2016 年 1 月 16 日 星期六 【雨】

米菲衝呀!


今年繼續跑渣打馬拉松十公里賽事,
跑第四組,
晨早5點起床, 打點一切,
在家出門時真係冇落雨
點知去到維園, 就好大雨,
由於維園寄存行理係在草地場上,
所以那裡一片泥濘,
所有跑手未起步, 就成腳泥了。

7:45am起跑, 那時又停左雨,
心想, 太好了, 天亦光亮起來,
點知, 跑到4公里,
開始落雨, 越落越大,
下半段全程淋雨跑,
比起上次, 不覺冷, 只是清涼感覺,
但下半身濕了,
當疲倦時, 特別感到腳重,
在堅持下,
米菲以56:30秒跑完全程,
比起上年55:50, 多了40秒,
如果要賴,
就係中途甩左兩次鞋帶.....哈哈哈

不過今年經驗好保貴,
原來落雨冇乜好怕,
只要肯堅持就可以了
下午就已經變成好天啦!!!

跑完照舊, 去太興食左個早餐,
餐蛋面加熱奶茶,
在這個情況下去食,
可以食到最美味的餐蛋面,
最好飲的熱奶茶,
人生真好玩呢!!!

回到家中, 沖完涼後,
竟然唔係休息,
係洗晒d衫, 跟住打掃屋企。
這是難忘愉快的一天!

>>January 17, 2016 at 4:01:17 PM GMT+8

2016 年 1 月 1 日 星期五 【晴】

2016年, 米菲, 跑吧!


冇為自己製造長假,
今個星期六返左工,
放工就去左跑步,
以運動來操練身體,
讓新一年健健康康,
一口氣跑左9公里,
用了53分鐘。
今日天氣好正,
跑得好舒服
心情也十分愉快。

>>January 2, 2016 at 4:37:11 PM GMT+8

2015 年 12 月 31 日 星期四 【陰】

米菲新一頁開始


新一年開始, 米菲一早起來食早餐,
開心迎接新的一天。
在家輕鬆看電影, 並且整理好房間。
因為時間上的問題,
我其待的燒烤告吹了。
唯有安排下次再燒啦!

新一年
好想送份禮物俾自己,
於是買了部PS4。
呢樣野我睇左好耐,
我的對上一部遊戲機係Nitendo Wii,
再上一部係PS1.
但兩部機都係好多年前買了, 講緊係8年前,
即是我係冇玩過PS2和PS3,
所以其實係好期待擁有一部PS4.
今日1月1日, Sony竟然推出一個PS4 1TB的超級優惠,
是call of Duty的同綑裝
再送uncharted collection 呢個game
延長保用變成共27個月
再送一年會籍
再extra送多一個手製
再減左100蚊,
我就開心地買了部PS4.
回家安裝後, 都未開始投入去玩,
已感到很滿足了。

冇安裝後即時投入遊戲,
係因為今晚好想睇叱吒頒獎禮,
只有網上直播,
大家有時間一定要睇番。
大贏家係吳業坤, 坤哥拿了三個獎。
仲有組合Supper Moment, 佢地都有三個獎。
個頒獎禮好精彩。
我喜歡的JW, 一個獎都冇, 有點可惜。

米菲好輕鬆地渡過了今個新年。

>>January 2, 2016 at 4:33:30 PM GMT+8

2015 年 12 月 30 日 星期三 【陰】

80分的米菲


如果要寫一年回顧, 今年都算不錯, 或者定量佢, 有80分啦!
滿意係因為升左職, 而且全年加左兩次人工。
工作上有新方向, 雖然辛苦左, 但已適應了。
咁點解扣左20分,
第一係今年投資未達標, 其次係房間太亂。
雖然我喜愛整齊, 但近年實在太喜歡買東西,
房間便變成太多雜物, 失去簡潔, 就會影響舒適。
這習慣短期改不了, 因為房間還有幾樣東西要換,
隨便說新一年減少買野, 並沒有意義。
例如我的電腦用了快十年, 將要報銷了,
無論係電腦自己頂唔住, 又或者我頂部電腦唔住,
所以換機是必然的。

好期待明天和melody燒烤,
一來我想見melody,
二來我真的很喜歡燒野食。
而且新一年第一天和melody渡過, 也很有意義。
所以今晚也沒有到處去,
放工行完街就回家。
買了兩個芒果布丁, 和媽媽一同分享甜品。

今個除夕, 平靜地在家渡過。

>>January 2, 2016 at 4:26:54 PM GMT+8

2015 年 12 月 12 日 星期六 【晴】

十二月大阪之旅第五天


今日好失敗, 沒有調好手機的鬧鐘,
一訓醒就十點, 還沒有梳洗,
就收到酒店電話, 告訴我check out 時間到了。
我雖然昨晚已收拾好行理, 但要我10分鐘後即閃人,
我又未能趕及, 咁佢地就charge我費用1000 yen,
可以延遲到11點交房。
不過係自己問題, 冇得好講。
其實, 10:00AM就要退房, 係唔係早左D呢!

