2005 年 10 月 29 日 星期六 【晴】

今日去左CITY 同肥雞佢地影畢業相, HA, 今次三成都做左遲到一族.
係屋企食飽飽, 嘆埋份報紙先施施然出門口.

基本上係一D 都唔想去的, 但唔想自己成日係屋企打機, 所以都迫自己出去行下.
都見返好多舊同學(中學的)及朋友...如很久不見的陳德福等(不過都同佢無講過野咁滯)
影影影, 影到5點, 之後佢地去睇戲..三成自己就殺入觀塘另起爐灶.

本來打算配副新眼鏡的, 諗住觀塘去開果間平D, 點知星期日唔開, 真係覺得自己笨過豬西...
不太喜歡APM, 無喇喇塞左舊野係度, 搞到D 路口亂哂, 再加埋個創紀之城, 阻住地球轉咁.
反而APM 外面都幾多特別野行, 有時D UP UP DUM DUM既鋪斗反而俾到人驚喜.

食野都係鐘意茶餐廳FEEL, 今次食左間叫為食貓既東東, D 野OK, 價錢亦夠大眾化.
算唔錯...茶餐廳就有E 樣好, 價錢唔貴, 食物無咩驚喜, 但亦唔會太難食.
當然, 更重既, 就係睇間野座得舒唔舒服.
呢間, 覺得唔錯.

答車回家時繼續睇我好耐都未睇完既書...
突然覺得自己很老, 人未老, 但心已老了......

現在的我, 沒有信心...

>>October 30, 2005 at 6:07:12 PM GMT+8

2005 年 10 月 28 日 星期五 【晴】

昨日睇完戲, 返到屋企都已經好耐, 今日終於可以大覺訓, 訓到一點幾先起身.
爽.
之後...全都留係屋企打機同睇波, 講落都覺得頹廢兼無聊...
唔打機就搞到好似無哂野做咁, 自己既生活係幾時變得咁枯燥同寂寞的...
真係諗起都難過...
發覺自己真係打機打到上哂腦, 竟然可以為王DULL唔陪我打機而覺得唔開心, 仲搞到有D DEPRESSION, 真係自己都覺得自己痴痴地線.
打機唔係生活既全部, 而只係一D 消遣...點解好似搞到唔打機就無哂生活意義咁???

好似以前咁, 睇下書, 砌下模型, 畫下畫以至打電話俾自己中意既人傾兩句, 聽下佢把靚聲咁0米幾好??
但偏偏又無咁既心情...點搞??

繼續沈迷電腦遊戲...隱蔽青年.

>>October 30, 2005 at 5:42:46 PM GMT+8

2005 年 10 月 27 日 星期四 【晴】

自從仙樂飄飄歌劇一役之後, 可能因為套劇同想像中以至係同電影版既感覺爭太遠, 每朝一起身都會大播仙樂電影版既原聲碟(其實不過係叫肥雞燒俾我既老翻)
邊聽邊刷牙洗面換衫, 幾醒神, 但唔知隔離鄰舍有咩感覺呢??

自阿YEN 消失後, 日日都鬼死咁多野做, 日日都OT到8點咁滯...
不過今日竟然風平浪靜, 幾得閒.

Jamie 隻手真係可以用柔若無骨黎形容, 妳每日用牛奶洗手嫁?

食飯時同Dennis 講笑咁講: 希望d 野(工作)唔好5點幾先湧埋黎就好喇...
中!!!中!!!!真係開口中...
4, 5點左右黎料...

即時諗起一句: "宜將有日當無日, 莫待無時想有時"

6點4, 求求其其做完d 野就同Kathy 拍台走人...真係一齊衝出去, 驚死俾人捉咁, 仲要行落一層答lift, haha...
之後再跑去戲院買飛...6:30開場, 用10分鐘都唔使就行到過去, 都幾快.
好彩, 只係睇唔到少少片頭, 不過好累.

怪誕屍新娘, d 公仔幾搞笑, 套野就搞到好似音樂劇咁, 係咁唱歌...
tim布頓近排d 風格都係咁???一定載歌載舞, 不過套野極短...75分鐘都唔知有無.
剛剛睇時仲一路睇一路諗緊公司d 野, 搞到唔到集中...原來Kathy都係...aahaha

總結, 套野娛樂性唔錯, 不過唔會有太大驚喜, 都係睇完一次就唔會再睇果隻.

食完晚飯之後, Kathy就返屋企, 三成就返公司繼續做野
唔係因為勤力或者有責任心, 只係唔想星期一 一返黎就俾Manager 屌唧~~呵

不過都做左個幾鐘就收皮.
講開又講, 8點幾返去間公司已經無人, 靜英英, 真係幾恐怖的.

