2005 年 7 月 25 日 星期一 【晴】

好想放自己一日假。今日聽到同事Connie係度講緊佢儲左八十幾日假，話有排放，我真係有d羨慕。

今朝去左西灣河文娛中心聽seminar，講公務員架構同點入職之類。講真，我好累，過程入面四分之三既時間係訓著左，但我知道好多人都訓左。受住薪，歎住冷氣來訓覺，雖然真係唔幾好，但又真係好soft，鬼叫你好眼訓！估唔到有意外收獲......seminar臨尾同場加演警隊招募seminar，仲大贈送folder、筆同埋.......報名表格一份。睇左果個薪金payment，真係有ｄ心郁郁，but都係唔好搞我啦.....做INSPECTOR，入PTS都係要做果D野....我唔會頂得順and我體能邊可能做到咁多下引體上升？！lol....

seminar完左，去左筲箕灣報案中心對面有間賣米線既食肆度食lunch，係唔錯喎，推介！

食完個lunch，之不過係12:55，咁我就慳ｄ錢，慢慢叮上灣仔返工啦，沿途又係訓訓訓。

不過今日真係好熱，有d想中暑既感覺。

其實尋日先係西灣河出沒，帶住班cub仔玩city run，湊仔尤其班仔有不和既時候係幾難搞。暫時差一分屈居第四（第二名同分），都算係咁啦，我相信如果佢地肯團結d，咁就會仲好。

其中一個checkpoint係香港電影資料館，老實講，我係第一次去果度既，發現韓國國際學校係對面，終於知道austin係邊度教水。

btw，austin話我個style似尋日岩岩新鮮出爐既香港先生高鈞賢，仲叫我下年參選，話一定得，唔係化？係都佢自己得先啦！

前日short week，但都係畀左scout，班大仔冇乜幾個返，搞到唔知做乜，有人話可以走得，到我地走既時候，又撞到某個人（當時有人做緊ｄ「不檢點」行為，有辱身份，有辱校譽的行為），有人寸寸貢咁話「可以走得架啦？冇野做架啦？我教你野。」，唉，果時真係唔知點算，班仔又唔想返去，但又唔夠膽唔返去，疆左一陣，行個round，都係返去，又係玩drill，唉，有感「害左佢地」。不過今一回，畀我睇到多ｄ野，我對某ｄ人既行為真係大扣分數啦！（好彩我立即係某人走後，同班仔進行急救輔導，叫佢地唔好學某ｄ人咁，希望救得到啦。

>>July 26, 2005 at 12:01:27 AM GMT+8

2005 年 7 月 22 日 星期五 【溫暖】

今日相信係我返工返左「咁耐」以來既最繁忙既一日。

又再一次體會到team work既重要性。

lol...有種感覺，覺得自己似一個「京」官。由於做HQ既關係，所以搞一個Project，其他地區office都係要向返HQ匯報，而且要等HQ發放指令。今日係某Project既「放榜」大日子。各district office紛紛打上來問幾時可以放結果出街呢咁，原來先發覺，我做果少少野原來都足以牽動成個香港有關該超爆大型Project既工作，諗到呢度我真係不敢怠慢，我貢獻左我半個鐘頭lunch來趕工。

17:15，所有既事終於完成晒，好有鬆左一口氣既感覺，亦都有dd成功感，淨返既係有排先會掂既follow up work。其實做一個簡簡單單既CA（即係Clerk），唔單只要叻word processing、用excel，仲要識得公關技巧。周不時都要你打電話畀d NGO(Non-government Organization)，而d NGO亦都會有好多野問你，亦都間唔時會同你講下佢地FACE緊D咩問題，表達一下訴求咁。既要服從你上司指令，又要TUM得住班Client，其實都幾講功夫。

