2015 年 9 月 9 日 星期三 【晴】

大阪之旅第四天


今天訓到成9點, 起身就要收拾,
剛好趕及10點退房,
Freshness Burger的早餐時間過了,
選了他們的熱狗配上咖啡作早餐,
好多芝士配上大香腸, 好好味,
米菲走到廚房前, 親自讚賞製作熱狗的店員,
下次回美國村, 一定來食隻熱狗, 好得。

1450要到機場, 咁早又冇野好行,
只有提早到機場, 在機場買食品手信。
坐上空港急行, 43 min就到達機場,
太早到, 只有等check-in,
因為點都想寄放行理後, 才到處逛逛,
等左好耐, 先寄存到行理,
坐廉航就有這問題,
人手唔夠, 空間緊迫, 時間係o岩o岩好,
可以想到在廉航打工的員工係好辛苦,
但米菲的行程很順利 所以都要俾個讚他們。

在扶手電梯, 米菲救了個內地女人,
她一家三口拿著巨大行理,
拉進扶手電梯, 電梯是向上走的,
她老公及女兒在電梯前段,
女人在後, 突然那女人連行理跌下,
她的頭向下, 一級一級跌下,
米菲也在電梯中, 跑上前把她扶著,
米菲也險些兒向後跌,
因為她是個肥女人,
我只能把她hold住, 唔夠力托起佢,
等到她老公來, 就在電梯快到盡頭那刻,
我倆把她扶起,
慶幸她的頭髮和裙子沒有捲進電梯裡,
也慶幸是長電梯,
她們向我道謝後,
米菲只關心她有冇受傷,
看來她的脂肪救了她,
全過程電梯沒有停下, 也只有我們4人在電梯裡,
附近的人, 估計都看到目瞪口呆,
我也慶幸自己沒有受傷。

行完機場的店, 午飯時間了。
看見一間食炸豬扒的專門店,
叫什麼KYK, display 個 set 好靚,
雖然有午飯特價set, 我也沒有點,
點了店中最特式的鹿兒島黑豚肉, 是炸物set,
好香脆, 米菲好喜歡,
價錢只是在香港銅鑼灣世貿中心炸物店的一半。

食飽後, 在機場的手信店,
買了綠茶蛋糕給媽媽, 是長崎的,
另外買了兩盒 Frantz 朱古力,
一盒是白朱古力包著乾了的草莓,
另一盒再加一層綠茶, 由於是乾草苺,
原來可以保存幾個月, 味道之前己試過, 好得,
事實上, Frantz 經常是流行榜的第一位,
如去專門店, 更可食到他們的魔法布丁。

回程坐在窗口位,
隔離坐著兩位中國大叔,
中間的大叔好快就表演吐痰, 雖然吐在紙袋裡,
但太近米菲了, 而且他把袋放回座椅後面的布袋,
如果清潔做不好, 下一手客人隨時中招,
兩位大叔向空姐要茶, 空姐打開 menu 介紹茶及水的收費,
他們便不要了,
大叔說: “他媽的航空公司, 水都沒有一杯。”
事實上, 廉航會遇上較多內地客人,
遇上這樣的事, 也要 EQ 高一點, 旅行是開心呢!

今次4天假期遊大阪,
讓我好好認識了大阪,
雖然一個人去, 但感覺良好,
所以如果夾唔到朋友去,
我也會再次個人遊
大阪裡, 其實我有好多地方未去,
例如天王寺, 大阪城公園,
同埋快將在11月會開 EXPOCITY,
是將萬博的舊址, 變成一個新旅遊點,
所以是很大的, 食,玩,買都有, 下次會去呢!

米菲go go go

>>November 22, 2015 at 1:41:38 PM GMT+8

2015 年 9 月 8 日 星期二 【雨】

大阪之旅第三天


兩晚都訓得幾好, 但我都灘到成9點先食早餐,
酒店下面是Freshness Burger,
他們的西式早餐500日元一份,
有3種選擇, 點了滑蛋配上香腸及多士跟咖啡,
米菲在店中漫漫享用, 望著窗外的雨,
這一刻, 咖啡的香, 微微的雨, 靜靜的我,
一個人旅行,
多了這份隨意、寧靜、細嘗。

由於太喜歡玩具,
作天用上了大量時間睇, 所以早餐後, 安排較緊密。
上午會到梅田, 下午就打算回心齋橋、難波、美國村,
一次過行晒這些地方未行的店,
若有多時間, 想再去電電城。

乘坐地鐵, 從心齋橋三個站就可到達梅田,
梅田有很多商場, 即使近年開業的也有,
但米菲的主要目標, 還是去阪急三番街。
阪急三番街總共有四層, B2/F, B1/F, 1/F和2/F.
最高的2/F就是阪急梅田站, 最底層的B2/F主要是食店,
中間的B1/F和1/F就是日本品牌服裝、雜貨及精品。
到達後, 先去kiddy Land 逛逛,
在日本, kiddy Land並不會打動我, 因為......

