2008 年 11 月 26 日 星期三 【晴】

時間過得很快, 冇假期的11月就來過去了......
12月會好嗎?
等候的心情很複雜......
快d 啦 快d 啦........
---------------------------------------------------------

比卡mo

從來都冇睇過比卡超呢套卡通, 仲有一套差不多的叫數碼暴龍,
我對呢兩套卡通講乜都唔知,
但我知道比卡超或其他的都可以變身, 應該變身後都會勁d 啦!
我在幻想, 如果我遇上困難,
小狗momo會化身成一隻巨大的怪獸,
把壞人惡人趕走, 拯救我,
不過如果momo會變成一隻怪獸, 個樣都會係好cute,
恐怕敵人都唔會驚佢......

今個冬天, momo件新衫係一件粉紅色的, 上面寫住sweet,
阿媽o既taste好難觸摸, 第一天穿上時,
momo真係唔開心, 過左幾天佢好似習慣d,
oh! momo! 真係一個迷人pink lady,
momo, give me a kiss!
----------------------------------------------------------

設計緊一個新實驗, 下星期開始,
希望一切順利啦,
還有........
我希望......
--------------------------------------------------------

上星期去左和孩之家佈道會,
本來係plan左去跑步,
但係突然有聲音在心裡, 說:你求我幫助你, 現在教會有需要, 你會否願意回來幫忙呢?
雖然我分不出是什麼聲音,
但o既然呢件係一件正面的事,
我就番左教會做陪談, 仲有機會帶多一個人回教會......

佈道會唔算多人, 坐一半人都冇, 講得衰d, 有少少冷清,
介紹團契段片不錯, mem報道團個話劇不錯, 李牧師講道強而有力,
所以是一個好的佈道會,
決志有3至5人左右, 以咁少參加者來計, 差不多啦,
我同carmen就同秀麗的媽媽做陪談,
雖然秀媽唔係因為決志走出去, 但係同佢o既對話,
我地都再介紹耶穌基督俾佢認識,
主啊, 希望有一天, 你的愛感動她, 叫她開開心心地走出去決志.

講番佈道會少人, 我地團契得carmen, 思晋, bertha, Jacquline baby, paul哥, 同埋我,
成個團契得6個人番,
梗係少啦, 我都係偶然先決定番去,
這也反映出我們對教會的投入感,
甚至是對福音事工的委身,
進而就係我地同神的關係,
大家是不是真的咁down,
如果係, 我地打算點???
--------------------------------------------------------------------

上星期團契終於聽到彩虹甜品店老板o既分享,
好好的分享,
如果你miss左, 真係可惜架,

而今個星期由princess josephine帶大家遊深圳,
希望大家玩得開心d 啦!
冇錯, 去深圳係一個旅行, 唔係短宣, 立場清晰,
旅行就係旅行啦, 旅行就係吃喝玩樂啦! cheers!!!
------------------------------------------------------------

三神課程o既黃福光博士越講越放, 好精彩!!!
要開始狂睇書, 做功課同溫習, 呢科要考試架!!!
-----------------------------------------------------------------

飯後好眼訓.......不過都要開工勒!!!

>>November 27, 2008 at 6:48:25 AM GMT+8

2008 年 11 月 5 日 星期三 【微雨】

Dig Out My Soul



自殺原來係一件好可怕o既事，除左當事人失去生命，仲另到身邊的人都受影響。
係一種壞o既影響，而且相當真確。自從一位姊妹自殺後，我有一段日子都想起這件事，
而且仲有小小自殺的念頭，呢種感覺都係第一次。
曾經聽聞過家族或朋友裡面如果有人曾經自殺，這些親友及朋友的自殺率會比其他人高，我現在相信了。
我相信好多人都曾經有自殺的念頭，但理智讓我們不會將念頭變為行動。
而且，也好在我是一個怕死怕痛的人。

姊妹，想起你!
讓你在天國得到安息，將來有一天，在天國再與你對話。
那次在火車的對話，也是我們最後一次對話，或許我們可以說得更多......
---------------------------------------------------------------------------------------------

整個10月是有一點點唔開心，都有人問過我係唔係投資的影響，可能都會有少少，
上面件事又有少少，工作又有少少，但係最主要係10月份有好多日子都唔o係香港，
影響左我正常的生活方式，攪到個人好亂！
O係中國做o既實驗又唔順利，得個做字。
記得有一天實驗需要用冰塊，上面實驗室係冇，而內地7仔係冇冰塊賣，我要走去街市找冰，
一條友抽住夠冰番廠，真係好重，辛苦完一輪，又得唔到回報，
老細仲如咆哮的獅子，到處尋找可吞吃的人。
在重重打擊下，弱小心靈的我當然down啦!
你問我依家點，可以完成今天的工作，開始有番時間寫日記，我巳經開始康復了。
--------------------------------------------------------------------

上星期同Christine食飯，談到所羅門，佢都俾左一d好o既意見，
事實上，團契最近巳經多番一團火，希望可以持續燒落去啦！
早前為了下一年職員，我都好大膽去分享經文，本著互相提醒的精神，
希望大家都行出來事奉神、服事弟兄姊妹。
其實做左咁多年，我都有諗過停一年，讓自己充電。
但係，可能性質問題，事奉並唔係同工作一樣，工作辛苦一輪，可以用旅行方式充電，
而事奉唔係咁，本身跟本唔應該覺得辛苦，而且充電係番到神那裡......
對我自己而言，星期六有時都要番內地工作，影響我番團契，投入感自己減少......
看到Forest以前給我鼓勵的心意咭，我用同一番話鼓勵Kennis，也希望她快些找到工作，
天父呀，求你為她開路，給她一份更好的工作!!!

