2003 年 4 月 20 日 星期日 【晴】

星期日，琴晚踢完波之後仲要打佐成晚機，搞到成九點先訓，但係三點幾又畀媽媽叫醒佐喇…之後冇再訓返，又係走佐去打機。好開心琴晚可以贏倒波，好開心今日可以輕輕鬆鬆咁過，我想過o既都係一o的咁o既生活嗟…如果搵倒份工，唔駛再做化學，咁就好喇…

返到屋企，分外舒服，直頭成個廢人咁，只係食、玩、訓…屋企始終都係屋企，自己住o係宿乜都要自己搞掂晒，錢都要駛多好多，返到屋企始終都係最好… =)

>>April 23, 2003 at 4:32:14 PM GMT+8

2003 年 4 月 19 日 星期六 【晴】

今日好舒服咁訓到好晏好晏先起身，哈哈，曳曳添…

下晝送佐您落火車站諗住可以有o的o野做，等一陣就去踢波，點知個個都未準備好，早知陪您返入屯門啦…

夜晚場波就真係精彩喇，意想不到地大勝對手四蛋，搞到人o地個龍門要踢垃圾筒洩忿，真係唔好意思…真係怕佢o地唔再約我o地踢… @_@

由於種種因素，大部分踢開o既人都冇到，包括我o地個keeper、keeper個friend、健健等等…冇法子之下拉佐超人去「鄧」腳，細佬亦都拉多個friend，但係…都係仲差一個人…咁唯有問人借個間碟啦…由於keeper冇到，唯有屈佐米米上半埸守龍…隻間碟就打前…

開波頭o個段大家都踢得幾辛苦，好累咁，我就更加之累… @_@ 上半場打得好亂，大部分時間都畀對手攻門，唔係有超人o係後面，再加上「上佐身」o既米米連番撲救（真係估佢唔倒…原來佢守龍咁勁，又夠高…足足救佐成七、八球…真係勁…），上半埸點可以打和對面零比零。

下半場，細佬個friend守龍，米米打返最前（嘩，走來走去，好力到佢呢…全靠上半埸守龍唔點用氣走咋…），超人又不時上去助攻，我就打返自己防守工作o既應有水準…結果，居然係由隻間碟唔小心督入佐，令到我o地領先… @_@ 入球之後對手開始亂，細佬就再補射多球掛網波，贏到兩球。跟住人o地就好似散沙咁。大鴻就繼續做佢應做o既o野，入完一粒又一粒，結果大勝四比零完場…哈哈！其實佢仲有好多入波機會o架，不過唔係畀個龍門角阻住就係畀人擋倒…如果唔係邊只呢個數！

今晚我又有一個好靚o既單刀機會喇…不過又係畀人踢跌佐…冇法子啦…我邊有身位o丫，畀人一撞一kick就跌啦…難得米米畀得咁靚我又上得切喎…另外又有一球過完人之後射高佐…唉…後衛即係後衛，始終都係冇前鋒o個種射門前o既冷靜…算罷啦…都係做好自己o既防務工作先好喇…哈…今晚上下半場判若兩人，真係覺得自己xx o地…

今晚大家都踢佐場好波，好開心！

>>April 21, 2003 at 3:40:58 PM GMT+8

2003 年 4 月 18 日 星期五 【晴】

今日真係曬到嘔…仲要過Shaw同o的朋友仔影畢業相…見佢o地大汗淋漓咁o既樣就真係「鄧」佢o地辛苦…

下晝同您出佐市區行街街，點知原來您都仲有唔舒服同累…呢排您身體真係唔多好，要小心o的調理好佢先得嘛…

我o地行o下又坐o下，行o下又坐o下咁，差唔多行佐半個尖沙咀…行影碟舖啦，行琴行睇琴書彈o下琴，坐坐Starbucks同麥當勞，研究o下o的「壽包」褲呀，坐坐海邊，咁就一個下晝、一個晚上喇…