原途會經過一直好想食的Mister Donut,
雖然吃了早餐, 也貪心地點了兩件,
是原味和什麼“復刻味第4彈”這種,
原味和復刻都好好味呀。
其實, 米菲很喜歡Donut, Bagel 及 Taco 這幾種食品,
在香港專門店不多, 甚至冇。
問過阿妹, 佢都話唔知香港邊度有Donut專門店,
見字的朋友又知道請告訴米菲。
食完就入了輕鬆熊的專門店, 只睇冇買, 因為......

因為跟住係天真、活潑、可愛、有趣、純潔、美麗的Miffy專門店,
一入去就從心底叫, 嘩, Miffy呀!!!
店唔算好大, 由於是工作天, 大部份時間得我一個人在裡面, 店員向我打招呼後就回櫃台,
佢間唔中望我, 好像只行不買咁樣, 其實米菲係先由頭到尾行一次,
然後就攞起個籃, 將之前睇o岩的放落個籃, 在這裡花費了約16000 yen, 約一千港元, 真係好瘋狂。

新出的miffy毛巾枕套, 好睇又實用,
套在枕頭上, 就可以每晚和miffy面貼面,
拿出來洗又方便。
Miffy小豆袋好可愛呀!
miffy 造型的曲奇, 真係唔忍心咁食落肚呢!
還有miffy 的兔姿造型毛公仔, 毛巾質地這款是新品, 在這裡買, 便宜很多。
Miffy flower 字樣的杯, 配上spoon, 簡直係一件藝術品。
Miffy雨傘, 又係便宜很多, 買呀!
還有很多想買, 留番下次吧! 米菲一定再來見米菲。呵呵呵!

出來走不遠, 會有布丁狗café, 看menu的介紹, 真係好有趣,
而且時間早唔洗等位, 但米菲的肚飽飽的, 無法再食了。
由於到梅田只為板急, 到板急只為miffy, 所以買衫方面,
就只選了去Hep Five的 Beams睇。
點了好幾件試身, 喜歡了三件shirt, 因為平時在港幾乎不買衫,
所以就好豪咁買晒三件, Beams平常很少減價, 所以一D都唔平,
想起來, 如果大量買, 都係去機場附近的outlet買beams,
可以省回很多錢呀! 不過今次行程時間並不配合呢!

午飯食左個SET,
天婦羅, 米飯, sober, 配菜,
咁簡單的set, 都食得出水準,
滿足地坐地鐵回心齋橋。
去了Sanrio Galleries 幫同事找Pochacco精品,
行完一次唔見,
就隨口問店員, Do you have PC dog toys or accessories here?
當時忘記左只係PC叫Pochacco做PC dog,
所以店員用奇怪的眼神回應我, 真係好好笑,
後來我俾圖片店員看, 佢就話全店只有一款Pochacco東西賣,
但這商品一D都唔靚, 最後選了kitty及melody socks做手信。

經過Crepe Ojisan, 好香呀, 引唔住買左個ice-cream pancake,
banana配上Chlocolate, 絶配。

日本今期大熱流行食品, 心齋橋上當然都有店,
係garrett popcorn shops, 故名思義係賣popcorn, 原產來自美國Chicago,
有五款size選擇,
S, M, L size 賞味期限係當天,
Quart 及 Gallon 就會入罐, 賞味其限十天。
如果排隊, 米菲肯定買個small 即食, 再買個Quart回港,
可惜, 要排半小時隊, 只好放棄了。

