2006 年 7 月 6 日 星期四 【清涼】

今日係我地偉大既 7B re-U, 都幾多人, 特別嘉賓有由加拿大空運到港的阿虫同梁琬婷, 我地一行十幾廿人去返上次 re-U既銅鑼灣利舞台王家沙, D野又真係幾好食既, D野食一落台, 未轉已經冇哂, 有人問點解冇哂魚, winnie就話見到劉備夾左半條魚落自己碟, 劉備一路食一路話冇 ar冇 ar, 郭駿仁話 kitty tong玩 camp時好放, fion就扮 kitty tong「好放」既姿勢, winnie見到系度笑, 話放原來「放」係咁既, 我睇唔到, 想叫 winnie做一次俾我睇... 之後溫敬良講 kerry ho講到好似講鬼故咁, 唔該講快 D la, 溫敬良話 gradin o個晚, 臨入會展時系海旁行, 見到 kerry系後面行緊埋黎, 講到 kerry ho成隻鬼咁, 佢仲話以前中六時做 prefect, 上三樓見到 kerry ho系欄杆背住佢喊, 之後上四樓, 又見到 kerry ho系欄杆背住佢喊！ 落返三樓, 多左個人系 kerry ho隔離 ar！！！ 阿展就扮溫敬良講鬼故：「kerry ho背住我, 但我見到佢喊！」 之後唔知做咩話「問阿虫 la」,事後阿虫問：「咁成件事關我咩事？」 其實原來係冇關, 只係阿虫都係 prefect而已... 今晚我不停話當年,例如溫敬良冇返學, 姚 sir問 kerry, 溫敬良去左邊, fion就話我次次 re-u都講一次, 梁琬婷話佢都聽過五六次, fion話頂唔順, 結果我就俾人掟毛巾... 郭駿仁不停話未解決, 個個都叫佢夠 la, 件事已經潮左, fion問我地邊個去遊船河, 郭駿仁話七月十四後先可以遊船河, 阿虫就問鬼節係新曆定舊曆, 唔關事既發問緊係又俾人掟毛巾... 今晚團長冇黎, 但係係佢特登黎我屋企樓下話我知有 re-U, 郭駿仁話佢系 hku見到團長, 同佢 say hi時團長會走, 就話可能團長系大學識左新朋友, 就唔想同返我地中學同學一齊, 豬豬都話有咁諗過, 因為次次 re-U團長都例牌唔出現, 我地話係咪團長微笑左你唔知咋, 我話團長晚晚都上黎我屋企睇波, 同兩年前一 D都冇變, 依家同我、dennis、阿郭系度發癲吹水講無聊野, 我話團長係咪因為唔想食飯咋？winnie就話佢黎睇波時晚晚都不停咁食, 笑死, 我話團長係咪冇錢 ar？dennis同阿郭就話佢次次上黎睇波都有夾錢... 我地綜合左咁多原因, 歸納出咁應該係有郭駿仁所以唔黎, 話下次同團長講 re-U冇郭駿仁, 問佢黎唔黎... 之後豬豬問 winnie下年返唔返香港, winnie話唔返 la, 豬豬問：「咁點 ar！？」winnie竟然話：「分手 law！」 我望住梁琬婷衝口而出左一句：「頂你 ar！」 郭駿仁話系 hku見到王浩賢同女仔傾偈, 好 surprise, 仲見到佢同女仔拖手, 我地話好平常姐, 郭駿仁話同兩個女仔傾偈 wo, 我地依然話好平常姐, 我地講起山根, 我就話有首歌係好岩山根既, 佢地叫我唱出黎, 我搞左好耐終於唱出「從前如不羈的風不愛山根」, 結果當然俾人掟毛巾 la, 郭駿仁話劉備真名係曹操, 呢個 gag比阿郭的還要爛, 唔掂... 食完飯成班搭 lift落樓, 王彥婷系度搞我個胸, 我就同佢講：「你搞到我粒的硬哂...」 跟住我地成班去左維園諗住傾偈, 點知又熱又多蛇虫鼠蟻又冇地方坐, 行行下阿虫話有蝸牛 wo, winnie就衝埋去踢隻蝸牛, 阿虫大叫唔好 ar, 因為阿虫講左出黎所以累左隻蝸牛 sosad, 我地行左維園一個圈就返世貿食甜品, 阿虫系大熱天時下著左兩件衫, 溫敬良就問佢：「虫, 你鳩左 ar？」 郭駿仁等呢個機會等左兩三年, 就大聲話：「虫, 你鳩左ar？」

