2006 年 6 月 2 日 星期五 【雨】

趕reports呀…又係做到痴線！

由於又會有三日見唔到自強，所以今日一定要做起大部份月頭交o既reports畀佢簽，真係好鬼死麻煩…o的reports有幾個o的料可以話係完全一樣，但係交畀唔同o既人又有唔同o既format，內容亦間唔中有些少唔同，真係好很煩呀！

做做做又係做足成日，間唔中呀自強又無端端「隊」o的o野出o黎畀我搞，又話internal audit揀佐我o地個site做作文，題目係professionalism…痴線！真係做到得閒死唔得閒病啦，仲要搞埋o的咁o既o野！

唯一o既安慰，係我o地部新o既水機，o係五月幫我o地慳佐幾皮o野電費，叫做補返四月用多佐o既錢。仲有半年，睇o下部機又可以同我o地慳返o既多電費！好期待！

>>June 5, 2006 at 3:26:03 AM GMT+8

2006 年 6 月 1 日 星期四 【雨】

忙死佐。點解咁忙？因為有個不負責任o既老細囉！頂佢個掣！

人之將死，唔係其言也善o架咩？條友仔o係咁o係度講電話，唔知幫邊個人o係度搞緊「國際龍舟邀請賽」o既o野…總之就一定同新翠冇關啦！

今日有三個吉舖要交，條友就o係office出出入入，係咁講電話、收fax等，朝頭早九點幾就要交346，好在個客鐘意自己睇，我先可以快快手手咁交完吉閃人。但係坐低一陣，348 o既許小姐又突然walk-in，直頭走埋入office度話要收舖。見佢係熟客兼且好人一個，就快快趣交個舖畀佢，免除後患o丫嘛！

搞掂兩個舖都已經十二點幾喇…頂…月頭仲有大量reports要交，睇o黎都係做唔到o架喇…今日大堂個展銷又核核突突，都冇咁多時間去理喇…食完飯仲要交埋103-4畀康泰。

食完飯未坐低，個客已經早到佐，落去交完吉，仲要繼續招呼佢。因為佢間舖同佢想像中有好大出入，做水晶閘有困難…出出入入上上落落走來走去，同埋呀Man一齊都搞到成五點先可以抽身而回… @_@

返到office仲要搞埋個康泰要改動o的乜o既report畀leasing，先至有時間搞大堂壇o野。打電話畀o個條所謂負責人，居然「cup」我線，真係火都o黎！一落去搵佢，佢即時爆晒粗咁o係個大堂度大聲又跳又叫，慌死冇人知咁，又話我o地o的職員對佢點衰點侮辱。頂佢，而家好似係違規在先喎，不過我都心知下面o的友仔對佢o的態度都唔慌好得去邊o架喇。

一日都係推廣部衰，乜都唔講清楚，仲要到夜晚七點先至fax張worksheet過o黎，同人o地又講得唔清唔楚。老實講o丫，佢o地真係好唔掂囉…都唔係第一次o架喇，硬係要畀o的鑊氣我o地「o肯」，叫佢o地幫手做o既o野，例如sticker signages咁，等足成年都未做，真係邊可能會咁o架…

搞掂晒呢堆o野都唔止，今日開始行返palm，結果行唔到四次又玩完…頂！人o地IT已經換過另一部機過o黎畀我o地試，但係班友都仲可以用壞，即係證明原先部機係冇事，而係我o地o既職員自己o既技術問題，自己用壞…呢o的o野老闆問到都唔知點解釋…唉…

但係以上o既o野，呀自強一o的o的都冇參予…做到八點半先有得走…人都癲… @_@

BB~好需要您呀！ >_<

>>June 5, 2006 at 3:04:25 AM GMT+8

2006 年 5 月 31 日 星期三 【雨】

端午節…琴晚打機打到閂門兩點先走，返到屋企就開始研究部V3 o既功能，搞到九點先訓… @_@

訓醒都好似係兩點喇，今日好鬼死累，但係都要返一返公司收舖。B今日要留o係屋企做乖乖B，所以冇出街留o係屋企hea，另外今晚媽媽去完旅行返o黎，o係佢o地返到o黎之前同妹妹點都要執返靚仔間屋先得，免吵嘛！而且今晚點都要交人報到，費事煩啦。

