2003 年 10 月 4 日 星期六 【晴】

星期日的好處：想幾時起身, 就可以幾時起身

今朝起身, 望下個鬧鐘, 接近十點 (即係實際時間九點三左右)
咁鬼早, 又病
一於訓多陣
結果十二點先醒
一醒就有午餐食, 午餐係粥
無錯, 食粥係可以清腸胃, 同埋可以調理身體
但係好心我病到死下死下咁, 就唔好淨係食 D 我唔會飽的野啦
最後我食左一湯碗粥, 再加一筒消化餅
仲係好肚餓

一路做功課一路練嗩吶
當我諗唔到點做既時候就練單吐
當我吹唔到單吐的時候就做功課
結果一事無成, 兩樣都做唔到...

無啦啦謝子 send ICQ message 問我一陣得唔得閒出去
之後阿一又打畀我問我出唔出去
如果係平時我一定會話好
但係精神狀態唔多正常的我考慮左好耐
如果佢地唔係話約左周展講數我都唔會出去
最後...
我就梗係出左去啦

五點半左右去到銅記紅 ANT, 周展都未到
但係佢話陸健斌都去
咁即係話...
佢兩個一定會 "循環煲煙"* 啦
> . < "
擺明係襯我病攞我命O者！

* 循環煲煙者, 即無間斷地吸煙, 猶如循環換氣般, 故名

果然無估錯
佢兩個坐低唔夠五分鐘就開始 "煙霧瀰漫" 起來
吸完一支又一支
望住 D 煙不斷咁向住我地四個 (我, 阿一, 謝子, 伍中彥) 的方向包圍
唯有心裏面講："頂！早知唔黎啦, 上左賊船... 唔係！煙船先 arm..........."

同佢講到七點三, 佢話要走
原來佢今晚要表演
但係場音樂會七點半開波
而且仲要係響西灣河果邊表演.........

果然無錯, 我地成日遲到
其實都係以前果 D YCO 人遺留落黎的 "優良傳統"
之不過肥仔江話當年有九成人係會準時出席....
真係有 D 匪夷所思.........

之後話要開四人會議傾決賽細節
但係實情係去左世貿打機
去到阿一唔記得點上去
管理員問佢去邊, 佢淨係識話："去機舖"
中晒毒咯佢....

卒之打完機 (都好似係一粒鐘之後)
開始開會
傾左好耐, 講左好多野
但係真正落實的都係得排位

Belinda 打黎話聽朝唔使做野
超開心
之後阿大又打畀我講同一樣野
佢仲話我把聲好左好多添！！
唔係掛
尋日我勉強仲可以唱 "我不會唱歌"　(一路拜山一路唱...)
今日一上高音就走音
連 A 都去唔到
聽日點唱呀！

死啦, 擺我同黃蜂響中間
即係唔可以 "熬底" 同炒粉O者
對我地黎講, 絕對係一個大挑戰
仲要編到咁鬼死難
睇黎我同佢真係要練到好熟先得咯....

好！
我地要努力！！

>>October 5, 2003 at 4:59:05 PM GMT+8

2003 年 10 月 3 日 星期五 【晴】

重陽佳節
要去拜山, 好慘...
慘既唔係要行上行落
要拜山, 即係有親人離世......
好唔開心
病住去拜山

拜完山, 同家姐去左圖書館
又借 D 聽既野
無計啦
我都無時間睇書
唯有借 D 歌返屋企聽啦

見到有一個新系列的中樂書出版, 有阮喎
立即 Search 睇下邊間館有, 可以預約嘛
點知圖書館都無買到果個系列有關阮的書
無奈...
不過都唔係毫無收獲
起碼發現到一隻 CD 有 "臨安遺恨" 的錄音
仲有 "伊犁風情" 聽添
我二話不說就預約左咯

一返屋企, 連飯都無食就訓左
訓到五點九先起身
但係成個人就渾渾噩噩
都唔記得自己做過 D 乜
淨係記得阿大打畀我
除左同我講左 D 莊務之外, 仲話我把聲好病 (磁性的聲就係病？！)
叫我去睇醫生 (不過正經既野我就唔記得左......)
多謝關心..........^^

要打畀 D Freshman 問佢地去唔去 O' NIT
之前打電話無一個通
打打下忽然唔記得時間, 地點同收費
打返畀阿大, 問返佢 D 詳情
又再打多畀幾個人
總算係有人肯去 O' NIT

真係唔得
要去訓啦
唔訓的話, 我都唔知聽日有冇精神做野
聽日的進度會係 (排名不分先後)：
1. 練阮
2. 練嗩吶
3. 做功課
4. 打電話 (莊務之一)
5. 訓

至於睇醫生...
我相信呢個 Choice 的 ranking 會比我去剪頭髮的 ranking 更低.........

