友都我變佐，居然會諗儲錢、結婚、生仔等等我以前一直堅持係好戇居同無謂o既事。甚至畀人話今日o既我，已經唔再係佢o地認識o既我。有o的人，都話咁o既變化，對我o黎講並唔係一件好事，笑我。亦有o的人，支持我，幫我o既將來諗埋一份。

其實我成日都同人o地講，當你學識唔好以自己o既伴侶成為生命中唯一o既快樂泉源，企後一步，放鬆一下，做o下自己想做o既o野（背叛對方o既事情除外），絕對係對愛情長跑有積極、正面o既幫助。可惜，有時當局者迷，往往會犯上自己所講o既錯誤。

其實我又好簡單，坐低飲o下o野、食o的令您開心o既o野，煲o下煙，傾o下偈，傾乜都得。發表o下我o既「偉論」，聽o下您當日所遇見o既，再表達o下我o既瘋狂意念，逗到您笑，令您充滿壓力o既情緒得到釋放，咁我就會好滿足。keep住呢種咁sweet o既mood，返到只屬於我o地o既屋企，甚或只係一個極小o既丁方小房間，沖個涼，做個愛，相擁酣睡，就係我所諗o既full moon。

現實情況下，係要有呢種mood先至warm、先至和諧、先至靈肉合一。

----------------------------------------------------------------------------------------------------------------------------

一個日記留言、一個sms、一個msn擁抱圖案、一個電話，都是您愛我的證據…


您就是我的禮物

>>August 31, 2008 at 6:28:24 PM GMT+8

2006 年 5 月 21 日 星期日 【雨】

最近覺得自己好似成為佐精明消費者咁，買乜都格幾次價、又睇o下幾時有減價呀、邊度可以用coupons呀、點樣可以用盡o的優惠呀、申請o的乜有咩著數呀、八達通都申請埋計積分呀咁…好似好鬼師奶…

不過如果可以用少o的錢，買到同等o既快樂，又或者同一舊錢，可以買多幾個快樂，咁又唔驅喎！人工就係得咁多，駛費又有n咁多項，唔諗方法駛錢駛得叻o的，點可以盡快達成長遠o既願望呀？！

BB最近唔夠可愛喎！為佐「鼓勵」，係「鼓勵」，唔係「獎勵」，I repeat，係「鼓勵」BB繼續可愛，毛毛特登買佐o的BB鐘意o既小禮物送畀B，等毛毛o既BB o係厭悶之中可以沖喜o下！開心o下！笑o下！

眺望將來，而家o既少少辛苦，以後都會覺得係甜o既！我愛B！

----------------------------------------------------------------------------------------------------------------------------

米米，您個相簿開唔到喎…

>>May 22, 2006 at 1:48:18 AM GMT+8

2006 年 5 月 20 日 星期六 【陰】

懶洋洋星期六，琴晚臨走留佐字條畀老細，話呢兩日唔o係香港，等佢唔好打畀我o係度煩住晒，ACL夾裝修還原o個單o野就佢自己執生。但係晨早九點幾都仲係畀ACL個pk打電話o黎嘈醒佐…頂！

醒佐可以再訓，訓到兩點幾起身，再同BB去街街，睇o下買唔買到馬仔袋。嘩，有好多種馬呀！有「半隻馬」啦、「細隻馬連字」啦同埋「萬馬奔騰」呀…

可惜o丫，o岩款又唔o岩size，o岩size又唔係o個個款…唔通焗住要買「愛迪達斯」或者「賴茄」？

毛毛最近心情都好唔穩定，見B悶悶不樂咁，都係想逗o下B嗟，不過毛毛淨係識得搞搞震，好似冇乜效咁喎…結果搞到毛毛都憫埋一份添…毛錫錫B~毛錫錫B~毛錫錫B~ >3<

>>May 22, 2006 at 1:25:17 AM GMT+8

2006 年 5 月 19 日 星期五 【清涼】

每做到一項，快樂便多一些，你能做到幾多項呢？

起步
1. 早上一起身便對著鏡依起棚牙，開心的豬頭炳，幾時也開心過憂鬱小生。
2. 越早起身越好，晏起床的人總好像不大快樂。
3. 無論怎樣忙，一定要食早餐，而且一定要把早餐慢慢歎。一早起來便趕喉趕命，整天都會有『唔知為乜』的感覺。
4. 大解後才出門。

待人
5. 喜歡你喜歡的人，討厭你討厭的人，待人毋須平等。
6. 告訴你喜歡的人你喜歡他╱ 她。
7. 無關重要的人誤會了你，便由得他們一錯再錯。
8. 無條件為喜歡的人辦事。
9. 無端白事送件禮物給自己喜歡的人。
10. 待人以誠，對方不誠便立即遠離，勿拖拖拉拉，做大戲才須好頭好尾。
11. 任何條件也不為討厭的人辦事；雖小氣，免勞氣。

