2006 年 7 月 15 日 星期六 【乍寒還暖】

Population By-census 2006中期人口統計

正式展開！

我地計過，淨係返工放工來回車費全程已經蝕左$320！

真係覺得好戇居，每日由東涌專登搭車返青衣山頂既centre，跟住又搭返車（冇coach坐！要先自費，後申報再claim錢！）返東涌屋企附近做訪問，之後又要搭車返青衣centre，放低個紅袋、換衫、報數，又搭返車返東涌屋企，車費同時間都浪費左唔少，認真費時失事、勞民傷財！

我地組好快就熟晒，仲快過快熟通心粉，已經變左做一家人，我地叫負責我地既ACE（助理組長）做阿媽，因為佢做既行為同講既說話實在太似O camp入面既組媽！我地08號既組員因為要同隔離組既07 part，結果就咁我地呢個仔就咁入贅左隔離組。我地組7個人，5男2女，計埋隔離組，我地成個大組14人，得我同我既partner係兩個男仔，其他都係1男1女，我都估到實係可能我地pair要做segment啦，點知真係，隔離組全組做逸東，我地組就有3個做逸東，2個淨做裕東，而我同我個partner（阿安）就「全個東涌」（逸東、黃泥屋、裕東。阿安仲慘，佢自己一個做埋馬灣涌，今日我地成個大組一齊實地考察，佢馬灣涌d segment真係好甘！）做晒，仲要做埋警署、學校、診所添！

我地成「家」約埋一齊食dinner，「阿媽」話好開心我地咁快可以咁熟。我都覺得係好事，只不過我地有個麻煩到爆既「太后」，乜都渣到正一正來做，連宣誓都要做（呢樣野真係好多餘，又冇統計處d人來睇你有冇做，駛唔駛徙時間去做呀！）！

今晚試做左一個訪問，未完成已PK，完全唔熟份問卷，好似問錯左D野，又寫錯D格仔，睇來有排執，仲要「做完」之後唔記得問拎返個電話！好彩係未完成既CASE，仲有得補飛！

2006 年 7 月 11 日 星期二 【晴】

趁去做「中期人口統計」前去鬆一鬆，阿媽講左好多年話想去海南島，所以就趁住最後呢一個星期時間，臨急臨忙去報團。其實講返都好笑，之前我地係從來冇諗過會去旅行既，上個星期忽然有一日唔知邊個講講下話想去旅行，咁就跟住去搵資料，老竇即刻返去請埋成個星期假，就係上星期五報團，好多團都已經full左，但我地係都要最遲星期二就要出發，因為我星期六就要返census，結果就得返康泰既海南島四天「超值抵玩團」。

2006年7月11日（星期二）

朝早九點半，到左機場check-in，好多團友都已經到左lu，但係成個機場都仲係好靜，冇乜人

呢架就係我地架飛機，係細機來既，我咁大個仔都係第一次坐咁細隻既飛機，入面只係得左面兩個座位加右面三個座位，真係同舊式巴士既佈陣差不多
呢日既香港天氣實在好麻麻，成日落雨，其實我好擔心過到去海南島天氣都係好差，咁就玩得冇咁開心啦，點知......

由於係機仔既關係，又咁岩，我坐既位置係對正行李艙既入口，睇住工作人員將d行李運上機

雖然話落雨，但視野真係好清晰，係飛機上睇到成個東涌一清二楚。byebye啦屋企，byebye啦屋企入面果幾條魚仔，保重啦！


從高空望落去的香港老鼠樂園

穿越雲層，原來上面都有個咁大既「平原」


從高空望落去海南島既三亞灣，居然見到我地第一晚入住既三亞海航度假酒店（紅圈示）

就快降落啦！

簡陋到無麟既三亞鳳凰「國際」機場


我都係第一次好似「國家領導人」咁樣落機法，果真唔同風味，我真係想企係機門揮完一輪手先慢慢步行落來架！
由呢個唔開燈既「國際機場」驅車前往首晚下塌既三亞海航度假酒店途中，發現海南島仲係好「純樸」（落後），仲保存到農村風味。四處都是田野同非常簡陋既房屋。果兩條路軌，相信已經荒廢左，如果唔係，冇可能雜草叢生。








