2006 年 8 月 27 日 星期日 【晴】

今天是wendy的生日，生日快樂！

約左六點鐘食飯，今次係地點係春和樓，d野有d都幾好食。
我一入到去坐低無耐，就有野食上檯，但係原來人未齊個喎，仲有fion未黎，
但係ol竟然已然遺忘左約左佢，如果唔係提起，就係好似Dororo咁，俾人遺忘。

不過因為野食已經上左檯，而fion仲要一段時間先到，所以唯有食住等，
已經好節制咁食架喇，但係都消失左唔少，到佢黎到喇，咁我地就再度起菜，
不過都係黎多幾個餸，不過原來fion唔食個喎（因為已經食左個腸仔包，一個腸仔包就夠飽，
真係容易養），咁大家都有飽既跡象，所以剩返既野就由我、keith同阿諾一齊搞掂佢。

食飯個陣最好笑既都應該係ol又講埋d唔知乜野既常識（釋法：此常識指常人唔識），
話個胃係個肺既個個位，但係明明係係肺下面，咁我地就隊佢，不過都唔係好記得點隊佢，
之後keith記起佢既搞笑普通話，話說佢上次同ol一齊，咁就叫ol教佢妹妹既普通話，
最後keith就將妹妹讀成咪咪，咁都無乜野既，不過大頭仔就話咪咪係一個部位黎既喎，
咁我地就笑晒，跟住都好似無乜野特別好笑既野。

食完飯之後就去左打機，去左千色下面個間，無咁多野玩，咁大頭佢地又玩搵錯處，
咁我就去到十幾關先走埋黎加盟，黎到之後都玩得好驚險，差d就輸，但係都去到20關，
而且今次仲成功贏埋，不過贏左20關之後就無得玩，即係爆機，終於都爆到機，
爆左機之後就走喇。

送左wendy同ol上車之後，我地就搭車走人lu。

>>August 29, 2006 at 12:59:57 PM GMT+8

2006 年 8 月 26 日 星期六 【晴】

今日又要去將軍澳，所以晨咁早就要起身。

九點五出門口，九點九就去到元朗同阿健會合，接收左佢向馬交買返黎既手信鳳凰卷。
然後傾下傾下就到左南昌，但係就收到阿諾電話叫我地去唱散紙，
之後行晒成個南昌站先唱到600蚊散紙，然後就去轉地鐵。

係地鐵上面發覺原來我地同阿諾係同車，所以就先行合體，用左好多時間先去到坑口，
次次去都遲到，去到睇到都黎左唔少人，不過就唔多囉，之後做既野就係不斷打電話，
最後有個要自己搭車上黎，而我地就搭車先。

今次既人數都唔少，係最多人既一次，個過程其實就無乜特別事，
只係有d串串地既人係到，不過都俾我打沉晒，今日因為人數眾多，
而且資質只屬一般，所以原定3點完都推到去4點幾先完結。

之後諗住落去旺角食野，咁係地鐵既旅途上，阿健醒起話要去銅鑼灣扲野，
心諗都係一陣既o者，咁我地就一齊去先，點知去到淨係執d貨出黎都用左成個鐘，
仲問我地有無野想要，入面除左d梳發呀，電器個d值得扲之外，其他個d都無用，
所以乜都無扲到就走。因為call左車，所以就搭順風車落旺角，不過其實係做苦力多d，
因為塞車既原故，搞到搭左半個鐘先去到，真係唔怪得地鐵咁多人搭。

去到扲埋d野上去之後，我地就落去食飯，今次去pizza hut，因為有張coupon，
去到等左成半個鐘有多先有位，咁我地就同負責俾飛個兩個囡囡吹水，
咁就發覺原來pizza hut個名牌有顏色之分，原來係級別，黃色係trainee，
紅色係junior，綠色係senior，藍色係supervisor，銀色係manager。

仲講左好多野，不過都唔係咁記得講左d乜野，有位之後就上去嗌野食，
初時我以為阿健係叫一個大餅，一個細餅同埋一個麵，點知食完先知，
佢只係叫左一個細餅同一個麵，搞到我都唔知食過乜野咁，咁唯有嗌多個大餅，
唔係我都唔知過唔過到今晚。

