2005 年 5 月 15 日 星期日 【酷熱】

好熱呀！

Final將至，仲未溫過書，點算？好似好多野溫喎，唉~

2005 年 5 月 14 日 星期六 【晴】

經過一番討論和細心分析、權衡之後，我決定了負起責任，而放棄一己情慾，我認為絕不能以個人一己私慾而不負責任並且置人於不顧。我要做一個「肯承擔、負責任」的真正男子漢大丈夫，履行一個男人，一個成員應有的操守，要做一個好榜樣給一班小男孩們看，教導他們什麼才是真正的男人！（好像誇張了點，可我是有一些少抱負）

心裡很感謝Alex、Eric和Jason (in alphabetic order)的意見，他們令我把屈左心裡差不多一個月的矛盾衝突釋放。頓然覺得輕鬆不少，有心情溫習了！（比OTO e足健好像還厲害似的）

>>May 15, 2005 at 11:24:02 AM GMT+8

2005 年 5 月 9 日 星期一 【溫暖】

呢幾日真係多事幹囉~~

今日係天文台連續第二日發出黃色暴雨警告。在下午十二時，天文台在葵涌區錄得風速達強風程度，陣風更達十號颶風程度既風速。強勁既風速令到位於葵涌及青衣的貨櫃碼頭分別發生貨櫃倒塌壓毀貨櫃車的悲劇，另外亦發生多宗棚架及大樹被吹倒的事件，其中窩打老道的塌樹、亞皆老街的塌棚架及太子道東的危險招牌要分別全線或部分封閉，令到九龍區交通癱瘓，有報道更指窩打老道的龍尾一直塞到香港仔隧道口！有新界北區居民指見到龍捲風，但未被天文台証實。

香港考試及評核局忽然宣佈2007年更改香港中學會考的中國語文科評核制度及課程。新的會考中文科將取消「填鴨味甚濃」而且只靠背誦課文而非測試考生中文能力的「讀本問題」部分，教師可就學生喜好而選擇文章再指引他們導讀。2007年的會考，中國語文科會分5張卷，卷一是閱讀能力，卷二是寫作能力，卷三是聆聽、卷四是說話能力，卷五是綜合能力考核。公開考試部分佔總分80%。而新加入的校本評核部分，則佔全科分數的20%，情況有得似高考既中化科。評分方面，屆時中國語文科亦會同會考英文科一樣以水平參照代替拉曲線，評級由1至5級，以5為最高，1為最低。
在新的會考英文評分，我都拎到第5級喎，而中文既新考法真係岩晒我，我實會考得高分過2002年果年囉，就以我2004既中化為例，如果我係新會考係有同樣水準，我都拎到第5級呀。真係好想考多次，考過個新既中文會考添。對我來講真係唔公道啦，但係都好既，起碼考評局知道有問題，仲識得去改。我十分支持今次新既考試改革！

5月7日同5月8日，好享受一個我從未experience過既感覺同感受，勁like，i'll do my best！好想快d到果日，好期盼著起件衫既時候果種感覺！不過呢樣野真係開心入面有d煩，唉！魚與熊掌不可兼得，原來真係咁辛苦架！

>>May 9, 2005 at 11:36:58 PM GMT+8

2005 年 5 月 5 日 星期四 【綿綿細雨】

呼了一口氣~~~~

成了，終於完成了！

很有成功感，縱使非常非常辛苦！

通頂完成4000字《孟子》論文一篇，我講「浩然之氣」～真係有呢樣野架......唔信就拿本《孟子》來睇！以及要重新寫過既Bio Psy Individual Section。忽然覺得自己「好叻」，居然一晚可以做咁多野！

似乎差不多已經清晒手頭上堆落來既功課啦，真係輕鬆不少呀！

等好天少少，我要練水啦.......忽然要考水試......太耐冇游水，都唔知pass唔pass呀，唔pass就勁爆瘀皮啦！

係呀係呀...尋晚做做下《孟子》，大約凌晨兩點幾三點度啦，我間房盞燈係咁忽暗忽明喎，最後仲熄埋添，認真邪呀！都唔知係咪叫我去訓咪鬼做。不過我最後開左盞檯燈來捱埋佢，我一定要今日交呀，我星期五一定唔返呀（為多一日假期：study week）。