行完心齋橋, 就走到難波,
被那個巨大的 KATE TOKYO 廣告版吸引住,
廣告拍到黑木美沙超美, 真係好美, 而且有種神秘的美,
近期睇日本電影的魯邦三世(雷朋三世),
當中黑木美沙亦係好搶眼, 佢當然飾演峰不二子。
當然要影低有黑木美沙的廣告版,
唔知點解每次去大阪, 都總會在 glica 影相,
今次雖然冇自拍, 都照影呢個景一張,
難波橋影出來也很美,
雖然是遊客區, 但空間始終大, 所以沒有迫人的感覺。
在大阪名物的手信店買了幾種手信,
其中大條的彩虹百力枝, 好得, 好睇又好食, 叫 Giant Rainbow Pocky;
今期推介的sponge cake made from fresh banana cream 就唔突出, 得個甜字;
神戶Toraku X Royce 的巧克力布丁, 味道還可以, 試吓無仿。
餘下手信, 留番在機場買。

難波的章魚燒一向出名, 所以又食章魚燒,
不知這店叫什麼名字, 是被店員介紹下, 忍不住買了的,
好食過甲賀流的, 不次去要再食。
行完心齋橋和難波,
回美國村途中, 又會經過一玩具店 Mandarake,
有幾層的動漫店, 好多野睇。
在美國村, 最後忍唔住在 Big step 買埋件 shirt 衫, 真係好靚嘛!
經過g raniph design T shirts, 買了5件T, 優惠架10000日元,
算幾抵, 不過店員建議我買M, 回家後試只係啱啱好, 可能著L會舒服D,
點解?因為個小肚腩囉。
將戰利品放回酒店, 就出發去電電城。
最後買左好多 figure, 星月、神月、小圓、高板,
行到店關門先走。

又夜左食晩飯, 只好回到酒店附近食。
今晚嘗試去鳥貴人食,
是食牛扒的專門店。
一入去, 點解咁奇, 有枱冇椅子。
雖然眼見係咁, 都忍不住要問店員,
因為行到好累, 好想坐。
女店員說, 站著食也是店的特色, 是新流行的。
半聽半估計她說什麼, 就是新流行的上班族快餐式食牛店,
由於冇得坐, 流動快, 價錢也便宜很多。
話說這女店員的眼綫很深色, 就是全隻眼也塗上黑色, 可能又流行吧!
全店設計以高高的Bar枱, 客人走到前面先選一種牛扒,
有4種選擇, 日本和牛, 美國安格斯等等,
以每100克作單位俾錢, 在客人臉前即時切出一塊和磅重,
就即時帶入廚房燒, 不是在臉前鉄板燒的形式。
我選了最貴的安格斯, 因為早就決定豪食牛扒, 每100克700日元,
我的224克, 共1568日元, 約100港元, 抵呀!
一會兒燒好, 會放在鉄板才上桌, 由客人自己加汁, 所有調味在桌上都可以找到,
還有一張紙造的圍裙, 好貼心的安排, 以防在享用時弄污衣服。
成件事好好玩, 我的安格斯好好食, 加上好肚餓,
塊安格斯略為太熟, 我選了medium, 下次要選medium rare先得。
回酒店後, 又來浸浴, 今晚將餘下的浴鹽倒晒落水, 都係冇乜味。
很滿足的一天呢!

>>November 22, 2015 at 1:00:24 PM GMT+8

2015 年 9 月 7 日 星期一 【雨】

大阪之旅第二天


由於得4天時間, 沒安排去京都及神戶等地方, 主攻大阪。
今天上午計劃去黑門市場。整天大部份時間都下著雨。
阿妹叫我唔好先食早餐, 直接落去黑門食。
想搭日本地鐵, 於是心齋橋搭一站到長堀橋, 轉車再搭一站就到日本橋。
我雖然在車站出啱黑門市場的出口, 但行錯方向, 超低能。

10點到黑門入口, 只有一半的店開著做緊生意,
另一半還在打點, 黑門壽惠廣未開, 黑門三平就好多人,
由於米菲不想迫, 就在附近的店叫了份魚生,
價錢的確是黑門三平較便宜。
我都是第一次食魚生作早餐,
我的一份裡有四種魚包括吞拿、三文, 另外兩種不懂, 還有蝦和魷魚,
其實都是魚生, 能食出黑門市場好食D嗎?
我食唔出, 但係無疑係新鮮。
買了枝有機凍豆漿, 好香。
有間燒牛肉店, 我買了串燒和牛串,
因為細串, 所以1000 yen真係好貴, 不過入口溶化的感覺, 實在美味。
在另一炸物店, 買了條大蝦天婦羅, 好像叫做大海老天婦羅,
食完後, 再到一間叫大判燒的餅店, 買了件即製豆沙燒餅, 好好食呀,
雖然那刻已經好飽, 還是整個豆沙燒餅食晒。
米菲不好海膽, 但看見這裡的即開海膽都好吸引, 將來有機會再試。
在三都屋, 沒有買生果, 買了個叫大福餅的和菓子,
是軟綿綿的糕點包上新鮮草莓, 晚上先食。
這個早餐一口氣吃下了我最喜愛的食物,
魚生、燒烤和牛、炸蝦天婦羅、豆沙燒餅、豆漿,
真要講句人生真好玩！
唔計酒店式的自助早餐, 呢餐係我人生食得最貴最豪的早餐。
大約用了3千幾日元, 即2百港元食早餐, 呵呵呵！

