2013 年 8 月 5 日 星期一 【晴】

momo, 我好掛住你呀!

>>August 6, 2013 at 9:28:19 AM GMT+8

2013 年 8 月 5 日 星期一 【晴】

小狗momo, 再見了!
我永遠都唔會忘記妳!

>>August 6, 2013 at 4:36:28 AM GMT+8

2013 年 7 月 31 日 星期三 【驟雨】

愛書的米菲


米菲早前去了書展,
參與書展這個活動,
雖然要排隊入場,
像米菲星期六下班後去,
排到離會場入口好遠,
不過入場後, 又唔覺得好迫人,
而且, 可以在好多書中尋寶,
找尋自己喜歡的書, 感覺真好。
有人批評書展太多人, 所以唔想去,
米菲總覺得書展多人熱鬧,
總比冷清好得多。

因為這天朋友臨時要代課,
但我們又沒法改期再相約去,
於是米菲決定如常去書展,
也是米菲第一次一個人行書展,
那麼, 我可不可以像高木直子一樣寫書,
寫本書叫一個人行書展。

大約用了20多分鐘才能進入會場,
米菲在會場右邊的中國書商一帶一看便個多小時,
然後向左邊一望, 發現原來自己還在起步點。
隨著經過榆林, 三聯, page one和其他多個書商,
已經是晚上11點了,
原來我睇左咁耐, 而且還沒有食晚飯呢！

為了看衛斯理五十周年展, 疲累地還是要走到三樓看。
看到衛斯理小說的人物關係圖,
真係令人吃驚, 我諗連倪匡都唔知自己寫得咁複雜。
時間無多,
還要去埋宗教書商那邊, 為了要買新書,
最後也沒有時間及體力再看其他的展覽了。

今次書展睇得多,
但只是買了六本書,
大部份是打八折買的,
其餘的是七折買的,
到底買了什麼書,
看完後再和大家分享吧！

米菲由下午4點幾行到晚上11點幾,
行足七個小時,
離開會場後才食晚飯,
也不知那年開始, 成為了一個愛書狂熱者啊!

>>August 1, 2013 at 4:18:21 PM GMT+8

2013 年 7 月 30 日 星期二 【晴】

辦公室有鬼


還記得多年前讀碩士時,
教授話美利樓有鬼,
我就細細聲回答,
鬼就唔見, 鬼佬就好多。
到了今天,
慶幸內地自由行,
唔係咁去赤柱,
所以赤柱還能保持某程度寧靜。
不過在週未去赤柱, 真係好多鬼佬,
不過米菲其實唔係想講鬼佬。

關於鬼, 在基督教裡,
其實就是邪靈。
而米菲實在好喜歡睇鬼片,
又要驚又要睇o個種。
不過米菲其實唔係想講邪靈。

我想講係內鬼, 我發現內鬼。
辦公室原來真係有人打小報告,
怪不知有時D事咁出奇啦。
受害者有好幾個人,
米菲亦是其中一個受害者。

不過今時今日的米菲,
也不怎麼介意,
只是有點不明白為何內鬼要做內鬼,
以後唯有自己小心一點,
以免再成為受害者。

最可怕是, 內鬼可能唔只一人,
不過因為沒有100%確定(也有99%),
所以米菲也沒有和同事分享,
而且這些事, 知道便算了,
反正也不能做什麼,
也不想在公司說是是非非呢。

今時今日的米菲,
也不怕內鬼呢！

>>July 31, 2013 at 3:22:05 PM GMT+8

2013 年 6 月 18 日 星期二 【晴】

米菲遊首爾第五天


今天出發去梨花女子大學，
就是到女子大學街上觀光。
為何去女子大學觀光，
唔通去睇女仔？

作為循道衛理教會的會友(米菲其實是好多基督教派的會友),
就真係要講講這所大學。
Ewha Womans University梨花女子大學是韓國第一間女子大學,
是最有歷史價值的。
在1886年建校, 當時叫梨花學堂,
命名是為紀念衛理公會一位醫生的太太,
她是最先在韓國開創女子教育的。
到1948年, 改名為梨花女子大學, 簡稱梨大。
近年在亞洲排名45, 被認為是韓國最好的大學。

