2006 年 2 月 20 日 星期一 【炎熱】

Title：挑戰成功

　　今日去左唱 K ，終於唱到 Juno 既 " 雌雄同體 " ．雖然仲有少少瑕疵，但係咁先至似 Live 架嘛！

>>February 23, 2006 at 5:33:38 PM GMT+8

2006 年 2 月 18 日 星期六 【乍雨乍晴】

Title：遲來的禮物（真人真事版）

　　好似耐到都唔記得幾時開始申請做組長．經過一次 Individual Interview 同一次 Written Test 之後，每次當ｏ個位負責既 Supervisor 經過我身邊，我都會期望佢走埋黎問我幾時得閒去 Trainning ，只不過每次佢都係係我身邊擦過...就好似暗戀一個人期待佢同我講一句野，但可能佢根本無留意過你一樣．當我每次 "等收工" （註：等收工 = 返工），正諗緊點解咁失敗既時候，我既 "女神" 終於出現．（註：但係呢個 Supervisor 係一個男人！）我地既邂逅係咁既...

　　話說今日有十場馬，去到唔知第六定第八場（因為小弟逢單數場就會去 Toilet ），當我正係度介乎閉目養神同搵周公捉棋之間，突然有人係後面拍左我一下．正當我以為係組長以為我訓著左，而我又其實唔咪訓覺，想怒啤番佢既時候，一個期待已久既面孔係我面前出現．係佢，係佢，係 Supervisor ．

　　佢問我：" 你今日放工得唔得閒 ? " 估唔到咁直接 Date 我．
　　
　　" 哦！ " 我本能地應左一下，可知當時我幾緊張．
　　
　　（點解唔用 " 好呀！ " 呢? 因為咁樣就未免太過顯得自己想人地約，要含蓄少少．點解唔用 " 唔！ " 呢? 因為 " 唔！ " 可能有否定既意思，亦可能令人地覺得你太 Cool ，所以呢個 " 哦！ " 可以話係既大方又得體！！）

　　" 咁放工去 Trainning 丫！咁你完場去放 Break 食飯先啦！" （心想：係公司入面 Date 咁揚既！而最奇就係點解要食飯先呢? 要咁多體力做咩呢? ）

　　" 哦！ " 可見我仲未緊張完，至於點解用 " 哦！ " ，請見上兩句，但係其實說穿了 " 哦！ " 係我平時既用語．

　　Supervisor 見我個樣仲未發完夢，本來想走，但係都係加返句：" 係上組長 Trainning ！ "

　　跟住我終於夢醒，回番魂之後，先至諗起前兩日決定黎緊月尾退休，連辭職信都打埋，但係依家先至話要升職，真係唔知應唔應該用 " 晴天霹靂 " 黎形容我即將升職既心情好囉！

　　但係係臨完尾場既時候，因為有個本來話做 En （簡單黎講即係完場後遲 D 走既意思）既同事想有事走先，組長臨時臨急要搵人做 En ，因為搵唔到就會俾人鬧．於是，我為左幫組長，決定幫佢做，勇敢 Delay 我同 Supervisor 既 Dating！

　　但係做人點都要有交代，所以我同 Supervisor 講：" 唔好意思！因為有個同事要走先，所以我要代佢做 En ！ "

　　Supervisor 好奇怪咁問：" 咁你好想做呀? "

　　呢個問題好難答，因為如果唔咪為錢既話，係無人想坐係度唔走得囉．如果可以照計錢而唔駛坐既話，我諗全部位都無人坐．

　　於是，" 大方得體 " 既我好坦白咁答：" 唔咪...不過個位無人坐丫嘛！ "

　　Supervisor 再次 "語出驚人" ：" 咁你放 Break 先啦！一個半個位無咩所謂既！ "

　　" 咁點解搵唔到人坐呢一個半個位又會俾人鬧呢? " 當然係我心諗啦！

　　跟住我就去左放 Break ，再返去聽左負責 Trainning 既組長講左差唔多兩個鐘頭野，白賺左百幾蚊，差唔多九點先走得．

　　至於點解升職就唔辭得職，又或者升唔到職就要辭職，可以用 Wui's Paradox （中文譯：匯之謎思）去解釋：

　　1) 如果升左做組長，第時寫履歷表會好睇 D ，又可以用呢個 Post "借題發揮" ，例如話有 Leadership Experience 啦！

　　2) 如果唔做組長，就會多 D 時間讀書．可以讀晒個堆連阿 Sir 都話 " 讀成世都讀唔完 " 既參考 Notes ，同埋 D 唔知講緊咩既 Notes ．

　　所以呢個問題都係要要學下政府咁做下研究先！希望唔駛 2010 年先實行到啦！

　　ps. 遲來的禮物（故事版）請見 2003 年 4 月 27 日日記．（做下 Cross-Selling 推銷先）
　　

>>February 23, 2006 at 11:46:30 PM GMT+8

2006 年 2 月 17 日 星期五 【乍雨乍晴】

Title：嚇死人咩

　　今日同 King，7B同心心仔出去打邊爐，約好係沙田新城市 Body Shop（以後稱老地方）等，跟住 King 請搭的士去乙明村麗都火鍋．我地落左車，昂然行過一行樓梯上去，竟然發覺間酒樓執左笠，點解我地會唔知！！