>>July 22, 2005 at 11:31:17 PM GMT+8

2005 年 7 月 21 日 星期四 【溫暖】

尋晚忽然黃雨...今日下晝青衣落冰雹...
倫敦三個地鐵站及一輛巴士又再發生爆炸案...上次倫敦大爆炸恐襲岩岩先發生冇耐...又來多獲?!...好驚好驚
人民「弊」話唔升唔升...結果咪又升左值...香港今次真係「港(講)弊」啦!
上星期政府先贏完公務員「合法」減薪案官司...今日又再贏埋領匯上市案...真係「可喜可賀」！港台最近鬧「私有化」或「官台應為政府喉舌」或「官台不應與商營電台有利益競爭」的風波...睇來其實又可以靠一招「分拆上市」搞掂！再唔係...就放棄港台...改為收購亞視再繼而上市亦得...你睇果個咁既「亞洲先生」競選..有冇搞錯...橫睇掂睇都冇可能俾果個核突大陸佬得到個冠軍卦？！唔係擦鞋擦出面呀？頒獎我記得都好似有某內地高官來頒...真係冇佢符...呢間「亞洲」電視睇來比「香港」電台更為「忠心」...包唔會同當「權」者對著幹！

anywayz，多謝Leo同Jason分別係澳洲悉尼同英國倫敦既手信，最衰尋日間綠野「仙蹤」（果然仙都唔仙）有咁「高」既效率，呆等45分鐘冇野飲冇野食，等到我碗飯來岩岩要夠鐘走人, in fact我係遲到左返去office添，搞到我要拿拿林打包走人，個「醒到唔醒」既waitress只係畀個膠袋我有鬼用，係咪叫我用手拿來食。行出去叫人幫我執外賣食具啦，另一個「醒到唔醒」既waitress以為我去洗手間就指左我去第二邊，我即刻話佢知我等緊佢（指另一waitress）執緊我袋外賣，佢都仲未醒水，係咁拉我企緊上面既floor mat。呢間野乜請埋ｄ人咁「高」質素架？！唯有下次約過第二度食多次。Jason好勁，居然畀佢睇到tvb 630news訪問左lunch時坐我地對面果位靚仔先生（佢買左盒Longman English Study Pack畀佢個女）。其實果時好搞笑，我地三個同佢地一家四口同時assigned左去同一張7人檯，咁岩有齊阿爸阿媽家姐阿哥細佬妹咁，勁爆似一家人咁，個情景真係好搞笑。ｄ「醒目到無麟」既waitress真係以為我地係一家人咁，居然落晒同一張單！唉~

近日返工個心情好搞笑。覺得自己真係大個仔左咁。以前細個係爸爸返工，我同媽媽出街玩等爸爸放工，而家呢？由於爸爸拎左兩個星期暑假，但我要返工，就變左就係換轉係佢地去街等我放工咁。亦都感覺到，遲早有呢一日，爸爸退休我返工咁，忽然覺得自己大個仔左好多，父母亦都老左好多咁。

我發現我社署呢份工對比其他係私營機構如某大書店集團或某美資會計師樓既summer intern來講，真係算係優差。某大書店集團近排要搞香港書展既參展攤位，搞到toowei晚晚都好遲先放工，睇來真係好辛苦。不過最激既莫過於此，當我得知eric被佢間會計師樓派左上去大陸蛇口做三星期job，仲要冇得返來香港訓，只可以住「高級」職員宿舍，感覺同做大陸民工無異，我就真係覺得自己係身在福中，另外我亦覺得ｄ私營機構好離譜，summer trainee嗟，駛唔駛咁駛到盡，連上大陸「公幹」都要做埋，都唔知保險點計。我唯有係度寄予無限同情同祝福啦。此事之後，我發現我自己真係適合做政府工多ｄ，莫非真係畀我呢個公務員爸爸講中左，我都畀公務員精神「洗左腦」？哈哈

