2006 年 7 月 31 日 星期一 【酷熱】

《長洲之旅 --- 前篇》 今日我同梁琬婷, 加埋佢個加拿大朋友 Amy大姐去左長洲, 我地一落船等左陣, 溫敬良就出黎接我地, 佢著住孖煙囪同背心, 感覺佢真係好「長洲」.... 我地去左間房睇睇, 都 OK, 有兩張雙人床, 又有冷氣雪櫃廚房, 又有電視 VCD機, 天台仲可以燒野食, 之後我地去左街市買燒烤用品同燒烤野食, 再拎返渡假屋雪住佢先, 之後我地四個人就落去租單車踩勒！ 我地踩到去張保仔洞, 就停低影相, 再踩返轉頭去東堤.... 我地踩到去東堤盡頭, 就踩返轉頭, 系途中有間破屋賣豆腐花, 我地就坐低每人叫碗黎食, 嘩！超好食！食涼粉、西米露、豆腐花.... 每碗都係五個大洋咋！溫敬良話呢間豆腐花鋪開左十年 la, 因為唔駛交租, 經營工具又唔多, 但地理環境超正, 每個人踩單車踩到累, 就停低食碗豆腐花再踩過, 都係五個大洋, 所以個婆婆可以經營咁耐.... 之後我地踩返去張保仔洞, 鎖好架車, 就上去溫敬良個懸崖傾偈, 嘩！又冇人, 個海又正！個天又藍！溫敬良訓左系懸崖石上, 我地三個就坐系度想和你去吹吹水, 睇海又正, 睇日落又正, 不過溫敬良話途中會有野狗, 所以夜晚就唔好上黎, 一個咁正既地方如果可以睇埋星星同日出就 perfect la！ 我地坐左個零兩個鐘, 返歸時溫敬良問我有冇長條狀物件, 因為怕野狗, 咁我就拎左支長電筒俾佢, 還左單車, 返到去長洲碼頭, 我地行左一陣, 就去買左 D蜆, 再拎去第二檔叫人幫我地炒, 夾夾埋埋都係五十個大洋, 一來溫敬良識人, 二來佢話分開炒會平 D同新鮮 D... 我地返到渡假屋就開餐食蜆勒, 嘩！真係超好味, 好味到振！ Amy仲話留返 D汁送飯, 我地都想, 不過冇飯, 倒哂 D汁真係可惜.... 跟住我地就上天台燒野食, 一路吹水一路燒, 燒燒下溫敬良話要落去聽劉華首神鵰主題曲...= = 我地燒完就淋熄哂 D火, 落去樓下另一間糖水鋪, 食涼粉西米露同豆腐花勒！ 原來夏天燒野食都唔係太熱咋 wo, 可能係夜晚同長洲近海既關係.... 我地食完糖水, 就返渡假屋沖涼, 三個未沖既就系度玩啤牌, 我地各自沖哂涼之後, 就玩吹酒！我地先每人吹一支黑加侖子酒, 又幾好飲 wo, 本來係玩輸左先要飲, 不過因為支酒唔太高濃度, 所以我地得閒就飲兩啖, 搞到好快冇哂, 不過之後先係戲玉... o個兩個女仔都癡線既, 用橙汁溝伏特加, 支伏特加成四十幾度酒精, 我地玩啤牌鬥大, 但每人抽左隻之後唔睇得, 要放系額頭俾其他人睇, 之後就每人加酒落個杯度, 結果我同溫敬良輸到 pk！ 飲到我地 wingwing地, 支酒就飲哂, 佢兩個女仔就落去七記再買過, 我地就面紅耳赤口跳加速好辛苦, 佢地兩個上返黎時, 我同溫敬良就已經訓左, 其實我仲有意識, 想同佢地再玩過, 不過身體唔聽駛, 咁就訓左勒, 佢地個就系廳再飲過....

