2006 年 2 月 15 日 星期三 【晴】

以前上八點半完全無難度，而家上十點半已經叫做早堂，笑話！

返到去放低 d 野仲有時間去 library print notes，又重複左 week 4，正白痴，o徒晒 d 紙。
尋日多口問句 Carmen 飲緊乜，佢話"係花茶，聽日帶包比你試下丫"，點知我今日一見到佢佢真係帶左比我。而家就飲緊喇，係玫瑰綠茶。之前戒左以茶代水，話咁快就無左件事，我真係唔鍾意飲清水。就算杯茶好淡好淡，都係茶，都好飲過水。

Stephen 話安排多個 company visit，唔揀星期五，因為有 d 同學有堂，之後佢問我：「你星期五係咪有堂呀？」我話係，佢又問我係咪無報名。哈哈哈哈，你睇 Stephen 幾關心我~仲留意我有無得去，佢之後特登避開星期五都係為左我咋~嘿嘿嘿嘿。Stephen 真係型呀！我走堂都去呀。(都要睇係咩堂) 雖然 Stephen 真係好型，不過我估佢仲未記得我叫 Angela。算啦，如果連少少缺憾都無，我實去破壞佢個幸福家庭，做佢成日打機o既情婦。(Stephen 話佢老婆晚晚放左工就打機 ，真係幸福 -_-)

終於睇左《小王子》，有 d 野，真係小朋友先會明。
「Grown-ups never understand anything by themselves, and it is tiresome for children to be always and forever explaining things to them.」

「Grown-ups love figures.... If you were to say to the grown-ups: "I saw a beautiful house made of rosy brick, with geraniums in the windows and doves on the roof," they would not be able to get any idea of that house at all. You would have to say to them, "I saw a house that cost $20,000." Then they would exclaim: "Oh, what a pretty house that is!" 」

「To forget a friend is sad. Not every one has had a friend. And if I forget him, I may become like the grown-ups who are no longer interested in anything but figures......」

「That is the most difficult thing of all. It is much more difficult to judge oneself than to judge others. If you succeed in judging yourself rightly, then you are indeed a man of true wisdom.」

「 One runs the risk of weeping a little, if one lets himself be tamed.........」

只有大人先會用麵包衡量愛，只有大人先會覺得愛可以被取代。其實就算有，用黎取代愛o既一定唔會係愛。

>>February 16, 2006 at 4:03:21 PM GMT+8

2006 年 2 月 14 日 星期二 【晴】

今日真係好日子~何永泰立左大功，我決定劃幅地比佢，封佢為王。XD

好開心好開心好開心！有個好耐好耐無見o既朋友打電話比我~唔知如果同時有五千人一齊抽筋會係咩景況....
唔知點解我知道左之後無佢身邊其他人知道之後o既反應，可能就係因為生你者父母，知你者就係我

我想快 d 有 CD 買，加油努力！

我突然記起我前幾日(一星期內)發夢阿恆打電話比我，嘩，原來我真係先知黎架。

我前日仲發夢我有對孖仔細佬，好靚仔o既~

之前以為跑晒 10 k 已經好醒，原來無抽筋仲醒，夠我炫耀三四年....

>>February 15, 2006 at 4:15:30 PM GMT+8

2006 年 2 月 13 日 星期一 【晴】

收到一個 haagen-dazs 雪糕蛋糕，雖然唔係太鐘意收到食物，又唔太鐘意雪糕蛋糕，不過好欣賞呢個人記得我一句隨意o既說話，我話好耐無收過全個o既蛋糕。(上次係 Sou i 送o既，又係haagen-dazs )

捐血，痛

>>February 14, 2006 at 4:56:56 PM GMT+8

2006 年 2 月 11 日 星期六 【晴】

渣打馬拉松，愈跑愈強！

由於要六點三到尖沙咀，平日憤左一點半倒訓o既我隆重其事十點九就訓。好辛苦先訓得著，可惜少少聲就醒左。結果幾乎完全無訓過。Tommy 四點半出門口 send 個 SMS 比我我都未正式訓得著。四點五十八分又到我起身喇.....不過又唔係好眼訓。

五點半出門口，o係樓下買左兩個未上架o既腸仔包，食左一個已經飽，但係驚一陣無力跑，所以繼續食，食左一個半。五點十一o係天后地鐵站月台已經好多人，好多人都係著渣打馬拉松衫。去到金鐘轉荃灣線，嘩，多人到好似平時朝早八點逼地鐵咁，不過都個個係著運動衫o既。尖沙咀站內，好多人換緊鞋，拉筋，扣號碼布....

睇住地圖都唔識去行李車，好緊張，問左好多人先去到。Amy 又落錯車，幾驚佢黎唔切，咁連跑都無得跑。-_-，好彩佢最後黎得切。佢超緊張，隻手震到扣唔到號碼布。

開始左都兩三分鐘先有位慢跑到，都好，當熱身。開頭 Amy 左穿右插，我跟得好辛苦。可能由於好多人一齊跑，自己都唔敢跑跑下就停。可能我地大家都驚拖累大家，所以支力都唔敢抖。

今日我耐力都不錯，愈跑愈強，係咁跑......跑跑跑，咁就到終點喇。仲有九個字就呃 Amy 得返半個鐘先有咁快咋。如果我一個人跑可能會快少少，又或者根本第一個鐘跑唔到五公里。反正都見一定跑得晒，所以都唔爭在慢少少等埋 Amy。

我地兩個都竟然跑得晒，好開心，真係要為自己鼓掌。我今日簡直係為自己寫下光輝o既一頁。跑完記得拉返筋，對腳就完全無支力喇。抖抖先，去伊利沙伯大廈百里鮮 join Tommy佢地飲茶。間酒樓好爛！服務能度差，野食要等好耐好耐，又成日錯。o係洗手間有個婆婆：「小姐，馬拉松呀？係咪尋晚跑到而家架？我個仔都跑....」
好眼訓.....

