2007 年 7 月 16 日 星期一 【晴】

我番左黎啦^^

掛住我嗎?

>>July 16, 2007 at 11:27:46 PM GMT+8

2007 年 6 月 21 日 星期四 【晴】

轉左新日記啦...抱歉無通知...

>>June 21, 2007 at 11:11:21 PM GMT+8

2007 年 5 月 15 日 星期二 【晴】

路線圖 :

LEVEL ONE...依路線循環十次...約三千米...


LEVEL TWO...依紅色路線由翠櫻樓跑向聯合醫院向左跑上順天停車場再跑往紫色路線...再依紫色路線循環十次...約四千九百八十米


LEVEL THREE...依路線由翠屏南邨向上跑循環路線一次...約五千五百米


LEVEL FOUR...依路線由翠屏南邨向下跑循環路線一次...約五千五百米...

>>May 17, 2007 at 10:31:58 PM GMT+8

2007 年 5 月 15 日 星期二 【晴】

好驚好驚好驚呀......

星期六應該睇唔成戲吧...

根本唔敢約妳

舊規則...大考時唔打日記...

暑假時唔打日記...

所以日記要停寫啦...

>>May 15, 2007 at 11:07:53 PM GMT+8

2007 年 5 月 15 日 星期二 【晴】

五月十五日
昨晚游水時發生既趣事...
起初我同呀旺一齊係嬉水池浸水...
與此同時有兩個女仔係嬉水池離開並行上樓梯...
再巧合地有個肥仔跑緊過黎嬉水池...
就係個肥仔跔到去果兩個女仔既前既時候...
佢線低左...趴左係果兩個女仔既面前...
此時此刻此人此景...真係笑到我同呀旺收唔到聲...
之後望真D...原來個肥仔係係泳池同我失散左既呀誠...
此刻我地更係笑不停...

發現左一樣野...就係點解自己會得個諗字而唔去做既原因...
我係一個凡事都諗得好樂觀既人...未結果前既事我都會諗到個結局好美好...
但係以前就發生過太多太多事與願遺既事...所以好多事我只係敢去諗而唔敢去做...
打呢篇日記之前我又係諗左好多好多將會發生既事...好開心...
只係一諗到結果可能同想像差距極遠又自不然感到極度灰心...唉

>>May 15, 2007 at 10:41:18 PM GMT+8

2007 年 5 月 14 日 星期一 【晴】

中一至中三你地都唔過問我既成績...

唔緊張我學校既事情...我去邊...你地唔理...

我玩通宵甚至幾日唔番屋企你地都當無一回事...

今晚你地做乜???扮關心我???轉性???

好心你地啦....咪比呢個面口我睇呀...

我雖然唔講出聲咋...但係知唔知我好唔鍾意你地架...

我想自己一個出去住都係因為唔想見到你地...

平時你地嘈之閉我都已經有得你地...煩我?OK...我唔MIND...

但係煩極都有個限度好唔好?我唔係神...我既容忍都有限度的...

我對左你地十幾年就忍左你地十幾年...

今晚先發火我唔覺得太過分囉...

我只係想比你地知道...想鬧我?OK~~鬧囉...

想趕我出去我咪出囉...但係唔該唔好過左我條底線...

>>May 14, 2007 at 11:14:49 PM GMT+8

2007 年 5 月 13 日 星期日 【晴】

SEVER癱左...預計唔到既事吧...

想約妳去睇蜘蛛俠呀><

有人問我...你大個左想做乜野呀...
當我講左我大個後想做既職業時...
所有人都係質疑咁問...你講真架...繼而大笑...
我既理想職業係獸醫...即係專醫禽獸果種...
乜呢個職業好好笑咩?好笑得過去選特首?
掃街既工作都有人肯去做我唔覺得做獸醫有咩問題囉...
定係我個樣唔似有愛心既人?係...有人問過我...你係唔係好有愛心架...
我有無愛心我唔知...但係愛心同獸醫呢種職業無直接關系吧...
獸醫見到貓貓狗狗未必會餵佢地食野...呢D叫無愛心...
但係唔代表你帶隻寵寵去比佢佢唔幫你醫囉...OK?

>>May 13, 2007 at 12:31:40 AM GMT+8

2007 年 5 月 9 日 星期三 【晴】

每日都好攰...今日特別攰...上九堂有七堂係度訓...
近兩個禮拜失眠...相信每日唔會訓超過六個鐘吧...
以前都試過失眠...真係好慘架=.=

音樂考試...本來諗住唱國歌...之後呀SIR覺得我係度玩野...
然後唔比叫我揀過第二首...其實我係好認真架...唔信我...
好無耐揀左大長今黎唱...呀SIR好似好唔据不過都係比我唱...
笑死全班...