>>February 18, 2007 at 12:36:56 AM GMT+8

2006 年 7 月 30 日 星期日 【微雨】

今日同陳大 win去左沙田馬場個亞洲青年節, 我地要搭火車去火炭, 但當陳大 win一入火車時, 佢就話：「冇位既！？」咁我見到隔離有位, 我就坐落去, 之後就叫 winnie坐埋落黎, 點知佢一坐落黎, 個 pat一「唧」, 就「唧」左坐我隔離個麻甩佬出黎, 個麻甩佬仲話：「有冇搞錯...唉..俾你坐勒...」 我地笑到碌地, 真係笑到碌地, 因為我地夾硬坐落張椅度迫走人, 呢 D香港人先會做既野, 竟然出自我們之 pat！！ 等我地仲成日好燘咁鬧香港人冇禮貌, 唔識禮讓, 或者第日 mini forum會有個 post叫做： 「醜陋的香港人系火車上爭椅坐, 不惜 bell開人！」 又或者俾人偷拍左我地用 pat bell開人既惡行, 再 upload上 youtube.. 我地搵沙田馬場都唔知搵左幾耐, 又熱又哂, 早知唔黎 la, 去到沙田馬場, 行左成個圈佢先話個入口系頭先o個度, 頂, 又要行返轉頭, 我地入到去都開始左成粒鐘, 不過好似話係介紹 D大粒人物出場既無聊環節, 之後我地見到 winnie個多倫多大學同學 bosco, 一路傾偈一路睇表演, 行行下先見到我阿媽同我阿妹系看台... 個 show都幾特別, 用歌舞劇型式講出香港由漁港去到工業發展, 再到現代社會, 女人既地位同壓力都越來越重, 一個人要做好多野.... 睇完之後我地兩個同我阿媽細妹去左沙田新城市廣場, 個「史糯皮」展覽都唔岩我地玩既, 全部都係 D細路玩.... 用難兄難弟主題曲配樂, 全場企起身, 勁 high！ 好好笑, 佢地既服飾都好七十年代...

>>February 13, 2007 at 11:45:25 AM GMT+8

2006 年 7 月 29 日 星期六 【陰】

今日同陳大 win去漫畫節, 我地先去左灣仔地鐵站, 因為有個好 nice既 life science year2學長解答左我好多問題, 同埋佢俾左 D notes同 project我, 嘩！ 人又 nice, 又唔收錢, 又幾靚仔, 我真係未見過呢 D人, 佢幫我係完全冇利益可言... 之後我地去左漫畫節, 買左好多野, 不過唔係漫畫, 而係青年地攤檔既野, 類似跳蝨市場, 我地買左個軟坐墊, 陳大 win打機時可以俾我坐, 我地又見到有 slam dunk湘北既 10號, 11號, 14號, 同陵南既 7號波衫賣, 最正係有「膠」賣, 對換率港幣五圓, 又有件扮 starbucks既 who fuckin' care tee, 我就買左一舊膠, 正！不過 winnie買得仲多野, 好多公仔, 咕o臣, 白龍貓既盒, 我叫陳大 win拎個綠箭香口膠出黎睇下, 佢一拎, 就有隻甲由彈出黎夾住佢隻手, 嚇到佢彈起尖叫同丟左落地下, 週圍 D人同個老闆都望住佢, 我就笑到飛起, 話哂呢個玩意都有八年歷史, 我中二已經玩, 陳大 win竟然仲唔知道.... 我地見到好多毒男, D毒男真係有樣睇 ga, 之後我地見到有頂熊貓帽, 戴上頭就好似隻熊貓騎住個人, 好搞笑, 我地系 mega store買野, 佢問我地有冇 coupon, 即係入場券, D coupon入場券因為樽水整濕哂同爛哂, 所以我地拎哂出黎時, 個收銀員都唔駛我地俾佢, 之後佢俾左個橙色麥嘜既帆布袋俾我地... 我同梁琬婷因為見到好得意, 就開始當眾爭袋, 好似細路仔咁, 兩個不停大叫「我 ga！我 ga！」之後個收銀員笑笑口話唔駛爭, 俾多個你地, 我同梁琬婷梗係大笑一場 la.... 跟住我地臨走時, 見到有好多 cosplay女仔坐系地下, 擺哂 post俾好多男人圍住影相, 仲好 enjoy, 就好似 AV拍硬照咁, 成班麻甩佬圍住黎影相, 就好似 D汁男咁, 有個汁男仲笑淫淫咁話, 呢條女 ok wo, 另一位汁男先生就笑淫淫咁答咀話：「假既...」

