2011 年 9 月 30 日 星期五 【雷雨】

米菲在台北的第四天



今天食麥記做早餐, 台灣麥記個餐單又不同, 有bagel食。
接著去黑橋牌, 我們買了很多肉乾及1包辣肉腸,
其實除了買俾人, 我自己都食好多, 黑橋牌真係好好食呀。
跟住去老天祿, 我們買了鹵水鴨舌及鹵水海帶, mo媽很喜歡食海帶。
可能因為老天祿出名, 唔憂做, 店員服務態度唔好。

到西門的誠品, 行左好幾間商店, 也試了唔少衫, 都不合適,
像Stay Real這些店, 只賣年輕休閒服, 也太多色彩, 返工著唔到。
最後竟然在Best friend這個台灣品牌, 買到了合適的襯衫,
一望下去, 以為Best friend 也只有年輕的服飾, 慢慢細看, 都有好靚o既恤衫,
買左三件, 都係930港元, 合理價錢呀。
在APIRATESTORE買了個背包, 好靚呀, 這店賣台灣本土及日韓的, 價廉物美。
沒有在誠品書店買任何書, 隨便睇下就走, 只因上次在香港書展買的書還正在看呢。

又下雨了, 真不方便。白羊食了湯冬粉, 我就食了魯肉飯, 我們就去下一站, 就是佳德糕餅店。
我是很喜歡食肉乾及鳳梨酥的, 所以白羊見我買咁多黑橋牌肉乾,
又買咁多鳳梨酥, 佢都覺得好誇張。
自從食個同事買的佳德鳳梨酥後, 我就決定要去買。
我買了三盒原味鳳梨酥, 一盒水果鳳梨酥。
水果可以自選, 我每款都買d, 蔓越莓鳳梨酥是最好食一種。
誠意推介原味及蔓越莓鳳梨酥, 好好食呀。
不過記得買舊包裝那種, 就是一小包只裝一件那種。

因為我們第一次到台北, 所以都去台北101大樓打個轉
事實上, 沒有興趣去行和香港一樣形式的商場, 本來卻想上去最高層看風景,
但落雨個天色唔靚, 又冇乜時間, 真係要留番下次勒。

返到酒店執拾完, 就坐國光巴士到機場了。我地o既晚飯係在機場食burger king.
班機delay一小時, 我地行免稅店。
白羊買左一盒mask, 這個品牌, 香港暫時未有得賣, 所以就一試。

今次台北之旅, 玩得好開心。
和她一起旅行, 我更了解自己, 也更了解她。
米菲愛白羊呢！
有兩天半晴天, 一天半下雨, 也好在冇打風。不過落雨真係好唔方便。
在台北要找小店, 都唔容易, 有時要走入小巷, 又行番出來,
又走番入去先搵到, 小d耐性都唔得。不過有這次經驗, 下次會知掟。

還有很多地方想去, 很多食物想試, 例如
Q Square的台隆手創館,
K Mall的高達旗艦店及大創百貨,
米朗琪咖啡館的冰滴咖啡, 士多啤梨窩夫, 草莓巧克力鬆餅
劍持屋的饅魚飯
Somebody Gallery Café飲咖啡
So Free 的柴燒pizza
大雕燒的陽具熱狗
Smith & Hsu的英式鬆餅
查理布朗烘焙屋的雞蛋布丁
金泰食品行的魚生飯, 海鮮蓋飯
糖村的芝士鳳梨酥
Bravo Burger 的花生醬牛肉漢堡
Dazzling Café的蜜糖吐司
作田串燒由日本伯伯燒的串燒
GOOD DAY的pizza
金仙蝦捲店的炸物
樂麵屋的日本濃湯拉麵
老張牛肉麵的招牌辣味牛肉麵
加州燒烤堡的即做漢堡
Zakka Club的彩繪
好丘的超好食bagel

還有很多很多, 佢地已成為我下一次去台北的推動力了!

這麼用心記下我的旅程, 是想留下這些記憶,
除了相片, 文字是最好的了,
這些記憶讓我多欣賞這個世界,
多欣賞神創造的美好,
也提醒我要好好珍惜這一切!

