2006 年 8 月 5 日 星期六 【晴】

其實有d懶唔係好想打，不過算啦，反正都入到黎喇。

八月四日
－－－－－－－－－－－－－－－－－－－－－－－－－－－－－－－－－－－－－－－－－
話說今日我應該係要去將軍澳個邊去接個d trainee既，不過有東窗事發，
所以我就唔洗去，不過大家唔好以為係一件好事，其實係一件慘事，
因為我一起身就已經上吐下瀉，仲嘔左兩次，個肚空到無得再空，
但係個肚唔空又唔得，所以空住肚咁去訓，由九點幾訓到十二點幾，
然後起身食d粥，之後又再訓過。

咁到再醒個陣已經係3點幾，咁又再食d野，然後又再訓過。

再下一次醒個陣就係7點幾，不過屋企已經無晒人，咁就先睇套戲先（重案ｘ孖根），
睇完就先沖過涼，然後去煲熱d粥，食完之後就睇高朋滿座同神鵰俠侶，
之後見又好似唔多妥，頭又再次痛痛地，所以就再食多粒頭痛藥（已經食過），
咁又走去訓覺，咁到再醒個陣已經係11點幾，不過已經康復得七七八八，
難熬既日子終完熬完了。


八月五日
－－－－－－－－－－－－－－－－－－－－－－－－－－－－－－－－－－－－－－－－－
尋日無去到，不過今日就要去喇，係西鐵到不斷打電話，不過越打就越興，
明明講好左今日架啦，但係d人一係就唔電話，一係就話唔黎，但係最興係點解唔通知返我，
做野唔係咁無理搭圾呀，大個仔架啦，e到又唔係你屋企，話黎就黎呀，
真係．．．．佢地呀！都唔知乜x野人黎架！

咁最後得5個黎左，不過都無計啦，出到黎喇，想cancel都cancel唔切啦，真衰！
由11點幾train到去3點到，咁中途我就玩個個拍走個杯既魔術俾阿諾睇，
好搞鬼，勁好笑，好笑在玩完之後會先驚訝一野，但係好快就會諗到點解會拍走到，
所以就勁好笑。之後變埋俾阿健同阿雞佢地睇，又係睇到笑晒，真係ok個喎，
我意思係個個好笑程度。

3點幾就落去旺角，食晏先，然後就去LG到扲返上次扲去整個個電話（唔係我既），
就同阿諾一齊上去既，咁已經係好耐之前扲去整，都應該有一個月，但係好神奇，
去到竟然無喎，同我講野乜膠，但係個舊膠我一早話整埋佢，
所以我就話：乜膠咁巴閉要整成個月，我都係係咁易俾d說話佢聽，
之後阿諾就走埋黎一齊出聲，咁個人就話整好會打俾我，咁阿諾就話：寄過黎得唔得架？
又話如果整唔到會唔會丟左部電話架？搞到個個人勁唔好意思，咁最後我地就唯有空手而回。

之後就去左波鞋街到睇下野，之後就搭車走人。

>>August 8, 2006 at 3:30:18 PM GMT+8

2006 年 8 月 2 日 星期三 【雨】

好總是在以前，皆因苦只會是現在。
（tony尋晚講左好多次"以前真係好架"個陣，我諗出黎。）

尋日都幾遲先起身，咁睇下電視，食埋個飯就睇埋個A計劃。
睇完之後阿諾就打俾我問我幾點出發，咁最後決定三點幾出發，
之後就準備一下，然後就出發去了。

其實想搭到去荃灣轉地鐵既，咁樣可以慳返兩蚊到，不過見63X到左，
咁我唯有唔慳啦，係車上面打俾大頭先，因為知佢做完人類普查，但係就打唔通，
咁唯有打俾OL，聽下佢近排點樣。