尋日問題的答案
都係畀 D 時間大家諗下
唔好咁快就開估
(其實係因為要訓, 所以無時間打, 亦無心機打...)
知既就留言答我啦

>>October 5, 2003 at 4:14:07 AM GMT+8

2003 年 10 月 2 日 星期四 【晴】

病中吟......

喉嚨好唔舒服
但係其他的活動能力仲十分正常
之前本來要做完份 Exercise
但係實在太唔舒服啦
結果三點幾就訓左
功課！？
聽日先做咯........

晨早起身上堂
除左成日講野唔舒服之外
真係一切如常
但係病的感覺好強

出左尖東海傍睇橋
Joseph 無啦啦叫我地對住條橋寫生
唔係掛？！
D 人淨係會對住花草樹木寫生架咋喎！

寫完生, 返 Poly 開工
做番尋日未做完的功課
做得好順利
但係太多人要 Print 野
搞到我排左好耐隊

遲左少少先落到 Library 門口
離遠看到嘻嘻, 居然佢仲早過我到
真係有 D 唔好意思...

去左巷仔新發食飯
一如以往都係邊食飯邊吹水
佢宜家打 TC 2 打到 二百一十幾萬, 仲差日本仔三萬幾
不過佢打一次, 就破香港紀錄一次
真係佩服佢, 起碼佢都算係響某一方面搵到佢的目標嘛

佢 INFO 寫左："近排鍾意睇樹, 仲要係高果種..."
終於知道點解...
果然係好耐無接觸過佢同鄧某人
完全缺乏對 "呢" 方面的新知

食完飯, 又要上個廢柴的堂
唔係要交陳武份功課, 我真係想走左佢呢堂！
交左功課, 坐響度聽佢無聊
佢成日講書好似同自己講野咁
好似唔係講書, 而係自話自說

如果 Joseph 今日唔係提過佢個名
我真係唔記得原來佢姓丁

講左好一陣子廢話
阿大打左兩個電話黎
同佢講完野之後, 我就忍唔住訓左
橫掂聽唔聽 Dr. 丁 講野都係一樣啦...

訓醒仲未落堂
又聽到佢教一條小學生已經識計的數 (四則運算之嘛...)
只不過用左 D 英文, 簡單問題複雜化左O者
真係好易計
我同 Leo 爭論緊究竟係小三學定小四學四則運算既同時
阿水竟然話唔識
搞到我都唔知點回應佢好....... > . <"

問題如下：
假設你要移動一 D 物料去做野 (e.g. 填海)
你有兩個選擇：
1. 從其它地方運 d 物料到你做野的地方, 一開頭運送 500 m 唔收錢, 之後每立方米的物料運 100 m 就收你 $10
2. 從外地買物料, 每立方米的物料運 100 m 要 $30 (包運費同原料錢)
問題係：你知唔知道你最遠會從幾遠運 D 物料黎做野, 而唔會直接買料呢？
提示：問題同運幾多貨無關, 淨係關運幾遠事
想知答案, 聽日話你知

上完堂, 同小倩去 GI 既 Comp. Lab. 做返今朝未完的野
做做下 Yr. 1 要上堂, 我地走左去大後方繼續做
乜舊年我有讀過果 d 野架？！
點解我會無印象架？
可能我同今年 d 人一樣, 果時都係開 icq, 上網....
都係唔會聽 Nelson 講乜！
但係又無錯架喎！唔係 Excel 都要人教掛！

做到緊張關頭, 無啦啦有電話黎, 仲要問我知唔知佢係邊個
通常我都會話唔知, 從而滿足下果 D 人的願望
竟然係 "魔鬼"？
佢話搵番個譜架, 仲幫我搵埋添
唔該晒呀！！！ ^^
請佢食飯都係值得既
不過...
都要睇幾時得閒