好眼訓now，去訓先。

>>May 5, 2005 at 6:55:23 AM GMT+8

2005 年 4 月 30 日 星期六 【陰】

所有的PRESENTATION終於告一段落。留下的只有未完成的review paper、report同埋我掂都未掂過的《孟子》。《孟子》係5月6日deadline囉，頂，我點扯得切果幾千字報告。最弊係我太遲去借書囉.......冇書畀我做reference，只有一本「古籍」同埋一本係兒童圖書館借返來既書囉！

今日上既BUS100(Introduction to Business)，由1350直踩到1810，勁呀！Daniel (Lecturer)為表「謝意」（學生留到咁夜咁「賞面」），特登為上足咁耐既學生另加10分！真係太好人啦！所以今日evaluation梗係寫好佢啦，不過佢係值得既！今日之所以上咁耐，係因為今日係Final Presentation (Business Plan)。我地組「茶良用　涼茶速遞Cha Leong Yung Herbal Tea Delivery」獲得8X分，係第二組高分，最高果組係90分，係肥魚果檔健康食品Cafe。Daniel Sir讚我Presentation係有一手，表現好突出，表現得好好，好convincing。下星期唔駛返lu，有d唔捨得佢呢幾個月既「字字珠璣」既課堂呢！

現在急切需要的是找一份工作，好「養得起」自己。

>>April 30, 2005 at 11:59:27 PM GMT+8

2005 年 4 月 27 日 星期三 【雷雨】

好煩。
好慶。

點解有d人總係會唔講道理，一廂情願覺得佢岩晒，人地點樣都係唔妥，唔順佢昭，佢諗既野就係岩，就係正常，人地架呢就係唔正常、唔岩、唔妥架呢？點解有d人硬係唔理人地感受、唔理人地既處境，佢係咁樣就咁樣呢，人地提出反建議就會meng晒薑咁架呢？我以前就得人太多，我係時候要學下say下no。

我發現，其實好多人唔識易地而處，唔識去有同理心去體諒人、明白人地既感受。好多人都仲係顧住自己果一面，而忽略晒其他既野。呢ｄ可能就係所謂既自私同埋自我中心啦。

今日開始，我又一貧如洗了。身家再度回復之前的狀態（不能用提款機提款的程度）。最無奈的是，看來，我又快再次回復失業（上個學生應該流失定了）失學(等JUPAS)的狀態了。慘在，家中斷糧，認為：「你咁大個仔，自己有錢自己駛，屋企唔會再畀零用你。」問題係：我自己既積蓄已經近零了，而再無收入，我想話，這個星期後，我想我連乘車上學去的錢也沒有了，教我怎麼辦？

>>April 28, 2005 at 1:12:03 AM GMT+8

2005 年 4 月 25 日 星期一 【雷雨】

「穿黑衣的會給人aggressive的感覺、以黑色為主的也給人很aggressive的印象。我剛才想做一個experiment或者observation，想証明一下這套理論是否成立，結果......」Dr. Ip娓娓的道來，目光也慢慢地移過來。「做Parkinson Disease的那一組穿的衣是黑色的，就連那個powerpoint也是黑色的，我很有深刻的印象。那麼乾脆叫他們『黑色那組』吧！.......」

終於結束了Biological Psychology的終極Presentation，只欠的只有其「手尾」－－review paper。"Frontal Lobe-r"做得好好！看來，Dr. Ip也甚為滿意。她的一句精警說話：「你們要為那麼多同學提問而覺得慶幸，因為只有他們聽得明白、學得牢固，才會衍生問題來追問。這也是你們組的優點。可改善之處是：看來可以就著audience的程度而加深內容至談談mechanism的東西，以及最好加一版reference section in your powerpoint。」

令我大驚不已的是，Dr. Ip 居然記得我的名字來！今天，她就經常拿我作解釋例子的比喻。真有點羞愧，之前上她的堂有很多時都遲到......

至於我以問一句："Do you know why it is so special for the Monday two weeks ago, that means the date of April 11th?" 作開場白之用，另又情商一位友組同學Celest作媒代答，令在場各位大笑大已一事，Dr. Ip認為這是一個非常好、運用得當而且很成功的gimmick。對於她的欣賞，真的令我樂透了。