三神讀到聖經研讀呢一科，今季係舊約。黃福光博士真係勁，內容深入但又唔會悶，很好的講課技巧，我想，隨了要學識舊約一點點，也要向他學習演說及分享的技巧。不過呢一科要考試，都要勤力一點了!
---------------------------------------------------------------------------------------

上星期六，終於提起精神為momo剪毛。對不起呀，momo，令你做左長毛咁耐。
其實佢d毛長o既時候，個樣會得意d，但係要剪到一定長度，好難剪，
所以我將momo剪到好短，效果就好似個小朋友咁!

剛星期日旅行我冇帶momo去，都有d後悔。
作為旅行負責人，要作好一切交通及食物安排，又要照顧momo，雖則唔係有好多o野做，
但係未去過o既地方，安排上我會有d擔心。
下次我會交俾其他人做，讓我同momo可以一同去。
------------------------------------------------------------------------

10月份買左三張CD，係安室奈美惠、Primal Scream、Oasis

安室奈美惠—Best Fiction
由2002年到2008年，6年來o既精選，收錄17首歌，15首單曲加2首新歌，好抵聽。
都唔夠，再送晒17首MV俾你。
一直都唔覺得安室係選美的那種美女，但係佢個份高貴氣質好吸引我，比選美的那種更美。
因為時間及金錢關係，我以往唔會有機會睇咁多佢o既mv，上星期我就一口氣睇晒17首mv，mv拍得好靚。
新曲Do Me More及Sexy Girl好得，Do Me More都係Vidal Sassoon廣告歌，而睇番Rock Steady，
個mv可以拍到咁有音樂感，一個勁字!
被稱為Queen of Hip-pop，都有佢道理。
頭一個星期就賣左68萬張，到依家巳經100萬張以上，寫日記這一刻，佢以朝著150萬張進發。
由於安室是19歳加進樂壇，依家係30歳，
所以最近有報導指安室是日本唯一的歌手可以在10、20、30世代都有唱片賣超過100萬張。
巳經有一個兒子的她，今天仲可以成為女王，佢張專輯，我會慢慢欣賞。

Primal Scream—Beautiful future
Primal Scream的第九張專輯，同樣是橫誇3個世代，46歳的Bobby Gillespie繼續帶領樂隊做實驗，
聽佢o既碟真係次次都唔同，到今天呢張碟只係聽過一次，所以冇乜特別感受，
可能真係少左一兩首一聽就愛上o既歌。

Oasis—Dig Out Your Soul
Oasis第七張專輯，一回來就好像要對人說，我就是超級巨星。
單曲The Shock of the Lightning令人興奮。
Oasis現時成員係Liam Gallagher，Noel Gallagher，Andy Bell，Gem Archer，Chris Sharrock，
呢個陣容我幾鍾意，因為除左兩兄弟，有Andy Bell玩bass呢！
知道佢地巳開始一個18個月o既tour，不過應該都唔會來香港，有點可惜。
上一次去左26個國家，可能佢地覺得太疲累啦！
其待有一天可以再在演唱會中大合唱Don't Look Back in Anger、Wonderwall、Champagne Supernova等歌......

在10月失去靈魂的我，這張大碟叫Dig Out Your Soul，或許就是要喚醒我，今天要dig out my soul.

>>November 6, 2008 at 9:37:59 AM GMT+8

2008 年 10 月 11 日 星期六 【晴】

一個睡不著的晚上......


自從一個在留學時期相識的姊妹自殺後,
這個十月總多了一份愁緒,
是的, 在她的安息禮拜, 有一種難過, 但說不清感受如何,
因為從來沒有朋友自殺離開我......
也有點後悔, 為何不早找這個朋友傾計,
或許會有出路,
要另所有身邊的人都快樂,
看來是我的使命了,
睇得Heros多, 個人都多一份使命,
"Save my friend, Save the world"
--------------------------------------------------------------

回憶.........

今日下午食tea時, 去左大快活,
正當我專心食緊我碗米粉時,
隔離枱發出一些鼻涕聲,
是一個小朋友, 約8歳,
自己一個人在睇漫畫, 冇叫o野食,
真不明白, 他的家長為何不擔心他的安全,
看來他傷風了, 但因為冇紙巾,
佢用自己件衫及手去扶鼻涕,
並且狂索, 希望索番d鼻涕入去,
我俾左張紙巾佢,
佢細細聲同我講唔該,
當我繼續食米粉一段時間,
那聲音回復,
看來一張紙巾都不夠,
我再俾兩張佢,
佢細細聲同我講, 咁樣唔好意思,
好, 呢個小朋友真係好有禮貌,
我只係話唔緊要, 你扶個鼻啦,
但其實我應該同佢講, 第二時你都去幫助其他人啦,
咁樣就可以傳達一d信息俾佢.

而佢另我想起小時候一件事,
好像咁多年都冇忘記,
小學三年級的我,
社會科考試,
我流到成手都係鼻涕,
老師叫我出去,
然後俾左張紙巾我,
跟住係點, 或者考成點,
我當然唔記得,
但係記得個Miss都幾惡,
我應該都係好驚咁出去拿張紙巾.

咁多年後, 輪到我俾張紙巾另一個唔識o既小朋友,
希望呢個助人精神可以隨著張紙巾傳出去啦......
個小朋友睇緊叮噹,
原來今日仲有小朋友喜歡叮噹,
不過佢地好似叫多啦A夢勒......
---------------------------------------------------------

尋日開職員會都算傾到幾多o野,
總算為下一年職員會做左好o既準備,
開會後,
我去左城大舊同學o既聚會,
都幾多人,
我地燒烤, 玩得幾開心,
天氣涼左,
燒烤真係剛好,
希望呢班舊同學可以一直保持關係啦....