>>October 15, 2011 at 4:38:10 AM GMT+8

2011 年 9 月 29 日 星期四 【雨】

米菲在台北的第三天



今天一早坐捷運到復興站,
白羊買左"痴"飯伯伯的好食"痴"飯做早餐,
我就食焙根蛋三文治做早餐。
跟據指引, 在sogo對面找到1062巴士, 約一小時到達九份。

下車和一對日本情侶傾起閒計來, 我就問佢地是否去東京不安全, 大板就可以去。
佢同意這種說法, 叫我唔好去東京, 所以若有平機票, 大家都要想清楚。

好快就去到魚丸伯仔食野, 我幾enjoy試呢d小吃, 原途我都係一邊睇野, 一邊係咁食,
比起夜市, 呢度d小吃其實好一般。
白羊和我最後去到一間店, 坐下來休息, 我叫了杯籃山咖啡, 白羊就繼續食生果,
這店是在山上, 望著山下的風景, 只見霧越來越大,
直至霧就在我們臉前, 再看不到什麼。
下山時就買一點手信, 白羊買左史迪仔喜歡食o既乳酪提子巧克力,
只有史迪仔喜歡食, 我地兩個都不明白為何史迪仔咁鍾意食這種巧克力。
下雨前順利上車回程。今天下午, 開始下雨。
九份這個地方, 來旅遊逛逛都幾好。這裡有種獨有的氣氛, 令人舒適。
不過人多時, 會幾亂, 讓我直言, 可能又係內地遊客的行為。
同埋這個地方, 衛生相比起台灣其他地方為差, 要改善, 但比香港都清潔, 香港真失禮。

我們先回酒店整頓。下一站到東區, 坐捷運到敦化站, 嘗試找想去的店。
去了好樣捧捧糖果店, Pizza Cut Five X Shop, Wistore, Galoop, 這也, 和一些沒有留意名字的店。

在Galoop買了一件喜歡的tee, 其餘d野都幾貴, tee就合理價錢。

Pizza Cut Five是五月天開的店, 這刻只有一個男店員,
他真係好lady, 我試衫時, 佢搭我的肩時, 我有d麻痺,
白羊就o係度笑, 不過這店員服務態度好好, 他更隨意俾白羊著d衫來影相,
其實好多店都唔俾咁做呢, 不過我們攪攪震冇幫親

這也, 雜誌話這也是周董開的店, 但其實是他的監製或編曲朋友開的店,
d衫其實幾靚但貴, 也其實不合我, 剛巧有減價貨, 我看中一件長袖shirt, 真係好靚,
不過我的肚腩出賣了我, 竟然冇我的碼, 乜我肥左......好驚......(白羊, 一定會話, 肥左好耐啦, 死肥仔！)

Wistore, 是店中有店, 主要代理幾個牌子, d產品及衣服真係好靚,
佢地強調只賣牌子中最靚的產品, 所以價錢一d都唔平。
我買左件tee送俾朋友, 我和白羊都買了可可巧克力, 白羊送俾人, 我就自己食。
有人話這牌子的巧克力有人買過, 就成箱咁買番香港, 一試之下, 真係好好食,
好香可可, 又唔會太甜, 食到停不到口, 下次去, 一定要再買。

叫得好樣捧捧糖果店, d糖果真係好靚, 因為晚了, 只有一個店員在打掃,
她讓我們在裡面影相, 她打掃完, 就過來介紹產品, 沒有覺得我們阻住佢收工,
真係好好的服務態度, 我們買了些糖給史迪仔, 我買了條捧捧糖給白羊,
自己就買了一小盒巧克力, 我都係較為喜歡巧克力。

白羊也在東區買了一對高跟鞋, 好靚, 佢話價錢都好抵。
在東區, 我們真係行左好耐, d店好難搵呢。

我們今晚去洛神賦麻辣火鍋, 因為訂位要十點才有位,
雖然肚餓, 但正好讓我們在東區多d時間行街。
其實白羊冇我咁鍾意行街, 所以其實心裡好多謝她陪我走咁多路。
所以一到晚上, 我都選擇計程車, 不想她太辛苦了。

這間麻辣火鍋是任點任食, 是雜誌推介, 我們就來試試。
我們都喜歡牛肉, 所以真好。這裡招牌牛, 頂級肥牛, 霜降牛肉, 都是任點,
前後我們共點了五份牛肉, 又點了鮮蝦兩份, 又點了很多其他的東西,
還有好靚o既雪糕任食, 汽水任飲, 真係抵。
我們食晒大部份d野, 冇浪費, 又係我包底食, 我個肚好似氣球咁大,
都係白羊衰, 點咁多......
每位160港幣, 真係超抵。

回到酒店, 今天的戰利品又係打成平手。
今晚白羊真的很疲累, 我就為她按摩。去得按摩多, 我都識幾招架。
其實只要有心去按, 別人一定感受到,
我就好用心去按, 讓她今晚訓得舒服d呢。

>>October 14, 2011 at 3:20:24 PM GMT+8

2011 年 9 月 28 日 星期三 【晴】

米菲在台北的第二天



坐捷運到中山站典藏咖啡館吃早餐, 就是在MOCA藝術館的cafe
叫了兩份set早餐, 不好吃, 令人失望,
這是今次台灣旅行唯一覺得不好吃的店,
連用料都不新鮮, 杯咖啡就還可接受。
不過今天的天氣及心情都很好, 所以唔緊要啦。