在課堂完結後，Dr. Ip專程走來問我一個「好私人」的問題：「我想問這幅圖是從那裡得來的？」，手指著我們powerpoint的最後一張，圖上正展示著一群人在耍太極。我回答那是新聞片中capture出來的圖片來的，我們原本想播放那段新聞片，可是capture不出來，唯有capture定格圖片好了，另以audio來代替，可惜時間不容許我們播放出來。她繼續興致勃勃地追問，究竟我從那裡得知太極可以幫助Parkinson Disease patients減輕病情，希望我能告訴她reference，事關她正埋首研究著作一本關於太極的好處(something like that)的paper/書。（原來這才是真正背後的目的！）她再補充：「我一聽到你說太極可以幫助減輕Parkinson Disease病情，我真的很開心，但奈何你又沒有cite reference，所以專程來找你，好讓我有supporting的東西告訴人嘛。」，接著，親切地打了我的手臂兩下，就如同朋友之間的行為一樣。我從沒有接觸過如此親切得要命的老師（包括教授），記得上一次如此作的那位，就是Brother Thomas了！我告訴她，那是TVB的新聞片，事實上沒有一份article說過太極可以有所幫助，只是我把最近4月10日千人耍太極為柏金遜協會籌款裡面某醫生的說話跟另一篇談及Physical rehabilitation therapy扯上關係，作為例子罷了。她哈哈地笑起來，說唯有只好寫這是TVB的新聞片，叫他們自己找TVB拿片好了。

最後，我真的很感謝"Frontal Lobe-r"的努力，我們今天真的很成功，真的很令人滿意！個powerpoint做得超好，比起我的還要好，真酷！

>>April 28, 2005 at 1:08:31 AM GMT+8

2005 年 4 月 25 日 星期一 【酷熱】

我累透了！

我的思緒混亂極了！

糟透了！

我有很多東西想說出來，但我又予欲無言。

打從4月6日以來，所發生的事情實在太多，太複雜，我很想靜下來，留給自己多些空間。

人生的意義何在？我雖然去年中化文化篇章有A，但睇來我要再進一步鑽研鑽研。畢竟人與人之間的關係好奇妙，發生過的每一件事、說過的每一件說話，在一刻間你可能想不起來，但它、它和它卻正深深的影響著你。有些時候，在那一刻並不覺得刺痛，過去後才慢慢感受到那種痛楚。也有些時候，在那一刻即時有所反應，過去後，可能又不覺什麼。人有最大的一個缺點，就是：從不懂去珍惜，過去後、失去後才去後悔、才去學懂珍惜，但卻又十分諷刺的是，過了一些時間、發生過一些小插曲後，人又忘記之前的懊悔、之前的承諾－－去學懂珍惜。有一些人，你很想很想跟之交朋友，甚或有更緊密的關係，可是對方不受落；而又有一些人，你不知為何對之存有若干程序之「偏見」，是先入為主或不知何原因的「偏見」，而不欲與之交朋友，甚或想敬而遠之。有些決定、有些說話、有些行為，作出該等行為的那時，可能真的只憑自己一己的意願又或只就事實而做甚或只是出於衝動，卻未有想過後果、別人的感受。

我知道近來我有些行為、說話、表現、處事、態度等等可能出了問題，這是我所頓察的。但我控制不了自己，我有點精神崩潰。我真的很想很想做一陣「隱閉青年」，與世無干，我不想再接觸煩惱，畢竟太多事情正如狼似虎般的向我襲來，我處理不了。我很痛苦，只少我的心裡很痛苦。

我一向很討厭自以為是的人，我一向很憎恨對我不守信用的人，我一向很厭惡把我玩弄於股掌之間的人，我一向不甚喜歡說三道四搬弄事非的人。

不是你很懷疑我的智商，就連我自己都這樣的懷疑。若然智慧真的那麼高，卻又為何次次給人玩弄過後才知道真相，才知道別人對自己幹過了什麼，別人原來怎樣看自己、怎樣把我放在那一個位置。

我看重別人怎樣看我、怎樣說我、怎樣對我，正因為我的童年並不好過，我不知道我做錯了什麼，卻遭人們如此冷酷對待。我一直相信，只要做好自己，盡力做到最好就是了，總有一刻別人會認同你或對你另眼相看，所以我小時候很努力，但卻換來一次又一次的刺痛。記得小時候，年年的生日願望就是：希望人緣好。但很可惜。以為人大了，應該會好一點，只少可以重新來過，卻又再一而再而三地發現人言真的可畏、人心真的難測。並不是只要你做好自己、盡力做到最好就會成功，欠缺的還有其他人的影響力。

我知道現在的自己並沒有把自己做到最好，原因我不想再受到太大的傷害。當你一邊大量付出，而沒有回報或少量回報，但承受大量風險的時候，你會發現你很蝕。這不是自私的想法，而是碰壁過後所學懂的道理－－沒有人會做蝕本的生意。從前的我，來者不拒，受傷害的總是我；現在的我，學懂了企硬，學懂了說不，以欲減低受傷。