有幾樣野值得一題,
在黑門市場的超市裡, 發現黑毛和牛便宜很多,
但因計重量, 要實際磅清楚才知價錢,
如估計的話, 超市是食店的4份一價錢, 部份再做緊半價, 那就變成8份一價錢了。
在黑門的公眾廁所裡, 發現有圖示教人點去廁所, 也似乎是專給中國內地人看,
圖中表達出, 他們有人坐廁不坐,
也有人把抺完的紙掉進垃圾桶, 又唔衛生又失禮。
說起中國內地, 這裡有間食河豚魚生的店, 介紹裡寫著,
很受中國內地遊客歡迎。
但河豚魚生還是較冷門, 在黑門, 只見到幾個人在店外享用 , 也是說著普通話的。

離開黑門, 已快12點了, 下午係去電電城。
從黑門步行到電電城, 一條直路, 15分鐘內可到達。
途中會經過千日前道具屋, 那裡主要是賣廚房用具,
例如想開章魚丸店的話, 可以在這裡買到燒章魚丸機。
好PRO咁樣, 買乜機都有, 傳統的也有。
米菲不花時間, 快閃咁行個圈就走,
因最期待的玩具街就在前面。

電電城有小秋葉原之稱, 裡面集合電玩動漫產品。
但米菲未去過東京, 所以冇得和秋葉原實際比較。
這裡有Astro Zombies, Super Position, Super Kids Land, Volk, namco and animate 等等。
仲有一些不知名的店, 新品和中古的貨品都有。
米菲入去後, 很開心有咁多玩具,
而每間店都讓你自由觀賞, 不打擾客人,
有需要時才找職員幫忙, 這樣就睇得較為舒服。
行吓睇吓買吓, 就已經3點幾, 係食下午飯(茶)的時間了。
其實早餐飽到依家, 但真的想找個地方坐坐。
找了間店食湯麵, 食一種叫三豐麵, 我點了乜乜猪加溫泉蛋這種,
好食噃, 湯濃, 由於三豐麵這種麵較拉麵幼細, 所以能把更多的上湯帶進口裡,
好味呀!!!
繼續在電電城戰鬥, 今天有很多戰利品。
魔法少女的兩款曉美figure, 在香港已不多見, 在這裡可以平價錢買到。
我的妹妹那有這麼可愛的高板, 更可在這裡超值買到。
中學時喜歡的筋肉人, 也用優惠價錢買到。
價錢平, 主要係因為滙價很低,
這刻, 10000日元對650港元。
還買到一隻很想擁有的我的妹妹音樂歌曲CD, 太好了。
只有部份玩具店有免稅, 稅實在也是一個問題,
冇得免稅的話, 便要計清楚了, 免得買貴左而仲要拎回香港。
玩具店大部份都是8點關門, 我竟然行到7點幾, 都未睇完,
但太疲累了, 明天下午打算再來, 行程要修改。
雨也沒有停, 又拿著很多東西, 我打的回酒店,
消費820 yen, 還可接受吧!

在酒店對面, 有間叫elk的西式店,
主要食什麼我不知道,
但我入去係9點, last order係9點半, 但可坐到11點。
所以即刻看相片的推介, 點了個漢堡pancake,
就是兩塊熱香餅夾著一塊漢堡牛肉, 有沙律伴著,
好好食呀,
點了杯strawberry smoothie, 好香呀!
全部即叫即整, 食得出及飲得出店員係好用心製作食品,
我當面在店員面前, 讚賞他們的製作,
看到她們的笑容回應, 很滿足的樣子。
應該讚賞時, 就要及時讚賞, 是米菲近年學會的。

那個和菓子、卡樂B限定味薯片和可樂, 就是今晚的宵夜。
叫大福餅的這種和菓子, 太甜了。
今晚用上半支浴鹽, 配上面膜, 好好relax,
我是個會邊食野飲汽水邊浸浴的人,
今晚浸浴配上薯片和汽水。
呢款浴鹽好差, 連少少香味都冇,
好天然, 同無用一樣, 呵呵呵!

