2006 年 7 月 20 日 星期四 【晴】

今日 MeeLing 有野做要放假，我就將星期日同今日o既 schedule 調一調，做左 CSA 先。好在檸檬放假，如果唔係佢又要我著條樣衰到爆o既歡樂姐姐圍裙。o個條死人野，紅色底黃色低能圖案，襯套 crew 衫真係一絕。

一路o係 lobby 近門口同 d 客人打招呼，一路同 Bo Bo 傾計，佢突然同我講：「你第時會管廚房定管出面架？如果你管廚房一定好好....因為我覺得你好容易相處，同廚房 d crew 又好玩得埋」我第一次聽到人講 "我好容易相處"，不過我會盡力做個咁o既人。

今日第二次 break 時 crew room 勁多人，Ivan (痴漢) 同 Mor 仔又撩人鋤 2，我未應承同佢地玩，鄧民儀入緊黎，大家話佢會爭住玩，我開頭以為佢地講笑，因為民儀係一個阿婆黎架。點知民儀一見到佢地玩真係即刻發晒癲咁話要玩-_-，所以我最後都無玩 。好彩無玩，原來公司唔比架。

死人 Ivan 成日打我，次次經過都攪我頂帽或者打我個頭，點解我做經理做到地位咁低微架？我要降佢職，唔準做 crew，做樓梯扶手啦。死人朱寶見到我著左服務區制服：「出去接客呀？」

今日唔知點解特別攰。

食飯時睇左少少神鵰俠侶，楊過：「我又無得罪你地，又無害過你地，點解唔比我同姑姑一齊？」我又無得罪你地，又無害過你地，點解要話我份工無出息？

今日有時做下 lobby 有時做下 CSA，我見民儀換垃圾桶個袋，我諗住幫手，不過佢話唔洗。肥霖經理見到就叫我埋去：「倒垃圾你叫佢地得架喇，唔洗你做架，你淨係睇住個 lobby 就得」哈哈，無所謂啦，我要比大家知道我係做得野o既，唔係淨係識讀書，更加唔係人地講o既花瓶！

>>August 3, 2006 at 5:28:41 AM GMT+8

2006 年 7 月 19 日 星期三 【晴】

我五點十打比 MeeLing 叫佢起身，佢唔知點解又訓返，九點幾先返到黎，遅多過兩個鐘。 Ady 當然好慶，MeeLing 又驚比 Ady 鬧，又o係度自責....我終於學識o係人地做錯野時講 d 有建設性o既野。「過左o既就算喇，你由聽日起日日準時返工，大家就會忘記你之前遲到」不過睇佢之後都係咁架喇，佢對份工都無 committment。

佢灰到話：「我唔做喇，你以後自己學啦。呢份工我做唔做都罷....」我聽到佢咁講都幾唔開心，如果唔係要 train 我，佢根本唔洗返咁早。不過我又唔信佢真係會唔做，上次檸檬講得o岩：「人有時係會有 d 情緒」

不過隔左一陣見到上次問皇室堡借返黎o個個 trainer 黎左，MeeLing 話黎代佢，我都唔信，明明見佢 train 緊個收銀。我本來做緊 Muffin 位，後來 MeeLing 話：「喂，你一陣做雞位」la_la：「點解呀？」MeeLing ：「Candy (皇室堡 trainer )叫架，佢搵緊你」la_la：「下？？你講真架？？」我好傷心 -_-，不過都未係好信，仍存有少少希望。我去同 Candy 打招呼：「Hello，你返黎教我呀？」Candy：「梗係唔係啦，下星期一 all star team 比賽，我帶我地 d 人睇下 d 位。」la_la：「余美鈴！玩我？！」

講返朝早，學做 hot cake，我前日已經備晒課，所有爐溫、時間、標準都記晒，所以 MeeLing 都唔洗點講。由殺人鯨教我整，其實真係好易，話咁快就學完，有兩個阿姐經過都大讚：「嘩，好靚！」其實個個人都可以煎得咁靚，不過有人讚都做得開心 d，定係佢地唔係讚 d hot cake，係讚我呢？XD

MeeLing 話佢地只係氹下我，話我咁易信人。我話咁樣 supportive，學得開心 d：「係得你唔識欣賞我o者，上次 Candy 都讚我聰明~」MeeLing：「我覺得你自信心爆鵬，唔需要我讚」