返到屋企，好唔願沖涼，好想訓。不過唔得o既，一來出過少少汗，另外如果唔沖個超熱水涼，訓醒 d 肌肉放鬆晒就會痛。

二百七十蚊報名費，扣除 New Balance 件衫，屈臣氏 d sponser，仲可以跑西隧，多次當住警察免費亂拋垃圾，抵！最後悔無帶相機跑，我本來諗住衰人Tommy 會幫我影相家嘛.....

後話：一個女仔，o係任何情況下摺個心比人地男朋友都係好無恥架！除非你係佢阿媽。

>>February 12, 2006 at 4:21:09 PM GMT+8

2006 年 2 月 8 日 星期三 【晴】

平日做 gym o既時間今日改左用黎去 KFC 食 Lunch >_<六個 SOM 女同學，一個不知名男同學。(佢係 Brenda d 組員，不過連Brenda 都唔記得佢個名)

我地一路食一路望落溜冰場，見有個老伯著住件開胸背心，溜緊o個時用雙手打開件背心，好似雀仔，做乜呀阿伯？

早o個時我行頭，亂咁行，佢地就跟住我...行行下佢地覺得唔對路，問我做咩行呢邊。我理直氣壯：「我唔識路囉....」我唔識路其實就唔應該帶頭o既，不過佢地行得咁慢，無法啦....哈哈

我一路都唔打算認 又一城 d 路，因為 又一城 都係有限大o既o者，點行錯只要係咁向下就會到地鐵站...憑住我堅定o既信念，我到而家都唔識自己行 又一城 而唔行冤枉路。

開始睇 CRM 份功課o既題目，真係勤力！

我終於的起心肝開始追尋三年前o既 MPF

>>February 9, 2006 at 5:31:51 PM GMT+8

2006 年 2 月 7 日 星期二 【晴】

我從來都唔覺得自己明知比人利用都唔會唔高興。"乜你地唔係去印書咩？" "我唔得閒呀，你地印完借我印啦" 我當然立時將所有唔高興都放晒上面啦，(少少o者)，我記得佢見到之後仲講左句野，不過我已經拎轉面行左。算啦，反正有 Amy 陪，又得一本書，多對手都無用。

睇《魔幻王國‧獅子‧女巫‧魔衣櫥》，故事好一般，有 d 牽強，畢竟係比細路睇o既戲。話就話幫細路明白聖經，唔講真係唔覺。

>>February 8, 2006 at 3:50:09 PM GMT+8

2006 年 2 月 6 日 星期一 【晴】

上 data mining，幾乎完全係渾渾噩噩咁過，完全跟唔到。話咁快已經有功課做。

落堂同 Amy、Connie 去食 tea，一傾就...傾左好耐，唔知幾耐，墟！好多野都想，好多野都怕，好多野都不了了之，這就是人生。

返屋企，怒睇 衛斯理，又睇完一本。

>>February 7, 2006 at 3:17:32 PM GMT+8

2006 年 2 月 4 日 星期六 【晴】

『在那一瞬間，我突然感到傷心、難過，全是多餘的。

因為納爾遜不論是死於甚麼原因，死於甚麼時候，他總是會死去的，他本身的生命
是一定會有結束之日的。

但是生命本身，卻永無盡止。
生命不因個人的死亡而斷去，相反地，它不但延續著，而且不斷地演變，在進步！』_衛斯理

日子一日一日逼近，我開始覺得自己越來越神經質，完全控制唔到自己o既情緒。我真係唔想o個日咁快到，我好唔捨得..........

>>February 5, 2006 at 2:45:36 PM GMT+8

2006 年 2 月 3 日 星期五 【晴】

拎馬拉松衫，yeah！去到個攤位就收工，跑過去，支力。
好明顯太大件，做乜揀大碼喎？我要拎兩份，Tommy拎四份，勁樣衰 -_-


去意粉屋，我覺得 Pizza Hut 好食好多，而且抵好多好多！意粉屋要比三百蚊入會先得到 Pizza Hut 免費就得到o既野。

去星巴克 hei 下，越坐越多人，多人到所有人企晒o係度好似逼地鐵咁。(真架？真~架~)

>>February 4, 2006 at 5:36:55 PM GMT+8

2006 年 1 月 30 日 星期一 【晴】

今日車公誕...樂樂今日生日。所以，樂樂係車公。Hello~車公

一早起身去 Tommy 屋企拜年。北京樓飲茶，上蘇宅打牌....一陣之後 Tommy o既婆婆公公，好型o既舅父，舅母，阿姨 x 2，卓卓表妹，朗朗表弟上晒黎....朗朗嘈到拆天，銀芽！卓卓大個一定好靚女，而家有 d 似 C Poon....

拎返副大富翁比 C Poon。Hello~ Cecilia

大人打牌，我同 Tommy 睇《Iron Ladies》，好爛呀，一 d 都唔好笑！可惡
朗朗可能有過度活躍症，我認真o既，無貶意。佢食一餐飯都行開咁多次，平時又走黎走去，絕對唔係一般活躍o既小朋友。不過如果有人咁同佢阿媽講，佢實拎甩人個頭，嘈爆佢耳仔。

>>January 31, 2006 at 3:00:15 PM GMT+8