寄存行理後, 今日早餐去番Doutor咖啡店,
咖啡還是咁好飲, 但今天我點了普通的熱狗,
只有生菜伴著, 味道不及作天的芝士熱狗。

今天繼續行動漫街,
真係好enjoy咁樣行,
唔一定要買野, 但咁樣參觀了解這個漫畫和玩具世界,
就已經好好玩。

下午返去難波買手信, 經過自由軒,
先前冇安排好會試他們的咖哩飯,
但既然時間咁好, 唔洗等位, 咁就試試。
我單點了最簡單的咖哩飯,
為什麼這店會係大阪名物？
這店原來很久歷史, 一直主打咖哩飯。
老板已由年青, 做到依家變成老太婆。
煮飯過程中, 已一開始就把米和咖哩汁伴好,
所以咖哩汁會均勻分佈在每粒飯上, 最後會加隻生雞蛋在上面,
味道算不錯, 但同快餐店咖哩飯,
其實差唔多, 試過就算。
坐我對面, 有個日本女人和我說話,
得知我是香港人,
就問我, 中國菜有沒有用生雞蛋放在咖哩飯這個菜式,
我只想走茶記的窩蛋牛肉飯,
我就介紹給她, 因為她也經常來港工作。
想起來, 自從禽流感爆發後,
已很少人食窩蛋牛肉飯了。

行到5點幾, 在酒店拿回行理,
就坐空港急行回機場了。
由於坐晚上10點機, 今日都可輕鬆行埋街,
成6點先出發到機場。
米菲在KYK吃了個鹿兒島吉列黑豚肉定食,
才上飛機, 返到香港落機已經半夜1點半。
原來是因為航道問題,
香港飛去大阪, 需時3.5小時左右,
大阪飛回香港, 有時需要4.5小時。
但這個情況, 不是必然會發生。
拿回行理回到家, 已經係深夜3時。
米菲呢個時候, 竟然好肚餓,
餓到唔想訓, 於是就走到附近茶記食件三文治,
訓落床已經是4點了。
第二朝, 我還準時返到工,
米菲, 你好勁呀!

今次大阪5天遊,
天氣良好, 不凍又少雨,
感覺也良好, 不悶也不算太累。
經驗上, 原來一個人旅行也可以很好玩,
不過, 米菲認為日本係咁, 其他地方不一定。
主要是因為日本除了風景, 購物都可以好愉快。
今次先安排用兩天時間睇風景周圍去,
然後留番最後兩天購物,
可以避免我這個動漫迷,
用太多時間留在動漫裡。
另外, 搭晚機都唔好去咁盡,
好似米菲晚上10點機, 就太夜了,
或者, 就第二天放假或下午先返工吧!

>>January 6, 2016 at 1:54:33 PM GMT+8

2015 年 12 月 11 日 星期五 【晴】

十二月大阪之旅第四天


尋晚真係太夜, 今朝訓到10點。
今日係米菲的動漫日, 訓夠先睇都唔遲,
佢地應該太早未開鋪,
不過就食唔到酒店的免費早餐。

真幸運, 酒店附近有間叫Doutor的連鎖咖啡店,
佢D美式咖啡好飲, 用有機的咖啡和糖,
配上店鋪新出品的芝士熱狗,
一個輕量美味的早餐。
好奇, 長大後, 我最享受就係食早餐。
特別係有時間慢慢食的時候,
簡單的早餐, 好食過自助大餐。

11點幾走進動漫街,
氣氛很好, 有新電玩遊戲發佈簽名會,
排晒隊, 顧客經過, 都可以抽獎。
米菲只抽到四獎, 係一個狗狗folder.
雖然只係幾條街,
看見很多志同道合, 感覺良好。
曉美件cosplay制服有得賣,
米菲唔係女人, 唔係真會買來著, 好靚!
好多野睇, 不經不覺睇到4點先食午飯。
去到上次見到的乜乜乜松乃家,
是買食券的, 按了個吉列炸生蠔定食,
抵食, 但略為燶左少少。