>>November 22, 2015 at 12:38:11 PM GMT+8

2015 年 9 月 6 日 星期日 【雨】

大阪之旅第一天


米菲去旅行不算多, 如果唔計中國內地, 一個人的自由行, 今次更加是第一次。
而促成這次個人遊, 更多得香港快運的特平機票, 讓我可1千蚊來回大阪。
還記得初次上綱搶機票, 是安排5日4夜,
點知網絡問題, 搶回來的5日, 去唔到俾錢的版面, 不停說我重復登入,
最後還要重開電腦, 才順利買到, 但已買不到5日, 只買到4日的來回行程,
也好, 反正不知一個人遊日本感受是怎樣, 就去4日試試。
其實都有約人去, 但可能太急了, 米菲六月尾買飛, 九月頭出發, 朋友都說太急了。
也多謝Cherry和PC的鼓勵, 就決定一個人照樣去, 體驗自個遊的樂趣。
Mr. Gabuji藉請話一個人旅行好好, 好自由, 佢好enjoy, 不過佢可能只係唔想同老婆一齊, 呵呵呵!

米菲一向是個膽小的人, 得把口嗰種, 亦好容易對未知的事不安,
所以一個人遊大阪, 我就一定要預備好整個行程,
每日去邊度, 玩什麼, 食什麼, 都安排好,
到時唔跟冇所謂, 最緊要預先想過。
計劃時主要睇正文社出版的旅遊書, 之前和melody和JM去台灣都係睇佢地出版的,
所以今次繼續睇正文社的書作籌備。
在安排的過程中, 越來越期待出發……

二個月的時間過去了, 終於今天出發了。
米菲喜歡搭機鐵到機場, 可以在九龍站先check in,
好處係唔洗排隊check in, 然後輕鬆搭機鐡, 雖然價錢較貴, 但覺得藉得呀!
HK Express係在T2那面入閘,
我又唔記得返回T1先食早餐, 以前出差試過係咁, 因T2冇乜野好食,
最後選了間不知名的快餐, 叫左個餐蛋面食,
嚴格來說係迷你餐蛋面, 而且係唔好食。
當時我想, 早知返過去T1先食, 希望今個旅程最唔好食就係呢餐啦!

Delay no more, 10:50AM 順利起飛,
HK Express d位係窄喎, 雖然米菲不肥,
但三個人一行, 我雖然坐路邊位, 隔離大叔隻手臂侵犯我,
留意到隔離三個位, 竟然得一個少女坐窗邊,
大好機會, 等我調個位先。
大好機會意思係調位, 與少女無關, 先講清楚呀!
米菲主動問空姐(幾靚), 可以調過去嗎?
空姐話起飛後就可以,
太好了, 調位後, 大叔和米菲都可以坐得舒服多了。

在機上, 沒有點餐食或飲品,
只喝入閘後買來的水, 和自己帶上機的餅,
同事話只要不太過份, 他們還是容許你吃自帶的東西的。
日本時間3點半到達關西空港, 查証件的過程也很快, 但攞行理就等耐左。
到出海關, 關員用英文問了我好多問題,
最後還要打開行理檢查, 不過旅遊書的確提示了,
指日本搜查行理是較為普遍,
因為預先有這心理, 所以也不覺不自在, 只是怕浪費了時間。

沒有買定南海電鐵的車票,
因為知道最快的rapi:tα, 是34 min 先到難波,
而空港急行, 是43 min, 也不是相差很遠。
但兩種都是1小時得兩班, 所以去到有邊種就搭就最省時間了,
因為預先買定的話, 最壞情況係等足半小時呀!
米菲到車站, 職員用英文及圖指引我, 最近開出是空港急行,
幾分鐘後就開出, 920yen 冇劃位冇行理架這種,
但火車上足夠位置擺放行理, 好快開出了。
米菲3:30PM落機, 4點前已在火車上開出, 一切順利呀!