好夜番到屋企,
收到一個email,
另我很難過,
人生就係咁,
那會事事如意,
有d事只有接受.......

明天要出發中國工作了,
希望實驗順利完成啦!

>>October 12, 2008 at 6:44:04 PM GMT+8

2008 年 9 月 13 日 星期六 【晴】

九州第五天


今天是最後一天，吃過早餐後，就去最後一個地方，天神地下街。福岡地下街同大板都係一樣，連住好多商場。
我們在門口等著開門，但原來好多日本人同我地一樣等開門，呢一點比較怪。
我地遊客就話時間好重要，住o係日本洗唔洗咁緊張去買o野呢?
我們先去藥房，跟住我去左Shiseido幫人買o野。
阿妹就睇中左一件37000yen o既衫，雖然計港幣係2670左右，貴唔貴就好個人，阿妹話如果千幾就好，
做阿哥見個妹咁鍾意見衫，就話出$1000，咁阿妹就真係用千幾就買左件衫，佢真係好鍾意件衫。
同場有2個日本妹都試緊呢個款，鋪頭得3件，其中一個日本妹諗左好耐，最後都買左，佢地同我個妹，就買起左呢件衫勒。

之後去左Porter Tokyo，阿妹買左個番工袋俾David，我發現竟然剛剛出Bearbrick crossover Porter Tokyo，係400%，
上網睇番係9月11日出，只限在日本有得賣，我即刻買左一隻。
記得好似7000yen，約港幣$510，香港依家賣緊$850，食水都幾深。

行行o下去到MONO COMME CA，本來冇乜特別，但係播緊一首好好笑o既日文歌，
雖然聽唔明佢唱乜，但係唱腔同把聲巳經好攪笑，推廣一個女仔叫Sumiko，個樣有小小似小丸子o既野口同學
p.s. 野口個樣係咁www.nippon-animation.co.jp/na/maruko/nakama/noguchi/index.htm

而下面係太陽報最近o既新聞，都有介紹佢

【近年好像很少看到日本有代表性的Character公仔及貨品．在電子遊戲中心內所見的夾公仔機器，
都是以九十年代日本動畫人物的貨品為多。但是早前有一位小姑娘登場，更獲得市場支持，
她的名字叫Sumiko！她是一位8歲的小學三年生，但沒有兄弟姊妹，只與父母生活。
由於Sumiko很喜歡唱歌，常常夢想成為歌手，經過她的一番努力，終於夢想成真！
在不久之前出了唱片，最近更與日本潮牌Comme Ca合作，推出一系列貨品，包括電話繩、T-shirt、杯等各種不同的生活用品，
能夠成功地與Comme Ca合作，已差不多能確定這位以帶幵「古時代的可愛」的Sumiko在日本的認知度，
她所唱的歌曲，亦帶有昔日的味道，再加上一張傳統的日本臉，真的會明白她為何會變得人氣起來，
在十月份，她又會再出新碟，且看一看她會否再創高峰！】

大家可以留意o下，真係會聽到你由心笑出來。我買左個電話繩送俾人，廣告話10月11日出唱片，正!

最後陪阿妹買完一輪，我經過郵局，睇有冇記念郵票。
賣緊一套叫Scenes in My Heart ‘心之風景’第二集記念郵票，800yen，我買下來留念。

去旅行我會collect兩樣o野，一樣係Hard Rock Cafe short glasses，上面會印左個country/city個名係上面，
現在我有13隻唔同地方，都係多得各方好友送來。不過咁次見唔到hard rock。
另外一樣，就係當地郵票，買當地郵票係一個習慣，覺得幾靚就會買。

上車會合團友後，我們去機場了，由福岡→熊本→大分→宮崎→鹿兒島→豪斯登堡→福岡，玩足一個圈，好滿足，
希望有機會將來去埋長崎同佐賀啦。聞說長崎o既蜂蜜綠茶蛋糕好食，
我o係機場買左一盒，係香，不過我覺得太甜，唔係咁鍾意。
上到機，阿妹同我講話見到個空姐似麵包超人，我望過去，竟然係咁似，我同阿妹講唔好咁大聲，聽到真係會好hurt。
因為今日係中秋，飛機送每人一個月餅，後來我仲幫麵包超人從行理架拎d月餅落o黎，好想笑,佢真係好似呀!

今次寫個旅遊日記好詳盡，我想將來睇番都有好多回憶，希望下年可以再去日本。

>>October 7, 2008 at 11:24:13 AM GMT+8

2008 年 9 月 12 日 星期五 【晴】

九州第四天


一早醒來，還未到早餐的時間，我獨個兒用一個多小時行了豪斯登堡一遍，到處影相，貪佢晨早冇人。
影左好多相呀，因為我知道一陣掛住玩，冇時間影風景。如果你喜歡影相，建議你去豪斯登堡，可以影足一天。

早餐都係日式加西式自助早餐，不過明顯冇Aoshima Palmbeach Hotel咁好食。
遊戲設施係10:00am開，我地今日可自由玩到3:00pm，有成5個小時。起初我們以為會玩得晒，但最後都唔得。
我們有全日任玩pass，一般來說，都唔洗點排隊，只係要夾o岩時間去每一個玩動。
園內大致分為荷蘭宮殿、漁村區、博物館區、遊樂設施區、風車花園區、餐廳區、購物區。

我們先坐好近酒店o既海上巡航觀光丸，係一架好大的帆船，會駛出海岸睇o下風景咁。
但可以上船頭扮里安納度，我就唔敢放開雙手，因為真係驚跌落海，同埋都好多人，唔想阻人地。
之後教你打繩結，我學識打逃生繩結，工作人員真係好有心機教我地。
下船後，我地又走上另一隻船，係一隻遊艇，佢會載我們去番門口，妹妹打算由門口玩起。
沿途在運河上行走，可以睇番園內風景，d風車好靚，想起昨晚都有下雨，今天陽光普照，感謝主！
我們是否只會想起下雨的日子，忙記了陽光的日子；是否只想起我們的缺乏，忘記主豐富的預備........