米菲拍了她的校徽, 上面有真善美三個字,
估計校訓又係真、善、美。
這所學校環境很美麗,
而且大學還遺留當時的古老建築物,
踏進校園, 感覺好優雅。
米菲在草地附近遇上一班小童, 4至5歳左右,
用僅餘的韓文跟他們打招呼,
慶幸他們聽得明白並以招呼回應, 佢地好可愛。
由於要睇住時間, 否則一定會走進她們hall裡面看一看。

梨大附近的街道稱為梨大前, 由於這裡學生多,
漸漸成為潮流飾物的熱點。
服飾店多數是小店, 並有些飾物店和咖啡店等,
也有店主自家設計的品牌。
到處拍照後, 走進去一間較大型的商店Kosney,
類似Franc Franc 加City Super,
這裡Kosney有四層, 是賣文具、服裝、玩具精品等,
在裡面米菲買了些手信, 最開心是看見一個好靚既背包,
而且是韓國做的,
能夠在最後遊韓一天, 買到一個喜歡的背包真好。

午飯時間我們走到離機場不遠的一個海邊區食飯,
好像叫Young Jong Island
看回拍攝的照片, 我們大約在Young Jong Dock的位置,
不過到現在還不肯定自己在那裡.
午飯今天就在這海邊的店食魚生、海鮮和火鍋, 還有些小點會不停送上,
最特別是食生八爪魚, 隻八爪魚其實幾大,
把活生生的爪放進咀裡, d吸管會吸實個嘴唇,
大約十幾秒才失去吸力, 都幾鮮味。

這個下午陽光很好, 在這海邊令人開郎。
沿著海邊走, 都是這類型的海鮮店。
還有一隻叫Worldee的吉祥物在海邊,
走到一段, 有團友買了一包蝦條, 在餵海鷗。
這海邊本身海鷗很多, 加上我們餵牠們,
幾十隻海鷗巡迴飛在我們的附近,
牠們都有一種飛行pattern,
就算有食物, 牠們也只向一方向飛,
繞圈才再飛回來,
幸好冇人仲頭獎。
米菲用手指夾著蝦條,
一至二秒牠們就把它咬去。
其實都有點怕牠們會咬我的手指,
不過又好好玩。
這海邊真的好舒服,
唯一缺點是少了一間咖啡店(或者在不顯眼的地方)
所以米菲在上車前只有買罐樂天咖啡飲。

去機場的途中, 被安排了到手信店,
但價錢一點都不便宜, 所以米菲也沒有在這店買什麼。

我們7:45PM起飛, 卻3小時前已到達機場了,
在機場辦好退稅後, 就到免稅店取之前買的貨品。
發現是好麻煩的, 而且好不環保。
就以米菲買一支cleansing foam為例,
兩層氣泡膠包著, 再多一個封口袋表示這物品以免稅,
職員還想再給你一個他們公司的膠袋把它裝起,
太浪費了。
所以如果只是便宜一點, 我是不會再買這種在機場才領取的免稅品。
晩飯她們食湯面, 米菲就選了食包,
在Dunkin Donuts買了一個sausage & egg bagel,
再加一個crispy almond donut,
好滿足呀!
事實上, 在韓國候機的大堂, 好像也沒什麼餐廳選擇。

若回顧今次參加團遊韓國的經驗,
感覺良好。
團友都好好, 大家都好友善, 亦沒有什麼大遲到的情況出現。
如果要挑骨頭, 當然都會有,
例如米菲覺得導遊其實唔係好落力, 安排也不算很好,
有時去到一D地方, 跟本都未開門營業。
不過去旅行最緊要開心, 所以也不會介懷這些小事,
而整個旅程只有一天的天氣特別差, 以算幸運了。
就讓這日記為米菲留下美好的回億。

有團友問我下次會去邊度, 泰國吧!

