2006 年 10 月 14 日 星期六 【晴】

Title：旅遊の終結

　　總結番今次既北京之旅，全程都好開心，要引用番何亨係日記既一句 --- "旅行的同伴都很重要" ！

>>November 18, 2006 at 3:58:24 PM GMT+8

2006 年 10 月 13 日 星期五 【微冷】

Title： Day 5 @ Beijing

雍和宮 -> 德勝門箭樓 ->【巴國布衣川菜】-> 北京機場

　　今日已經到左北京旅程既最後一日，一大朝早就起身好匆忙咁執好晒 D 行李，因為 D BellBoy 要幫我地將 D 行李拎落去巴士上面．跟住同何亨就落左去食早餐，但仲係食番個 D 早餐．

雍和宮

　　跟住食完野就 Check Out 上車，第一個景點係去德勝門戰樓．本來已經去到門口，不過因為太多旅遊車，根本泊唔到埋去，所以轉左去雍和宮先．雍和宮係雍正皇帝未繼位前既府第，而到左佢個仔 --- 乾隆皇帝登基之後，基於佢係歷代之中出名既孝子，於是佢將雍和宮改成喇嘛廟，令太后可以好方便咁去祈福．

雍和宮正門


萬福閣


主殿 --- 雍和宮


　　值得一提係個度有一尊四五層樓高既神像，擺放係一間裡面打通左既屋入面．

德勝門箭樓

　　跟住就去左德勝樓箭樓，德勝門係當時軍隊打勝仗之後，入城既城門．上到去望返成個北京城，都覺得幾宏偉．

德勝門城樓


城門上既神武大砲


　　跟住就有一個 "老師" 招呼我地，講野都幾搞笑，有 D 似詹瑞文，不過詹瑞文好笑好多．入左去之後，佢就開始勁講風水，講野個 tone 有 D 似宋韶光．當時都心知不妙，因為經過咁多日既行程，知道一有人講野，就要收錢．

　　講完一大輪，佢揭開左塊紅步，原來入面有隻玉貔貅．貔貅係瑞獸之一，據聞可以招福招財．之後各團友就逐一摸隻貔貅，我同何亨就無摸，因為何亨唔咪好信呢 D 野，而我就覺得隻貔貅好慘，好似俾人控制住咁．跟住我地就入左間房，有一排又一排既凳係度，更加知今次又係叫人買野，於是聽左佢講野，當坐陣都好．係上面 Hea 完一輪之後，就去番城樓上面影相．

　　跟住我地就坐車去食午餐，呢餐係 "巴國布衣川菜" ，間酒樓都幾靚，不過服務就好差．因為我地入到去，佢地都未安排到我地入去房間，去到房間又未有野食．偷聽到導遊同領隊講，原來佢地唔知我地會到，酒樓仲叫導遊帶我地去第二度食，搞到導遊勁嬲．但係最尾因為呢間酒樓之所以咁出名，都係因帶我地團既當地旅行社，當年帶團去佢地度，先咁好生意，所以都係要俾幾間房我地．亦都由於呢個原因，我地等左成半個鐘，先有野食，唯有周圍搵地方影相啦！

酒樓內的優雅裝修


擺設 --- 北京面譜


領隊哥哥 --- Alfee


　　跟住我地本來應該去一個土產市場參觀，可以去個度買 D 特色土產做手信，但係因為食飯個度遲左，所以無時間去，我地就直接坐車去機場 Check In lu ！

　　係車程入面，領隊哥哥做左一個幾好笑既 Ending ，因為佢要收領隊導遊小費　:p　經過差唔多一個鐘頭既車程，終於去到最後一個景點，就係北京機場，要同導遊姐姐分別 lu ！

