2006 年 1 月 14 日 星期六 【晴】

尋晚玩電腦　大概一十點到呀哥問我拎番部機
無無聊聊入房訓　見到呀哥部ＭＰ３機放係度
其實我由九月開學以黎　除左頭果一個月之外
我都無乜邊幾日有去ＦＭ聽麥ＳＩＲ個節目
我調左去９６９　開始聽麥ＳＩＲ個ＳＨＯＷ
其中有個女仔　佢話小六時去左紐西蘭果邊
一直都鍾意小六果時個男仔　但係依家過左咁多年（我諗應該都有五六年）
唔知打唔打電話比佢好喎　話驚無啦啦打比人會嚇親人
唉　愛情既野不嬲都係最煩人架　
有人會好順利　反而有人會一波幾折
麥ＳＩＲ同佢講　佢話：打咪打囉　使乜驚姐
不過妳唔好當佢係情人咁打比佢
應該當佢係一個朋友咁打比佢
之後既我都唔係咁記得啦　只係覺得麥ＳＩＲ講得好岩
打電話比人咪打電話比人囉　朋友之開傾下電話咁使乜驚姐
不過個女仔又幾專一下　Ｎ年仲鍾意個男仔

唉　呢個世界　咁多野唔煩　
係都要揀最煩果件黎煩　偏偏人就最鍾意呢件　

尋日睇佢個日記　忽然之間有種感覺
或者我真係鍾意錯人　可能我唔應該鍾意佢啦
唉　

>>January 22, 2006 at 1:49:05 AM GMT+8

2006 年 1 月 14 日 星期六 【晴】

保密日記，請登入觀看！

>>January 15, 2006 at 12:48:07 AM GMT+8

2006 年 1 月 13 日 星期五 【晴】

回覆~~~

車~李澤具咩~

總知日記我會照打~

論壇我會照玩~

>>January 13, 2006 at 8:48:12 PM GMT+8

2006 年 1 月 11 日 星期三 【晴】

今日考既係西史同普通話

普通話考得一D都唔普通

我都好似無上年咁有水準

一向都係歷史白痴既我

今次既西史兩頁共四版紙

我留空左兩頁半　坐底扣左七十幾分

淨低廿幾分　呢廿幾分又有一半

係我比面份卷所以亂作Ｄ野上去既

扣埋得番十幾分　而呢十幾分又有幾分我唔知岩定錯

扣埋又係得幾分　唉　單位分數　你又試過未？？

前日既中史都係　第一部份既想像題我做得幾好

第二部分既創意題我都做得唔差

但係之後果Ｄ歷史吹水題同埋亂作題我就做得麻麻地啦

無解啦　鬼叫自己係歷史白痴咩　

呢幾日都忙住打爆resident evil 4個professional mode

因為上網睇左流程　發覺開場白果支電槍原來可以用到架

之後又見到爆埋ADA既話可以拎里神秘武器添

好知知道係乜野呀>.<　而且我仲見到Ｄ人話

可以將入面既武器升做無限彈果Ｄ　哇　勁正呀

仲有呢　成日放學都同肥寶佢地去圖書館度打機呀

不過呢排我變獨立左　自己打自己

係戀之谷個論壇玩緊呀　個扑傻瓜好得意呀

大家都上去支持下啦～按下面連結可以去到架啦

戀之谷

得意外星人 8

>>January 11, 2006 at 10:47:36 PM GMT+8

2006 年 1 月 10 日 星期二 【乍雨乍晴】

呀媽今日就番大陸啦　咁岩我又適逢考試

呀哥要做野　細佬要番學

我番到屋企　成間屋就好似係我既咁

上網上幾耐都無問題　無人會哦我

打機打幾耐都無問題　無人會收埋我條線

睇電視都無人會同我爭　勁好開心

不過　間屋真係好似我既咁=.=

成籮衫要我執　成籮碗要我洗

掃地拖地都係我做晒　夜晚又要去買送

又要煮飯又剩咁　食飯晚飯叫細佬洗碗又乍唔知

