2003 年 2 月 19 日 星期三 【晴】

星期三，唔駛group sem.，心情特別開心。

今日過佐兩支columns同set佐三個reactions，但係仲有時大把間淨，真係好。心情幾靚。

老細又入錯貨喇…我o既所見所聞令我對大陸人一貫o既形象完全幻滅…勤力，唔怕捱苦等等大陸人有o既美德通通都唔o係我個lab出現…哈哈哈！你都有今日喇老細！

夜晚出佐去同健健睇焦媛o既話劇《赤之禁室》，冇乜料到，雖然情慾，但係冇乜特別。佢露佐個全背，就係咁多…唉…十分我只可以畀佢五分，完全一o的insight都畀唔倒我，冇inspiration…講o的o野太general喇…等我仲以為佢可以講倒o的要人諗到頭都大o既道理添…o徙氣。差！

對唔住米米，一時戇x搞到您成腳濕晒添… @_@

好掛住老婆仔媚呀~~~

>>February 20, 2003 at 1:58:41 AM GMT+8

2003 年 2 月 18 日 星期二 【陰】

老細走佐佬，個lab真正冇王管。

朝早返去蒸DMF，蒸得好慢，但係好順利，都係做佐lab咁耐第一次，今day個頭開得唔錯。

由於冇column過o既關係，所以set完兩個reactions之後就收工，走去做埋o個四個lab reports o既mechanisms。搞掂食碗麵！yeah！又放下一個心頭大石，可以全心做lab，真開心。

夜晚就同您走佐去馬鞍山睇《老鼠愛上貓》，得啖笑。不過三十五蚊真係好抵玩。

今晚玩得好夜…好死累…十個累畀夠佢十三個。您扭親條腰仔，我條腰就一早累佐好耐啦… @_@

愛心曲奇好食。不過我知您仲有進步o既餘地o既！愛您~~~

>>February 20, 2003 at 1:42:13 AM GMT+8

2003 年 2 月 17 日 星期一 【雨】

今日真係累到嘔…琴晚三點幾先訓得著，都唔知咩事…個頭又暈又痛…頂…

今朝九點半倒返到lab，為佐慳o的錢，今朝我揀佐行返lab，又唔係好累咁喎…上晝set佐兩個reactions，食完飯再過埋支column，今日可以做o既lab又做完喇。

晏晝食完肉醬意粉，痾佐三次尿都仲有肉醬意粉味，好恐怖… @_@

因為老細走佐佬，今日冇得面聖。為佐唔好畀佢有說話可講，我send佐個progress畀佢，人至義盡啦…

四點開始做undergrad. o的濕x pre-lab reports，做到隻狗咁…好死累…

十二點，頂唔順喇…做埋個lab 4 o既mechanism就要去沖涼訓喇…又開始頭痛頭暈…今日真係好辛苦… @_@

>>February 18, 2003 at 1:18:07 AM GMT+8

2003 年 2 月 16 日 星期日 【陰】

今日返佐屋企，好平淡咁過。

琴晚九點半就不支倒床…訓訓訓。八點半自己醒佐喇！今日唔駛返工o架，做乜要咁早自己起身？好，我再訓！訓到十二點都唔想訓喇…上網，玩玩玩。玩到三點幾，好悶，打畀您，原來您今日成日都溫書，咁乖，真係抵錫！下晝最後都冇訓晏覺，怕今晚訓唔倒。

聽日又要返工。老細幾時去日本o架？

天氣開始潮濕，四圍都係倒汗水，好鬼煩…

>>February 17, 2003 at 12:11:14 AM GMT+8

2003 年 2 月 15 日 星期六 【陰】

今日係元宵節呀，唔怪得之我o地幾乎又嗌交啦…

我終於明白點解我o地成日都嗌埋o的小交喇！原來係因為我同您都成日用自己認為對方會明白自己o既方法去同對方講o野，但係最終o既結果係大家都唔明對方o既意思。被追問之後又會表現得好憫咁…嗯…原來係因為咁。我要承認好多時我的確係對您缺乏佐應有o既耐性o既，因為我以為您同我一齊都有半年喇，應該都會明我講乜呱（話頭醒尾嘛！），但係原來我同您都仲未呢個地步。嗯，明白晒喇！終於都有辦法解決倒大家o既溝通問題喇！好在您o係返屋企之前拿出o黎講咋，如果唔係一定仲有排嗌、有排拖。我唔係您，您又唔係我，又點會咁容易完全明白對方呢？我o地係要表達得清楚簡單先可以互相了解多o的。我又點只畀三次機會您o丫，以後您唔明我會用心講解您知o架喇！您都要！

