2003 年 5 月 10 日 星期六 【陰】

今日我要講人o地o既好媽媽。

琴晚去佐健健屋企度，諗住學o下點setup一個router同networking o既o野，順便o係佢度訓埋。

差唔多成點鐘喇，健健o既媽媽起佐身，原來佢今日為佐幫兩個仔o係市區搵屋租而折騰佐成日，累到一返到屋企就要訓。

健健去佐訓，我就同佢媽媽傾偈。佢講返一o的佢o既際遇同埋佢兩個仔，即係健健同細佬。

佢講到「駝」健健o個時生活無憂，所以生佐個好馴o既仔（哈哈！咁又係喎，健健就係最易同最好蝦o架喇！=D），但係之後「駝」細佬o既時候，因為環境轉變，搞到佢成日都好擔憂，結果就生個仔都憫憫憎憎。佢話呢o的係胎教。

呢個係其中一個感動位。無可否認，身為一個媽媽，係會畀最好o既o野自己o既仔女，擔心自己個仔之餘，居然會諗到怪責自己o係個仔出世之前都唔可以畀倒最好o既o野（即使只係懷胎之時o既好心情…），呢o的就係母愛。

另一個感動位，就係佢又講到自己掛住做o野同擔心生活，只係可以滿足倒細佬o既物質上需要…原來細佬以前咁鐘意玩公仔係有原因o既，因為佢細個o個時冇人同佢傾偈，所有o野都只係可以同o的公仔講，媽媽o個時又只係以為自己個仔鐘意玩公仔而不斷「到處搜羅」，以公仔o黎滿足其物質要求，到晃然大誤之時，先發覺箇中原因，但係一切已經太遲，實在係令人感嘆。

搞到我成晚都訓唔著…做媽媽o既，真係辛苦…

又令我諗起我媽媽…我要生性o的，唔好要媽媽咁擔心。聽日講我媽媽。

>>May 28, 2003 at 6:21:41 AM GMT+8

2003 年 5 月 9 日 星期五 【陰】

今日終於都去埋general office搞掂埋張退學form。office姐姐話可以將個遞form日子寫早半個月，咁都好，即係返埋下個禮拜就可以同中大講拜拜…不過我估佢o地都係唔想畀錢出多成個月糧畀我呢個唔會做o野o既人之嘛…都好，而家執返半個月糧，諗住乜都冇，而家又有返o的，都算係失而復得。

今日突然之間好多o野都想一次過做晒，o的行程編排得比較急同密，搞到您好憫憎添…

係o既，今日我個人係急速佐o的o既…但係而家我心裡面只係諗倒一樣o野，就係要o係最短o既時間之內追返我呢一年零九個月以o黎所失去或者浪費o既時間。您話我冇諗其他人o既感受，淨係識得諗自己o既o野，做自己想做o既事。冇錯，您係o岩o既，如果您唔想o既您咪開口講我聽囉，我一諗倒就做o架喇，如果您覺得有問題又或者唔開心，您開口講，我就會即刻諗第二個流程去做我諗住要做或者plan好要做o既事。您唔怕出聲o架，因為我仲會聽您講嘛~~~

總之，開口講我知啦，我而家要追返失去o既o野，好多o野都可能會忽略佐，您唔出聲，辛苦死您呀，寶寶！

>>May 28, 2003 at 6:22:48 AM GMT+8

2003 年 5 月 8 日 星期四 【陰】

今日無端端又紅色假，都唔知係放乜…不過有理冇理，訓到下晝先起身…

個新日記都係有o的問題，之前寫寫o下都可以突然之間成版白晒冇晒o的字冇晒…一個字…「廢」…不過唔駛錢都冇得揀o架喇…

>>May 28, 2003 at 6:20:03 AM GMT+8

2003 年 5 月 7 日 星期三 【陰】

今朝早諗住返去上group seminar，點知個x人一入到房就話︰「你辭佐職o架喇喎，唔駛o黎開seminar。」我就話︰「開埋今次。」佢就話︰「o下…仲唔走？」

咁o既情況我就緊係第一時間走啦…不過冇得聽Man姐講progress添…早知唔駛我晨咁早起佐身再行到身水身汗咁返去啦…出佐去半個鐘就返宿…問o左general office，佢之前又話要填唔知乜form，原來都只係我上次自己去拿o個張頹form…

以個x人咁要面子，同埋以office o個班冇o野做得閒到死四圍講事非o既人，我估應該成個化學系都知我飛起佐個x人。哇哈哈…咁我唯有祝你前程似前錦o既嗟…同埋祝埋你第日唔好再入錯貨…不過佢入o個兩個PhD都係廢人，有時真係忍唔住笑同話佢抵死，正所謂「話佢戇x又怕佢嬲」。不過要我貼錢走就勢係假！

