2005 年 2 月 9 日 星期三 【炎熱】

大年初一，事事順境，心想事成，想要果樣得果樣，身體健康，咩好野都要晒！~~(爆貪心！)

年三十晚，落雨，認真掃興，買左幾束花咁就走啦，冇買乾貨，事實上今年ｄ乾貨吸引唔到我～係維園見到長毛，我豎手指公讚佢好野，哈哈；亦都係維園雷霆881商業一台果檔度見到「果隻」蔡素玉同埋余若薇係度做「左右大局」直播，勁多人影相，媽的！商台做乜無啦啦投個檔來做直播，係咪嫌維園唔夠逼人？！係商台檔旁果兩檔認真冇癮，旺丁唔旺財，因為ｄ人俾商台檔吸引晒目光。

大年初一例牌節目－－拜年。今回去大姨媽屋企。今年特別「齊人」喎（多人咁解，據知有25個在場，勁！搞ball都得呀！）。上次食團年飯俾人無啦啦潤左一句，今次特登就著靚ｄ赴會，全套Biem X Textwood Mix and Match Suit，全身總值過$2000，肯定「豔」壓全場（出街都不斷有人係咁望我；自己都覺得自己特別靚仔/型仔咁）！結果真係得到人「敬重」。我相信今次係我有史以來第一次有咁多人主動同我講野，搞到我應接不暇，而且句句正面喎：「嘩！著得好靚仔呀！」「好靚呀件suit！」「條tie同件衫襯得好靚呀！」「ｄ料好靚喎！」「我最鍾意男仔鍾意打扮架啦，打扮得靚靚仔仔果ｄ男仔先至好呀！」「wow！好大個仔呀！」「我離遠都見到你啦，著得咁靚！」「正言讀『醫』既真係唔同ｄ，你睇，一睇就似『醫生』樣！」（＜我即刻澄清話我讀psycho咋，唔係讀醫，wow，估唔到對方即刻回應話：「咁都係醫人丫，都係「醫生」呀，咁你都係叫讀「醫」呀」，滴汗.....）「你俾你個電話我，我有咩問題都搵你醫！」「嘩！讀心理咪好易捉到人d心理？」......and不斷問我係屬於咩department呀，修咩minor呀，有冇住hall呀，阿邊個邊個係我ｄ校友呀，blah blah blah....，就連大家食飯時由於太多人空氣唔流通個個滴晒汗咁食，我走去開把風扇嗟，即刻獲大把人讚賞：「好呀好呀！正呀！終於有涼風到啦！食到身水身汗」「哈！係喎，有把風扇我都唔識開添，真係蠢左呀！」，真係未試過咁「受歡迎」，我開口講野的次數應該係歷年之冠..............
世界真係好現實

>>February 10, 2005 at 1:10:47 AM GMT+8

2005 年 2 月 7 日 星期一 【陰晴不定】

剛過去的年廿八，當然做了「洗邋遢」，主打對象是我的電腦，想不到我的電腦原來是多麼的骯髒，滿佈黑黑的厚厚的棉狀塵埃，狀甚恐怖，花了我一整天時間去把它挖乾淨，他媽的，那個機箱不知為何會有那麼多孔穴，我之前也不察覺的，我把每個孔也撩一遍，活像挖耳孔鼻孔取出垢物一樣。

