2006 年 9 月 26 日 星期二 【晴】

我諗我要先多謝林璟昀同馬翠芝兩位既留言，呢兩個留言，令到我好感動，係黑暗裡面見到曙光。
多謝余鎮洋肺腑之言，你一句「好朋友」我已經覺得感覺好好多。
多謝張瑋（a.k.a.王小明）無意一句「兄弟」，其實我已經覺得好開心。
多謝李沛暉，你雖然冇咩表示，但呢十日內不停同我「作出輔導」，其實已經好有心。
多謝你、你，仲有你，我明白，有ｄ野唔駛講出口，心照。

「兵變9.11」事件發生左十天
其實事件已經係9.20完結左
心裡面覺得如釋重負所以寫左出來
亦都諗返起counsellor要我做既一樣野
上個星期六，同個counsellor分享返過去兩星期所發生既事
最後得出結論
我要搞清「我的看法=/=我本人」，別人可以不認同你的看法，但不表示反對你
嗯

經「政治協商改革委員會召集人」「王小明」既「一番努力」
鐵定OMG於10月1日改組重新上市
停刊《Fu**周》，但將出版全新「雜誌」《自由斟》
取其『「斟」砭時弊．言論自由．新聞自由．壹「斟」見血』既意思
希望王小明成功入到《蘋果日報》，咁就最好勒！

無聊間見到email傳來Yahoo!星相免費睇自己係咩紫微星
咁咪做下囉
原來我係「天相獨座」

天相獨座
優點：自愛自重, 領導力強
缺點：自負任性, 發號施令
人格特質：他長得清秀俊逸，溫文儒雅，帶有一種較為中性的細膩感覺。因為他待人處事較為溫和，所以人際關係挺不錯的! 又因為他的個性樂觀，舉止優雅，很容易給人白馬王子般的感覺，異性緣也非常好。
Yahoo!(2006).

紫微斗數之領導型：天相星
代表人物：魯肅
優　　點：斯文有禮，應對得體
缺　　點：意志不堅，粉飾太平
◆ 天相星之個性
天相是一顆優雅樂觀的星曜，為南斗第五星，化氣為「印」，有掌印的作用，也是官祿主，偏於文事，處世較為慎重，不會草率衝動，能處處犧牲小我而替人著想，總是寬厚體貼，對他人總是發揮人飢己飢、人溺己溺的精神，不僅毫不猶豫的幫助他人，更有一顆寬厚誠懇的心，嚴以律己，寬以待人，是理想的幕僚人才。
◆ 天相星之理財觀
天相星的人，是很愛自己的。而他跟破軍一樣，是消費能力很高的族群唷。不過相較之下，他更有種外放的能力，是想藉由裝備來提升自己，進一步來做為投資，讓他的親和力、吸引力、媚力更高一層，以進一步的拓展自己的人際關係。
◆ 天相星之消費觀
天相是求精不求量的人，要買就是要買好的，不要那種用沒三次就壞掉的東西，也有慣用性的消費行為，喜歡買有買過的東西，就是有口碑的啦！工欲善其事必先利其器，當他想做什麼事的時候，一定要先做好事先的準備工作，該有的傢俬都一定要齊全，所以久而久之就囤積了一大堆東西了。
◆ 天相星之感情觀
敦厚、誠實、守信的天相星，喜歡凡事都照著自己的計畫流程來。但是嚴以律己，寬以待人的他，有時會因為自己的同情心作祟而交到較為任性或霸道的另一伴，所以天相可別因一時衝動就答應與對方交往哦。而喜歡高級品的他，也是很重視另一伴的外表、打扮、裝飾等。再來就是對方是否多才多藝，或是有良好的人際關係、交際手腕、做人圓滑等…不過能符合條件的人，大多也是萬人迷，所以也常會給他帶來空虛感或是莫名的壓力。
科技紫微網(2006).

