2008 年 7 月 23 日 星期三 【晴】

尋日下午自己team同事出晒去,
出trip請假兩樣都有,得番我一個,
本來諗住一定唔洗開會,
一個director, 一個VP, 同我呢個small potato,
又有乜好傾,
點知VP話照開,
好在手頭上有一個presentation, 一個project plan, 再加一個experimental design可以拎出來講,
開會時我三樣o野都講晒,
雖然老細讚我做左好多o野, 又話做得好好,
但我一d都冇感覺,
兩位老細, 你讚我冇用喎, 你要有d表示先得o架.......不過我知道簡直妄想.....
問題又來勒,
我冇可能每兩個星期開會都有咁多o野講,
你估真係成日都有o野唸到出來,
唸到出來又未必有時間寫出來,
有時間亦不一定有心機寫出來,
兩個星期開一次, 遲早都冇貨賣,
呢d就係打工o既苦,
老細係唔會明白, 員工除左正常工作,
都會有好多細微o野做,
不過我只係隨便抒發o下,
一d唔開心都冇.......
------------------------------------------------------------

過去週六同Mandy睇左赤壁,
並不如影評那麼差,
相反我覺得幾好睇,
兩個半小時都冇悶場,
如果你係都要批評一番吳宇森點解咁拍、點解又唔咁拍, 咁你隨便啦,
我就情願好好享受呢場用3億港元拍o既戰爭,
呢次只係電影o既上集,
仲要等下集,
講到演員方面, 我淨係留意林志玲,
而林志玲本身好靚,
套戲拍得佢仲靚, 不過戲份唔算多,
希望下集會多d 啦!
--------------------------------------------------------

尋日放工去跑步,
一口氣跑左4400米,
雖然是黃昏,
但在大暑情況下, 好熱,
不過當身上o既汗水流出來, 感覺好舒服,
我咁努力keep fit, 希望真係fit 啦!!!

之後o係旺角簽左一份約,
係一份Now TV o既約,
呢排一直考慮開番個台睇波,
尋晚就遇上一個好sales,
夠誠懇, 講o野夠實在, 我唔鐘意把口"浪過油"o既sales,
所以我決定裝,
$186per month, 我諗巳經係最平o架o勒,
我以後o係屋企可以睇波勒,
happy happy!!
------------------------------------------------------------

以馬忤斯我係參加26旅,
過去星期一係我地第43次重聚,
雖然我地現在巳經唔可以每個月重聚咁密,
但係不經不覺巳經重聚43次,
先要感謝主, 賜我五位弟兄,
再要多謝五位弟兄抽出時間參加重聚,
救主接納我們的禱告
---------------------------------------------------------------------------

呢排真係好多活動,
星期日中午同大學校友飲茶,
一飲就飲左三個幾小時,
大家都講吓自己近況,
雖然巳畢業十年,
但呢十年裡面, 我們都願意抽出時間每年見面一兩次,
事實上我們留學時也番同一間教會,
所以同學以外, 也多了一份弟兄姊妹的情,
感謝主......
----------------------------------------------------------------

晚上參加了家會, 我地組去BBQ,
Carmen屋企燒烤其實好舒服,
而我又真係好鐘意燒烤,
所以佢每次邀請我, 我都會去,
小吉仍然都係咁怕男人,
我巳經好體貼咁對佢,
但係佢都係怕, 我相信佢以前個主人真係成日打佢,
希望呢隻狗有一天終可康復, 唔好咁怕人啦!

燒腸, 燒丸, 燒雞翼, 燒牛仔骨都冇乜特別,
但係燒兩塊安格斯牛扒真係好好食,
燒菇, 燒粟米, 燒青椒, 燒蕃薯都冇乜特別,
但係燒矮瓜就好特別,
事緣係Princess Josephine就咁將成條矮瓜放上去燒,
係成條, 冇經過任何處理,
大家叫住佢,
佢話大陸係咁架, 話佢o係大陸都食過, $3each,
我答佢話有d人因為窮, 冇錢燒d花巧o野,
所以先咁燒矮瓜,
Princess Josephine講左幾句就o係到笑,
大家就繼續睇佢點搞,
燒左半個小時後,
佢拎把刀將個矮瓜擋開, 一刀過,
跟住倒d garlic o係上面, 拎住把刀o係上面"了來了去"
當然係指"了"個矮瓜啦,
再過約15分鐘, 佢話得勒,
放左上table後, 我冇食, 我唔知其他人有冇食,
我見唔到有人食,
而佢自己就開始食勒,
佢講左一句, "唔得! 失敗左!"
佢冇笑, 佢係認真咁講"唔得! 失敗左!"
Josephine, you are really the princess!!!

