2006 年 8 月 6 日 星期日 【綿綿細雨】

宿營完了。
多謝張家樂的努力，你的努力並沒有白費！
「今個camp行程好緊密呀，不過好好玩，所以我唔覺得（支力）呀！」
一位幼童軍是這樣告訴他的媽媽。
可是有一些人處事的手法，我真的沒辦法認同。
希望紅隊的小朋友不要再為分數、名次而感到不開心，不要再為一些人的處事手法而感到不快，只要保得住貞節，什麼也贏回來了！
很高興絕大部分P.6都有回來參與，真難得。

>>August 10, 2006 at 12:54:22 AM GMT+8

2006 年 8 月 3 日 星期四 【驟雨】


點解咁大風都未有八號信號? 隔離澳門都掛左啦!

>>August 3, 2006 at 11:22:27 PM GMT+8

2006 年 8 月 2 日 星期三 【驟雨】

今朝係成凌晨點幾先返到屋企囉！仲要係天文台發出左一號戒備信號成12個鐘頭後，我先知道原來已經係1號波！

尋日係為期18日既中期人口統計既最後一日，我地奉太后之命，特別要成9am就要返到centre，準備出發派信！最慘都係阿Jay同Michael，居然今日都仲有appointment！最離譜都係香港電台，我出問口前聽到某DJ呼籲叫D抽中左既住戶如果未做訪問，就趁最後一日打電話落appointment，大佬呀，話明8月1日最後一日係派自填問卷架，咪搵來搞啦！

星期日我盡最後努力掃晒d樓，跟住仆返centre，係咁譯碼，務求係前日交晒100%。果隻太后離晒譜，一時一樣，又叫我地7月31日交晒所有卷，包括NC卷，到前日又叫我地唔好交住，我地交晒日報表勒，又叫我地將D NC卷填埋落日報表，真係朝令夕改，搞到好麻煩！我有理冇理，譯晒D卷就唔理佢啦，落晒日報表，趁住有少少清閒時間，幫忙到爆要飲靜心既阿媽手處理下佢堆積如山既ACE事務啦，咁我又成為左AACE啦...LOL！

今日我派自填問卷時，陽光普照，天氣靚到點會估到佢已經一號波丫（中午發一號信號）！派完返到CENTRE，又做AACE，跟住三點幾，我地組已經清晒所有野，PACK埋箱，排埋檯，坐係度等收工啦！太后太乞人憎，我地影相冇預佢，佢自己都「好識做」，見我地影大合照時，走左出去，正值此時，我地發現左佢既統計員身份證明書！

好難得3點半，太后放有2個鐘TIME-OFF既人走（大部分人，我係其中一個），跟住再係4點半，放埋冇TIME-OFF既人走（即係走晒）！我地放左工，因為未食飯，太肚餓，走左去飲茶，由於太晏既關係，冇啖好食，但畀我地見識左咩叫「懷舊蒸燒賣」，原來係兩舊肉丸上面分別放豬潤同埋豬肚，簡直同我地食開既燒賣係兩回事！飲完茶大顆兒就出左旺角，搵gathering既地方（樓上cafe），搵左好多間，最後落腳係登打士街既5/F Cafe（上左去同系既10/F Super Club Cafe），我都係第一次去呢d樓上cafe咋，感覺好靚好舒服，有床有sofa有玩具有書睇有wireless lan，但食野飲野既收費比較貴，尋晚大家就已經每人要$80.2落樓啦！

我地成晚喪玩大富翁中國版，後因為要開餐就冇左繼續，食完野之後玩killer，好正呀！但唔知做乜咁好彩喎，我居然做左3次killer囉！仲有兩次係連續兩舖都做killer添！玩到畀隔離組阿媽(ACE01) Creamy話我d演技好好添！我地玩到過左12點先走人，我咁大個仔都係第一次咁夜仲係旺角出沒，真係幾驚下，一落到樓，見到好多妙齡女子企係街上面「兜搭」，仲驚，勁想速逃。到搭地鐵既時候，睇地鐵資趣台先知到係一號波，果時即刻O晒咀，估到估佢唔到！

by the way，係呢幾日我被人封左以上稱號：「冷知識王」、「Owl博士」（Owl因同我個英文名前頭發音近似）。

0910 - 準備出發派自填問卷啦!!!

