2008 年 8 月 18 日 星期一 【晴】

今日放工, 繼續追睇奧運,
平衡木程菲只得銅牌, 李珊珊就掉下來失去奬牌,
美國o既沙恩壯遜得金牌, 柳金得銀牌,
不過呢兩位真係做得很好,
見到程菲識得笑, 體操都算係一個好好o既結束.
李珊珊, 加油! 將來仲有好多機會!

今晚o既女排好好睇,
中國勝俄羅斯3:0,
可以留力打巴西,
今晚最愛的趙蕊蕊成為主角,
打到班俄妹冇乎,
不過頭兩局都贏得幾險,

明天出trip了, 希望早d做完o野可以番酒店睇奧運啦!!!

>>August 19, 2008 at 4:05:33 PM GMT+8

2008 年 8 月 18 日 星期一 【晴】

尋晚放工即刻番屋企,
為的是要睇兩個妹妹的高低槓,
番到屋企, 點知tvb唔係播高低槓,
係播"特備節目--劉翔"
就好似一個追思會一樣, 令人氣憤......

劉翔我都關心, 我都希望佢快d好番,
但係新聞巳經講左, 就係佢隻腳有事啦,
再講都係佢隻腳有事要退出,
再三講都係佢隻腳有事要退出,
但係tvb又o係黃金時段播特
那邊好緊張, 楊伊琳、何可欣代表中國隊在高低槓爭取金牌,
tvb完全唔播,
一尾講劉翔跑唔到, 然後玩感動,
"基仔你點睇?"
"什麼教練你點睇?"
隻腳又唔係佢, 傷成點又唔知, 可以點睇....

後來我放棄tvb,
轉個亞視,
佢地都遲左播, 但係佢地完整播晒成個高低槓,
多謝你地!!!

何可欣係第一個,
睇住佢飛來飛去,
有d替佢擔心,
佢做得好好,
表現近況完美,
成功跳下來, 得到16.725分

第二個又係對手美國的柳金,
佢都做得好好, 一樣係16.725分,
這一刻我真係好緊張,
唔係咁呀o麻,
唔好判第二呀!!!

之後第三個出場, 但係一路等緊究竟同分邊過會勝出o既結果,
直至第五個出場, 係楊伊琳,
佢真係做得好好,
不過難度冇何可欣咁高,
跳下來翻騰得好靚, 得到全場掌聲。
我好欣賞何可欣抱起楊伊琳, 佢認為個金牌應該係楊伊琳,
呢份無私的心真好,
不過楊伊琳得16.35, 最後得到銅牌,
而何可欣因為失分比柳金少一點, 所以得到金牌,
看著她兩個走上台上的笑臉, 真的令人很開心,
不枉我稱你做"天下第一高低槓何可欣"

其實奧運每一天都有好多o野睇,
但我個人比較喜歡女子體操及女排,
是我必看的項目,
其餘的睇到就睇,
今晚, 就有女子平衡木,
李珊珊同大師姐程菲出場,
平衡木係程菲強項,
希望在呢個最後機會,
程菲有好表現, 一抺之前o既唔開心啦!!!!
對手仍然係美國o既柳金及"沙恩莊信", 絶對唔容易。
睇完又即刻有女排, 中國對俄羅斯, 緊張!!!

在訪問中, 問了楊伊琳一連串問題,
有d都答得幾好笑,
但有一問題係, "你現在還有什麼夢想?"
她笑著說: 奧運都完結勒, 還有什麼夢想呀!!!

其實, 運動員可以用四年時間預備奧運拿金牌,
她間接提醒了我,
四年後, 我想得到什麼?
有目標的話, 就要開始預備,
四年一d都唔多!!!

>>August 19, 2008 at 11:06:34 AM GMT+8

2008 年 8 月 17 日 星期日 【晴】

奧運巳經過了一半,
大家都會好開心, 因為中國o既金牌數目昨天去到35個,
而銀、銅數目亦加了很多, 所以連總獎牌數都追近美國。
尋日就一天得到8個金牌, 好勁!

電視都唔知點播好,
由下午開始, 男子體操、羽毛球、女子體操、跳水、排球連住播放,
有d仲係重疊時間, 所以睇睇o下排球冇得睇......