>>June 28, 2013 at 3:05:01 PM GMT+8

2013 年 6 月 17 日 星期一 【雨】

米菲遊首爾第四天下篇


差不多下午3時, 我們來到明洞,
下午也是在這裡全自由時間.
來到明洞第一個感覺, 就是覺得好像銅鑼灣,
其實之前去既韓屋村和N首爾塔,
都是明洞區的.

先到了樂天百貨樓上的免稅品店看看,
見到價錢俾香港平一點,
所以雖然在韓國,
卻在Shiseido的專櫃買了支美白cleansing foam,
有點不方面是要到機場店, 才可以領取貨品.
這樓層真是太多中國人了,
所以看了一會便閃人.

我們走到街上, 米菲看見doughnut又發癲,
走進Krispy Kreme doughnuts買了米奇朱克力doughnut,
真殘忍把米奇吃下肚裡
又在Etude House買了十塊臉膜,
今天特價是買十送十, 我們買了平分一半,
選了蘆薈和collegen.

再行了一會, 便走進地下街,
去了I love flat幫同事買了兩對鞋,
由於米菲的熱情, 老板俾左折扣
用80000won買左兩對鞋, 超抵,
以小店連鎖的方式經營,
這鞋店較平民化價錢,
穿著一兩季都夠啦。
我前面兩位小姐, 買了十多對,
米菲就好奇問佢地,
原來佢地係台灣人,
是買回去台灣賣,
可見這便宜的小品牌, 有一定吸引力。

下午茶去左Pizzeria食pizza,
好想西下, 順便飲杯咖啡,
由於是閒日下午時間,
我們是唯一顧客,
好休閒的一個下午茶

接著去到樂天超市,
這裡紫菜不算很便宜,
傍晚時段, 已經開始有特價魚生和壽司,
也有很多飽點好吸引,
突然一邊很多人排隊買炸雞食,
是一盒一盒買回家的。

之後去左Lotte Young Plaza行,
只是隨處走走,
其實米菲返工的背包用了好多年,
終於出發前報銷, 所以都順便看一下背包

晚飯約左韓國美少女食飯, 是她留學認識的,
是典型的韓國女生, 樣子不錯
她帶我們食較地道的韓國菜,
這店都是韓文, 好像叫青園
她點了seafood pancake, 石頭飯, 和泡菜肉湯
這店D配菜都很好吃,
個seafood pancake好新鮮好棉好好食,
石頭飯標準啦,
泡菜肉湯好好飲, 有少少似牛尾湯o個D味
韓妹堅持要請我們食, 所以我們請她再到咖啡店吃甜品.
她說我們之前去過的Beans bins不錯,
我們叫左三杯咖啡,
Share一份ice-cream waffle.
聽她說在韓國的生活怎樣,
一傾就兩個多小時.
原來我們之前在樂天超市,
見到D韓國人排隊買炸雞塊,
其實係好出名的,
韓妹話係好好食架,
特點係你買佢D炸雞,
就算番到屋企, 佢仍然保持住一樣咁crispy.
我們有在街上試過其他店的炸雞塊,
都覺得好好食,
俾佢講一講, 下次有機會到首爾,
會試試買來食.

晚上又下雨了,
花了點時間才能上到的士回酒店,
玩到好盡的一天

>>June 26, 2013 at 2:30:41 PM GMT+8

2013 年 6 月 17 日 星期一 【雨】

米菲遊首爾第四天上篇


今天會去5個地方,
南山公園(首爾塔)
南山韓屋村
仁寺洞
戰爭紀念館廣場
明洞

今天一早便下著雨, 有時頗大,
就是我們到南山公園的時候,
也下著雨
這裡風景很美, 我們忙著到處拍照,
下雨及霧氣, 令我們不能在南山山頂腑覧首爾,
這有點可惜,
N Seoul Tower有兩個意思,
N 是代表Namsan, 又是代表New,
因為這塔曾經番新, 讓它成為遊覽熱點,
天氣不好, 沒有付錢到觀景台,
米菲在手信店買了好美的磁石貼作為紀念,
也在Teddy Bear店買了一隻baby Teddy,
這裡毛公仔好抵買.
今天已經是旅程的第四天,
但除了團費及幫人買東西外,
自己其實唔係點洗錢,
所以買野都手鬆D
米菲和兩隻Teddy bear影相,
仲有同Teddy bear man影相,
佢就係PSY