>>July 22, 2005 at 11:18:06 PM GMT+8

2005 年 7 月 19 日 星期二 【清涼】

呢幾日都畀五年來最強勁既颱風「海棠」既下沉氣流影響，搞到勁熱，之前連續兩日都錄得37度高溫，好多大廈都因為電力負荷過重而停電，最誇張既係葵芳閣，停電停到佢我唔記得左幾耐啦。空氣污染情況都因為同一原因而頗為惡劣，成個天都矇查查咁。好彩有工返咋，可以成日哩係office度「歎」低成10度咁大把既「冷氣」！不過呢幾日勁忙，好多野要follow。好開心，呢幾日返工覺得自己有用左，覺得自己有價值左，真係要多謝社署畀個機會我去找返自己既價值出來。

>>July 20, 2005 at 1:24:49 AM GMT+8

2005 年 7 月 15 日 星期五 【晴】

尋日又要幫一個day off 同事手執database，又要同另一班同事係咁衝衝衝，係度「趕deadline」，而且「做完」之後又畀助理處長「加料」發還又做過，搞到我要遲成一個鐘先放工(6:10PM，其實差五分鐘先一個鐘，唔知有冇OT錢），都真係幾忙。不過冇緊要，我覺得呢個TASK幾好玩，好過要我做inventory，果份inventory真係悶死人。Gertrude（同事，task i/c)同我一齊走，我先知道原來我有份involve既呢個task係咁大、咁巴弊，唔怪得要萬事小心，亦都唔怪得AD（助理處長）咁緊張（我日日都見到佢！）。我幾同意Gertrude既一句：「做HQ可以學到好多野，學到一D你係讀書既時候學唔到既野，一個政府部門既HQ你估可以咁隨便畀到你入來，仲有得親身接觸佢入面既運作咩，而且做HQ OFFICE既野同出面做街既真係好唔同，做街你只係需要做下搞下活動之類咁就可以勒，呢D野你讀書既時候做學生會都學到啦。仲有，你做HQ，經常會見到D高官，好似Miss Chan（即AD）咁，成日會走來開會，你唔多唔少都可以係佢地身上學到唔少野，真係好難得架。」

今日大TASK冇咩進展，唔知係咪同Gertrude day off有關。咁我又拎返尋日未做完既database出來做埋佢。估唔到今日就係對住呢個database做成日，做做下，覺得好無癮，好爆悶，感覺到呢個CA既痛苦，不過佢好開心，佢話我幫左佢處理左一個令佢苦惱左好耐既統計問題，仲讚我好叻添，我當堂「自信」返晒來，都真係覺得自己幾「叻」下，哈哈。

AD連同兩個Chief再加兩個SS（全為部門高層）今日請大家食LUNCH（大食會）。好野，又慳返個Lunch，仲食得好飽添。我發現我真係日日都對住阿助理處長女士大人，其實我壓力好大。有個有趣發現，原來個office一有AD坐鎮既時候，係特別忙碌架，包括會多左好多電話啦，多左好多人按門鐘啦，D人又會走來走去影印、FAX、開會咁，但AD一出左去，成個OFFICE就會「靜」返D架啦，好奇哩。