「統計員 好易認」
-此乃標準打扮：規定要穿長褲的，不可穿短褲、涼鞋

我地檯合照
（後排）Paul(08)、Jay(10)、Kevin(14)、安(12)、我(11)
（前排）Queenie(13)、Betty媽(ACE02)、Becky(09)

Division 15-02 合照

執野準備收工！
前排第二行左起第二張檯放左件統計員制服果張檯就係我張檯來架啦！

呢位就係太后　（組長）
現任「旺角地鐵站步行五分鐘某中學」既李老師
經查證所任教中學為「潮X」

gathering 去！！！　旺角10/F Cafe　（未齊人）

大富翁中國版
未玩晒呀！仲未有人起樓囉！

因為呢18日既By-census，就多左咁多個東涌之友，我阿媽笑話就同d師奶去到新區識左班師奶一樣。記住我地呢班「東涌冰雪皇朝之友會」要多多出來gathering啦！

2006 年 7 月 30 日 星期日 【微雨】

為尋日係大家樂整爆左芒既手機哀悼，今日買返個殼換，唉，咁就要同我個靚靚原裝1010殼永別啦！

今日終於清晒所有客啦，我要聽日交齊100%！

今日阿媽同阿安終於搵太上皇蘇生報寸，踢爆太后７宗罪，估唔到太上皇略知一二，聲稱會跟進，真係大快人心。

2006 年 7 月 27 日 星期四 【乍寒還暖】

難得今日太后唔上朝，大家終於有啖自由既空氣吸下、有寧靜既環境畀對耳仔享受下！奉「太后御准稅/碎務大臣」Betty媽之命，今日唔駛出街，真係唔知幾好！不過進度表又出左，因為之前兩日要陪阿安做segment，冇得做自己野，搞到我急跌到尾二！

尋日太后上朝，開國會，「垂簾聽政」，叫眾卿家稟報近日政績。一如上星期，又要人放低晒所有野，面向佢如同面向聖上般開會，惟只欠我們要跪下來大呼「太后千歲千千歲」，然後她說「眾卿家平身」而已！我冒昧向太后提出：「我地１點鐘先report duty，你要我地１點９就交晒日報表畀你，得果９個字點譯得切畀你呀，譯一份問卷既碼都要成半個鐘啦！夜晚又話係黃金時間，我地出晒去做野，咁邊度有時間去譯卷，跟住又話我地交得少又剩，人地華富centre３點先截數，我地就１點９，爭咁遠時間，好唔公道嗟！」，誰知太后拋下聖言：「蘇生（我地centre個主管）係好人來既，咁每個centre都有佢自己既rules同做野方式架啦！我睇到既就係，唔係關個截數時間事，係有人專登拖數......」坐在我旁邊的Queenie終於按捺不住心中那團怒火，終於開口向太后發炮：「咁你既意思即係咩，係你見到有人拖數定係咩先......」太后：「咁梗係我見到有人拖數先咁講啦！」Queenie:「咁你即係話我地組有人係度拖數咁話啦！」太后：「我見得到就梗係我地自己組啦！」Queenie：「哦，咁你明言係邊一個係度拖數勒！你咁既意思即係話我地蛇王偷懶嗟，我地好多野做架！」太后沒有答上咀。隨即輪到阿Paul向太后宣洩不滿：「你搵d人來幫手譯卷，結果仲全部譯錯晒，仲要我擦過晒ｄ野再做過，仲徙時間啦！」太后：「咁搵返我地組既人譯囉！」之後，太后搬出蘇生呢個太上皇做擋箭牌，聲言：「蘇生話課室內一切電器都唔可以開！」跟住我地齊聲寸佢：「咁即係唔駛開冷氣同開燈啦！」太后：「我既意思係話課室入面既收音機呀、電腦呀、電視呀都唔可以開，我地唔知係咪好彩，冇電視，高ｄ年班果ｄ房有電視，有一組開左電視，結果全部收晒warning letter......」Kevin忍唔住要開口寸太后：「咁如果我帶個火牛返來差電，咁咪即係偷呢度ｄ電來用？好大罪架喎咁！」，呢句擺明明寸日日返來差手機既太后，太后冇聲出。