----------------------------------------------------------------------------------------------------------------------------

《中七生見工辛酸事....in盈科保險, in文員呀》
http://forum.showhappy.net/index.php?showtopic=37134

今天到朗豪坊見工
見完了所謂的工,感覺他們"超賤"
很氣。。。氣死我喇!!!
之前去in馬莎的時候收到這間公司的電話
叫我今天去in.....小玲也是同一天
但她比我早半小時。

一踏入朗豪坊辦公室大樓二十九樓
便看到"盈科保險"
只知道是大公司....便進去了。
甫一坐下....發現身邊很多年齡跟我差不多的人在等待
請一個文員不用這樣誇張吧?
一等...便等了差不多兩小時
有些人都等不及便走了

終於輪到我了
但不只叫我一個....
一叫便叫了六至七個人入同一間房
我們排排企....接著某人邊開始噴發她的"妙語"

某人的說話如下:
"真係唔好意思...要你地等咁耐"
"你地都見到架啦....我地今日都已經in左唔少人架啦"
"咁其實我都睇過晒你地幾個既...um...um....履歷表啦"
"就發現你地呢....就冇一個人有全職工作既經驗"
"咁其實呢....我地請既文員就係需要一d有全職工作經驗既人去做架"
"可能....你地就唔係太適合喇...."
"而我地都唔想再晒你地d時間係度等喇...."
"但係呢....我地公司就有請D業務推廣助理..."
"宜家就係30樓搞緊一個講座架"
"如果你地有興趣既可以去選擇呢個工作架"
"做業務推廣助理其實都係一個唔錯既工作"
"同埋你地幾個都好似唔夠廿一歲架...."
"如果要做呢個業務推廣助理....唔係一in就得架..."
"要睇下你地適唔適合囉....咁你地有冇人係打算試下呢個職位呢"
"我會搵位同事帶你地上去聽講座架"

這七至八名"傻仔傻女"都沒有人打算去做
接著便排隊離去。。。
原本小玲也在等待叫名的
但最後也跟我一起離去。

相信門外的應徵者也聽到這一番話
大公司便是這樣對待一眾求職者
要請有全職經驗的文員的話
請不要打來叫我們這班沒全職經驗的人去面試
沒經過篩選便打給我們
足足等了兩個小時
最後連一個面試的機會也沒有
說了數句說話便打發我們離去
學生的時間就不是時間嗎?

浪費了我的一張照片
浪費了我的兩個小時
浪費了我的精神去氣這間所謂的大公司!!!

----------------------------------------------------------------------------------------------------------------------------

咁小事就覺得慘？仲有排你受呀細路！

>>June 4, 2006 at 4:29:49 AM GMT+8

2006 年 5 月 30 日 星期二 【雨】

放孖地，爽！

訓到下晝三點幾先起身，真係好耐都冇試過訓成十二個鐘，起佐身食佐三件卷蛋、一包叮叮炒麵、十隻雲吞、五條芝士腸同兩條腸仔，好似生「大食積」咁…

一路食一路睇港產片《獨家試愛》，有方力申同鄧麗欣，仲有妖精吳佩慈。好典型o既香港愛情故事，方畀鄧發現佢同吳有o野，居然就係衰佐o係sms o個度！所以奉勸所有偷食人士，最好唔好用sms同第三者聯絡，就算收到都要睇完即刻洗佐去，以免「奶」o野。

雖然最後大家都發覺自己o係o個一刻最愛o既係對方，但係我唔鐘意佢個結果，就係兩個都有偷偷o地同佢o地分開o個段期間鐘意o個個人聯絡，唉…硬係有o的唔知點咁樣。或者佢o地都唔想對方亂諗o野啦，不過如果對方係接受到o既話，我就prefer光明正大打正旗號咁聯絡喇，成日瞞住瞞住咁好辛苦嗟！大家出得o黎行，要講過信字喎…