>>July 24, 2008 at 1:48:10 PM GMT+8

2008 年 7 月 17 日 星期四 【微雨】

尋晚同Paul, Ken, Michael打邊爐,
聽到Paul同Jess o既近況,
看到他們這麼努力事奉神,
也帶領很多人信主, 有吸毒力, 有迷失的年青人,
他們流露出耶穌的愛,
希望不久看到他們達成心願......

四個佬食左唔算好多o野,
主要都係想傾多d計,
二個半小時很快就過去,
老板話夠鐘要埋單, 唔係就要加錢,
咁我地就走, 因為其實大家都唔想咁夜番屋企......
----------------------------------------------------

特首十大抒解民困的方案,
好多人都話自己冇乜著數,
有d仲話部份中產人仕只係可以得到電費津貼,
其他9個方案都冇佢份,
起初我都有這個感覺,
我咪就係只得到電費津貼,
其他o野都唔關我事,
但係, 我又覺得冇乜問題,
聖經都教導我地幫助貧窮o既人,
咁我交稅,
政府用o係貧窮人身上,
似乎理所當然 (雖然我唔明點解幫助有錢請外傭o既人),
不過,
方案都是以幫助窮人為主,
我覺得不錯,
感謝主, 我沒有"我冇乜著數"的感覺,
放工......

>>July 18, 2008 at 9:56:40 AM GMT+8

2008 年 7 月 12 日 星期六 【陰】

收到Alice o係facebook o既留言,
就係取消左TD o既 lunch party,
只是幾個人回覆會參加,
大部份人都係一個"maybe"回覆,
有人有心攪活動,
如果大部份人都冇實在回覆,
咁遲d就會冇人出來攪活動,
真係浪費alice一番心機,
我想, 點解咁多人都唔知自己是否能參加一個活動,
或者, 好多人一生都係活在一個"maybe"當中.......
-----------------------------------------------------

唱機正播著王若琳的大碟,
真係從來都冇諗過一個台灣人,
可以唱英文歌唱得咁有靈氣
有soul, 有blue, 19歳可以唱到咁有味道,
希望佢會越唱越好......
------------------------------------------------

昨天順利完成"同學們的分享"這個週會,
大家的分享雖然離開晒原先o既內容,
但係出乎意料地好,
感謝主!!!
我昨天有些緊張或害羞,
雖然run團契run週會都有16,17年,
但係有時都會變得緊張,
carmen話呢d係什麼"人群恐懼症"?
我都唔記得佢話乜,
總之在台上要面對好多人講說話時,
有時就會發作,
有時做婚禮司儀,
對住咁多人都好自然,
但係有時只不過二十人的聚會,
又會發作.......
不過其實變得緊張或害羞也是好事,
咁樣我可以時常提醒自己每個分享,
都要好好預備,
唔係隨便講,
因為就算冇人聽得出你冇預備,
但上帝就知道,
"要像服事主, 不像服事人"........
但願自己永遠抱著這種態度去事奉......

尋晚團契後食飯,
我知道自己作為關顧,
係應該主動同新人傾多d計,
但係, 話題o既o野, 係對住男人,
有時真係冇話題..............

新來o既新朋友o既名字係最common,
有Sam, John, Paul,
過幾個月, 唔知會唔會有埋Tom, Peter, David,
如果係, 就齊晒.......
對住阿John, 阿Sam, 我巳經好主動,
對住Paul就有d難度,
不過, 我相信都會有其他人同佢地啱傾d都唔定........