>>January 8, 2007 at 3:44:30 AM GMT+8

2006 年 7 月 5 日 星期三 【酷熱】

《占星術戰勝孫子兵法》 法國國家隊以 1:0戰勝葡萄牙, 將與意大利國家隊爭奪本屆世界盃冠軍, 與 2000年歐洲國家盃一樣, 法國四強淘汰葡萄牙, 意大利則戰勝東道主, 唔通星座既力量真係咁勁？由分組賽第二場對南韓施丹拎第二面黃牌要停賽, 以為法國會小組出局繼而令施丹絕跡球場, 但法國竟以小組次名出到線, 十六強對西班牙, 八強對巴西, 場場開波前 dennis, 團長同我都向施丹作出敬禮, 因為我地相信這場必是施丹告別戰, 但法國竟過了一關又一關, 淘汰如日方中既西班牙, 衛冕冠軍既巴西, 同埋冠軍教頭大菲既葡萄牙, 殺入決賽火併意大利, 拜託意大利國家隊一定要打跨法國隊, 我十萬個唔想見到杜明尼治條廢物捧到世界盃, 千祈唔好！加油啊巴治奧！！！

>>January 10, 2007 at 1:10:30 PM GMT+8

2006 年 7 月 4 日 星期二 【綿綿細雨】

今日我地又去左海洋公園, 我地特登早 D去, 揀少 D人既時候去睇海洋劇場, 搏俾佢揀中落去玩海豚, 我地去左金魚大觀園, 上年系度同梁琬婷傾左個幾鐘偈, 同見到波波魚, 我去睇完金魚就去蝴蝶館同恐龍徑, 之後搭吊車上山頂睇水母... 睇完水母我地再去睇海洋劇場, 點知真係揀中左梁琬婷 wo, 佢有得去表演台命令海豚轉圈同摸佢地影相, 上到台個司儀問佢系邊度黎, 第幾次黎睇海洋劇場, 佢話：「I'm winnie, I come from toronto, it's my first time...」 頂, 講大話話第一次睇之餘, 仲要串到講英文, 搞錯.... 但梁琬婷梗係興奮爆 la, 佢返黎之後同我講, 話條海豚好滑溜溜, 但係唔好掂佢個窿, 因為條海豚會興奮...... 之後我地去哂返張相, 有全年證就有優惠, 不過都要八十個大洋一張相, 如果唔係會員就要一百個大洋, 真係搶咩, 一張數碼相收咁貴, 我地睇返張相, 見到條海豚個樣好霖, 梗係 la, 俾人模緊 wo...

