2010 年 12 月 20 日 星期一 【微冷】

今日返工心情幾低落...

plan定新一期的小組內容...
兩星期開一次的義工小組...實在唔知做咩好
真係好唔想做小組呀...

另外,3月份我負責的同工訓練visit...
今日始終都係不斷逃避
到最後都無打到電話去contact...
真係好唔想做哩個job呀...
幾大壓力.......好唔想負責!!

除左哩兩樣...
其實今日的心情低落...係因為多野諗
唔知係咪關holiday mood事啦...
完全無心機做野....
跟住個心就係咁多愁善感同亂諗一大輪無咩point既野...

我覺得響公司裡面好孤獨...
一來, 有兩個同事一向都熟d...
佢地響公司成日都交頭接耳、傾計
即使我知道好多時佢地都只係傾閒計,別無特別
但我感覺都好似覺得人地熟d
自已埋唔到佢地2個堆咁
我會主動搭訕,但又怕人地心諗關你咩事...
總之...響公司的感覺好孤單....
雖然d人個個都無咩野衰
但個個都好似好冷酷咁,無咩人情味....
所以...心底好想埋堆...同人熟d...
應該係話,我知道出黎做野,應該要open自已同人交際下...
唔可以只係低下頭自已做自已事的....
同埋我都知道若果同d同事friend d...響度做野都可能會開心d

但好矛盾的想法是....
我知道要咁做...但轉個頭又唔想咁做
我會覺得：我唔想/唔需要同人埋堆...想自已一個...想自已做自已事....唔想social
我記得之前老細叫過我：lunch唔好帶飯啦，一齊出去食下飯啦
但我到宜家我都係每天帶飯...
我情願自已坐自已位食...經常都覺得自閉的感覺好好
我知道應該要點做...但有時又唔覺得咁有需要...又唔鐘意咁做...
總之...個人好矛盾.........

另外....今日個同職級的同事一路做野一路叫辛苦
見到佢真係勁多野做....
我個post的職責真係好hea了...
見到佢咁,我覺得佢好勁呀.........
唉,又係好矛盾的想法....
我其實好怕多野負責同怕壓力...
我知道新一年老細應該會加duty俾我...
我又知道人要向上和要求進步...
我唔應該enjoy咁hea的...
相反,我應該要追求多d野學習、多d機會去嘗試做多d不同的野....
但同時間,我又好想永遠都可以hea住黎返工搵錢....
好唔要得的想法...

......我覺得自已好多思想都好矛盾....
好多野都係諗得好對立...
亦都一時想咁,一時又覺得唔係咁
唉...我覺得自已好麻煩呀...
點解會咁多野諗....
唔通一切皆因我對自已無信心？...
總之...唔開心....

有時真係積埋積埋好多野!!
想有多d人可以明白自已!!
唉....

發洩完畢!!!
明天還是繼續努力啦!!!

>>December 20, 2010 at 9:29:29 PM GMT+8

2010 年 12 月 17 日 星期五 【乍雨乍晴】

今日頗多感受
逐一訴說

痴線,今朝市區得6度
我睇新界應該可能真係得4度
真係凍到好辛苦呀
死啦,我仲夢想日後移民外國
如果我咁怕凍,咪唔適合囉...=[

今朝9:00就過到西灣河開會
同工訓練小組會議
原本我負責hold 一月搞既同工訓練活動
今日開會決定延到3月先搞
真好,等我可以慢慢搞

之前一直都好驚哩個活動的來臨
因為今次係我負責in-charge
雖然整個工作小組有supervisor、主席同埋兩位同事
但畢竟我從未試過in-charge大型活動
仲要係搞俾YWCA全個elderly department既同事參與
當中全部野,包括行政事宜、對外聯絡、活動當日的帶領等
所有都未有經驗

現在距離活動仲有3個月時間
要有好的時間管理,而且分先後次序工作
將這樣一大舊工作,分散一part part處理
以致令活動完成
加埋事後工作和檢討等
我想...這些就係我在這次要學習做既野！

出到來工作就係咁
好多野都唔會有實習
未做過都好,都要做
唯有邊做邊學習!
希望順利完成啦!