係嗌野食個陣，我地係咁玩個個囡囡，乜野都叫urgent，而且叫佢加多d芝士，
佢話加芝士要加十蚊，咁我地就焗佢加芝士但係唔加錢，最後個餅真係ok多芝士，
咁係真係有咁多定係真係加左就唔知喇。中途有個仔黎加水俾我地個陣，
咁阿健就話佢滴水，咁佢好似聽唔到，我就指住d水加一句，嘩！汗黎架？
阿仔就好驚奇咁望下，然後阿諾就話係咁穿左架，佢真係望下有無喎＝．＝
食完之後我地就寫左張野高度讚揚個個囡囡，然後就走，走落去個陣，
阿健嚇樓下負責俾飛人個個囡囡，佢真係俾佢嚇到喎，我地笑晒。

跟住就去先達買隊皮鞋，不過係阿健買，然後就去買電話膠貼，諗住可以玩下，
不過最後一d都唔好玩，旺角d人真係無咁好玩，跟住就落朗豪坊到抽獎個d搞，
係香港購物節，咁初時有張單係350蚊既o者，但係我地就加多個1上去，
即係變左3150，明明可以抽一次，變左可以抽十次，咁係搞緊個陣，
又玩下佢地，點知又係唔好玩，失望。

之後去左m記到買雪糕，諗住又可以玩下啦，點知都無d後生d既囡囡，
玩都玩得唔過癮，又係到問杯雪糕上面個支棒棒係咪薯條黎架，
咁有杯芒果雪糕，又好驚訝咁講，芒果黎架咩，唔係咖哩味咩，
又係到問麥旋風可唔可以溝埋，不過今次唔成功，佢話我地無e隻產品架嘛，
今次真係無計可施，最後唯有就範啦，咁就返上去坐係張萬九銀既梳發到食，
咁等阿君收埋工之後就一同搭車返歸。

>>August 28, 2006 at 7:19:45 AM GMT+8

2006 年 8 月 25 日 星期五 【晴】

尋日打左電話去玩mini，個過程都算係最難忍笑既一個case，所以打出黎同大家分享下。


我：你好！何小姐唔該！
mini：我係。
我：我係觀塘警署個邊打黎架！（佢住係觀塘）
mini：哦！
我：咁樣就有一個市民係觀塘地鐵站a出口到執到你個銀包。
mini：下！我個銀包係到喎！
我：我唔知喎，咁你係咪叫何ｘｘ丫！身份證號碼係zｘｘｘｘｘｘ（ｘ）？
mini：係呀！（因為某ｄ原因，我有齊佢d資料）
我：咁就有人執到你銀包，裡面有300蚊。
mini：下！
我：係呀！小姐（此時電腦的msn突然響起，破綻露出左）
mini：咁銀包裡面有乜野呀？有無咭個d架？
我：ｅｒ．．．．乜野咭呀？
mini：銀行咭個ｄ
我：有！
mini：咁樣內面仲有乜野呀？
我：三百蚊、身分證、個d咭同埋一d相
mini：乜野相呀？
我：你個ｄ私人相
mini：咁樣有無學生證呀？
我：有！
mini：有幾多張呀？乜野學校學生證呀？
我：ｅｒ．．．．YMCA（好彩真係YMCA）
mini：個銀包乜野cuting呀？
我：我唔知點講喎！
mini：咁樣你乜野no.呀？
我：乜野no.呀？
mini：你個警員編號
我：pc86012（即刻作俾佢）
mini：咁樣你叫乜野名呀？
我：我叫．．何（笑緊）．．紅（仲笑緊）．．生
mini：你玩野呀？
我：因為我個名同澳門賭王一樣，所以我每次講都忍唔到笑
mini：你覺唔覺得你好無聊呀？
我：其實你知唔知我係邊個？我係阿嘉呀！
mini：傻笑十秒