全程導遊 --- 小月


　　跟住 Check 完 In ，又過左關，就去左入面既書店睇左陣書，之後就坐係度等上機 Lu ．

機場候機室既顯示屏


北京機場停機坪 --- 起飛離開北京 lu ！


北京手信 --- 奧運吉祥物 --- 可愛小福娃


>>November 18, 2006 at 3:40:26 PM GMT+8

2006 年 10 月 12 日 星期四 【微冷】

Title： Day 4 @ Beijing

北京同仁堂 -> 人力車古胡同遊、四合院 -> 恭親王府 -> 【天安門仿明清宮廷帝皇御膳】-> 岳秀服裝市場 -> 老北京傳統藝術表演 -> 足底按摩 -> 【湖北菜】

　　今朝一大朝早，再次落去食酒店自助早餐，又勁飲蕃茄汁，因為一來好味，二來平時飲好貴 :p 跟住就去左北京老店 --- 同仁堂，去到又聽個教授講中醫，又有御醫 "義診" ，據聞話一眾領導人都係佢地醫治既；又有一班按摩師同我地 "免費" 按摩．（不過要收小費）

同仁堂正門


　　奇怪既事情就發生喇，我地每位團友，竟然都有某 D "隱疾" ，要食佢地 D 藥．而由於佢地一向奉行用最好既藥材先做到最好既藥，所以每種藥都既貴下，所謂 "藥材好，藥才好" ，因此我同何亨都無氣理佢地，但係亦都有好多 "富貴團友" 好似開倉咁入貨！！

　　之後經過一輪疲勞轟炸之後，終於逃出魔爪，再上車去參觀胡同同四合院．胡同就等於屋與屋之間既小巷，我地既車停左係胡同外，落晒車之後，突然之間，大約十幾二十部人力車突然從四方八面衝出黎，將一條平靜既胡同泊滿好多紅頂既人力車！

遊胡同既人力車


人力車古胡同遊、四合院

　　跟住我地就揀左一個 "實力派" 車伕上車，因為驚 D 後生仔會飆車，阿伯又唔夠力車我地．沿途都好地地，點知去到一條直路，有 D 其他車伕就想爬頭，踩得好快．其中有個車伕同我地個車伕講左句野，連我地部車都行得好快，好似坐亡命小巴咁．



　　經過一場 "亡命之途" ，終於係我地上車既地方停低．跟住我地就行去一間四合院，入去參觀下北京人家既屋企．係入面，我地既導遊示範左點整北京水餃，我地 D 團友都有試整．

北京四合院


恭親王府

　　參觀完四合院，就去左相距幾步既恭親王府參觀．恭親王府其實係和坤既屋企，係和坤被抄家之後，恭親王就入左去住，所以叫恭親王府．

恭親王府正門


　　由於和坤實左係太有錢，所以基本上個府邸都幾靚，甚至靚過皇宮添！

恭親王府園林


　　跟住我地就去左食 "御膳" ，食完就再去返之前去過既 "北京商業城" --- 岳秀服裝市場，今次梗係唔會再去啦！我地兩個去左附近既商場行街，點知附近既竟然係 "北京黃金商場" ，裡面都係買 D 電腦既野．好彩裡面有個超級市場，我同何亨就入左去掃野食做手信．

老北京傳統藝術表演

　　跟住就去左睇一個傳統表演，表演既地方都既靚，好似以前既茶座咁，仲有花生同茶，一路睇，一路剝花生同飲茶，而隔離亦都有 D 好 Old School 既屋，好似置身係古代北京咁．而表演包括有用頭整攣支鐵筆，單手將 D 釘釘入木板入面，最犀利就係一位老人家將把劍直插入口入面，同埋將個鐵球吞落胃，隔左好耐再吐出黎，真係 "凳" 位老人家辛苦！

茶座 Feel 既觀眾席


Old School 屋仔


　　之後就去左奧運村做足底按摩，真係搵笨，仲搞到對腳勁痕　＞＜

　　食埋飯就返酒店，又係勁早，同左何亨落去打美式桌球．

>>November 18, 2006 at 3:37:29 PM GMT+8

2006 年 10 月 11 日 星期三 【微冷】

Title： Day 3 @ Beijing

玉器加工場 -> 北京寶樹堂 -> 定陵博物館（明代十三陵 -- 定陵）->【老北京風味】-> 蘋果園 -> 神道 -> 萬里長城(居庸關) ->【春江好烤鴨城烤鴨】