回到起點，係Teddy Bear Kingdom，成個館睇番Teddy Bear發展史，唔同年代公仔都有。
個主題精品店d o野都幾貴，我買隻熊，係5月版本，跟住幫佢揀件2号o既衫，咁就係5月2日，我生日的日子。
店內有好多唔同o既熊，都係用呢個玩法。另外，我買左一隻好cutie的熊。
平常在香港行街，我唔會咁買，但係去旅遊，開心之下，就會買左。成年男人之中，仲會買毛公仔o既人，全香港可能唔多，我就係其中一個。
我覺得望到d得意o既公仔會令我幾開心，所以我會買佢番屋企。我但願我o既童真可以繼續。

在遊樂設施區，導遊話其中三個遊戲必玩。
第一個係什麼Grand Odyssey，係20人一齊玩，首先我要申個頭入部機裡面，佢會掃瞄我個頭，係3D，
然後等埋另外19人，跟住會有故事人物介紹，你會發現你變左其中一個角色，戲份多少睇o下你抽得好唔好，
阿妹同爸爸都多戲份，我就好少，爸爸個樣最似自己。成個故事睇15分鐘，不過加埋掃瞄就要玩成45分鐘。
見到自己阿爸爸同妹妹變左電影裡面個角色，都幾好笑，話係全球首創o既遊戲。
第二個係Horizon Adventure，要進入一個大型舞台，一個大自然背景，旁邊係一間屋，用特殊裝置，
做出閃電行雷下大雨的場，全部用真水，雨不停落下，直至產生洪水，洪水沖向間屋及觀眾，都幾逼真。
叫觀眾體驗大自然的威力之餘，最後帶出叫人珍惜食水的信息，睇成20分鐘，ok好玩。
第三個係IFX Theater Kirara，係3D劇場，講出如果地球冇左月亮會點。影像同音樂配合，造出美麗的畫面。
佢話係想傳達保護地球的信息，成20分鐘，講日文，要俾錢租耳筒，我冇租，所以都唔知仲乜。呢個遊戲係一個悶字。

玩完三個遊戲，巳經用左好多時間，巳經係2:00pm，得番一個鐘。即刻去世界最大o既Nijntje Miffy精品店。
荷蘭文Nijntje，意思就係Miffy。一入去，嘩！Miffy呀！再行入d，嘩！好多Miffy呀！
一排排貨架上坐著一隻又一隻Miffy，有日本版，仲有豪斯登堡版，又有佢d朋友仔，種類好多。
亦有Miffy個作者Dick Bruna設計o既其他公仔。好開心呀！

我買左2條Miffy領呔(d公仔唔係太誇張，質料都唔錯，所以真係可以用得到)
一隻Dick Bruna設計的狗仔
雨傘、毛巾、袋、仲有好多好多......
我買左20，000yen，真係好誇張。
起初我唔知豪斯登堡係點，所以唔知跟團有冇機會去Miffy館，依家可以去到，真係一個bonus。
買完係食午飯時間勒，我地玩到2點幾先食lunch，時間又唔多，所以只係食漢堡包，就要回酒店集合離開。
總括來說，豪斯登堡係一個好靚又好玩的地方，亦有最靚o既精品店。如果要玩盡d，需要2日。
第一日盡量玩遊戲同shopping，夜晚睇煙花，第二日就踩單車，睇風景，行博物館，好遊閒咁渡過。

出番去福岡，係食晚飯時間，今晚食Shabu Shabu，係日式火鍋的意思。
一般係食牛肉，不過我地係食豚肉，湯底係配上芽菜，粉絲，豆腐，大蔥，白菜，
最後係食烏東，烏東吸收呢個湯特別好味。我地今晚係任食，所以任何一種材料都可以加，好滿足。
Shabu Shabu o既價錢由d肉而決定，食靚牛肉或豚肉就可以好貴，我地今晚的豚肉只係一般。

食飽後，導遊帶我地行福岡o既中州不夜天，係著名o既紅燈區，像東京新宿歌舞伎町。
我就收番埋部DV，因為驚影到人，俾人打鑊。 見到好多做馬夫o既日本仔，見唔到d日本妹。
自由活動時，我好奇下入左一間介紹centre，原來有好多相片在廣告板上，我諗有二、三百個日本妹，
每張相下面有個價錢，我行左個圈就走，有個日本仔走埋來好似想問我o野，我冇理佢行左去。
呢個就係佢地經營方式。之後行到前面o既屋台，係一條大排檔街。有串燒，拉麵，清酒等等，都幾多人架，而且係晚上先開。
好可惜我地三個都好飽，而且我地o既目的係下一個地方，係Canal City Hakata，係一個好大o既shopping mall。
我地首先去左藥房，阿妹見到Afternoon Tea個廣告，佢好想知道O係邊，我地都搵左一陣先搵到。
阿妹同爸爸去Afternoon Tea，對面就係Onitsuka Tiger專門店，正。我買左件運動外套。
其實依家香港剛剛開專門店，仲有機會平d，不過來到日本，都係想買。上年o係大板就買左tiger鞋。
tiger鞋以前來說，係最輕o既鞋。應該因為前幾年做Kill Bill時，Uma就係著住Tiger，所以呢幾年都流行番。
香港買對Tiger鞋，靚d款式一般都要$900左右。