真係未試過返工可以返到咁慶。尋日個會勁大火藥味。又畀我地批中，太后忽然御准係課室度食pizza，仲要用佢張信用卡來訂，之後實要我地畀返錢佢，因為佢連請野飲都唔肯請，結果佢真係趁所有人走晒出去做野既時候，下聖旨叫Betty媽向我地追收款項！有冇搞錯呀！作為CE請果幾百蚊野都唔肯，仲要追數呢Ｄ私人事務交畀ACE做，擺明係公器私用啦，ACE既責任唔係同佢處理呢D私人野架囉！最後我地齊齊拒絕交，仲叫ACE畀返張單太后，要追錢由佢自己口講返出來問我地收。

我地真係再忍唔住，臨走之前，係太后面前，好大聲咁講左句：「退朝啦！眾卿家換官服走人啦！」

2006 年 7 月 24 日 星期一 【清涼】

今晚有一條＊＊，我係上佢屋企應約之前，打左電話畀佢confirm返幾時我會上到佢屋企度做訪問，豈料我搭搭下lift去緊佢屋企途中，居然收到組長太后既電話：「喂，你今晚係咪有個case，number係****-**-*，戶主係*小姐，佢岩岩打上hotline投訴你冇覆佢電話confirm時間喎！」
我：「（頭頂打左個大感歎號）下？！我打左畀佢架啦喎，我而家仲企係佢屋企門口添（岩岩到左果一層樓咁解）！」
太后：「下？！乜咁奇怪既，咁冇野啦，你入去做訪問啦！」

真係乜野奇人癲人都有！唔係咁快失憶呀嘛，定係得閒無事吃飽飯冇野柯，就打去hotline玩complain下化！真係無辜辜囉！仲要入到去，勁死寸，好似阻佢發達咁。佢阿媽果句老生常談先夠無聊：「次次抽中我地咁好彩，又唔見我仲六合彩！？」，跟住果個＊小姐就以寸爆既咀臉咁問：「係囉，我都好想知道你地統計處係點抽人既，佢用d乜野來抽？」

另外，今晚居然訪問中自己既小師弟，哈哈！係度大談某老師既野！

問到話做CENSUS做得開唔開心，同自己一班ER、ACE果時咪開心囉，對住個煩爆太后CE就真係唔方開心，對住難頂既客更加唔該佢！日日係咁追數、趕數，日日係咁畀人話「哎呀！你地交得咁少，未達標呀！」，填呢樣填果樣但十居其九係無聊浪費既文件，日日宣佈每日通告話收到Ｄ人投訴呢樣果樣乜都投訴一餐，又要出街訪問、洗樓、應APPOINTMENT、即時CONFIRM APPOINTMENT、CODING、彈返轉頭再問，勁多野做，仲要做埋好多好多無聊文書工作，聽埋好多好多奪命追魂催，好似趕狗咁趕：「簽左到未？快D簽到呀！」「交日報表啦！快Ｄ交啦！仲有邊個未交呀？１１，交左未呀？」「出門口之前交行程PLANNING同FULL ADDRESS呀！」「報左數未？仲有邊個未報數？下？得咁少？你有冇NC CASE呀？交左Complete果d先啦！」「我地仲未達標呀！阿邊個邊個，你做得太少啦(進度表被highlighted)，快d呀！」「我地組個進度係全個centre 15入面排第7，我地centre15一共有14組，太慢啦！」「交左車資申報表未呀？日日清呀，唔好拖呀！」「收到appointment即刻覆d住戶呀！仲有冇人未覆呀？」「邊個聽日朝早有appointment架？邊個聽日要落time off或者返A更(10:00-19:00)架？」「邊個要問卷，出來拎，簽返名。仲有冇人要？」「邊個要拎souvenir架？出來拎完簽返名」「阿邊個邊個，你出出來丫......（阿邊個邊個正在忙緊）」「阿XX（統計員編號）返左來未？仲未返？打去搵佢，睇下佢係邊。（指人去打）」「食完野好清理返佢喎！」「阿邊個邊個，你冇野做呀？交左幾多份呀？（邊個邊個正在CODING後小休一會之後再CODE過」「對住D問卷好眼訓，乜你地唔眼訓架咩？」......