不過,問心的,我都會相信自已的能力既
一向份人既性格都無自信心...
但現在學識要欣賞自已...
我覺得自已份人做事認真、謹慎.....
而且有責任感、有交帶、緊張、上心
所以...我相信我無問題的
只要一步一步處理每項程序....
是次工作就可以搞掂
我要相信自已
不過唔好俾自已壓力！
好怕又會因壓力而頹....

----------------------------------------

by the way,開會時,見識到DECC既忙碌和同事多
下午返番自已office
我覺得宜家哩度都算係優差喇!!
NEC同事少少、clients少d、工作量少d、工作的複雜程度亦低d
而且,我老細、我老細既老細、同事都算nice nice
最緊要係工作量唔多
仲準時返工準時收工
所有野都好穩定
所以...諗落...我都算鐘意/滿意我哩度喇!!!

有時好羨慕d人既工作人工高、職位高
但...嘉敏講得arm...所有野都有代價...
人工高、職位高...但就要咩飛,工作時間又長d
又要social交際、不斷進修....
無止境的向上爬、無止境的「人望高處」....
諗落...我都係甘心於平淡、唔好咁多變化
亦唔好有咁多壓力...穩定安逸的生活...
簡簡單單就好....

我唔認為自已份人係hea
但我都覺自已份人真係好懶
哈哈...

---------------------------------------------------

今日下午見左個client
佢同我講他的人生故事
講左成45分鐘

我好enjoy聽老人家的人生故事
做哩行做得耐
就見到人生真係好得意
每個人都有自已的故事
故事可能會有相似,但真係唔會一樣的
你會見到即使兩人的際遇相同
但處理和面對的方法、心態、過程都會唔同

今日哩個伯伯,我真係好欣賞佢......
從他的對話中...
我知道他是一個很堅強、很獨立....
不怕辛苦不怕捱、不放棄...
很正直、很有承擔、很愛家庭的一個男人
一路聽佢講,我一路打從心底遇很欣賞他！
事實上心底遇,我覺得我爸爸的為人頗像他

雖然佢窮,又多病,無辦法再工作
要靠同是年老的太太每天工作12小時洗碗去養家
佢好心痛自已心愛的女人捱得咁辛苦...
但伯伯佢都盡佢最大的努力付出去為這頭家付出
一個男人去打理家頭細務,煮飯等太太放工返黎
佢話：佢做工咁辛苦，所以我唔俾佢做家務的事
我第一次聽到老人家親口表達愛...佢同我講：我真係好錫佢
他本來有不少機會可以識第二d好d質素的女人
但佢話佢從無動搖過,一心一意對太太
從他的說話中,我覺得佢真係一個很真正的男人

我覺得,像他這樣才是一個男人
我覺得,他的太太...真的很幸福

很記得伯伯說：
老婆做工辛苦...每日見面時間都無幾個鐘
佢一個月先得4日假期...我地無錢...
老婆放假我地會去麥當勞食10幾20蚊
再帶佢四周行下
但我地都好開心...老婆都知道我好錫佢....

兩公婆,雖然捱得很辛苦...很辛苦....
但老公因自已盡了當爸爸和丈夫的責任而無悔
而老婆亦有一位這樣盡心盡力愛錫自已的人
我覺得...真是無憾了！

這份工作,讓我知道現在香港地仍有人每天工作12個鐘,但只有3,4千蚊人工
讓我看見在香港的一些角落竟仍有人住在垃圾屋...
同時,這份工作,也讓我看到生活艱難但有愛...當中所帶來的快樂...

老一輩的人
因為捱過,所以不怕捱,很堅強
但現在新一代的香港人真是太幸福了
反倒越來越脆弱....
經不起風浪...依賴...怕辛苦...容易放棄...
同埋亦害怕承擔...怕事...
甚至有時不走正直的路,走不純淨的捷徑/走快路
同埋,亦自我中心強,以致不懂如何去愛錫一個人

伯伯,你真是一個「男人」！

>>December 17, 2010 at 10:21:02 PM GMT+8

2010 年 12 月 16 日 星期四 【晴】

今朝好凍呀
俾鬧鐘叫醒果一刻真係唔想起身
出門口一落到街,果d寒風...加埋雨粉粉...真係凍到痴左
仲要遲左出門口,跑出村口追巴士
搞到上氣唔接下氣,好似哮喘咁
返到公司先知,原來今日新界得6度
響office都著住件羽絨,但都覺凍
真係好唔鐘意咁凍
凍到薑哂,個人更加懶蟲....
早上明明食左隻熱狗做早餐
但十一點幾就覺得肚餓了
冬天真係特別快肚餓
可能係身體要你食多d先夠暖
話時話尋晚同今日lunch都食蠟腸蠟鴨
咸野真係好正呀~~~
中醫話我腎同肝都虛,但我都唔理仲成日食咸野:P

希望下星期去旅行唔好咁凍啦唔該!!