搵唔到 Soc. T 張單, 好彩延左期, 唔係就死咯
搞左好耐, 終於要返 YCO
打畀阿一, 諗住同佢一齊遲返
但係佢今日竟然已經返左去？！

遲左返
簽名果陣, 洪立見到我, 問我上星期有冇返
我話冇, 佢就扣押左我本 "歷史研究"
話坐響門口好悶, 要搵 D 野睇喎...
入到去又有新歌練
"梨園" 好過癮呀
棉花鬼成日都話吳華抄得好出, 未練晒我唔敢講其它野
我淨係知一開頭有一堆十六分好快, 好勉強先 sight read 到
我都係時候要加強我既 sight read 能力咯...

練完食飯, 本來去大家樂, 但係迫爆左
行左去西田果邊 food court, 但係又收晒檔
結果行左個大圈, 去左希爾頓果間 "德興"

返到屋企, 同魔鬼傾偈
先知自己唔記得攞番個譜架
好驚個譜架會畀人虐待添....
> <"

唔可以加重病情
都係多訓為妙 (不過都係點幾至訓)
Zzzzzzz.................

>>October 4, 2003 at 4:26:23 PM GMT+8

2003 年 10 月 1 日 星期三 【晴】

尋日無無聊聊坐響部電腦面前坐到四點半先捨得訓
其間做左一條極其無聊的數 (Exercise 的其中一條, 功課之一)
仲有一條數(都係 Exercise 之一, 不過事後發現計錯, 到宜家都諗唔到點計...)
另一條極其無聊的數 (慶祝某某與某某生日的平均支出, 莊務之一)
同埋一條唔無聊, 但係計到我好唏噓的數 (Revised Master Budget, 莊務之二)
好似好精神咁做, 仲愈做愈起勁添
但係明知今日一定要做到通頂, 尋日都係要去到咁盡
如果今晚捱唔到的話
都可以稱得上係抵死咯....

晨早起身, 竟然唔覺得眼訓
仲好似好亢奮添
今次大鑊啦, 我一定會病咯...
仲可能會病好耐添
上次同呀然講話今個星期之內一定病係無錯架
但係下個星期好似仲要交兩個 Assignment 喎
呢鑊杰啦....

今日真係好亢奮
唔單止砌好份 Master Budget
仲好有交帶咁同 AC 果 D 人話延期交 Interim
好唔正常
完全唔似平時懶懶閒的我的工作態度
睇黎今次都病得幾嚴重

返學咁耐, 今日好似係第一日完全無想訓的現象
凶兆呀~~~~~~~~~~~

食完飯之後開始覺得喉嚨痕
開始病發咯...
如果我聽日真係病左
仲病到返唔到學
係咪可以唔使交 Exercise 呀？
係就唔怕病呀~~~~~~

都係唔寫咁多咯
繼續努力把啦
唔係連半粒鐘休息的時間都無啦

向過三的目標邁進！
只不過...
訓住邁進得唔得架？？

書於12:12am, 03-10-2003

>>October 2, 2003 at 4:07:01 PM GMT+8

2003 年 9 月 30 日 星期二 【晴】

好唏噓, 之前就寫好, 按錯左取消
結果要由頭打過
慘.........

國慶日繼續唏噓
我要加油
但係無錢買油...
唉...........

又要閉門做 Bud
有時都真係幾大壓力
又要趕時間做, 又要驚做唔好
話晒我 Account 都真係唔算太好
做得都幾辛苦, 但係唔放棄得
放棄左, 唔單止自己有影響, 仲影響埋其它人, 影響一個組織
真係會好大鑊
唯有頂硬上啦

迫自己面對現實, 也許是解決問題的最佳辦法
過去我實在是逃避得太多了...

面對堆積如山的 Assignment 同 Exercise
仲有一大堆數
只有嘆一口氣, 繼續努力
宜家我連溫習時間都無, 你叫我點樣過三呀...........

晨早起身, 望到鬧鐘十點正, 咪起身洗面刷牙咯
但係愈諗愈唔對路, 無理由訓咁耐仲係咁眼訓嘛
出廳望下個鐘, 九點正.............
對係時候要同我個鬧鐘 "談判" 下咯.......