今日有ARS NOVA 蒼鋼的展覽,
展品唔算多, 但出過的有關figure都有展出。
買左佢本劇場版資料集, 日本買真係好平。
高雄個造型好靚。
在街上, 有個女生cosplay左貓服, 行埋來介紹佢既貓貓按摩店,
單張上就係佢本人, 佢強項係貓腳踩背, 笑死我。

今次我去埋好多上樓的店, 地面鋪我上次都行晒,
日文字看不明白, 米菲就是跟住人地走上去。
發現部份上樓店能找到好多好野, 而且價錢更加吸引。
米菲收鑊不少。
行到晚上9點, 好累, 今晚在動漫街裡吃拉麵。
點了個醬油豚肉拉麵, 再加碟餃子, 很滿足。
米菲的動漫日, 真係一個人先可以咁自由,
有邊個可以陪你行一天動漫呢!

>>January 6, 2016 at 1:47:21 PM GMT+8

2015 年 12 月 10 日 星期四 【晴】

十二月大阪之旅第三天


今日要轉酒店, 在酒店吃過免費早餐,
就check out, 打算先把行理寄存在今晚入住的酒店。
從Hotel Nissei行到Hotel Kikuei, 5至10分鐘路程,
Hotel Kikuei位置已經進入了動漫玩具街裡,
所以接著日子睇玩具, 也很方便。

今日去天神橋筋商店街,
日本橋坐堺筋線到南森町就到, 好方便。
它是日本地面最長的商店街, 有幾百間店。
分成七段, 叫作天一、天二、直至天七。
街道是行人專用, 兩旁的店舖,
有傳統有新潮, 但傳統的店較為主要。
有很多特式的食店, 經過時, 都好想試,
但米菲肚子只有一個, 那容得下這麼多食物。

大阪天滿宮是在天二,
所以米菲先到天滿官, 之後可以一口氣由天一行到天七,
睇睇真係要行幾耐。
天滿宮是個神社, 紀念一個讀書人,
他喜歡牛, 所以這裡也有很多牛的像。
來祈願的, 都是關於學業或工作上的考試能夠合格。
其實, 除了好出名的, 日本好多神社都係差不多樣,
既然來到, 睇過就算。天滿宮也不算很美麗的神社。

好！從天神橋筋一丁目出發！
先到司光這店取一張出發狀,
這張出發狀, 是讓你行到天七時,
可以用出發狀到天七的店 換取行完全程的証書。
一起步就食, 在賣有機食物的店鋪買了個五殼米飯團, 只想試試。

詳細唔講, 行左睇左好多, 來到天四了,
途中在一間傳統的昆布專門店, 買了昆布給媽媽煲湯用。
這裡要停下了, 因為有Mister Donut,
米菲點了草莓和肉桂donut, 加上一杯美式咖啡。
Donut好食, 咖啡好難飲。

天五遇上春駒, 是一間日本壽司老店,
都係排隊店, 好在過左午飯時間, 排左一陣就有坐位。
Menu是看牆上掛著的牌子, 點菜是直接和師傅講,
對於唔識日文的遊客, 就送上英文menu,
自己將食品寫在紙上, 直接交俾自己前面的師傅。
米菲看英文, 但嘗試寫日文在紙上,
點了拖羅、海膽、鰻魚壽司, 全部孖件上,
再點了拖羅手卷,
我d日文字冇錯呀, 成功點到以上食物。
好新鮮好好食, 有機會一定再食。
咁好的質素, 大眾化價錢, 十分。

在天五買了Kokyu chocolate, 中文釋作呼吸巧克力,
意思是好味到要停止呼吸來品嚐。
有五種味道, 都是關西限定的。
買了抹茶味和期間限定的草莓味, 好得。

到天六, 就可以參觀大阪今昔館,
周遊卷又可免費入場。
參觀今昔館的遊人, 都可免費換上一套日本傳統服裝,
裡面其中一層的景觀, 會設計成回到日本江戶時代的老街,
所以配上日本服影相, 是很美麗的。
雖然得兩三層可以參觀, 但值得一看。

到天七了, 天七是沒有牌子寫著天七,
所以米菲起初以為自己行過左。
好在這裡又有間老店, 叫千鳥屋,
是賣草餅、和果子之類的。
出名的是千鳥饅頭, 也是店中最平的, 只賣120 yen.
米菲已經好飽, 估且買個千鳥饅頭試試,
由於唔係熱食, 食落就似一個凍左的蓮蓉包,
不特別, 相信就是那些年的食物, 就是這麼簡單。
在天七一間家品店,
取得証書了, 証明米菲行完整條天神橋筋商店街。
唔計行天滿宮的時間, 米菲用了3小時15分鐘行完整條街。

