2007 年 5 月 8 日 星期二 【炎熱】

實在很高興得到大家對小弟在剪片/片段編輯技巧的認同。

其實小弟對此門學問實在認識不算多，而且不算深，還是一個新手來，所謂「技巧」、「技術」也實在全憑自己多留意和觀察電視台的製作，再加上自己亂摸一通而得來，可不算得上專業。

老實說，其實我有一個心願想學CG，我覺得那些CG Technician/Designer都很酷，造做來的東西很有美感而且十分真實，但那來錢及時間去學呢?我發現我還是對傳媒研究和製作上有興趣一點。難怪很多人奇怪我不是讀新聞系。

>>May 23, 2007 at 6:43:52 PM GMT+8

2007 年 5 月 3 日 星期四 【炎熱】

16 DAYS FOR 9 ASSIGNMENTS

好辛苦

做到癲左

好大壓力呀

抖唔到氣呀

>>May 23, 2007 at 6:46:59 PM GMT+8

2007 年 4 月 30 日 星期一 【炎熱】

一年半前，我家從香港寬頻回巢轉用電訊盈科的家居固網服務，以真確地比較兩所電訊商服務的分別。
結果弄至不愉快收場，也不見得本地電訊業老大哥電訊盈科的服務比香港寬頻的好多了多少，也不見得它的服務值這個價錢。
半個月前，我們遂決定回用香港寬頻。
今天，香港寬頻的師傅們來拉線。
由於現時香港寬頻家居固網電話免費送24條香港寬頻電視的基本頻道，結果我們由寬頻上網(bb100)、家居固網電話以至收費電視均是幫襯香港寬頻，這間本地第二大固網商。其實我們由2000年3月8日開始便一直使用香港寬頻的上網服務（前稱CTInets）至今，從無間斷，縱使中間曾使用其他ISP服務，但沒有中止過香港寬頻的服務，王維基應好好獎賞一下我們這些忠心客戶才是，否則他的公司豈可能從以前被人看不起的一間小型長途電話網絡商（CTI 1666)，發展至今天的第二大固網商，還說要在2007年年底前，收費要超越電訊盈科，而力搶電訊業一哥地位?
十四前年左右（1993年），當年香港政府發牌予九倉經營收費電視，就是「有線電視」，我們就曾裝過兩個月有線電視，可是我媽不太滿意有線滾筒式重播的運作模式而cut了。約五、六年後，當年的香港電訊發展「iTV互動電視」（可說是現在「now寬頻電視」的前身），我們又走去裝，結果用不夠兩個月，又把它cut了，原因是節目內容貧乏。之後，我們已經很久沒有再安裝過任何收費電視了，因為媽媽說免費四台都看不完，沒需要付錢去安裝。但到了今晚，我們們家又重回了收費電視家庭，可這次更是免費！最開心的當然是我，因為我是一個電視精，沒電視會死的那種。要不是，我不會發現one2Free可以欣賞有線電視新聞片段，更不會二話不說地申請了「新聞頻道」，更不用著經常邊走邊拿著手機看有線新聞。曾經有位朋友說老遠已看見了我，卻不敢打擾正在在手機上亂按一通的我，其實我當時只不過在看新聞！
我還在考慮應否安裝有線電視那條「十蚊台」（正名為「有線電視第1台」，將於6月13日啟播）呢！還是真的「無須有線，一樣精彩」（按：這個是香港寬頻電視於5月21日起易名為bbTV時的宣傳口號）？