>>July 25, 2006 at 3:01:44 AM GMT+8

2006 年 7 月 19 日 星期三 【晴】

跟余鎮洋煲粥煲到凌晨4點半，大家吐吐苦水又傾下兩個centre既分別，原來真係幾唔standard，佢地3點鐘先截數，我地1點45分就截，而我地返工時間只不過係1點鐘！不過呢樣野今日反映左啦，都係果句啦，佢有佢1點45分cut數，至多加多個5:30畀你。

經過連續兩日都唔好受後，今日終於有返d甜頭啦！

一大早11點幾，終於都有客覆我既NC Card（未能接觸住戶通知卡）啦，好彩我一直有開到個工作手提，咁就唔駛miss左個call啦！點知一返到去centre，我居然滿檯都係appointment！由之前冇，到今日暴升5個，真係好啦！我既辛苦終於有回報啦，唔駛我走上走落咁多次，仲要畀人鬧個一面屁！

今日又係去果個屋苑度再洗一次樓，呢棟樓我星期一洗過，大部分都接觸唔到個住戶，由於今晚係提早5點幾同成班（８個Enumerator加１個ACE助理組長）「冰雪樂園」（冰乃隔離檯一個非常出眾之女子名字、雪乃CE組長之名字）食完Pizza Hut後至去既，即刻執返3-4個住戶返來，都算好好架啦！邊個叫我地做既區同個centre離咁遠！最衰就係今日畀我知道左我地centre隔離間學校都係centre來，搞錯呀，一連租兩間隔離既「山頂學校」做centre，都唔分返一個去東涌，真係唔知想點！

今次不但冇住戶鬧，仲唔知幾nice咁同我吹下水，有一戶更加同我講佢因為岩岩去完旅行返，所以我星期一搵唔到佢，仲請左我食地道小食添，我有推佢架，推左好多次，佢係都要我試下，我就應酬左佢啦！

>>July 25, 2006 at 3:00:38 AM GMT+8

2006 年 7 月 18 日 星期二 【晴】

連續第二日無端端做左出氣袋，又畀d客鬧到一面屁，今次仲要係尋日既升級版，真係好無癮、好無奈，好彩partner阿安係同一層做，佢聽到個住戶咁大聲係度鬧三鬧四覺得唔妥，擔心我會畀人郁，走左來幫手支援，如果冇佢係度，我都唔知點算，冇理由係個「客」面前打電話要求增援，又冇理由唔打完場就走人，更加冇理由企係度冇啦啦畀人鬧個狗血淋頭，咁樣實是太過冤枉、委屈了！