下午2時了, 下一站到梅田。
先到阪神百貨的Afternoon tea, 這裡店員告訴我,
原來妹妹collect的年熊停產了, 2015及2016年已經冇再出了。
停產我都冇辦法了。
梅田, yea!
係時候到阪急三番街miffy店朝聖了。
又買左好多, 自己都覺得過份,
其中, 買了隻冬天版穿冷帽著毛衣的miffy, 是限量的,
其餘的都很實用性, 所以唔算浪費。(自已為自己的購物解釋, 呵呵呵)

既然有周遊pass, 就到Hep Five坐摩天輪,
Hep Five除了有喜歡的Beams店,
還有大約三層遊樂場, 有兩層都是影貼紙相的。
呢兩層一入去, 嚇一跳, 入面好多靚女。
可能因為星期五晚上, 可能大家亦打份好來影貼紙相吧!
這裡有那些進入房間的探險遊戲, 其中一間是叫貞子3D.
又好想睇係點, 又唔敢入。
到了Hep Five 的摩天輪了,
唔洗點樣排隊, 又登上了摩天輪,
原來這個摩天輪好慢, 慢到底層上上落落都好安全,
已經六時了, 在摩天輪看梅田的夜景很美。

提早晚飯時間, 因米菲需要找個地方休息。
回到阪急三番街, 上次經過冇機會試,
就係POMPOMPURIN Café
布甸狗café剛剛公布, 也會在香港開設分店。
米菲點了個布甸狗牛肉飯,
飯是布丁狗的臉, 漢堡牛肉是布甸狗的帽子,
旁邊是牛肉汁。
個賣相有100分, 真係好有趣,
味道方面, 像牛腩汁的味道, 不過不失。
對於男人來說, 份量就不夠。

下一站係Umeda Sky Building,
重點係Floating Garden Observatory.
呢個空中庭園展望台, 是建造在兩座大廈中間,
有173米咁高。
好容易記得, 因為米菲係173cm, 所以個庭園係100個米菲咁高。
坐電梯上到去, 再坐扶手電梯到空中庭園。
上面好大, 可以東南西北睇晒四面夜景。
今晚天氣很好, 可以望到好遠。
Time magazine 說在空中觀看景色的情況中,
沒有比這空中庭園更容易使人動容的。
這裡有個牌寫著每天的日落時間,
今天是16:48日落, 如果4時來, 可以日夜景色睇晒,
仲可以睇埋日落。
如果想慢慢欣賞景色, 可以在Café sky 40這裡買杯咖啡,
坐在這裡享受這美景。
Umeda Sky Building的地面平台,
有個聖誕嘉年華,
有十幾間店鋪, 中間有棵大聖誕樹。
這裡的店賣德國腸, 啤酒, 面包, 香氛, 蠟燭等等
遊戲只有旋轉木馬。
這裡是今年米菲到過最有聖誕氣氛的地方。

這裡回程可以經過Yodobashi Umeda,
是一座約十層高的電器大樓。
電器、玩具、電玩等等都有,
大到你唔信, 單單是電腦和音響, 都有排睇。
部份貨品會減價很多, 所以要慢慢行買平野。
米菲就很清晰而且疲累, 所以經過只看玩具。

十時先回到Hotel Kikuei, 中文亦作菊榮酒店,
房間比Nissei大, 其餘設備就是酒店基本野。
職員已把我寄存的行理放到房中, 太好了。
整頓後, 就到酒店附近的拉麵店宵夜,
回去再到酒店的自助洗衣店洗了部份衫和牛仔褲。
因為得一條牛仔褲, 唔洗著5日太不衛生了。
就係咁, 今晚好夜先訓。

>>January 3, 2016 at 1:20:08 PM GMT+8

2015 年 12 月 9 日 星期三 【微雨】

十二月大阪之旅第二天


在酒店吃過簡單而不錯的早餐, 就出發今天的風景遊,
原先係今日計劃了到梅田,
但天氣晴朗, 往後日子未必咁好天, 所以就先去睇風景。
買了兩天的大阪周遊卷, 3000yen,
兩天內, 搭車及指定的場館免費入場, 好多熱門景點都cover.
第一站係大阪歷史博物館, 日本橋坐堺筋線到堺筋本町, 轉中央線到谷町四丁目就到。

大阪歷史博物館, 有十層高, 從難波宮跡講起。
參觀的導引, 是先坐elevator到十樓參觀,
睇完就坐escalator落一層睇, 直至回到地面。
這博物館實在太多野睇, 可以用上半天的時間,
米菲都睇左兩三個小時。
內容太多, 不花時間記在日記裡, 這博物館推介要去。
睇完博物館, 旁邊就是NHK電視台, 順便參觀一下,
剛巧在拍攝電視節目,
透過玻璃, 可以睇到整個拍攝的情況,
電視台俾人咁樣參觀電視拍攝, 都幾有趣。