飯後去左銅鑼灣行街,
行金百利,
我諗我係少數o既男人, 可以陪幾個女人行街買女人衫都唔會悶,
我都會留意d女人衫, 睇吓佢地o既設計,
偶然又會見到好靚o既女人行過, 又隨便望下,
最後, 又係只有佢地買o野,
自己唔會破費,
講起來陪女人買衫呢個活動不錯....

行夠就去左飲coffee, 我後悔我咁夜都order左一杯Mocha chillino,
咁樣飲再加cream, 太肥勒,
今晚, 我地好多o野講,
我enjoy我地今晚o既chitchat.....

>>July 13, 2008 at 12:46:41 PM GMT+8

2008 年 7 月 6 日 星期日 【陰】

早前看了一套電影"Number 23",
主角一生都同23這個數字連上關係,
其實, 人的一生, 總離不開數字......
----------------------------------------

今個月有成7個飯局, 看來要達成今個月節省計劃的目標, 有相當難度,
1. 同好耐冇見o既團友食飯,
2. 家會去燒烤,
3. 舊同事重聚飯局
4. 同爸爸吃飯
5. 大學同學重聚飯局
6. 與Paul, Ken, Michael一年一次o既飯局
7. 以馬忤斯重聚飯局
有7個飯局咁多.....

我係5月2日出世
5+2=7......

我o既staff no. 係586
5+8-6=7......

我第一次洗禮係11月23日,
1+1+2+3=7......

我第二次洗禮係12月22日,
1+2+2+2=7......

我每日都係7點鐘起身準備番工.......

今日係7月7日.......

好驚呀!!!

>>July 7, 2008 at 3:57:42 PM GMT+8

2008 年 6 月 29 日 星期日 【微雨】

今次去中國o既business trip遇上8號風球,
雨又大, 出入真係好唔方便,
幸好工人打風都番工,
生產才能順利完成,
而我同一時間做o既實驗到星期五為止, 都進展良好,
今個星期五要再返去一天就知結果.

雖然打風落雨, 但今次個trip好舒服,
因為我安排了呢個trip之後我一連放4天假期,
同大家一樣7月2日先番工,
所以今次心情很輕鬆,
我都可以講番句: 其實落雨又有乜好怕喎!
---------------------------------------------

4天假期, 聽日係最後一天了,
雖然Hullian o既留言話開冷氣一小時要$1,
即一天開十小時, 開足一個月的 話, 要成$300, 真係好多,
但係.......我........這個假期我都開著冷氣, 而且如果遲出街仲開好多個鐘tim,
真係好熱喎!!!

洗錢o既o野, 呢到洗多左, 就要第二度慳d,
節省計劃今天完結,
結果六月份, 我俾原先set o既budget洗多左$153,
只係超出$153, 都算唔錯,
呢個計劃幾好玩, 打算下個月繼續玩落去......
-----------------------------------------

睇完歐國盃決賽, 西班牙勝了德國,
基本上唔覺得好睇,
反而世界女排大獎賽就好好睇,
中國隊星期六遇上日本, 雖然中國三局全勝,
但日本突然在第二局打得咁勁, 中國隊苦戰才取得第二局,
而星期日, 中國隊決戰意大利,
一人一局打到第五局, 真係好好睇,
每次中國隊輸一局, 話者去到set point, 我真係好緊張,
而我喜歡的兩個球員趙蕊蕊、李娟都打得好,
李娟今次可以正選出場真係好,
其餘球員都打得不錯,
基本上意大利勝或是中國勝, 其實只差一線,
不過明顯地, 末段時間中國隊的心理質素比較好........
中國隊取得香港站o既勝利, 真係好開心.

今次睇排球和今天看的經文,
令我有一些反醒,
使徒彼得在彼得前書2章9節這樣說,
" 惟 有 你 們 是 被 揀 選 的 族 類 、 是 有 君 尊 的 祭 司 、
是 聖 潔 的 國 度 、 是 屬 　 神 的 子 民 、
要 叫 你 們 宣 揚 那 召 你 們 出 黑 暗 入 奇 妙 光 明 者 的 美 德 。"