事緣今日又係做返尋日既屋苑，不過係另一棟。

我一去到某單位，該單位打開左門，我照樣按鐘，應門既係一位七十幾八十歲既阿伯，佢一聽到係「統計處既統計員，而家做緊2006中期人口統計......」便即破口大聲叱罵：「有乜野好統計？！政府做呢d統計都係想捉我地講錯野，然後就捉我地架嗟！政府有電腦一（禁）就睇到晒d資料架啦，房屋署又有，稅務局又有，駛乜做訪問？！」
我：「（官腔）哦，中期人口統計既資料係絕對保密既，所以唔會有其他人知既.......（未講完）」
住戶：「政府講就講話保密架嗟！佢地有電腦（禁），我有幾多錢積蓄，都查到啦！政府就專揀有少少積蓄果d來做訪問，就係想捉我地有冇講錯野！我話你知呀，我拎$705生果金已經夠食架啦！我個仔畀$5000我，但佢交稅....(忘記了詳細內容，總之就話政府一查就會查到佢有幾多資產），話明人口統計，我話畀你知，我呢度住4個人乜得囉，駛乜問咁多野，做d乜野訪問，我畀埋名你都得（跟住係度up自己個名）。我同你講呀，你第時讀完書都唔好做律師呀，佢地好鍾意捉人告人架，做埋好多陰質野！政府果d高層呀，唔會有子孫架（我O晒咀），佢地搵你地來做呢D陰質野架咋！」真係語出驚人！
我：「今次中期人口統計係長問卷，主要係收集數據做發展既，一切資料會保密既，政府其他部門都唔可以拎到你D資料既......」
住戶：「總之你而家要問就好問，你遲D問我就唔會答你，駛乜等齊人答嗟，我答晒咪得囉，我話你知有4個人，畀埋名你都得！」
我：「咁即係你而家方便做訪問啦，但因為要保障你既個人資料私隱，我地唔可以企係門口做訪問架，咁樣唔岩規矩架！」
住戶：「你駛乜入來嗟，我唔會畀你入來！我怕咩私人外洩呀？！我就係企係度答你，你問就好而家問。」
呢個咁艱難既時間，幸得阿安出手，悄悄致電組長請示應該點樣做，果個住戶阿伯既聲音之大連電話既另一方都聽得一清二楚！
阿安請示完後，出手相救，佢先聲明企係門口做係會保障唔到個人私隱，而係個住戶要求係咁樣做，而唔理會個人私隱問題，所以如果有私隱外洩我地就唔負責，跟住我就好快咁同阿伯go through成份問卷，因為佢好insist佢自己一次過答晒，所以畀佢代答，之但係佢問乜都唔知道，真係畀佢吹脹！訪問途中，佢太太返來，一見到咁既情景，居然走返出去升降機大堂扮唔係該戶成員（因為我地走時見到佢返入屋）！
我叫阿伯畀個聯絡電話我（統計處要求向每戶拎聯絡電話），點知佢咁答：「電話我可以畀你，但係所有政府打來既電話我都唔會聽！你地再上來我都唔會睬你！」

呢個咁惡啃既case，因為阿伯乜都唔知，搞到我仲要繼續follow up，我真係唔想再做落去，我覺得好無癮，我只係暑期賺下錢嗟，我做乜要搞到咁折墮係咁畀人鬧，仲要錯不在我，唔關我事，你唔好鬧我丫唔該！如果做份暑期工都叫做陰質野，我真係冇野好講！

香港人實在太冇文化、修養、禮貌、公民意識，真係好離譜！

>>July 19, 2006 at 12:34:30 AM GMT+8

2006 年 7 月 17 日 星期一 【微雨】

今日做得好唔開心，仲有d嬲，香港人d禮貌同態度真係好唔得，亦唔識咩叫公民責任，好冇質素！

事緣今日去到某一家度做訪問，對方是一位年約六十歲既女士，一開門見到統計員（即係我），就即刻以勁惡劣既態度係度發爛渣：「你地統計處離晒大譜架，十幾廿年來成日都抽中我既，我又唔見我地隔離屋有份架喎，以前舊屋又係咁，呢度又係咁，係都要成日抽中我地既，我懷疑你地統計處跟本就唔係抽既，見到有人答就下次搵返佢，冇可能成日都抽中既！」
我：「（擺官腔）哦，今年做既係中期人口統計，五年前做既係全港性既人口統計，所以五年前係全港住戶都會有份做人口統計調查既，而今年係中期人口統計，會有全港十分一住戶被抽中做今次既調查，所以大部分今年做中期人口統計既住戶係五年前都會做過一次。」
住戶：「我就唔覺得係抽勒，你就話抽嗟，冇可能十幾廿年來都抽中我既，又唔見隔離屋抽中既．．．（喋喋不休，欲罷不能）」
我：「（官腔）咁請問你而家方唔方便做訪問？」（欲扯開話題，唔想周旋落去，徙我ｄ時間）
住戶：「咁就方便。」
我（大滴汗）：「咁我可唔可以而家入來做個訪問？」
住戶打開門畀我入去，之後又回覆剛才既話題，態度極之惡劣，不停怒目相向，好似想打我咁。好彩佢老公叫佢唔好咁樣，但係都呻話：「成日都做人口統計，自己又唔識做」，不過勸還勸，那位女士繼續纏繞呢個話題：「我有個姨甥係統計處度做架，佢話你唔駛睬統計處，佢地見你答左佢，下次又搵返你做架。」
我心諗：阿嬸，你大我呀！你咪唔好做囉，等罰$500囉，我理得你咁多。
老實講真係好慶，我就話：「如果你對呢次中期人口統計有d咩意見、不滿或者投訴，你可以致電中期人口統計既查詢電話。」我唔再想理佢，為左扯開話題同唔想徙時間，我即刻開口問問題做問卷，好彩佢老公係度，所以兩個都算合作，但就話d仔成凌晨兩點先返屋企，又話一早七點幾出去返工，又唔知佢地幾時返來，擺明玩野，真係好慶，搞到我唔記得講：「遲ｄ我既上司可能會拜訪，睇下我做得好唔好，唔該晒。」，如果checker上到去呢個單位，真係唔多好受囉！