之後就問下佢幾次識穿，原來就係msn，下次我要再小心d，唔係就成功昆到佢去觀塘警署。

>>August 28, 2006 at 5:19:55 AM GMT+8

2006 年 8 月 23 日 星期三 【雨】

話說尋日就去左亞洲博覽館到interview，咁其實本身我就唔諗住in，不過最後都in左＝．＝

四點幾個陣就去左屯門碼頭，因為阿諾話搭船喎，咁樣一陣間就到左東涌喇，
然後就轉乘城巴，乜野no.就唔記得喇，因為今次係四季明帶路，佢好似成日黎咁。

去到f區都見到幾個黎左，咁我地係早到既，未到齊都係好合理既。
咁因為肚餓既原故，所以就落去麥記諗住買個包食下，點知落到去就發覺無8蚊包個喎，
咁就轉做買雪糕食啦，就問下個姐姐仔有乜野雪糕食，咁就問麥旋風有無得溝架，
佢就真係就去問經理喎，咁個經理就話唔得個喎，因為如果有咩野事公司唔會負責，
咁我就話：咁我負責囉！然後就ok左，咁個姐姐仔就去搞個陣，
我就玩隔離無野做個個姐姐仔。

咁我就問佢知唔知麥當奴幾時有咖哩味雪糕，因為我岩岩係泰國返黎，就覺得幾好食。
然後佢就好愕然咁問邊隻雪糕有咖哩味，我話隻隻都有個喎，
咁佢就話泰國個邊d野係怪d，阿諾就講：係囉，泰國d人都怪d，你係咪泰國人黎架？
咁個姐姐仔就好好笑咁話唔係，然後雪糕到，我地就走返上去。

咁係之後既過程都好平淡，等齊人，然後聽tony講同一樣既廢話，上去interview，
其實只係填下form，screen下個樣，然後影印埋就完左。
唯一唔同既就係tony竟然話如果有工開既話，我同阿諾是但一個一定會係到＠＠，
咁樣咪即係我地兩個都走唔甩＠＠，不過唔會既，做熟左之後一定會走出黎，
想當時美麗華都係咁，到e家阿諾唔係到咪一樣得。

interview完左之後就搭車去返九龍食飯，去返上次龍蝦粥到食，
我仲一心諗住出黎食一舊水鮑魚，點知唔係，有點兒失望。
其實d野食真係幾ok，加上又唔貴，不過今次食就無上次咁抵，上次好多個餸先三百幾，
今次好似5個餸都要二百幾，唔知發生乜野事呢？

>>August 24, 2006 at 3:06:18 PM GMT+8

2006 年 8 月 22 日 星期二 【晴】

電話整人記錄


成功：
楊小姐（3台未交兩個月電話費事件）
曾小姐（大發金行金鏈事件）
葉小姐（mandy原諒我、啟迪游泳訓練班事件）
黃小姐（3台中獎－＞未交兩個月電話費、斯迪琴行學琴事件）
蔡小姐（學校迎新日、mandy原諒我事件）
譚小姐（金輝乾洗事件）
蘇小姐（中三同學阿輝事件）
何小姐（觀塘警處唔見銀包事件）
吳先生（csl promotion事件）
袁先生（打錯電話事件）
黃先生（高登LCD mon事件）
羅先生（永安旅遊北京旅行團事件）

失敗：
陳小姐（mandy原諒我、3台未交兩個月電話費事件）
鄒小姐（數碼通中獎事件）
胡小姐（舊同學事件）
莎莎小姐（永勝尋物事件）
黃小姐（新城歌唱比賽事件）
王先生（安福遊戲中心事件）

半成功：
何先生（百老匯電腦送貨事件）
王先生（csl未交兩個月電話費事件）

>>August 25, 2006 at 10:14:18 AM GMT+8

2006 年 8 月 19 日 星期六 【晴】

今日又有工返，約左大家係七點鐘等，係車上面無聊就打左俾莎姐吹水，
唔知點解，今日係太子旺角到竟然無塞車，真係怪，最後成功係七點鐘到達尖沙咀。

咁因為一開始見唔到mini，咁阿健又話無佢電話號碼，其實我都無，但係我知佢打過俾我，
不過我就無聽到，咁就係未接來電個到搵下啦，見到一個係no.既，咁我就試下啦，
一聽男聲黎既＠＠，咁即係唔係啦，而我唔知佢係邊個，只知佢係trainee黎，
咁我就話我係阿嘉呀，你係．．er......，等佢答我係邊個，又成功左，
但係都唔知講咩好個喎，咁就叫佢去interview啦，最後佢未有咭，我就話唔緊要，
我地會再安排，咁就俾我成功過到骨，俾佢發現我打錯，咁咪好醜囉。