咁講左d乜野就唔記喇，因為都唔記得，點記！
首先去左荔枝角到睇下d衫褲鞋襪先，不過都無乜合適的東東，所以就走去觀塘。
去到就先去左麥當奴到食個包先，然後就上去再睇多次d衫褲鞋襪，今次就好好多，
不過又唔夠數扲discount，所以都係算喇。

跟住就到坑口到會合tony，上到去個檔口，見到成班人係到玩排九，
之後又聽下tony講d野擺係邊，然後就等下先，其實唔知等乜野架，
咁我地就睇下人地玩排九，但係都睇唔明佢地玩乜野，淨係見到好快有交收，
而且成交量都幾高下（幾千蚊上落，我諗一個鐘個成交量唔排除有十萬），
到去八點幾就坐車返去將軍澳，然後搭地鐵去太子轉的士去食野。

咁係車上面tony就講下e個酒店散工業既野俾我地聽，聽下聽下就就到左，
出到去見到超大雨，不過好彩架的士好近下，唔係都唔知點算。
今次去食龍蝦粥，咁去到就嗌野食，d野都幾好食個喎，個龍蝦粥都唔錯，
先三十蚊，又幾抵喎。

咁今次就聽到tony個句─我唔慳架！我憑我記憶打俾大家睇下佢講過d乜。
d人成日話節流，其實個d係蠢人既做法，聰明人係開源架，
開左源可以有好多唔同既用途，慳！慳乜鬼丫，慳幾辛苦呀！
如果真係唔夠既，就同時開兩個源，咁樣先至係聽明既做法，慳！我唔慳架！
（大概就係咁樣啦，不過有經過剪接。）

之後tony個fd就黎到，咁又再食過，真係幾飽下，咁tony仲有個fd係隔離檯既，
不過就陪自己既朋友，咁當d朋友走左之後，就坐埋黎一齊吹水，中途仲黎左個差人朋友。
一晚遇到咁多人，個差人又講下佢d野黎聽下，話其實差人無乜face，唔似以前咁好，
仲話自己一槍都未開過。咁到另一個人，讀書個喎，講law既，讀緊master degree。

咁佢就好似做關於游水既工作，即係救生員，咁就聽到原來教生員人工都幾好個喎，
係酒店泳池到做，一個月都有10400，有d仲有12000，如果我游得快d，
都要去考過拯溺章返黎先得，今晚都聽左唔少野返黎。
其實可能係我多心，不過我始終覺得tony講咁多野，唔多唔少都有想洗腦既成份係到。

11點到就搭車返去旺角到搭巴士返屋企，咁係車到就打俾莎莎，佢係友人既版主，
咁因為友人發生左少少事，咁我就打去睇下發生乜野事。
佢就講返件事既始末，咁我都係齋聽既o者，咁因為我知道已經搞掂左，
不過係傾談既過程到，佢讚我喎，估唔到無乜係友人到出聲都有人讚，
佢話我文字裡面個d暗示係好gentle，而人地個d係好過火，
估唔到我既說話藝術都有人欣賞，睇黎我唔認我口才好都唔得，嘰嘰。

>>August 17, 2006 at 6:02:55 PM GMT+8

2006 年 7 月 30 日 星期日 【晴】

智者智，愚者愚；智者可愚；愚者可智？
大智必若愚，大愚如弱智。（打下打下，無聊作出黎）

睇黎事情無咁順景，應該點樣解決呢？

能唔掂可諗唔掂，諗唔掂就唔能掂。（打下打下又作出黎）
唔好讀左粗口出黎（不過用粗口讀就好搞鬼），意思係：
可以唔掂既時候，諗唔掂都無問題；但係諗唔掂既時候，就真係唔能夠掂。

>>July 31, 2006 at 3:14:29 PM GMT+8

2006 年 7 月 28 日 星期五 【雨】

少女接受男友暴力侵犯成風
(明報) 07月 29日 星期六 01:10PM
社工團體憂慮時下少女不抗拒男友暴力侵犯的惡癖，
成長後可能變成家庭暴力事件中的受害者或施虐者。