二月五日，團年飯活動是也（austin娘家也是同一日搞，真巧合）。我相信正常家庭每年都會吃至少三餐團年飯的（父家、母家、自己家），我家只會吃兩餐（當然就是自己家以及娘家啦），相信可以省了不少麻煩。但那天五舅的說話，雖他可能不經意或刻意，我卻十分介懷，且有點不滿。不知怎的，他忽地問：「卓行大d定正言大d架？」（明知故問，實不懷好意）我答：「我叫佢表弟既，咁梗係我大ｄ啦。」他回應：「點解卓行成熟過正言既。」（中啦，又借頭說三道四，非要落我面不可），我不語，心裡想「那你的意思是什麼，想表達什麼，是論外貌、打扮還是談吐、思想？其目的如何總言之是對我不懷好意。」姨丈急說：「佢會考啦嘛，殘ｄ丫嘛。」阿姨也接著說：「我都話佢殘架啦。」（算是幫我解圍吧？）舅又回應：「唔係殘呀，係成熟ｄ。」，我聽後真是眼也翻了，對他的言論深表不滿，但我沒有即時提出抗議，反正也是浪費唇舌。不久，他又揚聲問我那個讀中五的表弟：「俾你個email我啦，我得閒send d野俾你睇啦。」我一直坐在他對面，他沒理睬我一句，卻走去揚聲問坐到老遠的表弟，逗他聊天，請問這是否刻意去「落我面」？（老實說，我那麼的趕由寶馬山放學即跑入沙田去吃這頓飯，之後又要跑到尖沙咀去上補習課，我也自問算「俾足面」了，為何你們這些大人偏要走去借故忽地「落我面」或對我不尊重呢？我想我出席與否都不大重要，我出席只會受氣，我厭了。我不明白我究竟做錯了什麼，竟然遭人如此對待。這不是第一次發生的了，而是由我懂事開始、有記憶開始就已經如此。人心可畏！實在可畏！）

二月四日立春日，竟是我的black friday。陪我渡過不少嚴寒日子的七彩頸巾－－我的最愛，竟在這天離我而去。都只怪我的錯，這麼的不小心，弄掉了你，希望有好心人把你檢回去MTR Lost and Found，好讓我們重逢，miss you so much! Waiting you back home, love you!

>>February 7, 2005 at 2:03:33 AM GMT+8

2005 年 1 月 31 日 星期一 【乍雨乍晴】

2005年的1月行將過去，時間真的過得太快，人也老得太快。

在過去的一個星期裡，心情有起有跌，但總像發過一場夢般似的，太飄渺了，太不實在了。

期盼著「情況樂觀」的hospital visit，期盼著那一天的來臨，期盼著穿起醫生袍在威爾斯親王醫院裡遊走，期盼著看看那部MRI(磁力共震)。（看起來，我還是有虛榮心的，總覺得「專業人士」是高一等的）

看過大一國文的成績了。一詞記之曰：遺憾。

近來新聞熱講的，不再是海嘯，不再是趙老，而是紅火蟻。我不曉得為什麼這些小昆蟲為何忽然成為全城熱點，竟可以弄得人心惶惶。老實說，螞蟻隨處有，不同種類的螞蟻到處皆有，別傻著以為這些可以「把人致死地」的紅火蟻香港沒有，我想，只是大家不太留意罷了，何需鬧什麼不必要的恐慌，說：「紅火蟻攻陷屋村」了，像打仗打到來一般。其實，去年熱論的校園暴力問題也是一樣，年年代代也有的問題，每所學校不論等級的皆有的事實，又何需炒作得那麼嚴重，那麼恐怖呢？我不相信那些「有心人」當年就學時，沒有看見過這些事情。

昨天(1月30日)，聖若瑟書院的一百三十周年校慶開放日(Saint Joseph's College 130th Anniversary Grand Open Day)，比以往的，更進一步了。很專業，辦得很成功！縱使天公不造美，時常下著毛毛雨，但無減「聖糟仔」的熱情，不論舊生還是學生，家長還是老師(驚訝星期日的下午五時撞見Mrs. Cheung在校園內)，都拿出一份對學校的熱愛，齊齊以行動見証聖若瑟的百三載生日，氣氛令人動容！今年的開放日特意加插了煙火表演，主辦者(學生會)的創意、專業，簡直令人欽佩！我有幸身在其中，感受這種難以忘懷的氣氛，感受這種攝人的school spirit (全場人唱School Rally，叫Cheer: S...J...C...SJC Forever)，真的感到非常高興。美中不足的是，紀念品一早售罄，我買不到，難免有點失望。昨晚見到了很多人：Adrian、Edward、William、Fai、Wilson, and many more，hope they enjoyed the night either!
130 Grand Open Day的相簿：http://community.webshots.com/album/262834936NTrtka
最後加一句作結：「聖糟仔好野」！