今朝一大朝早，再次去到餐廳食番同一堆既早餐，跟住匆匆上車去第一個景點，就係玉器加工場．與其話係加工場，不如話係去玉器市場更加貼切．一入門口，就見到一間大房，我地隔住玻璃睇佢地將一大舊既玉石，用部機啄到所需要既樣．當然，之後就入正題，就係去買玉啦，我地作為後生仔，一來無興趣戴玉，二來都無錢買玉，所以就將 D 玉當成景點，慢慢觀賞．



定陵博物館（明代十三陵 -- 定陵）

跟住就去寶樹堂，即係一間藥廠，都係叫你買野． Hea 完個幾鐘，終於走得，坐車去定陵博物館．去到定陵既第一個地標，就係 "神功聖德碑" ．呢種碑，係每個皇帝既陵墓前都會有一塊，塊碑由一隻瑞獸背住，瑞獸每隻都有佢既特長，傳說呢隻瑞獸係力大無窮，所以重既野都會由佢背住．功德碑上面會刻有該皇帝一生既豐功偉績，而最出名既係武則天既 "無字碑" ．無字碑並唔咪代表該皇帝無功績，相反，係太多功績，寫都寫唔晒既意思．



定陵係明朝神宗皇帝既陵墓．明朝總共有十六個皇帝，記憶中導遊姐姐講左，開國既朱元璋葬係南京，有一位就係皇帝既細佬，曾經係佢哥哥被擄走時做左一陣皇帝，之後待哥哥歸位，所以不可以葬係皇帝陵墓，另一位就唔記得 lu ．而呢十三位皇帝，就葬係北京市郊既山林中，成為明朝皇帝既陵墓群．

十三陵分佈圖


定陵既模型


原來每個皇帝上位不久，就會為自己興建陵墓，一起就幾年，最大工程（長陵）更加達十八年．你可能會問： "佢地咁樣咪咒自己死 ? 好唔吉利喎！" 原來佢地視自己既死亡，只係去第二個地方繼續做皇帝，所以唔會視死亡為終結．

咁由於工匠起完個陵墓，皇帝都未死，有時比佢地仲長命．而皇帝既陵墓入口，又需要保持機密，咁到皇帝死既時候，點搵番個入口呢 ? 工匠會將 "指路碑" 埋係某個地方，上面寫有向邊個方向，行幾遠，要挖幾深先搵到個入口．

其實每個陵墓都知道大約既位置，因為每個陵墓都有一座神樓係前面，我地坐車去都見到兩三個神樓，但係皇帝好驚會有人去佢地既陵墓，所以命人將個入口收得好密實．話說當年毛主席（好似係）派人去搵定陵既入口，點知搵左兩年幾都搵唔到．將要放棄既時候，就搵到呢塊指路碑，跟住就搵到定陵既入口喇！

定陵指路碑


去完定陵之後，就去左食午餐，跟住就去蘋果園擇蘋果（完全無興趣 :P）．擇完之後，就去左十三陵既神道參觀，神道位於全部陵墓之前，係守護各個陵墓既守護石像．而石像中除左有大臣之外，仲有各式各樣既動物，好似馬，駱駝，大象，獅子咁．

"神道" 地圖


文官


大象


神樓


萬里長城(居庸關)

去完十三陵之後，就去今次行程既戲肉 --- 萬里長城．首先係山腳既，係一座寫有 "天下第一雄關" 既城樓．



城樓前，又有刻有毛主席寫既 "不到長城非好漢" 既雲石碑．



遠眺另一邊既長城


居庸關呢段共有七個烽火台，最大既考驗要數頭一兩個烽火台，因為我地一開始要面對斜度起碼四十五度既長樓梯（大家睇睇一級都有兩個磚咁高就知道啦！）．上去既時候，即使唔用手摸住前面既梯級，都要扶住扶手先可以拾級而上．