收左線之後就再串下mini，旅行咁好笑丫喇。到食飯喇，咁就見到今日係ken briefing，
都知佢唔會咁易收手架喇，所以最後阿雞就真係俾佢雞左，其實我都唔多覺有咩野問題，
不過無辦法啦，人又多，預左佢會搵人祭旗架喇。

今日既function係婚禮，其實一早結左架喇，只係補擺喜酒o者。
初時諗住成班教育界人士，都預左佢地食殘廢餐，點知最後無喎，真係好。
咁初時都有少少慢既跡象，因為頭幾個餸都要分兩轉先搞掂，加上扲傢私個到好麻煩，
所以慢既就可以叫做永遠慢，快既就會永遠快，好在仁哥係翅個到幫我收幾隻碗，
所以後期都無乜問題，一直平步青雲落去。

今日就無尋日咁好，又得食又得飲，今日淨係食左個燕窩撻，都好過無啦。
收工個陣，阿邦（今次第二次返工），佢竟然走去同ken理論，話說佢無收到d龍仔分羹，
但係係d客叫佢唔好收既，咁係ken話佢個一刻，佢就唔講，到收工問完我地之後，
簽名個陣就同佢理論，人地邊得閒理佢，岩岩出黎做野既人就係咁，傻下傻下，
真係傻得可愛。

>>August 21, 2006 at 11:10:44 AM GMT+8

2006 年 8 月 18 日 星期五 【晴】

先回應下OL既留言
既然你唔中意不知所謂，咁改用風趣幽默（我馬上改）
我想到了，其實你那應該是札記，不是日記
札記既意思就係選取某些題材來寫，岩晒你啦，揀某d日子黎寫
=================================================================================
今日係放左咁耐假之後第一日返返工，整體上黎講都係不過不失既。

今日返工就有我、阿諾、仁哥、健哥同kelvin，全部都係tony線既精英，
唔係精英個個超人女就話唔撈，所以就甩左一個。

不過今日返工前就有少少意外，因為明明就應該係返7點半，但係返到去又話返8點，搞錯晒！
今日食飯重點講既野就係原來去深圳都叫去旅行，話說我尋日打電話去叫mini返工，
咁佢話佢唔得，要返深圳，咁我就話昊時都返唔到，話要去旅行，
點知mini同我講就係佢地一齊去，＠＠我已經馬上講話去深圳都叫去旅行，
最少都坐下船丫，坐車＝．＝．．．．．．無言

今日winfierd安排我地係8廳，最近廚房，所以大家都無意外發生，
而且仲可以飲到好多慘汁（燈汁），仲食左個地撻仔，好過無得食。
之後仲俾gary叫左落去b2到收野，而佢就叫左我同阿健去收垃圾，
咁我地見到有四罐生力係到，就收起佢先，咁係收個陣，gary竟然走左出黎，
我同阿健馬上係到洗手，之後佢問我地做乜野，咁我就兜話岩岩中左招，所以洗洗佢，
gary話我地係到古古惑惑，不過最後都安全過關。

到左收工個時，我同阿健都聽到winfierd係到問無晒啤酒喇，緊係無晒啦，
都俾我地收埋晒喇，不過佢地就遲遲都未走，搞到我地都唔知點扲走，
搞到遲晒先走得，最後就多左罐啤酒可以飲，都好過無架喇。

>>August 21, 2006 at 10:50:44 AM GMT+8

2006 年 8 月 16 日 星期三 【晴】

在這個靜寂且孤寂的晚上，我看了一看舊時的日記，發覺字數上有了明顯的差別，
而且記載的內容亦比舊時粗疏得多，而且也少了很多形容詞及借代的修詞手法，
人不斷的變，連寫日記的手法也變了，不過這變可能是好的，最少讓大家看少了很多字，
不用那麼傷神看2000多字，反正用500多字也記載了一天的事情，只是沒有那麼清晰而已。
我會把字數稍為提高少許，滿足那麼求知欲比較高，即是較八掛的人士，
也免得自己的日記版變成像OL那種風趣幽默的簡單日記
（都不知用什麼字來表達，只好用回日記，但其實稱不上是日記）

