2004 年 1 月 12 日 星期一 【乍雨乍晴】

比尋日更凍
就算黃宜洲係響西貢既山南部份
但係對住個海吹十幾粒鐘都真係有 D 寒

朝早未到八點就醒
個 camp 既g食真係差到無人有
D 野食居然永遠都係凍既！

由於朝早我地未使落船做野
我地都係響房度玩
借左部電視畀其他組打 PS 2, 所以無得睇電視
一路打牌一路聽收音機
打打下我見攰就返房攞 CD 機聽
仲見到有人攞魚杆去釣魚添！

食完晏就開始上船
由於之前兩組朝早上船 set up 左好耐
搞到做唔切
下晏做既另外兩組 (包括我地) 都有 D 驚做唔切
我地組由 Nelson 負責, 另外一組由 Nick 負責
講真, 由 Nelson 負責照顧我地, 我真係有 D 驚佢
佢唔掂不特止, 把口仲好衰
可能會愈幫愈忙....

上到船, D 野之前果組 set up 左無拆
所以我地好快就可以開船出海
講左咁耐, 都好似無講我今次去 camp 做乜
我地今次要量度黃宜洲對開海面既水深
順手仲要做埋一幅地圖出黎畀人睇
聽落好簡單, 實際都好簡單
但係就涉及數十萬的儀器
好驚 D 儀器跌落水添....

做得好順利
順利到有 D 出奇
反而另外一組有問題
要 Nelson 跳去第二隻船幫手
我地就九條友自己搞掂個 Project

揸船既阿嬸今年成七十幾歲
但係就畀我地左一句 "靚姐", 右一句 "靚嬸" 搞到好歡喜
仲同我地有講有笑添！
好開始呀~~~~~

做左幾個鐘
不停來來回回行直線
行到個個都木口木面, 好攰呀~~~
早知帶 D refreshment 出海啦

做左大半, 個 GPS 無啦啦停左
(本來我地架船一路行, 個 GPS 就會顯示我地既 Position 不斷變緊)
無電？！
由於另外一組做唔到 (電腦問題), 所以好慷慨咁借左兩舊電 GPS 既畀我地
換左電, 個 GPS 既數都係唔變
搞左一陣, 先發現唔係個 GPS 無電
係控制 GPS 個操作器無電
要返黃宜洲換電
咁我地咪可以順手攞埋 D refreshment 上船？！
yeah~~~~~~~~~~~

上到岸, 大家都迅速飛返房攞野
再次開船既時候, 我地已經係兵精糧足
準備再戰江湖咯
我帶左本 "紅樓夢" 同部 CD 機
珊就帶左 D 野食
Andy 就帶左部 MP3 機 (有聽, 但係主要用途係用黎 save data)
小倩就帶左部 Game Boy 上船
正呀~~~~
結果無耐就變左我同 Andy 一齊玩 "Super Mario" 咯....

今日做得非常順利
基本上做晒所有落海既 field work
除左攞海底泥 sample 之外 (唔係唔夠時間做, 係無膠袋裝 D 泥)
咁即係話, 我地做埋聽日就可以安心渡假咯
hee....... ^^

落船食晚飯 (埋到岸都六點咯....)
發現除左我地之外, 組組都硬係有 D 扎手野未搞掂
如無意外, 我相信我地組一定係最快完成既一組

食完飯我返左房, KO 左本 "紅樓夢" 第二冊, 訓左一大輪
醒既時候, 赫然發現已經做完 "紀曉嵐" 咯
好灰...
唯有沖涼
今次終於有較熱水咯.........

沖完涼就上女仔房
基本上女仔房係由一個家庭房改裝而成既
有四張床, 但係每間房都係得三女仔訓
今日既晚間自由活動時間係玩 "猜猜劃劃"
即係畀個詞語你, 叫你畫圖, 使其他組員估到果個係乜字
同 "大電視" 差唔多, 淨係唔可以做作動

玩到兩點幾
好眼訓
又返房數我好開心九千九百九十九次先訓得著

>>January 17, 2004 at 9:37:58 PM GMT+8

2004 年 1 月 11 日 星期日 【乍雨乍晴】

希特勒曾說：
"說了上萬次的謊言, 就叫事實"

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
七點起身
簡直係奇蹟！！
仲要係自己識得醒
好似好耐都未試過咯....