下一站韓屋村, 我們只是在外面拍吓照,
真係到此一遊, 對這類韓屋亦不感興趣.
在咖啡店坐了一會, 接著去仁寺洞。

其實鐘路區有好多野睇, 好多古蹟及博物館都係呢度,
亦是韓國歷史及文代的代表勝地。
但行程關係, 我們只被安排到仁寺洞一帶。
仁寺洞路上, 會看見畫廊, 美術館, 工藝品店,
還有一些食品店, 而最創眼的是Ssamziegil.
這商場中間是空心的, 共有五層,
但因為走廊是斜的,
所以走一圈, 便不經不覺走到另一層.
這商場的設計, 令人感覺舒服,
部份牆壁和天花會有噴畫, 好有藝術氣息,
頂樓還有一個小花園,
走進其中一邊, 發現了有間餐飲,
氣氛很好, 還有一些咖啡店在頂層.
成個商場都有幾十間小店.
門口有間小吃店, 是賣屎餅的,
其實是燒餅, 裡面是豆沙,
但製作成屎的形狀,
米菲一向喜歡食豆沙燒餅,
所以覺得好食, 而且咁大過都係第一次食屎.

在地面還有一間叫Uglydoll的店,
好吸引我,
其實在香港都有, 不過此店display得好靚,
米菲和店員傾談, 互相介紹下,
佢先講韓名, 我當然聽唔明啦, 但佢英文名叫Kay,
Uglydoll 既公仔故名思義係個樣好ugly,
每隻都有名字和故事, 米菲買左隻叫Cold feet.
我地吹左一陣水, 我同Kay講,
有機會再來韓國, 我再來這裡找你.

行完商場後, 在仁寺洞路上的畫廊流連了好一陣子,
其中一些畫雖然很美, 但不會買下帶回家呢.
而發現部份會製作成磁石貼,
所以米菲買左一塊, 以作紀念。

午飯食了燒豬扒, 好單調。
接著去到戰爭紀念館.
這裡分內外兩部份, 時間關係,
我們只在外邊廣場參觀,
而裡面場館是要收費的。

廣場上佈滿了各式戰機, 坦克, 裝甲車和一些飛彈武器等,
部份戰機和運輸機, 還可走進裡面參觀,
場上還有紀念韓戰休戰的石像.
其中一塊石碑寫著
FREENDOM IS NOT FREE
但付出的代價好大
從另一塊石碑得知,
1950年北韓入侵南韓, 戰爭持續三年,
結果有4百萬人傷亡,
一千萬家庭失散,
消耗230億美元財產
也令我想起中國在戰爭中死去的人
所以真的不要打仗

>>June 26, 2013 at 2:23:57 PM GMT+8

2013 年 6 月 16 日 星期日 【綿綿細雨】

米菲遊首爾第三天


一早便到達青瓦台, 就是總統府對面的一個院子,
在這裡只是到此一遊。
這時, 早上下了點微雨。
還好, 一陣子就停了。
接著到了人蔘專賣廳,
米菲更是路過一樣。

午飯是人蔘雞湯配長壽麵,
就是雞裡有糯米的那種,
湯好飲, 雞和麵,都好食,
午飯食這個幾好,
晚飯的話可能唔夠食

午飯後就是Lotte World,
我們參加這個團,
其中一個原因就係佢會去兩個主題公園,
Everland和樂天世界,
樂天比較舊, 現在旅行團可能不去,
改為去國家公園或溫泉渡假村一天,
去這些地方都吸引,
不過對於首次來韓國旅遊的我們, 總想去樂天世界一次

