2003 年 10 月 7 日 星期二 【酷熱】

星期二，終於都開始落區做site visiting。

今日成組人十一點半先至o中心係出發，十二點正先落到區。其實係一落到去就o係太古廣場食飯，食完先開始行。

行行行，係o的高樓大廈同碼路之間穿插…嘩…真係有o的累…又悶喎…但係冇法啦，o的高樓大廈只係因為我o地香港人每日都見所以先覺得佢o地冇乜特別，所以先會冇興趣望多兩眼嗟…我相信外國人o黎到香港一定會好驚訝。因為咁細o既地方居然會集中佐咁多座成七、八十層樓高o既大樓，點會話唔勁！而且您又話過我知o係法國見倒o的人對o個個古靈精怪商業區好有興趣嘛，我估今日到過o既地方一定有市場o既…

放佐工就落返銅鑼灣同您食飯同睇戲。今個禮拜睇《無間道2》呀，不過余文樂同陳冠希o的戲就真係認真差，硬到死…不過余文樂o的舉動又學得幾似梁朝偉o既，陳冠希個樣都有七分似劉德華，但係佢o地o的戲就真係好差。黃秋生又表現得唔係好突出同埋喊得好假喎，成套戲就好似係曾志偉同吳鎮宇玩晒咁。

吳鎮宇，做得真係好好。

臨走o個時戲院條友話完佐字幕之後仲有o野睇，見仲有時間咪坐多陣囉，點知原來只係o的好頹o既《無間道3》宣傳片，頂！

>>October 11, 2003 at 10:00:44 PM GMT+8

2003 年 10 月 6 日 星期一 【晴】

嘩…好眼訓呢…琴日訓得太多喇，搞到成晚都訓唔倒，直到五點先訓著…唔係亞辛打話畀我叫我起身，今朝一定遲到。已經遲佐出門口，但係原來o係中環搭5X返中心真係好快，唔駛三個字！哈！搞到我由柴灣去西環連晒塞車都係用佐九個字咋！

今朝返去又係做o的行政上o既工作、填好多種唔同o既表格、導向、同埋o的團隊建立o既遊戲。唉！真係火火o地…點解要咁折磨我？！唔通係天將降大任於斯人？點解要畀個咁o既甜筒人入我o個組！！

今日收佐條友入組，佢個人怪怪o地，行動怪怪o地，思想怪怪o地，外表又係怪怪o地。玩遊戲o個時大家都覺得佢有o的問題o架喇，諗住算啦。但係當我o地一路o係度做o的文書工作佢就表現得好心急，成日催生晒，搞到我真係火火o地。我有我o既處事方法，而家究竟邊個係老細？我見係第一日返工見面，於是諗住忍佢，點知佢就係咁向我進逼，我由一開始就係咁忍佢…忍忍忍…忍到我真係頂佢唔順喇，我就火佐佢一句︰「我唔鐘意人o地教我點做o野！」當堂靜晒，佢仲夠膽死扒低o係度扮訓扮死狗…真係吹脹… @_@

條友真係有o的問題，大佬呀，我呢o的，正所謂有條不紊，做完一樣先一樣。我完全唔可以理解佢做乜要o係度向我指指點點，而指指點點o既，都係一o的雞毛蒜皮o既小事…唉…救命呀！我個樣唔係廢成咁呀嘛？做我o既「靚」又有幾時蝕底過？真係火！

我相信我o既能力，我清楚自己o既限制，我有明確o既目標。我係DOMINIC！

>>October 7, 2003 at 12:22:24 AM GMT+8

2003 年 10 月 5 日 星期日 【酷熱】

唉…下晝電視做埋晒o的陳年舊戲，仲要係我都睇佐九百幾次o個o的，爸爸媽媽居然睇到不知幾投入…唉…唔通做人真係簡單o的好？

今日都係好簡單，訓到成一點幾先起身，其實今朝五點先訓… @_@ 之後食過飯，見冇乜o野做，i-cable又痴佐線上唔倒網，結果又走佐去訓，訓到成七點食晚飯…

食完個飯，都仲係上唔倒網，結果走佐出街，去搵超人傾o下偈。見佢女人間舖都ok啦，不過係學您話齋，黑佐o的囉…上到去間舖見倒個男仔，原來係佢女人o既觀音兵…最x憎呢o的人o架喇！個森林咁q大，係要煩住人o地棵樹，真係不知所謂！火佢！

----------------------------------------------------------------------------------------------------------------------------

謹記差異性
（甚麼該做，甚麼不該做）

1. 你生氣是因為你仍不瞭解她的觀點，而並非她引起你的怒氣。
（有責任去瞭解她，不要責備她引起你的難過。開始嘗試去瞭解。）

2. 「感覺」是不會立即被瞭解的，但她仍然需要被同理。
（深呼吸，甚麼也不要說！放鬆，試著控制自己想要評論的念頭，試著想像如果站在她的立場，你會有甚麼感受。）

3. 生氣可能是因你手足無惜而引起，就算她不能馬上感覺好些，你的傾聽瞭解一定會對她有幫助。
（不要責備她沒有因提出你的解答而心情變好。如果你的解答不是她需要的，她怎會感覺得好過？提供解答時，一定要避免爭論。）