返到 poly 舊 can, 八點左右
我果組有兩三個返左去
明明之前果晚約好 8 點架嘛
我都起到身, 都仲有人遲....

響舊 can "老 lub" 左六隻杯 + 六隻叉 + 兩個碗
用途分別係：
杯：漱口, 飲用 (因為好似入邊無杯用), 沖野飲 (當然係我至愛既 "竹蔗茅根精" 啦)
叉：仲要問？梗係食杯麵啦！
碗：除左杯麵同碗麵之外, 我地仲買左一堆麵, 好似福麵等等, 因為無碗, 所以要 "lub" 碗

點解我要講 "我地"？！
因為我同左我果組既人夾錢買野食嘛
我果組既人包括：我, 珊, 小倩, Jenny, Geiger, 水, Andy, Stanley
同埋無夾錢既 Roger
Roger 係一個新人物, 容後介紹
今次買既野食可謂種類繁多, 真係驚出 camp 都未食晒
計有：
熱食類：無限量杯麵, 碗麵；
冷食類：薯片, 蝦條, 麥維他消化餅...
熱飲類：竹蔗茅根精 (早知佢地買我就唔特登買啦), 夏桑菊, 芝蔴糊 (?!)
冷飲類：菊花茶, 檸檬茶, 維他奶, 麥精, Cream soda.....
響舊 can pack 野
足足 pack 左四大箱野食

去到平常等車既地方 (Block X 樓梯)
見到一個新人物, 之前未見過既
佢叫 Roger, 係 Defer 左一年既 HD 學生
問佢做乜要 Defer, 佢話要考過 AL
但係又為乜唔 2nd sem 考而要 defer
佢既答案竟然係："交左學費佢先話唔畀退錢, 咁就梗係讀啦！"
明知想 defer, 仲交乜學費呀~~~~~

同佢由 poly 出發前既等車時間
傾到入黃宜洲都仲未傾完
佢都真係幾健談喎....

入到去
發現果度唔係好收到電話
大家立即攞出佢地既電話猛咁好似攞左個 "羅庚" 咁四圍 "堪輿"
希望搵到個好位收得多 "格" D
我都唔例外
但係屋企又無人聽電話
最後我搵左阿大黎試機

食第一餐飯 (晏)
有無搞錯！
唔係好熱既飯
外加好凍既 "送"
食到人 "(食) 慾念全消"
好彩有四箱野食o者...

由於係第一日既關係
所以都係一如以往咁無即時做 field work
主要都係做 D 分配工作事宜
所以我地都好得閒咁玩
今次個 camp 唔同上次
可能 Nick 份人好 D, 所以我地都當今次既 camp 係度假
大家各自帶備玩樂既物品, 包括：
1. 麻雀 (必備行裝一)
2. 啤牌 (必備行裝二)
3. UNO (必備行裝三)
4. 魚杆
5. Game Boy
6. 猜猜畫畫 (版圖遊戲, 容後介紹)
7. CD 機 / 收音機 / MP3
8. PS 2 (！)

今日先玩 UNO 再打牌
成個晏晝就係咁樣等食飯

飯後一路玩 UNO 一路睇電視
剩係得女仔房有電視睇
發現 "鐵齒銅牙紀曉嵐 2" 真係好受歡迎
連平時唔係好睇電視, 又或者睇馬多過睇書既同學都差住睇
有一個唔係好熟既同學, 直情走入黎問："我可唔可以入黎睇 '紀曉嵐' 呀？"
可想而知呢套劇係幾咁受歡迎啦

沖涼
點解個電熱水爐開到最盡, D 水都係咁凍
凍到想死, 仲要今日都幾凍架嘛
沖完出黎先發覺唔記得開熱水
好掛住屋企溫暖既煤氣熱水爐

打牌打到十二點幾
就開始玩 UNO 計分賽
邊個玩到一千分就輸
玩到兩點
結果........
我嬲！
做左天下第一添.....

大懲罰係..............
我變左一粒藍色既無頭怪
(實情係小倩有件連帽既衫, 帶左頂帽, 拉左條拉鏈, 就可以連個頭都套埋)
隻怪獸個樣仲有 D 似精子添！
我唔要做精子呀~~~~~~~~~~~~~~~~~~~~~~~~~~~

夜晚唔係好訓得著
用左做綿羊既方法, 講左九千九百九十九次 "我好開心"
方可悄然進入夢鄉........