樂天分為兩邊,
一邊是大型機動遊戲, 另一邊是冇大型機動遊戲 (講左等於冇講)
前者是露天的Magic island, 後者是室內的Lotte World Aventure,
我們從南門進入,
一邊拍照, 一邊走進機動遊戲的室外區域裡,
在這裡, 米菲和團友Bonnie看著她和其他團友玩,
因為我地真係唔敢玩,
Bungee drop 跳樓機, 仲要chok你幾次
Gyro drop 比跳樓機更高跌下來
Gyro swing 不停轉及搖到好高,
睇到都好驚, 因為我是畏高的。
米菲在這樂園第一樣參與的設施,
就是叫
Restroom, 好安全, 不怕高, 而且令人愉快

接著去Ghost house,
我幾enjoy睇4D鬼戲, 又係吹風個隻,
睇緊戲不驚, 反而通道和出入口,
好驚有野會走出來。

途中吃了米菲十分喜歡的燒餅,
以及十分喜歡的churros,
就是doughnut加上肉桂粉的味道,
外面好cripsy, 裡面卻是軟的,
諗起都想食,
有說是墨西哥人的doughnut
也有人說, 如果是西班牙口味的churros, 多數配上朱克力醬.

米菲俾錢玩打搶,
五發子彈中了兩個目標,
只得安慰獎,
兩條珍寶珠,
雖然說打中兩個目標,
但其實其中一搶米菲是描這個而打中那個,
好好笑
接著到處都要排隊,
我們選了坐熱氣球,
可環繞樂天世界一個圈,
望下去好靚,
更會注意到樂天世界其實並不大

她們玩海盜船時,
米菲買了一隻Lottey毛巾公仔,
一邊飲菓汁, 一邊看了Alice in Wonderland的表演,
再玩了些小遊戲, 便要離開樂天了,
跟團的話, 在樂天的時間真的不夠呢
因為還有很多遊戲還沒有玩

晚飯是Shabu Shabu,
除了配菜, 就是豬肉和菜, 好清淡.
回酒店後, 我們再到附近酒吧食店區,
又再買化妝品,
再到超市掃紫菜手信。

今晚大家訓晒後,
米菲靜靜地到樓下IGA Mart食宵夜,
整番個辛辣面再加包雜果仁,
又順便試試d袋裝咖啡, 選左Arabica Hazelnut 味,
買完店員會俾個冰杯你, 倒進去飲, 幾好飲呀......

>>June 26, 2013 at 2:18:10 PM GMT+8

2013 年 6 月 15 日 星期六 【晴】

米菲遊首爾第二天


今天主要活動是在Everland夢幻樂園玩,
米菲是很喜歡到主題公園玩的,
好讓自己投身在一個一片歡樂的世界,
很期待今天的行程。

今天是第一天吃酒店的自助早餐,
雖說自助, 卻也沒什麼可選擇,
米菲吃了一份最普通的沙津,
一份蒸蛋腸仔加多士,
一杯咖啡機的咖啡,
就是米菲的早餐,
而且來緊三天都是一樣的早餐。
反正免費, 且在酒店吃也省回不少時間。

從酒店出發約一小時的車程, 剛在樂園十點開門到達,
我們先乘吊車到山另一面,
話說這種吊車, 米菲試過在加拿大滑雪,
和朋友從吊車一同掉下去, 我們都沒有受傷,
說來都好幸運。
見少人排隊, 所以第一個遊戲是Safari World,
是坐觀光巴士看動物,
因為去過長隆, 所以看見白虎, 獅子, 班馬,
沒有太大驚喜,
反而巴士司機送上食物給大啡熊,
佢會站起來跟著巴士行走,
和我們只是一塊玻璃窗之隔,
雖然他們好兇殘,
但樣子真的好可愛.
還有不知從那處入口, 是可以搭乘水陸兩用車,
這俾巴士好玩, 而且行走動物園的路綫亦不同。

米菲都幾細膽, 唔敢玩T-Express,
不只轉圈, 這說是世界上最傾斜的過山車,
聽到都驚, 見到仲驚, 點玩呢.
所以她們玩時,
我去了騎駱駝, 坐著牠行了一個圈,
心想坐這駱駝在沙漠行走一定更加有趣.