本港近期發生連串家庭暴力命案，全港社區青少年外展社工隊發言人陳子陞，
出席電台節目訪問指出，經常留連街上的年青男女，使用暴力已尉然成風，
甚至有些女孩子接受男朋友的粗言、暴力等對待，並視之為理所當然，情況令人憂慮。

香港家庭福利會區域經理劉國華表示，在經常使用暴力家庭成長的年輕人，
五成會感染暴力習慣，對他們性格影響深遠。

e家d o靚仔o靚妹係咪傻既呢？？？

今日見到計較e兩個字，就令我醒起我想作個句關於計較既警句仲未完成，
睇黎要查下字典，睇下會唔會有d靈感乍現。

>>July 29, 2006 at 4:41:15 PM GMT+8

2006 年 7 月 27 日 星期四 【雨】

今日好唔夠訓，一早就起左身，咁因為收到阿諾個電話，話去漫畫展。
初時我都有d軟弱唔想去，不過諗諗下如果錯過左d好野咪死，話晒上年都有斬獲，
加上唔去，下次去就要俾錢入，咁不如唔洗錢去喇，所以就起左身準備起行。

萬事準備妥當之後就出發，選擇歸西再轉乘地車。
因為去到既時候751已經離我遠去，所以我只好搭610去元朗先轉乘，
咁就係輕鐵既唔知邊個站到偶遇肥佬，真巧，不過到達元朗後都分手，
因為我要去買通（全日通）。

九點鐘就到達左南昌，收到消息，阿諾岩岩塞完車就到美孚，咁等左一陣，
然後就出發去會展。咁係灣仔到買左個麥當奴早餐入去食，今次入去好順利，
無咩野問題，入後之後行逛左，不過今年d野好屑，唔去好過去，
如果要俾錢入去睇ｄ咁既野，真係有六個唔值。

今年既買野瘋狂程度應該係新低，無乜野特別野，我覺得無需要一早就去排隊囉，
排完買埋d垃圾野，真係排打機既人分分鐘仲多過排買野既人，真係．．．．

咁等阿諾買完書之後就去mega store，不過個到都無乜野岩我，我都唔睇公仔書既，
之後就去睇下地灘，都係賣下d公仔，不過就有頂軍曹帽，幾得意下。

最後都係周圍行多轉，然後就走人，係走個陣，睇到個人，佢cosplay cos到好似會展d炒散，
我同阿諾見到都笑晒，真係加多個名牌就一模一樣咁滯，之後就歸家去。

我發覺d人d理解能力真係好低下，連個"同"字既意思都唔係好明，
咁仲有唔明乜野叫姓名，真係有姓又有名，就唔係得個姓或者名，
就更加唔係暱稱，e類人真係要進修下d理解能力同中文能力。

