2005 年 5 月 8 日 星期日 【雨】

正常咁返十二點…係咁做係咁做o的reports…

Promotion o既Amanda親自o黎佐新翠，等佢見識o下我呢度有幾細啦！仲話要放五百隻粽！

傾掂數啦，新翠唔駛搞賣粽活動喇。今日Amanda安排佐個APM o既「扮糖人」o黎做「花仙子」派糖，點知原來呢o的時薪成百蚊o既model係唔可以o係其他場做promotion o既，結果搞佐成兩粒鐘都係傾唔掂數，得個桔。

返屋企食完飯後再出街睇佐XXX: The Next Level（港譯︰《3X之特種叛變》），無聊片一套，但幾好笑…偷坦克o個幕最正！

相嗌唔好口喎…鬧交呀！

>>May 15, 2005 at 10:46:35 PM GMT+8

2005 年 5 月 7 日 星期六 【雨】

放假，要返學…

送完您返工再返一返公司，吹佐兩咀，再返屋企換衫搭車返學。

今日又係o個個鐘意討論呀sir，講pre-management。o的人個個都當佐handover咁講，完全唔解題咁去討論，都幾搞笑…

放學返屋企食飯，極累，一食完就訓…zzz！

>>May 15, 2005 at 10:42:35 PM GMT+8

2005 年 5 月 6 日 星期五 【酷熱】

原來您琴晚肚屙屙到脫水暈佐，入佐廠，今日仲返唔到工添！咁嚴重，唔掂喎！您都係做個詳細o既body check好…

終於改返好個bulk change…一身鬆晒！冇晒問題喇！叫做o係Frank走之前最後一次合作…

去佐睇奧蘭度套Kingdom of Heaven（港譯︰《天國驕雄》），ok啦…古裝戰爭片，打打打，打餐死…

累死…

>>May 12, 2005 at 12:24:23 AM GMT+8

2005 年 5 月 5 日 星期四 【酷熱】

好熱呀！

今日唔知點解勁眼訓，係咁恰o下恰o下咁做o野…下晝樓上椰林閣有個經理過佐o黎，傾佐陣，先叫做冇咁悶。

今日leasing呀Frank打o黎話個bulk change有問題，唔係嘛？！

終於都收工喇…好累…

>>May 5, 2005 at 9:57:31 PM GMT+8

2005 年 5 月 4 日 星期三 【酷熱】

老細放孖day﹐話忙又得，話唔忙又得…

繼續做o的月頭交o既reports，做做做…

今日新光打o黎，話想退按金，真係唔知頭唔知路…同老細通o下email，最後都要打電話搵佢… @_@ 新翠呢個地方，大樓關大樓，商場還商場，中間仲要夾住層唔知似乜o既新光購物中心…嘩…真係煩…

Promotion o個邊問我o地有冇位放五百隻粽，真係唔知佢o地係咪癲佐…

晚間上堂，今次輪到一個o係太古做o既人，有印度血統，但係我估係香港大o既。教得幾好，雖然唔算好有趣，但係不時都會講o下笑引起我o地o既注意。佢叫Frenky Yue呀，條友好prof，好正。

>>May 5, 2005 at 9:54:50 PM GMT+8

2005 年 5 月 3 日 星期二 【酷熱】

放假，成日畀晒欣欣…ccc！

訓到九點幾就話要飲茶，因為之前口快快話請您媽媽飲茶，您又咁順攤同佢講而佢又應承仲要記住…冇法…焗住上。

o係天水圍飲茶都要搭車去，真係煩！間o野都好一般嗟…最記得您媽媽話︰「我o地係惡人谷o黎o既！」笑死…

之後同您去買漫畫，再返去小睡。小睡完都七點幾喇，再搭返車去觀塘，因為我今日想去新鴻基個新場APM。

個個都話一定要去，又話點好點好，又話老闆RK點讚點讚，公司內部o的廣告又吹到衡晒…一去到，嗯…都不外如是嗟…

一去到見到o的白色地磚已經黑晒，就覺得唔多得，o的冷氣仲凍到死… @_@ 好細嗟，o的所謂方便人o既特長扶梯又只可以上，冇得落。間戲院最後一場居然係十點幾… @_@ o的舖都唔係講o既開到好夜，好多十點已經閂門。