>>January 2, 2007 at 6:44:54 AM GMT+8

2006 年 7 月 3 日 星期一 【綿綿細雨】

今日同梁琬婷去左尖咀香港歷史博物館睇足球展, 裡面都幾多野睇, 亦都係唔俾影相, 梁琬婷就幫我把風, 我就偷影左雷米金盃, 祖雲達斯同皇家馬德里五六十年代既球衣, 之後仲見到曼聯三冠王件波衫, 好想買返啊.... 原來碧咸系 1986年做過曼聯既吉祥物 ga wo, 我淨係知佢老豆係 best既 fans, 正中曼聯躉, 當年咸哥去熱刺試腳, 竟然著住曼聯波衫, 當然俾人踢走 la, 真係好好笑, 咸哥都話, 自己好想返奧脫福掛靴, 但先決條件係老費走.... 我地見到好多學生跟學校黎, 都幾噪, 男既多數走左去睇電視播以前 D片, 女既多數坐系度傾偈, 我地見到佢地手上要填工作紙, 梁琬婷好詫異咁做有咩意義, 我話我當年小五時, 跟學校去科學館都要做工作紙, D答案就系科學館裡面搵, 梁琬婷梗係話香港 D教育點解會咁 la, 因為佢系加拿大係冇呢 D戇居野...... 之後我地坐低畫公仔, o個度 provide埋咭紙同蠟筆, 梁琬婷畫完個頭像之後話係我 wo, 自己系度笑唔停, 我個頭邊有咁圓 ar大姐？跟住我地去玩電腦足球問題, 又有「足球名星找不同」, 真係好難搵 ga D錯處, 即係兩張相有五個不同地方, 要你搵出黎o個 D呢, 只不過係換左球星 D相, 我地同 D小朋友玩左好耐.... 我地去完足球展, 就去左尖咀碼頭間許留山, 我地叫左五十個大洋既甜品, 貴係貴 D, 但真係好好食, 夕陽西下同女朋友坐系許留山食個甜品, 真係寫意...

>>July 6, 2008 at 4:09:08 PM GMT+8

2006 年 7 月 2 日 星期日 【酷熱】

《世界級左後衛 - 卡路士》 好野, 佩服！！！, 卡路士經典「丘」襪, 攪到巴西出局！ 世界最強左後衛！！！！唔知做乜, 卡路士系度「丘」襪, 當亨利系遠柱冇到, 係咪以為大家心照, 亨利會等佢「丘」埋對死人襪先一齊起步？ 亨利已經開始起步, 卡路士仲唔知自己賴左野大檸樂, 仲有o個四條香蕉企位又係一絕.... 施丹已經起腳斬, 亨利已經離開佢幾碼, 佢仲未捨得企番直個人, 係咪望緊自己對襪「丘」得靚唔靚仔先, 注定輸梗！ 大家留意其餘四條巴西蕉, 唔知企系呢 D位做乜, 佢地唔係諗住施丹會用地波送出黎, 所以搵定四條友去攔截下話, 不知所謂！ 大佬, 佈越位之前都唔好咁明顯啦, 起碼都做到一個 mark一個先, 然後先一齊散出黎嘛, 你咁樣企法, 阿水都知你想裝越位啦, 亨利呢 D咁有經驗既球員, 仲點會再賴野？ ok, 最攪笑既係, 就當你裝越位, 點解又會有三條巴西蕉, 跟住法國五條友一齊走向龍門而唔係散番出黎？ 條友終於肯企直番個人, 但亨利已經離佢十碼有多, 死梗, 十八歲既奧雲都追唔番 la, 另外又留意左邊o個四條磨碌系度做乜？ 四條友系度鋤緊 Dee呀？全靠呢個一絕既佈防, 結果巴西係由八 mark五變做三 mark五, 好野！ 個波已經飛到埋離, 亨利已經到晒位, 佢條友仲未捨得踏入禁區線, 仲系度睇波, 真係膠到冇朋友.... 到亨利撞射既位置, 離龍門只有三碼而且又係盲眼位, 因為想裝越位所以冇巴西蕉企系門柱兩邊護空門, 我係迪達o個時就真係想爆粗