>>February 1, 2005 at 12:44:01 AM GMT+8

2005 年 1 月 21 日 星期五 【陰晴不定】

過去既幾日都好懶，唔想寫日記，其實唔係冇野要記既。

1月18日，中共前總書記趙紫陽病逝，今次中共搞得好低調，又係因為六四政治因素，就連香港立法會d民主派話要默哀，都遭人話「違反基本法」，又搞到流會，亂七八糟。今日支聯會就係維園搞左個追悼會，話有成八千人去坐滿２個足球場。

個sem break好頹廢，原本真係想的起心肝趕溫business架（因為真係追唔切，好驚），但最後不敵心魔，唔係睡覺就係睇電視一係打機......

sem 2既時間表，真係差到冇眼睇．．．兩日激早堂，冇day-off（返足星期一至六），天地堂，但差不多係日日都係返一兩堂，頂多３堂，勁徙我時間，今回星期四夜晚我仲要返computer course架，我科business............
極壞消息：4.18考business，4.22交大一國文《孟子》閱讀報告
真是他媽的！
p.s.1：上回的《論語》成績好差，個心好"up"
p.s.2：激愛玩大富翁（可能有人會笑我低B，但真係激愛）

>>January 22, 2005 at 12:08:35 AM GMT+8

2005 年 1 月 13 日 星期四 【乍雨乍晴】

「暖」返得果幾日，又來凍過，我至怕就係凍架啦，好辛苦，又麻煩，著咁多衫好唔自在。今次仲衰，凍之餘再加兩分冷雨，行出街真係滋味在心頭。

last day for exam la, really so happy ar!!!! 尋晚已經冇乜心機溫psy，係咁玩玩玩，最後係10:xxpm先開始溫，仲要係拿住張psytrek (intro psy既interactive learning 既cd)來溫，貪佢夠方便，有人讀我聽，又有野玩，盡量培養我溫習既興趣，捱到3點度就訓。今次份mc好似難左好多，但d short question同essay question係比我想像中易囉。考完好想去玩，但咁凍，打消左個念頭。

今日新聞話捉左個男人用BT放左3套電影作點對點傳送，唉，有D驚，都係少用BT為妙，避下鋒頭先。

>>January 14, 2005 at 12:07:14 AM GMT+8

2005 年 1 月 2 日 星期日 【乍雨乍晴】

2005年新一年lu!!!!~~~~ 希望今年世界和平、無災無難、健健康康、平平安安、齊齊整整，我自己心想事成、轉會成功啦！哈哈！～～

依然繼續咁凍，凍到好懶，唔想郁，我又虛渡左個christmas vacation啦，乜都冇做過，sigh!!!