下晝過佐香港o個邊，去過法國文化協會同英國文化協會，拿佐o的leaflet睇o下咁…仲帶您去佐我以前同o的friends成日去o既分域碼頭麥當勞…不過今日唔記得買法國電影飛同埋太遲先去到izzue結果佢收佐舖…

>>May 28, 2003 at 6:22:13 AM GMT+8

2003 年 5 月 6 日 星期二 【雨】

今日當然都係冇出現啦…但係總有返過去…但係唔小心又畀我撞倒Man姐…之後就跟佐佢同另外兩個postgrad.頹人上佐去UC思源館食tea…傾o下偈咁…唉…o係度讀postgrad.真係"dum"懶晒個人o架！陰公…成班大好青年搞成咁…

General office打畀我話收倒個x人forward我send畀佢o既email，話畀我知原來要一個月通知！！@_@ 搞亂佐我陣腳添…本來諗住可以搵o的立即上班o既工…而家點搞好呢？Joseph o個邊又點算呢？

煩煩o地添…不過您考完試，仲要識得都幾多o下添，真係好喇咁！但係您點可以大學二年班先學人做o的咁o既o野o架…唉…學壞晒喇您…真係好o既唔學衰o野學到足…頂您不順喇！

>>May 28, 2003 at 6:23:59 AM GMT+8

2003 年 5 月 5 日 星期一 【雨】

老老實實，今日唔返工喇。

腥佐個email畀個x人，話畀佢知要同佢講拜拜。個x人只係回佐個email畀我話如果我聽日都仲係唔出現，就會forward我個email畀general office…嗯…都好o丫…不過原來quit o個份form都唔駛佢簽名o既…

其他時間就同您溫習o下inorg. chem.，不過個人憫憫o地…您又真係可以完全唔識… @_@ 是但啦…一齊「係咁睇、係咁睇」快快手手搞掂佢先啦…聽日考完就ok o架喇！

>>May 28, 2003 at 6:17:29 AM GMT+8

2003 年 5 月 4 日 星期日 【雨】

o的雨係咁落係咁落…部電腦就整極都整唔好…頂…

同媽媽講佐我唔想再讀，要退學。佢只係叫我自己諗清楚同自己決定，仲有叫我有心理準備好難搵工…不過我見佢個緊張樣就真係得人驚喇…慌死我會冇o野做咁。我唔信o架！我一o的都唔會信自己搵唔倒o野做！睇住o黎，我係唔會衰畀「你」睇o既！哼！

爸爸就問我幾時搬返o黎，因為個房要裝修一o下…mmm…我估大家都好尊重我呢個決定喎…咁都好o的…咁我都係要更加努力做人先得喇！

好！畀心機！第一件事寫好resume再send畀Joseph先！

>>November 18, 2003 at 10:54:42 AM GMT+8

2003 年 5 月 3 日 星期六 【雨】

火呀！咁辛苦約晒人等齊人o係彩虹等踢波居然畀一個雷暴警告搞到冇得踢！！！豈有此理呀！

註定冇緣同皇上踢波喇…見佢失望而回，連地鐵都唔駛出閘就走佐…對唔住喇…

食完飯之後各自解散…我就落佐銅鑼灣搵個朋友仔Joseph…條友仔居然學人食雪茄…真係吹脹…同佢講佐我而家返工o既情況…希望佢o個邊有空缺啦…

之後我再同佢去佐打檯波…結果搞到成點先返到屋企…返到去就開始update屋企部機做windows 2000…不過個中文版好似有o的問題… @_@

>>May 28, 2003 at 6:17:51 AM GMT+8

2003 年 5 月 2 日 星期五 【晴】

星期五喇…下晝先返去，點知畀我老細早一步send email畀我叫我見佢解釋做乜唔返…早知就連下晝都唔返啦…

五點幾，都係上UC教o下您o野先喇…琴晚見您好唔掂咁，我仲發佐您脾氣添…搞到您喊…唉…耐心o的耐心o的…一時唔小心lost佐patient添…對唔住呀老婆仔…

同個朋友仔傾過，佢叫我improve o下o的英文先，仲好有可能介紹倒份工我做。我要努力！我要考IELTS，等我搵工多張CERT.先得…

點同媽媽講唔讀o既o野呢？

>>May 3, 2003 at 2:42:22 AM GMT+8

2003 年 5 月 1 日 星期四 【晴】

今日係五一勞動節，講真就真係冇乜勞動，成日死佐o係宿…夜晚出佐去買o野畀您食…您乖乖溫書，畀心機啦，唔好好似我咁…

唔想讀o既諗法越來越深。

應承過自己，我以後o既生活一定要過得有意義同開心過個x人，所以我要︰
1) 戒煙。
2) 早睡早起。
3) 慳o的駛，早日還債。
4) 搵工，學好英文。
5) 嘗試完成o的lab。

>>May 3, 2003 at 2:36:17 AM GMT+8