2006 年 3 月 10 日 星期五 【晴】

今朝三舅父打我手提，我仲以為係鬧鐘，差 d 就收左線，都係改過第二隻聲好 d。佢從來都未打過我手提，有 d 驚訝。佢話下晝上黎。佢問：「你而家做緊咩呀？」我其實仲未起身，不過費事比怇知道嘈醒我啦。點知：「唔係呀，你讀書定做野呀......邊間呀....咩科呀？」哈哈，今時今日仲有人問。最好笑係佢聽到我話 BBA，佢話：「咁你第時咪好犀利囉？」

痴線！o係 Delifrance 食 tea，討論 6 sigma，唔明。去大家樂食 dinner，又講 6 sigma，都未明。算啦，放低先。

去星巴克，又飲咖啡，今晚唔洗訓。都好，溫書啦。今日思考左一個早上都未明 6 sigma quality 係乜野，好沮喪！想打自己一身，灰左大半日。自尋煩惱，有時我都幾好學。

明明有野想寫先 login，又唔記得
呀記得，就係鬱金香好靚，屈晒機，哈哈哈哈

突然好想攤o係地下

>>March 11, 2006 at 4:44:21 PM GMT+8

2006 年 3 月 9 日 星期四 【晴】

好無聊呀，咁大個人仲做埋 d 無聊野，鄙視自己

>>March 10, 2006 at 4:14:14 PM GMT+8

2006 年 3 月 8 日 星期三 【晴】

唉，我上 Stephen 堂都遲到呀，本來打算八點半起身，點知電話無響。覺得唔對路，點解好似訓到好晏咁o既，開電話睇下，已經十點零三分，上十點半呀....反正都遲好多，不如放 break 先入去唔好阻住個地球轉，所以我仲煮埋早餐先出門口。十一點四到，o係門口企到搭七放 break 先入去。個出前一丁米線好味呀，有米線o既口感，不過太幼喇。

今日好熱。

logistic tutorial o個兩個 year 1 groupmate 都唔係路架，(其實仲有一個同學都係)，次次都無 prepare，唔做都唔緊要，睇定 d 野一齊傾都好丫，睇都唔睇，去死啦！"去做傻仔啦"(日文)

Li & Fung 個 recruitment talk 真係去錯左，唉，又難入，又辛苦，唔o岩我。我都係努力 d 準備 pizza hut 好過。行出去拎份野留比 Connie，有人叫我喎，我望住佢一時之間唔知佢係邊個，諗左超過一秒先知原來係阿 Roy，做乜今日反應咁鬼慢？

上小巴前經過 7-11，都 feel 到八達通要增值，不過又懶，諗住博一博，可能仲有錢呢。點知一上車，(得我一個)，八達通真係無錢，仲要散銀都無，唯有死死地氣落車，個司機仲發出 "呵呵" 咁o既幸災樂禍聲 -_-。行返去街尾 7-11 增值，又行返去上車，車上已經有好多人，司機就話：「去七仔入錢呀？好近o者」-_-，如果佢再好人 d，叫我唔洗落車，咁就好啦~

你地睇住啦，我好快就會學識影相，成為一個業餘攝影人。

哎呀，好無聊呀！login 寫日記，成日睇到 forum d 無聊 topic 就入去睇，又見到 d 無恥o既野，o徒晒 d 時間。都係o個句，點解而家 d 人心理咁有問題架？

表面上訴諸權威，其實就係惡o個個就o岩，惡o個個就有道理，所以阿媽永遠幫隻癲狗。次次佢一開始發癲，阿媽就加句：「你明知佢係咁架啦，仲同佢駁」結果隻癲狗就越吠越放肆，開始咬人。蠢女人，一定要聽佢講咩？

我一直都好想講，你無資格做人阿媽，賞罰不公，是非不分，對一家每個人都用唔同o既尺，我真係好憎你，每次係咪都屈我先，成日話我唔應該將不滿放晒上面。第一，其實全家個個都係咁，不過你眼裡只見到我咁做。第二，我係唔應該相信一家人可以坦白，唔應該相信真理。不過即使你對我點唔公平，我都唔比自己忘記你多年o既付出，你養大我供書教學我一定還。我已經盡量，盡量，盡量對大家都寬容，根本有更多野值得我計較。

我真係希望自己無機會做人阿媽，我明白做到公平好難，另外，心理因素有好大影響，人好容易將自己唔好o既遭遇帶落下一代，都係唔好預我喇。萬一有個好似我咁小器咁麻煩o既女；又有一個好似我個妹咁識做戲咁識擦鞋o既女；再有一個好似我家姐咁牆頭草，咁識搞關係o既女，而我又唔識明辨是非，又唔公正，咁就只可以講句

>>March 9, 2006 at 4:46:35 PM GMT+8

2006 年 3 月 7 日 星期二 【晴】

Dr Tse：「下次都係放一個 break 好 d，你地放 break 好靜，好專心，可能訓晒啦....一返黎又要好耐先靜返，訓返都要時間啦...」

去 McDonald's 食 tea，個 staff 收左杯汽水行左好幾步先問我仲要唔要，爭在未放入垃圾桶。

去 Italian Tomato 食 buffet，又加左價！可惡，共加左 20 %。個人對我地訴諸威嚇：「你地知規矩個呵？」

我簡直係醒！

飲左 1L 威路氏....