好多籌款賑災既活動，連油麻地街市都義賣，真係好耐都未見過人係咁有愛心架啦。
據聞好似開始爆發疫症，希望係「流料」啦！

04年12月26日，頒左新城勁爆....104個獎，真係令人眼都大埋，不愧係boxing day，party頒「獎」禮，認真勁爆
04年12月27日，好辛苦、感覺好無助同有ｄ絕望、灰心、氣餒既心情同極差既精神狀態下，搞左RadioNetwork一年一度既「至尊頒獎禮」，頒左51個獎（原本係50個，有個同票數，變左51)，比係勁爆真係少左成半，投票情況冇去年咁踴躍，收聽率就高過去年少少。係度多謝義務客串、拔刀相助、雪中送炭既暉，如果連佢都唔幫手，今次實搞唔成。我有諗過一係放棄唔搞，一係延期，但最後都準時"the show must go on"。經過今次，我真係有諗過唔再做、唔再搞落去，我有ｄ灰心同沮喪。我有諗過選擇退出。(今日-1月2日，睇返某人既日記，佢27號凌晨臭罵完人地勁爆之後，自己再搞自己既心水成績公布，再強烈咁叫人留意人地叱吒，好刻意咁幫人宣傳叱吒，但係一字都冇提過即晚搞既至尊。叫佢幫下手，唔得閒可以幫下手，冇晒回音，我自己一手一腳做好晒，我有懷疑過佢連幫手宣傳都冇做到。佢話好唔得閒，但好有時間去睇TVB8金曲榜（講都出面話有睇）、新城勁爆(斷估佢有睇先會咁臭罵)，咁點解會唔得閒幫手搞至尊呢？佢話要遲30分鐘搞，我以為佢會幫手啦，點知都冇，連幫下手宣傳都冇做到，okay，我都哽左佢算啦。尋晚叱吒啦，人地又擺到明、講到出口睇緊叱吒啦，仲寫埋出來，方死人唔記得係做緊叱吒咁。不突止，仲鬼死冇咁快就post左人地叱吒結果上佢自己個日記度，我睇渾成個日記，我完全睇唔到有任何野係關於至尊架囉，但好多叱吒囉，and佢自己個心水結果囉，睇到我真係好嬲。）
05年1月1日，叱吒頒獎禮，頒左44個拍膊頭「獎」，數目係少人好多呀，公信力呢？我唔多覺佢有公信力，縱使陳冠希今年第一次拎到叱吒獎我好開心之外，我都係咁話架啦。咩唱票環節，懶係公平公正公開咁，圍圍喂成個hall千幾人投票，係小圈子選舉，仲有所謂即場點票冇人知係咪真係有點過，數目字求其up都up到啦，冇人知係咪事實。最憎果個林海峰，絕頂無聊又唔好笑，仲成日懶係好好笑咁，真係嘔死，如果我係商台高層，我第一個炒佢！好對唔住，商台依然唔岩我口味，佢地既style我完全唔buy，我覺得好cheap同好嘔心，我唔覺得叱吒有ｄ咩咁好睇（即使唔知點解咁多人鍾意叱吒）！

發洩完，係時候食野，太凍好易消耗體力！

>>January 2, 2005 at 4:40:23 PM GMT+8

2004 年 12 月 31 日 星期五 【乍雨乍晴】

香 港 天 文 台 在 12 月 31 日 下 午 10 時 02 分 發 出 之 最 新
天 氣 報 告

下 午 10 時 天 文 台 錄 得 氣 溫 9 度 ， 濕 度 百 分 之 39 。

請 注 意 ：
強 烈 季 候 風 信 號 現 正 生 效 。
霜 凍 警 告 現 正 生 效 。
火 災 危 險 警 告 為 紅 色 ， 表 示 火 災 危 險 性 極 高 。
寒 冷 天 氣 警 告 現 正 生 效 ， 天 氣 寒 冷 可 能 影 響 健 康 ，
市 民 應 小 心 保 暖 。

本 港 其 他 地 區 的 氣 溫 ：

京 士 柏 7 度 ，
黃 竹 坑 8 度 ，
打 鼓 嶺 7 度 ，
流 浮 山 7 度 ，
大 埔 8 度 ，
沙 田 8 度 ，
屯 門 9 度 ，
將 軍 澳 7 度 ，
西 貢 8 度 ，
長 洲 8 度 ，
赤 ~P 角 9 度 ，
青 衣 8 度 ，
石 崗 7 度 。

元旦日將是43年來最冷
======

12月26日 本港時間早上8時59分
印尼蘇門答臘島北部
發生黎克特制9.0級大地震
觸發海嘯
鄰近多國死傷慘重

南亞地震和海嘯造成的總死亡人數至今接近12萬4千人，其中印尼的遇難者數字可能高達10萬。
各國最新公布的死亡數字:印尼79,940(可能高達10萬人);斯里蘭卡28,508人;印度10,736人(安達曼-尼科巴群島上三千名島民已找到，印度官方把遇難數字向下修訂);泰國4,500人(2,230人為外國遊客);東非137人;馬爾代夫67人;馬來西亞72人(另218人傷);緬甸36人(另45人傷);孟加拉2人。
至今有大約5000名外國遊客失蹤，其中瑞典稱，可能多達1000名國民在災區中喪生。