>>May 23, 2007 at 7:10:13 PM GMT+8

2007 年 4 月 20 日 星期五 【晴】

用得多時間落一樣野度，係咪真係代表會做得好、做得有質素？
唔好忘記「時間有限，工作無限」
用每晚十幾廿個鐘，次次開通頂咁，到最後散晒，又有ｄ咩意思？
開咁長時間的通宵會，唔通呢ｄ先叫做開會？先叫做有成效？
一個真真正正有成效的會議，係要短時間內達到共識，要有目的、有內容、有方向，而並非全部人出晒來開一個漫長的通宵會，但大家已經精神疲憊，腦都轉唔郁既會議先至會出產好既質素，相反可能效果更差。
眼見近日呢股「敗壞」的風氣日趨盛行，我真係冇辦法接受到咁既情況。一係如果預知要開咁耐會既，不如早ｄ去開始，搵多幾日出來做buffer。
有限的時間並唔係畀你用晒係同一樣野度，有好多野都等緊你去做；就算果樣野畀你舞到識飛都冇用，其他野根本就冇時間、精神同體力去完成，最後都係得個吉。
集體負責制亦都唔係解全部人冇方向地斟酌於同一個point的問題上，傾上好幾個鐘。
應該學懂分配工作、分配時間，並之後將各人的工作結果拿出來討論，尋求共識。這個才是集體負責制。
行民主，並不是叫你冇內容、冇方向、冇目的，不斷係同一個問題上打轉；當然，我並不鼓勵行獨裁。然而，「出少幾句聲係因為怕人以為你dominant」，呢個係諗歪左既想法。Everyone is free to suggest anything which is beneficial to the work. 交出個人的方案後，再討論，尋求共識，已經是行之有效的民主式集體負責制。

我終於明白點解我會減少左寫blog既意欲
寫blog既原意係想係自己的個人網上空間，記得自己的所思所想所感，呢ｄ野全屬個人，亦不代表其他人
而你寫得上去網上日記，就預左有人會睇，所以我會覺得現時日記果ｄ"private/protected” post係唔太make sense既功能，更加唔會去用
但係寫私家blog，講自己野，並冇預期到有人會對你寫既野有負面的批評，畢竟呢樣野係表達緊自己
blog的作者並冇要求過任何人去閱讀佢既「作品」，只係預期有人會來睇。如果讀者對作者寫既野有任何唔滿意，都只係屬於讀者個人既感覺，絕對不適宜去作公開批鬥（如傳閱完再動用群眾壓力去逼blog的作者就某些內容作出調整），因為你呢ｄ都係屬於個人既感覺，點解要限制作者的個人感覺，限制佢表達的自由同權利？你唔滿意，你可以唔睇，你亦有權唔同意作者講既野，但唔係使用批鬥方式去達至個人目的，否則，同獨裁者欺壓異見人士有何分別？
我好羨慕仍然有人能夠藉blog抒發自己的情緒同思想。回顧之前的「挫折」，我對blog呢個本是個人言論自由平台產生不其然的陰影，唔夠膽再寫好個人的感覺同思想了。
隔左咁耐，今日再寫返，希望是一個對呢個陰影的一個突破。

2007 年 4 月 16 日 星期一 【晴】

大步檻過！

今天去見了孫天倫，interview for the approvement of 150+30 extension，原來係1對3形式既interview，除左孫博士，仲有Calvin同埋Daniel，咪話壓力唔大，仲要之前in完既同學都話畀孫天倫寸到唔識出聲，更加加大我既壓力緊張程度。

2點2就去到孫天倫門口等，2點3佢開門就入去，一坐低，孫就問我果150個鐘做成點，我如實回答之後，當佢知道其實我應該一早就已經爆左鐘，只不過我有良心，將2年來既scout service壓到只count 5個鐘，就算我計到咁少，做埋仲未做完既南亞支援聯盟，我都已經做齊3間機構，爆晒150小時既要求，只不過因為Project SASA要到7月中先真正完結，我先要apply for extension，佢聽完點一點頭，冇野要追問，就問我30小時counselee見成點，我話見左16小時啦，因為之前果個要成1個月先1次，我覺得咁樣落去唔掂，就搵Losana ask for help，而家果個係Losana轉介既，keep到1星期1次，好穩定，佢聽到Losana個名都唔敢寸我啦，仲要係我自己主動搵lecturer幫手處理個問題，證明唔係我唔願去做，只不過有好多因素搞到咁遲先咁多個鐘，佢計一計數，知道我7月底都完成得晒果30小時，當堂gur晒，即問其餘2個approve my case or not，咁當然好順利就approve左，只係叫我依舊係6月24日交返晒所得既鐘數返去先。

成個interview in左都冇5分鐘，又冇畀人鬧同寸，就已經即刻approve，我相信直情係唔當我係extension，只係當係畀返個buffer我，相對其他同學畀人寸/鬧到一棟都冇，我真係好好彩啦！