殺人鯨今日向我示威，佢話自己人工好高，雖然係時薪，不過返足鐘高人工過經理，佢想話比我知佢地位重要，我明。MeeLing 話佢對其他人好惡，不過 so far 佢對住我都係客客氣氣，我怒整錯野佢都按捺住怒火教我，相信係因為佢未摸清我個底。

今日 counter 好忙，無人得閒加冰，歡姐走入黎見我好無聊咁行行企企，同 MeeLing 講：「可唔可以借個女 (指我 XD) 比我呀，出面一粒冰都無」咁我就自己去雪櫃搵冰鏟冰筒，好似好好玩咁。後來肥霖經理大叫：「有無人加冰呀？」歡姐：「有呀，o個個大使加緊」大家好奇怪，今日「青少年大使」有活動，所以唔o係度。歡姐補充：「o個個女仔呀」肥霖：「o個個經理黎架，唔係大使黎架...你死喇，佢第時報仇呀」

阿庭o係廚房拖地，話自己好鍾意拖地，我話：「咁拖一百次丫」。d 阿姐又話：「第時做左經理日日叫你拖呀，你自己話鍾意o既...」

其實現階段我唔鍾意佢地成日當我係一個經理，(雖然我係 XD)，我真係虛心向佢地學習，而且我又無諗過自己o既身份有咩咁特別。佢地心目中我係一個大學生，應該學野快高作能力又高，其實都好大壓力。所以我每次學新野都預習左先，佢地以為我聰明，其實係我勤力o者。好驚下星期出 counter！聽日要出 lobby 做阿四，星期日就出 lobby 做 CSA。自從做熟左，我好鍾意留o係廚房，好開心~ 阿 Yao 好好人，朱寶又好好玩。

死人余美鈴，開口埋口就話：「遲 d 皇室堡個 trainer 會......」「我都唔做咯....」「你自己同佢講學左乜野...」

MeeLing 今日做左樣野，令我百思不得其解。我獨自做緊雞位，佢走埋黎話：「阿明仔話想認識你呀...」
la_la：「好呀，靚唔靚仔架，唔靚仔我無興趣個喎...」佢帶左我去 back sink，同空氣講：「佢就係 Angela 喇 .... blah blah blah」-_- 仲叮囑我：「你唔好搵道士收左佢喎」講完就哈哈哈咁走左去。低 b -_-，佢今日自從呃到我之後就好似啪左丸咁...

我發現左我地其中一個 CSA Candy 都好鍾意豬仔架，佢又好開心有人同佢一樣咁鍾意豬仔。我唔見左 7-11 換返黎o個隻 piglet 呀，唔開心。正衰仔，走都唔講聲，我嬲你呀！唔鍾意你喇！

>>July 28, 2006 at 2:17:32 AM GMT+8

2006 年 7 月 18 日 星期二 【晴】

玩左大半日踩地雷，中毒太深。

同家姐去書展，我買左三本書，join 左一個會。其中一本叫做《假如我們原諒上帝 - 我沒有被遺棄》，睇左少少覺得好有意思，就買左。另外兩本係無聊書，講出黎都比人笑，所以唔講喇。

>>July 28, 2006 at 2:06:36 AM GMT+8

2006 年 7 月 17 日 星期一 【晴】

原來返七點 係唔洗搭的士架。我今朝見到周圍都係車，以為自己遲左，睇下錶，無事；過多陣，周街都係人，都係唔對路，以為隻錶慢左，睇埋電話，無事；再過多陣，都係唔放心，裝下其他人隻錶，都無事。終於放心....因為到公司，未開門。

MeeLing 尋日比左 locker 鎖匙我，所以我今日輕飄飄咁返工。今日戴 con，敏儀(我要開始記人名喇)話我戴 con 睇落細個 d。大人就唔會覺得我似讀緊中學，d 小妹妹就唔識睇樣判斷人地年齡。

MeeLing 返七點都日日遲，下星期返六點都唔知佢點算。我星期四起要 morning call 佢。佢今日要做魚柳位，話我係自由身，自己決定鍾意做咩位，不過最後都叫我做 grill 位。好呀！我極驚呢個位，我要練習。有 Yao Yao (又稱姚明) 同群英睇住及支援。一埋位我完全唔記得晒點做 -_-，阿 Yao 係一個好好o既人，我做錯野佢一句都無話過我，好有耐性咁教我同幫我執手尾。好多人都教過我鏟包，不過係佢教完我先成功。佢整包o個時又係好型....o個個群英係一個阿婆，淨係識話我，成日 ge ge gut gut 又唔講 d 有建設性o既野。我真係好努力學架，我成功獨自完成一底 六個 big mac，九個孖芝。我覺得呢兩樣係 grill 位最難，因為多，d 包特別易鏟爛。我同 trainer 講：「我頭先做左六個無敵 big mac 呀」