　　跟住行番過去新城市，打算去好運中心既皇都，點知行到過去都勁多人．之後諗起瀝源村既敦豪酒樓，行到過去，迎賓姐姐俾左張飛我地等，但係唔駛一分鐘就有檯．

　　入左去之後，叫左個皮蛋鍋，之後拎到黎，但同時發覺墊檯紙寫住 " 火鍋每位 $ 48 (包湯底，醬料，免加一) " 同時上面有句 " 新鮮火鍋配料碟碟 $ 10 "

　　咁疑問又黎喇：

　　1) 點解淨係個湯底都要每位 48 蚊呢? 咁個湯咪值百幾蚊囉！但係我攪完個湯底，除左芫茜多 D 之外，皮蛋都係得半隻喎！

　　2) 如果唔咪淨湯底，係包埋野食既，咁又點解係碟碟 10 蚊呢? 唔通有人寧願碟碟 10 蚊都唔揀任食?

　　於是我地做個 Test ：就係走出去儸野食，睇下會唔會記低我地食左幾多，如果會，就即係 $ 48 淨係湯底，野食另計啦！而可憐既就係，侍應叔叔又真係圈番我地拎左幾多碟，咁即係野食另計啦！於是，正當我地豁出去既時候，我亦同時諗緊將呢件咁搵笨既事寫係日記度．當然，話晒都係投訴，梗係唔會指名道姓咁衰啦，不過我諗住用 " 瀝源村既敦X酒樓 " 同埋 " X豪酒樓 " 呢兩個代號交替使用，希望各位可以有個警惕．

　　跟住，我地食完之後埋單，當計緊每個應該唔過 $100 既時候，侍應拎左張單過黎係 $214 ．跟住我地都好出奇，因為就算每個 $48 ，都應該係 $192，點都計唔到係 $214 ，不過既然係 $214 ，唔理佢係咪計少左照俾囉！跟住出到去睇番個 Banner ，原來有行細字係 " 每位四碟 "，咁就岩數喇！食左 18 碟，$ 192 + $10 X 2 + 兩碟加一 = $214，咁就合理 D ．但係點解門口 Banner 就有寫，墊檯紙就無寫，想嚇死人咩?!

>>February 23, 2006 at 6:10:54 PM GMT+8

2006 年 2 月 16 日 星期四 【颳風】

Title：各有前因莫羨人

　　今日 Dr Li 上堂時講起有 D 野係 Year 2 同學有，而我地 Year 3 同學就無既，就係 Team Spirit ．佢話 Year 2 既同學會約埋一齊踢波，又會整埋波衫， D 女同學又會到場打氣．相反，我地連 Group Discussion 都要分開一堆堆坐埋一齊，真係可以話係天淵之別囉！

　　跟住我心諗： "唔好話約埋一齊出去啦，就算我地迎面撞到打個招呼，甚至只要離遠唔好混路行都已經好好啦！"

　　以下係據小弟觀察今年 LSE Year 3 (某 D )同學離遠遇到其他同學既反應：
　　
　　同身邊同學傾計
　　貼埋牆邊行
　　隻眼 "射" 埋牆邊
　　Dup 低頭 + 扮睇緊 Notes
　　整理儀容
　　甚至混路行

　　其實雖然話唔咪 Friend 者，但係都算有緣一齊讀書丫．係咪連打聲招呼都咁難呢? 最奇怪連迎頭見到都要掉頭走，有 Lift 都唔會一齊入，似乎唔咪似唔 Friend 喎，似仇人多 D ．

　　ps. 不過就算係我對你有仇呀，都係應該我掉頭啦...用不著麻煩你擺駕回宮咁閃縮丫...

