2006 年 4 月 23 日 星期日 【清涼】

未到夏天嗟，做乜可以熱成咁…

琴晚同郵差返公司打佐場通宵牌，打完返屋企沖佐個涼，再去陪BB。BB~BB~毛毛需要您呀~我愛小火爐~

恰佐幾個鐘，就出發去馬場。今日天氣好熱，熱到毛同B都溶喇！BB未入過馬場睇live o既跑馬仔，表現得好好奇咁，就好似一個天真o既小朋友o係度探索身邊o既新事物一樣，個樣真係相當吸引。

之後我o地再去佐新城巿行佐陣街，兩口子都累，食完o野好快就返屋企lu…架巴士開得好慢，攬住伏o係身邊o既BB，sweet~sweet~

>>April 25, 2006 at 2:01:01 AM GMT+8

2006 年 4 月 22 日 星期六 【酷熱】

給妳愛
Alive

Written By: Victor Lau
Lyrics By: 姚謙
Arranged By: 劉志遠
All Instrument By: 劉志遠
Backing Vocals By: Pat Lui / ALIVE

如果我
只能選擇一個字說明白
如果我
只能選擇一件事在　未來去期待
我會不假思索　心浮上對妳的愛
wow wow

如果妳
還有一些疑問仍解不開
如果妳
還有一些糾纏往事　還不能釋懷
我願意再等待　一直到妳準備愛

時光匆匆帶著太多變數和無奈
妳卻不變的　一直在　我的最深心海
我多希望當妳需要的時候我都在
解憂讓我來　再給一點愛

如果妳
還有一些困惑想理明白
如果妳
還有一些傷心情緒　需要些時間
我願意再等待
就算等到頭髮白
wow wow

時光匆匆帶著太多變數和無奈
妳卻不變的　一直在　我的最深心海
我多希望當妳需要的時候我都在
解憂讓我來　再給一點愛

時光匆匆帶走多少歡笑和情懷
妳卻深深的　 一直是　我的最終等待
我多擔心妳被世界打擾心情壞
解憂讓我來　再給一點愛

http://www.alivenotdead.com/node/512

>>April 22, 2006 at 8:46:01 AM GMT+8

2006 年 4 月 21 日 星期五 【炎熱】

幾經辛苦，兼且特登早起身，終於都由某個歷屆度認領返流亡海外多年o既兩本好書︰Paulo Coelho o既《牧羊少年奇幻之旅》同埋飯島愛o既《柏拉圖式性愛》。

《牧羊少年奇幻之旅》呢本書講述一個追尋夢想o既故事，買o既原因，係因為當時2001年尾，單身o既我，約埋二家姐璇陪我去睇o既一套叫El Alquimista o既話劇，睇完之後覺得個故事幾好，而且o個時又閒錢多，勁買書，所以買落o既。

《柏拉圖式性愛》亦係當年一見到就即買o既書。因為被列為意識不良，所以有袋包住，你想睇，就要畀錢買。呢本書除佐外表係紫色好簡單好靚之外，亦係我睇過o既自傳之中最好睇o既一本。本書梗係有提到o的拍AV同埋情慾o野，但係最好睇o既反而係本人翁點樣同佢媽媽和好，非常之感人…呢本書真係揭到最後一頁都仲咁震憾。

不過連埋兩本書，居然仲有o的垃雜o野︰一本我o既舊相簿同埋一個朱古力盒。正因為我今朝冇食早餐，好鬼死肚餓以為有得分，點知一打開個盒，原來係以前寫畀個歷屆o既信同埋一o的相… @_@ Man姐見到o的相，即話︰「唔怪得呀鼠任飛佐佢啦，佢咁o既樣…」我即時都唔知點答佢好…又會直接成咁o既…

跟住我就拿晒o的可以用碎紙機碎o既o野碎晒去，相簿亦都畀佐Vicky。我只係想拿返兩本書嗟，都唔係好明點解o的人咁奇怪，自己唔丟o的o野要人o地幫佢丟…

>>April 23, 2006 at 10:38:46 PM GMT+8

2006 年 4 月 20 日 星期四 【酷熱】

繼續放假，但琴晚十點幾就訓著佐，不過兩點九又自己醒佐喎…o岩晒，睇阿仙奴！=)

作死，結果六點幾先訓得返著，一訓就訓到下晝點幾鐘… @_@

我o地出佐去睇戲，睇佐四個傻佬包括尹子維、連凱、陳子聰同吳彥祖o既《四大天王》，低能片，得啖笑，最抵死係佢o地o係套戲裡面o既服飾，真係超正…




"Alive... is all about love... Alive... is all about sex..." "Alive is not a shitty little band!" by (也母)型stylist。低能！畀著我係尹子維，要著住o的咁o既低能衫，真係一早火都o黎埋，罵到佢臭化…