4時50分已在難波戎橋筋商店街入口, 天氣很好呀!
有點分不清方向, 第一次嘛, 就問一個日本仔,
佢好有禮, 即刻用Google map 查我間酒店,
原因是, 我上唔到網。
找對方向後, 一入戎橋筋, 就遇上北極,
即刻買條抺茶雪條食, 120yen, 又抵又好食,
估唔到今次在日本食既第一樣野, 係北極既雪條。
一手推行理, 一手拿雪條食, 繼續前進。
米菲很小心推行理, 因為在香港也體驗過內地遊客推行理對香港居民構成的不便,
不是內地人禮貌的問題, 而係香港地方及街道太小了。
所以在日本, 米菲知道自己行理大, 就更要小心, 唔想影響到別人。
我是住在美國村裡的西鐵西心齋橋酒店Nishitetsu Inn Shinsaibashi,
所以走完戎橋筋, 就接上心齋橋筋, 中途轉左走向美國村,
到了美國村, 就認不到路了。
問了兩個日本少女, 她們知道米菲是香港人, 好樂意幫我帶路。
我本身知道日本人近年不喜歡內地人(消費以外來說),
所以多數表明自己來自香港, 對香港人態度有分別的。
到了酒店的位置, 但又看不見酒店, 我多謝了兩位少女,
自己繼續找, 遇上一個日本貨運員工, 他一看酒店名稱,
就親自帶我進入一條內街, 原來在這,
哈哈, 之前就睇唔到, 真的很多謝這員工。

這酒店的環境不錯, 房間整潔, 無氣味, 平日連稅約5百一晚。
安頓後已經5點幾, 出發行街先。
今天時間不多, 只打算行美國村和心齋橋,
先到甲賀流食新的山芋燒, 因為事實上, 我連午飯都未食呀,
甲賀流即刻製作出來的, 真係得。
醬味很濃, 好熱, 熱到燙舌, 但山芋味唔突出, 還是我點錯左, 呵呵!
我就坐在三角公園食,
我買完後, 回望甲賀流已排長龍,
就在這時,
突然落大雨, 只好走到附近一間店門口避雨,
剛好這店沒營業。
雨沒有停, 一小時前還好天呀!
唔理, 開始購物,
入了間不知名的店, 買了件外套, 及shirt衫,
從今晚起, 米菲開始失控購物。
接著走進Baller, 這店賣男裝古著,
買左件shirt 衫, 呢件好喜歡,
但不是日本製, 是韓國製的, 手工很好。
對面就是Tiger Copenhagen,
是一間丹麥家品雜貨店,
喜歡逛雜貨的朋友, 這間一定要行,
以這個中價錢及這裡的創意來說,
是質素較好的店, 我買了些自己合用的,
合用最緊要, 在雜貨店, 最容易買下無謂的東西呀!

行吓行吓, 走到Big Step商場,
大部份店已關, 在一店看中了一件Shirt衫,
但貴, 所以暫且不買, 反正住在美國村。
其實, Big Step和三角公園, 都是美國村的地標,
還有就是Tom’s house , 而美國村街道, 特別也用上人形街燈。
在這留連, 不經不覺8點幾, 店都關門了。
下一站, 只有逛心齋橋的藥房了。
落雨, 星期一及晚上的關係, 心齋橋不算人多,
但入到藥房, 又另一回事。
好多內地遊客, 即刻無心行, 畢竟今天都疲累,
不想和他們迫, 執齊幫朋友同事買的東西,
再買D零食及可樂, 就閃。

晚飯回到自己酒店附件的食店, 是買票的,
這店叫“定食・朝食XXXX”,
點了份燒牛柳定食, 再加可樂一杯,
白飯改店的新產品, 十六穀米,
塊牛柳不算很高質素,
但米菲很享受呢個SET,
整体感覺非常良好, 可能係心情好吧!
我見隔離枱個外國人及日本人自助refill飯,
我就照做, 點知,
原來選十六穀米代替白飯, 係唔可以refill,
店員很有禮貌告訴我。
哈哈哈, 早知加多個白飯(已過last order時間, 已十時半了)
不過, 呢個十六穀米, 好好食,
香又多fiber, 但又不失日本米的綿, 推介。

回酒店浸浴, 舒暢。酒店隨了整潔也寧靜, 聽不到嘈雜聲呀！

>>November 22, 2015 at 12:18:03 PM GMT+8

2015 年 8 月 18 日 星期二 【晴】

新不如舊


自從無記再重播大時代,
就令我開始番煲劇習慣。
已經是第四或第五次睇大時代,
仍然覺得咁好睇.
實在經典中的經典

之後, 竟然又播他來自江湖,
我又不自覺再看一次,
真係笑死,
達叔和星仔, 始終係最攪笑組合,
當時, 梅小惠的角色亦係好好笑呢......