裝修
12. 不要在白鴿籠內建造羅馬柱。
13. 客廳不置組合櫃，空間頓增加七倍。
14. 別讓室內設計師把你的房子設計成他認為理想的房子，除非你打算與他同居。

財政
15. 不打算炒賣任何東西，便無忌。
16. 帳單收到立即付，便無牽無掛。
17. 可以送錢給人，別借錢給人。當然也可以不送錢不借錢給人。
18. 可以有多少錢，並不是由自己決定的，毋須一天到晚『數住』。
19. 間中買貴了，不值得耿耿於懷。
20. 床單至少有兩張，信用卡只需一張。

從簡
21. 不動用自己不懂的字眼。
22. 不去了解自己不明白的人。
23. 週末 ╱假期不一定需要有節目。
24. 不講大話便不用記住講過什麼。
25. 不扮野便不用記住要扮左乜野。
26. 不要看不順眼的人 ╱事物，別看需要邊看邊罵的東西，一年頂多看一次半次好了，例如港姐選舉。
27. 不用應酬你認為是『應酬』的飯局 ╱聚會 ╱出席等等。
28. 把 Appointment Book 丟掉，你不是牙醫。
29. 你不需要兩隻手錶，當然更不需要兩副面孔，徒增添維修費用。

接吻
30. 別濕吻不愛的人，手尾好長。
31. 更加不可濕吻權貴的屁股，乾吻、甚至輕啄也不宜。
32. 接吻時，全情投入，別看鐘錶，別看股價，別看天地萬物。
33. 保持舌頭清潔。
34. 吻時別嚼香口膠，也不要把對方當作香口膠來嚐。
35. 有冇人錫，都要錫自己。

飲食
36. 每天至少吃兩個水果。
37. 眼睛多吃冰淇淋，便可減少眼火爆。
38. 路過涼茶鋪，不妨幫襯一下－有無幫助不重要，自己覺得好便是好。
39. 茶樓酒館宜少去，免得二手煙頂住你個肺。
40. 雞肋及其他食之無味的東西，毫不可惜地棄之。
41. 飲水，飲水，再飲水。

睇戲
42. 遠離慘情片，尤其是那些真摰動人的；哽咽有礙呼吸，好辛苦。
43. 看不明白大師的電影，不用內疚，也不必扮欣賞。
44. 睇戲當然要吃零食。
45. 拒絕看配了廣東話的外語片，尤其是成人電影。
46. 請女人看極度驚慄片之前，自己先獨自看一次，免得屆時出醜。
47. 專心看戲，不分心在戲院偷錄。
48. 睇鹹片不要拗劇情。

工作
49. 適可而止。

得失
50. 過後不過一啖笑，記住起身依起棚牙，性感豬頭炳嚇不死人也嚇死自己，好happy 。

悲觀的人說「知易行難」，樂觀的人說「知難不難」。

----------------------------------------------------------------------------------------------------------------------------

我都想開心o的！

>>May 21, 2006 at 2:42:30 PM GMT+8

2006 年 5 月 18 日 星期四 【酷熱】

今日o既工作依然係好煩好忙，因為呢期一來好多舖到期要收返，二來leasing o個邊呢期又玩緊老屈續約商戶將玻璃門改做水晶閘（甚至連粥麵舖都唔放過，真係過晒火位！），我o地又要幫佢o係個場度睇o下夠唔夠位做閘、天花上面有冇喉o係度阻住做閘箱等等…總之就係你幫佢o地做o野，就唔駛旨意有時間做自己o野。

終於都等到放工，可以見到最想見o既BB~

最近唔知點解成日都有o的discourt o既coupon、贈券等等，缺水貪便宜o既我唯有焗住幫襯，依照佢o地o既規矩做o野。戲飛買一送一喎，你去唔去睇先？《黑社會二︰以和為貴》其實都係雷聲大，雨點小。好在o係冇乜期望o既情況底下入去睇，當係笑片咁睇都幾得意o架，呢期o的黑社會唔知係咪興用鎚仔呢？套戲裡面大大小小o既鎚仔居然出現佐十幾個，真係笑死朕…

不過今集加入o既鄭浩南好正呀，不過最終都係畀人圍毆到死佐。上下集都係要黃金唔要兄弟，最有義氣o既人居然係張家輝… @_@

>>May 21, 2006 at 3:03:48 PM GMT+8

2006 年 5 月 17 日 星期三 【陰】

琴晚見橫掂都要做o野，決定睇埋雲石護理班人做o野。

原來保養地面雲石唔係只係眼見佢o地搵架o野車o下車o下咁容易（其實全場係用人造石，仲要主要有三隻唔同… @_@），當中大有學問。

佢o地最近畀呀自強屈佐做全場地磚翻新，翻新就要搵唔同o既碟車地，車完又要再用好臭o既晶粉再車一次，車完晶粉都唔夠o架喎，因為只係側邊望埋去o的磚先會反光o架咋，要落埋加硬o個隻o野再車一次，先至會每論直望定側望，個地都係咁「ling」，咁反光，即係「照鏡」喇。