接著睇左套4D電影, 有D情節成日會俾風吹,
再入了一個神秘屋, 可用laser gun打D物件和怪物,
打仲佢先會活動, 最後會計分數。
再入了一間鬼屋, 觀眾坐著椅上,
但因為四面牆都會動,
所以只要張椅移斜少許,
整間屋就好像在活動,
由於聽不明白之前的韓文介紹,
所以其實唔知自己做緊乜,
最後結束時, 張椅會有野插你pat pat一吓
大家都嚇一跳

係時候玩番outdoor活動,
就係激流旅程,
八個人坐著圓形大水泡,
關鍵係真係會濕身,
米菲都濕左身,
但相比起同團一位團友,
個浪沖著佢, 佢由頭濕到腳,
在便服情況下都幾狼狽,
出口已經為乘客預備了熱風機和風扇,
團友頭髮都滴出水來,
米菲都算幸運

是午飯時間了
吃了一個芝士焗肉醬意粉, 配上大可樂,
這意粉出奇地好食, 芝士又夠多,
沒想到樂園有這樣好食的東西.

約2點已經坐著等睇巡遊,
在烈日下等左20分鐘才開始,
好在米菲有帶傘,
如果唔係白色的miffy會變成啡色的miffy (叫Melanie)
個parade叫Carnival Fantasy Parade,
巡遊主要睇什麼,
係主要睇人,
會睇到外國人,
又睇到亞洲人,
咁樣講好好笑,
佢地當然係奇裝異服走出來啦,
結尾時會見到著住公仔衫的人,
係一隻和輕鬆小熊差不多的熊, 好可愛呀

接著米菲和馬達加斯加四個動物主角影相,
其實有個叫Madagascar的show可以看,
也有間Madagascar餐廳,
但時間關係, 我們只能選大家都喜歡的東西玩,
米菲的媽媽佷喜歡馬達加斯加這套電影,
佢一連三集都睇左好多次。

接著我們坐小火車遊four season garden,
再走進secret garden影相,
便坐吊車回山的另一面繼續影相,
買了些紀念品,
一隻不知名的公仔,
和一隻兔兔電話吊咀,
個兔兔吊咀同米菲一樣咁cute (呢句我自己都要頂…..頂唔順)
總括Everland係一個幾好玩的樂園, 比樂天好玩.

離開樂園後, 我們去泡菜學校學整泡菜,
學習整泡菜這活動其實不錯,
但最後還不是叫我們要不要訂他這裡最新鮮的泡菜,
當然不訂

接著是著韓服影相,
團友好似唔係好想著咁,
米菲冇理咁多, 就著上韓服影相,
好一件韓服穿在米菲身上一點都不合襯,
當然係米菲太有氣質了, 所以不合適, 哈哈
晚飯是任食韓燒, 這餐已經算不錯了。
晩飯後到梨泰園,
從歷史知道, 50年代韓戰結束後,
美軍在梨泰園附近作為基地設營,
所以這裡很多外國人出沒, 直到現在都是這樣。
這一帶也較多外國食肆及商店,
而且可以用上英文, 他們都聽得懂。
去了一間免稅化妝品店, 買了同事要買的晚間水份面膜,
打了八折, 計回港幣真係好抵.