一早起身成間屋都無人
係練嗩吶的最好時候
點知一吹, 發現仲衰過尋日
真係好唔得
我真係要加多兩分肉緊練先得咯...

練左一陣
好肚餓, 但係屋企的儲糧已經畀我消滅殆盡
肚餓係練唔到嗩吶架
所以決定唔練, 做其它野

同林美講完野之後, 決定同上面延期唔交 Interim 住
成身鬆晒

做左成日功課都未搞掂 (做左半條咋...)
好失敗
星期五有兩份要交, 聽日唔係又要通頂掛.......

三點幾先有飯食
屋企無人, 我又無錢出街食
搞到我能源都無晒
成個人無晒心機做野
點解平時響 Poly 成日唔食飯都得
但係響屋企, 食遲一陣飯就會好肚餓
完全控制唔到自己對食的慾望
仲係響物理層徘徊....

成日都 "吽" 響屋企
我想出街呀！！！！！！！

>>October 1, 2003 at 2:55:58 PM GMT+8

2003 年 9 月 29 日 星期一 【晴】

昨日做了很多事, 但無乜心情寫日記
今日補記番

Test 又 Test 完, Master Budget 終於交左上去
又要練歌, 又要開會
結果點幾兩點先返到屋企
遲番屋企已經成為開會必然的事
不想如此, 但既然上左莊
就應該堅持落去

上莊的另一個作用
就是令自己係最不能自處的時候有地方可以暫時寄居
如寄居蟹的殼般

現在的我, 比去年的我更不能自處
去年沒有做時 (除了開學的一兩星期), 我仍可以跟不少同學閒談
總算不甚自閉
但現在的我彷彿斷六親般, 不跟其他人說話
每天上課, 總是連話也不多說 (當然做 Group work 例外)
上課後立即離開, 別說閒談, 連正事也不想多說
寧願遲一陣子再說
是逃避, 也是無法面對

以後都不會再…………………
絕對不會
有些事錯一次便足夠
但說到最後, 還是一切隨緣

終於上左第二個 Major 既第一堂啦
唔係上左好耐, 四點三度開始, 五點幾就走
第一堂當然唔會咁快勁啦, 但係我對仔仔同自己都有信心
一定會玩好佢！

要練用 support 吹嗩吶同埋單吐
感覺同唱 Choir 差唔多, 不過要重新練用氣同埋嘴唇, 因為呢兩樣野同我之前諗的有 D 分別
仔仔成日話我嘴唇太用力
我又有 D 問題, 顧得音準又顧唔到單吐, 兩樣都顧, 又顧唔到用氣
總之麻麻地啦
不過第一次O者, 下次應該會好 D 架啦…
其實吹嗩吶個嘴形同吹飲管差唔多O者
得閒多 D 練下吹飲管咪得咯

走果陣先發現要拿支嗩吶返屋企練
死咯…
我都無嗩吶袋, 點袋呀？！
仔仔仲叫我響國樂室地下 “是但” 拿個袋裝著先！
唔係掛！ > < ”
好彩我有帶多個袋.........

都係買返個嗩吶袋穩陣 D

本來仔仔要去宏光, 但係佢話唔想一個星期有四日見到何生
計下計下, 又好似係喎
星期一 APA, 星期二宏光, 星期五 YCO, 之後宏光表演又係
所以佢決定都係見少佢一日, 返左屋企

我連街都唔敢行
背包有好多野都係唔行街的原因之一
手上面支嗩吶係唔行街的第二個原因
一路行返屋企一路驚, 點知會唔會第一日拿返屋企支野就報銷呀！
好彩, 平安回家...
不過有 D 驚唔記得拿走

突然有個念頭
好賤, 但係好想試試
唔知三更半夜無啦啦訓唔著拿支嗩吶吹會唔會被樓上樓下的人怒鏟呢？
我相信我如果真係咁做
"香港彩雲邨交響樂團 (The Hong Kong Choi Wan Estate Philharmonic Orchestra, HKCWEPO)" 一定會為我演奏一首經典名曲：
"少"之聲, 第三樂章："少" 聲四起
聽講成隻歌都係 D 人不停咁 "少" 來 "少" 去
最後仲會以全部人群 "少" 結束
到時一定氣勢磅礡, 萬眾一心O者
^^

>>September 30, 2003 at 3:42:24 PM GMT+8

2003 年 9 月 28 日 星期日 【晴】

又要返學
有時會覺得自己好像活在兩個世界裏


>>September 30, 2003 at 1:09:26 PM GMT+8

2003 年 9 月 27 日 星期六 【晴】

終於到左比賽的今日啦
會唔會緊張, 一起身就一定唔會啦
都未訓醒...