每次當中國遇上災難, 遇上困境,
或中國隊和世界其他隊伍作比賽時,
我總會很關心中國, 或說是站在中國那方,
我在香港出生, 但這中國心巳種在我的心裡,
聖經說我是屬神的子民, 是屬於神的那方,
每當神的國度遇上攻擊, 神的家遇上困難,
我是否企出來站在神的那方, 是否出一分力,
這真要反醒一o下........
-----------------------------------------------------------

假期睇番兩套我心目中o既經典電影,
Reservoir Dogs,
Pulp Fiction,
兩套都係Quentin Tarantino o既作品, 前者是92年, 後者是94年,
很喜歡Reservoir Dogs裡面Harvey Keitel (Mr. White), 同Tim Roth (Mr. Orange)呢兩個角色,
而Pulp Fiction 就冇得傾, 14年來都是我心目中o既 no.1 電影,
每句對白都咁正, 情節故事耐人尋味, 選角配合近乎完美,
John Travolta + Samuel L. Jackson + Uma Thurman + Bruce Willis + Tim Roth + Harvey Keitel,
都係我喜歡的演員,
呢個配答真係正, 我都係呢套戲先喜歡 Samuel L. Jackson呢個演員,
不過呢套戲真係好多粗口, 可能有d人會接受唔到,
當年睇完呢套戲, 我就去書店買左本劇本來重溫,
因為當年在加拿大睇, 冇字幕, 有d英文真係聽唔到,
睇劇本係唔想miss d對白, 你話我有幾鐘意呢套戲呢!!!
----------------------------------------------------

看雜誌見到Travis in HK 呢個廣告, 7月31日首次香港演出,
好吸引, 最平都要$480, 忍......

The Breeders 六年來的新碟, 買......
-------------------------------------------------------

好少買TVB週刊, 但今期入面附送一本週刊係有林志玲作內容,
買......好靚......
7月10日赤壁上映, 好期待,
赤壁, 我等你......唔係! 應該話, 林志玲, 我等你!

>>June 30, 2008 at 6:15:02 PM GMT+8

2008 年 6 月 21 日 星期六 【酷熱】

天氣好熱, 一番屋企就要開冷氣,
究竟開半天冷氣要多少電費? 即晚上7點開到早上7點,
聽Rita講, 如果部冷氣仲係新, 半天都係cost你幾蚊,
咁抵?
如果幾蚊係錯, 又有人知道請話俾我聽.
當然, 星期六,日就會開多d冷氣都唔定, 除非成日出街啦......
雖然環保係重要,
但係momo都熱到咁o既樣,
我梗係鍚住佢啦,
不過阿媽就唔同, 佢開冷氣o既時間比較飄忽, 你估佢唔到,
momo就好醒, 邊間房有冷氣就去邊到,
天氣熱呀, momo, 你要飲多d水呀!!!
--------------------------------------------------

自從節省計劃開始左, 用錢我都會想一想,
可唔可以唔買? 或者遲d先買, 因為之後好有可能又會唔想買,
節省計劃到今天都好成功, 仲有幾天, 呢個月就完, 好開心,
完成後, 就會好清楚自己洗錢o既模式, 令自己知道點樣去洗錢,
下星期去中國4至5天, 食阿公我仲慳得多......yea!
-----------------------------------------------

股市o既變化真係好大, 氣氛變得比之前更差,
新聞都係bad news,
雖然我持樂觀態度, 但我都係有少少profit, 就放左一半中煤,
多一份支金以預防自己睇錯左, 都有多d錢將來再買貨,
有擔心就要持少d貨, 始終要令自己投資股票有輕鬆的心情最為重要,
不被市場升跌而影響自己的心情.......
也要多謝思晋的提醒.
----------------------------------------------

之前攪左一次職員飯局,
好想o係短期內攪一次團友燒烤活動,
心想下個星期日會幾好, 因為隔一天就有七一作休息,
但係自己下星期去左中國, 聯絡方便會幾麻煩,
放上團契綱, 大家一星期內會否主動報名令人懷疑,
而有個風又話要來,
想不通.......
-----------------------------------------

歐洲國家盃又爆冷門,
之前德國勝葡萄牙唔奇,
但係土耳其勝克羅地亞冷,
尋晚俄羅斯勝荷蘭就好冷,
不過自從英國出唔到綫,
法國慘敗,
我都冇咁投入睇歐國盃,
等遲d睇決賽就算勒.
-------------------------------------------