好愛您媚媚。我o地要永遠唔分開~~~

好死累…zzzzz…

>>February 17, 2003 at 1:33:40 AM GMT+8

2003 年 2 月 14 日 星期五 【陰】

我深信今日唔係一個好日子。因為冇天時、冇地利、冇人和。

今朝八點半起身，九點就返到lab。畀佐個abstract老細睇，之後再交埋添，總算了佐一件心頭大石。之後set完reaction又要去grad. sem.，今日實在好繁忙，走來走去未停過咁滯…完佐seminar居然成十一點半，搞到十二點先開始過column，連飯都冇得食咁過埋支column就趕住落沙田…完成佐mission 3同埋買多佐好多其他o野，又係要撲來撲去先買得齊o的o野…嘩…真係累死…最慘就係買到成兩點先走得，結果要飛的返中大趕帶lab…呢兩日趕來趕去真係人都癲…又累又眼訓，晚晚差唔多三點先訓，八點幾就要起身，真係痴晒線喇…救命…

帶完就同您出去喇。都唔知去邊好…四圍都係人，錢又唔可以駛得多喎…結果o係又一城行來行去，您話好悶，我都唔想呀，但係我真係唔可以畀倒o的咩驚喜您囉。

我又點敢唔為您預備o丫，話晒都騰佐成晚同今日個中午呀。傻婆，我又點會冇諗過同您去邊o丫，不過我覺今日天氣唔好好多地方都無謂去啦！上山頂同去沙灘實凍死您啦…我自有我o既安排啦…您又心急到死…您知我乜都慢幾拍o架啦…真係畀您激死…見您成晚面無表情咁…真係搞笑。見您最後都開心返喇，希望您會有一個難忘o既、第一次o既情人節啦，一切都係為您做o既。禮物唔係o的手作仔又唔係o的乜別緻o野，只係一件我覺得好靚又好o岩您o既衫。件衫就係我喇，您著住佢o個時就好似畀我抱住咁，唔著o既時候就掛起佢等如掛住我（唔好摺埋我收埋呀…）。好希望可以為您帶來從未有過o既快樂。 =)

終於都同您講佐我放o係心裡面一直好想同您講o既o野。多謝您o既諒解同明白，不過我又整喊佐您喇…我愛您，老婆仔媚媚。今日做唔到o既事，第日我一定會做到。今晚您真係set me free喇！啜啜~~

好多謝您o既禮物，好多愛呢~~~

>>February 16, 2003 at 12:58:35 PM GMT+8

2003 年 2 月 13 日 星期四 【陰】

嘩，今日勁慘，要八點鐘起身去sit老細堂…琴晚仲要差唔多三點先訓…真係冇陰公…好在有人morning call我嗟，如果唔係死都唔起身。一返到去就要quiz，第一次上堂就quiz，不過唔計分兼且o的題目勁易。

上完堂就set reaction同過column。今日好混噩，成支2.5L dichloromethane跌埋落地，成地都係solvent，真係激…呢個都係我生平第一次，除佐xx聲之外，我都冇其他反應…唉…o徙晒。

下晝食完飯返o黎過完支column就冇o野做（唔想做o野…），但係老細偏偏又成六點先走，搞到我呢個又要去超級市場買o野又要去買情人節禮物同埋要返屋企食飯o既我趕到七彩…買完廁紙搞到八點先返到屋企，食佐九個字飯又要趕落銅鑼灣…嘩…勁累…今晚落去o既missions係要買三樣o野，其中一樣當然係您嚷著要我買o既禮物啦。去到「斯華洛世奇」，發覺都係唔多o岩心水（本來想買o個條拼圖鏈），最後行佐一個圈都係決定要當機立斷，因為已經九點半喇，時間唔再容許我慢慢揀…買完之後都十點喇…結果我去唔倒想去o既地方去完成我另外兩個missions…好彩仲有舖未閂…mission 2 completed之後，已經十點三，o係成個銅鑼灣走來走去，都搵唔倒，太夜喇…頂…好在見倒有個新o既商場（我未行過…），咁就諗住行埋就走，碰碰運氣。行佐兩o野，居然見倒有，但係又想行多陣睇o下仲有冇其他揀…唉…算喇，又累又夜，大把o野未做，又o黎一個當機立斷，買埋，走人。點知返上水o既小巴排長龍又冇車…企到傻…十一點五先上倒車，架死人車仲要o係九龍行大運…十二點先返到lab，打兩個GC，終於都走得喇！但係仲想做埋個abstract先訓喎… @_@

嘩…您呢排好冷淡咁喎…都唔知您做乜…o的態度怪怪o地咁… @_@ 不過夜晚又好似好返好多咁喎…

聽日係我同您o既第一個情人節，見您好似好期待咁，但係我又偏偏冇乜特別o既禮物送畀您（一o的都唔精緻，又唔係親手整…），亦都冇乜特別地方想帶您去…我只係想o係一個好舒服o既地方同您坐o下靜o下嘆o下咖啡咁過一晚…

真灰…抹完地之後整爛佐mission 3…成舊水都係碌卡未畀…仲要o徙時間再買過…頂…今日做乜係咁整爛o野o架…灰爆…極唔開心。唔好玩我啦…我已經好累喇…聽日唔係仲要我仆落沙田買呀嘛…對唔住，錢同時間係我呢排最緊張同最需要o既o野…