>>February 11, 2007 at 7:56:19 AM GMT+8

2006 年 7 月 28 日 星期五 【乍寒還暖】

今日我, 陳大 win, 我阿媽同我阿妹再去海洋公園, 不過我地玩左一陣水槍同泡泡之後, 就落好大雨, 我地唯有換衫去兒童樂園玩, 坐過旋轉木馬同摩天輪, 就上山睇表演, 玩到夜晚先搭返吊車落山... 我地系阿瑪遜流域既吊橋上面, 我細妹同梁琬婷系度鬥搖.. 我地去左兒童王國做主角, 玩旋轉木馬... 我地上左兒童王國既摩天輪... 我地同梁琬婷系度談論各自既老豆, 年輕時都係電單車狂.. 我地上左南朗山, 之後搭呢個轉轉塔, 聞說可以遠眺香港仔, 仲見到自己屋企... 我地同「樂天豚長」影相, 梁琬婷不停指住佢話係團長呀！ 我地行完太平洋海岸睇海獅, 就系精品店拎左人地 D帽黎玩, 梁琬婷不斷扮鬼臉, 好搞笑, 我仲問佢玩完未, 佢即刻變左聲.. 梁琬婷仲愛不惜手, 唔捨得除... 睇完海洋劇場, 我地就搭返吊車落山, 臨走前我細妹仲同梁琬婷玩打鼓... 見到佢兩個根本唔知音樂為何物, 亂敲一通, 就等我音樂之子陳俊峰表演一下 la！

>>February 11, 2007 at 7:54:05 AM GMT+8

2006 年 7 月 27 日 星期四 【陰】

《軟硬天師 long time no see演唱會》 今日下晝同陳大 win出左旺角行花園街, 諗住行完就去紅館睇軟硬, 點知我地系花園街買左兩盒各一千塊既 puzzle, 兩盒加埋都係三十個大洋, 如果加多兩個木架就 total九十個大洋, 我地再去買左 D袋, 超抵！廿個大洋一個袋, 又幾靚, 又實用, 雖然成個師奶袋咁, 陳大 win都買左個廿蚊袋, 咁我地拎住咁多野點去紅館睇 show呢？ 唯有先返香港仔放低哂 D野, 食埋個飯, 先出去 poly匯合阿郭, 真係.... 我地去到紅館, 見到出面有得賣 SH既帽同 tee, 不過成三百個大洋一件！頂帽都要三百個大洋, 搶咩, 我都係用二百個大洋買一張飛咋！ D logo都係印上去之 ma, 仲咁多人排隊買先奇.... 我地買左兩支葡萄適入去飲, 不過因為唔俾帶玻璃樽, 所以我地要收埋系褲袋, 等佢 check唔到 ma, 不過最後入場時都冇 check... 估下下面呢三個人係邊個？ 四場軟硬天師演唱會先加三場再加三場, 總共十場！！ 一開始買左尾場又或者第一次加場時買左尾場既人真係喊都無謂, 變左第四場同第七場, 所以我地今晚睇頭場最好！！ 個 show真係好好笑, 林海峰話昂平 360吊車只係由這處吊去那處, 再由那處吊返這處, 點知系中間「cake」住左, 仲困左三個鐘, 系吊車上面試搭既遊客, 都不禁大叫一聲：「屌......車.....」 之後葛民輝話, 今屆世界盃睇羽毛球比賽仲多過足球比賽, 仲要場場羽毛球比賽都係一樣！打足成個月都係播同一場！ 都係顏福偉對顏福偉！去藥房買白花油佢會俾羽毛球俾你！ 買羽毛球佢會俾白花油俾你！記得「搽」多 D顏福偉 la！ 跟住佢地講返軟硬系 tvb做過唯一一套節目 - 軟硬製造... 佢地話第一集就係同羅文打網球, 籮記呢個名仲係佢地改既, 打打下籮記突然神色凝重咁同阿葛講, 佢話... 「阿葛, 光加熱就等於火, 火加歌就等於我, 若我與歌再加上你, 溫度將提高更多, 所以你應靠近我, 不要再自我封鎖, 此一刻你屬於我, 你再沒法躲, hey！」 估唔估到上面幅相係邊三個人呢？ 估唔到 ar？睇下下面條片就會知答案 ga la！

