2003 年 10 月 17 日 星期五 【陰】

終於都到星期五喇！返埋今日就放兩日喇！

今日去佐好多地方，o係半山度行來行去，先去佐SOHO區上少少o既些利街清真寺，之後沿住堅道行佐去必列者士街，睇佐間舊到死o既YMCA，再上埋醫學博物館。再轉返上堅道，經過合一堂，就上去睇o下。班細o既唔多想上，總係覺得冇乜特色。不過呢o的咁o既舊建築又確係唔多討好青年人o既…最後落埋高街鬼屋，睇完幅牆又返中心。

下晝又唔知搞過乜，但係時間都過得幾快。

夜晚就約佐Joseph食飯，去佐佢最鐘意o既Outback牛扒度食。我請。因為佢o係澳洲返o黎咁耐都未見過佢，原來佢突然又唔讀返香港係因為屋企有事…明白。之後就同佢去佐皇室堡13樓打佐兩粒鐘台波…

問佐佢好多物業管理o既o野，之後返到屋企又上網睇晒成個啟勝o既網頁，聽朝見工實冇死喇呱！

>>October 20, 2003 at 7:52:05 PM GMT+8

2003 年 10 月 16 日 星期四 【晴】

今日天氣唔錯。返下、夜，冇遲到。

今日o既行程係上山頂。但係因為要三個TDA supervisors同呀嫻、Jamie開會，所以搞到成五點先走，五點半先落到中環… @_@ 搞到返上、下o既Shirley上山又唔係，唔上山又唔係…結果佢就送佐一節畀公司同埋蝕佐一堂日文。

又開佐一個又長又冇乜用o既會。一開波就要報告o下小組近況。不過咁，o的人都未混熟，而且總有o的人係慢熱o的o既，所以都係睇多陣先啦…

公司畀佐好多好多o野我o地做，完全係驚我o地做唔死咁多…大約有五至六個tasks要完成…慘喇…好快就會忙死…

山頂都係o個個山頂，但係班舊人今日好唔乖，成日都以為自己o係o個度開佐一個月工，就好唔認真咁去做site visit…仲要帶住幾個新人添… @_@ 唉…都冇乜火喇…唉…

山頂風景都係咁靚，香港o既夜景果然係世界三大夜景之一。絕！

>>October 20, 2003 at 7:43:59 PM GMT+8

2003 年 10 月 15 日 星期三 【晴】

今朝中心有o野搞，所以直接落區site visit。仲好，慳返一程車錢之餘仲可以大家晏少少先集合！正！

今日去佐大會堂隔o黎o個個香港規劃及基建展覽館，都幾多o野睇o下，又舒服。好多香港未來o既發展，不過大部分都仲係紙上談兵，唉…算罷啦…

之後上佐琴日冇開o既茶具文物館，睇佐成個鐘，好多o野睇，仲有茶葉畀人聞，好鬼得意。之後就返中心。

下晝又要同個A乜lan開會講個萬聖節party o既事。佢xy o丫！真係完全唔掂囉佢，叫人點同佢合作呀？大佬呀，做少少o野做咁耐都仲未做好，拖住晒我o地o既進度，頂！火佢！

我都唔知佢想點。問佢o野佢就乜都話而家o的o野好亂，要返去組織o下先。ok，冇所謂喇。畀個email佢，叫佢打落個word度send畀我，夾埋一份proposal交畀呀嫻同Jamie。佢就反而叫我做好個poster之後send畀佢，ok，都冇問題。佢問我駛唔駛要佢個email，我就同佢講話佢send email畀我，我咪知佢個email咁我咪可以reply佢囉。點知條知淨係o係度「er…er…er…」…火！我就火佢一句話︰「你唔係星期六都仲未做好你o的o野呀嘛？！」之後佢就無言，我就話「散會」。同o的咁o既人講多句o野都o徙氣。