今晚本來住Grand Hyatt Fukuoka，但係安排上有問題，我們住了Hyatt Residential Suites Fukuoka，
雖然都係屬於Grand Hyatt，但質素好普通。
係君悅收購番來的service apartment，相信係因為君悅想做大d，俾service apartment我地住當然好大，
但冇酒店咁靚，仲有少少煙味，我就唔係咁鍾意。

我地之前order左o既牡丹蝦送到來酒店，係生食，好大隻好鮮甜，我係第一次食牡丹蝦，我地食左8隻咁多，計起來差不多$70一隻蝦。
爸爸休息後，我同阿妹再去食博多拉麵，阿妹話點都要整番碗先訓。去到一間就係叫博多拉麵館，唔夠大板一風堂咁好食，不過坐bar枱睇住個師傅，都幾有風味。

巳經係11點幾，諗住冇o野行，點知又見到間開到零晨5點o既大型商店，又睇左一輪，番到酒店都謝晒。
我將我買o既戰利品放晒o係床上，來一張大合照，足足放滿一張床，不個比起只去日本購物o既人，濕濕碎。

>>October 7, 2008 at 11:18:12 AM GMT+8

2008 年 9 月 11 日 星期四 【晴】

九州第三天


今早醒來，本想浸多一次溫泉，但實在太想睡了，加上要執o野，所以我放棄左。
而今朝係豐富自助早餐，我食左兩次，加上一杯ucc咖啡，成個醒晒。去日本旅行的話，我都幾享受份早餐。
一般酒店，都有日式加西式o既自助早餐，可以慢慢享受，我喜歡先食一碟生菜為主的沙津，然後先食其他o野，
最後再加多士或包包，嘆o下咖啡，真係要講番句：“人生真好玩”。

由於尋晚先到青島，跟本睇唔清楚酒店出面d環境，所以食完早餐，正當爸爸大人做大事的時候，我同妹妹就去酒店四處逛逛，
間酒店出面係水池，並且見到椰樹，有少少海南島feel。旁邊有個教堂，係方便結婚。
我見到d廣告有推銷d人來呢間hotel結婚，呢度結緍會很浪漫。從酒店步行約2分鐘，就見到海灘， 好靚。
有人話青島日出好靚，sorry, please wait me up next time。個海亦很美，呢度都係滑浪o既熱門地方，見到都有二三十人滑浪。

接著坐了十多分鐘車，到了鬼之洗板。
原來山崖下的海邊岩石表面，由於長時間被海水浸蝕，形成波浪狀，好似洗衫板咁樣，日本人就稱佢為鬼之洗板。
面積都幾大，但我唔覺得有乜特別，反而整個日南海岸俾我個感覺很好，籃天白雲加海浪聲巳足夠。
幫爸爸影左張側面相，背景係個海，好有幾許風雨feel。

下一站係鹿兒島縣(kagoshima)，從來冇想個自己會到呢個地方。
想起鹿兒島，就會想起一個教會姊妹，佢依家巳經冇返我地團契，佢係Allison。
話說佢生日，我買左一個Hello Kitty杯俾佢，上面寫住鹿兒島限定阪，所以想起鹿兒島，就會想起Allison。唔知佢依家點。
我地去到城山展望台，可以眺望櫻島活火山，個感覺係在太平山望落去，見到好多樓一樣。
唔同係個背景，因為樓後隔著個海係一個巨型火山，而且不繼噴出白煙。
想像o下你住呢d樓，日日望住一個噴白煙的活火山，都唔知佢幾時係“The Day After Tomorrow”。
而鹿兒島出名係大蘿白，好多Hello Kitty精品都會有Kitty抱住蘿白。

Oh！Baby, lunch time！今日係食壽司定食。每人有一set壽司、天婦羅、烏冬。
我地另外order左一隻魚生船，好多魚生呀，食到飽飽。
我同阿妹係可以食好多魚生，所以我地差不多食晒，但係好多團友都食淨好多，有點可惜同浪費。

去鹿兒島都只係一d gimmick，因為跟本只係去城山展望台同埋食個lunch，我想最主要係可以在鹿兒島轉坐子彈火車。
我們來到鹿兒島中央車站，車站連住個大型shopping mall，上車前兩小時瘋狂購物，
妹妹自己去掃貨，我陪爸爸睇衫，爸爸其實好少買o野，不過我就帶佢睇帽，
然後鼓勵佢都買番一頂，佢平時都戴帽，佢最後買左一頂，幾好睇架!!!之後入左Kiddy Land，
幾開心噃，見到輕鬆熊，忍唔住買左一隻。買o下睇o下，時間就到。
我們坐子彈火車了，係燕子號，由鹿兒島到新八代，子彈火車真的很快，在車上超定，部份車卡有汽水機，隊左罐coffee。
本來巴士要兩小時多，現在火車40分鐘就到，好快。落火車後，我們還要轉乘旅遊巴，到豪斯登堡。