>>July 16, 2005 at 12:19:34 AM GMT+8

2005 年 7 月 12 日 星期二 【晴】

尋日真係忙爆囉~~~~做到冇停手，係個office度chik cheuk咁轉。不過做得好開心，感覺好充實。

一輪忙碌過後，今日就慘囉，得成日對住部機係度整inventory，悶爆，好機械式囉，有幾個同事都特登走埋來「戥我慘」：「你悶唔悶呀？」「唉，要你做埋ｄ咁悶既野...」「你眼唔眼訓？」<<
今日助理處長「駕到」我地既office，仲「專程」來同我傾左幾句計添（處長：「我早幾日想搵你傾計又搵唔到喎。」<<其實佢早幾日係我隔離行過幾次，但我又唔知佢原來係助理處長，佢又唔知我就係果位「同學仔」），多謝班同事係處長面前誇讚我做野好畀心機同好幫得到手啦，搞到我唔係好識點應對（可能眼訓係其中一個原因）。陳肖齡助理處長其實係童軍既青少年活動處總監來架，我被某位同事「踢爆」左我係scout之後，陳處長就好雀躍咁問：「你邊區架？」我：「深旺。」陳：「咦，咁邊個旅架？」我：「七十五。」陳眉飛色舞地說：「英華？有蘇家樂呀，高sir架嘛。」......佢真係好熟.....我果時又鈍鈍地，應該即刻話：「高sir都係做社署架。」，睇下佢又知唔知，不過應該知，話晒人地都係個助理處長。.........唔留意唔知，果個張志業原來係陳處長係童軍界既「下屬」，早知既話，我一早同陳處長打個交道，通知佢我10號其實要考footdrill既，咁由佢「下令」阿張生「鬆ｄ手」同唔好下下「jer」住晒我咁，我就唔駛走去「逃避」個考試啦！哈哈～～～又一証明，呢個世界真係好細好細，人同人之間既關係其實真係好親密，即使你睇落唔識另一個人，但好可能原來你地都係識埋同一班人，彼此間係某些機緣下撞到然後認識，才彷然大晤。

_______________________________________
今日又多一份免費日報面世啦！
星島新聞集團旗下免費報章今日創刊！星島在昨日的「頭條記者會」上聲言要將《頭條》成為最大的免費報紙（指印行量）。

今朝搭地鐵返工，見到好多人都手執兩份免費報紙（即《都市日報》及《頭條日報》），而傳統大報就真係少左好多人買來睇。
《頭條》值得一讚既係，佢地ｄ排版好靚、好用心，真係好attractive，感覺上亦都有heart過《都市》，而且d料好齊，真係幾乎咩都有，同大報差不多。最誇張既係，細細份報紙居然印埋股市報價表出來，真係令我好驚訝。不過礙於《都市》已經一早奪得左地鐵網絡發行專營既關係，《頭條》係唔會好似《都市》咁放在站內供乘客取閱，而係要派人係站外門口都派發。依今日所見，一個職員負責晒一個地點，都真係幾辛苦，而且咁既發行方式實好蝕，希望《頭條》諗諗有咩改善方法。

《都市日報》為左「迎戰」同樣都係星期一至五免費派發既報紙《頭條日報》，特別出左一個廣告（未出街，但網上有得睇），睇來香港報界又有一番惡鬥。



來緊約九月，另一份免費報紙《AM730》出爐，真係三國鼎立囉，好睇好睇。

另，《頭條》歡迎全港市民做記者，每刊登一次新聞稿，可獲$100報酬，每月更會選出最佳新聞稿，更會以$5000作獎勵，一眾「中文人」不妨當呢個做副業，賺下外快。

>>July 13, 2005 at 12:33:15 AM GMT+8

2005 年 7 月 8 日 星期五 【乍寒還暖】

AL放榜。

據講好似普遍成績差左喎。冇6A狀元，得5A，仲要係六個入面得一個係傳統名校（BPS），其餘都係地區名英中，跟住又一大堆分析：名校優勢、教學語言問題、「拔尖」計劃。

今日都係我既放榜日，一科咁大把啦，過得去啦，算係咁啦，唉，無欲無求，但求合格，已經算好彩。呢個合格AND呢個放榜日見盡人性美善既一面，真係好感動架！全日不斷有FRIEND打電話來啦、SMS來啦、ICQ MSG來啦咁，真係要多謝各位支持、關心同鼓勵，我亦都FEEL到自己既存在，哈哈！當然要特別多謝兩個係考前不斷萬二分友情搭夠既義務拔刀相助、雪中送炭、不嫌其煩地借出教科書、NOTES、PAST PAPER，以及動用左不少時間同精神去教我呢一科（因為呢一科我新自修讀既，冇左佢地兩個，我一定冇可能係半年時間TAKE UP晒成個COURSE，而且拎到個PASS返來，補返隻腳，起碼有可能拎到張「三等豪華艙」入場券），衷心咁多謝你（地），Leo & Janis。<<<<咦，哈哈，未來「夫妻檔」？唔怪得咁岩Key啦，兩個都做左同一件「善事」（又拿你們兩個開開玩笑先）。