睇完兩套, 點知仲可以重溫誓不低頭,
太回味了
有一段好好笑,
秋宮在天台和劉美娟傾計, 佢話,

"人善人欺天不欺, 人惡人怕天不怕,
我經歷了咁多, 都冇痴線,
就係因為相信呢句說話"

哈哈哈, 笑死我勒......
呢句說話, 大時代都有,
原來相信呢句說話, 無論境況變成點,
都唔會痴線......

>>August 19, 2015 at 3:17:13 PM GMT+8

2015 年 1 月 24 日 星期六 【晴】

米菲, 跑吧!


今年繼續參加馬拉松十公里賽事,
7點幾就已經到達維園記存行理,
事實上,
我很喜歡賽跑, 也喜歡這樣的十公里賽事,
只是晨咁早要到達, 始終覺得辛苦,
也因為不習慣週未早睡,
所以作晚要零晨二、三點才睡著,
五點幾又再起床,
休息真的不夠呢!

天氣今天很好,
只是起初時濕度太高,
地面有些滑,
身體散熱也不太好,
跑落有點辛苦,
不過就是這種辛苦也要跑下去,
還記得上斜時,
米菲也決心不停下來,
繼續跑足全程, 沒有停下來休息過,
這種刻苦自己身體及心情,
捱過了就好開心。

我的衣服上, 扣上黃絲帶,
也繼續表示支持我要真普選,
上年用59分鐘完成,
今年大約55至56分鐘完成,
要看大會公布才能確定

一如以往,
跑完後去太興食餐蛋面,
熱奶荼,
在這情況下食,
唔知點解特別好食呢!

感謝神, 賜下陽光,
感謝神, 賜健康能參與賽事,
今天一切, 都要感謝.......

>>January 25, 2015 at 2:37:51 PM GMT+8

2015 年 1 月 12 日 星期一 【乍雨乍晴】

2015年的第二個夢


其實真係好少在日記寫夢,
但因為呢個夢係關於momo,
而momo係日記的第二主角,
所以就把這個夢記下來

昨晚的夢,
是我和小狗momo去旅行,
旅行細節現在已想不起來了,
只記得一個畫面, 是她在很窄的桌子上睡午覺,
在夢裡是這樣想,
桌子這麼窄, 她不會掉下來吧!
接著,
畫面變到街上,
我們在街上散步,
突然狗帶甩開了,
好奇的她不繼向前走,
我在後面怕她有意外,
在後面跑著追她,
夢裡的momo跑得很快, 週圍望,
我卻追了好多街口,
街道是旺角街道的模樣,
那時心裡想,
怕有車衝出來把她撞倒,
所以米菲再加把勁跑,
終於追上把她捉住,
她在笑,
那時很近的望著她,
她的毛原來變得好長,
好像告訴我, 你已很久沒有給我剪毛了!

momo, 我好掛念你呀!

>>January 13, 2015 at 2:29:37 PM GMT+8

2015 年 1 月 10 日 星期六 【晴】

跑呀跑呀


今日下午去了跑步,
一跑就跑左8.8公里,
本來是諗住跑8公里,
因為momo係8月8日出世,
突然跑到那一刻,
決定為momo跑多0.8公里,
跑得很愉快,
天氣亦相當好

新一年睇完兩套劇,
From Dusk Till Dawn, 劇情好緊張,
雖然係講吸血鬼, 但當中每個人物性格的描寫都做得好,
而且因為之前係電影, 現在改為 tv series,
所以好多情節加長左,
又可以再回味呢套戲。

Penny Dreadful,
成套戲有晒
人狼, 吸血鬼, 科學怪人, 邪靈,
對我呢類喜歡科幻和超自然的人,
實在好吸引,
開頭睇時有d實望,
點知睇到後期,
重點慢慢浮出來,
所以故事用左好長時間報局,
好期待第二季來臨。
Eva Green的演出, 亦好邪氣。