夾band最緊要係友情，即係所謂friend到打band。嗯…有意思！一班人聚埋一齊玩，都係為佐開心嗟，唔駛因為o的小事而大動肝火嘛！

我覺得我就好似尹子維咁，成日掛住去玩，做人又覺得冇需要時就唔駛咁harsh，搞到成日畀人以為好唔認真咁。但係我又唔似連凱咁著住套馬騮衣只係怕怕醜醜唔出聲，我一定好似尹子維咁為佐o的friend或者自己o既尊嚴同個stylist撐！

過佐輕鬆o既一夜。

Official Link: http://www.alivenotdead.com/taxonomy/term/67

>>August 31, 2008 at 6:19:57 PM GMT+8

2006 年 4 月 19 日 星期三 【酷熱】

琴晚約佐郵差啦，一來係交換佢o的snoopy同我o的加菲貓特別版，二來係我要學打橋牌。

郵差係橋牌高手o黎o架，但係無奈佢搵唔到一個好o既partner。我就初中年代接觸過橋牌，但只係好皮毛，當時我同佢並未同班，亦係o係學校個橋牌組度識…嗯…當年o既回憶，總令人有o的懷念…

不過因為事隔都已經有十年以上，我老早已經畀麻雀同鋤大o的等等佔據佐我o既人生。至於橋牌o既玩法，都只係忘記剩少少…個人又懶喎，冇心機上網慢慢睇o的玩法…我估真係要o的時間，先學得返個玩法同埋學識o的技巧…郵差先生，我估您真係要等一等喇… @_@~

學完之後就一齊返佐公司打牌喎，今晚唔駛玩紙麻雀，但係就嫌副牌細隻o的囉…好玩好玩！玩完都成六點，返屋企訓到下晝…

毛毛要BB~毛毛要BB~毛毛要BB~攬攬~ >_<

>>April 20, 2006 at 5:24:52 AM GMT+8

2006 年 4 月 18 日 星期二 【酷熱】

返埋今日工就放孖地喇，不過今日亦都唔係容易過，因為今日真係好忙好忙，忙到連廁所同吹煙都唔得閒去…

因為個場有好多個過晒期o既signage licenses仲未續期，之前畀promotion同leasing晾住佐，放假前多口問一問leasing，佢先至話o的licenses一早已經批佐，仲問我呀自強係咪冇講畀我知…

頂o丫！佢老闆，呀自強真係…火都o黎！今日呀Mi放完假返o黎，就係最好o既時機交帶o的o野畀佢。十幾份license agreements，係咁改係咁print，改極都有錯，print極都唔o岩，結果o徙佐十幾廿張貴價新鴻基信紙先至叫做搞掂…

十萬火急！而家仲有rate o既bulk change未做…點解可以忙成咁？四月真係得人驚…

>>April 20, 2006 at 5:15:14 AM GMT+8

2006 年 4 月 17 日 星期一 【陰】

四日假期o既最後一日，但係個場就最多活動喎…

仲有好多文件要做，o的ISO o野又搞極都未搞完…慘…

----------------------------------------------------------------------------------------------------------------------------

琴晚去接返BB返屋企時，突然回憶起一件低能o既事。

我諗o個時係初中啦，有次學校旅行，我放佐佐盒紙包o野飲o係個袋裡面，但係唔知幾時，盒o野畀我壓爆佐，結果搞到成個袋都濕晒同「甜耶耶」，極慘！自此之後我就冇再放紙包o野o係個袋裡面，亦都極少再買紙包o野飲…

我估呢種對紙包o野飲o既執著，只有經歷過同類事情o既人先會有同感…

哼！你o地即管笑啦！>_<

>>April 20, 2006 at 5:09:20 AM GMT+8

2006 年 4 月 16 日 星期日 【微冷】

返到屋企見到座頭呀徐，佢係咁同我「洒lum」，話琴晚有人洗樓真係唔好意思。其實又有幾多個住戶真真正正明白有線o的推銷員係有幾咁賤o丫？呢o的事唔可以完全怪晒o的保安，因為有線班x樣真係「盜亦『冇』道」！

我曾經同過佢o地o係大樓玩過追捕，亦幾乎畀佢o地襲擊過，我深深明白佢o地o既賤係有幾咁賤，而且係冇另一間公司會做到自己個名咁衰咁臭。

話說前晚一家人食食o下蛋糕有人按門鐘，一睇，原來係sales，講o野又勁快，我就叫佢講慢o的，拖一拖延佢，等佢以為我好有興趣。跟住我就問佢拿個證o黎睇，原來係有線！佢真係唔好彩喇，遇著我！我一手拿佐入屋，諗住打電話落去座頭叫人上o黎請佢走，不過又搵唔到個電話，就索性親自帶佢走。

出到去等電梯，佢問我拿返個證，我就死都唔肯啦。佢話︰「我都係搵食嗟，唔駛做到咁呀嘛？」我答︰「對唔住，我畀你o係度搵食即係我唔駛搵食！對唔住，我真係好憎有線。」入佐電梯我先畀返個證佢，再睇住佢走。座頭呀徐仲以為佢係我個friend，真係死蠢！