搞晒o的o野，再吹一陣水，四點返屋企訓…好累呢…

>>May 21, 2006 at 2:42:04 PM GMT+8

2006 年 5 月 16 日 星期二 【陰】

極端電視劇集《女人唔易做》經已全部播影完畢，雖然唔鐘意睇，但係從中又學到一個道理︰「從一個你討厭o既人身上去學佢o既優點」。真係好深奧…

最近真係好嬲一個人，就係o個個o係度拗更表唔公平o既友仔。

可能真係學最近o係網上面流行o既一條短片裡面個阿叔所講啦︰「每個人都有壓力，你有壓力，我有壓力…」，我又確係唔應該咁火o既…我都知佢日日畀佢老婆同佢老母煩住係幾咁慘o架喇，因為身邊有一個女人o係度「哦」住都已經夠慘o架啦，佢身邊仲要有兩個，而且仲要有個讀幼稚園o既女，都真係幾頭痕o既…

不過如果佢又可以企o係我o個邊諗o下，咁就好喇。自從換佐老闆之後，o的友仔比以前更加唔肯蝕底，以前叫佢o地四四六六擦掂o既o野，而家都只係一拖再拖…樣樣o野都black & white落晒簿，咁佢o地真係名正言順咁做返佢o地o既CSA，要佢o地過界做多少少o野都話︰「唔關我事！」唉…

呀自強又日日有o的新o野落o黎，唔係要查呢樣就係查o個樣，又要做咩兩手準備咁…痴線…o的文書工作突然之間增加佐一倍啦…唉…

聽日係放假呀，不過有太多o野做，唯有焗住唔返屋企食飯再OT…慘…

>>May 21, 2006 at 2:34:04 PM GMT+8

2006 年 5 月 15 日 星期一 【酷熱】

一切都夠喇！(3)

話說最近編緊下個月更表，因為下個月好多人拿大假，變佐月頭夜晚唔夠人，焗住要一個夜轉早o既同事返多半個月夜，等夜更人手充足o的。

點知呢條友仔真係好唔熟性，星期六打電話畀我話佢咁樣返多半個月夜對佢好唔公平，真係火都o黎q埋！之前調佢落夜佢已經o係度「呀gi呀jor」，又話見工時冇同佢講要輪班（第一日出o黎做保安？！），我估就算我漏佐，Selina都唔會漏，冇講過就假o既。就算我兩個都漏晒，最終都要以合約為準，冇寫o既話o個份就係假合約。

話轉回來，條粉腸打o黎話對佢唔公平，點解會係佢，我同佢講人手不足，梗係搵個夜轉早o既返多半個月，佢就係都話要返早，我話合約冇講明一個月一個月咁計o的更份，佢都係話要諗o下先（諗o下唔做？好喎！橫掂都想你條友走好耐！），咁就由得佢諗飽佢。仲細呀？三十幾四十歲人仲要人o地(乙水)呀？又唔見有人(乙水)o下我？！

今日再revise佐個draft更表，直頭調返緊早o既Kenji返下個月頭十幾日夜算（咁係咪又對呢個同事好公平呢？返緊早轉夜，再夜轉返早），費q事同佢講咁多o野，根本o徙氣。其實要怪o既都只係可以怪我自己太好人，太心軟，太戇x，想個個o的假都可以放得o岩心水，開開心心放假，放完假開開心心咁返工。根本我就唔駛出draft，只要合符勞工例，公司有權話放邊就放邊日，邊個要返早返夜根本唔到佢o地下面過問，呢個世界做好人根本冇好報！

嬲死佐，o係個更表上面寫佐十隻大字︰「斤斤計較者，難成大器也。」

我逗多你o地幾千蚊人工，做到隻o野咁，你o地班友就日日放佐工就「關人隱事」，我就仲要諗埋第二日、下個月。大佬呀，你第一日出o黎做o野咩？！呢個世界不嬲都冇公平o架啦！畀少o的麻煩我都已經要多謝你o地班友啦，仲要o係度搞搞震！真係嫌我未做到死咩？！

條友走埋o黎話佢唔係斤斤計較，我都費q事啋佢。早前佢日光日白當值訓覺，我都只係係咁二口頭警告佢就算，警告信都冇出一封，呢條x樣連最基本「賣笑」都唔識，日日愁眉深鎖，我都唔知佢係咪家變。雖知佢日日畀佢老婆同老母煩，但係工作還工作，你就唔好o係度一路做o野一路諗o野，學o野又慢，做二百次都仲可以做漏o的日常o野，我已經對佢仁慈到極點！

一切都夠喇！你要返早我就畀你返到夠，唔x好再煩我喇！不過如果畀我再捉到你訓覺，你等收信都得喇。

>>May 16, 2006 at 1:50:40 AM GMT+8

2006 年 5 月 14 日 星期日 【酷熱】

好悶呀！我o既生活好悶呀！

個個月出足糧都可以月中就冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！冇晒錢！

又要忍住手唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！唔買o野！

返工又要畀呀自強阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！阻住晒！

究竟為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？為佐咩嗟？

我就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！就快癲！

唉…除了唉，還是唉…

>>May 16, 2006 at 1:59:34 AM GMT+8