呢間五星級數既三亞海航酒店真係好靚，d環境靚到真係同postcard媲美。值得一提既係，估唔到三亞咁好天氣，真係好正，咁好太陽、萬里無雲先似去左熱帶地方架嘛！
我地呢間酒店係正三亞灣旁，行出去過條馬路就係廣闊無邊既三亞灣，感覺好正、好relax，不過三亞灣水質認真麻麻，仲濁過香港ｄ海灘，所以唔適宜游水既，要游就去酒店入面呢個咁靚既沙灘泳池游仲好過！

三亞灣有好多呢ｄ大大把既「草遮」，好有feel，望住個咁澎湃既三亞灣，真係唔錯！

其實我地有諗過去要坐10分鐘巴士車程既天涯海角，但原來天涯海角單單入場費已經好貴，入到去都只係太兩舊刻左天涯同海角既大石，覺得唔抵，所以冇去。呢一架就係去天涯海角同亞龍灣既穿梭巴士。

返返入酒店房，開電視睇。唔好以為大陸地方冇乜電視台你睇，估唔到連楷楷旗下既香港now寬頻電視台都有得你睇，不過係講英文的！當然仲有得你睇同樣係香港電視台既鳳凰衛視同埋美國CNN有線新聞網絡啦！

到黃昏，係酒店泳池睇「日落」，真係好靚！



夜晚出發去三亞市做腳底按摩同食宵夜。
由海航酒店坐車入去三亞市，都有一段時間，期間我地發現左成夜晚八點幾九點，全個天已經黑晒，太陽應該落左山，但都仲見到個黃黃地又紅紅地既巨大圓形發光體係半空中，原來果個就係太陽，但係呢個巨形太陽周圍都唔會光，一樣咁黑，簡直係奇景，可惜因為我唔係坐係睇到呢個奇景果一邊，所以影唔到相。
去到三亞市，先行個夜市，周街都係人，不過就落後之中帶點繁榮。我地既行街會畀人打劫，急急腳貢左上一間百貨公司，裡面都係有nike、adidas既專門店咁啦。
我地再行返去按摩店做腳底按摩，個技師係一個同我同齡既男仔。心諗自己真係好好彩，我同佢都係21歲，但我就繼續有書讀，讀到大學，佢就要走出來做dup骨仔。
按完，去左一間叫「中港城餐廳」既食肆度食宵。一貫內地作風，經常閂晒d燈，路過都唔知佢原來係營業緊，我地一入到去，即刻開返晒ｄ燈。食左大大碟既炒飯、炒粉同一大鍋既乳鴿粥，樣樣都好好味！
食完之後，就返酒店了。

2006年7月12日（星期三）
係酒店食完個豐富既西式自助早餐之後，就出發去一間水晶工藝廠參觀，在場似乎得我地一班香港客，其他全部都係內地既旅行團，不過我地臨走時，終於見到有團新華來左。


之後，我地就去左大東海。
呢個沙灘又係好大好靚，不過超大浪，眼見真係游水既人唔多，只係玩水既多囉！
跟住，我地就去左附近既一間由港人開設既珠寶店睇，感覺有ｄ似大陸人來香港旅遊去金至尊睇咁囉。不過個老闆同我地上左好寶貴既商業管理課，仲話叫我地唔駛買野，但如果係都要買，就劈價至兩折來賣畀我地，雖然係咁「抵」，我地都冇買，因為買來都冇用。
離開呢間珠寶店，我地去左間裝修唔錯既食肆度食午飯，再出發去一間珍珠文化館。
都係果句啦，冇野岩買，不過學到唔少關於珍珠既知識既。果度仲有一個小攤位，畀十元人仔就可以任開一隻蚌，睇下有冇珍珠，有既話，所以開到既珍珠都係屬於你既，估唔到有人玩，真係有，不過就唔係隻隻有啦！