>>April 18, 2007 at 11:11:15 AM GMT+8

2007 年 4 月 3 日 星期二 【溫暖】

Research Project（畢業研究論文）
真係好好彩，真係要好多謝（排名不分先後）
何東中學
林護中學
英華書院
一班老師幫手協調，我同anny先至可以在上星期
一星期之內收晒約450個subjects既data！
呢一個受訪人數，可以講話係全系畢業研究論文的最高受訪人數
我地今次能夠可以咁高效率，仲快過好多原先步伐快我地好多既同學成功收齊晒data
呢三間學校既老師同接受研究既中三同學真係功不可沒！
我當然要特別多謝
林護既Ms. Lo、Ms. Shum同吳Sir
英華既蘇Sir同Ms. Siu
佢地既一口答應同為我排除好多不必要既障礙
真係令我好感動
所以我一定要做好份research來報答返佢地
個research結果，我已經應承會畀返呢三間學校做參考架啦
所以一定一定唔可以失禮人架！
最開心既係
居然有中三同學仔對我地個研究好有興趣
仲專登寫左封email來畀我
問我可唔可以將個結果send返畀佢
咁當然可以啦，難得有中三既同學仔有興趣呢ｄ「大學學術研究」喎！

上星期四返左林護同班師弟妹做研究
真係好感動既一樣野係
連校長都親自出來迎接
仲專程來睇左一班(3A)添
3A，估唔到，我係99-00年度係同一個班房上堂架囉
已經7年前既事！
我同班3A師弟妹介紹自己果時
都專登話畀佢地知我99-00年都係讀3A架
頓時睇到佢地好開心
之後佢地果堂上PE堂
路過豪裝LIBRARY時見到我仲專登同我打招呼添
By the way，3A class monitor好靚仔同好smart，真係好charm，唔怪得做到3A班monitor
吳Sir話學校可能要拆左個hall，將佢升高兩層起課室
聽到都心酸
個hall難得咁grand
升高左佢真係cheap好多架
但唔夠課室用都冇計啦

之後同日返左英華
估唔到咁都撞到孔慶暉同埋禤澤銘
佢地咁乖仔走來同我打招呼
抵錫
第二日返去拎返d data
見到黃瀚萱

南亞支援聯盟
星期六難得既好天氣，就同左我果班南亞f.1仔去左大澳門度過一個周末
估唔到我個學生讀緊既余振強紀念中學都係果度搞緊學校旅行
我仲同我個學生share緊同一個barbecue site添！
你話世界幾咁細丫！

我個組得返我一個出席
所以我就轉左入小明果個第一組
結果我地呢班全男班
成功係cooking competition度贏得
"Best taste food award"
"Most creative award"
兩個大獎成為大贏家
我地成班男仔成功引入左全港首「家」野外炸魚薯條
ｄ魚同薯條係我炸架
估唔到我煮野食原來都有一手

(credited from 小明)　遠處果班男仔係余振強中學既學生
佢地周不時走過來睇我地點wild cook，連佢地既老師都走過過來取經架

(credited from 小明)　將ｄ魚炸到變金黃色再翻一翻

(credited from 小明)　食完 "FryDonald's"行過去睇人放風箏
剛起步行去就有一個老婦送左呢隻風箏畀我同小明玩
「後生仔，畀你拎去玩啦！」
當堂覺得呢個老婦係咪神仙
哈哈，估唔到無啦啦有風箏玩

(credited from 小明)　真係環境靚到咁既樣，真係乜壓力都冇晒



上面呢三張都係我影架！所以唔駛credit啦，估唔到我都可以影得咁靚喎
不過十居其九都係執相果個（小明）既功勞來啦

2007 年 3 月 25 日 星期日 【晴】

完全冇心機/動力去做任何野
好渴望好渴望放一個冇責任冇負擔冇手尾跟既真正假期
好明顯我已經過左果個stress point

點解可以咁多野做?!
點解可以多野做過中學公開試年代?!
好辛苦好辛苦
好想走堂好想走堂好想為自己製造多一點時間
是誰偷走了我的時間?