夜晚去佐老地方同郵差玩馬仔機。我o地要做「馬場大亨」（唔係馬場大「享」）！哈哈哈！

>>June 4, 2006 at 3:18:32 AM GMT+8

2006 年 5 月 29 日 星期一 【雨】

今晚郵差約佐好耐冇見o既Benedict食晚飯，我都有去。

因為有意粉屋o既coupon，所以食佐餐三個都唔係好滿意o既「香港o既意粉屋」晚飯。o的waitors十o下十o下，完全冇乜留意坐o係吸煙區最角落o既我o地，間o野個飯巿時間一半都坐唔滿，居然話個甜品tiramisu「o岩o岩」賣晒…唉…

食完飯傾o下偈。講真，其實我o地又好少機會咁樣三個人坐埋傾偈。笑o下巴士呀叔o既金句︰「大家都有壓力…」 @_@

Benedict呢期居然諗梗人生目標同冇女o既問題。人生目標呢o的o野，o係呢個分分秒秒都有強烈變化，今日唔知聽日事o既社會，真係一個令人好徬徨o既問題。三個人都讀完大學，一個澳洲返佐o黎幾年終於都做到佢讀major時o既工作，一個o岩o岩美國返o黎暫時做住一份完全唔鐘意o既工，一個o係香港讀完大學做佐幾年o野，但係大家都唔覺得自己有乜成就或者目標…

郵差就一直為佐份做得唔開心o既工而唔開心，不過老實講，佢想做o既o個類工，其實巿場上o既需求又唔係咁大，而且佢搵工o既量始終都算係少〈但係見工百份率都有成十幾二十個巴仙，犀利！），總係要經過一番尋尋覓覓，加上個人際遇等因素，先有機會搵到。好似Benedict咁，以前咪又係做過sales，我咪又讀過chem o既mphil，有時總要經歷過先至得到經驗同埋知道自己條路點走。如果一出身就做到一份自己好滿意o既工，又未免太過乏味喇！

之後講到女人o既問題，真係好認同而家香港o的女人太過注重物質喇，尤其是o個o的明明有份唔錯o既工，可以自己照顧自己，都仲要靠個男人養，為男人增加佐唔少壓力。口口聲聲話男女平等o丫，其實一段男女關係根本就冇平等過！

香港o的男人都好抵死，比女人遲熟，好似中學時代o的女生成績大多比男生好，而男人又比較容易對打機、賭錢呀呢o的o野沉迷喎，咁咪畀o的女人扒晒頭囉。結果搞到同齡o既男人無論質素同埋物質上都慢慢比唔上女人。到男人發奮時，o的女人都上晒岸啦！呢個社會現象同風氣真係好奇怪，難怪o的newsgroups o的topic成日唔係男人話o的女人貪慕虛名，就係女人話男人冇錢冇出色…

愛情可唔可以唔好再加入呢o的咁外在o既元素，可唔可以只係講返feel，個個都好似初戀o個時咁天真？

傾完偈之後Benedict因為住得遠，所以返屋企先。而我同郵差，就落Barn II飲酒。自從上次飲到嘔佐三次之後，o的腸唔知點解一直都唔舒服，所以今晚只可以慢慢飲（其實以佢個價，飲夠三、四杯都已經乜本都返晒o黎！）。郵差今晚唔開心，係咁飲，仲o係我去廁所o個時飲埋我o個杯… @_@ 離晒譜！結果今次咪到佢嘔巴士囉！哇哈哈哈哈哈哈哈！