返到 DB 個 HALL, 7A做緊自己野, SMC 打緊鼓, 小談就彈緊琴
除此之外, 別無他人
又話九點正到齊！！！(雖然我都遲左個幾字...)
上到 Stage (個琴響 stage 上面), 同小談講左句生日快樂
我就訓左響小談隔離
實行 "佢有佢彈琴, 我有我訓覺"

到陳沛倫同黃蜂都返到我就醒番
打畀阿一, 佢先 arm arm 起身
睇下隻錶, 都成十點咯
小談都要走 (學鋼琴喎...)
連庇記 D 人都到左阿一都未到, 好似過份左 D 喎...

練練練練練練........................
我同黃蜂都好驚炒粉 (因為成日炒), 大家都好努力練
其它人都算係積極
正式其實今朝過左唔係好多次 (因為打一次真係好辛苦)
但係都算表現正常
所以十二點幾就去左宜豐食飯

食完飯去我, 阿一, 肥仔同 "小澤延" 一齊去揀蛋糕
返到 DB, 之前 BOOK 果架車已經到左
由於要幫陸健斌佢地果組 "香港製造" 攞鼓
時間緊迫, 搞到無時間食蛋糕
唯有攞去文化中心果邊先食
謝子同伍中彥跟車
大伙兒就搭地鐵去

去到中級組都未玩完
我地就係存貨區 HAE 時間, 順便食蛋糕
當然唔少得既係唱 "Happy Corner to U" 啦

唱完之後, 又過左好耐, 終於係時候換衫啦
我地個隊名叫做 "18", 除左有十八條友之外
平均年齡都接近十八
(作架咋, 其實我地成隊最老－－我同阿一－－都係廿歲之嘛, 其他庇記的妹妹仔得十五六歲, 仲要有唔止一個添, 點有可能平均年齡有十八歲呀！)

我地的衣著, 相信係所有比賽隊伍之中最簡陋同 "自然" 咯
一件自製的鼓樂節 T- Shirt (前面有個 "鼓" 字, 後面係我地十八個人的名, 超似人地扶靈的名單咁)
一條長褲 (不過要摺起褲腳到膝蓋)
一條紅色腰幅 (原材料係響 YCO "笠" 既, 本來係一年前何生叫謝子買黎縛鈸, 不過佢都無縛過)
赤腳 (司儀問我地點解要赤腳, 我咪話打鼓要自然同 "放" 嘛！不過事實上, 我地係抄殘波架咋！)

上台之前同謝子研究過, 我地都同意我地唔應該, 亦唔會 "熬" 底
話晒都出過唔少大場面, 有乜風浪未見過呀！
不過出到台, 望到閰惠昌個樣
我都係無啦啦 "熬" 底
無用！！
同我玩 Hugo 果日望到佢個樣 "熬" 底一樣咁無用！

成日炒粉
黃蜂第十八式直頭有一句完全無打到 (佢都唔記得份譜係點打咯...)
我又成日打錯
不過大家都打得好 High, 可能赤腳真係有用 (不過地面如果太熱就 "辣" 死咯, 好彩尾二至玩咋)
但係如果細心留意我隻腳, 我打第一隻果陣對腳係有少少震架....

第一次用非本門樂器比賽
(三弦我都唔算唔識, 話晒朱老師教三弦, 唔勁都偷到 D 師嘛, 反而鼓就真係自學啦)
實緊張啦
比完賽之後, 大家都有 D 擔心入唔到決賽
不過 "勝固欣然敗亦喜"
入到係僥倖, 入唔到都正常呀
咁多問題！！
不過起碼我地知道有乜問題, 都算係有無限的改進空間
點解無限？？
你識 Maths. 就知啦...