走時怒等巴士...ZZZZZZ

>>October 30, 2005 at 5:29:13 PM GMT+8

2005 年 10 月 26 日 星期三 【晴】

哇, 好耐都冇人留言喇, 一留就三個...yeah, 真係開心^^
其實自覺自己都可以好爛口, 但都係睇對咩人, 對d 唔鐘意聽粗口既人, 三成真係可以一句粗俗少少既說話都唔講, 但對住d 爆開粗既, 一齊粗口橫飛亦得.
但近排自制力明顯減弱, 做野做做下真係會不自覺爆粗.

Flora 姐, 好耐無見了, 真係極難得先可以聽到下妳把聲.
d 碟慢慢先還亦得, 只係擔心借左你d 漫畫咁耐, 你大佬發哂忟咋.

順手呼籲大家...
有邊個借左三成套DN ANGEL, 月黑高飛 同EVA既, 麻煩乖乖地, 自動自覺交返左黎0Y.

套聖鬥士北歐篇又唔見左最尾果隻...
仲有王DULL借左4年既烙印戰士...借左俾牛屎5年定6年既城市獵人第二期.

到底仲有幾多野係借左俾人而家又未取返既呢?
睇黎下次借野俾人時都要記錄在案, 一來自己無記性, 二來大家亦一樣咁無記性...
女神就係一個絕佳人辦, 到底三成幾時先可以係佢身上取返屬於自己既東東呢>

>>October 30, 2005 at 5:36:34 PM GMT+8

2005 年 10 月 25 日 星期二 【晴】

今日繼續發顛, 好鬼疲累, 望下個system, d 單個issue name 幾乎全部都係我個名...
但d 單又唔係我自己個播...
又要幫Dennis 走貨, 但又有好多貨有問題, 搞下搞下連自己d 野都唔記得左做.
俾自己d 客屌, 好在一聽佢個留言就知咩事, 即時做返俾佢.

個email 又有問題, 係咁彈返轉頭, 搞到爆哂粗咁滯.

做做下, 望下鐘, 又12點...
第一個反應即時係: 屌, 仆街, 又12點~~
唔係時間過得太慢或者係肚仔餓, 而係d 時間過得太快, 做唔哂d野...唉...
返工返到會想個鐘行慢d...真係悲哀.

下午同Joey 食野, 仲同久違既Flora傾左陣電話, haha, 開心.
多謝哂, 不過間野d 食物就麻麻了~~~下次去第二間!!

Joey變了, 粗言少女~~可怕...
不過都係小兒科, 唔知Joey姐姐有無意思繼續進修, 再進一步呢~~haha

返到公司繼續狂做, 不過8點就收工了, 頂唔順~~~
呵呵...又同Dennis一齊放工...(佢住藍田, 可以一齊答地鐵去到太子...)

>>October 26, 2005 at 3:11:59 PM GMT+8

2005 年 10 月 24 日 星期一 【晴】

阿Yen走左, 三成要做埋佢既野, 一個人做兩份工作, 真累.

跟返d野發覺阿Yend 野有唔少甩甩漏漏, 執得鬼死咁辛苦, 不過e d 錯誤三成之前都成日犯.
好煩, 無喇喇塞左堆唔屬於自己既工作落黎, 由於阿yen係Dennis 既assitant, 所以三成又要搞埋Dennis d 野, 算喇, 相比剛進公司時晚晚9點10點既日子, 而家都算輕鬆.

做下做下, 都做到成9點先走, 根本做唔完...
又要兼顧埋d 打雜野, 一個人, 兩隻手, 都係做得幾多得幾多...
搞下搞下已經有d豁出去既感覺, OT 反而有少少痛快既感覺~~~而且做多d野, 起碼可以證明自己對公司有貢獻.

OT 完之後, 同Dennis 一齊dinner, 一路食一路吹水, 如工作, 阿Yen 死因等.
Dennis 大我鬼死咁多, 話同佢好好傾又唔係, 不過都有d野講...
起碼兩丁友面對面都唔會有咩悶場...有時再怕同人撐台腳, 大家雙對無言, 鬼死咁唔舒服

之後再一齊答一程地鐵...

返家途中, 發覺死人Kathy又腥短訊來...明知我唔識係手提打字嫁喇...
即係明玩我唧...

累...疲...累...但返家後繼續打機.