睇來好似好唔錯，又靚仔又叻又有領導才能。荀盤

2006 年 9 月 20 日 星期三 【晴】

近日認真動盪不安
台灣倒扁
泰國兵變
每天既新聞離不開台灣同泰國既政治鬥爭風波
記者們真係好唔得閒
究竟係咪磁場問題
所以搞到近日咁多大大小小既「兵變」事件?!

台灣既紅色倒扁浪潮仍然繼續
而我既黑色無聲抗議宣告結束

事情該告一段落

上個星期六首度見counsellor
談及我既交際問題
我既功課：
我究竟有冇朋友？（換句話講：有冇人當過我係佢朋友？）
＊朋友在此意思唔係點下頭，say兩聲hi，至多傾多兩句果隻

>>September 20, 2006 at 11:26:37 PM GMT+8

2006 年 9 月 14 日 星期四 【乍寒還暖】

本港於19:53錄得黎制3.5級地震
中國自古有云：天有異象，必有妖孽。
自4天前的9月11日開始，本港連日來連連暴雨、熱帶低氣壓也強得足以能掛「3號波」，如今更錄得黎克特制3.5級地震！
忽然天降異象，正正暗示有妖孽在背後搞風搞雨，製造分裂和動盪！如斯妖孽，若不及早斬除，則大禍降臨，文筆聊生！

>>September 20, 2006 at 11:12:13 PM GMT+8

2006 年 9 月 12 日 星期二 【微冷】

......
曲終人散既時候　只有剩低幾個幾個
我問我　我既戰友　係咪就係我一個
......
我話我　進一步　退一步　我都難過
我想過放棄我　再唔識分對錯
......
成日鬥前鬥後　想走都難自己走
有傷口有時得手有時失手　我都要受
......

呢首歌，無論點理解個內容，都好觸動到我既內心
由首歌岩岩出街，到而家，我一有唔開心既事，拎返出來聽，都好貼切，好到肉
我係《戰爭》入面既失敗者，無論邊方面既戰爭都係
「是我想得太盡要爭氣」
「成日顧前顧後　想不透行左轉右　是我打的仗自作自受」

我尋回失落左既孤獨感
如今我只好一個人上路
不要奇怪我會少了說話
也不要奇怪我會少交際
可能自己做錯了說錯了
我不能作什麼的事彌補
我只好選擇自行退出了

我是一個自卑而且沒自信的人
就算做出來很強很了不起模樣
只不是裝出來掩飾內心的自卑
我的自尊心其實很強但很脆弱
若果要用比喻就像是強化玻璃
強化玻璃給人的感覺不易破裂
其實只要對準弱點一敲就碎了
碎了的強化玻璃能恢復原狀嗎
不是沒可能只得花多一點功夫

有一點很可笑
當我決定離開之時
想不到同一時間會有這樣多人離開
還好吧
該是時候終結了

記得Leo跟我說過有得就有失
記得拔萃有句名言：「不要問拔萃給了你多少，而是問你為拔萃付出了多少。」
記得肥魚跟我講過要好好反思下發生左ｄ咩問題
係呢一刻
呢ｄ說話好大感觸

心
既淌淚
又淌血
很痛很痛

2006 年 9 月 5 日 星期二 【綿綿細雨】

da best chocolate
a new start．a new image．sept '06

新學年就快開波，居然有d緊張喎，從來都未試過咁架！

早前去左幫手個o'camp，有陣時有d野好玩係唔需要核突既！
變種版既「金氏遊戲」，老實講，真係有d嘔心！

希望大家經過今次搞o'camp，都得到成長，可以有進步，唔單止門面要做得好，幕後都要做得好好睇睇。

可能在freshmen角度來講，呢個係一個算是成功既o'camp，但係worker角度來講，有好多野仲需要改善。

有時安全同好玩，邊樣緊要d呢？係咪真係為左但求好玩，就放棄安全呢？值得討論。

仲好記得兩年前玩大O，SU為左推銷我地係專上學生聯會（學聯）成員，特登邀請左某友好大學既學生會莊員來扮警察，聲言我地「非法集會」、「擾亂公眾秩序」，要記錄身份證，唔好講笑，真係有九成似，唔多清醒都真係好易畀佢呃到，其實果次就係想提及「公安條例」，果一幕大會都只係用來玩下，拎個綽頭。我真係估唔到，兩年後自己既細O，居然真係勞煩到真正既警察，我對呢件事真係好遺憾。