>>December 16, 2010 at 3:45:57 PM GMT+8

2010 年 12 月 15 日 星期三 【晴】

今日下午中心搞Christmas party
第一次參與中心的大型活動
我的小組負責表演話劇

雖然佢地表演唔係話完美
但我都好開心
有幾個組員從來無做過、無表演過話劇的
但我見到佢地嘗試左新挑戰,從而有成長
另外,我開心係因為自已有滿足感同成功感
今次係由我親自諗+寫個劇本+編配13人的角色...
我只係得六堂小組帶領佢地排練...
由諗劇本到今日表演,都係我一手一腳搞出黎...

對老人家,要好有耐性、好照顧每一個
無信心果d你要鼓勵佢地、讚佢地多d
本身叻果d你又要俾機會佢地去表現自已、發揮自已
老人家,都係要識tim佢地

另外我開心既係
我覺得我同哩班組員建立左良好既關係
我越黎越鐘意佢地!!
特別有1,2個真係好可愛!!
不過佢地每一個都真係好獨特
而且佢地都好錫住我哩個初出矛爐的小妹妹
好好呀佢地!!

黎緊1月又繼續新一期的小組喇
希望自已保持哩顆心
為左佢地既好處來計劃新的小組內容.......
-------------------------------------------

仲有一開心野...
就係前天收到一張聖誕卡
係一個剛過身的伯伯住響大陸的女兒專登寄送給我的!!
真係好有我心呀...
果個伯伯就係我第一隻case...我好鐘意佢...但過左身了
佢個女成日都好多謝我...成日都話我幫左佢同伯伯好多忙
我知道我做的好少而且唔係d咩...
但我真係幾開心、幾有滿足感架!!
因為自已的工作被人認同啊!!^^

加油呀正能量.....

>>December 15, 2010 at 10:02:21 PM GMT+8

2010 年 12 月 12 日 星期日 【晴】

看了《魔幻王國》第三集
很有意思的一齣電影
有信仰的人會更深領會當中的意思

為了神的國度
我們信徒是神的戰士
在世上為神作戰
有時要走入最有挑戰的黑暗角落去戰鬥
當中會有很多考驗
例如不同的誘惑和內心最深處的角落
但神會作為我們的領航者

從電影中
我看到的訊息
就是這些...

另外
最深刻的是...
那個頑固又犯過了錯的男孩
因受了金錢的誘惑而被變成一條龍
但最後也被隻獅子挑選
成為一個勇士
有一番大作為,最後成為救回Narnia的一大關鍵人物

如果可以的話
我都想被變成一條龍
即使不配但也能被揀選
重新變形,有新的/意想不到的作為
希望頑固和錯犯都可以有一天被挽回

>>December 12, 2010 at 9:33:58 PM GMT+8

2010 年 12 月 10 日 星期五 【晴】

copied from Xanga.com.hk

真想找個沒過去的人。

沒有過去就沒有什麼前度、舊情人的問題

他不會在跟你一起的時侯說什麼「你讓我想起我的初戀情人」、「你跟她真像」
這些讓你突然無奈的說話 ;

他不會在跟你吃晚飯的時候
想起那天原來跟她也來過這餐廳
也坐過這位置談心 ;

他不會在半晚擁著你睡時
夢囈中吐出舊情人的名字 ;

他不會在跟你擁抱的時候
心卻懷愐著昔日那個她的體溫 ;

他不會因為每晚夢裡再會前度
而夜夜深思自己是否真的喜歡你 ;

他不會煩惱究竟...
要把捨不得扔掉的舊情人合照、溫暖牌頸巾、情信、信物放在哪裡才好 ;

他不會在擔心如果有一天她回來找他...
他該如何抉擇才好 ;

他不會聽每首情歌都先想起她
然後偶然才發現身邊原來已經有你 ;

他不會因為你對他太好而感到內疚
更不會以此作為分手的罪名 ...