食完野, 在藝術館參觀展覽, 都是新潮的服飾展,
並不是很吸引我去看, 反正看一看無仿, 接著就係去shopping.
但係行完藝術館, 發覺白羊有點疲累,
呢隻係乜羊來架???咁快就疲累, 我還在熱身呢！
咁就先去我最想去的餅店Piece of Cake, 讓她休息,
我們點了兩份日式卷蛋套餐,
一份選黃金奶茶 + 巧克力卷蛋
另一份是菊花茶 + 水果卷蛋
好好食呀, 軟綿綿又好滑, 真係好似我d皮膚咁滑
(對唔住, 講多左, 係好似白羊d皮膚先真),
不愧被譽為台北最好的卷蛋,
他們是12:00pm開門, 我們是今天頭兩位客人,
可能沒有人像我們午市時間食卷蛋, 只有我們兩人,
所以我可以和白羊靜靜地享受在這裡食卷蛋, 真好.......
離開時, 剛好就有人來了。
如果可以在台灣停留耐一點, 我會再到這裡, 享受地再hea過。
買了三包這裡的米香做手信, 黑苦巧克力, 草莓白巧克力, 和抹茶巧克力。
回港後, 試過黑苦巧克力米香, 好食呀, 白羊都話草莓味都好食。

接著去找一些小店
經過米朗琪咖啡館, 真的排晒隊, 好在飽飽, 無緣光顧。
來到Motherhouse, 這是日本以外, 第一間海外店,
很欣賞山口繪理子提倡公平貿易這種精神,
很喜歡這間店, 好多野睇。
買了一隻用手造的布公仔送給mo媽做手信, 像是小狗,
Mo媽很喜歡, 現在佢拿來壓著她的彩票,
話睇下隻小狗會唔會帶來好運, 真係好笑。
有興趣可到 www.mother-house.tw

隔離有間加藤真治專賣店, 他是日本好紅的插畫師,
今次冇時間去佢原來o個間商品店,
這裡都可以止渴, 不過商品少很多, 本店要去到芝山站先有。

接著去到0416x1024買左一件tee, 好攪鬼, 我還喜歡一件有帽的棉衣, 是斷碼, 真可惜.
這店是兩個插畫家的生日日期而命名, tee的插畫內容都是很正面,
就是所謂的正能量概念, 我喜歡他們的插畫。

再行多陣, 就經過乾杯的中山店, 就順便book埋位今晚來食。
接著來到Booday 及台灣好，店, 真係純粹睇, d野好貴, Booday café的氣氛其實麻麻。
本來下一站是去劍持屋食鰻魚飯, 但下午茶時段這店休息, 真可惜。
在附近找了一間叫灌湯包的店, 食灌湯包及冬粉, 味道不錯。

我們坐計程車到下一站中正記念堂。
是為了看日本手塚治虫的世界特展, 有三個月在這裡展覽,
還有幾天就結束, 我們恰巧可以來看, 太好了。

可以一次過睇到怪醫秦博士, 森林大帝, 三眼神童, 火之鳥, 藍寶石王子,
小飛俠等等的原稿及玩具, 又有好多場景睇,
還有真人扮演怪醫秦博士和貝貝, 貝貝真係超得意。
再看介紹下去, 原來漫畫故事背後係咁有意義, 講及環保、金錢、人性, 乜都有,
依家d作家想到呢d野唔出奇, 在50年代已經這樣想, 好有遠見。
呢類展覽館, 最尾多數係賣紀念品的shop, 今次都不例外。
白羊喜歡的tee, 賣晒, 真可惜, 佢買左拼圖比史迪仔。

因為睇展覽睇得太耐, 行程第一次delay,
我們又改為計程車, 去下一站西門紅樓,

西門紅樓裡面有0416, emmaAparty, picobaby等等, 是我想去的小店。
Picobaby是用廢棄的電子零件造公仔, 質量相當高, 我個人很喜歡,
只是因為價錢, 才放棄購買。
0416, 這間沒有中山店的一間大, 但有減價tee賣, 800NT就可以買兩件tee,
計起來只是106港元一件, 超抵。我和白羊一人一件。
emmaAparty, 插畫都是用動物作主角, 例如有偷偷熊, 投降兔, 手影貓等,
我買了一件tee, 叫大象貓咪, 是一隻貓以為自己是大象的造型, 好好玩。
emmaAparty這種店, 很有創意, 推介他們的tee.
在另一間店, 白羊佢介紹一隻肥皂, 佢話好好用, 不過佢買了三件, 都係手信。
其實還想在西門紅樓裡停留耐一點, 但時間到, 要快快去乾杯吃晚飯了。