未行到第一個烽火台，已經辛苦到唔上繼續上．抖陣又行下，又追下何亨，就繼續再上．點知去到第三四個烽火台，竟然俾同團既一對兄弟（大約四五十歲）話：" 丫！後生仔呀下！ " 極具挑釁性，於是 "的" 起心肝同何亨繼續行，一定要上到去最高個個烽火台！

越過第五個烽火台的風光


終於，皇天不負有心人，經過一個鐘頭既辛勞，終於上到最高既烽火台喇！

終點在望（第七個烽火台）


結果，我地終於上到最高既烽火台，而我亦都將預先準備好既說話，送俾先前個兩位兄弟．於是我對山下用普通話大嗌： "你們在嘎 X 我嗎 ? "

從居庸關最高的烽火台望落去既風光


跟住我地花左差唔多一個鐘既時間落返去，都比原定集合時間遲左兩三個字．由於我地團既團友比較年長，只係行左一兩個烽火台就落山，全部人都準時係部車裡面，結果我地行返去我地既座位時，兩邊既團友都鼓掌讚賞我地行畢全程，好英雄式呢！

跟住我地就去左食烤鴨宴，食完就返酒店休息，但係由於返到酒店只係八點幾九點，我同何亨就去左酒店既保齡球場打左場保齡 lu ！

出賣好友照片：何亨 X 領隊 Alfee


>>November 10, 2006 at 4:15:50 PM GMT+8

2006 年 10 月 10 日 星期二 【微冷】

Title： Day 2 @ Beijing

頤和園 -> 絲綢館 ->【廈門海鮮店閩粵風味】-> 故宮（紫禁城）、珍寶館、鐘錶館、珍妃井 -> 景山公園 -> 雜技表演 -> 什剎海SOHO酒吧區 ->【老邊餃子宴】

頤和園

今朝係酒店食自助早餐，基本上係去旅行既指定動作．食物種類不算少，但再想想，之後三天既早餐都係對住呢 D 食物，唯有叫自己唔好咩都食，留 D 聽日，後日，大後日先食．

食完早餐之後，就坐車去頤和園．呢個就係頤和園既正門喇：



跟住行入去，又遇到一條長廊，不過呢條長廊特別在長廊裡面既頂部一直都有一個一個傳統故事既畫，好似 "武松打虎" ．同埋...唔記得，總之就係傳統故事啦，俾慈禧太后同佢地既侍從行既時候，可以欣賞下．



跟住行到去昆明湖，點解昆明湖會係頤和園 ? 因為太后想係京城都睇到昆明既風景，所以命人起左呢個咁大既昆明湖．呢個湖大到好似海咁，真係佩服 D 人當時既努力！

由於個湖太大，所以如果要去對岸既十七孔橋，就要搭呢 D 咁有特色既 "龍舟" （不過係有摩打既）．



不可不提，就係下面呢艘石舫，據說當年太后執意要造呢艘石舫，竟然用左海軍軍費黎起，間接導致之後北洋艦隊全軍覆沒，而中國又被列強入侵既後果．



排雲殿，佛香閣：慈禧太后上香祈福既地方


落左 "龍舟" 之後，就係十七孔橋，點解要係十七孔 ? 因為無論你從左邊數，定係右邊數，數到橋中間，都有九個孔．"九" 呢個數字代表住皇帝，點解 ? 陣間話你知！



下面呢個路牌係景點 ? 非也！頤和園已經行完喇！呢個只係北京市既路牌，導遊話北京唔同香港，因為北京人既方向感好強，幾時都清楚邊邊係東南西北，如果係香港問路，香港人會答你直行轉左再轉右，但係係北京，佢地會叫你向北行，之後再向東行，所以連路牌都有指示方向．