仲未慶完，嬲嬲地之際，我就落返去屋苑管理處辦公室度查證某單位係咪空置，我正跟一位管理員溝通，另一位身穿同公司制服既中年女士彈出來，態度惡劣咁問個管理員：「佢（指我）搞咩呀？」，管理員覆述返我既要求一次後，該女士態度極之惡劣兼極度不友善既口吻回答：「我地唔可以答你邊d單位有冇人住，因為呢ｄ係保安理由，我地唔可以講你知，你代表統計處就有責任走去每一個單位拍門睇下有冇人，我地因為保安理由唔可以答你！」話音才剛跌下，隨即轉身走左去，態度非常有問題！你就算因為乜野理由都好，你可以禮禮貌貌客客氣氣咁同我解釋，我會okay，但你咁既態度，sorry，我接受唔到，大家都係打工，我冇必要受你呢d氣，況且我地有指引如果懷疑有單位係疑似空置單位，就應該向鄰居核實，我都費時煩你ｄ住客，問你地最清楚勒，你咁既態度，我真係唔可以接受得到，之前啖火仲未息，而家又來多獲，我真係七竅生煙，我同個管理員講：「頭先果位女士叫咩名，佢ｄ態度好惡劣，我想投訴佢！」管理員苦笑左一笑。我同佢講左聲唔該之後轉身就走勒！

跟住我就約埋阿安上警署調查三樓同四樓有冇住人，雖然我都知唔會有人住，但task list有，就要上去架啦，點知一入到警署門口，個當值警員O住咀，跟住惡惡死死咁問：「咩事？」我地有指引又要用官腔介紹自己啦，點知個差佬話：「唔駛講咁多野，咩事？」我地只好將個目的講一次，佢就惡惡死死咁話：「呢度係辦公既地方，點會住人呀！」。大佬，我夠知冇啦，但都要上來架，萬一有我咪好大獲！

香港人太唔識為人設想，亦都好冇禮貌，又唔識咩叫公民責任，香港人Ｄ質素真係仲係好唔得！唔該啦，我都係住係同一個社區架，大家都係街坊，駛唔駛咁樣講野咁既態度呀？！我試下唔著住件統計員制服，走返去屋苑管理辦事處投訴你呢個阿嬋投訴到你炒尤都得呀！呢個世界好細架咋，仲要你服務既地區就係我住緊既地區，我都係客戶，你咁對D客，我睇下我仲唔PORT死你，你個＊＊！仲有果個中年阿嬸，大姐，我唔係統計處Ｄ人，我點知佢點抽，我都係一個學生，搵下暑期工兼職賺錢嗟，仲要大家都係街坊，你咁既態度對我，呢個世界好細架咋，我下次我唔著制服落街見到你，我睇下我仲唔啤你啤餐飽！

今日真係好受氣！！！唔想再做，最好派晒Ｄ自填問卷就算，唔好再煩我！

>>July 18, 2006 at 12:39:11 AM GMT+8

2006 年 7 月 16 日 星期日 【溫暖】

凌晨二時至三時天文台錄得122年來最高的一小時降雨量紀錄達115mm。天文台在40分鐘內先後發出黃、紅、黑雨警告，至早上7時左右取消所有警告。東涌道山泥塌下需封閉，全港水浸。

>>July 18, 2006 at 2:00:50 AM GMT+8