比賽完左
無啦啦見到文姐
佢話 arm arm 睇完大峽谷喎...
但係好似做左好耐咯喎......

赤腳踏中香口膠...

等左好耐, 東方終於都有車咯
尋日就話得兩個位, 今日特登 BOOK 東方, 就係貪佢有五人車坐
我, 阿一, 謝子, 陳沛倫同伍中彥五個一齊搬番 D 鼓番觀塘四擊頭總部
陸健斌畀左條鎖匙謝子, 我地就上去佢貨倉
搬完鼓之後, 玩左一陣 "煎 Pan 打毽"
超過癮, 大家從打得一下起兩下止, 到打到玩花式
真係要引進呢個遊戲去 YCO 玩先！

玩到六點半
大家出返旺角
收到 D 小道消息.......

去左 pizza hut 食飯
大家太窮, 結果叫左兩個二人套餐就算
但係我地有七條友....
好肚餓.............

食完好快嗌埋單, 張單黎左之後又唔想咁快走 (因為實在太疲累啦)
於是 SMC 就收埋張單響枱底......
大家繼續吹水
吹吹下無啦啦黃蜂頭頂有水滴落黎
仲好似落雨咁落, 落左好耐, 搞到佢勁無奈
肥仔以為我地好似玩 "泥 + 輪" 咁玩佢 *, 已經笑餐死
知道真相之後, 佢更加笑到收唔到聲

* SMC 話有次 YCO 練野, "泥 + 輪" 訓著左
有人就倒 D 水落佢個頭度
"泥 + 輪" 更係醒左啦
但係佢想追究責任果時, 全個吹管組都望下佢, 然後望下天花板
扮晒係天花板漏水咁
搞到佢勁 ON 居咁望望個唔會有水滴落黎的天花板 (因為冷氣機同佢頭頂差十丈遠)
然後一面不解 + 茫然咁扮無野
非常搞笑　^^

食完又去 Cyber 打機
返到屋企又十一點啦！！

聽日要 test, 點解我仲有咁多時間寫日記寫到接近十二點呢？！
唔知呀, 聽日先算啦
不過聽日又要 Aud 人, 無乜時間溫書
今晚都要畀心機溫溫佢
唔係就過唔到三啦！！！！！

>>September 29, 2003 at 10:24:17 AM GMT+8

2003 年 9 月 26 日 星期五 【晴】

今日星期六
一起身都成十一點幾十二點
食左個飯就出左去攞錢, 攞完就返 DB 練野
今日係 Final Rehearsal
聽日就比賽啦
好緊張添...
話晒都係 Final Rehearsal, 遲到都好似唔係幾好
不過最後都係遲左 D D
好彩阿一仲遲, 唔係又畀佢話我遲到就唔好啦！！

又要去銀行攞錢, 都係無咭好
唔係一定畀我"手禁" 晒 D 錢出黎
好彩銀行未閉門, 唔係就無錢畀
不過成日響戶口透支都唔係辦法
都係需要一份輕鬆的工作, 好似教下琴就最好啦
(因為真係好想教琴, 又有錢收, 又可以感受下將經驗傳授畀其它人, 感覺會好好, 同齋講野畀人聽唔同, 因為真係變成左師徒, 經驗係唔會間接傳授, 而係直接講述, 會有效好多架！)
再唔係精補中文中史都得
如果各位讀者有好介紹
歡迎來電：98578702 同萬先生聯絡啦
佢會同我再聯絡架啦！

講就講兩點出現
但係都係兩點幾三點先齊人
練左一輪, 我地就去左四擊頭總部 (觀塘某工廠大廈)
又名羅行良同陸健斌個貨倉
做乜？
問左佢地借鼓, 宜家要去攞嘛！
我, 阿一, 伍中彥, 黃蜂, 同陳沛倫五條友搭地鐵去
約左貨車司機六點九到, 但係我地都係六點九先去到
於是極速去搬野
無啦啦謝子打畀我地, 話幫我地叫外賣
我費事煩, 就同佢講 (其實係伍中彥轉述我的說話畀佢聽) 全部都要乾炒牛河
但係一收}�, 阿一就話想食其它野...
無應