一定要講既野...
上電腦俊木係度做功課然後佢問我做晒未...我答佢做晒仲係係屋企做...
佢聽到之後笑到收唔到聲...仲問我 : 乜你都會係屋企做功課...一路笑一路問...
其實聽到佢咁問有DD洩氣同埋佢呢句話好打擊我自信心...
雖然我平時係懶懶閒閒一副事不關己已不由心既模樣...
但係咁樣唔代表我唔著緊功課呢樣野喎...唉...印象太過深刻了...

>>May 9, 2007 at 11:50:12 PM GMT+8

2007 年 5 月 8 日 星期二 【晴】

尋日打果篇日記...妳應該無睇到掛?

雖然打左出黎...但係諗諗下都係唔想比妳知...

番到屋企即LOCK...都係擺脫唔到自己果關...

做晒功課...啦...

>>May 8, 2007 at 10:56:47 PM GMT+8

2007 年 5 月 7 日 星期一 【晴】

一篇似是回覆既日記

成個假期...都無乜ON過MSN...除左因為多野做之外...仲因為我想逃避...
我唔知點解要避...我只係知道我唔想再去面對妳...無奈自己又忍唔到...
始終都係想ON一ON...目的係想知自己既地位係乜野程度...
一上MSN就收到妳一大段既訊息...睇完妳既訊息...初初好平靜...
但係慢慢變得好複雓...當時好想即時作一個回覆...但係又好驚...
好驚講錯一句說話...好驚講錯一個字...更驚既係妳會對我作出既回答...
我唔知妳會再同我講乜野...我唔知妳所講既野對我既影響會有幾大...
只係知道...我又再一次想去逃避...只係避無可避...果日朝早...
我覺得妳應該係顯示離線等我出現吧...(別掛心...我估野通常都好差的)
妳叫我答妳...雖然係之前已經諗起左點可以回覆妳...
但係當時對住妳我真係唔知點樣講出口...緊張?驚?怯?怕?總知就係恐懼...
每次同妳MSN...都覺得會比之前陌生左...乜野原因?
時間既錯?我既錯?感情既錯?大家既錯?
仲記得第一次見面既時候嘛?果時係係201...妳陪OMOM上黎搵我...
我都唔記得係為左乜野上黎啦...為左借筆記?送朱力?種種原因...
只係記得妳企係窗口大大聲叫左聲 : 呀草...我瞄左妳地一眼就無理你地...
繼續呆企係課室之中...唔怕講埋...就果果次令我去注意妳...
對妳既第一印象係...可愛???肥肥地(錯覺?)???特別???總知妳比到個好開心既印象我...
第二次面對妳係係教員A室出面...當時我正要去留堂班留堂...
然後妳就突然出現係我面前...仲同我講妳係OMOM個朋友...
問我等唔等埋OMOM一齊走...妳既舉動攪到我有D不知所措...
所以只係留低左一句 : 我要去留堂....跟住我就走左啦
我唔知妳係唔係有D乜野誤會而講呢句說話...
只係知道我對妳又有另一種感覺...好爽直...好大膽...
真正認識妳...已經係發生係戀之谷既事啦...點認識?唔記得...
我記得既就只要同妳無所不談既片段...對住妳可以暢所欲言...
一段時間之後...對妳有第三種感覺....好健談...
只係依家一切都變得極之唔同...一個唔識既人妳可以大叫佢個名...
妳可以無啦啦去截停佢...但係對於一個識得既人...卻要避佢?
每次見到妳...或係妳身邊經過...妳都會擰轉塊面...
好似想同我講...妳唔係度...係飯堂度係咁...係車站度係咁...
可能...何時何地妳都係咁吧...難怪我有妳想避開我既感覺吧...
每次妳有咁既舉動...我都好想問番妳以前問過我既一個問題...
「乜我真係咁得人驚咩?」或者感該問...乜妳真係咁唔想見到我?
我仲有好多野想講....好多野想問...好多野想知...
只係我打到呢度...已經打唔落去啦...好失落...
對於一個只懂拖住舊事既人黎講...呢種感覺真係好痛苦...

>>May 8, 2007 at 12:09:42 AM GMT+8