ps：今日係漫畫展既開禮到見到阿sa、阿嬌喎，我見佢地個樣好悶，
坐到好悶，不過都總好過企到好悶既，嘰嘰。

>>July 28, 2006 at 3:31:15 PM GMT+8

2006 年 7 月 24 日 星期一 【晴】

今日打幾句殺悶思維既內文出黎俾大家一同欣賞下


情愛教徒肯定：情最可貴。智者知道：情最難能。情愛教徒中的智者，
嘆息「情最可貴但最難能」，堅持「情最難能但最可貴」。

聽到對方說「我愛你永不改變」時，人們常會感到高興，其實可能是過早高興。
對方可能不是說：「我愛你」永不改變；而是說：我愛「你永不改變」

精彩的警句人人讚賞，人人以為警句所針對的只是別人。

悲痛時觀悲痛，離悲痛。
自傷時笑自傷，殺自傷。
即觀即離，笑可殺傷。

真成功者虛懷若谷，凝斂如夜。

情變生恨，自我中心而已。

耶和華說：「除我以外，你不可有別的神。」
人說：「除我以外，你不可有別的人。」

來自情的嫉妒，因嫉妒而無情。斯即寡情。

以為自己被愛情毀滅的人，有多少個不是被無底心魔毀滅的？
以為自己被受情毀滅的人，往往只是被自以為的愛情毀滅。

找錯太太，苦死。
找錯敵人，即死。

自我中心，心無別人，自憐自苦可以上癮。

朝花夕落，笑靨幾何？逝水無聲，歲月飛梭。
不快樂白不快樂。

睇到一半之後再打多ｄ出黎。

>>July 25, 2006 at 3:43:20 PM GMT+8

2006 年 7 月 23 日 星期日 【晴】

發左請人post之後，多左好多人走黎add我，不過就好怪，好多add完之後又唔出聲，
（唔出聲！唔出聲！香港人就係咁，意見俾左出去，中央接納與否，我們不知道！
但係e個方案係要落實既！）咁佢地唔出聲就算啦，反正我唔會主動去搵佢地。

e首歌我諗無人聽過，送俾大家聽下。
歌詞我都無，如果想知，大家就俾多d耳力聽精楚。

2006 年 7 月 22 日 星期六 【晴】

今日要早起，因為安排左自己今日返教會，雖然我平時話自己好有計劃，
其實我通常都係即興多過計劃囉，不過唔理喇，都安排左先啦，
因為安排得既野，我通常都唔會俾自己做唔到。（做唔到安排黎做咩？？？）

今朝九點幾起左身就去左飲茶，好耐無飲過喇，都食左好多野，所以飽飽的咁返去教會。

返到去，d時間set得幾岩，咁見唔到自己友喎，係邊呢？再行岩入去睇下，
就睇到智揚喇，咁因為有個人（好似係阿叔黎）就擋住個門口，
咁我就唔介意行另一個門口既，廢時打斷佢咁有興致係到講野啦。
咁一出到口，回頭就見到keith，咁就一同步入，咁可能我無岩出現，行蹤比較神秘，
所以返親黎都好似總有新面孔，不過唔緊要喇，都無機會相識到架喇。

時間都差唔多喇，就一同進場，咁揀好位之後就佳定定啦。
（位唔係我揀架，係judy揀，不過揀完之後佢又唔坐，唔知佢搞乜野呢。）
keith就同我講你又知今日係報導會既？我就答佢：我唔知架，不過岩岩知道左喇。

今天就有兩位人兄上台講見證，不過來來去去都係想表達同一樣野架喇，
我都一早看穿了，不過當故事聽下都幾好既。
第一位係消防隊長（其實唔記得佢乜野post架，不過因為係ive到有個消防隊長，
咁就當住佢係先啦），講佢由賭海迷徒裡面到脫出，
咁其實睇由港台制作既賭海迷徒都得架喇，d case都係大同小異，只係想代達既野唔同o者。

咁就到第二位人兄，keith話佢開頭個五分鐘係講緊我，咁其實我又唔係咁認同囉，
我唔係話無相似既地方，只係唔係十分之相似o者，咁都講下個五分鐘大概講咩。
大概係話自己份人高傲自大，睇唔起人，覺得其他人轉數好慢，同自己唔岩級數，
唔想同佢地溝通，覺得自己好醒，應該差唔多架喇，不過佢份人就睇唔起老婆個喎，
自己揀返黎，但係又要睇唔起佢，真係．．．．．．
有智無情者白活，有情無智者亂活

咁睇完佢地講野之後就去食飯，咁因為今朝食得太多，所以唔係食左好多，不過都唔少囉。
跟住就返屋企，好眼訓，所以就訓教先，今日欣賞左殺悶思維既8分1到啦，
真係極品，佢根本就無一本書唔係極品，不過基督徒睇個陣就唔好咁激動囉。