Diet Coke + Mentos = Fountain
有興趣，好想一試

2006 年 8 月 28 日 星期一 【綿綿細雨】

亞洲電視 - 亞視新聞


電視廣播 - 無(糸戔)新聞

先扯一扯開話題。
TVB今次搞呢個聲討《壹本便利》大會可真夠絕！
首先，TVB藉這單影視處已收到接近2500宗投訴的震撼偷拍事件獲得人心。既然這麼多人對《便利》的報道反感，乘勢在《壹本便利》的大本營－與電視廣播城一街之隔的壹傳媒集團－旁的電視廣播城，大搞聲討《便利》大會，以振婦團、娛圈、公眾人物，甚至壹傳媒死敵東方報業集團既人心，自然民心所向，而且擺下台威，只有TVB才能有力號召全娛圈人士，自自然然愛睇娛聞既人，就會轉晒去睇無(糸戔)收費電視。
此外，《壹本便利》偷拍阿嬌換衫事件，由於投訴數字已經破紀錄（尤甚於幾年前的英皇新傳媒集團的《東周刊》女星裸照事件），而且已驚動國際，大馬及國際刑警需介入，令到呢件八卦周刊時有偷拍既娛樂新聞，變成做「頭條港聞」，成為一眾唔踩死壹傳媒唔心息既傳媒集團如東方報業集團以及星島新聞集團旗下報刊連續一星期的頭條港聞！搞到兩大電視台係早幾日都開始連日係電視新聞報道呢單新聞。無可否認，呢件事係過去一星期，係除左何俊仁遇襲案外既最大新聞，又難怪兩大台要係新聞報道既！咁講返TVB點解搞聲討大會點解咁絕。事關呢個聲討大會係TVB電視廣播旗下冇乜人睇又成日改名既TVB PAY VISION無(糸戔)收費電視新開台無耐既娛樂新聞台搞既！陳志雲認真有計！襯呢單野搞到咁大，台台新聞都報，就食住個勢，搞呢個聲討大會，搏台台既新聞都來採訪，免費係對手電視台度播佢個娛樂新聞台台徽，認真大收宣傳之效，你睇TVB既主要對手亞視都「逼於無奈」要播咁大隻「無(糸戔)娛樂新聞台」咪牌出來，而TVB自己既新聞仲絕，刻意要講明係「無(糸戔)娛樂新聞台」搞既，實大收免費宣傳之效！咁搞，真係好想知道無(糸戔)娛樂新聞台既死敵有線娛樂新聞台有冇播／採訪今日既聲討大會呢？

再扯開話題。
忽然發現TVB新聞既受訪者身份就算係同一日同一段片都會時有轉變。
前兩晚發現TVB晚間新聞影阿嬌去灣仔警察總部報案，佢係打「鍾欣桐　Twins成員」，我睇到當堂笑左出來，新聞居然咁樣打，接住，佢仲要係畫面左上角打「無(糸戔)娛樂新聞台片段」！嘩！真係估唔到娛聞台既片居然會係新聞度播，仲要訪問演藝人協會會長曾志偉既片段同tvb娛樂新聞節目《東張西望》一樣，仲要播埋tvb entertainment咪牌同《東張西望》既主持人上鏡！我真係唔知話係突破好，定話電視台娛聞採訪專業左，抑或新聞部cheap左，咁樣都放得係新聞報，都真係幾富娛樂性。到第日六點半大聞，又再次見到阿嬌係新聞出現，今次tvb news就將佢既身份由「Twins成員」改做「藝人」，再係同一晚，再次改做「歌星」，之但係條片係完全一樣既！換句話說，tvb係會周不時修片！