到達稱為九州迷城的豪斯登堡(Huis Ten Bosch)，有令一個感覺，真係好歐洲。
Huis Ten Bosch是荷蘭語，是森林之家的意思，是在1992年開業，以中世紀荷蘭街道作藍本，
這是因為400年前荷蘭巳與長崎有交流。豪斯登堡現在是亞洲最大的，比東京迪士尼大兩倍，
用左5400億日元建造，聽說是世界上投資得最多o既娛樂事業。
裡面有點像一個大型游樂場，但不是機動遊戲，是一些播放影片的場館，
例如3D，濆水，激光之類，而最主要係場內的建築，令你仿如在荷蘭一樣。
由於我未去過歐洲，一進入豪斯登堡我被它的建築深深吸引住，我的相機同我都好忙，好靚呀。
因為我們到達豪斯登堡巳接近日落，導遊先和我們做個introduction，帶我們行一次，
讓我們知道明天應該點樣安排時間玩遊戲，去邊度食飯好，途中見到Teddy Bear館，
另一個令我跳起來的，是Nijntje Miffy館，嘩！Miffy呀！聽日掃貨。
最後行到我們住的酒店，係最入，我們住在Huis Ten Bosch Hotels Den Haag，酒店是歐洲設計，我住個房都幾豪。
收拾好行理後，我們就去吃晚飯，去到一間叫長崎洋食，我叫左個焗芝士咖哩飯，份量剛好，
味道一般，不過我食得好滿足。
飯後，我們在美麗的夜景中散步，晚風吹來，好舒服。
行到間精品店，d精品好靚，只有投降，呢度有好多主題精品，Miffy有一個section，
我買左少少，留番聽日o係Nijntie Miffy館先買。
我地搵左個好位，準備即將開始的鐳射激光煙花匯演，買左杯Latte，
諗住一路嘆，一路睇煙花，又要講番句，人生真好玩。
個鐳射激光煙花匯演真係好勁好靚，而且好近我地，我諗都係100米左右，就在面前的碼頭船上射出，好震撼。
不過我部DV剛好冇電，後備電在酒店，超低能。
全個煙花last約10分鐘，今日都玩到好盡，回到酒店一個浸浴，渡過了美好的一天。

>>October 7, 2008 at 11:06:32 AM GMT+8

2008 年 9 月 10 日 星期三 【晴】

九州第二天


一早醒來，沖完身就跳進溫泉，要再浸多一次，好舒服呀。
好鍾意浴場o既環境，好自由自在。整頓後，就吃一個自助早餐。
部咖啡機好好玩。我~襲馱@杯，再~聾@杯唔同味，俾爸爸揀，我地都覺得好飲。
由於我好早起身，有時間我就在酒店外邊逛逛。
酒店有動物園和植物園，我相信都係點綴o下咁，因為我只見到一些鹿，
而植物園裡d花都好像唔o岩季節，唔係好特別。見到好多學生集合，佢地都準備出發。

由於我地在山腳，坐十幾分鐘車巳經到阿蘇火山入口。要坐吊車，上到火山山頂的地方。
導遊話佢帶十個團來計，只有五個團可以上火山，亦只得50%機會上到火山。
佢話火山噴出來的煙，充滿有毒氣體，如果風吹向吊車及觀望的地方，火山就停止開放，
唔準人上山，以保障遊人的安全。風向o既o野講唔埋，如果吹唔o岩風，咁點算，
咁山下有個火山博物館，免得遊人空手而回。
當然可以親身上火山最好啦!阿蘇火山是熊本的象徵，上唔到真係慘架。
我地就好幸運勒，風吹另一邊，我地可以上吊車了。
坐上吊車看風景很美，原途都見到熔岩留下來的痕跡。

下另車後，去到觀望台，看到一個奇景。好壯觀呀!火山不繼噴出白煙，有時發出一些聲遄C
聽導遊講，阿蘇火山是世界最大的破火山口，我諗係指“個窿”最大，而且是活火山。
我依家可以企o係火山上，望番落去個窿到，真係藍精靈，十分勁......
.四面個景都唔同，有d幾煙霧迷漫，有d又見到熔岩痕跡，我不停咁映左好多相，
其實睇相片唔會感受到o個種震撼，不過都映啦，都有拍video，
原來近距離火山係咁勁，又要唱藍精靈，十分勁…….唔好笑啦，我都仲有好多童真架!

O係呢度都留左幾耐，當我行足一個圈，行番去起點時，點解突然咁多煙，
警報器閃著紅燈，表示要盡快離開火山。個顯示燈有四種色，日文寫著青、綠、黃、赤，
表示火山氣體濃度分別是0、0.2、2、5ppm。
依家係紅色燈，即火山氣體濃度巳達5ppm，個牌指示要做o既行動係避難、下山。
呢個時候巳經充滿硫黃氣味，有個別團友巳經咳嗽，我地番上去吊車，開始下山。
團友都覺得好幸運，可以順利觀賞火山，而且經歷埋避難o既過程。
可憐係一班小丸子，有二架旅遊車咁多，一上來就紅燈，失望而回，佢地可能只可參觀火山博物館。
當我地架吊車下到山後，公園都關起來，唔俾人再上山。
我買左一舊火山石，陽光下會有多種顏色在舊石上見到。
在食店買左杯黑芝麻軟雪糕，好香好好食呀!
我望住舊黑芝麻軟雪糕，又望o下火山，我以後見到黑芝麻軟雪糕可能都會聯想起今次去火山。

出發去大分縣(Oita)，我地去全日本最高吊橋，叫九重夢吊橋。
有173m高，長390m。條橋好新，06年先起，架在什麼鳴子川溪谷上。
因為條吊橋咁高加上長關係，風吹來會搖動。
安全關係，每隔一段距離，都有工作人員看守，如果你刻意搖條橋，他們便會禁止你。
我o係度橋走快左兩步，佢都對住我講左幾句日文，你話幾嚴謹。
望出去會見到瀑布，稱為日本百水之一的“震動之瀑布”，下望九醉溪，好美。
今次旅行雖然跟團，但我都好留意d旅遊資料，想學多d咁隉C
在橋上要企得安全，人多又要搵位映相，都幾高難度
。美中不足係，我行唔晒度橋，就要上車。我好想知橋另一面有什麼，跟團就係咁，冇法，呢度要扣分。