>>January 16, 2004 at 2:52:01 PM GMT+8

2004 年 1 月 10 日 星期六 【晴】

執野執左好耐

整野整到接近六點先食早餐

又無去練 choir
遲早畀人鬧死
但係有 D 野, 唔做又唔得
所以.....
都係要去少一次練 choir

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
開口閉口不離美德以及反躬自省等話題是人類的至善
不思反省的人生不值得苟延殘喘

離別的時候到了
我們各走各的路－－我去赴死, 你們去求生
那一條路好走
只有天知道
－－蘇格拉底

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
刺客
曲：劉以達　　詞：林振強

轉轉轉早晚在潛逃
迷亂又倦越去越迷途
往那處那神秘刺客
也必追到

我撲進黑暗地窖
還用夜幕密罩著頭顱
那刺客卻又狂笑殺到
還提著屠刀

它, 它叫孤寂
它又名回憶
它要以過往當作刺刀
我在逃而你那天因何離去
留下我一人狂追
極累極累硬去找節目麻醉
但寂寞又再跟我入人堆
似刺客那刺刀任務是令我心醉
(似刺客那刺刀任務是直插心裡)

怨怨怨知插翼難逃　橫路直路望去是窮途
往那處那神秘刺客也必追到
　
我撲進都市扮繁忙　尋覓熱鬧夜店內埋藏
那刺客卻又狂笑殺到還提著屠刀

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
0:)
You're the angelic smily.

People like you for your kind and friendly personality.
You live every day the best you can and don't take it for granted.
You are someone that can make someone's day a little bette

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
聽日就入 camp 咯
以前入既 camp, 大部份都係開心既
但係今次, 真係笑唔出
之前就算係 O' camp 我都推左
點解？
唔想面對咪唔去咯
但係計分既野唔去又唔得
唯有頂硬上啦..........

>>January 11, 2004 at 5:48:46 PM GMT+8

2004 年 1 月 9 日 星期五 【晴】

照樣係兩點先醒
今日本來要整白屋仔 (AP 道具) 同埋分組
但係我都無去

返到 poly
一開門就見到阿大響度門前面
明明大家都叫阿大小心 D
但係最後佢都係好慢動作咁撞埋度門度
仲要撞到郁唔到
Sorry....

搞莊務先
搵到之前未搞掂既 function report, 諗住上去上面影印
行到門口先醒起無帶影印咭 (原本響 music room 度)
已經覺得自己好蠢
但係行多兩步先記得張影印咭都無錢
咁即係話, 就算我記得帶影印咭都無用
Helen 又唔響度 (上面既負責人, 兼職影印咭增值員)
唉......
好灰咁返 music room

隔左一陣
阿大返黎同我講, 話阿然已經豪左一百蚊落張影印咭度
我心存僥倖咁攞左 D 野上去諗住影印
點知都係無用
張咭得番影一張紙既錢...................
畀人跣左添~~

都無所謂, 橫掂上到去
順便做下其他野
搞左一陣, 都已經七點九咯

練歌
練到十點
之後又吹左一陣水
跟住就返屋企食飯

是夜家庭影院休院一天
專心打機
都係打到五點先訓...

>>January 11, 2004 at 6:37:11 AM GMT+8

2004 年 1 月 8 日 星期四 【晴】

朝早實在太 "早" 醒咯
十點呀~~~~
對我來說真係好難得
但係唔係我想咁早醒
而係又要開會....

開電腦睇下 agenda
見到阿大
佢居然話我今日唔開會！！
我有話今日唔得咩？？
不過要做少少野先 O者...

遲左半個鐘
以為開左會好耐
點知返到 music room
居然見到 BILLY 同關明睇電視！！
佢地一見到我, 就好開心咁講："終於開得會咯...."
ha？！
如果我真係唔返得去, 佢地又唔夠法定開會人數
咁咪即係又要散會....

開會開到自己好唔舒服
唔係精神上, 係肉體上
仲唔小心發脾氣添
sorry...

開到三點半左右
走
要去沙田大會堂排練嘛...
去到沙田, 見仲有時間剩
去圖書館逛左一陣
好耐無試過有呢 D 咁既閒情逸緻行圖書館咯....