其實係上星期二，第761期《壹本便利》剛推出市面既日子，我一早帶同我個三年班學生去7-11買野，赫然見到如此「驚嚇級」題為「阿嬌後窗bra解」既《便利》封面，我便立即遮住我學生既眼，帶佢行去第二邊，叫佢唔好行埋雜誌堆。其實果日都仲未話好震撼，我第日（星期三）教完六年班，落到去7-11仲見到大量該期《便利》，之但係我冇買到，等到下晝，就已經全港冇晒貨，我當時估係畀人回收，點知原來唔係，係畀人掃晒，《便利》要加印第二版，但我都未見有第二版都據清十分鐘來去晒貨。雖然壹傳媒係今次贏晒銷情，但輸晒聲譽、民心。如今呢單《便利》偷拍事件搞到咁大，有不少人士、團體都聲言要罷買壹傳媒刊物，我有少少擔心壹傳媒因為呢單野搞到要執笠停刊，連累埋報界龍頭《蘋果日報》。我本身係壹傳媒集團既忠實擁戴者，我覺得黎智英先生真係一個好勁，而且好有生意頭腦既人，呢個人我係好佩服佢既，但佢旗下呢本《壹本便利》，我都好唔buy，簡直係淫書，期期都賣肉咁，兩個月前因為未成年少女組合cream成員李蘊為《便利》拍左濕身封面照，搞到滿城風雨，其實《便利》仝人好心真係檢點ｄ，我早前買左本《便利》睇，都被驚嚇得要丟書，版版盡是奇人奇事，果真驚嚇，如果連我呢ｄ壹傳媒既忠實fans都覺得接受唔到，其實《便利》係咪應該一早好好檢討？回想《壹本便利》創刊不久，壹傳媒死敵東方報業集團就搞左本《東touch》對衡，兩者都係年青人當年既潮誌，雖然《東touch》已於早年易手於星島新聞集團，繼續升華其潮誌既形象，而且仲越來越「高檔」，相反壹傳媒唔知點解，就將《壹本便利》慢慢步向自殺之道，越來越多色情成份，越走越低俗。

既然患有嚴重精神病妄想被害症既東方報業集團日日係佢旗下《東方日報》同《太陽報》好似癲左咁亂吠，無理拿更就要鬧壹傳媒，成日執住壹傳媒既痛腳，叫政府執左佢，話人地係邪惡傳媒，又話政府偏幫壹傳媒，今次仲賤到咒黎智英「多行不義必自斃」，認真過分，但就真係好心壹傳媒就做好自己，等大眾有眼睇，東方係隻癲狗，要執就應該執佢，等佢唔好為害人間。今次壹傳媒整左呢單野，我都幫唔落手，事關偷拍人地換衫真係好唔道德而且冇必要，今次係咁畀東方猛吠，我都覺得幫唔落手，只係覺得東方鬧得好過分（話壹傳媒誨淫誨盜反中亂港，但有睇過東方太陽就知，佢地既咸版有四版，蘋果得兩版，邊個淫ｄ？另外，一ｄ聲稱「醫藥」既色情廣告只係東方太陽見到，蘋果一d呢ｄ分類廣告都冇，究竟邊個誨淫d？亂港，日日係社論好似癲狗咁無理取鬧政府鬧對手傳媒既又係邊間？亂港既似乎係東方多過蘋果勒！）！