>>February 14, 2003 at 2:02:26 AM GMT+8

2003 年 2 月 12 日 星期三 【陰】

唉…又一day，又half week喇…

好累…琴晚三點先訓，今朝十點先返到lab…好累好累…

一返到去冇乜做o野就要開group sem.，今日係坤哥rehersal，同大家rehersal一樣，都係好悶…咁又一朝…真係唔想開…好彩下兩個禮拜老細唔o係香港可以唔駛開嗟…真係好。開完group sem.之後老細又請食飯…真係受之有愧…

下晝一開波就set佐個reaction，但係後尾又發覺做呢個reaction好o徙自己時間，所以做佐兩個鐘就停佐佢，過埋支column之後再set過…o徙多一個鐘時間總好過o徙三日時間…我估。

夜晚唔知做乜都搞到九點先返宿，個abstract仲未寫…又一day喇…唉…點好？老細就走喇，點死？我要畢業呀…個abstract點寫好？

今日係我o地拍拖七個月喇…光陰似箭，日月如梭…真幸福，咁快又同您七個月。

情人節，冇錢過，慘慘慘…點同您過好呢？

>>February 13, 2003 at 12:42:42 AM GMT+8

2003 年 2 月 11 日 星期二 【晴】

今日九點半過o的返到lab，居然一個人都冇，仲要連老細都唔o係度，我仲以為個lab發生佐o的咩事添…原來全世界今日都夾埋遲返…

上晝set佐個reaction同recry.佐o的starting materials之後就去食飯。今日好o徙時間呢…左等右等咁…下晝帶個lab好彩都唔算太耐。之後再用極速過column，再洗埋條vac. line（無端端畀老細話我條vac. line污糟…），就上UC同您食飯…mm…乜都冇…中大真係一個「好」地方。

今晚係我唔好o既，係我用開o個句「我都費事同你講呀」先o既。但係如果我明您講乜就唔會追問啦…您唔可以只係講一個現象出o黎而唔加以解畫o架嘛，咁樣我會唔明您想表達乜o架！凡事總會有原因嘛…點知我今晚問您做乜canteen開o既時間又會同百佳開o既時間有關，畀您回應一句「我都費事同您講呀」，之後您就真係顧住食唔再講o既嗟…您係咪想話百佳閂佐買唔倒o野食？我都唔知您想講乜自然就會追住問o架啦…而且追住人問o野又係我o既性格喎…或者我係問得太急太多，令您一時間諗唔倒點答，但係您都唔可以話收聲就收聲嘛…咁o既情況我就唯有做一個「我都費事同你講呀」o既真實版畀您睇啦…如果我出佐聲可能大家會嗌交o架喇…

其實我同您都已經好佐好多o架喇，因為我o地而家通常都係嗌o的小交，而且仲係好短暫o既交，大家好快就冇事，我估呢個都係大家相處佐咁耐而學返o黎o既。大家都知對方唔易頂，情格又相反，但係咁樣先可以好似砌圖咁拼得埋嘛…

我不夠愛您。

>>February 12, 2003 at 8:09:34 PM GMT+8

2003 年 2 月 10 日 星期一 【晴】

今朝九點幾就返到lab，但係總會有人比我早。見老細，又畀佢話我冇o野搵o野o黎做…哦。我諗倒我要做乜我就唔會讀chem啦老細。

而家keep住每日一個reaction同每日一支column，但係總係覺得人o地點都係比我勤力。是但啦，咁樣已經係我對呢個咁唔鐘意o既學科o既一種極限。我要好專心咁做lab，我要一個人去面對呢個殘局。我唔可以再畀其他人同事detract我o架喇，我要做lab裡面o既孤家寡人！

坤哥今日終於都返佐o黎，係塊面紅紅o地嗟，冇乜o野。好佩服佢對化學o既熱誠，我就一o的都冇喇。

今日洗牙，超痛…

您玩減肥搞到冇氣冇力又冇精神，好擔心…

夜晚出佐去睇戲食飯，我覺得今晚好似駛得太多錢添…我而家負緊債o架喎… @_@ 您食完個芝士火窩之後塊面紅pok pok咁，好鬼得意。之後睇埋"Catch Me If You Can"，超正，西片即係西片，劇情加幽默，勁好睇，不愧我咁鐘意睇西片。港產片真係唔該摺埋啦…

不過今晚食飯又因為o的小事搞到大家都唔係咁開心。其實琴晚我冇心話您苛刻，我知您係有o的不滿，但係您表現得比較唔耐煩又面黑黑咁嘛。其實我咁批評您苛刻o個個係我，對唔住呀。走o個時仲發佐您個小脾氣…對唔住…但係您真係要小心o的睇路行先得o架…

返宿畀個看更撞倒…定o的o黎！下次您都係留一留o係lobby度等一等啦…

>>February 12, 2003 at 8:44:41 PM GMT+8