我仲偷步跟阿 Yao 學左板燒雞，咁之後可以輕鬆 d。有時阿 Yao 行開，就會由朱寶照顧我，佢成日寸我同打擊我，例如我幫 big mac dressing，佢就 challenge 我 d 生菜落唔夠，阿 Yao 都話我o岩架，死朱寶就用手掃散 d 菜死都話我落唔夠。-_- 低 b 仔！我 break 完見佢去左炒薯條：「噫？比人放逐去薯條位呀？哈哈哈....」

Ivan 仲衰，我放 break 前去斟橙汁，佢企 counter，突然o係我後面：「喂，死八婆」
我一臉茫然：「你話我呀？」我都無得罪佢 -_-
Ivan：「梗係話你啦」
我：「你咁......樣同我講野？」
Ivan：「有排你受呀....」
我：「呢句應該係我同你講...」

之後 Ivan break，要我整特製 big mac，多醬，走瓜走菜，兩塊芝士，妖，麻 q 煩，收你錢丫拿。牛肉落鹽前，我話：「落多 d 鹽咸死你」，點知真係重手左，哈哈哈，佢遭天譴。由於佢一直睇住製作過程，佢好不滿，以為我真係特登。好彩阿 yao 幫我澄清：「佢一貫作風黎架」我真係唔識控制個鹽罐 XD

Ivan 正衰仔，趁我坐低做 MDP，行過就打我個頭。佢有次問：「你o係度 train 定係o係度做架？」佢知道我o係度做就話要討好我，不過佢都係照舊唔將我放在眼內。

HR 打電話黎話遲 d 有 OJE 黎我地舖，希望佢蠢 d，等大家唔好發現我其實好不滯

又一個海嘯，巴士又撞車跌 d 人出黎，人生真係好化學，要結束，真係快到你估唔到。今日睇巴士撞車o個段新聞真係好心酸....最可怕是 愛需要及時 只差一秒 心聲都已變歷史

>>July 19, 2006 at 4:56:50 AM GMT+8

2006 年 7 月 16 日 星期日 【晴】

原來返七點都要搭的士架，遇到個女司機，佢叫我下次見到佢上返佢車喎。佢好友善，不過佢問我：「前少少轉彎o個度落好唔好呀？唔洗我兜個大圈。」我唔知佢講邊度，不過我都話無問題。點知佢o係富豪酒店後面放低我 -_-，要過兩條馬路，不過佢收少兩蚊。算啦，反正早左咁多，我六點半已經返到去。

尋晚成晚都訓唔著，驚唔知醒，不過我將來成日都會有 early shift，我唔可以再靠人地 morning call。聽日開始返 7-5，早返工早放工，多 d 時間用。Cher，原來好型o個個 Jackie 係其中一個 CSA，Candy o既男朋友，不過有個咁靚仔o既員工o係度，學野都開心 d 啦。Candy 唔知係咪驚我謀住 Jackie，食早餐時問我有無男朋友。

今日學左早餐炒蛋，好好玩呀！又悠閒喎。之後學做 豬柳/煙肉 蛋漢堡，蒸蛋都好好玩，不過我成日烘完 muffin 都鏟唔返出黎。我一開始成為日都唔記得除藍色手套，MeeLing 唔知係咪比我激親，丟低一句：「你唔洗做 SOC 喇」就行開左。佢想話我唔會 pass。

咁我就好努力練習，直到離開岡位前，我覺得自己已經係 muffin master，哈哈哈。嘩，恐怖死人，打左一隻有兩個蛋黃o既蛋，我就大呼小叫，我覺得好核突。我知係好平常，不過我就係好驚o個隻蛋，MeeLing 覺得我咁大反應好好笑。

食第二餐，識左個新 crew，Zoe，佢聽到我話我讀何東出身，就問我而家中幾，哈哈哈 XD 好耐都無人覺得我睇落後生過實際年齡，今個星期真係過得好開心。

自修兩小時 MDP，其實個經理房好似廁格咁細，成村人要用經理房，所以我做 MDP 係好悽涼咁坐o係路邊做。溫溫溫，期間 Victor 經過我隔離，Benny 經理問佢：「你呢對咩鞋黎架？」我以為佢著左 d 犯規鞋，咁我好奇望一眼，笑死我，佢o個對邊係鞋黎架？準確 d 講係一堆物料，一堆本身係鞋o既物料。好好笑。