唉　成世人淨係識食飯同痾屎

乜都唔識做　好慘呀我

聽日考西史啦　唔溫書會唔識架

>>January 10, 2006 at 10:24:47 PM GMT+8

2006 年 1 月 8 日 星期日 【乍雨乍晴】

~~~~~~~~~~~~~~~今日真係~~好凍呀~~~~~呀~~~~~~~~~~~~~~~~~

雖然爆左N次機 但係不減我對resdent evil 4既熱情
玩緊pro mode 要拎枝電氣槍番黎呀

不過死左N咁多次先complete到一個 chapter 難過登天

好啦~~~CCC

>>January 8, 2006 at 1:06:02 PM GMT+8

2006 年 1 月 6 日 星期五 【颳風】

第一日考試　我已經括左出去啦
所以今日唔講呢個
放學之後　諗住去圖書館打機
點知肥寶比人捉住左　
我同肥權等左佢成幾個字
小李好咬住佢唔放咁
幾次見到佢行開　諗住走得人
點知佢又走番去鬥肥寶　激氣
中途見到幾十次小烏　我匿埋左
但係肥寶就見到佢　聽肥寶講
佢好似比小烏捉住左喎　死啦

Ｎ耐之後　我地終於到達圖書館
坐低各自忙左一陣　我就同肥寶隻抽ＣＳ
肥權就唔知玩乜野　到左個零鐘
我同肥寶走人先啦
　
部電腦壞Ｑ左　所以Ｄ日記打晒係磁片入面
今日諗住係圖書館ＰＯＳＴ晒Ｄ日記上去
點知部主機又無磁片機　仲部部都無添
之後從頭睇番晒自己Ｄ日記　剷左某部份日記

番到屋企　諗住溫書　但係又係係度坐
呀哥見我咁得閒　叫我去買係ＵＳＢ自己裝
我係買左呀　都裝左呀　但係上網好慢
所以我又剷左機　諗住再裝多一次
但係裝係裝到　不過就上唔到網啦
下次拎去寶達度比佢睇睇　順便叫佢裝比我睇

呀旺生日時　我地係山頂影左好多相
之後呀聰比左隻ＣＤ－Ｒ我
但係我放入電腦又睇唔到喎　所以擺左係度一直都無乜理過
頭先我係床頭見到隻野　於是擺左落ＤＶＤ度睇
睇到喎　十一月十一日
見到好多野　有我地既合照啦
有我既獨照啦　有呀旺既獨照啦
呀聰　呀超　呀標　呀俊既獨照都有
仲有當時壯觀既燈火　美麗既煙花
獨當一面既月光　而且
我地係前年中秋　留係度既印記仲係度
好開心咁係印記前影左幅相　見證呢一刻

回憶　真係好似古董咁　
越耐　越珍貴
因為過去　所以先至珍貴　
感情亦然

>>January 6, 2006 at 6:31:47 PM GMT+8

2006 年 1 月 3 日 星期二 【乍雨乍晴】

呼　一個假期咁就完左啦
話佢短　又唔係　因為大大話話都有成十幾日
但係話佢長　我又覺得Ｄ時間過得好鬼死快喎
今日就係番學既第一日啦　心情好似鹿撞咁
又想見番Ｄ同學　但係又唔想見到Ｄ老師喎
真係唔知想點　終於都係番左去
通常假期之後　我都會久好多功課
當然呢次都唔會例外　淨係做左中文既一樣功課
其他乜都無做到　小烏好似想鬧我咁　由得佢
無交佢篇文　同埋個錄音　比佢捉左去
依家唔知做唔做好呀　應該係話唔知點做好

今天就係今年既第三日　雖然零五過去
現在已經係零年　但係我覺得都係無乜變化
同零五時無分別　唯一有變既就係自己既年齡
過埋個生日又大一歲啦　又離個社會近一步
諗番自己既一生　自自然諗番起自己既家鄉

一處叫　長沙　係　汕尾　下邊既小農村
左邊係　紅草　村　右邊係　馬宮　鎮
風景雖然唔係好靚　仲好似好污糟咁
但係對我黎講　佢有住我十三年既感情