7:30到達乾杯, 呢間燒肉店咁出名, 除了因為敗犬女王, 就係d野真係好好食。
我地先叫左牛肉拼盤, 鹽蔥牛舌, 後來再加牛五花, 菜拼盤。
八點乾杯時, 我乾了杯可樂, 又可以飲多一杯, 白羊佢飲兩杯酒？ 真令人擔心!
很好味的乾杯。

食左2小時, 仲可以行半小時新光三越消化o下, 白羊真係好關心史迪仔,
佢買左份玩具, 係成套扭蛋, 台灣三越買兒童玩具, 真係超抵。

今晚回到酒店, 由我將d戰利品放在床上排好影相, 今天大家買的份量差不多。
米菲洗左咁多錢, 番去真係要食indomie勒。
轉眼間, 白羊又食起宵夜來, 好恐怖。

>>October 14, 2011 at 2:39:51 PM GMT+8

2011 年 9 月 27 日 星期二 【晴】

米菲, 去台北玩啦！


米菲在台北的第一天
無驚無險, 坐中華到了台北,
大家一向都話中華意外最多, 記不起我是否第一次搭,
既然是搭一次, 又安全抵步, 咁即係100%安全,
條數係咁計, 但一有意外, 就多數玩完,
所以我一上機就祈禱, 話完全唔驚就假o既

在機場用6000港元兌換了台幣,
那天的兌換率是3.765,
手續費兌換幾多都係30台幣, 緊係換多d啦
換了有22590, 有咁多錢洗, 好野,
我也要認, 去旅行時, 我是很大洗的, 不會就住用,
最多番到香港, 先再慳過, 真係唔惦, 咪日日食Indomie,
到時唔俾家用阿媽, 變成每個月俾180包indomie 阿媽,
條數係咁計, 30日x 3餐x2個人 = 180包
月短就佢食多幾包, 月長就我食少幾包, 你話我幾孝順呀, 哈哈哈......

在機場坐國光巴士到台北車站, 約1個多小時,
我們住在台北車站的新驛旅店(City Inn),
訂房氣氛都幾緊張, 好在白羊姐姐訂到房,
房間很細少, 一開門望入去, 會見到廁所, 隔離就係床,
再走入房, 望番出來, 會見到床, 隔離係廁所,
就係咁大囉, 緊緊有張長table, 俾你放雜物, 下面放行理,
房細其實唔緊要, 不過有少少煙味, 就唔like
不過服務員每天清潔都做得很好, 連頭髮都見唔到,
樽裝水又可以任取, 廚房和洗衣機在其中一層, 是共用的。

由新驛旅店去捷運站很方便, 穿過地下街就到,
第一個玩玩o既地方, 係漁人碼頭,
買了悠遊咭, 就是台灣八達通,
方便而每次搭又有打折, 按金100, 但4天旅程後,
因為冇時間退咭, 所以浪費了餘額及按金, 唯有當記念品好了。
由台北車站坐了18個站到淡水, 是最後一個站,
唔覺坐好耐, 可能因為閒日有位坐, 很舒服地看風景就到,
我同白羊坐捷運都影相呢, 兩個人都係第一次到台北。

到了淡水, 找了兩個女學生來問,
要講清楚d, 是剛巧想找人來問, 又剛巧有兩個女學生經過,
所以問佢地,
女學生話行去碼頭o個面,
就有船到漁人碼頭那邊,
買了單程票, 從這邊到那邊, 好像半小時內已到,
這天, 天氣很好, 不熱也不冷, 一件Tee剛好,
不過漁人碼頭那邊, 真係好大風,
風景很美, 我拍的照也美,
在飛機已吃午飯, 就隨便在阿給吃了碗魚蛋,
白羊同我都想”留肚”, 今晚行夜市掃街就當晚飯,
漁人碼頭, 除了情人橋, 還有情人塔,
這天太大風, 情人塔關了,
原來情人塔下面, 就係福蓉大飯店, 白羊話唔知呢度住一晚, 要多少錢,
不過, 其實都唔方便o係度住啦.
天色已晚, 我們搭巴士回淡水站,
再搭捷運到劍潭站下車,
由劍潭站到士林夜市較為近,

這是我第一次到咁大的夜市,
一邊是攤擋市集, 另一邊是熟食市場,
而熟食市場又分為一個很大的美食廣場及街道上的小吃。
我和白羊先行攤擋市集, 到處逛逛,
買了些小朋友的東西給史迪仔,
接著開始掃街食小吃,
我們吃了有胡椒餅, 杏仁茶, 柯仔面線,“狗”菜肉卷, 西瓜汁, 燒粟米, 大香腸, 苦瓜汁, 甘蔗汁, 豪大雞排, 涼伴小吃, 還有什麼嗎？ 都想不起來了,
全部都是在街上吃, 但其實美食廣場內還有很多東西想一試,
如大頭龍的蚵仔煎等, 不過真係太飽了。有機會都想再來士林夜市。
台灣這樣賣熟食的地方, 衛生也攪得不錯, 香港人d熟食地方就咁污漕, 內地人和香港人真失禮, 都是因為自欺吧。
回到酒店都不早了, 白羊將今天的戰利品放在床上影相,
嘩, 今天的戰利品全是她的。