其中幾樣我比較關注,
男子自由體操有鄒凱得金牌,
鞍馬有肖欽,
羽毛球有林丹,
跳水三米板有郭晶晶奪金, 吳敏霞奪銅,
排球方面,
雖然只係入8強, 但中國隊勝日本,
得到排第三入8強好重要,
有人問排球係點計入圍, 如下: (如果我冇搞錯, 應該係咁計)
A組有6隊, 頭4隊出}�,
B組有6隊, 頭4隊出}�,
咁A組第1名對B組第4名, 而B組第1名就對A組第4名,
A、B組中間第2、3名就抽籤,
所以中國第3名好重要, 因為如果第4, 就要同B組第1名打, 即巴西,
咁就分分鐘4強都入唔到,
希望中國抽到好籤啦,
另外, 尋晚場排球跟本冇機會睇完, 就話中國勝日本3比0,
我唔知打法係點, 點樣打贏,
不過希望呢次打番起中國隊士氣啦!!!
趙蕊蕊, 李娟, 加油!!

最另我關注的, 就是女子體操,
我當佢地係妹妹一樣,
上星期五o既女子全能, 楊伊琳得第三, 而程菲就冇牌,
到尋日, 程菲o係跳馬第二跳又失手, 只得一面銅牌,
佢失手都有銅牌, 如果冇失手, 真係金牌到手,
佢壓力真係好大, 看著她哭, 很難過......
到女子自由體操, 程菲又失手, 失去了獎牌,
而我最愛的江鈺源, 自由體操做得很好,
可惜對手很強, 只得第4,
真的有點可惜,
江鈺源小妹妹, 努力! 我會繼續支持你!!!

今天是高低摃,
有楊伊琳、何可欣代表中國隊,
天下第一的高低摃何可欣, 你盡情飛啦!
楊伊琳都要努力呀!!!
--------------------------------------------------------------------

7月o既節省計劃好成功,
完全達到目標,
8月開始左一半,
剛好洗左今個月可以用o既錢的一半,
好! 都要為自己打氣!
都要多謝通貨膨脹,
你地o既加價喚醒了我要慳錢,
多謝晒!
最神奇係在咁多飯局情況下,
我都達標, 感謝感謝,
求上帝繼續教導我點樣做個好管家。
--------------------------------------------------------------

上個星期忙睇奧運之餘,
就係睇書做功課,
終於順利在上星期四交了功課,
我慢慢睇左《約翰衛斯理的今日信息》
而且仲一邊睇, 一邊做筆記,
也帶來很多反醒,
三神就係咁,
讀完呢個課程畢業係好容易,
大膽講, 同大學年代比較,
如果大學難度係100%,
三神只得20%難度,
但係呢d course最危險,
因為如果你唔自發勤力,
讀完後你可能一d野都學唔到,
所以睇書係第一部, 加以分析思考係第二部,
咁樣先可以吸收課堂o既o野,
仲有兩科主修科, 要努力呀!!!
---------------------------------------------------------------

上個星期project埋尾, 又present埋,
今個星期三、四要回中國,
所以今、明兩天都幾free,
幾好幾好.......

>>August 18, 2008 at 4:03:25 AM GMT+8

2008 年 8 月 14 日 星期四 【晴】

又係充滿飯局o既一個星期,
同Julie, Shelley食飯,
我地去左風月堂,
其實風月堂都幾好食呀,
價錢合理, 旺角區來說, 環境都算幾好坐,
一碟羊扒, 羊扒好香好食, 伴碟d蘑菇都好香
一碟焗帶子, 就好普通,
一塊芥茉羊肉Pizza, 好好好好食!!! 不過唔明點解叫左咁多羊o既o野
一碟雜錦拼盤, 有雞軟骨, 幔魚串, 牛肉蘑菇串, 仲有一款唔記得, 每款三條,
一個雪糕甜品,
二枝啤酒, (竟然兩個女人一人一支, 我飲清水, 呢個乜o野世界),
每人$140, 可以接受.

尋晚就同Mandy慶祝生日,
食日本放題, 以$140一位計算有任食,
唔可以要求太多, 一般啦!
再去滿記食糖水,
好飽呀!!!!!

講起食, 上星期團契去黃埔打保齡球,
就o係黃埔美食坊王家沙食, 總覺得冇以前咁好食.......
----------------------------------------------------------------

呢排o既焦點, 當然係奧運,
大家談起個開幕禮, 都讚不絶口,
作為中國人, 見到中國奧運咁成功,
真係好感動,
中國人一d都冇失禮,
而且對於將來爭取主辦權好有幫助, 國際形象都變好,
最重要一點, 贏回好多中國及香港人的心,
做得好!
沒有大鑊o野發生, 也是幸事.....