返到上樓，我老妹話人o地都係搵食，我老母又話唔好理佢就算啦。佢o地真係唔明，呢班人係有幾賤，我憎有線唔係只係因為佢o地服務差，而係我曾經幾次親身經歷過佢o地o既賤。亦明白所有保安工作應該由每一個單位，每一個住戶做起。如果個sales有咩貪念、惡意，後果唔知會係點。唔通真係到自己身受其害，先再痛定思痛？

結果同老妹吵大鑊，快快手手食完蛋糕返入房閂埋房門玩自閉。

同呀徐傾偈，先知佢幾慘。原來佢做佐五年一蚊人工都冇加過，呢間公司真係「度」到冇人有！又o岩o岩畀個兩手空空o既人投訴佢唔幫人開門。如果你唔係做過呢行，身處過呢種情況，你跟本唔會明白。或者變態o的，自己都係做呢行，對人極度苛求都未定。我就只要求達到最低期望o既服務，真係一分錢一分貨囉，唔好畀幾毫子，要求幾萬蚊o既服務，唔現實。

講開又講，呀徐話原來我住呢度都有人好似以前Ken仔o個座咁有人丟屎落街！仲要係人屎！呀徐話佢覺得好奇怪，照道理而家家家戶戶都有廁所o架啦，又唔係舊樓冇廁所又或者以前o的徙置區一層樓得一個廁所。而且如果係一家人，冇理由o的屋企人會畀佢o係屋企裡面就咁拿張報紙墊住就咁屙屎；又如果係得一個人住，咁應該個廁所係冇其他人用啦，咁又唔駛o係張報紙上面搞掂，大可以入廁所屙，點解會有包屎丟落街o既呢？真係百思不得其解…

聽完之後真係笑到我肚都攣…

嗯…我都要有品o的，唔再丟o的煙頭、煙灰落街先得。真係過得自己過得人！大不了咪唔食！哼！

>>April 16, 2006 at 3:08:12 AM GMT+8

2006 年 4 月 15 日 星期六 【微冷】

今日又訓到十二點幾喎，之後同BB上山頂走個圈。

我o地學呀麥兜咁坐「飛機」（纜車）上山頂，仲買定朱古力做「飛機餐」，不過因為坐「飛機」o既景色太好，所以到落「機」先記得原來唔記得佐食飛機餐…

原來凌霄閣要暑假先開返呀，上到去都冇乜o野玩，行佐個圈就落返山，去佐銅鑼灣行逛。BB問毛毛食o的乜，其實如果毛毛唔駛儲錢就一定唔駛諗食乜好，一定直指日本o野。所以有時都會陷入內心兩難o既矛盾之中︰想用多o的錢去玩，但係又想努力咁儲錢去達成同BB有個家o既目標。

我知道自己真係唔似人o地咁幸福，冇含住金鎖匙出世，又冇人o地咁鐘意讀書，亦冇人o地咁有本事、咁有野心去賺錢…亦唔係一個女人可以搵個畀自己過得幸福o既男人o黎過活。不過我深信，如果有一個愛o既人同自己一齊經過呢o的捱o既日子，彼此間o既信任同安全感會強o的。

有人o係度笑緊我自己拿來辛苦，笑我有今日o既光境。不過你o地可以話我係「當局者迷」，但係我係甘心落意喎，我覺得o的錢要同最愛o既人分享先開心呀，我而家搵到BB喇，佢係我而家，亦係將來o既最愛，我要幫佢諗o下第日o既生活，我要畀幸福佢，我要同佢過將來o既每一分每一秒，我要同佢結婚（我有冇同某某諗過、講過呢樣o野o丫？），我要同佢生個精甩尾o既聰明B添呀（我又有冇同某某諗過、講過o丫？），因為我愛BB！

即使係辛苦，即使係「貧賤夫妻」咁又點？我偏唔信會「百事哀」呀！我爸爸媽媽咪又係咁廿幾年，佢o地唔會冇唔開心，唔會冇意見唔一致o既睇法喎，但係咪又係咁恩愛，我要畀心機，學佢o地，乖乖o地，唔再o係男女關係上曳！

>>April 16, 2006 at 3:15:10 AM GMT+8

2006 年 4 月 14 日 星期五 【陰】

返佐五日工，日日都唔夠訓，今日可以訓餐飽，真係非常之好！

係咁訓係咁訓，訓到一點，食完pizza，再訓，訓到五點…ccc…

放假真係好清閒，鐘意食就食、玩就玩（palm）、訓就訓、上網就上網、聽歌就聽歌…好鬼爽…只欠o係屋企冇得吹o下煙…

幾時先可以有一個自己o既屋企，攬住BB、同BB一齊煮o野食、同BB攤o下屍、睇o下電視兼笑o下o的電視橋段同人物…

BB，我愛您！

>>April 15, 2006 at 1:22:02 AM GMT+8