近年英美兩地的劇,
多左好多horror為主題的劇,
實在太開心了。

>>January 11, 2015 at 11:25:49 AM GMT+8

2015 年 1 月 4 日 星期日 【晴】

懷念叮噹


小時候很喜歡看叮噹,
因為叮噹法寶袋有很多法寶,
每次都能為大雄解決問題,
曾經有一段時間很迷上,
連漫畫都買埋來睇,
那時是海豹叢書這間出版社出版的,
當然, 想起來, 那是很開心的童年,
能買一本漫畫是很開心的。

那時看電視叮噹很簡單,
覺得叮噹就是這把聲音,
從沒有配音這個想法,
長大後, 也沒有留意是誰配叮噹這把聲。

曾經有段時間,
漫畫因版權問題,
叮噹要改名成多啦A夢,
那時很不習慣,
所以一直都繼續稱呼叮噹做叮噹,
過了很多年,
在綜合節目裡,
才知道林保全先生就是配叮噹那位,
而且在其他卡通節目裡,
都聽到他的聲音

長大後,
真的好少睇叮噹,
但在千奇百趣這個節目裡,
卻常常因為叮噹趣怪的描述而歡笑,
就算一些日本的簡單事物,
經過他的旁述,
都變得很有趣,

知道林保全先生只是六十幾歲離世,
有點難過,
在睡中死去這回事,
米菲也覺得很可怕,
而且總是令我不明白

叮噹的死,
令我想起momo的死,
永遠都成為一種懷念,
突然一刻,
就會想起來.......

>>January 5, 2015 at 1:54:38 PM GMT+8

2015 年 1 月 3 日 星期六 【晴】

開始了


2014年結束了, 沒有好好檢討過去一年,
新一年就已進入狀態了,
而且覺得過去一年時間過得飛快般,
最大可能是因為工作太忙, 而且公式化了,
以至沒有太多時間靜下來思想,
這可不是我期望的一種生活方式。

新一年的開始,
米菲用了delete 這個function,
除了是把電腦和手機大部份過去的file和bookmark delete晒,
就是再將其功能廣泛應用,
把人生中過去的成功和失敗都delete 埋,
對事物和人的態度也delete 埋,
自己的性格倒是不容易改變, 也沒必要改變,
但心態是可以改變的.
delete左,
就可以save好多新野,
也不知算不算是自己新一年的目標,
反正這樣想,
而且起步這一刻, 真的實行了。
--------------------------------------------------

作晚零晨4點左右,
從夢中醒來,
我記得部份夢中的內容,
大概如下:

米菲一開始就在課室裡面,
有很多學生,
像是個無窮大的課室,
人太多, 老師要把學生分成十組,
然後在課室的白板上畫了十個方格,
要求每組在方格上填上東西,
填什麼呢?
如何在商業上得到最大的成就?
如何投資成功?
如何理財?
詳細是什麼討論問題不記得清楚,
大概是填上這方面的心得,
所以這個課堂,
也可能是什麼投資理財的課堂,
我倒很多年沒有去過這樣的課堂或講座,
好明顯米菲的內心成受一定的經濟壓力,
才會有這樣的夢。

在很快的一刻,
其餘九組已把心得填在方格中,
只有我們的組還沒有什麼具體想法,
要不和別人的差不多, 我們又不想一樣的填上,
反正還有時間,
只是其他的組太快吧!
事實上,
當我們的組員閱讀別人的心得,
發現能行出做出以上九組的方法,
已經很成功了吧,
用不著我們再寫上什麼,
我們這樣在說著,
後來這個夢發展到我的組員要我做代表,
出去填埋最後一格,
我出到去有d 驚,
但一拿起筆來, 就自然寫下一句說話,
由於學生都是寫上要點樣做, 像是很實際的方法,
我卻寫到像和理財無關一樣,
我寫到
"並且不要忘記做一個愛心真誠的好人"
寫完後,
好想知道同學和老師的反應,
但夢醒了,
雖然身體躺在床上,
但腦子好清醒,
突然好想記下這個夢,
所以用紙筆把這事記下來,
再躺回床上的時候,
米菲想到,
會不會是聖靈對我講說話,
但無論如何,
這是一個正面的聲音

所以米菲新一年的目標,
並不算實際及具體, 而且部份來自一個夢。
2015年, 米菲要
好好運用delete這function,
好好在事業和投資上得到成功,
並且不要忘記做一個愛心真誠的好人。

>>January 4, 2015 at 2:09:26 PM GMT+8