Helen尋晚生日, 我地團契後去左食pizza,
Pizza o既香腸扭扭批比芝士扭扭批好食好多,
講起來同Helen, Carmen, Hull, 基, Mandy, Ophe, Harrison都識左好多年,
除左帶我番o既Brian, 一番團契就識佢地,
感謝神,
俾左咁多好朋友同弟兄姊妹給我,
又有一班咁好o既同事, 就算走左o既同事都繼續有聯絡,
講番Helen, 佢成長左好多, 見到佢咁落力事奉, 只能講個"勁"字,
Helen, 你好o野, 也再祝你生日快樂!
--------------------------------------------------------

去中國公幹, 回程有時間的話,
我都喜歡去做massage,
男人話去中國按摩, 女人或公眾都會認為係唔正當,
認為一定係色情,
d人咁講因為自己心邪,
不過也很難說,
因為去中國"摽"技o既男人真的不少,
基本上你亦唔會去錯d唔正經o既按摩場,
門口有奇怪顏色o既燈光, 加一個好sexy o既reception,
咁緊係唔正經啦.....

以前去o個間70元兩小時, 不過就比較舊,
Josephine介紹我去一間就唔錯, 98元兩小時中式加一小時按腳, 好抵,
而且係地鐵原線,
我通常都會找相屬o既技師,
而通常我都會俾好多tips, 例如50元,
點解,
既然我地話有d唔正當o既按摩場, 有人用唔正當o既方法來賺錢,
咁我就更欣賞d正當o既按摩場, 欣賞技師努力工作來賺錢,
我也喜歡聽佢地講鄉下o既事,
技師人工一般都好低,
放工後好多時都會手痛,
佢地宿舍仲係每人得個床位o個種,
有個技師仲話曾經新年打電話番鄉下, 家人食緊團年飯,
父母聽到個女年三十同初一要番工,
全家人都食唔落飯,
聽到都令人心酸, 所以如果佢用心幫我按,
我很樂意俾多d tips,
最唔鍾意係見到d人, 以為有錢大晒,
叫一個同佢按腳, 一個同佢修甲, 一個按頭,
係同時間進行,
最主要係佢o既態度令人討厭,
雖然你有錢又有俾錢, 人地服事你, 你都應該講聲唔該,
不過算啦, 呢d人都唔少.........
上次我同個技師提起宗教, 我話俾佢聽我係基督徒,
佢都好有興趣知多d,
不過就無暇閱讀, 如果唔係都可以送d書俾佢睇,
中國o既貧富懸殊真的很嚴重......

>>June 22, 2008 at 3:18:50 PM GMT+8

2008 年 6 月 16 日 星期一 【雨】

無驚無險, 就快到六點!

呢排生活實在有點淡淡,
加上天氣濕濕, 成日雨雨,
令到人變成懶懶 (小狗Momo的語言),
呢種懶若成為習慣就不得了......

作為一個男人, 總想在事業有一些成就,
為香港作出一點貢獻,
為國家犧牲,
(以上兩行唔該自己skip左佢).
雖然我唔係o個種野心好強的人,
但能夠多發揮自己的才能,
是很有滿足感的,
巧合地,
團契週會講"上位秘笈",
提到職場誡命和機會,
令我有些領會,
但放在自己處境,
就是你本來在地獄,
你再上位,
就等如向地獄行多兩層,
正如我組討論的,
是否可以上位, 很在乎你老細係乜o野人,
好似我老細唔願意pay,
升你title都冇用啦,
上位放在工作上, 當然也包括過擋,
希望唔洗太耐, 我可以上一上位,
在事業上有一些成就,
為香港作出一點貢獻,
為國家犧牲........