尋日既排練, 中阮同柳琴聲部都係得 "一半人" 返
點解要用 " " 呢？
因為真係得一半人
所有坐台入面 (即係右手邊) 既人都無返
搞到無晒 D 二部音效
今晚就表演啦
唔知今晚會點呢？

表演切忌空肚上陣
但係我今日又乜都無食咁去表演
鬼咩！
排小組既時間又咁 arm 係放食飯既時間
練完都無心情食飯咯...

無力彈琴
成日炒

今日係 "台上失準日"
個個都炒粉
其中以響台上跌既問題尤其嚴重
計有：
1. 徐英輝跌左兩次指揮棒, 但係兩次都係跌左何生擺響指揮譜架上邊果枝
　結果要勞動吳慧琪同琵琶第二個女仔幫佢執番
2. "古箏仔" 較較下音跌左個琴栓
3. 無數既譜, 同埋無數團員擺響譜架上邊既場刊

至於其他問題就梗係有唔少啦
最重要既, 睇怕都係梁仁昭入早左一拍咯
佢搞到何生要指少一拍就佢
何生真係曉 "執生", 唔係全人類都死左....

唔止係台上失準
台下既觀眾都令我地好無奈
台下邊算係 OK 多人 (除左右上角有一大個紅色既 "椅背平原" 之外)
玩柳琴協奏既時候, 一大班觀眾因為遲到而遲入場
何生同王紅藝都因此等埋佢地坐低先開始
但係有兩個唔識死既女仔
又唔想坐第一行, 其他地方又無位
行左好耐都唔肯坐低
唔止何生唔耐煩
我地都好唔高興, 全個 hall 既人怒 "啤" 左好地好耐
卒之果兩個女仔咪又係坐左響第二行最邊既位
咁同坐第一行有乜分別....
佢地唯一既貢獻, 就係阻住我地開始

本來我地早就預左要 encore 兩隻歌
"彩雲追月" 同 "芬蘭波爾卡"
明明兩隻都係何生指既
但係王紅藝無啦啦一個人行左出台
搞到大家仲以為佢要自己一個人帶我地入...
係就死咯
果個起拍, 就算何生響度我地都會炒, 何況係佢一個人帶我地入
點知佢一彈
咦？都唔係 "芬蘭波爾卡" 黎既
原來係佢自己既 solo 歌
差 D 落左添....
嚇死....

玩得唔好
正常呀
今年我地都真練得好唔認真
無大問題已經係要還神咯....

完左 concert 我地會埋 "豆" 黨去飲野
去左仙"�林
因為 D 野食又唔好食, 又貴
所以我都係忍住唔食, 寧願返屋企先食野
我, 阿一, 謝, "黃蜂號" 同 SMC 一齊叫左杯 "隨便" 飲
"黃蜂號" 死都要飲最尾果杯
結果我地就飲晒佢果杯野都未到
佢追 call 左幾次, 但係佢杯野既下落依舊不明
一杯又一杯既野飲分別送去其他地方, 但係就唔係 "黃蜂號" 既 "隨便"
等左半個鐘, 最後佢想放棄, 叫人取消個 order
劇情就好峰迴路轉咁, D 職員講就整好
好彩陳沛倫話唔想返屋企, 搭搭下車都響 "帝都" 落車返黎會我地
所以 "黃蜂號" 最後都有得飲野

以後都係唔好去果間野飲野咯....

坐到無聊就散
返到屋企
睇左套 "算死草" 先開電腦
講真, "算死草" 真係唔好睇
不過睇就算啦
打機打到五點先訓....

>>January 16, 2004 at 6:46:29 PM GMT+8

2004 年 1 月 7 日 星期三 【晴】

唔記得訓到幾多點 (大約一點左右啦)
要練歌 (兩點)
之前應承左花姐, 話要借件 "壽衣" 畀佢
(佢話攞件野去古裝街拍 hall 既賀年野喎...)
所以我今朝要響個亂葬崗度 (我間房) 搵番套衫出黎
搵到我一房都係衫
到我搵完出門口既時候已經係兩點幾咯...

返到 poly
好多人對我既出現都表現得好出奇
乜我有話今日唔出現咩...

已經遲到
但係又無啦啦要行出行入 music room
點解？
因為約左花姐響 7-11 畀件 "壽衣" 佢咯...
上到去等佢, 唔見佢
等左好一陣子, 先響燈火闌珊處發現佢
佢做乜要 "哩" 埋呀~~~~~~

同佢傾一兩句就要走
好懷念以前二百幾蚊租 MO 房四日一齊吹水添....