>>January 12, 2007 at 12:08:50 PM GMT+8

2006 年 7 月 1 日 星期六 【酷熱】

《英格蘭 vs巴西》 今晚梁琬婷, 阿郭, dennis同團長又上黎睇波, 英格蘭對葡萄牙, 法國對巴西, 阿郭本來諗住當英格蘭同巴西贏左, 就同我合照一張相擺上網, 因為四強將會上演英格蘭對巴西, 可惜一個敗給十二碼魔咒, 一個敗給星座占星術, 結果我同阿郭都冇哂心機.... 往後既世界盃已經冇咩心情睇, 唔會話唔睇既, 話哂四年一次, 但...我想不會如斯投入地看, 應該會半睡半醒地 hea著看吧... 我想最不想看到朗尼同 C.朗拿度事件的人, 應該是我這種英格蘭加曼聯迷, 當然有太多都是球迷的主觀意願與傳媒過份吹噓, 其實事情並沒有想像般糟透, 另外, 英格蘭因朗尼被逐, 十人應戰至十二碼階段, 講真, 英格蘭 D攻勢仲入肉過葡萄牙, 打多個人既好似係英格蘭 tim, 葡萄牙冇前鋒, 打多個人都冇咩攻勢, 打反擊又慢慢黎, 等人地回哂防先攻到, 笑到我同 dennis.... 如果今場冇出林柏特, 如果伏兵門前既唔係林柏特, 或者英軍早已入了四強, 捱到十二碼階段, 梁琬婷問我有冇信心, 講真真係冇, 1990年世界盃英格蘭四強射十二碼輸俾西德, 1996年歐國盃英格蘭四強射十二碼輸俾德國, 1998年世界盃英格蘭十六強射十二碼輸俾阿根廷, 2004年歐國盃英格蘭八強射十二碼輸俾葡萄牙, 2006年世界盃英格蘭八強射十二碼輸俾葡萄牙, 世界兩大全能中場, 林柏特同謝拉特皆宴客, 冇得講, 最可惜既係, 咸哥放棄隊長一職, 講真, 咸哥俾我見到佢有 heart, 雖然佢冇大哨既天份, 但佢對足球既熱誠比大哨高百倍... God bless England, 四年好快過既姐, 南非再見！ 巴西唔駛多講, 我一早已經話巴西冇四年前咁行軍流暢, 加上大熱門必輸定律, 巴西被施丹再一次擊敗, 法國隊比起之前分組賽幾場簡直好似兩隊波, 完全唔同哂, 機動, 快速, 流暢, 加上施丹的優雅, 完全把「一起摸肚臍足球」比下去, 彭利拿將巴西足球摧毀, 打突擊既唔會係巴西, 不過算了, 細哨下屆卅一歲, 卡卡下屆都仲係廿七歲, 朗拿度就唔好獻世 la.... 世界盃四強全是歐洲球隊, 2000年歐洲國家盃四強係... 荷蘭(主辦國), 意大利, 葡萄牙, 法國... 而 2006年世界盃四強係德國(主辦國), 意大利, 葡萄牙, 法國.... 是但搵隊同我隊霖法國佢 la, 我唔想見到杜明尼治條廢物捧盃, 係都要八十幾九十分鐘先換 D老將入黎吸收經驗, 韋托特 ar, 查斯古特 ar... 換韋托特入黎托咩, 平時死都唔換查斯古特先好野, 天秤座 sosad... 從前的星座小王子, 杜明尼治.... 法國反勝西班牙 2:1那球, 杜明尼治沒有奇連士文的誇張興奮大叫表情, 反而只擺出一副理所當然的樣子, 點解？因為佢當時是這樣說的... 「wow...一切都在我預計之中, 我早已用星座占卜到這球的出現...」 卡路士與加納球員斷背圖... 加納球員：「honey, 我係咪整得你好痛啊？乖..呵返...」 既然上得黎, 當然又要五個人十隻手系一個 keyboard上面玩炸彈人 la, 玩到笑死...

>>February 6, 2007 at 10:55:23 PM GMT+8

2006 年 6 月 30 日 星期五 【酷熱】

今日同梁琬婷去海洋公園, 我地系金鐘搭巴士去南朗山入口, 之後申請全年證, 我地有學生證, 所以都係三百個大洋, 買一張成人飛都要一百八十個大洋, 全年證去兩次已經抵返... 因為今日好熱, 又多自由行, 所以我地都冇玩到機動遊戲, 只係行左海洋館, 鯊魚館, 水母館, 同埋睇海洋劇場, 佢地請觀眾落去玩海豚, 因為太多自由行, 所以揀唔到我地, 不過唔緊要, 我都有全年證, 下次再黎玩過....