>>November 7, 2003 at 1:54:20 AM GMT+8

2003 年 10 月 14 日 星期二 【微冷】

嘩…今朝o係九龍過返o黎，結果返工又遲到佐十五分鐘…唉…

呢排香港都唔知做乜四圍都塞車，唔通係因為轉天氣？

今日行程豐富，去完香港公園之後再去香港動植物公園，嘩…累到呢…

茶具文物館、茶藝館同視覺藝術中心逢星期二休息，仲有香港禮賓府、聖約翰座堂同埋終審法院。通通唔入得，好冇癮。

累到嘔…行完公園之後，真係發覺香港o既天氣開始轉涼。

>>October 20, 2003 at 7:23:40 PM GMT+8

2003 年 10 月 13 日 星期一 【晴】

灰晒…今日真係…灰。

如果公司唔係遲佐出糧，今日o既事根本唔可能發生。

今朝原來係九點鐘要返到公司上基本急救班o架，不過唔知點解會咁黑仔遲佐成半粒鐘先可以返到去…我將要面臨「口頭警告」喇…唉…

九點鐘出門口，以為自己好醒目咁拿佐媽媽幾蚊散紙去搭巴士，諗住一個鐘乜都到西環啦。點知出到去巴士站，就見倒我前所未見過咁長o既人龍排隊等788同789。結果等佐三個字到佐第三架車o黎我先上倒，仲要係多人到爆晒o個隻…跟住又塞佐一陣車，落到中環都已經八點七。冇所謂啦，因為搭5X都係兩個字就返到公司，諗住大把時間。

點知等足四個字先至有車，咁我估最多都係遲到五分鐘o既嗟，之但係當我一上到車…pk！八達通居然係負值！&^%*^@#(^!#&^$*$^(@&! 我頂…點會咁o架…早知拿多幾蚊啦…結果死死地氣落車，走返落地鐵站「當」佐張八達通返工。等多一班5X，結果九點半先返到去…灰爆…

火！以後返工唔搭5X！城巴o的5X完全靠唔住o既！！！

下晝又要去site visit，今次係上環o的咸魚欄同參茸海味舖…都幾悶。不過一個鐘就搞掂返中心。

夜晚就見您約佐大鴻、文西同星星一班人食糖水，於是我就提早出o黎陪您。

嗯…旺角分店o的環境真係麻麻o地…下次都唔多想去… @_@

>>October 20, 2003 at 7:16:08 PM GMT+8

2003 年 10 月 12 日 星期日 【綿綿細雨】

點解o的糧仲未可以提出o黎用…

今日真係火火o地！因為o的廢人真係可以完全企o係度唔做o野都得！火！

今日雖然係星期日，但係都要開四個鐘頭工。今日去佐o個個「上環假日行人坊」，搞四個無聊攤位。全部工作人員有十六個，全部都係西環o既人。另外加埋我同埋隔o黎組個x人A乜lan。

一點鐘去到，集齊o的人，o個條pk居然可以遲到…上環咁近都可以遲到，真係叻。之後我將佢o地分為兩組，每組8個，一組做攤位，另一組做影相。條pk居然真係可以行行企企，你想點呀大佬？畀個官你做好唔好？完全係廢人一個。

今日都幾熱o下，而做攤位o個個位又臭到死，都幾辛苦o下，不過班組員都算幾畀心機做，係有o的時候唔夠人又唔知佢o地走佐去邊嗟…唉…都冇法…

眼見條A乜lan完全冇做o野，又唔知做乜一時見佢拿住支錦旗走來走去，一時又見佢拿住部相機o係度扮影相…佢xy…好心佢就幫o下手啦！淨係識企o係度傾偈！火佢！

五點幾終於都可以走喇…好累呢…火條A乜lan。

>>October 20, 2003 at 2:32:05 AM GMT+8

2003 年 10 月 11 日 星期六 【陰】

今日係咁訓係咁訓，完全冇出街。

好累，但係琴晚都要搞到差唔多三點先訓。其實我兩點幾已經坐o係電腦前面「合」著佐，不過要等埋您電話，冇所謂啦…

結果今朝訓到十點幾畀電話嘈醒佐，之後又訓到十一點幾，又畀公司嘈醒…頂…結果唔理又訓，訓到成四點幾…之後食佐o的o野，再訓。訓到七點半食飯…

食完飯都唔多想做o野，同健健媽媽傾o下電話，知佢做化療辛苦嘛…再打o下日記，咁就一day。

老實講，我都仲係好累…

>>October 12, 2003 at 12:08:16 AM GMT+8

2003 年 10 月 10 日 星期五 【雷雨】

雙十節，同您同埋家姐去食私房菜慶祝！好開心！

今日去佐好多個景點呀！一開波就去佐中環郵政總局，估唔到裡面原來有咁多o野睇o架！足足逗留佐成個鐘頭呀。可惜天不造美啦，開始落好密雨，搞到我o地行得冇咁開心。

食完飯之後再去埋天星碼頭、皇后碼頭、愛丁堡廣場、大會堂、和平紀念碑、皇后像廣場…行呀行…再上蘭桂坊，轉個圈過埋SOHO區，我o地仲見倒Sammi同黃秋生o黎度拍戲添呀。好累呀…今日好似去得太多地方咁…累死…返到中心成組人都冇心機做summary…我就要搞埋萬勝節個計劃書同埋一o的好濕碎o既事…