仲記得早前小明叫過我一齊報做《壹本便利》記者，好彩我同佢講《便利》太多奇人奇事，我唔多想掂，齊齊縮沙咋！

2006 年 8 月 24 日 星期四 【驟雨】

冥王星今被剔出太陽系行星之列
太陽系如今只有8顆行星

2006 年 8 月 22 日 星期二 【晴】

有陣時真係覺得呢個世界好唔公平、好唔公道。
有陣時真係覺得有ｄ事情真係無奈、真係可笑。

IVE優異生 城大拒取錄　會考英文肥佬 促重考再申請
應屆會考生陳易希獲科大破格取錄　會考僅得十二分

我唔係想話否定「星之子」「小小發明家」陳易希既科學研究奇才，我都覺得佢年紀輕輕，發明左咁多野真係好犀利，但身為應屆會考生既佢，會考未放榜就已經畀香港最頂尖既大學－香港科技大學－破格取錄，到會考放榜，陳易希既成績「醜婦終須見家翁」之下，親身證實佢既會考成績只有１２分，唔好忘記，佢係讀理科既，理科１２分，真係同文科６分既程度差不多（我唔係話文科一定難考ｄor易考ｄ，所以有分數上既差距，只係想指出理科生普遍比較文科生在會考上都較易取得較佳成績而已。以兩科普遍成績既分數差距，作一個類比比較而已）！一個咁既會考成績既人，居然仲快過會考１０優既所謂尖子生入讀咁頂尖既大學。那麼會考可以證明一個人ｄ乜野呢？會考既成績可信嗎？定係科大睇錯人、收錯生？

相反，IVE出身既優異生，當年同樣係會考失敗，在４年前既會考只考得１０分，英文唔合格，雖然我唔知道佢係文科定理科生，但同陳易希既分數實在相差無幾，冇中六肯收，唔好講話大學向佢主動招手，聽政府話，條條大路通羅馬，遂報讀IVE既基礎文憑，仲拎到優異成績，直上高級文憑，仲要以良好成績畢業。根據學評局既資歷架構，讀完基礎文憑等於會考５科合格包括中英文，點知過左４年，奮發左４年，係IVE捱出頭來，拎到個良好既高級文憑學歷，一心諗住點都入到大學學位之際，暫時所謂排名第四既城大居然將佢拒絕門外，連面試機會都冇過，原因係當年會考成績差，唔該再考過！所謂條條大路通羅馬、求學不是求分數、一分耕耘一分收獲、亡羊補牢未為晚也，這些是否全部變成廢話？

兩個以會考成就來計，質素差不多既人，卻有咁天淵之別既命運同待遇，你話係咪真係好灰，亦都好好笑呢？

2006 年 8 月 14 日 星期一 【晴】

前果幾日收到「旅行社領隊」Kevin邀請，問我參唔參加今日由專業導遊小玉帶隊既大澳團，初時我都預計有十幾人會去，點知原來成個團計埋「領隊」同「導遊」都只係得7個，算啦，咁既人數已經好好，好夠玩了！

我十二點一落到去東涌地鐵站，雖然已經遲左，但居然只得四個係度，我問小玉有幾多人架個團，佢話唔知，要等比我遲更耐既「領隊」來到先知。眼見隔離一團又一團咁出發，我地就話：「哎呀！遲左出發，有冇得賠償架？」

等到人齊，先去剛轉型既東薈城名店倉入面既Fun.tasia foodcourt食野，貪果度坐得夠多人。自從8月1日census完左，冇見兩個禮拜，大家依然都係咁好笑，大家依然對census既日子念念不忘！

食完野，時間岩岩好，唔駛等好耐，就搭車入大澳啦！我地仲笑話張八達通就係張boarding pass！唔知係咪人太多，架車好慢，坐左成個鐘先到大澳。

一來到大澳，正呀！有我好鍾意既陽光呀！Kevin仲急不及待奔左落車，伸開雙臂作大字型咁大叫「我要同陽光玩遊戲」！我地一行六人緊跟住係大澳有帶團經驗既專業導遊小玉，由佢沿途介紹大澳畀我地認識。雖然我來過大澳唔少次，數落今次都唔係第六次都係第五次架啦，但冇一次有今次咁真實地認識大澳，原來有人講解你聽既旅行，比起自己唔知頭唔知路齋行齋去齋睇好好多架，而且有趣好多、有深度好多，呢ｄ先至叫做真真正正既體驗旅行呀！