從海嘯災區返國的瑞典外長說罹難人數可能飆升至20萬人。

美國國家地質觀測中心的地質學家哈德納特表示，這次地震影響蘇門答臘周邊島嶼，小島可能產生多達20公尺的移位。南加州大學一名學者也表示，強震威力也把蘇門答臘往西南移動了30多公尺，改變了地圖樣貌。

這次強震的能量由於引爆一百萬顆在日本所投下的原子彈，台灣學者也表示，地震造成地殼外形變化，讓地球在地震發生時有可能自轉速度慢了「零點零幾秒」。

>>December 31, 2004 at 11:20:14 PM GMT+8

2004 年 12 月 15 日 星期三 【微冷】

真係好想大大力咁呼一大口氣出來!
幾經辛苦，我終於都完成左果6000字既《論語》論文，仲尋日交左添，由於前一晚捱通頂冇訓過，冇咁既精神寫返日記，所以今日先補返寫。寫完既感覺真係好興奮，覺得自己好勁，《論語》呢ｄ咁哲學既古文我都可以吹到6000幾字出來，唔寫個服字俾自己真係覺得徙。lol....交果時，真係有ｄ唔捨得交出去，自己做得咁辛苦，真係有ｄ唔捨得，好想自己不斷翻揭回味回味品嘗品嘗，始終都係自己第一次寫咁多字出來喎。個個見到我本野都嘩嘩聲，哈哈！
尋日真係勁唔掂！朝早返去只係覺得metally好累，但physically好變態咁仲好精神，但個腦已經轉唔到。上counselling既personal growth，得果小貓幾隻，勁驚囉。講到我棵樹，真係好驚訝。估唔到一幅咁既畫都可以睇穿一個人，仲要睇得好準下，好犀利囉，不得不寫個服字！我「係一個好有條理既人，但有好多煩惱，好需要安全感，係一大班人既時候我唔係spotlight果個，我好想行出去做spotlight，但我唔自我中心，我好想掩蓋光芒(但好可惜有時掩唔到:P)，我個人好講求fair，我好刻意做到自己好開心但可能內心唔係咁開心，我仲未搵到自己條路自己個方向，仲未認識到自己，我有好多野刻意收埋唔講出來」（以上摘錄自d同學睇完幅畫後既感想，注意一點係...起初佢地唔知邊個畫既）.....講親出來都係好中......真係好驚，但又好驚喜囉！下晝上大一國文.....簡直唔掂啦，捱唔住啦，勁釣魚囉.....畢竟之前冇訓過.....。放學，同濤濤講電話(因為一早約左佢去佢度拿部pocket pc，但最後computer soc冇開門拿不到，但我又上左車，結果去同佢去左高街新寶馬食tea，玩佢部pocket pc)，佢話我好唔掂喎，完全轉唔到，問非所答，成個死樣咁，鬼咩.....真係魂不附體囉我果時....我又聽唔清楚佢講ｄ乜，咪亂答囉，我又唔知自己講緊咩喎....哈哈
返屋企怒睡１２小時，今日終於都叫精神ｄ。尋日成日都覺得好凍，真係唔夠訓(冇訓），個人既體溫係低ｄ架喎！今日就唔同啦，哈哈，windbreaker都冇帶呀我！
勁奇怪既係......今日放學，濤濤同暉都好準時打俾我囉！濤濤幫我拿了機啦，猛咁叫我上去，可惜我今日要教補習，上唔到去，改左做聽日啦。暉又猛叫我join佢地個barbeque，睇下點啦，哈哈！今晚，藍振生突然msn來叫我join 5C gathering，叫我約人喎，話搞手係濤濤，佢係person in charge喎，仲叫我12:30am打俾佢傾細節...認真異常！ lol
今日放學去左電氣道蓬來齋館買左ｄ小食．．勁正呀．．．勁想食！真開心！