>>February 10, 2007 at 11:56:34 AM GMT+8

2006 年 7 月 24 日 星期一 【乍寒還暖】

今日我同陳大 win再去書展, 因為上次行左七個鐘都未行哂, 不過上次係第一日, 今次係最後一日, 兩次都好多人 sosad... 我地去買阿波羅乳酪時, 因為係購票制, 所以俾左錢都係得張飛, 張飛分兩 part, 一part係收據, 一part係短 D既, 列明你買左咩, 陳大 win就將短 D張飛榨到變廢紙, 之後塞入我件衫裡面, 自己就拎住張收據去拎雪糕, 點知個人話唔係呢張, 係另一張, 即係塞左入我心口那張....= = 好彩我冇丟到姐, 不過都俾陳大 win整都變垃圾, 佢當然一路 say sorry一路爆笑 la, 真係冇佢收.... 因為今日係最後一日, 所以七點就收, 我地一路行到七點, D書開始恐慌性拋售, 我地梗係執平書 la, 我用市價六七折就買左本《天使事典》, 幾好睇 ga！不過原來地獄都有職業 ga wo, 瑪門 mammon就係地獄採礦師, 我細佬笑到癲左, 問我係咪仲有地獄律師, 天堂醫生, 地獄工程師 etc.... 之後我地去左深水步, 去同陳大 win既姑媽仔與大姑媽食飯, 我地一路傾偈一路食飯, 講下金庸, 講下教育制度, 講下政治, 講下中國, 講下文革, 係陳大 win唔知我地講咩...sosad....

>>February 8, 2007 at 10:55:06 PM GMT+8

2006 年 7 月 22 日 星期六 【酷熱】

今日我、梁琬婷、我阿媽、我阿妹、同我表妹又再去過海洋公園, 我地又去玩泡泡, 玩水槍, 但係 D水槍勁廢, 射完一次要搵水桶入水, 而 D工作人員就拎 D水喉狂射你, 唔俾你入水, 勁好玩！ 請各位讀者留意： youtube影片一次過只可以睇七至八段, 第八至九段片開始會冇聲, 如要繼續收看, 請移玉手去 click一下 refresh鍵, 唔駛另外收錢的, 勞煩哂！睇片 la！ 上山頂前, 我同梁琬婷去左畫人像畫, 似唔似呢？ 搭吊車上山... 上到山, 我地見到個地下噴霧氣, 成班新屎坑走去睇... 我地上山頂, 又去海洋館, 但當 winnie拎隻海星時俾人話, o個個人話唔掂得 D海星, winnie就問佢邊度話唔掂得, o個個人就話第二個指示 law... 梁琬婷就大大聲咁叫佢睇清楚第二個指示寫咩先, 佢話：「第二個指示話請勿將海星取離水面咋 wo... 既然佢咁寫, 即係叫你唔好拎起佢離開水面, 邊度話唔俾拎呢？」 更何況佢冇用膠蓋掩住, 就係俾人摸下 D海星, o個個人就話, 有 sense既人都唔會掂 la, 之後就走左勒, 嘩！今次我真係好佩服梁琬婷, 勁型, 串到爆, 我鍾意！ 睇下海洋館裡面既虫虫魚, 好得意, 得個頭伸出沙... 睇下假扮水草既海洋生物... 有零下五度先可以生存到既海天使, 好細隻, 好得意... 之後我地去左鯊魚館, 咁當然要系經典鯊魚口入面影相 la, 我地話要扮俾鯊魚咬, 睇下我阿妹個樣幾痛苦, 好鬼真... 到左夜晚, 我地去左玩機動遊戲, 去到八點我阿媽個朋友同佢個女先黎, 我地就系山頂食老麥, 玩海盜船, 玩越礦飛車, 驚到我丫, 梁琬婷仲話衝落去時企起身, 佢都癡線 ga！ 我地玩到十一點先走, 返香港仔食綠野仙蹤, 又有我至愛既日式牛肉飯！ 我, 我細妹, 同梁琬婷三個系夜晚上左摩天輪... 夜晚坐摩天輪觀望海洋公園, 真係唔同 D... 梁琬婷, 我表妹, 我細妹走左去玩海盜船, 我自己玩左一次唔敢再玩, 其實海盜船先係最刺激o個個, 唔好俾佢個樣厄到... 見唔見到佢地呢？