跟住我地搭車去亞龍灣。
呢度沿途靚過三亞灣同三亞市多多聲啦，靚到唔多次大陸勒！
去到亞龍灣，第一時間見到好多賣貝殼既攤檔，感覺好似去左赤柱、石澳、大澳咁。
亞龍灣都有好多水上活動玩，有水底漫步、香蕉船、水上電單車等等，不過收費都唔係平架，單單水底漫步15分鐘，就要三百幾蚊人仔架啦！
最得意既一點，就係係呢度，居然有「沙灘按摩」，真係無所不有勒！
我乜都冇玩，只係去左玩水，仲係沙灘上寫左自己既願望。
呢個灘認真水清沙幼，好靚，香港有咁靚既海灘就好啦！




玩完水、曝曬完成個下午，加深左我「朱古力仔」既形象之後，就把握時間上左去沙灘後面既Holiday Inn間coffee shop度歎tea。
係上面望返落去亞龍灣既view勁靚，靚到唔捨得走！靚到好似postcard果d咁呀！

離開亞龍灣，亦即離開左三亞，我地向住全程最落後、最原始既地方－興隆－進發！
去到興隆附近，簡直覺得自己去左鄉郊，落後得可以，最後我地下塌呢間只得四星級既正昊壽仙溫泉大酒店。
呢間野，你睇佢個名咁衰，都知佢唔方係好野，一陣就知......

2006年7月13日（星期四）

極級開放式洗手間連浴室
呢張相係係出面床果度推開個木框半透明既窗影返入面個洗手間連全透明浴室。
換句話說，如果你打開我前面呢個冇鎖既窗，你可以「飽覽」洗手間連透明浴室每一個角落，真係同「做show」冇乜分別。我有時懶，想洗手，真係直接推開個窗，就咁洗，事關個洗手盆就係個窗下面，「認真方便」！
唔得唔提，就係呢間樓高四層既「酒店」，居然連一部電梯都冇，仲要Ｄ住客自己手抽住大大個行李箱，自己行樓梯上四層樓，認真「好服務」，上完去，真係可以當做完Gym，做左大隻仔！諗返起天津果間酒店，原來果間野未係最差，呢間野先至係極品！



「酒店」入面充滿嚇死人既英文，足見內地人既英文水平如何！


酒店房間窗外的景色，盡見興隆是如何的「簡樸」！

都係唔好踩到咁盡啦！其實呢間酒店都有靚景既！酒店後面（酒店範圍）有個幾靚既泳池景，都算係咁啦。前面同後面既照居然可以爭咁遠！


之後開始今日第一個行程，就係參觀興隆熱帶植物園
呢個園真係好多植物，其中一棵好高既樹就叫「見血封喉」，咪話唔驚！
係度仲可以試飲好多唔同口味既coffee or tea，試完唔買都冇人理你，事關試飲區唔設買賣，買同唔買都係要經「超市」離開，所以就算唔買都真係可以兩手空空咁行出個園度。

返返去間酒店拎返d行李同「交下水費」之後，就又要開始長途旅程，去增遊既博鰲。
估唔到今日咁好日子，有架結婚花車泊左係酒店門口，內地既花車好似同香港既有d分別喎！


博鰲係海南島現時最新既旅遊景點，事關呢度就係博鰲亞洲論壇會址既所在地，亞洲各國元首都定期會來呢度開會，所以搞得特別靚。


博鰲會場旁既花園都好靚，建築都唔錯，唔似內地

點解呢度要叫博鰲？因為個地形似龍既後代鰲。
又因為鰲有領導之意，附近又有三河三嶺等為「聚寶」之地，所以亞洲論壇選址於此。
還有，原本會議場地應在「鰲頭」，但在「神獸」頭上動土，則大不吉，所以只好在「鰲頸」上起會議場地，而「鰲頭」則一直空著，沒有發展。

乘船往對面的玉帶灘去，但原來此廣闊水景，只係一條河，妙哉！


這就是長長窄窄的玉帶灘，妙在這灘的兩岸，一邊為南中國海，另一邊則是萬泉河。
海中心有二石；河的對岸是博鰲會議場地。
在玉帶灘上可以駕駛呢ｄ沙灘四驅車在灘上飛馳，都只係約三十元人民幣玩十五分鐘，認真抵玩！不過就千其唔好濕水，如果唔係就分分鐘要賠成五百幾蚊！