一到六點就走人，但係好火隔o黎組o的廢柴。成班都係垃圾，冇話幫o下手，真係唔火唔得。

之後唔知點解您又會o係灣仔蕩失路喎…之後再去佐灣仔一間叫Le Blanc o既上樓餐廳食私房菜。家姐約佐佢妹妹、我同您、呀Mo仲有臭Kit。六個人食佐好多o野，好法式，好得意。我覺得成晚最好食o既一個，就係個甜品仲有杯expresso。呢隻意大利，完全冇酸味，好正。二百八十蚊一位，真係唔算貴。更何況我o地都好耐冇食過好o野喇，一次半次冇所謂啦！呢間o野間隔同情調一流，又high class，但係大聲o的傾偈都冇人理您o架喎，個老闆又nice。十分滿分呢間我畀佢八分。因為o的食物雖然係貴價貨，但係我唔覺得特別好食。

之後就帶住就o係累到爛o既身軀返屋企。冇送您返宿，因為又累又冇錢…

>>October 12, 2003 at 1:08:44 AM GMT+8

2003 年 10 月 9 日 星期四 【酷熱】

終於都有出糧支票，但係唔代表即刻有錢拿…成副身家得八毫二仙，成日都要歡樂滿東華…

今日去荷李活道、文武廟同摩囉街。行得都幾累o下…

見倒好多新奇o野，但係摩囉街真係好臭…食完飯之後再去埋中區警署就收工，結果仲有一個鐘頭o既自由活動時間。玩完之後再落中環中心個遊客諮詢中心拿佐好多資料…

今日放工仲邪呀！我同Kitty、Marco一齊行到去巴士站，個Alan又失驚無神閃出o黎喇！！！真係嚇x死！大家傳聞之中話佢鐘意Kitty所以先成日跟住晒喎…

我o地三個人冇理佢o係巴士上面係咁傾偈，佢唔係自己無端端x笑，就係搭咀講o野。但係我o地三個完全冇理過佢。落車o既時候，我同Kitty要去玩具反斗城睇o下o的萬勝節用具，點知條友又唔知做乜跟住晒喎…於是我兩個就畀佢行前，見佢行佐去另一邊，就即刻同佢講拜拜，我同Kitty就行另一邊。點知我o地傾傾o下偈，條友又突然o係我o地後面閃出o黎喎！嘩，救命呀！好得人驚！佢以我乎聽唔倒o既聲音問我o地去邊，我就大大聲答︰「我o地去拍拖囉！」，之後佢就dup低頭又係細細聲答︰「係呀…你o地幾時開始o架…」之後我o地冇再同佢講o野，亦都唔知佢幾時冇再跟住我o地…

睇佐o的道具，都幾貴，但係總有辦法o既，例如用蝦條o黎代替彊屍牙啦… =)

弊…又唔見佐抽鎖匙…

>>October 20, 2003 at 7:22:02 PM GMT+8

2003 年 10 月 8 日 星期三 【酷熱】

仲未出糧，好慘，已過法例規定o既七日喇…

今日係返下晝同夜晚，冇得落區，夜晚仲要去上堂，真係慘。不過阿如今中走佐，我o地組又少一個人…

下晝返到去其實係要開會，西環o既三組人要合作o係中心搞一個萬勝節party（萬勝節都要慶祝？為鬼慶祝？搞錯。），主旨係親子o既。老實講，個Alan真係好廢囉，成日自己同自己講o野，真係唔知佢做乜o架喎。結果大部分o野都係我同Kitty諗晒，寫低佐，而o個條友就仲o係度唔知自己同自己講乜…真係得人驚…

四點鐘就離開中心過深水步上堂。食完個飯六點開始上，上到十點。雖然都有o的悶，但係總算學倒好多同旅行社、領隊、導遊有關o既o野，好充實。不過坐o係後面o既人好嘈，係咁傾偈。我同Kitty o既兩組人就好o的，傾偈同玩o既情況冇咁嚴重。其實我真係寧願o的人唔聽o既話自己摺埋訓覺好過啦，唔好搞住其他人嘛，其實留心聽書係尊重自己同講者應有o既態度嘛…唉…

完佐之後隔o黎組個戇x組長Alan又無情白事一直跟住我o地組人喎。我心諗，點解佢唔係同佢o個組o既人一齊o既呢？佢跟住我同Kitty兩組人托咩？條友跟住我o地幾條街，無論我o地班人去到邊佢就跟邊…好唔容易佢先知難而退入佐地鐵站…條友搞到我o地成組人火晒，幾乎有人要火佢o架喇…

結果差唔多成十二點先返到去，仲要做返琴日落區個報告添…累死…結果做埋呢份報告都已經三點…唉…得五個鐘頭訓添…

>>October 12, 2003 at 2:47:06 AM GMT+8