>>February 8, 2007 at 1:47:56 AM GMT+8

2006 年 7 月 20 日 星期四 【酷熱】

《就算聽森美小儀變態樂園考第尾》 剛剛看了兩三年前的森美小儀歌劇團《早安曼克頓》VCD, 又看見森美的個人崇拜, 不過再看看無記改由 DoDo主持的《15/16》, 你就會發現森美小儀其實很好看, 就算極度不喜森美的梁琬婷, 亦都覺得森美小儀主持《15/16》才有氣氛, 當然先入為主是一個原因, 但你看到 DoDo說出答案時, 看到她那沒有氣氛的表情, 你就會很掛念森美小儀生動鬼馬地互寸... 聽了森美都有十年, 由《森美變態樂園》, 到《森美小儀 dot dot dot》, 再到《森美小儀山寨王》, 最後的《架勢堂》.... 星期六的《餓靚之 van》, 在海洋公園主持的《餓靚之 home》, 到現在的《森美移動》, 每個暑假都有的《森美小儀歌劇團》, 由長毛森美, 到肉鬆頭森美, 再到依家既森美... 有很多的 gags, 很多的思想, 很多的古怪念頭, 我都是由森美那處聽回來的.... 有時森美講 D野真係好有深度, 不竟他是喇沙仔, 會考 1A 5 B, 中文大學讀傳理系畢業, 同芝 see菇 bi二人考入商台做 DJ... 森美小儀做錯是不爭的事實, 他應該負上責任, 但真的嚴重到要失掉所有工作嗎？ 嚴重到要上報紙頭條嗎？嚴重到要遊行示威控訴侮辱女性嗎？ 只是一個小小的選舉, 影響大得過每天發放色情資訊, 在全港各大報攤出售, 隨處可看見的色慾封面八卦雜誌嗎？如果說森美小儀鼓吹非禮及性暴力的話, 我想這個人一定十世冇睇過電視, 一年三百六十五日的黃金時段至晚上十時, 不論是無線或是亞視, 強姦非禮的劇情比比皆是, 電視台更用作為宣傳工具, 反觀凌晨十二時至二時的《架勢堂》, 只是一個選舉, 就比人小事化大, 如果真係有細路青少年因為森美說一句「最想非禮的女藝人」而去非禮人, 反而對有影有畫有聲音有動作有意識的電視劇強姦場面無動於中的話, 我相信這個小孩的想像力真的非常高, 香港政府應該出錢資助這名天才兒童, 更應該給他非比尋常的教育方式, 否則香港教育又扼殺多一名世紀天才, 因為在香港教育下成長的兒童, 是出了名沒有想像力的.... 如果說森美小儀在凌晨十二點至兩點說出一句「最想非禮的女藝人選舉」是罪大惡極的話, 那麼在黃金時段至晚上十時, 在電視框內播出有意識強姦場面的無線及亞視, 豈不是是天地不容人人得以誅之？誅九族亦難以洩婦女團體班師奶們的心頭之恨！？ 講真, 她們當中有多少個真的 live聽過那晚《架勢堂》森美小儀說出那句話？ 不過, 以上的全是藉口, 不能掩飾森美小儀犯下的錯, 他們真的做錯了, 希望當他們回歸後, 懂得口舌招尤的道理, 講真, 這件事對森美來說未必不好, 自從森美做了 artist後, 心高氣傲了, 囂張鼻大了, 在電台節目中可以聽得出他的輕狂, 這件事可令森美的鋒芒稍為收歛一下, 挫折是上天賜予的禮物, 正如被 juno老豆厄哂 D錢既劉德華, 以及當初不可一世的謝霆鋒, 受過挫折後, 人都成熟 D, 人生一帆風順無風無浪反而會令自己受不住更大的失敗, 當更大的挫折一下子降臨時, 恐怕不能再站起來.... 十年前入行不久的森美小儀, 那時我才小學六年級, 第一次接觸收音機.... 八年前肉鬆頭的森美, 與小儀在海洋公園主持《餓靚之 home》, 當時我中二... 森美小儀與 operator光仔.... 《森美變態樂園 --- 森美小儀》 四至六你冇掟匿, 冇野做我咬大脾, 冇野做你搵野黎做啦, 變隻怪獸合作搞經典, 吞"pop"飛彈無聊射向面, 你老豆突然話我"小小賤", 我暗示話我愛陳玉蓮, 再變再變又覺冇乜點, 聽收音機狂熱勁上電, 至怕係突然淨有"點點電", 會錯過佢地人肉戰 就算聽森美小儀變態樂園考第尾, 阿媽照樣騎住你黎啜嘴, 就算聽森美小儀變態樂園攪到冇工返, 全城吶喊話"車"~~~~~~ 晏晝兩個奉上這首歌, 一家幾口無聊在振盪, 我兩個仔女好似仲細, 都聽森美~~變~~態~~樂~~園~~~~