>>October 14, 2011 at 1:43:58 PM GMT+8

2011 年 8 月 13 日 星期六 【晴】

我們愛著Suede



從Brit-pop說起
1989年成立的Suede, 與Oasis, 及Blur是三隊Brit-pop重要的樂隊.
那個年代的英式搖滾流行音樂, 稱為Brit-pop,
Brit-pop之前, 記得那時我是聽著Depeche Mode, New Order, The Cure......等等
回想起來, 繼新電子浪漫年代後, 再一次令我迷上英式音樂的, 就是因為Brit-pop movement.


回顧Suede的五張專輯
Suede -- 同名專輯, debut album走glam rock風格
Dog Man Star -- 離開了brit-pop路線, 但專輯郤是樂隊的masterpiece, 隨後結他手Bernard Butler 離隊
Coming up -- 走進商業化的一張唱片, 樂隊銷量最高的唱片
Head Music -- 樂隊成員有很多問題之下出的唱片, 維持多首上榜歌
New Morning -- 商業上失敗的專輯


我們愛著Suede
Suede令很多香港樂迷愛戴, 除了因為那種頽廢華麗音樂本身的吸引力,
也因為他們多次來香港演出, 和歌迷建立起一份感情, 每次來, 大家總會跟著一起唱他的歌。
在港的歡迎程度, 難以想像, 當年會展睇concert迫爆玻璃事件, 也是因為他們。
Suede在2003年解散, 離開了我們
到2010年Suede重組, 大家從沒想過
Suede 重組後的成員是
Brett Anderson -- vocals
Mat Osman -- bass
Simon Gilbert -- drums
Richard Oakes -- lead guitar
Neil Coding -- keyboards, synthesisers, rhythm guitar
全部都是之前的成員, 在知道他們重組, 有點感動, 七年後他們再走在一起, 真不容易,
重組後的tour, 去過好多地方, 有USA, Portugal, Spain, Ireland, Romania, Denmark, Germany, Israel, Turkey, Belgium, England等等,
今次Asia tour, 次序是South Korea, Singapore, Taipei, Beijing, Shanghai, Hong Kong, 跟住會去Japen......


2011年8月11日Suede演唱會
準時到達AsiaWorld-Expo,
只因沒有太多時間, 隨手就買了tour 的 t-shirt,
沒有什麼特別的 t-shirt, 不過$260, 就俾佢啦
我們買了兩份熱狗, 並水和可樂, 吃這種會場提供的快餐, 就進場了
演唱會全企位, 分$780或$580兩種,
買了$780那種, 為了與suede近距離接觸。

演唱曲目如下
She
Trash
Filmstar
Animal Nitrate
To The Birds
By The Sea
We Are The Pigs
Killing Of A Flashboy
Can’t Get Enough
Everything Will Flow
Obsessions
So Young
Metal Mickey
The Wild Ones
New Generation
Beautiful Ones

Encore:
She's in Fashion
Saturday Night

在我們的區, 我們站得很前, 也被人包圍著, 不知道為何一隊"咁耐"o既組合, 有咁多年輕一代歌迷,
開首歌She一唱, 就全場跳.....
雖然上一年都看過Brett Anderson的個人演唱會
但望著台上的Brett, 心裡想說我們等了Suede的演出八年了,
望著Brett的演出, 唱歌, 跳舞, 拂咪, 風采依然

說到演唱會的高潮, 郤是沒有,
因為18首歌我們都在跳, 慢歌就在搖,
全部歌都大合唱, 大家都玩得好開心,

唱Trash副歌時, 我在高聲唱......
But we are trash, you and me,
We're the litter on the breeze,
We're the lovers on the streets,
Just trash, me and you,
It's in everything we do,
It's in everything we do...

唱Beautiful Ones副歌時, 我又在高聲唱
Oh, here they come, the beautiful ones, the beautiful ones La la la la la
here they come, the beautiful ones, the beautiful ones La la la la la

或者, 唱18首歌, 我地有18個高潮了
有人批評只encore一次, 唔夠heart (聽到有die hard fans說)
不過, 何必這樣執著, 我們真係玩得好開心呀

Suede, we love you!

Trash

Beautiful Ones

>>August 13, 2011 at 5:35:49 PM GMT+8

2011 年 8 月 7 日 星期日 【陰】

大日子.....