出 counter 搵 MeeLing 同我做 SOC，見到黃美華同上次幫我揸機o既人，兌現左我承諾o既一餐。
做呢幾日學o既野o既 SOC，順利 PASS 晒，淺得很。

>>July 19, 2006 at 4:53:10 AM GMT+8

2006 年 7 月 15 日 星期六 【晴】

聽日開始返 7-5，早返工早放工，多 d 時間用。

車，阿 Tim 唔肯黎探我。佢o個日打比我試探我會唔會聽佢電話，我做緊野聽唔到，佢留左 d 低 b message 比我：「呀你真係唔聽我電話個喎。」

>>July 19, 2006 at 4:50:32 AM GMT+8

2006 年 7 月 14 日 星期五 【晴】

Trainer 又遲到，檸檬叫我問 Apple 經理比我做咩，佢叫我學漢堡位，又稱 grill bun jer，(jer 其實係 dressing)。好難學、多野記又好忙o既 station，好驚個煎爐，勁騰雞！做 dressing 又成日落錯野，la_la 你好唔掂呀！

附近有阿 Yao 睇住我，好幫得手，非常多謝佢幫手。佢係罕有地成日主動同我傾偈o既 crew，好人到不得了。唔知o個日叫 Victor 唔好話我o個個係咪佢呢。佢地四個一堆o既同學仔都對我十分友善。

成日對住班 crew，聽左好多粗口，我自己都多左講 d 粗俗o既字眼，唔得！要保持 well mannered o既型象。

今日自修期間 Tom Tong 同 Barry 黎左，(OC)，Barry 話我唔同左樣，因為我 interview 時戴 con。阿 Tom 之前又話：「乜你咁得意o既？點解有時戴眼鏡有時唔戴o既？你個樣成日都唔同，我認唔到你，不過我見你跟住 MeeLing 所以我估你係 Angela」即係話就算有個男人跟住 MeeLing 佢都會當係我？！-_- 我個樣已經失去代表性，世界上從此無人再記得起我o既容貌，無人會再諗起我個樣。

阿 Tom 同 Barry 睇到我本 pocket guide 笑我，Tom：「犀利喎，你返左一星期工本野已經攪成咁拿？唔知一年後會變成點呢？(佢拎本新束束o既出黎對比下，應該係佢自己o既)，我送過本比你啦，呢本唔比你住，我遲 d 搵下先，你要用包書膠包住，或者造個盒入住佢...」Barry 揭下我本野：「寫左好多 notes 個喎，咁咪要抄過晒囉」-_- 可惡，我試圖狡辯令佢地唔好覺得我唔整潔：「我袋住做野丫嘛，我成日溫先會咁殘咋...」你兩個好野，我記住你地咁對我。

其實我唔嬲 Victor，不過唔知佢係咪介懷前日o既事，從未同我講過一句野。夜晚廚房都幾得閒，我要求練習 grill bun jer 位，不過 caller 好耐都唔 call 一次，一 call 就有個型到不得了o既男 trainer，Jackie 好迅速咁整晒 d 野。佢快得好誇張，caller 講野o既聲音未到我耳仔佢已經做好一底包。嘩，佢型到爆！好快手！唔係快，係好快！(必要時加個助語詞都得)，又靚仔喎，哈哈哈，同佢企同一個 station 實在令人心曠神怡 XD

Jackie cool 到不得了，雖然同一個 station，佢又係唔同我講野o既，不過我請纓話我做 dressing，但又唔記得落咩，企左o係度諗，佢就會突然開口：「生菜」，後來我同 MeeLing 講，我想自已做下，佢同 Jackie 講唔好幫我手，但佢地兩個會睇住我，不過可能我太慢，結果佢地都伸出援手。

實在好得閒，同 d 同事聯誼下，Daisy 問我幾多歲，我答廿二佢又話唔似，佢估我十八九左右，跟住我又好浮誇咁開心左好耐。我地公司果然係 "永遠年青" o既品牌！經理話 turnover 係我地成日要面對o既問題，所以經理們要做人員挽留o既工作，令佢地返工返得開心。我地規定每個鐘最少要消毒洗手一次，要簽名話自己洗左手，我見 Wendy 自動去洗手，我好低能咁讚佢 "真係乖"。XD