>>April 24, 2007 at 4:49:17 AM GMT+8

2006 年 7 月 19 日 星期三 【酷熱】

今日同梁琬婷, 同埋佢姑媽仔去左書展, 我老豆同 winnie老豆都係信佛, 我地話佢地都有部喃嘸機, 擺系廳度長開, 一熄哂 D電視打算溫書時, 就會聽到.... 「喃嘸阿彌陀呼...喃嘸阿彌...陀呼...」 佢兩個一見面應該可以好似 keroro同 tamama咁共鳴, 兩個一齊系度「喃嘸阿彌陀呼...喃嘸阿彌...陀呼...」 我地由十二點行到七點都未行完, 行極都仲有, 行到腳痛, D野食又貴, 裡面有好多個 hall, 以為行完 la, 點知行過條時光隧道, 一出去, 見到一個人山人海既 hall, 我地好似發現新大陸咁, 點解仲有個 hall ga？我地已經行到腳痛 la.... 仲有半個 hall A, 半個 hall B同一個兒童天地未行, 行行下 winnie拍錯左人, 佢以為係我, 勁囉爆... 佢話想買三國演義本書, 我叫佢讀一段我聽下, 佢都讀唔出, 佢話呢 D都唔係中文黎既, 都睇唔明, 我就同佢講, 我話所以我先叫你讀一段我聽, 原裝章回小說係咁 ga la... 系加拿大長大既梁琬婷中文不嬲都差 ga la, 佢仲成日話自己中學時, 系加拿大中文班係第一, 每次 test都拎 90分以上, 我笑左.... 我地行行下仲見到有一班臭道士, 著哂道士衫, 梳哂道士髻, winnie指住黎笑左幾耐, 我話我幾想走埋去問個臭道士, 點解要污辱姑姑.... 梁琬婷系遠處見到大火柴人, 就即刻好似個小朋友咁嚷著要影相...

>>February 6, 2007 at 7:01:56 PM GMT+8

2006 年 7 月 18 日 星期二 【酷熱】

今日我、梁琬婷、我阿媽、我細妹、我阿媽個朋友、佢個女、 佢個女個朋友、同埋我我表妹一行七人, 去左海洋公園加勒比海夏水禮, 超好玩, 我地先去左南朗山, 睇海洋館, 去太平洋海岸睇海獅, 不過我地個個企哂系冷氣下面唔願走, 之後去左水母館, 當我一聽到森巴既樂曲時, 就手舞足蹈系度跳舞, 梁琬婷竟然唔陪我癲, 好衰... 我地系海洋公園間餐廳食 lunch, 勁貴, 我阿媽同阿妹食個炒飯, 都要成一百二十個大洋！我同 winnie都係食左個廿蚊芝士蛋糕就算, 起碼同出面同價 ma, 我同我阿媽講, 仲唔拎 D野食俾朕食？ 我阿媽竟然話：「皇太后你都敢叫！」 請各位讀者留意： youtube影片一次過只可以睇七至八段, 第八至九段片開始會冇聲, 如要繼續收看, 請移玉手去 click一下 refresh鍵, 唔駛另外收錢的, 勞煩哂！睇片 la！ 我地搭吊車落到山腳, 班細路系烈日當空下畫畫... 之後又有森巴舞睇, 又可以玩泡泡, 玩水戰, 我地排左五六次隊, 玩泡泡玩左四五次, 玩水戰玩左兩次, 玩左成四五個鐘... 睇下我點推倒小蘿莉梁琬婷 la！ 梁琬婷一開始都仲好斯文, 好就住就住, 自從俾我表妹整到一面都係泡泡之後.... 梁琬婷有得玩就會癲哂, 不停追住我阿妹... 仲自己衝左落泡泡堆裡面... 班細路女 (包括梁琬婷) 已經完完全全變左泡泡人, 梁琬婷仲轉身翻騰一週半衝向泡泡... 最易認係我！因為我著橙色衫, 好慘, 俾班細路圍攻... 睇下我表妹衝向鏡頭既姿態, 好搞野... 我地一路沖身一路跳舞！傻左.... 最後我地幾個沖身時圍圈跳舞, 有個唔識既細路走入黎中間一齊跳, hahaha, 諗起都好笑, 我同梁琬婷成廿幾歲人同班十歲既細路一齊癲, 不過超好玩, 玩幾轉又走返去阿媽度食野, 之後又再去玩過, 玩到七點幾先走人, 今日真係樂而忘返！ 我表妹仲將 D泡泡塞落個肚裡面...

>>February 4, 2007 at 10:04:28 AM GMT+8