2007 年 2 月 21 日 星期三 【雷雨】

真係唔知點解，一踏入2007年，開機上網既意欲低左好多，寫blog既意欲幾近零，真係好誇張，所以搞到每次開機都要追返晒d email同blog，老實講，blog我都少睇左好多，好似冇乜興趣去睇咁，真係好奇怪！可能06年發生得太多事，搞到我有d anxiety disorder，interrupt左我ｄ「日常生活」！

又過年啦，真係轉下眼又一年。我始終懷念以前細個時既農曆新年，覺得有氣氛好多，近年真係hea過，今年都好返ｄ，市道好左，而且屋企最近要沖喜下，所以搞多左次拜年，不過可惜我利是收入少左大半！

年初一(2月18日)凌晨先出發去維園行年宵，真係多人到呢，完全行唔郁，我估唔到行到凌晨4點幾都仲可以咁多人架囉！
今年學雞仔話齋係吹氣公仔既天下，真係乜吹氣公仔都有：吹氣較剪腳、吹氣天星鐘樓、吹氣珍寶珠、吹氣米袋......真係唔知買來做乜，令到我買野既意欲近零。

上星期三(2月14日)，樹仁大喜日子，邀請左曾蔭權、李國章上來為校名牌匾揭幕，港大校長徐立之都有來，而預左既示威場面都有，長毛梁國雄既社會民主連線，就要求徹查教院遭干預學術自由的風波又要求普選，另外的街工則要求將政府合約員工轉為長工。
當晚，要做Psychological Assessment的presentation。聽聞Edmond好滿意，仲超出預期，真係「飲得杯落」囉！另外，點解佢會一睇就覺得我係CEO架呢，好奇怪！
做完presentation，落到銅鑼灣已經夜晚9點幾，雖然見到「街裡愛人一對對」，但我一d都唔恨囉，不過要搵個位食野就真係好難啦，唔係拍拖大晒架話，攻陷成個銅鑼灣每一個食肆，搞到我要買外賣M叔，「違例」在巴士上進食囉！

星期一（年初二）晚，睇香港電台《鏗鏘集》，講個大學生（同校既添！）係咁追名牌，係咁藉買野來「慰勞」自己，又話要型要剩，令我諗起現時某位同學（都係男仔），真係完全一樣性格，講一樣既野囉，諗起都好笑。

2007 年 2 月 4 日 星期日 【晴】

誠蒙陳鈞瀚同學所託，我要0930到SJC，真係好耐好耐冇咁早出門口過！(想像唔到陳同學居然係可以大聲到，仲要係相信成間學校都聽到果隻！)

對上一次參加Green & White Day係2年前，130th Grand Open Day那個，還記得那場煙火表演。

今時今日的聖糟仔，真係唔同左啦！係估唔到，陳方安生個老公都係聖糟仔囉！

今年的Open Day，多左家長帶小朋友來參觀，以往冇咁多。

同Mrs. Cheung實在太「有緣」，經常撞到佢，不過原來佢教埋呢一年退休，莫非佢副校長之位係「老人牌」？

留在聖若瑟差不多六個小時，其實我一早想走，因為實在太累啦，又未做晒功課，未睇reading，不過同行果個李先生實在唔知做乜咁「留戀在聖糟的日子」，唔捨得走，相信係佢除左以前「被逼」要搞GnW Day之外，係留在GnW Day會場最耐的一次！

2007 年 2 月 2 日 星期五 【颳風】

轉眼間，咁就來到2月，時間好似過得越來越快咁，以前都唔會覺得咁快，bang bang聲又一日，打個乞嚏又一個月，人真係會好快老。

屋企近年都有養魚。上星期五（1月26日）左右，發現左兩條神仙魚生左一堆魚卵，好快呢幾日已經變左魚仔，好多好多，相信有近百條，細細條，透明，見到細過蟻的眼仔，好得意，似蝌蚪仲多過魚仔。屋企突然新年前夕「增添新成員」，真係好意頭，年年有「魚（餘）」。

今個星期初，亦都收到壞消息，我既大姨丈係上星期六離開左我地。仲好記得，去年8月，專程同佢去左伍華中學對面果間唔知乜名既酒樓飲茶，佢雖然已經病緊，但仲好有力氣同我地傾計，真係估唔到唔夠半年，就以後再見唔到佢啦！媽媽話大姨丈曾經同過鍾景輝拍過戲，好勁架！唉，我真係好擔心，咁快來到我對上果一代，越諗越驚。