>>July 19, 2006 at 4:54:09 AM GMT+8

2006 年 7 月 13 日 星期四 【晴】

今日又返 11-9，trainer 有事一點先後返，檸檬叫我做住魚柳等佢。太簡單！鯨姐做 caller，好好人。整包我已經無問題，不過補貨都未知道晒 d 位，
o係附近o既雞位 o既 Hellen Chu 就指人幫我喇。
廚房 d 男仔唔知點解個個都一樣樣，而且個個把聲都一樣。counter d 女仔又係咁。

檸檬玩野，叫 MeiLing 教我執士多同兩個雪房，個士多亂到癲。搬左一大輪，d 野勁重，我都搬唔郁，MeiLing 咁細粒竟然平時要一個人執

雖然做左兩個幾鐘苦力，不過我地其餘時間勁 hea，勁放肆！

我帶左個大橙同 MeiLing 一齊食，我搣架，我都對佢好架。佢話我學野好快呀，哈哈哈。我問係快少少定快多多，佢話快多多，yo！好彩我醒o者。我話比佢知因為我每次學一個 station 之前都睇定 manual，又會溫習先咁快。

經理房無位，去 crew room 做 MDP，(檸檬唔比架，佢話多人，唔理喇)，係一本比我每日自修最少兩個鐘o既野，四個男仔 crew 撩我講野，包括尋日好幫我o個位，其中一個：「經理仔，鋤 2 丫」-_-
la_la：「唔喇，而家做緊野呀」
「佢一陣輸左爭我地錢就有把柄比我地揸住，哈哈哈」
la_la：「下？鋤 2 我唔會輸個喎...XD」勁囂張，講下o者。講左呢句死都唔玩呀。

>>July 19, 2006 at 4:45:03 AM GMT+8

2006 年 7 月 12 日 星期三 【晴】

今日返 11-9，起錯身，o係返九點o既時間起左身換埋衫，唔怪得咁眼訓啦.....而家去訓返先。隻手痛到爆，用曼秀雷敦凍感鎮痛膏，ok咁喎。
(遲左一日補寫我乜都唔記得晒)
以薯條為今日揭幕，同本身炒緊o個個男 crew 傾下計，佢問我幾時出 counter 做，佢括：「做廚房好呀，做 counter 比人睇蝕晒，隻手比 d 客掂到 "鞋" 晒，遇著重 d 男客人可能會摸你隻手....」傻的，不過又係好人黎o既。

重溫魚柳包，做魚柳包位 SOC， (唔記得叫甚麼鑑定？每學完一樣野，trainer 同我做個鑑定，包括問問題同實習)，如果我 pass 就唔洗花時間再學，我現當然無問題啦。

做左一陣 "雞仔雞翼位"，即係雞翼同麥樂雞，好緊張，因為無 caller 叫我做，要自己睇住人流決定做幾多。當時o既 caller 係 Mor 仔，好人到不得了。

學做 "雞位"，麥香雞、脆雞飯同雞腿包。我覺得烘包好難，個機又咁o岩有 d 問題，好痴底又烘到 d 包燶鬼晒。我個 trainer 行開左一陣，Mor 仔都係 trainer，佢睇住我先，不過佢好快就收工，咁又有另一個男 crew 睇住我幫下我咁啦。好抱歉，我認人真係好差，不過我會記得佢好幫我，以後但凡似佢把聲同對眼o既男 crew 我都加以尊重。(因為戴住口罩，個個 男子 crew 都一樣樣 -_-)

後來因為唔夠人，轉左 McCafe Victor 頂住 caller 位先。caller 叫親包o個個好人crew 都睇住我，有時落手落腳幫我，佢自己本身已經要睇住一個 station，好多謝佢。不過個機真係唔生性，係咁爛包，佢唔得閒，caller 叫六個我出得四個，再叫四個我又比得三個，我自己都覺得好唔好意思，咁但係唔關我事個喎，個機有問題，佢地整都爛啦。Victor d 態度唔係差，不過出親野都比佢話，我好唔開心囉，人地 trainer 整都爛，我學左十分鐘倒，我係出唔切架喇。

明明話我睇雞位家嘛，魚柳o個個又唔知去左邊，咁 caller 叫魚柳，我識整又無人，我梗係自己去啦。我o岩o岩埋魚柳個 station，冷不提防無醬，問人o係邊度攞，o個條仔又求其指一指，我向o個個方向行再問第二個，佢又係咁，好彩佢企o係雪櫃前面。入到雪櫃，咁鬼凍，乜都 入晒箱，搵唔到出返黎再問：「可唔可以帶我去攞呀？」o係條仔真係摟打，d 死人態度：「咪呢度囉！」