後記：今日返到教會，有個女子過黎叫我地去camp，咁wendy,keith個d都扲左form，
咁佢就黎叫我，一開波佢就話：兄弟，我地搞左個camp，我就話：唔係我地，
咁佢就解釋佢個我地既意思，然後就話：我鼓勵你去囉。（仲有d野講既，不過唔記得左）
我就話：你鼓勵我，咁我就俾返個建議你，我建議你唔好鼓勵我去。

我今日先知原來我既形象係咁鮮明既，就係高傲自大，睇唔起人，
覺得其他人轉數好慢，同自己唔岩級數，唔想同佢地溝通，覺得自己好醒。

>>July 23, 2006 at 5:02:17 PM GMT+8

2006 年 7 月 21 日 星期五 【晴】

今日首先要記既就係尋日講緊個個廢人，佢不斷係到問長問短，
但係問既野全部都同炒散無關，咁識我既人都知我不嬲都唔鐘意打字，
我只係打得快o者，但係唔代表鐘意打，所以我就好老實咁同佢講：
如果唔係問炒散既野唔該你收聲。點知佢就做埋d細路仔野出黎，仲sd埋d無聊野過黎，
我都唔明21歲仔仲讀緊中五已經好醜架啦，個腦仲可以好似細路仔咁，
真係．．佢呀！都唔知乜x野人黎架！我地tony線唔需要e d廢人。

咁今日就去左書展，好耐都無返去會展喇，都唔係咁記得d路點行。
今日好多人去呀，佢又搞埋d排隊入既方法，搞到俾個太陽蒸左好耐先入到去，
（我都估唔到咁多人去，大家都知香港人無乜文化架啦）
入到去，睇到好多懶浪漫既愛情書藉，100蚊10本，真係cheap成咁＝．＝
咁我不嬲都唔睇e d既，所以之後就去返屬於我既天堂，睇到我想買既李天命既書，
咁都再行逛下先，睇下有無其他正野，今次就見到張小嫻、深雪同陶傑，
不過佢地既作品都唔係咁岩我，所以最後既斬獲只係殺悶思維同埋孫子兵法兩本書。
（一直好想睇既孫子兵法終於buy左啦）

今日玩左個sales，咁我睇下個d懶浪漫既愛情書藉，個sales叫我隨便睇下，
咁我就應佢：其實我真係隨便睇下架咋，搞到佢無奈晒。

今日又玩左賣飛個個人，咁到我買個陣，佢望住我個樣有d疑惑咁，
我就話我要張成人架，高過122就成人架嗎（隔離有個牌，有d刻度，有30,60,90,122cm），
咁佢就俾我啦。我就開始問如果係小童高過122就買成人，咁如果係成人矮過122咁點呀？
佢話都係成人架！咁我又問如果3歲以上但係矮過30cm咁點呀？（因為大過3歲就要買飛）
之後佢就答我無關係架e d，咁我見佢俾左飛我，所以我都唔再玩落去喇。

今日醒起discovery channel教話雞蛋可以增強性能力，不過唔記得係生可以定熟可以，
如果大家想增強既話，不防生食一隻，熟食一隻。（男女皆可）

覺得自己講野真係別具一格（衰格）

>>July 22, 2006 at 3:29:45 PM GMT+8

2006 年 7 月 20 日 星期四 【晴】

岩岩post完散工去大眾到就有回音，有兩個人走黎，不過就問左好多野，
都唔明佢問咁多野點解唔打過黎，我就不嬲都唔鐘意打字架啦，有得講就講丫嗎，
把口用黎講野架，禁幾個電話冧把咁仲快過打咁多字＝ｏ＝。

今日又見識到d自以為是既人，都唔知自己原來係井底之蛙，乜野都話想想想，
你估變魔術咩，想下就得架喇，又唔知e家既世界係點，以為一切都係佢既想像之中咁，
香港就係有咁多e d淨係得把口，以為自己好醒，其實就豬頭丙既人先搞到咁，唉～
e d就係e家既中學生，溫室裡既小花．．．．．．．．

>>July 21, 2006 at 5:20:38 PM GMT+8