跟住去左別府市，參觀地獄噴泉。點解要叫地獄？
原來由地下250至300公尺噴出約100度沸點、熱泥或氣體o既地方，都叫地獄。
有個叫什麼“別府地獄協會”，聽起來幾有來頭，其中有八個地獄。
分別係血池地獄、海地獄、山地獄、白池地獄、龍卷地獄、鬼山地獄、鬼石坊主地獄，
有一個全日文，唔知係冇地獄。跟團只能參觀最大的海地獄，又要扣分。
海地獄d水係藍色，幾靚，特產係用池水煮蛋，我冇買來食。
用池水煮蛋，so what?
我對龍卷地獄同鬼山地獄都幾有興趣，一個係話每5分鐘會噴水，另一個係用溫泉水養鱷魚，夠邪惡。
海地獄手信店d野幾好睇，我買左個cushion，上面寫住大分同埋有隻阿笨，一來靚，二來在旅遊巴巳經可以用。
當巴士在別府行駛時，到處都可以發現有小管排出氣體，以減低地底的氣體壓力。
導遊話日本人好早時期打算侵略其他地方，好可能係知道自己週圍係火山，又在地震帶，
好像別府，成個市都在地獄上面，都危險架。事實上，大分最出名係別府溫泉，全個別府市都布滿溫泉。
日本今日可以用火山及溫泉吸引到咁多遊客，都係一種智慧。買左豆付蛋糕食，唔知係唔係用溫泉水整呢。

午飯時間，日式燒烤，其實除左好高檔o既日式燒肉店外，什麼日式韓式對我來說都是一樣，
如果有蛙式自由式燒烤，相信都一樣係咁燒架啦!
我食左好多魚生壽司，特別食左好多三文魚同甜蝦，跟住燒左好多肉，加上任隊可樂加冰，
好happy，燒烤配可樂加冰係最完美，呢一餐充分發揮出任食的樂趣，
我們也一件都冇食淨，拿食物時只拿適量，因為唔想浪費。
我們一家三口可以咁樣開心一聚，天父，感謝你。

下一站係宮崎縣(Miyazaki)。宮崎係日本古時產生很多神話的地方，有些旅遊點都同神話有關。
旅遊書話要玩晒呢度要兩日，我得半天，只能觀賞日南海岸裡的鬼之洗板及青島。
由大分去宮崎都幾遠，要四小時車程，晚飯前到達宮崎。
冇更快的方法，因為冇飛機冇火車，我想去宮崎旅行o既人會少d，都冇聽過人自由行去宮崎。

去到間酒店，好靚呀，叫Aoshima Palmbeach Hotel棕櫚灘臨海溫泉酒店，
一個與青島海灘相連o既大型度假酒店，係單邊設計，所以每間房都望到海景。
四晚裡，呢間係最好o既酒店。在溫泉可以一邊浸，一邊望著太平洋。
個酒店豪，所以都幾貴，呢度咁偏僻，一晚收費都要$1000起，跟團就係抵在呢d。

我地整頓後，係食晚飯時候了。今晚係自助餐，個場好grand，
我食左好多魚生、天婦羅，好多美食，而每人另外有一個火:捸A美味的一餐。
食飽後，去酒店o既購物店，有好多手信賣，包裝得好靚，人唔多，所以我揸住部DV亂拍，好好玩。
我買左好多手信，由熊本、大分，到現在宮崎，我巳經差不多買完手信了。
剩餘d錢，就留番買o野俾自己好了。

又係浸溫泉時間，超低能，我攪錯左關門時間，所以只浸了一會就上番房間。
我個房好靚架。睇電視睇到好夜，有個幾攪笑o既節目，
一班男參賽者，個別都被一班美女引誘，睇o下邊個頂唔住，一伸手捉摸，就輸，係計時間。
雖然每個參賽者都知，但美女出招越來越激，多人都失手。
呢個時候，突然海浪聲很大，地面有少少震。
第二朝先知係北海道地震，九州都感受到呢。

>>October 2, 2008 at 4:02:48 PM GMT+8

2008 年 9 月 9 日 星期二 【晴】

向日本九州出發

九州第一天
上年跟縱橫遊去左和哥山、大板和京都，玩得好開心。
今年決定再跟團去日本，選擇了九州。
妹妹其實成日去日本，但係未去過九州，加上爸爸唔係行街shopping呢類人，
看風景會比較適合佢。再選跟旅行團，也是因為爸爸。
有旅遊巴士跟足全程去玩，會較為舒適，唔洗佢行得太多。
爸爸、妹妹和我，我們三個人就踏上這個九州之旅。

睇o下地圖，九州係位於日本西北部，四面環海，
由福岡縣、長崎縣、佐賀縣、大分縣、熊本縣、宮崎縣和鹿兒島縣所組成。

今次旅程o既第一站就係福岡縣(Fukuoka)，而福岡亦係九州o既經濟核心。
九州只有福岡有地下鐵，這也看出福岡比較有城市化一面，所以稱為東京的縮影。
由於港龍有機直航到福岡，所以下年2點巳經到了福岡。
福岡有好多購物o既地方，但由於明天很早要去火山，所以今天只會去一個購物點。
我地去到九州或日本一個最大型o既臨海outlet，Marinoa City Fukuoka，
個outlet好大，有百幾間名店。有個巨型Sky Wheel摩天輪可以睇風景。
跟團關係，冇時間坐摩天輪，亦冇時間行晒個商場。
本來也可以在海邊餐廳區慢慢嘆下午茶，但妹妹和我決定放棄，專心購物。
跟團就係咁，有辣有唔辣。
我睇中左一件Polo恤，減價後只需¥2457，好抵，即刻試上身，覺得好好睇，買到件咁鍾意o既衫，好開心。
不過只是第一天，我也不想洗太多錢，我就收手。阿妹都買到衫。
我地走到海邊食快餐，叫左咖喱飯、Taco，快快食完了，就要趕住上車了。
今天陽光很好，天色很美，約23至25度，幾舒服。