好多賽事都令我感動,
郭晶晶同吳敏霞o既雙人跳水, 贏得漂亮,
女子體操隊資格賽時,
何可欣在高低槓時掉下來, 看見她的樣子, 我就哭了,
在正式比賽時, 她克服了掉槓的陰影, 以16.85分做出超水準表現, 我又再哭了,
到她們知道可以奪金時, 場面很感人, 歷史性拿取一面女子體操隊金牌時,
當程菲完成表演與隊友擁抱落淚時, 我又再加入她們, 和她們一同落淚。
我會記住她們的名字: 程菲、楊伊琳、江鈺源、何可欣、李珊珊、鄧琳琳,
平均年齡16.5歳的你們, 做得很出色。
我16.5時, 最多咪同老板講, "喂! 你俾少左一粒, 三蚊唔係7粒魚蛋咩!"

而江鈺源是我認為咁次奧運裡, 最美麗的運動員,
她的笑容令人很開心, 體操運動員可以在做動作是都有這種笑容, 難得,
我都識一位女仕有個鈺字, 佢叫X鈺X,
此X鈺X和江鈺源好唔同, 佢唔係玩高低槓, 因為佢應該都上唔到槓......
講到呢度又要停, 為免惹來殺身之禍。

今日係江鈺源同楊伊琳o既個人全能賽,
希望佢地得金牌啦

而女排方面, 由國女排星期三輸左俾古巴,
剛剛輸埋俾美國.
輸比古巴都合理, 都可以講中國打得好, 但古巴打得更好,
輸比美國, 就係自己打得差,
美國技術唔算好勁, 但中國隊o既失誤, 打起左美國,
打到美國越打越好, 點解咁架!
我唔係教練, 唔可以作好深入分析,
但係可以清楚看到, 兩場比賽都一樣,
1. 中國隊一打得長, 體力都好像不夠, 或說比起對手疲累,
2. 每次先得分, 得到一兩局, 好像不能維持, 不集中精神打落好, 咁就冇再最好o既機會取勝,
我諗, 拿金牌應該可能性很低, 我希望佢地可以有銀牌, 咁我都開心......

>>August 15, 2008 at 3:14:17 PM GMT+8

2008 年 8 月 7 日 星期四 【雨】

Happy birthday to Mo
Happy birthday to Mo
Happy birthday to Mo Mo
Happy birthday to Mo Mo Mo!!!
Momo! 你十二歳勒!

>>August 8, 2008 at 5:58:32 AM GMT+8

2008 年 8 月 5 日 星期二 【寒冷】

尋晚實在太無節制,
睇電視劇睇到深夜2點,
心想, 呢鋪死梗,
今日番工實無精神, 仲會好辛苦,
而且要開會,

今早7時醒來, 即刻打開電視,
看見8号風球那標誌,
心裡的喜悅難以形容,
即刻爬上床再訓, 訓到11點先起身,
起身先發現屋企o既o野食晒, 得番杯面,
所以今日o既飲食係最唔健康,
早餐係杯面,
午飯唔食, 跳到下午茶食大快活,
晚飯竟然係麥記,
不過突如其來o既假期真係好舒服,
睇dvd 聽歌輕鬆渡過今天,
對唔住呀! 風小姐, 你給我一天假期, 我連你叫乜名都未知!
-------------------------------------------------

我睇乜o野電視劇睇到2點?
係睇緊Lost season 4,
不經不覺睇到第四季,
好多迷團都解開了,
呢套劇節奏唔算快, 特別係第四季你可能會覺得太慢,
但係一直睇到第四季, 你會好想找答案,
而呢集真係俾好多答案你,
好睇!
官方網站話第6季係最後,
期待第5季快d有得睇!

講開電視, 前排tvb o既向世界恤髮真係幾好睇,
不過應該話有好嘉賓先好睇,
好似余慕蓮同謝賢都幾好睇,
有d人話集集都要嘉賓喊o下,
我就覺得幾好呀,
外國有句說話Happy people has no story,
我好相信人係要經歷過傷心往事, 先會有故事講,
快樂o既事雖然留下美好回憶,
但對生命冇乜改變......

講開娛樂,
聽王若琳o既cd聽左近三個星期,
真的不錯,
但係正如她自己說, 佢對呢張碟唔滿意,
我同意,
雖然有好幾首動聽的作品,
但係絶對唔係一張佢o既代表作,
以佢o既功力, 遲d有機會做一張代表作,
一張全碟每首歌都好聽o既代表作,
努力努力, 支持你!

剛剛找回Placebo o既大碟,
係Without you I'm nothing,
同Pulp o既Different Class,
兩張碟都係90年代, 我諗係96到98年間,
我一口氣錄進mp3,
希望搭車時多d聲音可以聽o下,

早排好吸引我o既MTV,
係安室奈美惠o既MTV,
拍得好靚, 唔只係拍得安室奈美惠靚,
而係好有音樂感, 好好feel,
歌名一時唔記得,
日本人拍MTV可以拍到今高境界,
我懷疑全世界拍MTV最好o既國家, 可能係日本.......