梨泰園賣的東西, 如果抽起大商店幾個大牌子,
小店賣的就好像赤柱市集加上羅湖商業城,
不大吸引米菲,
反而有D食店幾吸引我.
行了不久後, 米菲見到Taco Bell,
即時走進去買左個beef taco食, 好好食呀,
米菲好喜歡食Taco Bell, 以前留學時,
喜歡叫一個taco, 再加一個soft taco,
咁樣軟硬都有得食
行了一會,
就再到導遊推介的店買了一個Rotiboy bun,
如果要形容, 可以說是一個像墨西哥飽的東西,
不過真係好食,
再加了一杯green tea latte,
一個飽飽的晚上

>>June 25, 2013 at 3:36:02 PM GMT+8

2013 年 6 月 14 日 星期五 【晴】

米菲遊首爾第一天


為了要玩盡D, 我們報的團是坐星期六的零晨12:30AM出發,
米菲星期五晚到了機場報到,
跟住食晚飯, 由於太晚,
就找McDonald叔叔就算。

也不知有沒有在飛機睡著，
約３個半小時就到了仁川機場，
是早上５點，韓國時是是６點，
我們換錢的兌換是１ＨＫＤ＝１３９.６ＷＯＮ
雖然知道城市中兌換會高一點，　
告訴過領隊，但領隊全不鼓勵我們到城市中兌換，
城市中兌換是１ＨＫＤ＝１４４或１４２ＷＯＮ
以我們兌換８０００ＨＫＤ為例，都少了１９２００ＷＯＮ（百幾元）

換完錢，距離上車的時間不多，
我們到了ＫＦＣ吃早餐，　
這裡ＫＦＣ的早餐，同午晚一樣，
都係賣炸雞，
我也是第一次晨早炸雞做早餐，
心情大好，所以都好好吃。

行程第一個活動，
是到溫泉水上樂園See La La,
招牌寫住spa & water park
這個安排不錯，因為米菲和團友一樣，
可能都冇點樣訓過教，
米菲赤裸裸地浸了好一會，
也是第一次裸睡，
休息完便穿上衣服，
吃過溫泉蛋，
便等待水上樂園開門，
帶上泳帽，游個暢快，
不知南韓是不是每個場游泳都要帶泳帽呢？
雖然有三層，但地方其實唔係好大，
衛生卻做得不錯，
浸一浸，游一游，体力立刻回覆過來，真好。

午飯是吃餃子火鍋，食店叫Miso city，冇任何特別。

午飯後被安排到Seoul Hilton hotel，
說是參觀casino，
反正時間很短，也不介意參觀一吓
我們沒有睹，行了一會便到hotel外面影相，
這酒店全名叫Millennium Seoul Hilton，
會不會真的是２０００年建成呢？
而個casino就叫Seven Luck casino。

約１點幾去到東大門，
只得３個幾小時行，
我們行了Doota, Migliore, hello APM, Goodmorningcity
這是女士主打場，米菲只是到處行行，有時在場外拍吓照，
我較為喜歡Doota的衣服，有D款真係幾靚，價錢並不便宜，
而好間唔中都見到韓國美女，但不多，
美女的臉是不是假的，我不知道，
但某商場的地庫，是賣假波鞋就明顯不過，
因為連正版冇的顏色都有，也許是韓國特別版呢！
我們最後留在Doota的Beansbins Coffee飲coffee
點了杯iced Americano coffee,
在這裡輕鬆休息一吓

晚飯又食火鍋，好像配上石頭飯，
好清淡的火鍋，
晚上回酒店check-in，
我們５天都會住在Richen County,
最近的地鐵站是新設洞站，
是在距離東大門兩個站，
由於這酒店開業只有一年多，所以好新，
唯一不好的，是房間的wifi好弱，
只有在大堂收得好。

安頓好後，當然再出去玩啦，
酒店行５分鐘左右，就可以走到一區有很多食店及酒吧，
亦有一些化妝品店，如Etude House和innisfree,
Etude house做緊買５送５塊臉膜，
快快先幫同事買好東西，
行完一輪，又係宵夜時間，
韓文看不明白，但這店可能叫The Born Family,
因為韓劇秘密花園的原故（米菲冇睇過），
我們吃燒豬皮，也吃了燒五花腩，
食燒豬皮的口感幾得意，但不會推介必定要食，
不過這店的醬汁好好味，
滿足的一天

>>June 24, 2013 at 3:25:37 PM GMT+8