人都是好奇怪的東西
在最孤寂的時候
都需要一個擁抱
而那個擁抱往往在舊情人身上

永遠已成過去的東西都是美好的、恆久的
即使那些所謂的諾言其實從未兌現
即使她其實根本沒那麼美麗 ...

但那些在回憶中、在夢裡的
一切都是這世界最美好的東西

然而 , 沒有過去的人其實也不是那麼好 ...
他們沒故事、沒內容、什麼回憶都沒有 ...
過往的人生就好像白開水一樣 , 淡而無味

他們看似很完整 , 很美好 ...
卻因為沒有經歷過什麼而顯得沒內容
這樣的人倒一點都不吸引呢 !

也許就是正正因為我們都是那麼千瘡百孔
曾經那麼快樂然後又那麼失意
過去所發生的一切足夠我們寫一本自傳 ...

然後大家都被彼此所發生過的動人故事深深吸引著 ...
才會驚覺原來世間還有這個你。

過去縱是那麼揮之不去
但時間總會過去
留在回憶裡更有情趣

>>December 10, 2010 at 10:31:47 AM GMT+8

2010 年 12 月 9 日 星期四 【晴】

尋日同老細傾開計
佢無啦啦問我：你既強項係咩呀？
我知佢都係傾開計隨口問問
我都係以講笑形式咁答佢
我答：訓覺同食野
so so so 白痴........
但其實,我心裡面,對於哩條問題,我真係唔識答....
講真我都搵唔到自已的強項....
唉,真係一「問」驚醒夢中人
好唔開心

宜家做人確實無咩動力
我都唔知係我唔鐘意份工丫
定係我唔適合份工丫
定係根本我個人有問題
係為人好懶同無上進心喇...
總之,唉,每朝一早就咁頹、無心機做野
都唔知想點

朋友鼓勵道：你回想返自己點解當日會選呢份工,就會重新得力
但....haha...當時我都唔知點解會選哩份工架
我選哩份工都係因為我讀左哩一科
但至於點解我會選讀哩一科,我都唔知
其實係因為A-level果時既成績無野好選
於是就選左哩科
至於點解我成績唔叻
我諗係因為人既質素同天生問題.....
至於點解宜家唔辭左份工
係因為為左份人工
我知道我出去以我既資質同懶惰既性格
都唔會搵到一份可以咁hea又算ok既人工
覺得自已so cheap

唉,好灰,點解做人咁煩架.....
覺得自已真係好懶...
唔想工作,唔願出街,就黎連食飯都唔願...
返工尤其真係無心機
其實,有工作要做...
但實情係十萬個唔想做
我都覺得自已好過份.....
似著工作量真係算少、唔急切,於是就唔做野...
表面扮做野,實際響度上facebook同玩msn...
老細響後面都係咁話....
好過份....

個腦成日諗埋d不切實際又唔成熟的想法
想成世唔洗做無野煩
想唔洗做但又有錢
想有人養唔洗憂,但又要有人經常陪到自已愛錫自已
想懶懶閒過日晨
想每日個天都會跌d錢、跌d食物呀用品呀果d落黎

有時都好憎自已點解會咁
好憎自已點解個人咁唔積極
我覺得自已只係一個搵唔到目標、迷失既青年
這實在是一個找不到意義的人生.....
唔通咁樣要到老？....好痛苦的

--------------------------------------------

下午有進展...
突然又變得很積極
下午開小組,哩期的最後一堂
其實,問心,我都覺得同班組員都幾開心架
覺得佢地老人家有d真係幾得意
傻下傻下咁幾可愛
開始越來越了解佢地/習慣左佢地既性情
開始越來越鐘意佢地!!!

有個組員扭計...
講明話決定唔參加新一期...
我覺得好可惜
因為佢已經參加了這小組好多年了
我用左好多口水、耐性同愛心tum掂佢
佢最終同我講佢買番張飛仔
我幾開心同滿足
另外,有組員話覺得自已咩都唔識,所以唔參加了
我又用左好多鼓勵既說話
最終佢都繼續報名...
我感到有滿足感...和成功感

在工作中,找到一點點的樂趣...是很重要的....