P.S.: 尋日睇到濤濤既pocket word入面佢寫既一篇文講旺角朗豪坊。佢形容為「入左去好似可以長生不死咁」(佢寫得用詞優美好多，key word係「長生不死」)，我捧腹大笑了一餐，令我諗起12月5日去過朗豪坊既一d感想。等我記載一下大家係點形容朗豪坊呢個旺角新地標先：
劉浩賢：成個倉鼠籠咁，係經包裝過既旺角商場，好旺角
黃俊濤：入到去可以長生不死
我：勁似入左一個類似盤古開天式爆開既大岩石入面咁，勁石feel，係一個雜種商場，又有高檔(勁少)，又好旺角格(勁多旺角look小商店），奇奇怪怪

>>December 15, 2004 at 11:33:58 PM GMT+8

2004 年 11 月 30 日 星期二 【微冷】

道維生日快樂！

今日下晝堂國文變左做talk，係經各同學選擇走堂冇人陪我既情況下，我都走埋堂。齊齊拉大隊落灣仔食吉野，今次係呢個月第２次拉大隊去吉野，仲記得上次人人隊兩碗囉，吹水吹到勁爆笑。

返屋企果時順便睇下前幾日燃燒左40小時、曾一度逼近愉景灣民居的大嶼山大火既痕跡，原來真係覆原甚大喎，連好接近北大嶼山公路既一大片山坡都有被燒過既痕跡，由欣澳山頭一直殺過去東涌。其實早幾日大火既時候，我有擔心過果次行大東山見到果隻牛呀，真係希望佢冇事啦！仲記得星期六晚出去尖咀果時，見到ｄ火勢真係好猛囉！

旺角新地標朗豪坊入面既阿拉麪館連日來一共有102人食物中毒，真係好嚴重呀！

近呢幾日真係多事之秋啦~

>>November 30, 2004 at 9:43:25 PM GMT+8

2004 年 11 月 29 日 星期一 【陰晴不定】

今日既日記好散亂，因為發生左好多野，好多野想講，想記低～

＝＝＝＝

今朝返學，坐地鐵，咁原本我坐果邊有個男人坐玻璃牆位，跟住有另一個男人背著一大袋信件咁（好似做信差咁）行埋來，坐左去我同原本坐係度果個男人中間，坐左冇耐，原本坐係度果個男人起身行左去第二卡坐，我心諗，冇理由有位（仲要挨邊位）唔坐，要行去第二卡坐架，正奇怪，又有一個女人走來坐落來我同「信差」中間，坐左一陣，臨開車，個女人又突然企係身，由我既右邊行去我既左邊，坐低（即係由坐係我右邊變左做坐我左邊），擺明有心避開「信差」，個女人坐落去時，仲望一望「信差」添，我既奇怪變得更加不可思議，唔知乜事連續有2個人刻意避開一個人。跟住，車去到青衣站，有一女子上車坐左我斜對面，亦即「信差」既對面，那女子一坐十秒不夠，起身，「即」一聲，又行過去我既左邊另一卡車廂，佢見到冇位坐，寧願企係門邊，佢企係果度時望返過來，見到我望住佢，佢個樣好無奈咁。車到荔景站，企門邊果個女子終於覓得位子坐。真真真奇怪，我真係唔知發生咩事，只係覺得好有趣，我望一望果個「信差」阿叔，佢睇落又冇乜野喎，唔知點解。香港人好奇怪。

＝＝＝＝

今日係塊民主牆度睇到有關系會俾人插既野，有ｄ同情支莊，但其實我又覺得支莊有ｄ人既public relations手腕真係差左少少啦，所以先搞到今次咁大劑，希望佢地經一事長一智啦，year one既莊員應該唔關事既，希望佢地唔會受呢件事影響到啦。

＝＝＝＝

congrat to the new (in fact the original one) SU cabinet - swear! Susan, you guys well done! that means, i can join those Joint-U functions la!!!!!