結果我地差唔多七點三先至搬完 D 鼓上車返 DB
由於架車得兩個座位, 所以得我同阿一一齊跟車, 佢地就搭地鐵返 DB 準備第二輪練習
阿一響車度同我講 D 令人覺得好唏噓的事
不過算啦, 聽日都比賽咯
大家團結 D 咪得咯

小談聽日生日, 本來會買生日蛋糕賀佢
不過時間緊迫, 都係聽日至算！

開始成型啦！
有齊所有鼓效果真係同平時好唔同
真係有氣勢好多
感覺亦都強好多
大家都唔錯
除左有人未背到譜, 同有人成日打錯野 (當然, 我都一定係打錯野的永遠榮譽會員之一啦)
都可以話呃到人
但係過唔過到骨, 就要睇聽日咯...
聽日如果表現正常的話就唔會有問題啦！

至於聽日的服裝
聽日的日記就會講架啦
請密切留意聽日的日記

去左許留山食 $12 定食！
真係幾平幾抵
絕對係優惠推介！

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
國慶日補記：

頂！！
又寫漏野啦！
都話左唔好夜 "媽媽" 寫日記架啦
仲要等之後要 TEST 果日先寫, 實寫漏啦！

是日夜晚去完許留山食 $12 定食之後
我, 阿一, Grace 同小談一齊搭地鐵
我地好好人咁送小談返太古
無計啦
佢 28 號生日嘛
一到 12 點, 我地就同佢講生日快樂
肥仔仲起勢咁搞佢個頭添！

到左太古, Grace 走左
我地三條友就響月台吹水
點解咁無聊？！
因為下一架車要九分鐘後先到
阿一都話未試過

終於有車啦
但係阿一都係好唔開心
因為本來佢想去九龍塘轉車, 但係架車淨係行到彩虹
肥仔聽到都頂左一聲 (無計啦, 佢著鑽石山嘛)
淨係得我覺得好開心
梗係啦, 又可以返到屋企, 又睇到兩條傻佬無奈個樣, 真係好好笑
阿一九龍灣就落左車想轉巴士返沙田 (但係佢最後要搭的士....二百幾蚊呀！)
肥仔就同我響彩虹落
順便攞十送一的免費車票
之後我就行返彩雲的屋企, 佢就行返佢鑽石山的屋企
行死佢....^^

>>September 30, 2003 at 4:06:05 PM GMT+8

2003 年 9 月 25 日 星期四 【晴】

晨早返左 POLY
少少眼訓
尋日做左成晚, 終於搞掂份 MASTER BUDGET
話時話呀, 真係有 D 感動
不過之後又要交 INTERIM, 又要做數, 好灰...

永遠都係 hae 時間的 Eng. Sur 堂
真係令我非常無奈
條友又廢, 教書又唔掂, 直頭衰過廢 "墟" (F.4 & 5 被佢教 MATHS, 簡直係令我失手的主因)
今次呢科都睇怕凶多吉少咯...

上完之後, 走左去 Print 野同做 Budget
尋晚竟然無 Send 到去我個 E-MAIL 度, 結果又要做過...
好彩都記得改左 D 乜, 仲發現尋日計漏左野
加埋 D Quotation 落條數度, 都成六點幾
但係 YCO 好似六點半開始喎....
最係份野都係交唔到
早知就等埋星期一先至影印啦
咁就可以等阿然攞張公家影印咭嘛！
我用左廿幾三十蚊去影印呀！！　＞＜"

同阿一, 林澤延, SMC 同黃蜂一齊由旺角出發去 YCO
黃蜂五點半由香港仔出發, 六點四五先至到旺角火車站
塞左成個鐘, 超慘...

返到 YCO, 又玩鶴？！
有人覺得鶴無女媧補天咁好聽
我就覺得鶴好玩 D 咯
無論從音樂的形式, 又或者從音樂的組織
關迺忠都真係好好
係佢 D 概念成日都係差不多先至唔好之嘛！

何生指指下, 指到個 Timpani, 居然無人響個 Timpani 度
之後陳沛倫先至彈起身
何生望著佢地敲擊個樣真係好無奈, 成個欲哭無激樣出晒黎
真係陰功...

希望胡晉僖星期二真係得啦
唔係我都唔知我幾時先可以開始 Double Major...

>>September 27, 2003 at 6:29:24 PM GMT+8