睇完這些, 就去斜對面的大阪城公園。
由於今年天氣暖化, 十二月也相對效為暖和。
所以, 在大阪城還見到紅葉。
在一片紅葉黃葉中, 大阪城真的很美。
米菲在這裡慢步, 很有詩意,
寫首詩吧,
暖暖陽光照著我
冷冷微風擁抱我
行來行去行唔晒
睇來睇去睇不完
係咪一首好詩呢! 呵呵呵!

繼續好好運用這個免費pass,
走上大阪城公園的天守閣,
可以一眼望晒大阪附近的風景,
從東南西北四面,
可見到大阪城博物館、NHK電視台、大阪府警察本部、梅田sky building、Hep Five、通天閣等等。
天守閣上都幾多人, 米菲要行了兩圈, 才能四面看過清楚。

下一站, 去通天閣。
通天閣由惠美須站去最近, 從日本橋站一個站就到惠美須站。
先會經過通天閣本通商店街,
米菲就到當中的更科食午飯。
更科是間老店, 手打麵已經傳至第四代師傅,
米菲叫了個天婦羅配上手打sober冷面,
手打的sober較為堅韌, 但份量太少了,
一陣上完通天閣再食小吃。

來到通天閣, 一定會見到Billiken像。
100多年前一個美國人話夢見一個像叫Billiken,
後來流傳日本, 而且好受歡迎。
那時這裡新世界遊樂場就造了Billiken像來作代表, 作為守護新世界。
打仗時個像唔見左, 於是沒落了。
戰後, 有設計師重申製新一代Billiken像,
並且守護新世界至今, 應該是祈福許願之類。
要登上通天閣展望台,
需要先排隊搭細小的電梯上中層,
只有兩部電梯, 人較多時需要排隊等候,
米菲等了15分鐘左右, 就到達了中層。
中層地方係商店買賣手信食品等等,
這裡好多特式零食手信, 部份是通天閣限定。

除了手信店和小食店, 會見到好多動漫筋肉人的展品。
筋肉人是米菲小時候非常喜歡的動漫,
那時全套日本漫畫買齊, 好似有36本,
是米菲慳著零用錢買返來的,
留學回港後, 家中成套漫畫唔見左,
到底去左邊, 依家都未知下落, 米菲很傷心。

講番筋肉人, 點解會在通天閣出現呢？
咁就要等米菲專家話你聽了。
筋肉人故事裡, 主角筋肉人是來自外來星球,
他本身是王子。
故事中, 主要講他參加了多場格鬥比賽,
對手有人, 亦有怪物,
後來再出現幾個唔同樣的筋肉人,
和主角爭奪肉星王位。
而在格鬥比賽故事中, 好多時用上通天閣作為場景,
所以通天閣也相應展覽筋肉人的展品。
在中層, 要再排隊乘搭電梯上展望台最高層。
登上最高層, 內裡全都是不同Billiken像造型,
米菲對Billiken不感興趣,
因為Billiken始終是個受人許願的神,
作為基督徒的我, 參觀完就算。
向我展望, 可以見到通天閣一帶的風景。
通天閣裡, 還有古力果Pocky餅乾條的發展歷史介紹,
不知什麼原因, 將通天閣歷史和Pocky歷史作了個對應介紹。
在這裡食左杯綠茶雪糕, 好大杯呀, 超正。

新世界一帶, 都是食串物的地方。
米菲到了較出名的一間串物店, 朝日。
因為還未到食晚飯時間, 不用等位。
朝日入面原來好大, 我諗超過100個坐位。
串物主要得兩個造法, 油炸或木炭火燒。
米菲點了炸牛肉串, 和炸蝦串。
另外, 再點了兩樣用炭火燒的,
就是牛舌和牛腸, 燒串物都是打孖上的,
所以米菲就吃了6條串物。
炭燒牛舌, 在上面加點檸檬汁, 好好味呀!
燒牛腸真係第一次食, 不太喜歡, 太肥膩。
牛肉串是串物店的必點食物, 但食過又唔覺為何要必點。
炸蝦和炸牛肉串都是配上同一種醬料,
醬油是放在一個金屬盒子裡, 讓客人點來食的,
盒子是共用的, 所以店中限定客人每串只能點一次,
否則食過再點多一次醬油, 就不衛生了。
另外, 全部點菜都是炸和燒,
所以串物店會提供免費椰菜, 讓客人食,
都切好一片片放在金屬盒子裡, 米菲把自己盒子裡的, 全吃光了。