今日返工真係好唔專心啦，因為經常有電話打來（公及私都有），and我又要成日打電話去某ｄ特殊學校喎（公），搞到好累，打文件時差ｄ訓著左.......好彩，我有個同事讚我：「真係好幫得手。」

打去d特殊學校既時候畀我發現左，原來香港唔係只得DBS一間學校係用錄音式架（即：歡迎致電拔萃男書院，廣東話請按１字。），有幾間都係用呢隻，就好似小拔隔離果間天保民咁就係其中一個例子啦。

今日做既工作，令我諗起係2年前明報做SUMMER INTERN時的情景，都係做差不多既野。

今日好奇怪，張家樂尋日突然約我今日一齊食LUNCH啦（話12點放學冇人同佢食好悶，又順便陪下我咁喎），我笑佢個名日日係地鐵廣告度出現（廣告片斷形容：某女校女生上課時訓著左，仲發開口夢咁叫住「張家樂（同音）」，嚇到坐附近Ｄ同學即刻望住佢；個廣告其實係宣傳地鐵「用心服務」），估唔到佢既反應話：「梗係啦，我咁出名又靚仔。咁個女仔靚唔靚架？」唉，佢無時無刻都係問人佢靚唔靚仔啦，佢同邊個比較邊個靚仔D啦，有冇靚女介紹啦，又要問人拎靚女CONTACT啦咁，真係冇佢符。有冇人教到我點先管教得好呢個「細佬」？（＜＜頂佢唔順，佢話：「通常D細佬都鍾意HUP阿哥架啦。」，我回應：「睇你就知啦，成日HUP我。」XD）
夜晚又同班舊同學AND老師去左六國食BUFFET DINNER喎，$151/person，質素okay架，但少choice囉，包兩杯飲品，都okay okay啦。
我之所以話奇怪就係呢ｄ食飯dating全部係預約既，但紛紛揀左呢一日，我所以估係咪個天當係找左ｄ人來同我慶祝咁呢(to make the date special)？哈哈

>>July 10, 2005 at 2:06:04 AM GMT+8

2005 年 7 月 7 日 星期四 【乍寒還暖】

HORRIBLE!

本地：
1) 葵涌和宜合道一酒店住宅地盤天秤突然傾側，壓在剛進行建築工程的新廈外牆，天秤斷為兩截，操作人員當場被拋出，送院後不治。
2) 考評局：今年有6人考獲5A、50人考獲全U　首屆中中高考明放榜　中英俱跌

國際：
倫敦在本港時間近下午5點發生連環炸彈爆炸恐怖襲擊，事發在倫敦市中心，據報涉及多輛巴士、地鐵及多個地鐵站，暫逾三十人死，逾三百多人傷，阿蓋達組織承認責任。這是計2001年美國911事件、西班牙火車爆炸事件後，西方國家又一再受到恐怖襲擊威脅。美國在事件後已將反恐級別調至最高。

_______________________________________________
今日第二日返工，做D野比較有意義D，但時間又真係過得幾快咁，話咁快就話要收工。不過，我真係唔係幾滿意我部機冇得上網，搞到我連英國發生恐怖襲擊咁大件事都要係返到屋企睇到果少少好唔PRO既六點半新聞報道先知，仲搞到我唔知頭唔知路咁。

聽日高考放榜啦，食粥食飯都係靠佢架啦。我真係希望，好衷心咁希望我既努力（難得地既努力）唔會白廢，希望唔好令我失望啦。

希望．．．聽日張家樂特登冇啦啦走來約我食LUNCH，AND聽晚果餐貴爆酒店BUFFET（又係冇啦啦（之前約既），好彩唔係會展，但係去酒店喎），會係「同我慶祝」咁啦，哈哈！