>>June 4, 2006 at 3:10:06 AM GMT+8

2006 年 5 月 28 日 星期日 【雨】

爸爸媽媽今日凌晨三點幾出發去機場，去上海玩。呵呵呵！

雖然「夜」訓，但係今朝都冇訓到日上三竿，十點左右就可以見到毛毛最愛o既BB喇！毛毛掛住~啜啜~

hea o下hea o下咁就下晝，BB帶佐毛毛去啟田商場隔o黎o個個商場o既其中一間食店去食泰國o野。呢間o野就係BB成日提到，但一直都未去o既食店。本來以為係o的食裝修食服務o既店，去到先發現原來係一間平民式食店。毛叫佐碗魷魚泰，B就要冬陰公泰（泰國粉即係濛粉？！），呢隻粉就係平時毛毛唔得閒返屋企食飯，落美心買外賣食o既「泰式粉麵」，不過呢度o的湯清好多，冇咁多味精。

老實講，毛毛對泰國o野唔係好有興趣，但唯獨呢種麵毛係覺得試過o既泰國o野之中最好食，而毛又覺得冬陰公o個種酸辣法又唔同上海酸辣麵o個種咁吸引。突然間諗起某舊同事某次同我等一班人去佐金百利上面o個間「泰式食」食飯，一路食一路自誇佢冇介紹錯o既情景，嗯…好笑！=D

食完飯送返B返屋企，大家都返屋企抖o下先~

>>June 4, 2006 at 2:30:44 AM GMT+8

2006 年 5 月 27 日 星期六 【陰】

因為呀自強上個月有日放假又無端端話去training，搞到突佐半日假落今個月，今日我就無無聊咁放上晝返下晝咁就返佢。

B今日都要返全日，我o地放佐工就o係旺角集合，買佐飛睇已經足足上佐成個月o既M:i:III（港譯︰《職業特工隊 III》），再去CALIFORNIA PIZZA食飯。

呢間餐廳上次「奶」過o野，o的pizza並唔係已經畀Pizza Hut或者Spaghetti House「港式化」o既pizza，已係乾身「脆搏搏」o個種。一坐底見到佢sell緊隻「意大利風乾辣肉腸蕃茄薄餅」，即時心知不妙，幻想到食o個時個pizza究竟會有幾乾！眼見隔o黎桌o的人叫佐，食o個時個個嗌晒「好乾」、「好硬」咁，就真係好好笑… =D

對M:i:III真係冇乜特別期望o架喇，不過呢o的外國大製作，點都要畀錢入去睇o下o的特技同佈影。好例牌咁Tom Cruise扮超人，打不死，鎗林彈雨傷都唔傷反而畀人捉住打到爆缸，真係唔多make sense…

戲入面扮炸佐架Lamborghini Gallardo，不過我就點都係最鐘意77年出廠，95年停產o既Porsche 928多o的~


小心中招！


Lamborghini Gallardo


Porsche 928 GTS

>>August 31, 2008 at 6:31:14 PM GMT+8

2006 年 5 月 26 日 星期五 【酷熱】

好o野！返埋今日工，五日唔見呀自強！佢會返去長江o既高衛，長江o的樓出晒名爛，條友居然話遇強越強，真係覺得佢有o的癲，唔知佢係咪痴線o既。

上晝做KPI，下晝搞租務部交新舖o的o野，未停過手…仲有五日就出糧，今個月雖然放佐好多日假，但係因為平時太忙，總係覺得過得好快咁，真係好。

呢幾日都好鬼累…一食完飯九點幾就死佐上床訓…好o野，聽日返下晝，可以訓訓訓…

>>May 27, 2006 at 5:39:29 PM GMT+8

2006 年 5 月 25 日 星期四 【綿綿細雨】

Man姐琴日下晝同我講呀自強有異象，果然今朝一返到去，就難免咁畀佢brief一brief…佢已經辭佐職，三個月通知。

其實佢走都唔係o的咩大件事喇，見佢呢期成日都hea o下hea o下咁，又一早放晒風出去話自己畀人挖緊角之類，再加上佢一直都唔願出去見o的客同埋上次見佢做公司o個份員工意見調查講到自己有幾懷才不遇，都知佢都唔會坐得耐…