Dear momo,

祝你生日快快樂樂！
小狗momo, 我愛妳！

米菲

>>August 8, 2011 at 2:46:23 PM GMT+8

2011 年 7 月 29 日 星期五 【綿綿細雨】

黑暗的中國繼續黑暗
他媽的鐵道部繼續他媽的



鐵道部賠償金額由45萬增至91萬,
死者家屬一定要在今天30日答覆, 並要放棄一切追究權,
今天不答覆, 鐵道部會離開溫洲, 再不會與家屬協商,
家屬為了申冤, 雖然賠償多了, 但不想接受, 限期又到, 心裡難受,
竟有這樣迫人在幾天答覆, 然後要你收聲......

家屬不接受, 可考慮找律師,
但作天司法部已下令, 對律師指出, 不要接受任何官司是關於這次意外的,
這種手段真可怕, 雖然後來又話不是這個意思, 是因為要統一處理等等......
總之要你收聲.....
---------------------------------------------------------------

講番d開心野, 今年行書展都幾開心,
但香港的書展真的很成功嗎?

原來今年書展, 旺丁不旺財,
雖然營業額高了兩成,
但因成本如人工及租金升了,
利潤維持不變。
我想能夠維持以往利潤, 都不錯吧！

唔講經濟的話, 見到今年咁多人參與,
咁多人買書, 對於推動閱讀來說,
是一件好事呢
內地人也過來買書, 書展能夠攪到咁大規模,
是很成功了。

今年行書展的經驗不錯, 其實不熱不臭,
有足夠地方食野, 書商也提供很高的折扣。
我花了800元, 收穫不錯,
剛好買了十本書, 大部份都有七折或八折。
記得宋真宗的勸學篇, 佢話書中自有黃金屋,
所以我都買了一本關於投資股票的書,
就算買唔到黃金屋, 都希望可以買間石屎屋啦
佢又講過書中自有顏如玉,
咁呀, 我都有買寫真,
仲買左三本, 分別係林莉, Da Da, 同埋趙哲妤。
林莉本寫真最豪華製作, d相好靚,
仲有dvd, 而且全數扣除成本後作慈善捐款.
佢真係有d似林志玲。
Da da 本寫真, 好性感,。
中國小姐趙哲妤好靚, 可惜本寫真紙質很差,
本來靚的相片也失去一份美, 失去一份色彩,
如果話刻意咁樣製作, 就更加失敗。

其餘六本書都係勵志或學術性o既書,
睇完再分享吧！
------------------------------------------------------------

星期三晚在大球場睇左兩場大賽,
就係布加般對亞士東維拉,
車路士對傑志,
我們七個人坐在不錯的位置,
可以近佢離睇英超波, 好開心,
頭場幾好睇, 維拉緊緊勝1:0
而車仔對傑志, 傑志保持頭三十幾分鐘不失球,
已經不錯, 不過實力真係太遠,
最後都要輸4:0完場
杜奧巴射左個好靚o既罰球, 不過冇入,
王子都冇乜機會掂波, 只有一球射門中柱。
Ashley Cole就真係好fit, 好落力,
由於傑志真係同車仔有距離, 所以都有時候幾悶,
因為冇乜反攻, 不過真係超抵睇
今日星期六決賽就冇飛睇了

>>July 30, 2011 at 4:57:49 AM GMT+8

2011 年 7 月 28 日 星期四 【寒冷】

黑暗的中國
他媽的鐵道部



近來唯一令我由頭睇到尾的電視劇, 就係真相,
要多謝高清盒加上硬碟的簡單錄影方法,
夜了回家也可看錄影, 而且過後睇番可以飛廣告, 省回不少時間。

找來陳展鵬及平時很少坐正的演員, 帶來了新鮮感,
還有, 這劇真的有別以往的作風, 令配角有機會發揮,
記得有一段審訊外籍人仕有否強姦陳茵媺飾演女星角色的案件,
有兩集差不多完全由配角帶領劇情,
如劉江, 李國麟, 盧宛茵, 飾演陪審團的一段,
真的很好看, 他們在那種內心的良知與法律的原則掙扎下,
再加上他們出色的演技, 令人很留心追看下去,
因為想知他們最後的決定是怎樣。

只可惜到了結局篇, 卻換上成黑社會故事,
一班主角找到洗黑錢罪證, 這種故事作結尾, 真令人失望,
但也算是近來的佳作, 看來TVB一定會開拍真相續集呢！

不過有d事, 你永不會知道真相,
例如溫洲高鐵意外, 你就永不會知道真相。
原來有高鐵和動車之分, 冇意外佢會唔會話你知？
香港計劃用咁多錢去造的可能係動車？ 咁到底是高鐵還是動車？
前面架動車出事時其實唔係停, 有乘客指出係行緊, 點解鐵道部講係停左？
點解要將失事卡車埋在泥底？
有員工不理上司要求, 堅持不用吊車, 要先救人, 才找出小女童伊伊, 為何鐵道部不以救人為先？
為何容許鐵道部清理現場後, 立即通車？搵錢重要過人民性命？
有一名家屬, 一家死了五口, 為了公義, 他多番抗爭, 今天說為了剩下的家人, 會收口, 又是否受到政府的壓力？
又是否員工受訓不足？
這些事, 你永不知道真相。
今早初步調查報告出左, 直情係將鄭融首歌改編, 佢話:“明明紅燈轉眼變成綠燈”, 所以就發生今次意外。
d人死得好無辜, 好慘.........作天溫總出來講話, 雖然溫總真係關心人民, 但除了他, 其他人都是做秀, 整靚個場等溫總來......