練完大組練小組
都係無得唱 solo
唔可以話唔開心
只係有 D 失望
不過有 D 得意既野玩
又要用假聲唱高音 (唱到 high D 既假音, soprano 先唱架嘛, 你都唔好話唔辛苦....)
又要扮電結他聲 (雖然唔似...)
練到喉嚨都死左....

為左練小組, 我尋日都同何生講左會遲 D 先到沙田大會堂排練
結果遲左整整一個鐘
一如所料, 今日多數都係排同王紅藝夾既歌
佢真係好強
但係夾既團實在太唔得啦

上次朱鳳儀同我講以前 YCO
佢話以前 D 人同宜家都係差唔多
不過佢地以前勁人多
所以搞到 D OK 勁既都變到唔係好勁
宜家既 YCO, OK 勁既人都太少啦
所以 D 唔勁同唔係好勁既人都以為自己好勁
唉..........
好擔心聽日既表演會炒粉添
講到尾
我都係 D 唔勁既人......

練完接近十點 (明明話九點半完架嘛！回水！！！)
好肚餓
今日乜野都無到過個肚呀~~~~
好彩今日唔似得尋日咁, 無人食
陳沛倫同 "黃蜂號" 要走先
淨返我, 阿一, 謝, SMC 同仔仔五條友
去左 "祥哥" 度食
五條友食左一個 $88 餐 + $68 餐
食到我地個個都好飽

$5 可以買到 1 L 維他奶
好抵
所以阿一佢地每晚都去惠康買 (好似賣緊廣告添....)
今晚都無例外
買完我就同 SMC + 仔仔一齊搭車走
一路上我又繼續請教胡爺 D 嗩吶野

返到屋企
家姐佔領左部電腦
我一連睇左兩部 "鹿鼎記", 睇到三點佢都係寧死不屈
最後我都係放棄
訓覺去也...

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
好耐無見過花姐
真係好耐
上次見佢係幾時我都唔記得咯
好似係同佢一齊食飯
同行既仲有.....
佢真係 "殘" 左好多
有 D 令我覺得難過
佢以前個樣好精神, 令人覺得神采飛揚
望到都覺得活力充沛架
但係宜家......
望到佢個樣, 兩隻眼無晒神不特止 (要用把口強行支持佢既精神)
成個人都好似好頹咁
希望佢係趕功課先咁殘, 而唔係..........
大家明啦~~

響呢度希望花姐可以開心 D, 精神 D

>>January 10, 2004 at 8:14:37 AM GMT+8

2004 年 1 月 6 日 星期二 【晴】

今日係充實既一日

晨早既時候
我係床上面, 隱約聽到 "晨光第一線", 再隱約聽到 "風騷快活人"
但係我起身既時候, 好似已經開始播緊 "娛樂滿天星" ＊咯....

＊以上三個都係港台第二台既節目名
播放時間如下：
"晨光第一線"：0600 - 1000
"風騷快活人"：1000 - 1300
"娛樂滿天星"：1500 - 1700

無獎問答遊戲：
究竟我幾多點先醒呢？？？
(答案在本頁內)

食午餐既時候係四點半
接近六點先出門口
睇左一陣施政報告直播
年年都講咁上下既野
董生唔悶架咩？
不過再無 "假大空" 地拋 D "八萬五" 既計畫
都算係踏實 D

好早返到沙田 MO
太難得啦
準時呀~~~~~~~~~

仲有三日 (計埋今日) 就表演
但係仲有 D 地方自己唔滿意
好
要響剩返既時間 KO 左佢！

徐生有徐生指
我地自己有自己玩
都好似唔係一朝一夕既事咯
今日都無例外
要學指揮
幾時都係偷何生師好 D....

執野既時候
個個既反應都好自然
問我："係咪要出中阮呀？"
實在太好啦
MO 唔出琴既政策咪又係畀我搞到名存實亡
hee....^^

何生問 "小澤延" 出唔出表演
ha?!
乜佢唔係因為 "小澤延" 唔出先搵 "丹素華盛頓" 架咩？！
結果 "丹素華盛頓" 攞左佢部電話打畀 "小澤延"
與此同時, 何生就猛咁講唔知 "小澤延" 想點
好衰唔衰佢成日叫 "小澤延" 做 "林延澤"
搞到我忍唔住咁狂改其他人既名
好似 "黃蜂號", "徐輝英", 甚至係 "何川文"......