只係兩分鐘左右，出到黎 d 魚柳包 d 蒸氣已經走晒，個包硬晒，又比 caller 話，佢都開始有火：「點解你整 d 包硬o既」跟住佢自己蒸過一個。

我本身都燥燥地，佢唔怪得晒我個喎。o個個男 crew 即刻走出黎同 victor 講：「唔好咁啦唔好咁啦，佢o岩o岩做架咋」不過佢已經惹怒左我.......其實我又唔係嬲，不過好唔開心，我又唔係對自己失望，不過覺得錯不在我。

妖，忍唔住喊，戴晒口罩我諗無人知o既，好快就無野，得返少少不忿。後來 trainer 返到黎，我話：「我頭先比人小呀」，(佢地文化中指比人話兩句) ，講左發生經過，佢問邊個話我，我唔肯講，因為我明白 caller o既責任，而且我唔想佢自責，因為佢有責任全程親自睇住我。

佢就好嬲咁衝出去問邊個話我，其實佢本身都估到係 caller，佢走去搵 caller 講野，好激動，講晒粗口鬧，(不過本身已經乜都講粗口)，最驚係佢入黎同我講：「Angela 我走喇」咁就拉咭走左。佢本應三個月之內日日同我一樣時間架，我知佢錫我，不過我驚佢咁走左會比檸檬炳。

後來過左一個鐘佢返黎搵我等我放工，佢仲同 caller 道歉。佢原來係返黎睇我有無事。佢話佢好耐都無試過咁樣走左去，我：「我都無乜野，你咁激動做乜o者？」佢笑下：「我唔鍾意佢話你囉...」MeeLing 真係對我好好。不過佢仲細，實在太衝動。

>>July 19, 2006 at 4:47:10 AM GMT+8

2006 年 7 月 11 日 星期二 【晴】

又係天未光就醒，訓極都訓唔返，但夠鐘又起到身。

我今日學薯餅薯條，好易學，不過好忙，一個人睇住出面多唔多客，自己決定炸幾多，夠鐘又要 shake，又要起薯條，又要入盒 -_-，好辛苦。不過我開心。

Trainer 教教下我做薯條位比人捉左去打籃球，公司比賽，由第二間舖調個 trainer 過黎教我薯條位。佢比較長氣，我覺得我個 trainer 教得好 d。不過佢讚我學得快，好聰明，哈哈哈哈。呀，Mee Ling 教緊我o個時，OC 阿 Tom 黎左，親手炒左一個中薯比我睇，我好型呀，由 OC 教我炒薯條。

雖然做得開心，不過右手手腕好痛，d 野對我黎講好重，朝早炸薯餅用個鉗已經抽抽地筋，個鉗好用力先夾到野。下晝 d 薯條又好重....我隻右手而家揸筆都痛...無晒力。我要快 d 買支止痛膏，唔怪得一星期兩日假，其中一日係比我去做物理治療，或者按摩。

加鹽又要搬盒鬼死咁重o既鹽，好彩都有 d 男仔 crew 好 gentleman o既，有幾次搬野都有人主動幫我手。不過我自己入大雪房搬一箱箱o個 d 薯條就慘喇，無人知，所以無人幫。箱薯條重都不在話下，入到大雪房個門會自動關上，我好驚道門會困住我，裡面又凍又黑，好驚，所以我次次搬一箱就走返出黎。

問 Mee Ling 換過條超大o既褲，型 d 丫嘛 XD，不過唔戴 belt 就會甩褲。

放工，除左帽好辛苦先整靚返個頭，約左班 5C2 同學，大家都無乜變，好在佢地都話我無乜變o者。由於有太多人，全女班，好多個墟，嘈爆隻耳仔，同佢地傾一陣已經喉嚨痛到死。我地去左間上樓 cafe，嘈到人地門鐘都聽唔到。

見到小蕊好開心。其他人都唔熟，不過交換近況都開心。佢地話邊個結婚就全班夾份送個室內無線電話，不過全班一齊去飲。或者送百佳禮券，100 x $20，附帶條款：
廿蚊一張，買滿一百蚊可用一張，每次只可用一張
只可以正價購買
只適用於指定貨品
有效期一個月

當大家一人一句講得好高興，Carol：「唔好去得咁盡呀，你送咩比人，到你結婚人地送返咩比你」
「係你地送咩比我，過幾年我送返o個份比結婚o個個」

我成日比 Tommy 笑我而家係 "crew look，有無人知話人"姑碌" 點解？知就明...

>>July 19, 2006 at 4:25:24 AM GMT+8