有一d人做野真係唔係好掂
講又講左啦
都係冇乜改善
冇計啦有人包庇
我就真係冇辦法認同某人做野係得架囉

上星期五為左個group coun.
準備帶組d野捱通頂
得返四分一條人命
真係老啦
以前細個捱幾晚通宵都冇乜野咁
而家分到兩個鐘都唔掂
冇咁好精力
成日感覺好唔妥咁

今日其實應該要溫返聽日mid-term既野架
又冇溫到
乜野都冇做過
係咁訓同睇電視
再係咁其實唔掂
太多野做太少時間
hae完今日又要再來過

今日「800人小圈子」特首選舉
一如所料曾蔭權高票當選
希望佢真係「我會做好呢份工」
梁家傑雖然輸左
但為今次既選舉引入好多元素
香港已經贏左
希望5年後真係做到「有得揀，你至係老闆」

>>March 25, 2007 at 11:40:53 PM GMT+8

2007 年 3 月 19 日 星期一 【寒冷】

再幾難頂都得捱過去!!!

我好佩服自己有溫到OS Mid-term
有睇晒賤Man d readings先去訓覺
都叫做「做晒」賤Man有如排洪般多既worksheet
賤Man今日竟然玩收worksheet
check人有冇做
果真killer!!!!
我唔知又冇畀佢kill到啦
只係知佢今堂overrun勁多
搞到我就來返工都要遲到
我決定唔等到佢要放學就早走啦
佢居然叫我抄埋journal title先
唔係化
個title長到寫滿晒個white board
我再同你寫埋
聽你講解完
我實遲硬都得啦
我已經將d時間pack到根本上冇時間畀我食野架啦
畀我食個飽都好丫
我已經個個星期捱住肚餓去到11pm先有得食飯架啦
體諒下人啦
唔係個個返學都唔駛返工架囉
奉旨d人好得閒咁
做佢d野睇佢d野真係可以幾日都做唔完架
我邊到有咁多時間呀?!

唔知係咪何偉成玩野
係咁話個OS Mid-term係下星期先係
擺明玩野啦
呃d人返晒來
佢一次過睇晒有邊d人成日走堂咋卦
我難得溫左都要搞到下星期先mid-term
唉

自從上左year 3
真係返學返得好唔開心
真係唔知為乜
今個sem都好d
換過班班底
呢班同學仔起碼都真係真心caring d
肯用心聽你講野d
感覺都舒服左好多
唔似再係單打獨鬥咁

上個sem衰左頹過一排唔好再頹啦
Ira講得岩
今個sem唔應該再輸埋畀「killer賤Man(我自己咁叫既，唔關Ira事)」
「王子復仇記」來啦!!!

>>March 20, 2007 at 1:15:41 AM GMT+8

2007 年 3 月 11 日 星期日 【雨】

今日帶班童軍仔去西貢行山
0800彩虹地鐵站集合
搞到我要0615起身
去到彩虹開始肚痛
到佢地差不多齊人既時候
我已經再忍唔到
即刻叫佢地齊人就自己搭車起行先
我就趕去搵廁所
真是他媽的
最近地鐵站既廁所
居然係一個唔知咩名既「商場」大家樂個廁所
誰知個男廁得三個廁格
仲要一個壞左
其餘兩個都畀人霸左
我個肚就痛到快要爆炸
想衝入個殘廁
誰知又壞埋
心裡一輪咒罵
出返去大家樂問職員仲有冇廁所
佢地話成個商場都係得呢一個廁所咋
真係唔係咁黑仔呀
等多兩等
........
完事出返來
見到蘇sir同班sea仔
蘇sir帶左個好消息畀我
英華肯畀我去做個research
仲已經assign埋負責老師
真係好好呀
當堂好感動
班仔走晒
我決定搭架1A小巴趕入去西貢
仲好記得上次搭1A趕入西貢去99個宣誓禮
再係咁我就會對西貢有phobia架啦

估唔到今日到幾大雨下
又勁大霧
老實講
真係唔係一個行山好日子
不過童軍仔係唔會理呢d野
冇警告就照出發架啦
今次就由北潭凹行上去嶂上
再落返去鯽魚湖

北潭凹- 出發!