>>December 9, 2010 at 4:23:57 PM GMT+8

2010 年 12 月 6 日 星期一 【晴】

其實一向都知道自已身體都唔多好
怕冷怕熱、易頭暈、暗瘡皮膚、半夜要去幾次廁所、女性問題、鼻敏感....
呀媽都成日叫我要的起心肝去睇下中醫...

今日放工返黎大埔睇中醫
終於最後都係決定睇...
因為今次身體真係有d問題...
係d女性問題...擔心...所以決定去睇睇

醫師見左成20分鐘都有...
診斷我既體質...
佢同我把脈...之後又同我量血壓....原來我係血壓低架....
原來我唔係我一直以為的熱氣、熱底的...
原來我個人好體虛弱!!
主要為腎、肝都虛!!!
所以又怕凍又怕熱,易累,又易外感...
總之一個字講哂啦...：「虧」呀我！陰公...
所以...今次咁樣...完全係因為血氣唔夠....

醫師要我大大誡口呀.....好慘......
凍野、生冷野、寒涼野、熱氣、煎炸....一律都唔好掂....
另外,佢話我唔飲得涼茶、龜靈膏果d....
總之,要食d中和d、溫和d既飲食啦...
如果唔係,亂飲亂食,就會繼續整壞個身子....

今次睇一睇...了解左自已既體質好多了....
希望哩幾劑藥可以幫到我啦....
不過原來中醫都幾貴架喎...
今次,一劑藥要成$90
診金+三劑藥...埋單要成$300呀.......
哩兩個月用左好多錢響醫藥費上...幾肉赤...
又$2000整牙...又幾十蚊買傷風感冒藥...今日仲$300中醫...

不過真係想調理番好個身體...
睇黎宜家需要有排執番好個身子了...
太虛.....死了...
如果唔搞番好...驚第日生唔到仔....=.=
始終女仔...咁後生...要調理好個身體....

聽日天氣開始轉冷
小心身體!!

>>December 7, 2010 at 12:46:59 AM GMT+8

2010 年 12 月 5 日 星期日 【晴】

好野!!報左團喇!!
聖誕,26/12至28/12
三日兩夜~~~~~~
盤龍峽之旅~~~~~~~~~~
跟星級假期~~~~
聖誕,假期,係比平日貴好多
但今次去近近地,團費$999,加埋d小費,
一人都係$1200左右
都算少錢架喇~~~~
最後都係決定返大陸,哈哈...
算啦,當係行開下,玩下咁囉^^

下年唔可以再咁傻傻
請假唔好請紅日喇
下年拿平日假,先去遠d啦
下次要坐飛機架喇^^

26/12~28/12~~~
好期待呀^3^

--------------------------------------------
NDS入左d新games但玩唔到 :(
應該係R4問題... :(

----------------------------------------------
身體有d問題......
死了,好驚.......
聽晚去睇中醫喇要!!

>>December 5, 2010 at 10:37:33 PM GMT+8

2010 年 12 月 3 日 星期五 【晴】

哩兩日...返工...過左簡直係折磨既生活...
被迫要去聽女青90週年慶典而搞既研討會
好無聊...迫我地d員工去幫手攝吉位...
目的就係等個場唔好有空位....
真係苦了我們這些員工....=.=
悶到痴左線...
最辛苦係第一日...坐足8,9個鐘....
又迫喎...搞到好似大閘蟹咁...唔郁得....
個個同事連我老細都齊齊低頭訓覺
d人一係就響度玩iphone、吹水、睇書、溫書、玩notebook都有...
不過諗諗下,唔洗返office做野
響度負責hea就有一天人工,應該要開心啦
不過真係好悶...同埋坐到好鬼累....

-----------------------------------

哩幾日見到個同事成日玩部ipohne...
原來悶既時候有部iphone響手,真係好重要...
搞到我又心隱起番喇!!!........... :(

另外,今日去旅行社睇....
聖誕真係貴一個double....
好想坐飛機去遠少少呀....
但要咁多錢.....4,5千蚊......又唔捨得.......

唉.........
又想出iphone,又想買衫,又想去旅行........
好多野都想做,想滿足
但又無錢........
好唔開心呀........滿足唔到d消費慾....

如果我人工高就好喇...
haha.....咁諗真低b....

>>December 4, 2010 at 12:36:05 AM GMT+8