首先小玉帶我地穿越橫街窄巷，帶我地去到關帝古廟同天后古廟，呢兩座細細座，好有特色，據小玉話大澳人好信關帝，係因為原來好多年前（唔記得確實年份啦，對唔住呀小玉！），大澳曾經發生大火，咁就有人見過一個黑影拎住把關刀係火場走過，每當個黑影走過既地方，d火就熄左，d人就相信係關帝顯靈啦！當然呢座關帝廟唔係事後而建，佢既歷史已經好久遠了！如果細心發現，大澳既廟入面通常會擺放左鯨魚骨，原來係話，大澳漁民出海捕魚前都會到廟祈求保祐，而每當佢地捕獲大魚，譬如鯨魚咁，佢地就會將呢條大魚既骨拎去廟度，感謝神恩。另外，原來入廟都有一個學問！入廟一定唔可以行門既中間，因為果度係畀神行既，我地要係側邊兩邊，譬如從左面入，就要係右面出發來，而且入廟唔可以踏門檻，仲要用右腳先步入廟宇內，真係唔講唔知，原來入廟都咁有學問架！

跟住我地就行到去一間叫東京士多既士多，呢間絕對唔係一間普普通肯既士多，原來特別就在於佢出面果d由士多老闆自製既「七個小矮人」公仔，同埋身後由一位澳洲旅客送畀老闆既自製「白雪公主」公仔，而家寫住「白雪公主徵婚」，任何人都可以寄個「白馬王子」畀老闆，佢會以中英文寫埋係邊個送架！至於士多上面既趣怪跳舞公仔亦都係士多老闆親自畫既，每年新年會有新一幅畫放上去，認真有心思！

之後我地繼續向楊侯古廟出發！
沿途風光好凸顯大澳古樸水鄉既風貌。

來到寶珠潭，原來向侯王廟方向望，左邊既係淡水湖，右邊係海，所以就有咁多紅樹林。而之所以紅樹林叫做紅樹林，係因為紅樹既汁液係紅色，除左有消炎用途外，仲可以用來染布！咁睇來，如果用紅樹汁消炎既時候就千其唔好著衫啦，哈哈！而叫做「寶珠潭」都有段古架喎，原來相傳有四靈獸爭現時侯王廟後面果座半球體山丘呢粒「寶珠」，為左鎮住呢四隻靈獸，就專登起左呢左楊侯古廟來保護粒「寶珠」，而果位楊侯其實是一位大將軍來既。

離開咁有神話色彩既侯王廟，我地就起程行去觀景亭。家中擁有動物園既Kevin見到有彈塗魚，已經按捺不住，拎齊架生，跑左去捉佢既彈塗魚，估唔到佢有收獲喎，但可憐既彈塗魚就要同屋企人從此分離啦！

呢個觀景亭都幾「隱蔽」，要「九曲十三彎」先行到去。中途會見到一間荒廢左既廁所，牆上有「有蛇勿進」四個大字，但見到呢四隻字都唔駛驚，講緊有蛇只不過係呢個廢廁入面有蛇嗟，冇人叫你行入去個廢廁度，其實佢隔離有一條足以行駛一輛私家車既路，所以係唔需要穿過任何草叢就可以行到去個觀景亭，唯一有少少探險feel既就係廢廁隔離係一間荒廢左多年既學校，已經頹垣敗瓦架啦，但仲見到課室入面既黑板同間隔，如果夜晚來，都咪話唔得人驚！

上到去呢座據講可以見到中華白海豚既觀景亭，見到咁廣闊既海洋，當堂心擴神怡。如果冇上過來呢個觀景亭，真係好可惜啦！如果視野清晰既話，仲可以見到對面澳門、珠海，當然仲有好近下既香港國際機場啦！

行返轉頭，導遊小玉安排左我地有tea time，就係去食大澳馳名既「車站豆腐花」！導遊真係導遊，介紹既野真係唔同d呀下，又真係好好食，冰冰凍、又夠滑，好耐冇食過咁正既豆腐花啦！

食完豆腐花，我地過左斜對面既「大澳文化工作室」度參觀。呢個「工作室」其實係一所獨立、無政府資助既「大澳歷史文化博物館」，免費入場，入面有好多以前大澳既相片同一些大澳文物，值得參觀，而參觀者亦可幫襯買$10六張既postcard，以支持「館方」繼續經營下去。據工作室負責人講，原址原來係一所賭館來，以前好多男人聚集來賭錢架！