去完咁靚既博鰲，就到中午街上都仍然冇人既瓊海市食飯。間酒樓真係頂佢唔順，居然可以完全唔著燈！
食完飯，又上返車直往海南省會海口市。
去到海口既第一個地方就係去左呢個「海南第一樓」既五公祠，裡面仲有幾個泉，同埋蘇東坡既祠。



海口市不愧為省會，寧舍現代化過人，不過個感覺仍然好深圳，所以都係好驚，結果走左入間百貨公司行就算，唔敢行街行得太過遠。

就係呢間類似「吉之島」般既百貨公司地庫既超級市場，發現香港品牌李錦記既tomato sauce，內地將sauce居然譯做「沙司」，真係......
內地始終係內地，有ｄ野做得好戇居，居然要求d客將佢地既袋、背包全部放入超市提供既一個密封手提袋內，仲要搵特製既鎖扣住，驚死你放野入袋咁，你派得職員同人封袋開袋，又整咁多袋同鎖扣，不如將呢筆錢用做做防盜裝置啦！搞到我個Columbia袋夾硬塞入一個唔多岩size (unique size)既袋度，真係多得佢唔少！
係呢度食完海南四大名菜：文昌雞、和樂蟹、加積鴨、東山羊，我地就去左全程最靚、最豪華既酒店－海口華運凱萊大飯店度下榻。我地間房仲要對正泳池，而泳池仲有樂師同歌唱表演添，唔係唱內地ｄ歌，係唱英文歌，仲要ｄ表演人員係外國人添！

2006年7月14日（星期五）




一早起身，天都未光，果時正正係清晨六點左右，係海南之行最後一日，亦都畀我係呢一日係海南迎接到晨光第一線！
好快手咁係酒店食左個早餐之後，就要拿拿林上車趕去機場啦！無計啦，早機！

在往機場途中，唔好徙，同海口市影返張街景先！
byebye啦，海南！
完全估唔到可以咁突然去左個旅行，仲要神不知鬼不覺，我係海南返到去香港只不過11點幾度，仲可以返去聽關心一線，完全冇人知我岩岩去完旅行返來，第二日又去開by-census工，真係好正！

2006 年 7 月 4 日 星期二 【綿綿細雨】

完了！這次真的完了！甚麼也完了！
沒了！心碎了！心死了！由他去了！

終於真真正正認識到自己的水平！
一個機會也沒有，就已經判死了！

早知不問也罷，問完，不但沒結果，還得惡耗。

>>July 4, 2006 at 11:42:21 PM GMT+8

2006 年 7 月 1 日 星期六 【綿綿細雨】

民主烈焰永不熄滅　5萬人走出普選路

今天是香港回歸中國的九周年紀念，也是開始實施一國兩制、港人治港、高度自治構想的第九個年頭。一如既往，泛民主派連續第四年主辦「七．一大遊行」，繼續爭取全民一人一票普選行政長官及立法會內所有議席。遊行隊伍於下午三時半由維園出發，直至晚上七時左右，遊行隊伍的隊尾抵達終點中區政府總部。今年遊行的主題是「平等公義新香港，民主普選創希望」。主辦單位民間人權陣線稱有5.8萬人參加今次的遊行，港大民意研究計劃則點算到有3.6萬至4.3萬名市民參與這次遊行活動，而警方數字則約有2.8萬。

陳方安生參與　成遊行焦點

今年「七．一遊行」的焦點，在於被批評「忽然民主」的前政務司司長陳方安生於遊行一星期前公開表態會參加遊行，並與一眾被指「不咬弦」的泛民主派議員攜手呼籲市民參加，以力谷遊行人數，有批評指陳太的動作是「另有目的」。陳方安生在家人的陪同下，準時到達維園出席遊行，在傳媒訪問的簇擁下，有市民指斥她「唔抵得曾蔭權做特首」，所以在「搞破壞」。陳太指她參加遊行並沒有私心，也沒有其他目的，只是想喚起市民對爭取民主的堅持。陳太遊行至灣仔警察總部外，便乘的士離去，並未完成遊行至中區政府總部全程。