麥理浩徑第三段

都唔知呢d係露水定雨水囉

過左「天梯」，向牛耳石山進發！
勁大霧呀！乜都睇唔到！
不過都仲有唔少人上來行山
我估佢地既感覺就好似我果次行大東山
又係勁大霧
行行下撞到班赤航仔既時候既感覺
只聽見一班細路呱呱叫
又唔見人影
咪話唔得人驚
哈哈

過左岩頭山，見到勁多牛牛
呢一隻牛牛仲好友善咁跟住我地行
仲一度走緊我地只離十步距離
佢企左一陣望下我地
大概五分鐘度啦
佢又施施然咁行返轉頭啦
無幾耐
佢同另外一隻牛牛走返來
果隻牛牛仲係我地面前表演屙屎添！

終於去到嶂上啦
呢個咪就係「地標」囉！
嶂上係一個高原來架

嶂上許林士多，係一間好耐歷史，而且好著名既食店
上過好多次電視架啦

最出名就係豆腐花
我都花左$6買左碗
又真係好唔錯，好滑架！
另外，我都用左$20買碗餐蛋丁
班仔猛話好貴喎
我覺得差不多啦
諗下人地點搵ｄ貨上來
人工都有返咁上下啦
話時話好佩服佢地點樣送貨上來囉

食完
循畫眉山落返去鯽魚湖

對面有兩舊就快跌咁既樣既山就叫做雷打石山啦

落到山腳，有間教會
真係好佩服班信徒咁「神心」
山長水遠行到「深山」去崇拜
果ｄ見到ｄ羊仔架！
過左教會
行多二十分鐘度就出返去馬路
沿馬路行多幾步腳就去返北潭涌解散

2007 年 3 月 5 日 星期一 【雨】

容我爆句粗口!!!

真係仆你個街丫!!!
你條仆街大鰻大刀闊斧、唔理三七廿一係咁做"LUM"個市?!
搞到全球性股災你好安樂呀?!
D重磅藍籌都輕微下跌
更何況D仙股?!
跌到停牌啦
你話點算?!
個股繼續咁跌
都唔知點收科
到時想離場都離唔到就大獲啦!!!

[主板300「股災狂想曲」]

岩岩過去既星期日
又係一年一度既渣打馬拉松
據大會講今年係破紀錄的報名人數以及出席人數
我今年就係第二年幫手做工作人員
成2am就要起身
平時我呢個鐘數都未必走去訓覺
2:45am就出左門口
原來東涌市中心而家有5間7-11
但只得東堤灣畔分店係24小時架囉!

凌晨3點幾的太子
人影甚少
地鐵就算果日提早到4am開頭班車係果陣時鐵閘都仲未開
旺角就多d人囉
好多一群又一群好似有背景咁既look既年青男女
當時有d驚
不過係架巴士度
真係唔知驚d乜

3:45am去到尖沙咀
我冇講大話架
呢張相證明到我係果時已經到左尖沙咀鐘樓
但原來d車泊晒係藝術館果一邊

凌晨4點幾
開始陸續有參賽既健兒抵達行李收集處
打頭陣既全部都係拎住黃色行李袋既10km挑戰組(精英)健兒
精英真係精英
寧舍有線條
個個都好好身形、好fit架
搞到我都好想有咁正既身段
有衝動又想試下跑下
不過只係10KM好啦

收行李時不停落雨
仲有時都幾大下
搞到一班幫手收行李既童軍兄弟好狼狽
當然班健兒一樣都好狼狽啦!!
係架車前面等左好耐
都冇人來放行李
原來我地架車係後備車來架
專for遲到既健兒來我地架車度放行李
去年係做普通行李車
唔知幾自在
起碼場面控制得好好
仲有好多健兒話我地服務好好又快手又有禮貌添
不過今次大獲囉
當銀雞一響
代表普通行李車要閂門開車走
成班放唔切行李既健兒即刻仆晒過來我地架車度
爭先恐後咁掟晒d行李上我地架車度
但係佢地既行李
係要經我地檢查過個行李袋索得穩唔穩
同埋有冇扣到行李牌
咁先可以放上車
佢地唔止冇畀我地檢查
仲將我地架車團團圍住圍左成五六層
斷估果一刻有近三十幾人圍住架車
企車倉門口果兩個就慘囉
畀班健兒逼到ao晒腰
我係車倉上面放緊行李
見到咁失控
當堂發惡大聲喝停d人唔好再掟行李上車
並重申唔合作情況下我地既免責條款
好彩大部分健兒都好合作
停低左再掟行李上車既情況
但人手實在太少
未處理完10km挑戰組健兒既行李托運
10km第一組果班遲到健兒又湧上來
搞到我差d見唔到圍尾
個場面真係好嚇人
我同Daisy已經做到冇停手
係咁將倉前檢查過既行李拋入去車倉前面
但根本人手又唔夠
d行李又重
去到中間係車倉前面既行李已經上到我地既心口
見就快出唔返去之際
我地大聲喝停
要暫停接收工作
等我地爬返出來
到我地出返來既時候
架車其實已經裝到8成滿
d行李開始有傾瀉既跡象
到最後我地抵擋唔住個行李傾瀉
就要求班健兒將行李放係車前
等我地稍後放返上車
果一刻真係好有無助既感覺
好彩有四個童軍兄弟義務走左過來相助
否則我地真係搞唔掂咁大堆行李
果一刻好同情班垃圾收集員
果種辛酸實在不為人道
anyway, 都係一個好好而且好特別既experience來既
咁樣搞一搞我d肌肉足足酸痛左幾日(截至星期三)
仲勁過做gym