十三年裏既所有辛酸　所有開心　所有驚慌
所有安慰　所有笑容　所有淚　
我已經有兩年無番到去　雖然人係離開左果度
但係回憶依舊　即使已經有好多地方已經變左
人啦　事啦　物啦　但係回憶仲係舊模樣

細個時　好多既朋友　同佢地既好多經歷
納悶時　好多既遊戲　玩樂時大家拋緒腦後既煩惱
逛街時　好多既地方　溜連係某地所注視既趣事
亦都有親子節目或兄弟戲　紅草村同馬宮鎮就係場地

諗起呢兩處地方　同時令我諗起一種交通工具
‘三腳雞’　因為佢有三個碌既關系　所以就有呢個咁得意既名
基本上　來往呢三處地方都係坐呢種交通工具
諗番　佢真係好似香港以前果Ｄ拉車果Ｄ
只係　三腳雞　係電動既　而果Ｄ拉車係手動
不過佢地賺錢一樣咁難　載一次客只係賺到三蚊　最多五蚊
但係村仔　有架車仔已經好巴閉　講下架車仔先

佢好似以前Ｄ手拉車　只係前面本來係用黎拉既地方
加上一個摩托車既前車身　後面連接兩個碌
再係架個帳幙係上高　用黎擋風擋雨　
而放多張二合一開合椅　就成為一架可以載人既三腳雞啦
我地成家人去親紅草購物　都一定會坐呢種車
而且會將張開合椅平放　我同哥哥坐後面　因為可以伸對腳出去
如果剎車　就會成個人飛出去架啦　但係咁樣坐真係好舒服
就好似坐係岸邊　海風迎面吹黎　咁舒服
鄉村儘管落後　但係無城市既憂愁　
香港邊度有呢種交通工具？　就算你坐係的士度
吹住冷氣　你感受到自然風輕吹你塊面既感覺咩？
香港人有幾多人係真真正正坐係度　比Ｄ風吹下？

既然點都煩　點解唔靜靜去吹下風呢

>>January 6, 2006 at 6:31:02 PM GMT+8

2006 年 1 月 2 日 星期一 【微冷】

尋日二伯娘同表姐黎我屋企做客　
順便係度過夜　佢地既到訪
令我諗起以前既一切
以前我同呀哥經常去佢屋企度訓
因為二伯娘四個仔女都去晒做野
同佢地仲要親過自己呀媽
不過之後黎左香港　除左上次番左去之外
都有兩年無見佢啦　咁耐無見
大家都變得陌生左　舊時健談既人
依家變得無言　除了佢問一句
我答一句之外　我真係諗唔到仲有乜野可以講囉

成個假期都無乜掂過Ｄ功課
今日係假期最後一日　我都要發奮Ｄ　
做晒Ｄ功課　去左呀旺屋企度做
一路做一路傾　好似仲做唔到功課
無幾耐　佢呀媽番左黎
見到佢兩母子有傾有講　有講有笑　有笑有罵咁
真係似知友多過似母子　兩母子可以做到咁
天下間又有幾多家庭可以？
六點到陪呀旺去飛髮　途中撞到肥寶
原來佢又係去飛髮喎　我見都須路囉
就昆左佢一包雞蛋仔　之後肥寶飛左個好惹笑既髮型
後尾落左去喜來軒度飲珍珠奶茶
唉　講起珍珠奶茶　又令我諗起一段段甜絲絲既往事
呀旺昆肥寶既壽司　我早知會發生咁既野

食完野我地就分道揚標
番到屋企　我又繼續做我未完成既功課
蟲蟲打電話黎陪我傾偈　開心啦　佢好耐無打黎啦
傾左成粒鐘　佢就收線啦　然後我痴線啦（睇番Ｄ功課）
唉　功課　唔做啦　所以打埋日記走佬啦

成個假期都活係呆滯既世界入面
生活缺少姿彩　同我既人不謀而合
我呢種人　都係適合過呢Ｄ既生活
唔使迎合人　唔使有人介入

>>January 6, 2006 at 6:30:31 PM GMT+8

2006 年 1 月 1 日 星期日 【微冷】

今日就係爆笑coco出版既大日子啦
雖然係史來第一期　但係我並無買到
亦唔會去買　爆笑COCO其實就係super-coco既激新版
做廣告既時候都提到會有幾攪笑