5.8萬人遊行　反映並非「政通人和」

民間人權陣線發言人李偉儀指出，今年參加「七．一遊行」的人數比去年的二萬一千人多出一倍多，這與港人面對07、08年行政長官及立法會選舉臨近，政府仍未提出普選時間表而感到有壓力有關，也與陳方安生高調參與遊行不無關係。有報道則指，雖然今年「七．一遊行」人數較去年因董建華辭任換上民望甚高的曾蔭權當行政長官的「七．一遊行」為多，但卻比去年政改方案審議前夕的25萬名市民參加的「一二．四」遊行為少，反映陳太的號召力並非如預期中大。

2006 年 6 月 29 日 星期四 【綿綿細雨】


魔豆真係魔豆，尋日仲係發緊芽咋嘛，今日就已經長到咁高，粒豆終於出埋字啦，不過似乎係沐浴露牌子名囉！

>>June 29, 2006 at 4:54:01 PM GMT+8

2006 年 6 月 28 日 星期三 【驟雨】

今日掛左個一號波，但個風其實好弱雞，只不過係熱帶低氣壓，而且又吹唔正香港，6:40p.m.左右就落左波。但係佢既外圍雨帶就搞到今朝落左場好勁既雨勒。

我棵魔豆終於發芽啦！都真係幾快，我種左4日咋嘛，就已經發芽啦！

左上：竹笙炒勝瓜、蝦多士、大斑兩味
右上：梅菜扣肉
左中：炸子雞
右中：三色牛柳絲
左下：合桃西芹炒雞球
右下：焗西米布丁
夜晚去左旺角鳳城酒家。成晚最好食既都係蝦多士，入口香脆，非常惹味。梅菜扣肉用來送飯最好，齒頰留香。炸子雞肉質略嫌老了少許，而焗西米布丁粉味比較重，不夠滑。

食飯時收到契舅母送畀我既生日禮物－真皮銀包一個！另外，auntie Pearl都送左兩封利是畀我，哈哈！

多謝Eric既very very belated "happy birthday"，過左咁耐先講，都好野啦，不過算啦！

2006 年 6 月 26 日 星期一 【晴】

好唔開心呀，21歲一來到就已經連收兩個打擊，一個係尋日發現衰左一個，今日再發現過唔到，超級唔開心，開始質疑「種瓜得瓜」，付出與成果不成正比，見到咁既樣，情況真係好唔樂觀，可以打定輸數，超級唔開心，唯有盼望神蹟既降臨。

我有好大壓力，好多野都未解決呀！

多謝今日Leo既belated澳洲IDD生日賀電，雖然遲左成日，算吧啦，哈哈！仲有多謝Alex既belated加拿大msn。

>>June 29, 2006 at 4:05:00 PM GMT+8

2006 年 6 月 25 日 星期日 【清涼】

21歲......終於成年了。但我真係唔多想咁快成年，我想做返細個仔，唔想大個。

今日雖然係我既生日，但就乜都冇做過、冇出過街、冇慶祝，淨係哩係屋企訓。今日又曬又熱，就算係屋企都真係唔係幾好受。有d唔開心，咁就過左我既生日。

夜晚login睇status，我有幾日冇睇勒，估唔到就咁開左份「生日大禮」畀我，有一個衰左lu，好唔開心，有d想喊，好彩仲未係我最想果個衰左，但我真係唔想又衰，我好想今年真係達成我既生日願望，順順利利成成功功咁達成我既願望，我唔想再得個吉。

今日，我諗最多謝既一定係濤濤。我真係估唔到佢會係澳洲都仲記得我生日，仲專誠打IDD畀我同我講生日快樂，真係好感動，好唔話得啦，一世人有個咁好既兄弟，真係三生有幸。

anywayz, 都要多謝各位有同我講過生日快樂既人：
Janis (早左成個星期，德國msn)
Ryan (早左兩日度啦，icq ecard)
Calvin (早左兩日度啦，icq ecard)
Nancy (早左兩日度啦，icq ecard)
Geoffrey (正日第一個，msn再加多個xanga comment)
Mangement Jenny (正日第二個，icq，另加為我安排稍後既活動)
Yu Chun Yeung (正日第三個，msn，另加為我安排稍後既活動)
Cheung Ka Lok (正日第四個，英國msn)
Wu Kiu Fung (正日第五個，icq)
Daddy (正日第六個，親口講)
Mom (正日第七個，親口講)
Cousin Nicole (正日第八個，sms)
Wong Chun To (正日第九個，澳洲IDD)
Tracy Ma (正日第十個，icq)
Judy (正日第十一個，電話再加多個xanga comment)