>>July 6, 2008 at 4:09:41 PM GMT+8

2006 年 6 月 29 日 星期四 【晴】

今日我地搭馬鐵去烏溪沙探 winnie婆婆, 因為 winnie婆婆去左個老人渡假村, 兩星期後先返柴灣, 由烏溪沙站行到去渡假村真係了無人煙, 靜到爆, 得 D野狗出沒, 探完婆婆四點幾, 我地就搭返去馬鞍山廣場, 梁琬婷系火車上強力按住我個頭 met我 D面毛, 仲要一路笑一路 met, 好恐怖！ 我地系馬鞍山廣場食左哈迪斯, 嘩！又好味又平, 比老麥同 KFC玩哂真係唔抵, 不過梁琬婷下次返黎, 可能已經見唔到哈迪斯 lu, 我記得以前... 仲有 jack in the box, wendy's等等好多間, 可惜依家冇哂, 如果可以好似以前咁百家爭鳴就好 lu... 之後我地去左旺角, 系女人街買左串魚蛋食, 真好味, 去左潮流特區搵樂天熊仔餅電話繩, 可惜搵唔到, 我地就再去女人街買多串魚蛋, 因為買野飲再加魚蛋會平 D, 所以我地叫左杯益力多冰, 結果梁琬婷飲左兩啖就唔飲, 話唔係益力多 wo, 係 D咩美樂多之類, 好難飲, 咁我係出錢o個個, 梗係飲埋佢 la, 但飲飲下又真係幾難飲, 去到朗豪坊就丟左 sosad... 我地唔知邊度有 701巴士站係返南昌西鐵站, 所以次次系旺角, 我地都要行返去地鐵站搵朗豪坊... 之後系朗豪坊出去旺角街市個巴士站, 因為有晚我地搵 701巴士站搵左成個鐘都搵唔到, 所以為免事件重演, 就算去到新世紀廣場咁遠, 我地都要搵返地鐵站去朗豪坊, 再去巴士站...

>>July 6, 2008 at 4:10:46 PM GMT+8

2006 年 6 月 28 日 星期三 【酷熱】

《巴西對法國》 巴西對法國, 86年柏天尼與薛高踢成 1:1, 互射十二碼法國險勝, 九八世界盃決賽, 法國贏巴西 3:0奪標, 施丹升上神台, 朗拿度從此不振... 繼八十年代, 九十年代後, 今屆世界盃八強, 兩支球隊在千禧世代再遇.... 巴西雖然大勝加納 3:0, 但講真, 完全唔知踢咩, 踢得最好那個只有盧西奧一人, 兩大天王阿祖安奴, 朗拿度依然冇咩表現, 阿祖安奴食左屎咁, 佢入那球完全係最簡單既事, 仲係越左位 tim, 大哨雖然比上幾場好, 有回去追波, 勤力左, 有埋門, 但下半場就冇左影 sosad... 我覺得贏 3:0唔係巴西打得好, 而係加納打得差, 唔係話整體差, 加納有體力有組織, 不過 D埋門差到離譜, 任你點勁, 埋門一腳入唔到波就冇用, 成場波加納最有機會那球埋門竟然係自己隊友系自己禁區銅頭一搖, 有角度有勁度, 仲係頂向地下, 差 D收死自己龍門... 呢場雖然係一場大勝, 但講真, 仲悶過瑞士對烏克蘭, 呢場完全冇驚喜, 巴西個個唔知係系度玩定熱得滯.... 完全冇霸氣, 冇皇者風範, 四年前陣容冇咁強, 但行軍流暢, 水銀瀉地, 下下唔係禁住你黎攻, 就係自己控波在腳, 慢慢玩你猜散你, 但係尋日我係第一次見到巴西打突擊！！有冇搞錯, 呢隊係咪巴西黎 ga？ 係咪彭利拿既錯就唔知, 不過搵番大菲教 la都係.... 巴西打左四場波, 呢場打得最差, 如果真係俾佢入到決賽對德國, 德國仲有冠軍相, 雖則德國冇後防, 但好明顯, 比四年前強, 好彩下次對法國, 星座小王子應該過唔到巴西, 如果法國仲聽佢支笛既話, 講真....法國雖然反勝西班牙.. 但我覺得因為將士用命, 完全唔覺星座小王子做過 D咩, 換韋托特都唔換查斯古特同沙夏, 亨利一個系前面冇人幫真慘, 連老人家施丹都要走上走落, 又要回防做野, 又要中場分波, 仲要打埋前鋒幫亨利, 唔通查斯古特星座真係咁唔夾法國？ 如果靠杜明歷, 法國晨早出左局 lu.... 究竟...尋晚既星象代表 D咩呢？沉思中... 星座占卜係最有利既方法去擊敗巴西！ 「領隊你係得既！！」「我都話我既星座戰術得 ga la！」 「yeah！星座占卜中哂！！」 群眾：「星座小王子！！幫我批批今日運程丫...」