>>August 6, 2008 at 3:54:29 PM GMT+8

2008 年 8 月 4 日 星期一 【雷雨】

今日一番工就慘,
好耐冇掂針筒, 一掂就"吉親",
事緣我諗住要6個針筒做實驗, 但唔需要針,
淨係要個筒做其他工作,
我都同自己講,
小心d 呀, 針o黎架,
我應該都幾小心, 折到第4支,
之針就插落手指,
即刻標血, 跟住成身軟晒(我見親人血會成身軟晒, 如果唔係, 我做左醫護行業好耐)
仲要頂住做埋個實驗,
d血就流o係手指同手套之間,
但明明話要小心, 但結果都避唔到
仲以為唔痛,
好痛呀!

>>August 5, 2008 at 3:42:32 PM GMT+8

2008 年 8 月 4 日 星期一 【雷雨】

一點點回憶

除了寶寶, 同埋......, 同埋......,
也曾經心愛她,
和她email幾乎每日停不了,
每天都給她一封情信,
每天都對她說想念她
每天都彷彿向她說一次我愛你,
來來往往也不知多少次,
和她傾電話很開心,
也曾經每晚都想著她,
曾經很掛念她,
曾經很想和她一起,
曾經很想和她結婚,
試過努力,
多少次付出,
但等不到,
或者在一些處境下,
學會了,
明白了,
必須放棄......

重拾一次
再放棄,

再重拾一次,
再放棄,

直至心意巳決,
不再回頭, 是的, 不回頭倒好,
心想不回頭不再痛苦,
造出這樣的決定很痛,

時間慢慢過去,
也康復了 也明白了

和她結束的時候,
故意說一些話令她討厭我,
或令她不知怎樣再回覆,
只為 一個了結,
沒完沒了的聯繫更痛........

今天, 卻想你......

>>August 5, 2008 at 3:42:24 PM GMT+8

2008 年 8 月 3 日 星期日 【陰】

呢排好鍾意同Momo夜行旺角,
係呀, 我係住o係mk,
除了留學加移民離開香港8年,
再加流落(或失落)屯門1年,
其餘時間我都係住o係mk,
同小狗momo行旺角一d都唔簡單,
由於旺角人多, 車多, 總知乜鬼o野都多,
而且污漕, 一般我都係抱著momo，
呢條狗17 lbs,
加上大熱天時,
抱著momo就好似抱住個火爐一樣,
佢就嘆啦,
蔡蘭嘆世界都要用對腳行,
而momo大少就行都唔洗行,
momo四處望, 好happy o係到笑,
呢條狗女成日望, 肯定o係到"鴿"仔,
不過我都唔差,
有時有d靚女走埋o黎摸吓momo,
我都可以吹吓水.......

小狗Momo係96年8月8日出世,
即係到今個星期五8月8日, 佢就12歳,
有組國放煙花為momo慶祝生日,
你真係巴"幣"!!!
Momo生日倒數, 仲有4天
---------------------------------------------------------

尋晚同Jacquelinebaby慶祝生日,
本來好地地,
但係食食o下簡直一個悶局,
除了主人家Jacquelinebaby保持甜美笑容外,
其他人都唔知想點,
這樣的環境及感覺, 令我食得很不快,
點解會咁,
我先聲明, 唔係一定有人做錯事或搞錯什麼,
只是那個化學作用就是這樣,
就好像食o野係好平常o既事,
但食錯o野就會肚痛,
呢個比喻唔得,
再唸過,
應該話本來一張table食飯有傾有講會好開心,
但係有人搭枱, 講o野就唔自然唔夠放......
不過講呢個話題好敏感,
又怕人睇完加左自己o既詮釋,
所以我都係唔好再講勒,
係唔關任何人事,
係社會o既錯, 冇錯! 一定係社會o既錯.
----------------------------------------------------------------

好耐冇睇香港o既電視劇,
但係近期"家好月圓"真係幾好睇,
成套劇主要係幾個場景, 例如兩個屋企加一個餅店,
所以內容好唔好全靠演員o既功力,
內容有劇力, 我會繼續睇落去.
同事R話如果你同米雪掙6個仔女,
你會點掙,
同事都有唔同諗法,
我就話我只係掙一個,
就係陳法拉,
同事話啞都得,
啞都得!
事實上陳法拉楚楚可憐個樣更美,
法官大人, 我淨係要一個女, 其餘5個都唔要......
---------------------------------

問世間情是何物,
最近好煩,
如果你要話俾一個人聽你係0%鍾意佢,
而且係從來都0%鍾意佢, 更加知道你將來都會係0%鍾意佢,
唔想佢花時間, 因為你一d都唔鍾意佢,
但係又唔想hurt佢,
你會點做,
有時暗示佢都好似唔明咁.......
有何方高人可以請教,
咪就係講緊佢law........