離開朝日, 還下著微雨, 今個下午是這次旅程唯一一次下雨,
算是幸運了。
在新世界, 會見到聲稱是全世界最大的室內溫泉。
望落去成個商場咁大, 是24小時營業的,
米菲花不起時間, 住的酒店又不在附近,
所以今次沒有機會見識這個最大。

下一站係阿陪野,
從通天閣, 直行, 轉彎, 再直行, 就可以到達阿倍野, 清楚吧!
哈哈, 約走15分鐘就到。
知道Hoop有妹妹喜歡的Afternoon tea,
所以先去, 希望買到年熊,
點知呢間Afternoon tea, 只做食店,
沒有什麼家品賣。
好在Hoop有Beams, 可以順便睇睇衫。
又有收鑊, 買左件shirt, 做緊特價呢。
行完Hoop, 就回程去Harukas 300近鐵百貨。
Harukas 300的天空庭園展望台, 並不包括在大阪周遊卷裡,
需要另外購票, 所以今次不去了。

在近鐵百貨, 只要出示passport,
可以在詢問處換取折扣card.
經過melody的介紹,
米菲就到Shiseido買左兩支facial cleansing foam,
日元平, 加上折扣, 再免稅, 就好抵了,
在日本買Shiseido較有保証, 這裡不再多講了。
Shiseido的Sales好有心咁介紹我去拿取折扣Card,
又好詳細教我點樣即時退稅,
而且還送了我White Lucent這條line的全部試用裝,
服務真的很貼心, 很欣賞她的服務態度。

退完稅後, 就到超市買宵夜。
嘩, 近鐵的超市好壯觀, 好多好多野賣,
人雖然多, 但地方大, 所以感覺良好。
食左兩次試食, 個店員係俾成個面包我試食,
哈哈哈, 笑死我, 多謝晒! 好可惜我冇睇中面包。
米菲買了兩件炸物, 蟹肉炸物和黑毛和牛炸物,
另外, 再買了兩件新鮮豆沙餅, 黃荳容的我即時吞了,
紅豆荳豆沙包, 就和炸物一起留作宵夜。
在Club Harie買了一個Cherry想試的年輪蛋糕,
Club Harie只買年輪, 真係咁堅好食,
回港後我們一同食了, 也不是有好大驚喜, 不過不失, 試過就算。

搭鐵路回到難波千日前,
參觀了AKB48 Café & Shops,
小嶋陽菜真係好可愛。
到Lawson便利店買可樂, 收隻印花竟然係換領Miffy禮品,
好吸引呀, 但我不可能5天收集到20個印花。

加上浴鹽浸浴, 再享受我的宵夜, 人生真好玩。

>>January 3, 2016 at 1:18:41 PM GMT+8

2015 年 12 月 8 日 星期二 【晴】

12月大阪之旅第一天


今年第二次大阪自由行了。
上次是九月去, 所以還有印象, 而且經過上次, 真係認識左大阪好多。
所以今次在準備上, 就經鬆好多。
不過今次錯過了一千蚊來回機票, 而是二千蚊來回,
但米菲覺得價錢仍係好抵, 所以訂了。
全程5日4夜, 午機去, 晚機返, 所以除了頭一天冇左,
其餘4天玩足呢!

出發前都有D想法, 米菲總覺得冬天去旅行好唔方便, 因為要攞大褸。
而且仲去俾香港還凍的地方。
在天氣預測方面, 是9至17度這種, 所以總要帶上大褸,
加上預測我旅行的期間, 大部份是陰天和下雨,
這種天氣, 在出發前確實影響我心情。
但結果整個旅程, 大部份時間都是好天, 大部份時間是15至20度的情況,
有時在冷風吹的情況下, 溫度會低一點, 但因為有太陽, 仍覺很溫暖。
整個旅程, 有很多意外收鑊。

坐機鐵到達機場, 今次唔會中計在T2食早餐,
原來, 搭機鐵在九龍站check in, 直情唔洗去T2,
時間到就可在T1入閘。
咁點解上次個地勤唔話我聽, 當然, 佢冇責任提我。
在翠華買了份大早餐, 滑蛋、奶油豬、沙爹牛肉面，
再配上熱奶茶, 好味, 人生真好玩呀!
記得, 機場餐的沙爹牛肉面, 一定要話加多D湯,
如果唔係會唔夠熱架。