最後一天先會再在福岡玩，因為今天要出發到熊本縣(Kumamoto)。
熊本最出名係火山同熊本城。我們一開車就兩小時多去到熊本o既Villa Park Hotel。
呢間溫泉酒店位於阿蘇火山的山腳，這是方便明天一早上火山。

晚飯係溫泉自助餐，食物質素一般，但係由於心情好，每樣食物食少少，都巳經好飽了。
最正就係房間，我地三個人參加，佢全程都會俾兩間雙人房我地，
妹妹同爸爸一間，咁我自己全程一間房，好舒服呀。
個房好大，我相信山區o既溫泉酒店房多數都好大，諗諗o下都幾抵。

晚飯後，在酒店的商店逛逛，好多包裝好靚o既手信，一大群日本小丸子買手信，
佢地人仔細細，買得算幾豪。
聽導遊講，d日本學生好少機會出外去d名勝地方，有機會出外，佢地都鍾意買手信。
我揸住新買部Sanyo DV四圍映，見到呢班學生真係好得意，想起自己小學生o既年代。
不過我當時冇得去火山，係去彭福公園。

Shopping完，休息一會後，就去浸阿蘇山溫泉。
我好鍾意浸溫泉，全裸咁浸，令人覺得好free，而且咁夜去得幾個人，而且身材好都唔驚人望啦!
浸完溫泉後，在溫泉個counter見到個服務員幾靚，就同佢吹o下水。
去旅行的話，如果有機會同當地o既人傾計，就最容易瞭解當地人o既生活情況。
佢原來係中國人，打扮起上來同日本人一樣。
佢係由中國大連o既酒店派來日本做實習，佢巳經識講基本的日語。
由於貧窮加上冇時間，佢未去過日本其他地方，日本對於佢來說，只係一間溫泉酒店和一個火山。
她很想去東京及大板，但沒有錢也沒有時間。都很難想像去日本，只係去過一個酒店，未去過任何地方。
和她比較，我真的很幸福。在此祝福她，希望她將來能達成去日本其他地方的心願。

實在唔想咁早訓，我冇叫佢地，佢地相信都訓左，我自己出酒店附近d街行o下。
由於山區，好靜，只找到一間便利店。
除左平時d日用品，間便利店原來都連住一間快餐店，有咖喱食同好多炸物賣。
不過我買左包花生就走，實在唔肚餓，只想逛逛。今晚o既電視搵唔到遊戲節目睇。

>>October 2, 2008 at 4:01:24 PM GMT+8

2008 年 9 月 8 日 星期一 【晴】

奧運雖然巳完結多天,
但係我都係最近先睇番兩場中國女排,
一場對巴西要爭入決賽, 一個字, 就係輸,
另一場係對古巴爭拿銅牌, 一個字, 就係贏,
比賽係唔係得輸贏,
當然唔係,
但係同胞都好現實,
隨了劉翔退出俾人"�,
中國女排都俾人"�......
朋友給我的影帶,
讓我清楚睇番,
其實輸俾巴西係關鍵第一局,
幾乎得第一局而變為失去第一局,
跟住"謝晒"
變左第二隊波, 心理質素輸晒

對古巴o個場,
得第一局, 增加了信心, 心理質素很好,
和上一場成對比,
打出水準, 贏古巴一d都唔簡單,
取得銅牌, 看著她們的笑臉和眼淚,
很開心、很安慰,
中國女排上了寶貴一課。

有一種叫奧運後遺症,
就係奧運時每天帶來的刺激現在都再冇,
令人感到悶悶,
冇晒心機,
越投入奧運, 病情越嚴重,
有d越快樂, 越墮落feel,
對我來說, 有一兩天有這樣感覺,
因為治療方式係叫d人出多d街, 同朋友食飯和社交,
就會康復,
而我剛剛入camp,
之後又出了trip,
所以即刻康復......

奧運其實可以帶來很多反醒,
我想起開幕時咁多人同心做一件事,
同心做一個動作,
場面震撼人心,
有些畫面超美感,
在找心目中,
就等如一班人, 同心移開一座山一樣,
聖經話如果我們有信心, 就是叫山挪開, 山也會挪開,
呢班人就活生生移開一座山, 勁,
所以基督徒群體如果同心, 真係可以影響世界,
所羅門團友如果同心, 也會有力量散發出來, 影響他人, 互相造就。

運動員花4年或以上時間為了得金牌,
我在想如果我花4年時間, 為了得一個由上帝給我的金牌,
我會點做,
4年時間很快,
現在有初步計劃,
希望4年後我可以得到呢面金牌啦!

也在此多謝祖國為我帶來一個美好的奧運回憶!!!
--------------------------------------------------

明天向日本九洲出發,
之後回來和大家慶祝中秋,
fun fun fun!!!

>>September 9, 2008 at 9:47:54 AM GMT+8

2008 年 8 月 24 日 星期日 【晴】

上星期三、四奧運時間, 要出中國trip真係麻煩,
過關守身好嚴緊呢......

o係廠工作熱到飛起,
每做完一樣o野, 我就走番入實驗室涼冷氣,
我同事話底褲都濕埋,
其實打風前天氣變得特別熱,
都係常見,
辛苦完兩天,
個風給我一天假休息, 剛好,
呢一日假期好重要, 因為接著星期六、日入三神camp,
本以為打風有機會個camp改期或者改為day camp,
但係個風咁勁,
連d雨都帶走埋,
天氣竟然回復晴天,
大家只有出發.

三神camp 一切如常,
但係晚上完全訓唔到,
望住隻錶望到清晨六點(都係唔好講清晨, 因為天文台長有唔同o既定義)
所以星期日都好辛苦,
跟住就病左勒,
今天都是帶病番工,
鼻水不斷流出, 好辛苦.....

>>August 25, 2008 at 9:47:22 AM GMT+8