>>July 8, 2005 at 12:16:50 AM GMT+8

2005 年 7 月 6 日 星期三 【酷熱】

Footprint Local (some maybe delayed):
1) 商台炒黃毓民及其節目監製 (7月2日聞)
2) 公眾殮房爆棚被揭屍疊屍 (7月4日聞)
3) 法院昨裁定「房署貪官」陳裘大（陳奕迅父）案永久終止聆訊　官指斥廉署犯基本法
4) 東廊今有運泥車「甩轆」　車輪墮橋1老翁遭不幸
5) 九龍公園泳池昨又再發現大量紅蟲　康文署被指刻意淡化事件
6) 政府就建西港島線跟地鐵進行磋商

Footprint Worldwide:
7) 倫敦將舉辦2012年奧運會
8) 菲律賓近日爆發反政府浪潮

Footprint Stars:
9) 韓紅星Rain旋風訪港後昨已離港
10) 前可口可樂代言人謝霆鋒加盟做百事可樂代言人
11) 陳冠希將兼任香港Levi's代言人　稍後將推其設計牛仔褲及男裝品牌Clot

Footprint Finance (delayed news):
12) 銀行早前紛紛調高利率並且已追過美國
13) 豪宅現雙門－長實渣甸山名門　火拼　新鴻基九龍站凱旋門

Footprint - the sign to show our legend

________________________________________________

第一日上班。
0845先到Morrison Hill社署戴麟趾夫人訓練中心度聽Briefing。
社署今年一共請左八十幾個summer intern。
社署真係好響應冷氣較到25.5度呢個新政策囉，成八十幾人坐係個Conference Room度真係一ｄ都唔覺得涼，我仲有少少微汗標左出來添。
個Briefing老實講，真係好悶，我好想訓覺，但又怕失禮，真係好惡頂，唯有死撐。
1045咁就完左Briefing第一節，只係得做field unit既留返係度，其餘既就要返回自己工作崗位。
我返社署HQ，梗要走。由Morrison行去胡忠真係散步行去都唔駛過15分鐘。
上到去report duty，d staff好驚訝咁同我講話：「我地仲以為你下晝先會來既添，我地仲未執好個位畀你添呀，真係唔好意思，估唔到你咁快就上到來添。」
一輪混亂過後，近1230，我終於有返屬於我既位，但未有lap top。
不過唔緊要，我果個幾鐘都幾夠「忙」，記password，記格局，認識下d人，clean up下我個位，咁都已經差不多。
言談間，我驚覺原來我做果個section (Rehabilitation and Medical Social Services Section, Social Welfare Dept HQ)係得我一個summer intern囉，換句話說，我係全office最細架啦，哈哈。
某staff話：「我地舊年請左兩個，今年就請得你一個架咋，所以好矜貴架，成個HQ請得冇幾個。其他果D做district office既INTERN可能要跑街、做家訪、搞活動，好前線。我地呢d做HQ既唔駛架，尤其我地SECTION呀，都係處理下D傷殘金架咋，聯絡下d NGO (Non-Government Org.)咁架咋。不過我地想叫你幫下手搞下D PROJECT咁，度度都幫下手咁啦，等你可以學多D野，唔駛徙左佢。」
1300放lunch，得自己一個去食，好悶，有d沮喪feeling。
1330上返去office「涼」「冷」氣，其實個lunch係去到1400既。
又同某位staff吹吹水，佢特別鍾意同我傾計，佢有仔有女(共三個)讀緊中學。佢話好難得「獨子」可以咁易同人溝通喎。不過佢有ｄ「歧視」讀文科既男仔......佢堅持男仔應該讀理科.......
1430，即過左lunch冇耐，我終於有屬於我既lap top啦，不過我就唔夠膽上網勒，費事畀人話啦（雖然我好想咁做）。
真係唔好以為第一日返工就一定冇野做，好「歎」。我下晝就畀我既上司塞左份「重任」畀我啦，就係叫我諗計去設計一個data table，用來入inventory record entry。仲叫我負責點算晒全個office既inventory，對下同果張inventory record有冇出入，有d咩要加，有d咩要減。至於果張inventory record sheet就經典囉，A3 size，超港英時代look（殘舊），佢仲千叮萬囑咁話果疊inventory record sheet好重要架，唔見左唔掂架咁，叫我全數拎去影印慢慢搞。
咁我個下晝就用晒係影印、研究果疊勁難理解既inventory record sheet，同諗計設計果份data table.
1717度，「好傾」阿姐提示我夠鐘鬆人（並冇話ask me to leave既），我最後都係1720度就鬆人byebye。