現在很多人都說, 中國科技及經濟發展得很快,
但國民的思想及管理方式追不上, 而且慢了很多很多佷多很多......

也許在這意外上, 有很多關於工程及設計我們不懂,
所以在尋找真相的同時,
可以討論, 但別要扮演上帝,
將我們認為對的, 以審判方式加在他人身上。

>>July 29, 2011 at 6:21:56 AM GMT+8

2011 年 7 月 15 日 星期五 【雷雨】

大江東去



冇聽錯的話, 今個月尾司徒華本回憶錄大江東去就會出版,
米菲一定會買來睇.
因為六四事件, 才特別留意司徒華,
記得當年89年6月4日, 我看著新聞在哭, 也是我第一次看新聞哭出來.
買這本書可以從別人角度看會一段段的香港歷史,
也可以向前輩學習, 讓我們學習真正的愛國是怎樣,
單看報章介紹已覺得很感動.

還有, 六四一定要平反!
-------------------------------------------------------------------------

早前買了一個新波俾momo, 點知佢一晚就攪到冇左聲,
真勁!
momo老了, 但係好好火, 成日鬧人, 不過隔離屋係抵鬧.........

仲有唔夠一個月, 小狗momo就生日, 那時就會15歳了,
momo你要健健康康, 與mo媽和米菲, 一同生活呀!
----------------------------------------------------------------------------

已一年多離開了Now電視, 也沒有join有線,
因為有線, 情願唔睇直播英超,
脫離這些公司, 真係好開心,
令人會有這種感覺, 你話佢地服務幾差呢,
你同人傾o下計, 好多人都會講起佢地一肚氣,
不過now係好d, 冇有線咁差,
新一季英超, 都係睇新聞就算了!

>>July 16, 2011 at 5:03:33 AM GMT+8

2011 年 7 月 14 日 星期四 【雨】

Momo來訪米菲



Momo: 米菲, 你死左去邊？做乜唔寫日記？
米菲: 我忙
Momo: 咁講你成日都忙, 唔洗寫啦!
米菲: 唔係, 忙完咪寫囉, 同埋寫日記呢樣野, 都要有d feel 先寫得
Momo: 到你得閒, 又話冇feel, 又唔洗寫啦!
米菲: 我冇寫, 你唔洗咁講喎, 都冇影響你？
Momo: 當然影響我啦, 個日記叫When Miffy Met Momo, 除非你改名叫When Miffy Met Miffy啦, 咁就唔關我事
米菲: (呢隻狗, 咁老仲咁好火, 等我還拖) 寫咪寫囉, 你再嘈我改名叫When Miffy Met Melody架
Momo: 唔好呀, 我唔嘈勒, 你寫啦, 我唔再嘈勒
米菲: momo啊, 我在這段日子有好多回憶, 不知從何寫起, 即管以大概日子來個小事回顧


米菲小事回顧:

2010年聖誕節前夕
竟然再要去南寧, 這是第四次去, 是要做關於QC的改動方法, 今次用新方法了,
但結果是不合格的, 是標準太高？還是我的手法有失誤？相信是後者,
就是在中國內地用一些舊工具, 總是感到不習慣又不方便, 絶對影響我的手法,
這事發生後, 感到有點挫敗, 最慘冇時間留下來重做, 也是今年的憾事。

2010年聖誕節
米菲行Franc Franc, 第一眼就愛上了一棵玻璃聖誕樹, 心想在聖誕節送給問問, 她一定會很開心.
到了那天, 在晚飯時送給她, 她沒有買禮物給我, 只想請我食這個聖誕大餐。很美味的晚餐。
當晚, 我們在IFC看了harry potter 結局前篇, 好開心你握著我的手一同看戲。
過了一段日子, 從你口中知道你不喜歡這類裝飾品, 還說幾舊水買個裝飾品, 俾錢好過啦,
米菲真慘, 聖誕樹上每個心心, 都是我的心意, 竟然......
不過, 米菲也欣賞問問的坦白, 唔鍾意下次咪唔送俾你, 哼, 下次想要都冇, 哈哈......
這個晚上最令米菲深刻印象的, 就是在送你回家時, 在你家路口的情節, 在那裡好一段時間和你一起, 也不想走......