>>February 5, 2007 at 2:35:59 AM GMT+8

2007 年 1 月 27 日 星期六 【乍雨乍晴】

原來我已經有差不多成個月冇寫過blog啦！這的確不是一個好blog－因為沒有經常更新。日記變月記，勁！

唔知點解，其實由1月1日開始，開電腦同上網既意欲忽然低左好多，莫非忽然戒甩左「上網候群症」，而且不藥而癒？

連開電腦既motivation都低左，唔好講話開機寫blog。的確，無可否認，忙到好stressed。一個星期的sem break，絕對唔夠！

一月頭既考試，老實講真係冇心機去溫，基本上可以話冇溫過去上戰場，唉，最驚係school coun份卷，做唔切勁多！

RP，till now，我仲未寫，唔好講話交，大獲！

今年決定唔跟佢地去西安，原因有好多，最大原來係唔想一返到來就開學，毫無心理準備。我上個sem可以講話係徹徹底底既loser，任何一方面都係loser，今個sem我要收回失地！

尋日終於有幸同著名傳媒人梁天偉教授「傾談」，Prof. Leung真係好好人、好nice、好helpful，好感動，如果我一早係佢既學生，咁就好囉！......唉，不過好可惜，時間唔岩，夢碎啦，我相信我冇機會再take到journal dept既科啦......

>>January 27, 2007 at 12:33:20 AM GMT+8

2007 年 1 月 1 日 星期一 【炎熱】

2007年1月1日星期一，一年之始有三條一，又係一個好既新開始。

回顧06，有得有失，不過不失。

展望07，從新來過，希望有目標，希望收復失地。

以前細個有目標、有planning，所以都叫成功；後尾衰左，都係因為迷失左，冇晒目標，亦都冇晒planning。

2007年1月1日星期一，為自己定下目標，捉緊planning，向著光明大道進發。

2007♦大放光明

2006 年 12 月 27 日 星期三 【颳風】

昨晚Boxing Day 20:28，台灣南部海域發生多次強烈地震，震斷埋海底既6條國際通訊電纜，導致本港以至東亞地區連線至美加的IDD、國際漫遊及互聯網服務幾近癱瘓，料5-6日才能修復。現時絕大部分美加、日本、台灣地區的網站都不能連線，互聯網供應商已抽出全數後備通訊電纜應付需求，但由於頻寬不夠，網絡大擠塞仍有發生。

ICQ、Yahoo! Messenger於晚上恢復連線，惟Live messenger仍未能連線。聽電台好多人都話上網上唔到，又或者激慢就好似56k年代。好彩我用左香港寬頻bb100，先至上網冇咁慢，大概速度去返10M度啦，真係唔能夠想像如果用6M果D會搞成點。（好似宣傳稿，但係事實）

>>December 27, 2006 at 11:16:23 PM GMT+8

2006 年 12 月 26 日 星期二 【颳風】

聖誕節，今年真係過得好開心！

首先要多謝Toto同Vito寄來既聖誕卡！Toto每年都有寄聖誕卡來，從冇間斷過，真係好有心，咁好兄弟當然要畀返10個咀咀佢！ lol, just joking.

多謝Ada的SMS，同埋居然收到一個學生既家長send來的christmas ecard，佢就係天天的爸爸！

多謝芷芷表姐send來的「搞笑」sms，有d surprise!

多謝爸爸送給我的中巴Q版模型！wow！我而家有一架城巴、一架中巴啦！
多謝媽媽送給我的毛毛熊，她聲稱在「環球嘉年華」玩攤位遊戲贏返來，咁我屋企又多一個新成員啦！
（巴士模型與毛毛熊都是我的最愛，雖然這個配搭有些怪怪地）

多謝Toto同Kiu Fung約我係23號食左餐飯同埋「無啦啦」睇左套《新鐵金剛智破皇家賭場》（新007）！真係唔明白，佢點「智破皇家賭場」，套戲既內容都唔係講新007既目標係呢間皇家賭場，咁「智破」來做乜？套戲有成兩個半小時咁長，成日以為睇完，原來重有，好似睇極都未完咁，其實可以縮短返少少，唔需要有三個平均高度既高潮咁多，兩個已經好夠啦！

多謝Tracy「力邀」我尋日聖誕日出來尖沙咀「感受聖誕氣氛」，重送左份USB light Christmas decoration畀我，真係好surprise，但我冇準備到禮物，真係好唔好意思！......by the way, 尖東果間雲南米線好好食呀，我終於完成左想食「雲南（過橋）米線」取其「過」呢個好意頭既意慾啦！

今年係收到左卡、sms、ecard同埋突然標升既聖誕禮物，真係開心到爆！多謝晒咁多位！

>>December 26, 2006 at 3:25:25 AM GMT+8

2006 年 12 月 20 日 星期三 【颳風】


香港電台《五稜鏡》20/12/2006

>>December 26, 2006 at 3:27:13 AM GMT+8

2006 年 12 月 19 日 星期二 【颳風】

今天是非常特別，而且難以令我忘懷的一天。

今天是我住我那座大廈首次全座電力系統檢查，故此全日停電停水，我趁著day-off，補習時間又夜，家裡又停水停電，正好合時間讓我跑到香港大學圖書館處找尋我Research project需要的journal。管理處寫明9am就會停水停電，我8:30am就起床了。結果管理處在9:15am終止電力供應，我出門時還得行樓梯。