4. 你不必放棄自己的觀點，或完全贊同她的觀點，只為讓她感激你是個好聽眾。
（如果你想表達不同的觀點，請先確定她已說完，然後在你表達之前先重複她的觀點。不要提高你的聲音。）

5. 不要為了成為她的好聽眾而表現完全瞭解她的觀點。
（讓她知道你不明白，但想瞭解。對自己的不瞭解負責，不要批評或指責她的說法令人難以理解。）

6. 你對她的感覺沒有責任，她可能好像在責怪你，事實上她只是需要被瞭解而已。
（等到她覺得你已瞭解她後，再溫和地解釋或道歉。）

7. 如果她真的讓你生氣，可能是她不信任你。她的內在是個受驚的小女孩，害怕開放，也害怕受傷害，她需要你的仁慈憐憫。
（不要和她的感覺與意見爭論，等情緒較穩定後再撥出時間論事情。）

《男女大不同》185-186頁

----------------------------------------------------------------------------------------------------------------------------

男人的犯錯
（為甚麼她沒有感受到愛）

1. 他不在傾聽，心不在焉，不問她有興趣或關心的問題。
（她感受不到愛，因為他不注意，不表示他關心。）

2. 他按字面感受她的感覺，糾正她，以為她要解答，因此提供忠告。
（她感受不到愛，因為他不瞭解她。）

3. 他傾聽，但因她帶給他難過而生氣地責備她。
（她感受不到愛，因為他不尊重她的感覺。）

4. 他淡化她的需求與感覺的重要性。
（她感受不到愛，因為他不突顯她的特殊之處。）

5. 她難過時，他卻解釋自己為甚麼正確，以及她為何不應該難過。
（她感受不到愛，因為他沒有認同她，又使她感到自己不對與不受支持。）

6. 她覺得沒有安全感，因為她沒有得到她需要的安慰。
（傾聽完後，他甚麼也不說，或者只是走開。）

《男女大不同》182頁

>>December 17, 2007 at 11:58:31 PM GMT+8

2003 年 10 月 4 日 星期六 【晴】

終於有得放返日假喇！重陽節。

係咁訓係咁訓，一直訓到十二點幾先起身，食完飯，玩佐陣cm，又好眼訓，結果又死上床訓，係咁訓到成五、六點先起身。食飯，休息，玩cm，同亞辛玩四國…玩玩o下，發覺部機有問題，一上網就死機，一定係個死人acer gamezone有問題！火！

今晚睇返本《男女大不同》，發覺我原來用錯佐方法去同您相處。我係唔應該否定您o既悲傷o既，您喊亦都係有道理。我估我可以對您好o的o既，等我抄低本書o的o野再用佢提供o既方法試o下先…

我愛您。

>>October 5, 2003 at 3:36:14 AM GMT+8

2003 年 10 月 3 日 星期五 【晴】

今日明明係放假，又因為要開個死人會，搞到冇佐半日dayoff…

下晝準時兩點返到去，但係居然要等到成四點九先開始開會。之前o的時間居然要做埋晒o的低能o野，就係拿箱頭筆塗佐印o係第日要出去派o個o的傳單上面o既「中西區區議會」字樣。好地地又要塗佐去，真係多舊魚，one more fish。

佢xy o丫！o個個隔o黎組o既leader「A乜x o野lan」居然淨係坐o係度唔做o野都夠膽死，結果搞郅成組人一齊火佢…真係完全唔知佢做乜，做人可以做成咁不如死佐去冇咁嬲。

星期一開始，我同Kitty就會分成兩組，我會帶住呀聰、呀澤、Marco同埋Mandy，而Kitty就會帶住Gary、Bear、Kevin同埋呀Sam。每組會加到十個人，五男五女。好在可以爭取倒留返o係西環center度﹐踢佐Alan條甜筒友上西環村。拆組係無可避免，但至少可以o係中心有多o的機會一齊做o野。認命罷啦…唉…

之後又開會，講紀律、分組同未來大計之類o既o野，又蝕佐半粒鐘畀佢…唉…

>>October 3, 2003 at 10:30:39 PM GMT+8

2003 年 10 月 2 日 星期四 【酷熱】

今日又唔知返去做乜喇…頂…

十點鐘，好耐都冇返過十點喇，好在o岩o岩好返到去。原來而家遲到執正o黎做，儲夠一百二十分鐘即時炒尤…唉…冇法，唯有守規則…

成個上晝都o係度填表同搞返o的出佐去成個月冇做o既行政o野…下晝就冇乜做o野，係等開會。但係最終等到六點半佢又話改聽日下晝先開，真係麻x煩…結果白白送佐半個鐘畀佢，仲要冇o野做o個隻，真係慘。