觀塘，不夜天，我估唔係咁呱…失望而回。

>>May 5, 2005 at 10:41:24 PM GMT+8

2005 年 5 月 2 日 星期一 【酷熱】

今日話晒都係紅日，大部分時間都留佐o係office裡面，可以自己靜靜做o下o野，真開心！

清佐好多paper work…呢間公司就係咁，係咁要你交o的無聊o既reports… @_@

放工返屋企，食完個飯再等您收工。您話累，想返屋企，咁我咪過您度囉！橫掂咁難得先至一齊放假嘛…ccc！

>>May 5, 2005 at 8:18:49 PM GMT+8

2005 年 5 月 1 日 星期日 【酷熱】

白痴佐，以為自己今日返工，等我仲十點起身，趕餐死返屋企換衫，再返到公司，點知弓返到去就見到我老細…頂！返錯更！！老細仲話以為我特登編自己孖day…shit！

見返到去，又做佐陣o野先走。下晝去行佐一陣商場，附近o的屋村商場呀、藍灣呀、杏花村呀…睇o下有乜橋可以抄…不過結果係冇乜收獲。

夜晚scan佐o的notes再放入部Palm度，咁就可以隨時睇，不過有o的好矇，o的字好細…點先可以整大o的？！

>>May 5, 2005 at 8:16:46 PM GMT+8

2005 年 4 月 30 日 星期六 【陰】

放假了！好很累！

又話十一點有人送個寬頻modem o黎，結果等個PCCW送貨等到差唔多兩點先o黎…冇時間裝埋先返學，叫爸爸諗諗點佈局先，因為個插位位置唔同佐。

下晝上堂，今堂講管理費，都幾有用，要畀人知道如果唔加會有咩影響，再等o的人自己鬼打鬼，到時唔加都唔得！

晚間食飯，好多人到呀！多謝大家畀面，上回得我同傻輝兩丁友食，真陰公。今日有我、傻輝、臭Kit、家姐、呀Ben、呀恩、呀Mo同佢女友，最最最重要o既，係玩失蹤成年o既Charles！唔係我係咁打畀佢，再打埋去佢屋企，都冇乜機會搵到條友出o黎呀！

去佐稻香食飯，o的o野食都ok好食啦，但係大家都係想聚一聚嗟！不過埋單一人八十八蚊，又唔係貴喎！食完飯散咁兩件，再落bar吹吹水，吹吹o下又走多三件，睇埋場波先走。

大家近況都ok喎。

之後再入天水圍陪您…

>>May 5, 2005 at 9:56:44 PM GMT+8

2005 年 4 月 29 日 星期五 【陰】

老細放假o丫！聽日到我。

今日好死累呀，返工都唔係做到好多o野﹐因為個狀態好差o丫…上晒o的rates o野喇，希望冇做錯o野啦…放工即返屋企，食完飯即訓…

就快出第一次完整o既一份糧，好期待！

----------------------------------------------------------------------------------------------------------------------------

身為男人o既我真係好賤格。過去我有過琪琪、Lawbo、Priscilla、Josephine、Amy，我可以保證每一段都係真情。但係我為佐Lawbo而離開琪琪；又奇怪地為佐Kathy而離開Priscilla；仲要為佐Polly而離開Josephine；之後再為佐您而離Amy…究竟點解會咁？冇錯，您講得o岩，我呢種男人真係非常之唔可靠。但係所有o既離開，都只係因為我貪求新鮮感？定係因為o的乜？點解我會咁賤格？真係連我自己都解釋唔到…只可以講一句︰「對唔住，以前o的女朋友們。」

一追再追，只想追趕生命裡一分一秒，原來多麼可笑…

>>April 30, 2005 at 8:58:37 AM GMT+8