2011年1月
米菲和melody去了澳門, 仲住在威尼斯, 好美的房間, 去澳門除左食食食, 我地都在不同地方影相.
米菲冇賭錢很久了, 但這次也當作遊戲玩玩, 輸贏不在意, 其實我都幾喜歡在賭桌上那種刺激, 有錢的投機遊戲才好玩呢,
不過作為一個基督徒, 與其要作解釋, 不如不賭好了。
很開心與melody一起渡過這個假期。

2011年2月
與melody渡過了一段辛苦又開心的日子。知道你不喜歡擺設, 就分別買了耳環, 手鏈, 和香水送給你, 是我的心意。
為了你, 我也不經不覺改變了呢。
2月14日那天除了是情人節, 也是米菲交屋的一天, 那天, 米菲家開始裝修。
裝修開始前已很辛苦, 先要幫媽媽搬屋, 再幫自己搬, 再要搬東西到儲存倉。
過程中, 不斷去看材料, 家俬, 電器等等, 好辛苦呀!
每次melody的來電, 都令我的心情緩和下來, 令我笑, 多謝你呢。
我很開心, 因為我深愛著melody

2011年3月
米菲已超過十年沒有去海洋公園, 上一次去, 是199X年或1990年之前, 嘩, 分分鐘20年冇去過, 主要因為不在香港.
回港後, 總是次次朋友攪, 都唔得閒, 到想去時, 個個去完又話唔會再去住, 拍拖又咁巧合沒有去。
今次由吉蒂帶隊, 我玩得好開心, 同吉蒂玩那個高速魔天輸, 真難忘, 我們竟然在高速中轉, 想起來都好恐怖.
吉蒂合上眼驚慌在求救, 我在安慰她, 其實我也超驚, 不過那個時候, 我只好安慰她, 好不容易才下來。
令一個難忘, 就是普通的魔天輪, 我們都畏高, 為何走進去呢, 其實吉蒂只想陪我玩,
上到去最高點, 真係好驚, 阿媽呀! momo呀! 救命呀!
風吹來時, 還有點搖, 好驚驚, 不過再去, 我還是會玩這個東西, 不然也沒有什麼機動遊戲可選擇了。這是開心的一天。
我很開心, 我好愛吉蒂呢

2011年4月
4月過得最辛苦, 除了番工, 就係忙裝修。因mo媽突然話想快d番屋企住，米菲為了配合, 就所有野都加速。裝修行程很密, 例子如下
12日 安燈
13日 安窗簾
14日 早上迷你倉搬運回家, 中午安浴屏, 下午整煤氣, 晚上脫智慧牙(好邪, 突然智慧牙事件), 再回家清潔, 仲攪到自己傷口爆左
15日 安大門, 下午傢俬送來, 晚上清潔到零晨三點, 為了預備媽媽搬回家。
16日 早上幫mo媽搬回家, 下午收洗衣機, 冷氣, 雪櫃
17日 整理執拾屋企, 一箱一箱拆合, 為了明天有空位放飯桌
18日 飯桌送到, 再執拾
21日 sofa送到
4月21日那天, 米菲家的裝修完工了。雖然仲有手尾要做, 但可以訓番個好覺了。
2個月加一個星期, 完成mo媽的dream house.
雖然洗左好多錢, 但係米菲見到mo媽的笑容, 就覺得好藉得了。
Mo媽老了, 現在不令她住得舒適一點, 還等幾時呢。
感謝神, 一切順利完工, 又冇遇上要出差, 太好了。
在辛苦的日子, 米菲好多謝melody的陪伴, melody, 我愛你

2011年5月
我和紫色賓尼去海南島旅行, 慶祝我的生日。以前去過海口, 今次選擇三亞。
選擇跟團去, 因為先可以用抵價錢住到好酒店。
有很好的陽光, 有很好的笑容, 有很好的團友, 有很好的食物,
個酒店叫Narada Resort & Spa Sanya, 個泳池好靚, 個海灘仲係私人, 游水係最開心的時候,
我看見紫色賓尼在浪中跳來跳去, 浪打過來時, 她還叫了起來, 那是我最快樂的一刻......
每天的自助早餐, 我都好享受。個團d免費午餐就真係麻麻。
有一天, 去了sheraton食tea, 那個大堂, 風景很美呀!
我很開心, 因發現我是很愛紫色賓尼。米菲很愛很愛紫色賓尼呢!

2011年5月至6月
呢兩個月是瘋狂出差, 去了4次深圳, 1次番禺, 2次上海, 有一半時間不在香港。
感謝神, 工作也順利。

2011年7月
終於寫番日記了

>>July 15, 2011 at 2:29:31 PM GMT+8