食飯前同嫻姐傾過o下，好在佢都明白TDA o既情況，但係佢都提我要以正適當o既渠道去反映，同埋要畀佢o地清楚指導員同助理之間o既分別…mmm…明白。

>>October 3, 2003 at 9:43:53 PM GMT+8

2003 年 10 月 1 日 星期三 【酷熱】

明明國慶放假，但係唔知做乜今日都要返工…

十點幾到中遮打道行人專用區，同Kitty一齊睇班新TDA做o野。「妹妹」本來都會到，但係後尾知道原來佢抄佐車到唔倒…

呢個由中西區區議會同埋中西區民政事務署搞o既「中國國慶嘉年華」，兩班TDA幫手做兩個攤位，西環o個班做o個個攤位真係做得唔錯，如果第日有佢o地幫手就好。另一班總部o既就比較不知所謂，好明顯係頹做o既。其實呢個節目睇落真係有o的不知所謂…呢頭又話可以開始玩，o個頭又話唔好玩住，搞到o的客仔o係度嘈。唉…政府o野，係咁上下o架喇…

放佐工之後入沙田，約佐Man姐同您一齊食飯，去佐好多人幫襯o既明將壽司，等佐成半個鐘先有位，仲要差o的個位畀人搶佐o個隻。食佐好多碟先至二百幾蚊，今晚又有人照，真係好。

好累…聽日仲要返center開會同食貓麵…

>>October 3, 2003 at 9:22:47 PM GMT+8

2003 年 9 月 30 日 星期二 【酷熱】

佢xy！又係寫完冇晒！真係火！

今日雖然放假，但係十一點半已經落到銅鑼灣幫超人手，因為佢女人間時裝店趕住聽日國慶開章。冇法啦，做兄弟o既出到聲，點會話唔得o丫！整o下衣架，鋪o下地毯，搬搬抬抬。總之有乜可以幫手就做。橫掂我都係等您四點放學之後去拿新電話再去日埋I. T.買衫再落銅鑼灣睇戲嗟。

同完佢女人去宜家買o野之後就開飯。今晚有人請我o地去我o地一直未去o個間日本麵度食飯，好開心。

之後就去睇《大隻佬》。完全不知所謂囉，劉德華完全係為佐做大隻佬而扮大隻佬，但係完全睇唔出佢做乜要做大隻佬囉。其實佢唔大隻套戲都一樣可以做落去囉…唉…港產片…唉…想食住《瘦身男女》個勢，但係sorry囉，好在係星期二平飛去睇，如果唔係o的錢丟落咸水海好過…

又過佐開心o既一晚。

>>October 3, 2003 at 2:28:46 AM GMT+8

2003 年 9 月 29 日 星期一 【酷熱】

今日係最後一日上山頂，亦係我最後一日做super draw。

今日o的時間過得好慢，而且一張兩日之內就到期o既傳單根本派o黎都係呃人。結果今日成組人一齊食佐個幾鐘飯，再加上睇o的明人、明星上o黎做show，好難先過倒今日…終於甩難喇…

好累好累。

下晝嫻姐打畀我，我問佢究竟係以個人、公司定係TB o既身份鬧我send o既唔客氣email，佢話係TB。其實我講得出都預佐，要打要鬧o既我一定唔會還手。不過天地有正氣，公義永長存，我就睇個天幾時收呢班廢人，幾時收呢個無能政府。

>>October 2, 2003 at 10:04:15 PM GMT+8

2003 年 9 月 28 日 星期日 【酷熱】

琴晚一點左右訓，訓到十點半起身，返金鐘。

最後一日返金鐘，好多人要我o地蓋印，亦有o的麻煩女人唔o岩資格係都要我o地幫佢蓋…

等埋Marco o係替Gary，再食個大家樂叉米，又要上山頂。因為仲有三日，但係仲有成四箱半o既leaflet，而今日又係最後一次人多o既紅日，所以逼住今日要派多o的，盡量派，要多，要快，要密。結果山頂廣場o係五點半到八點兩個半鐘之內兩個人派佐差唔多成八百幾九百張，真係叻！所以我覺得幾時都唔好話唔得，要對自己有信心，人o地唔要或者失敗佐再o黎過，咁就一定掂o既！

搞完一大輪，山頂廣場仲有一千張左右，而凌宵閣就仲有二千張左右，要努力呀！仲可以派多一日o架咋！因為九月三十日最後一日係冇可能再派呢o的o野o架嘛！

之前連續嗌佐兩日，今日全體人士都好似唔多想出聲咁…咁咪唯有我嗌啦，冇法啦，鬼叫而家做大o既咩…最後把聲真係沙到乜咁…唉…

嗌佐成日，放佐工就真係唔多想講o野，又咳喎…但係我想話您知咁唔代表我冷落您呀，我希望您明白，我總會有唔想講o野o既時候，但係我願意聽您講o野嘛，無論我說話與否，都無減我對您o既愛o架…

>>September 29, 2003 at 8:58:27 PM GMT+8