>>April 24, 2007 at 4:21:12 AM GMT+8

2006 年 6 月 27 日 星期二 【乍寒還暖】

今朝一個人八點落去通利琴行排隊買《軟硬天師》演唱會門票, 當時已經有十多人, 排到十點開始賣, 我就十一點先買到, 因為十點半時個城市電腦售價網 hang左, 要等一陣... 結果都俾我買到二百銀飛三張, 係頭場七月廿七日, 因為我同個售票員講, 三張最近二百, 邊日都得, 佢話頭場有好多二百銀既位, 不過對正台就二百蚊位既尾二行, 彎位就二百蚊位既第四行, 咁我當然要彎位 la, 個個都迫哂去尾場, 哈哈, 如果加場既話, 咁樣佢地咪捉蟲！？ 因為加場會系最尾那場後面加, 原先的尾場變成中間場, 咁就欲哭無淚 la, 三張飛有阿郭同梁琬婷去, 期待林海峰與葛民輝！ 夜晚阿郭, dennis同團長上左黎睇巴西對加納同法國對西班牙, 佢地三個系梳化睇睇下, 我女朋友系我房打完機走出黎 hi, 佢地驚訝咁問：「點解你系度ga？」我話：「呢 D叫金屋藏嬌..」 踢完頭場仲有兩個鐘先開始法國對西班牙, 上次日本對巴西, 阿郭, dennis, 團長同埋我四個人, 已經系兩場波之間既三個鐘, 用電腦打超任娛樂金魚眼同炸彈人 battle game, 今次仲勁, 加埋梁琬婷, 五個人十隻手系一個 keyboard上玩炸彈人 battle game！！！ 好玩到無倫, 越玩越精神, 又笑到肚痛, 死左可以系外圍拋炸彈, 如果炸死到人就可以復活取代佢, 試過得返 dennis同團長鬥緊, 我一個炸彈炸死佢兩個之後復活一秒贏左, 笑到肚痛... 上次玩娛樂金魚眼, 二年級體育係玩射十二碼, 一人射三次, 其餘二人負責撲救, 阿郭兩射皆失, 第三次團長叫佢射中間 la, 呢 round負責守龍既我同 dennis好有默契咁企系度唔郁, 結果阿郭真係射中間！！俾我同 dennis擋到！！ 笑到我地三個碌地！！當然阿郭好無奈 la.... 兩三個鐘好快就過, 但係我地玩到唔願睇波, 團長仲話唱國歌 la！仲玩！！ 五條友十隻手系一個 keyboard上玩炸彈人 battle game！！！ 三人專心打炸彈人, 仲專心過睇波... 你以為佢地四個討論緊場波咩？其實係討論緊士碌架！！ 因為法國對西班牙半場時無聊, 所以去左第二個台睇桌球... 已經執左好多落垃圾袋, 依然有好多系台上面... 致親愛的金穎雄先生： 托阿郭生轉述, 佢地係冇有線先上黎睇波, 所以冇叫裝左有線的你..

>>July 6, 2008 at 4:11:17 PM GMT+8