很多時，我沒有表露出任何一絲不快、不滿，難道這就代表我沒有腦袋、沒有感覺嗎，我不是機械人，並不是生來給人玩弄過夠，我覺得夠了。當你被別人傷害得多，你就會很害怕再受傷害，對人亦失去信心，再嚴重者，會有妄想被害的跡象，這就形成「思覺失調」。我不希望我會到達如此境地，但有跡象走得近了。

表現開朗、主動的人，未必是一個真的開朗、積極、有信心（無論對人對自己）的人，有可能是物極必反的一種表現。老實說，我是一個極度自卑的人，很多時候，我根本就不能抬起頭做人，我很怕，我很怕別人的目光、別人的觀感、別人的行動。

引用Maslow的hierarchy of needs。我由小到大，只有達到過self-esteem needs一次，但很快就已經退了下來，連social needs都達不到，之後就再沒有超越過social needs了。self-actualization對我來說，太遙不可及了。

我對我的過去很不快，很感委屈，我認為我不應值那麼的少，但事實放在眼前，我只有埋在心裡的抑鬱、憤恨。不要再跟我問及過去，我認為可以說的，我會說出來。在我不願回望的同時，請不要自作聰明地充作代言人。我很想找到自己的理想，尋回自己再也不可能發生的夢。

>>April 25, 2005 at 3:58:39 AM GMT+8

2005 年 4 月 5 日 星期二 【陰晴不定】

今年既4月4日兒童節過得真係好特別...真係好難忘。
我第一次入去醫院度上堂，去睇"CT Scan"同"MRI"既operation，第一次以非病人身份走入呢d醫院「禁地」。
一大清早，驚覺自己遲左勁多起身囉，係度掙扎緊仲去唔去威院好，結果都以9秒9速度出左門口，係九龍塘等果架82M，等到訓著咁滯，隔離一對年青男女係度攬攬錫錫好鬼溫馨，跟住我大概10AM果時見到一個極度貌似謝霆鋒既人走過我企緊既巴士站，行左去搭29A小巴上廣播道，佢行緊過來既時候，我已經覺得佢好似謝霆鋒架啦，估佢會唔會上去廣播道啦，點知真係上左廣播道小巴，會唔會真係謝霆鋒來架哩？哈哈。
我去到威爾斯其實已經遲大到，跟住好急急腳咁找包玉剛癌症中心啦，點知入到去，勁爆多人，上到一樓，嘩，乜咁多人等症既，茫無頭緒唔知果間CONFERENCE RM係邊，問左個姑娘，佢好難得好客氣咁話：「呢......前面半掩門果度呀。」，我依住佢指既方向行，都係找不到，身後有位阿叔（應該係PATIENT來既）問我：「你係咪來聽課架，後面呢間房就係啦。」，雖然勁樣衰，但真係個情景好好笑，佢仲清楚過我咁。
入到去，個醫生已經講左勁多版POWERPOINT囉.....無奈，鬼叫自己遲起身咩。畀D同學揶揄完一輪，企到腳都痛（唔夠椅），終於有得睇"CT SCAN"同"MRI"啦，勁興奮，雖然有D似鴨仔團咁，開完茶會去出團咁，但我個心情簡直覺得自己似做左個醫生仔，你見到D姑娘、醫生同PATIENT對你既目光都係唔同架，D PATIENT既目光好似畀個信息我：「畀心機呀！有為青年！」咁，哈哈，醫生同姑娘就好似對住班師弟妹咁勁客氣（雖然有一個係度擺晒款，態度寸爆）。
落到MRI房，門口寫著「香港中文大學磁力掃瞄室」(sth like that)，入到去先見到個染左個啡頭勁型仔既靚仔放射治療師，有某d女同學即刻發癲。室入面燈光昏暗，見到有個好大既黑洞物體，我地睇埋點樣將個patient放入部機度，點樣scan法，好正。個病人既脊骨歪了。
跟住去睇CT SCAN，部機中間個圓圈大MRI多D，間房都光猛左好多，又睇到有病人點樣SCAN啦。之後個醫生畀我地睇一D CASE，係D骨折既CASE，真係皮肉骨都SCAN得好清楚、好有真實感。
呢個Experience，我永世難忘。