到了中環渡輪碼頭，找到了上香港大學的22S小巴，剛坐在車上，正好11am，車上的收音機和我手機的免提耳筒正傳來香港電台11am的新聞報道，而這則新聞報道的頭條居然是重大喜訊－35年來的努力、10年的爭取，近日風聲甚行的行政會議一致通過香港樹仁學院升格成為香港樹仁大學，成為本港第一間私立大學，真真正正成為一所大學的傳聞，於今早10:53分成為事實！

10:53am那一刻，正是香港電台第一次公布香港樹仁大學名字的確立，也是本港首篇有關香港樹仁大學的新聞消息：樹仁胡懷中副校長手持教統局批文，向學生展示，香港樹仁學院由即日起（今日）即時更名為香港樹仁大學！

11am過後，每一則新聞報道，都是以樹仁成功升格大學為頭條，甚至唯一新聞。我立即使用手機上網瀏覽有線新聞的片段。我人在香港大學的開心公園（中山廣場），心卻把我來港大的主要目的－做好research project－放在一旁，不斷更新任何有關樹仁升格的消息。現在想起來，有點人在「異鄉」，有「隔岸觀火」之感。

老實說，我真的很高興。自2005年JUPAS再次敗北之後，我已經不敢再踏足香港大學，每次去到，也有極強的自卑感，實在很不好受，尤其害怕見到舊同學，被人「寸你幾句」：「點解你會係度既？」。今天，我心情實在愉快、輕鬆，甚至高漲，我心想，現在我跟你們香港大學的學生平起平坐了，我也是大學學士生了，再不是次一等的大專學士生了，我畢業出來，同你們是同級、同地位的！當堂自信了很多，忽然「愛起校來」。

下午，迅速找尋完我要的JOURNAL ARTICLE，見無電腦可用，便毅然決定乘23B回學校一趟，使用那些落伍的電腦做家課去（沒計，家裡停電），順道看看學校的氣氛，感受下那一種感覺。

(手機拍攝相片)

好不容易，4PM左右上到去，邵美珍堂已經擠滿了人，那裡正準備進行「香港樹仁大學記者招待會」，背景場上已經印有新校徽。會場入面已經逼滿學生、教職員，以及所有傳媒的記者（香港6間電視台：TVB、ATV、Cable、now、香港寬頻、鳳凰衛視，也齊齊到場），一片喜氣洋洋的氣氛，人人情緒也十分高漲及興奮。

企左一陣，等胡鴻烈校監正式宣佈更名為「香港樹仁大學」之後，我上圖書館做功課了。到了圖書館3樓，原來圖書館錄起了ATV和TVB的有關「香港樹仁大學」的午間新聞重播，我一下就被吸引住了。看罷，剛坐下來看ARTICLE，心卻又跑到新聞上去。最後決定留到5pm，返家算了。

落到樓下，見到cable做緊錄影/直播，看了一回，撞見calvin與阿7，寒喧了一頓，見到剛畢業的彭國柱，之後急步返家，趕看電視新聞。此時手機終於無電了，第一次充完電後才出街也可以用到沒電。

原本想取消今晚的補習，父母反對，算了，結果又浪費了一晚，我什麼功課也沒做過。惶論說做甚麼盡責的大學生。

2006 年 12 月 17 日 星期日 【乍雨乍晴】

好凍呀！今朝重錄得12度添咋，好彩我匿埋係被竇入面直至下午兩點，結果又係咩都冇做過。

尋日75 enrollment，一早11am返左去。後尾得知搞唔成個christmas party，有d失望。星矢話要再搞多次，希望搞得成啦！

成間英華full of people，好有返做個中學生既感覺。原來柏良仔係3樓上緊maths course，我冇去到3樓，只係係地下、一樓、五樓同小學部周圍走。個一早被人book左既Noble Hall原來係畀左PTA搞dinner，柏良仔又有去，但我朝早同夜晚都同佢身處同一個地方都見唔到，冇緣，哈哈！

朝早冇野做，好彩我帶左Research Project既journal來睇下，但真係悶到嘔電，再加上一樓好凍，睇睇下頂唔順，寧願周圍行下好過。

著名的英華小學「天王天后」專業教師形象

今日個天真係好靚、好清。
日落時，我仲特登跑上六樓影呢張相，真係好靚呀！
影完，拎轉頭，葉Sir：「好靚呀！所以話：夕陽無限好。就係咁解啦！」