參觀完「文化館」，我地又繼續去同陽光玩遊戲！
今次去巴士總站附近既南涌長堤！
呢個長堤新起冇耐，真係好靚，終於發現到香港有一個咁靚既景可以媲美澳洲既海旁美景！要走畢呢條長堤，真係差不多要二十分鐘，但我地卻行左足足一個鐘，冇計啦，堤下咁多招潮蟹同彈塗魚，Kevin哥又要跳落去捉返夠本啦，結果我地就係堤上曬太陽，終於曬返黑我既背部！
呢樣野未係高潮，估唔到，我地行到去長堤既盡頭，迎面而來是一個非常熟識既面孔！
大家一片靜默，四目交投。
之後......
「嘩！原來係曹宏威博士呀！」
估唔到咁都撞到曹博士，唔知佢來係咪要以科學角度解答神怪就說呢？
原來曹博士都幾高下，同我差不多高架！

跟住梗要唔可以錯過坐船出海睇海豚啦！上次我來既時候得一間船公司，所以收成$20一個人咁貴，今次唔同啦，多左好多間，為左搶生意，「周太海味」有份經營既「海豚旅遊」就畀左個$100買六送一優惠畀我地，平均每人都係$14左右，抵左好多架啦！上次我就睇唔到海豚，今次就睇到啦，仲要好多添呀，有成四、五條，有粉紅色、有灰色，好得意、好可愛呀！仲要有次係勁近既地方跳左上來呀！真係咁大個仔第一次咁近距離見到野生既中華白海豚呀！勁開心呀！
坐係船仔睇日落既感覺真係唔錯！個日落好靚呀！我都係第一次係咁既環境係海中心度睇日落架咋！
小玉既planning真係好好，乜都好perfect，真係夠晒專業呀！

坐船仔遊埋個水道之後，都係時候走人啦，今次我地決定坐船返東涌，試下另一種既感覺。估唔到香港仲可以睇到星星，我好耐都冇見過咁多星星既星空啦！隻船去到沙螺灣，抬頭望上天空，真係一番驚喜，星空真係好靚！咁如果下次有流星雨，原來出到海都應該睇到架！
返到東涌，約埋阿Jay去聯邦皇宮度食小菜，食到人地打烊，勁呀！而且終於解決左困擾我多年既Black Magic啦!

2006 年 8 月 9 日 星期三 【驟雨】

會考放榜 - 25名10A生，近十年新高
(灣仔男校)　 皇仁書院 - 6名
(油尖旺女校) 拔萃女書院 - 4名
(中西男女校) 聖保羅男女中學 - 3名
(中西男校)　 聖若瑟書院 - 2名
(灣仔女校)　 聖保祿學校 - 1名
(九龍城男校) 拔萃男書院 - 1名
(九龍城男校) 喇沙書院 - 1名
(觀塘女校)　 德望學校 - 1名
(沙田男女校) 沙田官立中學 - 1名
(沙田男女校) 宣道會鄭榮芝中學 - 1名
(屯門男女校) 順德聯誼總會梁球琚中學 - 1名
(屯門男女校) 保良局董玉娣中學 - 1名
(元朗男女校) 天主教崇德英文書院 - 1名
(元朗男女校) 新界鄉議局元朗區中學 - 1名

單性別學校 - 7所 (4所男校、3所女校)
男女校 - 7所

傳統名校 - 8所
地區學校(屋村學校) - 6所

英文中學 - 14所 (即全部均為英文中學)

男生 - 15人
女生 - 10人

港島區學校 - 4所 (中西、灣仔)
九龍區學校 - 4所 (九龍城、油尖旺、觀塘)
新界區學校 - 6所 (沙田、屯門、元朗)

官立中學 - 3所
津貼中學/補助中學 - 6所
直接資助學校/私立學校 - 5所