教宗若望保祿二世於香港時間4月3日凌晨3點幾蒙主寵召，主懷安息。全球哀悼，並摒棄宗教同政治成見，齊哀悼這位執掌教廷超過四分一世紀的宗教領袖，不少國家下半旗致哀。

>>April 5, 2005 at 2:30:01 AM GMT+8

2005 年 3 月 31 日 星期四 【暴雨】

香港既補習風氣係上世紀90年代開始就好盛行，唔知係邊個搞起呢個風氣啦，但睇返而家走係街上既旺區，真係都幾碰口碰面都係ｄ大型補習社「連鎖店式」集團旗下既「分店」，銅鑼灣、灣仔、旺角、油麻地、佐敦、沙田、元朗、荃灣、九龍灣，全部都係呢ｄ「天皇」、「古代」、「時代」、「燈塔」、「甲一」既天下，果真「琳瑯滿目」，課程多到「目不暇給」，而每每到新學年開始以及會考高考既衝刺時期，呢ｄ集團就會紛紛作鋪天蓋地式既宣傳攻勢，係各大報章周刊、地鐵九鐵既燈箱落晒廣告，甚至乎最近呢幾年仲出埋電視廣告（包括巴士上面果ｄ「勞嘈」、「第一視像」），真係隨時隨地都睇到佢地既存在，宣傳策略同競爭情況差不多同果ｄ電訊公司冇乜分別，果ｄ咩課程報讀優惠出到冇可能再出，跟住就有ｄ咩拎到幾多條Ａ就可以跟某某屎尿屁「補習天王」一齊免費去旅行，認真誇張，當然就少不了果Ｄ咩補習導師明星化、天王天后化，開補習社搞到好似開娛樂公司咁，係咁谷到行，無人不識、無人不曉般，香港學生人人必然手執呢Ｄ天王天后既精讀筆記、TIP路天書，彷彿有左呢Ｄ天書就考試一定唔會炒咁，講開呢Ｄ天書，補習社集團亦都會係Ｄ廣告係咁講話佢地既天王天后級既名師TIP題精確無比，經常見到「中！又中！」字眼係Ｄ補習社廣告上面，十足十果Ｄ馬經波經咁，睇來去公開考試同買馬買波都冇乜分別，都係講TIPS、講彩數咁，同樣都係要付出大量金錢去買回報，但唔保證有回報或合理既回報。

係咁競爭劇烈既補習市場，之前曾聞名全港既著名「補習天王」史SIR旗下既「A1補習學校」終於宣佈結業。其灣仔兩間分校經已在二月結束，昨天亦都將佐敦分校結束。教統局同消委會就今次事件收到唔少有關既投訴及學費退還查詢，但暫時未能聯絡上A1既負責人。有一個CASE係有家長一次過交晒成年既學費畀A1，但校方係結束前則只發回每名學生期票，要６月才兌現，有家長表示不滿，教統局正研究A1有否違反補習學校條例，因根據有關條例，校方不可以同一時間向同一學生收取多於一個月既學費。

1998年，當時既教育署正積極整頓發展越益蓬勃既補習社行業，曾查封數間無牌經營既補習社，而當年灣仔A1分校亦因為涉無牌經營而遭查封，負責人史SIR亦曾因此而被判罰款並留有案底，係案件審訊期間，揭發「補習天王」史SIR既學歷只達中五程度，並沒有持有學位學歷，只修讀過神學課程，而佢持有的只是「准用教師」，並不可以教授預科課程，但根據A1的廣告及課程資料，該校既預科英文課程全由史SIR親自教授，當時既A1發言人更稱「如果唔係史SIR教，點吸引咁多學生來報讀呀？」。

記得我中四既時候，都係受到A1既鋪天蓋地既宣傳吸引（據稱好多十優狀元名校生都係果度補習），走左去報讀佢地既補習課程。當時佢都係一收就收3個月既學費，好嗆喉。上史SIR堂，真係好誇張，百幾人逼係灣仔東區商業大廈既一層樓上面上，果度分左幾間房，只有一間房係真人教授，其餘既房都只係睇現場直播，有D無奈。事關佢果堂係星期六既朝早8點半上堂，我就好懶既，星期六叫我咁早起身就一定唔係好得架啦，所以10堂有８堂都係岩岩好先去到，結果要坐直播房。上佢堂好搞笑既，佢會無啦啦講耶穌，又叫大家祈禱，又拎本聖經出來睇經文，我明明係上英文架嘛，就好似變左上RS堂咁，無啦啦買一送一（買英文補習送RS補習）。我上左3個月頂唔順，跟住就冇再補啦。A1結業，十成九係臭名遠播所以再冇學生去報，圍唔到皮所以要執啦。

>>March 31, 2005 at 11:28:22 PM GMT+8