在閘口前的小食亭買了支水和朱古力就上機,
唔係唔捨得食飛機餐, 而係想留番個肚到日本食晚飯好過啦!
而且飛機迫你指定時間食呀!
坐廉航, 好多時要接駁巴士才能上到飛機,
點知落雨, 空姐在閘口每人派上一件便利兩衣,
感覺上有點浪費, 但這服務很貼心。
我冇用到雨衣, 由落巴士到上機只有一梯之距, 心想唔會濕得去邊。
點知我前面個內地女子, 在機倉的通道中, 手挽袋的手帶扣住左椅子,
佢拼命拉, 越拉越實, 就係咁, 成條通道俾佢一個人塞死,
我已在機倉裡還好, 後面的人在冒著雨在梯上, 真係多得佢唔少,
我叫她唔好再拉, 要反方向拿出來, 我把她的袋接過來, 幫佢反轉整出來,
點知, 原來佢拉到食死晒, 好難搞, 空姐埋來, 再攪了一輪, 終於拎番出來,
唉, 後邊D人淋雨, 都唔知乜事。

12:05PM準時起飛,
架機坐滿人, 就偏偏我前面O個行冇人坐, 我自己調上去, 坐窗口,
米菲等如自動升級, 仲可以鬆鬆動動坐三個位。
因為廉航冇戲睇, 米菲就之前錄起左商台早霸王節目時段來聽,
即係聽森美同小儀, 個節目兩小時, 可以合上眼聽, 感覺幾好。
不過, 呢集節目其中一主題, 竟然係講撞機,
森美問, 到底係一起飛即刻出事, 還是差不多降落時出事, 那樣比較好。
討論呢樣野本身好邪門, 仲要在機上, 不過我不怕, 照聽, 要死避不開呢!

差不多到達大阪時, 米菲看見雲的幾種形態, 很美,
發光的、霧狀的、棉花糖狀的、冰川狀的, 直至消散看到陸地為止,
看著雲的變化, 真的很有趣。
不經不覺, 到達關西空港了。
一落機就在輸送帶看見自己的行理, 今次冇查行理, 成個過程好順利。
感謝神, 平安到達了大阪。

今次買了rap:t β, 劃位那種, 大型行理只可放在同一卡車的前或後,
由於中途有停站, 即係有機會俾人偷走件行理, 不過坐位舒適。
兩種車比較, 我還是喜歡空港急行列車。
6PM前已到達難波, 上次的酒店加了租, 咁快……
今次找了間更平更近車站的酒店, 在千日前裡, 叫Business Hotel Nissei,
是間商務酒店, 房很細而且舊, 但要用到的東西都有,
這間酒店在平價中較為搶手, 所以, 我只能訂到兩個晚上,
最後兩晚, 要住另一間酒店。
這間酒店從難波站走過來, 只需5分鐘路程, 很方便。
酒店斜對面, 就係AKB48 Café and shop 和NMB48 shop.

今晚打算在難波食晚飯, 在去食晚飯途中, 經過花月這劇院,
今晩應該有talk show, 好熱鬧。
從千日前通道直走, 就會去到若猍家, 是間魚生飯專門店,
經常睇到介紹, 所以O既然酒店到這裡咁近, 就來試試。
這裡, 就像香港車仔面一樣, 先選飯的多少,
再選自己喜歡的魚生,
米菲選了toro, uni, salmon, amaebi (甜蝦) 共四種,
味道方面, 新鮮是其賣點, 而且可以選自己喜歡的材料幾好玩,
魚生份量多, 但飯我沒有特別加盛, 所以食完覺得唔夠飽。
不過, 也正是米菲的想法, 唔夠飽最好,
就可以再去食燒章魚丸, 再食上次喜歡的日本一章魚丸,
好好味, 熱辣辣的,
在日本一的附近, 有個公共休息地方, 正好米菲可以坐著慢慢食。
隔離有個叫松竹芸能角座広場,
可能係一個劇院開設的食店, 這方面不太清楚,
但望進去, 係一間好有氣氛的食店, 店員每次好像在高呼一種食物,
人客想點就提起手, 如此成個場好有氣氛, 也好像女仕較多。

食完就在難波散步一吓,
難波食店一帶, 一定會見到那條河和橋。
條河叫道頓堀川, 而橋就最少有四條可能會經過,
分別叫道頓堀橋、戒橋、太左衛門橋、相合橋。
米菲此刻站在太左衛門橋上, 欣賞這個很美的夜景,
橋的兩旁, 最突出的有一蘭拉麵和激安之殿堂。
一蘭又排晒隊, 但望過去, 好似中國人較多。
記得多年前, 第一次到大阪, 就食三大排隊店之一,
大阪一風堂, 那時排20分鐘左右,
而且真係好好食。
一蘭本身未食過, 所以唔知係咪咁直得排咁長龍,
估計最少都要半小時以上。