>>June 17, 2008 at 9:56:37 AM GMT+8

2008 年 6 月 11 日 星期三 【微雨】


Temptation
有段時間冇行玩具店, 今日一行, 好多o野想買,
因為慳錢計劃開始了, 所以我........忍
我巳經冇買五月o既pullip, 當然都因為四川地震, 所以唔買五月呢隻,
但今日見到,
100%Be@rBrick 熊熊cross over 我愛o既樂隊Oasis,
好想買,
跟住又見到,
100%Be@rBrick 熊熊cross over 我愛o既電視劇Lost,
好想買,
再見到,
一隻400%Be@rBrick 熊熊好鬼cute o既design,
忍忍忍........
為左計劃, 今個月忍住唔買, 下個月再算.....



>>June 12, 2008 at 3:03:00 PM GMT+8

2008 年 6 月 9 日 星期一 【晴】

Testing, testing.....

Momo

Momo變大左

Momo變左色

Momo慢慢行

Momo走得快

Momo變大變色又走得快

好耐冇用過html, 試o下先.......

>>June 10, 2008 at 9:38:22 AM GMT+8

2008 年 6 月 9 日 星期一 【晴】

6月尾前要清晒d假期,
雖然只係要清4日半, 但係要請假又唔影響工作都要plan o下,
就係咁, 我就剛過去o既星期五、六請假,
用1日半去另自己呢過屈原死o既日子有4日假........
其實今時今日, 除左食"種", 究竟仲有冇人提起屈原？

呢個假期我只想懶洋洋咁渡過,
所以除了同人慶祝生日加睇番場戲,
其餘時間都係睇書、睇DVD、睇波、睇狗,
我推卻晒任何有意義o既活動,
例如團契有派"種"活動, 但係我冇參加,
冇得解, 只是呢個假期唔算做, sorry........
----------------------------------------------------------------------

節省洗錢o既計劃開始左,
上個月作測試, 都有些少成績,
今個月開始要達到目標, 真係難,
希望月尾可以講番句成功啦!!!
---------------------------------------------------------

呢兩個月睇o既movie有好多,
Rambo I, II, III, IV
Narnia I, II
No Country for Old Man,
Silent Hill
學校怪談
有人話Rambo除左第一集, 其餘都唔得, 我就覺得集集都咁好睇, 第四集仲好鬼勁,
有人話Narnia第一集好悶, 第二集就好好睇, 我就覺得兩集都好睇,
悶？ No Country for Old Man一d都唔悶,
Silent Hill 真係睇到我好驚,
學校怪談就睇番95年o既鬼片, 幾有趣,
有時, 我地睇得戲多, 對感宫視覺要求多左,
自己變左"電檢處", 有時聽到人講, 呢套又話唔得, 個套有話唔好,
都係娛樂o者,
是感宫視覺效果, 是故事背後意義, 是演技都好,
能享受其中樂趣, 佢對自己來說, 就係一套好電影,
我諗, 做人都係一樣,
懂得欣賞多d, 人都開心d.......
我好開心我身邊有好多喜歡電影o既朋友,
大家睇完講o下笑o下, 不咁說句"人生真好玩!!!"
-------------------------------------------------------------------------

股市今日大跌,
我買左d貨,
如果之前一直o係手d貨叫第一批,
咁今次就買左第二批,
如果再跌, 咁就跌低d買第三批,
機本上我覺得個市另大部份人驚, 大部份人睇淡,
往往就係時機, 幾時有好多人一齊發達架,
所以我唔想跟人地,
冇乜理論架,
覺得d好股值得買, 咪買o羅,
如果係中、長線投資, 有乜好驚,
你諗o下以前咁多好股賣到咁貴, 就唔買啦,
依家好似Sogo咁, o黎個感謝祭,
o既然大特價, o米買番d 貨o羅.........
如果再大跌+大跌+大跌,
即係Sogo減完, 見到先施減價, 跟住永安減價, 跟住吉之島又減價,
咁Sogo 就再減價, 咁緊係會越來越平,
o既然特價之後可以再特價, 又買多d 啦,
你減價買一條Levi's牛仔褲, 再減價o米買多一條Levi's牛仔褲, 個point係遲早都要著,
大跌買中煤能源, 再跌再買多d中煤能源, 個point係遲早都要燒煤,
我諗俾d分析員睇到, 會激死,
冇呀, 各位專家, 我估唔到o係Sogo大減價都睇會到股票見解o者, 哈哈!!!!

>>June 10, 2008 at 9:24:02 AM GMT+8