>>October 26, 2005 at 3:02:47 PM GMT+8

2005 年 10 月 23 日 星期日 【晴】

今日係星期一, 又返工...
無係車訓過龍, 順利落到車, 有進步. 好事.

座前面既阿Yen, 一早已經收到風聲, 知道自己不被留用, 所以整天都沒精打彩, 工作也是虛應故事.
其實e d 態度真係唔多要得, 做野最緊要係有始有終, 始終人地有出糧, 收得人錢我就要交足課.
所以之前轉過唔少工, last day 我都會格外努力, 早到遲走, 自發OT.

本來以為佢會返埋聽日, 但點知原來今日已經係last day, 放工前先收到人事部通知, 無奈地同三成say good bye~~~
真係唔多中意換人換得咁密, 很煩, 又要夾過.
Haha, 自己都係做生不如做熟既人~~~
希望佢有個美好前程喇.

>>October 26, 2005 at 2:50:42 PM GMT+8

2005 年 10 月 22 日 星期六 【晴】

今天在家睇TIME, 英文放下很久了, 在公司用的, 寫的也是不倫不類的英文...
係時候修一修, 搞搞佢...
今期唔知點解咁鬼死厚, 成70幾頁, 睇幾都唔完, 睇左兩個鐘先睇得一小半...
平均要成10分鐘先睇完一頁...
而且, 睇完仲唔係明哂果隻.

無計, 英文太雞.

最怕的, 是失去了勇氣, 失去了自信, 今天的阿飛, 已不是昨日的阿飛了...
連站也站不起來.

所以, 今日我決定重新整理自己既生活~~

今日係阿飛重生既一天~~~即使再失意, 再不快樂, 也要振起精神, 積極面對~~
天性不愛強求, 合則來, 不合則去, 緣來緣去, 由它好了.

>>October 26, 2005 at 2:45:25 PM GMT+8

2005 年 10 月 21 日 星期五 【晴】

今日真的不知自己幹了什麼, 累極..

下午出了一陣街, 便去赴中學舊同學的晚餐聚會...
準時到達, 第一個見到既係同樣準時既阿民...
之後就開始無言的等待...不過今次大家遲到得唔算過份...
20分鐘內就齊人...有進步.

很久沒見Vivian, 佢第一句講既就係..
"E, 點解你會黎既..."
我不來你便會高興點嗎???

之後到火煱城打邊爐...已經對e 處地方有d 厭倦, 對任食既牛肉質素亦有d 厭倦...
不過一餐飯...由佢
整晚都提不起勁, 不同了...感覺上我和大家疏遠了不少...
悶到幾乎訓著咁滯...繼續運用自己的秘技...保持沈默, 靜靜地聆聽身邊人的對話及歡笑聲, 感覺也不錯...
邊吃邊回想這幾個月以來的一點一滴, 實在發生了不少事呢...
感覺上自己也改變了不少...

食了兩個鐘...佢地繼續下一round...
三成就當然係...回家喇..

>>October 22, 2005 at 5:31:25 PM GMT+8

2005 年 10 月 20 日 星期四 【晴】

俾Joey串我話 "咁得閒做咩唔update 下你個dairy??"
大姐, 三成最近只是在公司得閒咋, 下班後的時間分配還不是和平日一樣?
好喇...見有人請命, 就update下喇
好, 謝主隆恩喇.

呢兩日都無咩野做, 得閒到要搶其他同事d野黎做...
真係冗員的悲哀?

閒時和座前面的阿Yen 玩skypac (公司專用的messenger), 她已知道了公司不會留用她的消息...
唔, 別灰心喪氣, 希望佢會有美好既前程喇~~
前面個位極唔吉利, 黎一個死一個...如果有新同事, 真係無心機再理佢, 好似遲早都會俾人吉死咁..
希望下個唔會係我~~~

做緊d 無聊工作時, 收到至愛完美女神的秘密來電...
好...妳找我, 我便來!!!

下班後愡愡赴約...但女神竟然...遲到!!!

餐飯食左...3小時...

不明白...真的不明白...我不了解呀!!!

不如意事的確很多, 但除了積極面對外, 還是要積極面對...
開心時要笑, 不開心時更要大笑...hahahaha

不如意的事, 悔恨的回憶, 失去的東西, 一切一切不開心的東東實在太多了...
解決不了的話, 不去想, 或用阿Q精神去面對是唯一的方法~~~

回家時突然看到MISS了KATHY 的短訊...
由荃灣到上環的車程都在傾談電話中渡過~~

回到家中, 已經近12點...又1 DAY

>>October 22, 2005 at 5:44:44 PM GMT+8