呢個經驗係幾得意同開心既，真係幾challenging，雖然對住果疊經典真係會悶死你。

_________________________________________________

近排鍾情於渣甸山名門既廣告，勁鍾意佢首廣告歌。
原來個廣告用左成千萬去製作，為左係要打造名門係豪宅一哥，長實係發展商一哥。
首廣告歌原來係上次都係為長實樓盤「泓景臺」作《我的驕傲》既陳光榮作既，今次「名門」首廣告歌都好受歡迎，不過首曲難轉為流行歌啦。
長實特登請左荷里活班底拍攝同製作，並動用左80名「亞洲愛樂管弦樂團」團員、《雪狼湖》名指揮黃立杰齊齊參與演奏首廣告歌。
「世紀光芒　卓卓輝煌......The Legend.....渣甸山　名門」
（後註：名門其實仲係樓花，唔似得凱旋門已經係現樓，入伙期大概係2006或2007年。座落係虎豹別墅旁，即大坑道真光對面。唔講唔知，原來果頭都叫做「渣甸山」，枉我一直都當佢仲係大坑（因為好近我舊居），真係失禮晒。）

>>July 7, 2005 at 9:33:09 PM GMT+8

2005 年 7 月 5 日 星期二 【清涼】

7月1日
左右派各自搞遊行，分別據報各有近三萬同近二萬人參加。

去左執埋City Run d手尾。真係好累。

7月2日
畀人「逼」左上山頂，發現凌霄閣大裝修，封晒圍板入唔到去。City Run果度係一個check point來，認真大獲。

經過連場大雨，視野真係清晰好多，能見度都算幾高下。香港真係好靚。

今日既午飯同晚飯係值得一讚既，兩間都係好野。一間係天后電器道「特色京川滬菜」，果度既麵同甜品都好好，環境服務都一流，仲免收加一，另外仲係入圍「新城2005第三屆食神爭霸戰」既食肆來，真係唔簡單；另外一間就係灣仔譚臣道既「藍寶餐廳」，先講門面包裝就已經正到渾，菜色都好有水準，尤以咖哩飯最好食，奶茶都沖得唔錯，餐前餐包鬆軟得來亦都夠新鮮，絕對唔會食落覺口乾咁，廁所裝修都很考究，果份細心值得一讚，不過呢間要加一既，除早餐可以$17起同以$3600起包全場搞私人Party任玩任食加任唱(有karaoke服務)外，其他價錢其實都相對地高，但絕對係值得推薦。

7月3日
又一早去左受罪。
今次明顯地少左好多人去，好明顯係畀人嚇怕左。
今次D教官冇咁癲惡啦，但礙於係三十幾度兼陽光猛烈的情況下，有很多人感覺不適。
我真係唔多想累街坊，唔想累佢地PASSING OUT唔到，我會積極考慮下星期唔去考。如果唔係，我個心會過意唔去。

7月4日
天文台今年首次發出酷熱天氣警告

美國發射左個如同洗衣機咁大SIZE既撞擊器去撞擊一粒彗星，成功撞左係粒彗星度撞左一個如足球場般大既洞，引發左爆炸。佢地叫呢個實驗做「太空煙花」。

____________________________________________________
近排唔知點解，d friend鍾意叫我同佢(地)一齊「入會」，有獅子會，又有青協既會，我真係唔知有冇咁多時間去參與咁多啦，我盡量啦。

>>July 5, 2005 at 1:27:28 AM GMT+8