>>March 8, 2006 at 4:11:59 PM GMT+8

2006 年 3 月 6 日 星期一 【晴】

我o既生活實在好無聊！

我唔鍾意食任何我以外o既人煮o既即食麵，包括杯麵。今朝阿媽煮出前一丁，其實無乜野，係林左好少好少，不過我已經覺得好難食，食完想嘔。即食麵本身都唔係咁好食。

今日搭地鐵時見到個人好似我一個朋友以前o既樣，諗起以前同呢個人o既少少野，覺得好好笑，就忍唔住笑。一個人o係街行自己o係度笑真係好低能！

一個人笑係低能左 d，勝在笑得真。反而面對住其他人，又唔係太想笑，笑唔出。細個成日比阿媽話我對住人唔笑，木口木面。唔開心咪唔笑囉，你又唔做 d 野令我開心，點笑得出呀？自己鍾意見到人笑就逼人笑，變態！！知唔知咩叫o即都唔笑？就係我！阿媽因為我唔笑，就o即我，我都唔笑，因為我委得好委屈。佢逼唔到我，就打我一身，你話，有咁童年，點會開心笑架？不能也，非不為也。

我鍾意o既生活方式明明無傷害到其他人，偏偏就有人唔比我揀。呢個世界對我黎講實在太複雜......

Dr Tse 真係好人，雖然唔可以張揚，不過一定要講下！我地四個想問佢借份 notes 印，因為要 print 好耐。佢得份六格 hard copy，我地想要四格，佢就即刻 print 過比我地。順手問佢借個 software，本來唔應該問佢o既，因為係第二科o既野。不過佢聽左我地o既慘況就借比我地喇。好好人！全個 department 最衰就係 Dr Tso，又唔好人，問野又唔答，教書教得差，教人用 SAS 又唔洗理下人跟唔跟到。唔識教都起碼整份 notes 比我地自己睇丫，仲話係 program leader。

>>March 7, 2006 at 11:24:11 AM GMT+8

2006 年 3 月 3 日 星期五 【晴】

八掛睇人地寫o係 forum o既故事，覺得 d 人真係好無聊，攞黎賤。攞感情黎玩，無恥！
自己一腳踏兩船，發現自己比人玩就o係度話好傷心。仲要有人同情佢先激氣，d 人係咪無帶個腦呀？

好彩，仲有 d 正義o既朋友鬧醒佢。知道自己錯大晒呀？仲繼續錯，抵鬧！善惡到頭終有報....唔洗等喇，已經有現眼報。

人每日都會面對好多誘惑，但係一個有道德o既人，應該有能力自制到。世上好多人都可能同你好夾，但係最終可以一齊o既都只係得一個。遠睇每支燭爉都咁光，拎上手睇，咪你o個支最光囉。


我簡直盡得阿媽真傳，大家都想唔洗郁就會瘦 -_-
o係三越行百佳，咁o岩 Kathrine 放工，佢話我肥左好多。
買左支口服維他命 E油，我要抗衰老。抗衰、抗老。

>>March 4, 2006 at 4:19:42 PM GMT+8

2006 年 3 月 1 日 星期三 【晴】

唔記得今日 guest lecture，遲到左五分鐘，真失禮！

今日無 tutor，十二點半放學，但係就要六點半返去 lab 做 SAP 功課 -_-
仲見到個衰人，我一見到佢就諗起佢上個 sem o係 simulation o既"作為"

有個同學仔上上下 lecture 同我講，：「嘩，你 d 頭髮好長呀，好想摸呀。」

d 野食跌左，應該因情況而決定食唔食！例如o係旺角跌左落地，o係 canteen 跌左落台，係唔應該食架！

我今日好多次因為隨地吐痰比人收監

>>March 2, 2006 at 4:52:07 PM GMT+8

2006 年 3 月 1 日 星期三 【晴】





>>March 1, 2006 at 5:27:30 PM GMT+8

2006 年 2 月 28 日 星期二 【晴】

真係唔明點解阿媽咁大個人都仲咁無聊....
佢話個保安日日都追住佢同佢講早晨係暗戀佢-_-
佢見我玩阿妹個(姓名)印章，(仲有公仔架)，佢又話要整一個

o個日發左個低能夢，同班朋友玩 war game，我超勁，射低左好多人又無中過槍。正當我沾沾自喜，教練捉左個又係無中過槍o既人，叫人放火燒死佢。o係個夢真係睇到個火人架，咁我就好驚啦，即刻叫隔離個女仔o係我背脊開一槍。低能到死！

>>March 1, 2006 at 12:12:57 PM GMT+8

2006 年 2 月 27 日 星期一 【晴】

我攪到屋企發生大爆炸-_-好彩無人有事
我放左隻熟左o既蛋人微波爐i叮，爆到個門開左，全個廚房都係，抹餐死！

>>March 1, 2006 at 12:17:33 PM GMT+8