禍福難料，只知道條友一o黎就針住維修部，同埋搞埋晒o的低能規矩出o黎令到下面嘈亂巴閉。o的規矩係好，但係一班hea慣o既人又點會一時三刻玩得掂呢個game o丫…而家只係知道三個月之後又換個新老闆，唔知會係咩人同埋唔知好唔好夾…

唔擔心，因為我而家做o的o野都冇乜理佢，係唔想揹鑊先搵佢o黎做o下醜人…嗯。

>>May 26, 2006 at 1:53:35 AM GMT+8

2006 年 5 月 24 日 星期三 【雨】

今朝十點半就醒佐，成個人散晒…唔記得琴晚有冇洗面或者沖廁，淨係記得自己冇熄熱水爐就沖入房上床訓。洗個面，著返條底褲，開電腦上佐陣網，肚空空咁但係又冇乜胃口，飲佐包紙包奶，覺得個頭仲係有o的痛，上床再訓過。

預計兩點半起身幫婆婆拎份o野上醫院，但係最終都賴床賴到三點幾先起身，沖個涼再出門口已經四點幾，落到街發覺o的雨越落越密，不過諗住今晚會出街，又唔想淋濕我個可人兒，就返上樓拿遮。lift門一開就撞到Wendy姐，一齊上樓拿遮，又按錯佢住o個層添…

身水身汗行到上東區，自從唔駛再同婆婆去睇醫生，已經好耐冇行o個條百幾級o既樓梯。交完份表再坐車去太子買鴨仔畀BB。點知浴室套裝已經賣晒，唯有淨係買收音機，都幾得意，BB實鐘意。

接BB收工，不過BB又OT，焗住行o個個除佐萬寧就冇o野好行o既港灣商場。好在o係等o既時候就撞到個熟客，傾佐一陣，消磨佐o的時間。今晚我o地要睇Match Point（港譯︰《迷失決勝分》）。

係Woody Allen o既作品，雖然之前都未睇過佢拍o既戲，但係心理上覺得會係信心o既保證。照舊例唔睇影評唔睇簡介，憑直覺入去睇。套戲個節奏好慢，係從容不迫o個種慢。o個主角個個都靚仔靚女（最少睇得順眼），背景係英國，有現代，有古典，英式味道，沉迷。仲有鄉村、城巿、草原（有冇諗過o係滂沱大雨之下，置身草原之中做愛？）、apartment、老爺巴士、通街Mini Cooper等等等等，即使係背景亦都唔會令人覺得悶，取景一流！

好英式o既英文，o的對白聽起上o黎完全冇問題，有成九成o既對白都唔駛睇字幕，可以更加投入去睇套戲。主角Chris話做人完全要靠運，都可以咁講，際遇呢o的o野，真係對人o既影響好大。

不過條友確係好好運，出門遇貴人，畀佢識佐個有錢仔仲要friend到搭上埋佢個妹再娶入豪門。不過男人都係賤o架喇，係要搞搞震，仲要搞自己個friend條女，結埋婚都仲要念念不忘。中途都幾乎畀人識穿o架喇，但係又畀佢死唔認過到骨。所以話女人呢o的o野，一個都已經夠煩，但係又偏偏要搞多個仲要搞著個癲o既，飛都飛唔甩，最終居然誇張到要偷獵槍去扮劫殺射死條女… @_@ 真係激…

條友又好彩喎，明明以為佢會留底證據畀差佬查出，偏偏又有個道友做佐佢替死鬼，真係整定佢係做有錢人o架喇，不過可能以後晚晚都發惡夢，受良心o既責備直至死…

套戲令我諗起年頭睇o個套《出軌》，又係搞女人搞出事…哈哈…

睇完去食壽司，再陪BB shopping，一次過買佐好多新衫… @_@ 我估BB要一個大o的o既衣櫃喇…

>>May 25, 2006 at 4:12:17 AM GMT+8