好近無寫日記，因為變左寫札記，記既野係一d人生觀／態度，然後再帶出心情，
暫時得一位觀眾，一位我都是意料之外的觀眾，因為我都無公開過網址，
只係因為留言而被發現，等到有咁上下既篇幅就會公開，到時唔知有無人幫襯呢？
（要你地一次過睇，睇到你地死死下，係咪好衰呢，嘰嘰）

估唔到事隔都有兩個多禮拜，仍然有人走黎問我係咪請酒店散工，個post發左咁耐，
而且阿諾又發過個新既，按照道理上應該搵阿諾先岩架，點解仲會搵我既呢？？？
咁我今日就紓尊降貴去問兩個唔出聲既人，其實可能唔係想做酒店散工，
不過都問下，我費時多咁多唔知邊個既人係msn既list到，搞到其他人cheap晒，
同時亦都順手問下佢地點解唔主動出聲，只係順手，就唔係刻意要佢地難堪，
不過順手睇下佢地難堪，又何樂而不為呢。最後都有一個人願意做，都不枉我既紓尊降貴。

>>August 19, 2006 at 6:36:04 PM GMT+8

2006 年 8 月 12 日 星期六 【晴】

今日一早就要起身，因為又要去將軍澳。

一早食住個包咁行去輕鐵站，搭輕鐵然後轉乘西鐵，最後搭埋地鐵，
用左個半鐘就到達目的地，不過係路途上面就不斷聽到有人甩底，最後甩左3個，
仲打電話去左一個到訓話，e家d後生既，真係．．．．佢地呀！都唔知乜x野人黎架！

咁因為今次阿健無黎，所以我同阿諾就要做埋佢個份，負責今次既教學。
個流程都幾好，但係今次就搵唔到乜野精英出黎，所以拔唔到尖，而且仲有人倒滯水，
成為第一個training倒滯水既人，都幾威架。

今次個training開左ot，搞到四點先完，比法定時間多左一個鐘，不過無加錢既，
我地唔會做d咁無良既野，而搭完的士落去之後都開始回程，無去其他地方。

六點鐘過d就返到元朗，因為今日約齊左人食飯，大家又在聚首一堂，
好似係e個暑假第一次聚會，今次去左麻布十番到食，d野食就食得落肚，
但係就無好食既感覺，不過今次係阿諾請既，所以都好滿足。

之後去左打機，都係睇佢地玩o者，因為我對打機的興趣真係．．．．．．細，
睇住大頭仔表演太古，的確係犀利，之後去左睇人玩四川省，雖然只係對對碰，
但都係一個智力遊戲，絕對唔可以睇少，然後又去左睇人玩捉錯處，
個兩個人玩得好犀利，可以唔洗5秒就過左一關，之後阿諾黎埋一齊睇，
睇到佢地玩到第十九關先輸，輸既原因係禁錯位，不過真係好勁。

最後去左睇大頭仔同keith玩埋高達就閃人，今日的旅程都完結了。

今日既重點攻擊目標係keith，因為佢先攻擊我，咁我當要以還以顏色啦，
而ol依舊係講野無邏輯，所以都成為戰靶。

>>August 14, 2006 at 4:54:18 PM GMT+8

2006 年 8 月 9 日 星期三 【微雨】

我記得上一次返工個陣gary講左d幾好笑既野，不過我無記得，e家諗返起都有d好笑。

話說對上個次係個sideboard都分餸，咁gary就黎幫手，
而個陣分得好求其既，所以個d唔知乜野菇就調轉左，
gary就問我同tony讀乜野科，然後又話文科既俾d美感丫。
咁因為我同tony都係理科，所以就答我地理科架，
佢兜得好快，就話讀理科既，俾d理性丫，我都係讀理科既，唔好影衰我地d理科人。

諗諗下，佢條友又幾搞鬼，而且又幾有計個喎。

>>August 17, 2006 at 6:03:10 PM GMT+8