＝＝＝＝

今日psy mid-term 2nd test，又係40MCQs，今次感覺唔錯喎，希望考得好好睇睇啦！

＝＝＝＝

放學，同bobo, charles「企」地鐵返歸。差不多去到奧運站時，企係我隔離（其實係我背住佢既）既一位後生靚仔狂嘔喎，blah blah聲係咁嘔，周圍既人都四散囉，有ｄ仲nin住個鼻，咁我見到唔對路，望望後面發現有人嘔（原本我唔知佢嘔既），咁我就本能地避開啦，見佢不停係咁嘔有ｄ唔對路，又冇人幫佢，佢又好唔想但控制唔到自己咁係咁嘔，見到佢好尷尬，我覺得佢好慘，再見到ｄ人車門一開就奔左出車門等下一班，我覺得ｄ人勁差囉，眼望望又唔幫手，又閃又避，問候又冇句，香港人既質素真係好差囉。跟住我話「不如通知車長啦！」，我地係咁逼逼逼逼去個「通知車長緊急制」度，我地猛叫ｄ人通知車長，ｄ人好似無慟於衷咁，只係識得望望望，nin鼻，真係好唔要得。結果係bobo伸手去mang果個緊急制通知車長，bobo, well done, i'm so proud of you!我望一望嘔緊果位靚仔，佢真係好慘，人地都唔想嘔架，嘔好自在呀，仲要嘔到成褲成鞋成地都係，又尷尬喎，需知果時正值下班繁忙時間，佢嘔一嘔搞到列車延誤，仲麻煩左咁多人，我從佢既表情睇得出佢好唔好意思同好尷尬，我真係好同情佢既處景囉，我問charles同bobo有冇tissue畀佢，得charles有，阿靚仔見到我地幫左佢咁多，唔好意思咁講左佢「唔該晒，唔駛啦，我有啦，okay ga la！你地係咪通知左車長？」我答佢係，但我又見等左咁耐都冇人來，行左出車廂睇，班mtr staff居然逐卡睇囉，乜佢地唔知邊度發出來既訊號架咩，我唯有係咁yaap手叫佢地行來車尾（佢地係車頭同車中），d mtr staff扶左阿靚仔出去，我頂唔順，都出埋去月台，因為好臭，而且我有潔癖，怕嘔吐物，我驚我成日凝住唔知點捱到落東涌，故下次決定。香港人真係質素好差，好唔掂囉！

返到屋企，即刻消毒晒所有衫褲同袋。靚仔佢嘔得出來，都似係唔舒服啦。～

＝＝＝＝

夜晚睇到新聞話新鴻基同新創建決定左要拆空置多年既居屋樓王紅磡紅灣半島，我真係嬲到媽媽聲。佢地話咩「把錯誤糾正過來」、「均不能達到私人樓宇質素的標準，故決定全面拆卸，以致可達到地盡其用。」，都痴X線既！咩叫唔達標呀？唔達標你又起？又賣出來做居屋？當買居屋既人係咩呀？自己講得出唔達標既野都起得出簡直係自拆招牌，冇腦！仲有所謂唔達標就要拆架啦？乜而家唔住得人咩？係危樓？點解會冇人住？起得就有人住架啦，係你地班X街發展商係度唔放盤係度瘟臭咋嘛？紅灣起左咁耐從未住過人，而家就話要拆，浪唔浪費D呀？做咩要無啦啦製造咁多建築廢料呀？！而家決定要拆，就一定唔係「把錯誤糾正過來」架啦，反而越做越錯，越來越離譜。好心阿郭生s同阿鄭生s用腦諗下，而家你地咁做簡直就係將自己公司辛苦經營咁多年既招牌拆去囉，咁樣值唔值呀？連呢ｄ咁簡單既做生意方式都唔識，唔該新地同新世界ｄ人返屋企勤讀AL Business Studies啦！真係好火滾！

＝＝＝＝

今日發生左好多令我對香港、對香港人好失望既野，唔該香港人自己反省反省，香港人再配唔配做一個已發展國際大都會既城市人！

>>November 30, 2004 at 12:48:02 AM GMT+8