收完行李
我同daisy跟車坐
去到灣仔運動場
仲要幫手load貨
果一刻有一種想媽差人既感覺
因為我果時已經成個人散晒
仲要好趕時間咁落貨
我完全係頂硬上
到有一刻我醒起我地係要返返自己個區度報道
先有種脫苦海既感覺
好彩我地既區長好好人
畀我地hea唔駛咁辛苦
同區仲有班King's仔

d行李多到癲
真係好壯觀
我冇辦法影得晒
其實有五隻色既袋
粉紅、綠、藍、黃、紫
排晒號碼放係度等跑完既健兒返來拎返
係等緊全馬健兒返來既時候
我訓左係灣仔運動場既泰坦地訓左一陣
感覺真係好幸福
lol

其實今次馬拉松有一段小插曲
就係今年冇啦啦有班中學生來幫手派返行李袋畀班健兒
其中有一個女仔就好鍾意走來撩我同佢傾計
佢除左自己同學之外就冇主動撩其他人傾計
初時都覺得冇乜野
都傾到咁上下
佢開始無事獻殷勤
成日都問我係咪好累係就唔好做啦畀佢做啦
跟住又搶走晒我d野來做喎
我見佢咁唔得閒
咁岩我有企係果個行李袋旁邊
咪好自然拎起交畀前台再交返畀個健兒囉
點知佢笑晒口咁叫我唔好搶佢d野來做喎
我開始心諗死啦係咪「乃左野」
到之後得閒少少
佢又走過來同我講
「你唔好同阿邊個(指住一個女仔)傾計呀!
佢話你靚仔喎!」
隨著其指示方向望去
見一女子正在偷偷笑
心中一輪尷尬
頓然唔識對答
又借故尷尬笑左一笑
急步走去做野
呢一下我已經覺得好唔對路啦
唔係桃花旺成咁呀
其實果日我覺得自己幾烏wear
完全唔會係靚仔
畀佢咁講一講真係嚇左一跳
到之後勒
我明明聽到大會嗌咪叫果班中學生走架啦
我亦都見到佢地拎晒野走架啦喎
一個小時後
我又見返佢同果個被人聲稱讚我靚仔既女仔
居然佢地仲未走
我就問佢地勒
仲未走咩
個女仔就話「走架啦，而家去拎返個袋」
明明見佢地拎走晒袋say埋bye
我之後食完個午飯
去埋個廁
返返埋位做野既時候
我就聽到我個stall既一個madam叫我
跟住又見到果兩個女仔
原來仲未走喎
madam好大聲咁話
「人地等左你好耐啦
專登返左來都有兩次啦
都係為左同你影相咋！
快ｄ把握機會問人拎電話啦
msn都好啦！」
之後成個stall既焦點放左落我個身上
全個stall係度起哄wow wow聲
搞到我勁尷尬
stall i/c個阿sir仲好寸咁話
「嘩！人地只係同你影相咋
冇同其他人影相呀！
快ｄ交換電話啦！
我又影得唔得呀
不過人地都唔制架啦呵？」
搞到我同果個正在合照既女仔勁尷尬
我一影完即刻速逃
成面都紅晒
又畀人寸「面紅啦！面紅啦！」
咁果（兩）個女仔做緊乜
睇來都好明顯啦！！！
呢一幕小插曲就隨住佢兩個「心滿意足」、「得償所願」地離開而結束