又行到心齋橋, 哈哈, 每次來大阪都經過至少一次,
食甜品時間, 買了塊waffle, 選了原味, 好香,
希望有機會再試佢另外三種味, almond, chocolate, maple.
Sanrio的聖誕版kitty, melody, 布甸狗好靚,
只用上紅白兩色, 效果悅目。
接著會到大丸的afternoon tea幫妹妹買年熊,
年熊係我改O既,
Afternoon tea家品店, 每年都會出一隻掛上年份牌子的熊, 例如2012, 2013咁樣,
所以就去幫妹妹買2016年, 估計佢應該出左新一年了。
點知去到大丸, 成間afternoon tea唔見左, 執左了。
改天再去第二間afternoon team買。
經過Bottega Veneta的店, 應該係賣手袋掛,
裡面有隻好大好大的bearbrick, 唔係1000%, 係10000%都有,
唔知幾時佢地cross over左。
日本真係好熱鬧, 便利店貼上Hatsune Miku Expo 2016 – Japan tour,
叫作初音未來的expo, 其實係咪等如初音演唱會呢？
希望將來有機會去一次初音的演唱會。
(初音未來係一位虛擬歌手, 是用3D投射出來的, 比很多真人歌手還出名。)
由於是電腦的3D技術, 衣服設計會更加有創作的可能性, 例如可配上天使的翼。

回到酒店, 浸浴, 好好鬆弛一下,
今晚宵夜係聖誕版可樂配上卡樂B薯片,
呢款中間有個W字樣的限定卡樂B, 好好食, 但將來又係買唔番來食呢, 可惜。

>>January 3, 2016 at 1:16:28 PM GMT+8

2015 年 10 月 20 日 星期二 【晴】

從前有個山, 山O既前面仲有另一個山


今天同Cherry行山, 9點半已到達粉嶺火車站,
放假晨咁早起身, 真係不容易。
行的山徑, 叫大刀屻徑, 我諗係在林村郊野公園範圍肉。
由粉嶺出發, 會經蝴蝶山行山徑, 中途有個觀景台, 北大刀屻, 最後到達大刀屻。

今天天氣好好好, 熱同曬係一定,
什麼是最好的時間來行山呢.......
原途風景除了花草樹木, 遠處可望到上水及羅湖,
人亦不多, 是不錯的路徑,
中途如果行到想死, 原途是有路徑行去和合石, 會死得好方便。
亦有路徑行返去大埔林村,
但米菲冇死又冇行去林村, 在Cherry帶領下,
繼續向著看不見的目的地, 及可能行錯的情況下行下去。

條路有兩大特式, 係大部份都無樹蔭遮擋,
配合中午時分,地面都熱騰騰, 簡直係鐵板燒,
而另一特式係, 冇乜平地, 不停上山落山,
就算我們行到食午飯, 都是在鈄路上站著食,
米菲吃了一個飽一個蛋糕, 奇華D蛋糕好難食呀......
好在Cherry 叫我買多支水, 因為水分留失很多,
又過了一個山, 又落了一個山,
又再上一個山, 那裡風景很美, 可以望到遠處的加道理農場,
又再上一個山, 那時已過了三個幾小時,
米菲說, 終於到了, 比原定四小時, 仲行得快左,
不過, 米菲已很疲累,
點知, Cherry竟然話, 再上多一個山, 就會到了,
吓,
乜話,
再上一個山, 咁即是仲要再落一個山啦!
那天之後, 米菲頭髮少了, 體重輕了......

全程行了約4小時20分鐘, 冇乜停下休息,
到終點後, 我們搭車去了太和,
我叫了份雞脾薯條, 凍檸檬荼,
再和Cherry 兩份食多個台式花生醬多士,
我再飲多一杯凍檸檬荼, 真係要保番好多水份,
飲開少甜, 也不理糖分有多少了。

今次行山又加強了我的能耐,
上一次行長途山, 已是好多年前的事了, 那次行了6小時, 地點係西貢大浪西灣,
近年行山, 一般都是行2小時左右, 享受多於挑戰。
如果咁樣分,
米菲的行山, 大O既可分為挑戰式行山, 和享受式行山,
而上太平山頂係享受式行山的典範, 也是最容易的,
因為隨了行山, 還可以食, 玩, 買,
期待下一次行山。

>>November 26, 2015 at 7:30:34 AM GMT+8