有 D 唔尊重何生添
不過.....
真係忍唔住笑！！

本來去食飯
同行既仲有阿一, 謝, "黃蜂號"
"黃蜂號" 就晨早話佢係陪我地食
點知行到 "祥哥"# 附近
謝就話返屋企食
連聽緊電話既阿一都話唔食
咁即係要食既得我一個！！！！
結果........
四條友都無食野

去左 "新基地"
仲畀我地發現左因為聽日考試而早走既 APA 學生梁仁昭添
聽日考英文
後日考 The History of Western Music
都係幫佢祈定禱啦

# "祥哥" = 張 "桌" "長" = KFC
點解？
佢個樣似山德士上校嘛.....

返屋企, 搵野食
咁 arm 阿媽整左蘿蔔糕
煎左 D 食
當時為十二點幾
因為家姐要用電腦, 搞到我無得打機
又見一個人響廳度食野有 D 悶
於是一路食, 一路開家庭影院
今日既節目係：The Lion King

好既卡通, 點都唔會令人覺得悶

睇完辛巴, 家姐要訓
我終於可以用機咯....

一次過打左幾日日記
好痛快！

>>January 7, 2004 at 7:30:30 PM GMT+8

2004 年 1 月 5 日 星期一 【晴】

唔記得發生過 D 乜添！！
都叫左自己唔好隔咁耐先打日記架啦！！！
又唔見左 D 記憶啦！！！

唯一記得既係
我今朝兩點幾三點先起身
之後發生過 D 乜我就真係乜都唔記得

頹廢既人生
無用
夜晚又係勁夜先訓
不過早左
三點幾就訓咯
點解？！
都係因為打機 O者.....

>>January 7, 2004 at 7:01:51 PM GMT+8

2004 年 1 月 4 日 星期日 【晴】

朝早八點二起身
好耐都無試過咯
雖然明知夜訓要早起身係好困難既事
但係我尋晚 (今朝) 都係六點先訓
無原因
純粹係為左打機.........

真係為左打機？？

今日上 DB 追思老麥同 Fisher
講真, 除左畀老麥教果班既感觸會特別多之外
響其他人既眼中, 佢咪又係普通既一個老師
做老師有時真係做得幾悲哀
無乜人會尊重
就算係有學生攞到 10 A (會考) 或者 5 / 6 A (AL)
都只會話係學生既努力 (雖則更悲哀既事實......係！)
但係如果考得唔好
死貓一定預埋老師果份

不過一句講晒,
老麥既教書方法係唔抵幫既....
佢係用晒佢 D 時間響學校
但係主因係佢 D 時間無乜其他地方可以用...

佢臨死都堅持要教班會考人
都真係令我好感動
仲差 D 令我對佢印象改觀添

Fisher, 全名係 William John Fisher
係 58-59 年既 Senior Prefect
又係 old boy, 又係老師
佢真係對學校好長情
一個人, 對左同一個地方半輩子
居然沒有絲毫的厭棄
還要面對著一群......不, 是無數群如狼似虎的學生
經常戲弄他, 取笑他
但他仍是笑容可鞠地繼續指引我們
退休後的他仍是退而不休, 當了補習老師
有人問他為何不休息
他說："我喜歡教學生！"
這一句話, 好像已經足夠了.......

追思會後
"引誘" 左肥仔同謝走堂落新世紀食飯
食完大家就各有各散
肥仔同謝要上堂
阿一要同人覆診
我？！
開會去也！！

一點既會
我一點三先返到
但係實際上一點半先開始
所以話我遲少少先返係明智既

開到四點半....
不愧為長命會
突然發現今次已經係第卅一次會
半年開左卅一次會
都算係紀錄！

原來 receipt book 無改過價錢
畀 Helen 呃左！
仲要呃左我成半年！！
咁話佢衰好呀, 定話我蠢好呢？？

練歌
但係練練下我去左還書
遲左幾日啦！！！

食飯
食完飯又要返 Music Room 揀相
揀到兩點幾先走

>>January 7, 2004 at 6:57:25 PM GMT+8

2004 年 1 月 3 日 星期六 【晴】

繼續玩自閉
個腦完全無郁過

又無去練 choir

>>January 6, 2004 at 6:18:25 AM GMT+8