今日完全唔諗工作，只係休息，好快活。但係您又反返轉頭煩o的錢喎…唉…邊有話事事盡如人意o丫…我o地一齊再駛少o的囉…

>>April 20, 2003 at 8:40:02 AM GMT+8

2003 年 4 月 17 日 星期四 【晴】

今日連半晝工都唔可以話係有返，返佐去一陣，見老細可能都走佐，其他人又唔o係度，咁就索性走人。

同您落佐沙田食飯囉。其實都冇乜o野做o架咋，行來行去，見您又唔係好舒服咁喎…飲佐個咖啡，之後再去佐買鞋。嘩，勁呀，對鞋前兩日睇仲係買五百幾蚊，今日居然有八折！即買啦！

買完鞋再同您去食辣麵，但係估唔到會搞到您成晚都係咁"u" o的胃氣出o黎… @_@ 您腸胃又會差過我o既…真係大家衰埋一堆喇！

>>April 20, 2003 at 8:04:03 AM GMT+8

2003 年 4 月 16 日 星期三 【陰】

嘩，佢xy o丫！真係從來都未見過o的人可以咁假，一味淨係識得做跟尾狗、應聲蟲，o係度攀龍附鳳。不過我始終都唔相信我老細會係一個咁分唔清是非黑白o既人…不過，世事無絕對…算罷啦，我跟本就唔係o個o的咁叻同老細吹水o既人。要我主動搵話題同佢講o野？o徙x氣啦！老細鐘意乜、講o的乜，係咁附和…sorry啦，如果要咁先畢倒業o既話，我就真係唔稀罕喇。

>>April 16, 2003 at 6:55:34 PM GMT+8

2003 年 4 月 15 日 星期二 【陰】

撞鬼喇…又o黎？我同您都大為震驚…不過總算知多佐o野學多佐o野…

下晝先返去做lab，搞到要做到好夜…頂…聽日真係要早o的喇…但係唔知聽朝駛唔駛present literature呢？要o既話又要預備一番，真係麻乜煩… @_@

>>April 16, 2003 at 6:56:51 PM GMT+8

2003 年 4 月 14 日 星期一 【陰】

今日一早起身，又借勢唔舒服冇返。

下晝返佐去一陣，老細都冇見過。夜晚同您出去沙田食飯，都幾開心。您話我o地好耐都冇嗌過交咁，係咩？又好似係喎…

平平淡淡咁過佐一日，諗佐o的lab點做，希望聽日早o的起倒身返去做啦…其實我每一日、每個星期都想係一個新o既開始努力做lab，但係始終都係冇乜心機做。點解我唔可以中六合彩有大把錢？咁我咪可以飛起化學去外國讀自己鐘意o既o野囉…錢錢錢~~~

>>April 15, 2003 at 7:18:06 PM GMT+8

2003 年 4 月 13 日 星期日 【陰】

今日我生日，唔覺唔覺又做佐廿四年人，仲係一事無成咁…唉…

起佐身之後就入佐屯門同您屋企人飲茶，估唔到您會因此而覺得咁開心。其實我都唔係唔鐘意同您屋企人打交道o既，我只係唔鐘意太過頻密嗟…

之後因為太晏，冇去到我o地想去o既山頂，只係走佐落銅鑼灣四圍行來行去，睇佐好多間VCD舖，行到咁上o下就返我屋企食飯。

今日我生日，暫時忘記晒o的衰o野，玩餐飽先算！

蝦~~~叫您唔好買銀包畀我又唔聽… @_@

>>April 16, 2003 at 1:54:25 AM GMT+8

2003 年 4 月 12 日 星期六 【陰】

九個月喇，我同您一齊已經有九個月喇。

星期六，起身o既時候已經九點半，訓佐成十粒鐘…我覺得自己好似一個廢人。返到lab洗o野，仲一次過打爛佐兩支columns…唉…

下晝冇乜o野做，諗住返屋企，點知超人搵我幫佢同佢女人影相，做兄弟o既，緊係義不容辭o架啦，結果搞到七點先走，哈哈…

非常十分很掛住您~~~

>>April 15, 2003 at 7:04:22 PM GMT+8

2003 年 4 月 11 日 星期五 【雨】

今日又唔知自己做過o的乜，只係覺得好累、好累、好累…

冇佐您o係我身邊，日子特別難捱… =(

媚媚、家姐、健健、媽媽…好掛住您o地呀… =(

>>April 11, 2003 at 11:47:56 PM GMT+8