>>February 17, 2006 at 2:27:44 PM GMT+8

2006 年 2 月 15 日 星期三 【炎熱】

Title：Macro 派卷喇！

　　今日 Macro 終於派卷 lu ，派之前仲唔係好想收番份卷，因為驚住超低分．但係今日收番份卷時，成績又未係咁低喎，有 34 分，岩岩係 LSE 合格既成績．

　　點解會有呢個分數呢? 因為有兩條 Short Questions 做得幾好，再加上 Miss 改得鬆手 D ．不過以 2 條 Long Questions 做得三份一條黎講，呢個分數似乎高左 D ．不過點都好，試已經考完，而個分又無咩意思，繼續努力迎接六月既終極考試啦！

>>February 16, 2006 at 3:40:52 PM GMT+8

2006 年 2 月 15 日 星期三 【炎熱】

Title：熱到飛起

　　呢幾日雖然都仲係二月中，但係每日既氣溫都係 20-25 度，基本上已經都左長袖衫同短袖衫既分界．好衰唔衰就係朝早涼下晝熱，搞到今朝著短袖衫就出門口凍，琴日著長袖衫就返到屋企成身汗．再加上潮濕同翳侷既天氣，令到個人 Feel 到勁唔舒服，心情都唔靚．所以一係就熱 D ，一係就凍 D ，唔熱唔凍就好難頂囉．

　　天文台話今晚或聽朝會轉涼，希望係真架啦，如果唔咪我就會嬲架喇！！各位記得添衣哦！

>>February 16, 2006 at 3:29:16 PM GMT+8

2006 年 2 月 14 日 星期二 【炎熱】

Title：走鋼索的人

　　今日 Wing Wing Miss 放完 Break 之後，話撞到 Dr Li ，即係我地 HR 既阿 Sir 呢．Miss 話 Dr Li 問佢，我地既狀態點喎， Miss 話唔識答 Dr Li ： "因為我從來都唔覺得你地有狀態喎，因為你地都未開始溫書，而且你地又唔咪馬，邊度會有狀態呢? " 跟住 Miss 話其實唔應該講有無狀態，問題係有無溫書ｏ者，如果有溫書一定會 Pass 到考試個喎．Miss 又話我地個 Course 其實都幾難讀，因為個成績靠個 Final Exam 一次定生死，無平時 D 功課同 Presentation 既分墊下底，而且要有自律性，因為未到考試之前，唔會有壓力 Keep 住溫習．

　　ps. 上次 Christy 姐姐派考試編號紙條既時候，留意到原來成班 30 幾位同學，都唔知有無 15 個同學上次係 Full Pass ，好彩我係ｏ者，希望黎緊考試都 Full Pass 啦！

　　在此諗起一首歌送俾我地 LSE 既同學：

走鋼索的人 --- 李泉

走在半空中　要人命的風
就快要把我吹落
你在那一頭　說你不愛我
我掛在風裡顫抖

走鋼索的人　不害怕犧牲
只求你一句　愛我
往前是解脫　後退是自由
我應不應該回頭

風吹痛我雙眼　我看不清楚
我平衡不了　躲在我心裡的苦
我要給你幸福　你蠻不在乎
你愛不愛我　會決定我下一步

往前是冷漠　後退是寂寞
乾脆我墜落
回憶在左手　未來在右手
誰又會同情我

>>February 17, 2006 at 2:03:20 PM GMT+8

2006 年 2 月 12 日 星期日 【微冷】

Title：法律激流記

　　今日上 Law 堂，除左一向見到阿 Sir 既面孔之外，突然 Feel 到阿 Sir 塊面有 D "反光" ，嚇見有兩行鼻涕 Link 住佢既鼻同口，但係阿 Sir 唔知係懶定係唔知，由得佢繼續 "反光" ．跟住阿 Sir 行返埋去佢既寶座，係褲袋儸左條 "小手帕" 出黎抹左 D 鼻涕，跟住收返埋落褲袋．之後無幾耐，阿 Sir 既鼻涕又流出黎，結果阿 Sir 呢個咁 Cute 既樣就陪左我地成堂．

>>February 27, 2006 at 12:55:27 PM GMT+8

2006 年 2 月 12 日 星期日 【颳風】

Title：情人節的節目

　　本來逢星期二既日子係 Dayoff ，但係因為 Wing Wing Miss 同我地已經係 "情人" 既關係，所以係呢個一年一度既情人節，Miss 都要話： "我地梗係要見下啦！" 於是，聽日既九點至三點將會係我地同 Miss 約會既時間．

　　ps. 祝各位有情人既聽日開開心心咁過，未有情人就快 D 遇到個好情人啦！　^^

>>February 13, 2006 at 2:59:28 PM GMT+8

2006 年 2 月 6 日 星期一 【晴】

Title：孤獨過後

　　今日係年初十，亦都係自己獨自留係香港既第十一日．感覺係，適應自己獨處既日子，但係唔喜歡剩下自己既感覺，很像自己．平日返到屋企唔咪好想見到媽咪，因為佢總會搵到 D 野話我，而我也總會搵到 D 野駁嘴〔很難想像哦?!〕

　　今日係佢地返黎既日子，睇黎又會重拾同阿媽 "開戰" 既日子．感覺係，唔喜歡吵鬧既日子，但係適應有人管既感覺，也很像自己...

>>February 7, 2006 at 4:18:10 AM GMT+8