世盃熱，仲有人記得，都算係咁啦。多謝以上十五位有我心既親戚朋友。

2006 年 6 月 24 日 星期六 【晴】

今日屋企人提早同我慶祝我既生日，去左維園既巴西燒烤食dinner buffet，真係食到好飽！坐我地隔離檯果家人認真難頂，先有個女同個阿媽唔理衛生，將夾生蠔、魚生既夾就咁成隻夾放上ｄ食物上面，唔放返去隔離既碟到，再有個仔用手拎生蠔來食，最後到戲肉勒，個老竇竟然同個侍應講：「我試飲左先（佢檯面放左兩大杯滿滿的果汁先生橙汁），睇下好唔好飲，好飲先再叫啦，老婆你飲一啖睇下（老婆真係走去唔知醜咁飲一啖）。」，咁咪即係同呃野飲冇乜分別，真係未見過咁既質素既人。

食到臨尾，入左一大班男仔，仲有一個miss，睇來係班男仔請miss來食巴燒「謝師」啦，成個場即刻young左好多、熱鬧左好多，諗返起以前細個時，又係成班仔「請」miss出來食野，仲上埋miss屋企玩，好開心。

係去食巴燒之前，走左上山頂一轉。今日天氣好好，陽光普照，視野清晰，睇風景一絕！我最鍾意就係呢d天氣，好正、好靚，d景都寧舍sharp d、顏色靚d、豐富d咁！

返屋企前去左shop一d toiletries。最近威露士沐浴露送罐頭魔頭，咁得意既玩意，我橫掂都係要買沐浴露，結果買返屋企試下玩，睇下係咪真係種到棵植物出來。佢話7日就已經有植物架啦，仲會有粒有字寫既lucky bean，唔知我呢粒豆會寫左d咩字呢，好期待呀！希望佢真係為我帶來好運，達成我既生日願望啦！

睇網上新聞報道，21年前我係果度出世既銅鑼灣聖保祿醫院（法國醫院）話今年上半年，係St. Paul產子既孕婦當中，70%都係來自內地既孕婦！我睇到呢個消息當堂眼都凸埋！乜而家國內既孕婦真係咁有錢，千辛萬苦都要跑到落來生仔，仲要出咁多錢係一間咁出名既私家醫院度生，仲要數目咁多添！我唔係話歧視內地孕婦，但似乎好似唔係幾妥當。自己都係St. Paul既出產，估唔到我出世既醫院，21年後已經被內地孕婦攻佔，變得「唔再馨香」。

2006 年 6 月 23 日 星期五 【晴】

真係話咁快又一個星期，仲記得上星期返去聽線時候既戰戰兢兢，今日已經係第二次聽線啦，個人定左好多，自然左好多。今日寧舍多人，坐無虛席，電話又唔多，好多時都係齋坐。坐我隔離既係一個又係讀psychology既男仔，都算幾gag下，佢同佢班同學都幾nice，成日撩我玩同傾計，又咁開開心心咁過左4個鐘。

今日接到一個call令到我好有成功感，我好成功咁扶左我既client一把，大家已經建立左一個好好既關係，只可惜我地唔可以follow up case啦，如果唔係，我都想知佢之後點！我由佢好唔開心、好冇自信，講到佢有返信心，同無咁唔開心，果40分鐘既詳談係值得既！

另外，邊個話男仔唔會接到sex call架！今日我同埋坐我隔離果個都幾靚仔下既男仔（全場唯一既兩個男仔）就收到同樣果兩個人打來既sex call啦！所以話呢，唔一定係男仔打去性騷擾d女輔導員既，有d女仔都會打來性騷擾d男輔導員架！睇來機構應該要開始平等勒，sex call唔一定女仔先遇到，男仔一樣都會遇到！

>>June 25, 2006 at 4:19:24 AM GMT+8