但係就無左我對super-coco既果種親切感
super-coco　係由當時既super-coco同coco別冊合併既
因為當時我係第一次買黎睇　所以都無所謂既親唔親切既問題
但係佢大大話話由開刊到依家都陪左我成兩年幾有餘啦
入面既漫畫好多都係陪住我長既
好似由舊版既super-coco連載落黎既《數碼暴龍大冒險》
太一同斯路同生共死　兩人互不於棄
雖然係漫畫　但係呢種精神唔係應該學架咩？
仲有《機甲路寶》　係super-coco入面唯一一個令我有少少反感既漫畫
入面Ｄ波大無腦既機甲寶都好好笑呀
亦有當時經典既《五右衛門》　同妖怪連番惡鬥
都要保護同伴　都係一個好好既漫畫呀
當時好hit既《激鬥戰車》都有漫畫版連載
一架小小既車仔　引放出五名少年既無限鬥志
亦係因為佢　令五人既感情與俱增　
證明時間可以令感情更穩固
而攪笑漫畫《拾下拾下仔仔》　就係我做功課做到好累時
失望時　唔開心時　帶比我無比既開心因子
令我心情輕鬆左又開朗左　
除左呢Ｄ每期連載既漫外　都有一Ｄ一期過既漫畫
例如《斗零小福星》　本來一期過既漫畫
經過讀者既支持　韋越霧先生都將佢變為無期連載既漫畫
仲有《少林學園》外傳　而《少林學園》更係我買super-coco既最大原因
真係要多謝作者溫世勤先生　創作出一個咁神奇既漫畫
由super-coco第一期開始就連載到依家
一個集神奇　運動　智力　攪笑　計謀等元素於一身既漫畫
每處都有你估佢唔到既地方
而每一個過渡處更係令你可驚可喜
就好似某一期　洋蔥由大佛頂跌左落黎
就係果剎那佢既猴現左出黎
然後我係下一期我再睇　原本以為佢既實力已經逼發晒出黎
點知果剎那只係因為佢想救隻馬騮所以迴光返照
又有一次智池師叔整蠱佢地　同佢講個寶盒比人搶左
攪到成班準弟小係度大亂鬥　但最後發現個寶盒只係一盒鹽
我都以為會係Ｄ咩金銀珠寶　點知係牛屎燈籠
但係當super-coco變成爆笑coco之後
呢個漫畫就唔會再連載　而轉左去ＣＯＣＯ度
ＣＯＣＯ今年都改版　但係改唔改我都唔會睇
我淨係睇super-coco架咋嗎　
除左呢Ｄ　仲有最近推出　而我又係好鍾意睇既《魔術偵探師Ａ》
透過變身　用魔術既識破一Ｄ用魔術作案既壞人
從中亦教識左我好多唔同既魔術　
之後既魔術教堂仲會教人點變一Ｄ簡單既魔術添
不過super-coco改之後　佢亦唔會再連載
而係變成全新既單行本推出市場
咁樣有個唔好處　我唔知佢幾時出版同埋唔知賣幾錢
前排推出　但係好快結局既《無極皇者》都係我既首選
雖然集數少　但係內容豐富　好有戲劇性
仲有好多我睇住佢開始　睇住佢結束既漫畫
可能有Ｄ我已經唔記得左啦　但係super-coco出品
漫漫都係精品　仲有游戲地帶
裏面提供左好多遊戲既爆機秘技
亦幫我排除左好多既爆機障礙
而且提供既最新食玩資料詳盡　玩具都好有趣
之前都有好多讀者寄去既信同埋自己畫既話
有Ｄ真係好靚架　唔知改左版後仲會唔會有呢

唉　陪左我兩年幾　今年終於都改啦
對我黎講　我對文章比較有興趣
但係呢本super-coco既漫畫真係好正
除左《名探偵柯南》《鋼之煉金術師》
《６６６撒旦》呢幾本漫畫之外
最吸引我既就係super-coco入面既《少林學園》
而家　無得睇囉.....................................

>>January 6, 2006 at 6:29:43 PM GMT+8