我唔想lost呢段友誼,
關心人係我o既本性,
但為了唔想有任何誤會,
我有時甚至要故意表現態度差,
令對方覺得我唔好,
你話我幾痛苦......
我點解今次寫呢段o野咁恨,
咪係想表明我立場清楚,
如令你受傷, 請見諒, 事實上我唔知佢會唔會睇到我日記......

各位高人! 如可脫離困局?
請教, 請教!

>>August 4, 2008 at 3:20:27 PM GMT+8

2008 年 8 月 3 日 星期日 【陰】

同事S尋晚零晨上機, 同女友飛去倫敦,
會在倫敦及法國玩足兩星期,
最重要係會在今次旅程求婚,
近期一個多月佢就係為個trip造安排,
佢造了一本故事書用來求婚, 由史力加故事改編,
而讀出呢本故事來求婚o既地點佢未決定,
可能係London eye(倫敦摩天輪),
或者係法國巴黎鐵塔,
或者係一間餐廳......

我最欣賞同事S係佢o係求婚呢件事上很認真很有心思,
而且有d低能,
呢方面我同佢好相似,
就係愛情裡面唔怕做低能o既事,
最緊要係令對方開心...... 只要你有心思, 成件事就算超低能都變得好有意義.

由於同事S唔識中文, 佢女友英文又唔係咁好,
我就要幫佢將呢個英文版故事改編成中文,
星期六早上就為了這事打字打個不停, 希望趕得及完成這書,
最後我們當然順利完成,
得到同事S允許轉載, 也讓好奇的同事及朋友可以一看, 如下(人名會改左),
不過知道製作時間太趕, 有d地方翻譯得唔係咁好....

從前有個美麗公主叫Sasa，她住在一個遙遠的地方稱為馬鞍山。
儘管她是一個公主，她十分勤力工作。你常會發現她在有名望的學校教書，
例如“愛德華茲” 這種學校。她幫助好似哈利波特呢類學生學習普通話。
有一天，在完成忙碌的工作之後，公主Sasa決定去郊外散步。
她從愛德華茲坐上一架馬車到市中心去。她隨隨地散步到一些地方。
步行了一會之後，公主Sasa 被景色吸引停了腳步下來。
她深呼吸了一口氣，然後說：「上帝創造這個地方真美麗，感謝主給我這一切。」
隨著公主Sasa一直向前走，她經過很多美麗的地方。她常常停下來讚美每樣事物，
例如花、建築物、甚至天上的雲。
公主並沒有留意時間的消逝，她只是不斷行走，經過一個又一個的草園。
直至太陽下山的時候，公主Sasa 開始感到疲倦和飢餓。
正當她決定要回家的時候，才發現自己巳經迷路。
當公主Sasa在森林感到無助時，她來到一個中間長滿蘆葦的河流。
她喊叫地說：「救命！……救命！有沒有人可以幫我，我完全迷了路。」
「如果我可以回家，我願意送出我華麗的衣服和珠寶，以及我所有的東西。」
正當她說話的時候，一隻青蛙在樹後聆聽著。
那隻青蛙跳上樹枝上，接著說：「我的公主，我可以幫助你！」
青蛙說：「我不想要你的財寶或華麗的衣服，但如果你可以愛我，
並和我一起生活，我可以教你怎樣回家。」
公主想：「呢隻傻青蛙不知自己在說什麼！」
青蛙跳到地上，轉過來面向著公主鳴聲說：
「我就是你的白馬王子，你可以和我結婚嗎？」

應承或是拒絕

我拒絕！
這個拒絕卻令青蛙的心都碎了，只換來是點點憂愁。

我應承！
當青蛙感到開心快樂的時候，他突然變成了一位英俊的王子。
這王子從馬上跳下來和公主踏上婚姻的道路！
王子帶著公主回到他的王國裡結婚，從此他們過著永遠幸福快樂的生活。

讀完整個故事後, 同事S就會求婚,
相信同事S會問女友想隻青蛙變成點, 即是問佢應承或是拒絕......

欣賞同事S有心意, 在百忙中也做好這個故事,
如果你認識同事S, 就為他祝福吧!
我也祝同事S求婚成功!!!

>>August 4, 2008 at 2:07:31 PM GMT+8