故宮博物館

故宮即係舊既宮殿，呢度係 "皇宮" 既門口：



故宮望出去，就係景山，可以話係皇宮既後院．昔日景山叫做煤山，但係明朝最後既景帝，係李自成起義闖到京城附近，都煤山自縊，所以之後就改左叫景山．以前讀中國歷史，都認為亡國皇帝一定係昏君，但係聽完導遊姐姐講完歷史之後，先知亡國既皇帝都可以係好皇帝．

當時既景帝，眼見之前三位皇帝，荒於政事，令成個國家都變得腐敗，決心強政厲治，但係之前既大臣已經習以為常，都無人理佢．因此，縱使景帝盡心盡力去整治國家，都係無咩起色，引致之後既地方起義．當景帝知道李自成迫近京城，就召集大臣商討對策，但係竟然無人出現，因為 D 貪官都只顧逃亡．景帝萬念俱灰，就走到煤山自盡，上吊前仲用頭髮遮住自己既面，因為覺得自己愧對祖宗．之後過左兩日，先有兩位忠心既太監，將景帝既屍體放下來安葬．

景山公園


珍妃井

當時珍妃懷有龍胎，但係因為慈禧太后唔鍾意珍妃，唔想佢 "母憑子貴" ．於是，佢就命幾個太監抬住珍妃，將珍妃掉入井浸死．



關於皇室既屋，例如皇宮入面 D 屋，同埋王爺府等，屋簷上面都會有一 D 好得意既 "瑞獸" 係上面．唔知有無聽錯啦，聽導遊講話呢 D 瑞獸係龍既仔黎既，擺係屋簷上面就可以擋開邪氣．而瑞獸既數目都有根據架，首先一定係單數，大概係因為皇室係獨一無二掛（我估既），其次，關於皇帝就有九隻，因為九係單位數最大，所以 "九" 就代表皇帝；皇后個 D 就有七隻，如此類推啦！咁呢幅相就係有五隻既 Version ：



呢個係金嵌珍珠寶石藏經盒，真係忍唔住講句 "真係名貴" ！



據說係世界第一個計時器：日晷



咪眨眼喇，九隻瑞獸既 Version 呀！



睇電視就睇得多喇，呢張係真既龍床喇！



皇帝既匕首：金製既匕首套，玉製既手柄


九龍壁

據說真既九龍壁，世界上有三幅，其中一幅就係係皇宮裡面，而亦都最特別．話說當時皇帝下令工匠們整一幅九龍壁，佢地日夜趕工，整到最尾個晚先做起．點知個晚落大雨，其中一塊琉璃瓦（就係幅相見到啡色既部份，近龍肚既地方）跌落地下爛左，成班工匠都好驚，因為第二朝皇帝見到幅九龍壁未整好，實會成班捉去斬頭．但係琉璃瓦要燒完再冷卻，再加工先可以填番個空位，根本就做唔切．於是佢地諗到用塊木頭雕起花紋，再漆上顏料，魚目混珠，結果成功過左關．由於 D 油漆甩色，所以就變返啡色喇！



從景山公園望落去既故宮全境


什剎海 SOHO 酒吧區

什：代表多過十，即係 "十幾" 既意思
剎：蒙古語代表寺廟
海：導遊姐姐話因為北京係內陸地區，見唔到海，而慈禧太后問過玄學家，話北京要有個海先會興旺，所以將呢個湖叫做海．（但又有人話蒙古人叫有水既地方做 "海" ）

什剎海係新興既酒吧區，興起既原因都係因為沙士．沙士當時既酒吧都係係室內，疫症令人唔夠膽去室內又多人既地方，於是 D 人見呢度有個湖，環境又好，就係度開露天茶座，結果生意好好，於是就變成左新興既遊客區．



>>November 6, 2006 at 4:33:58 PM GMT+8

2006 年 10 月 9 日 星期一 【微冷】

Title： Day 1 @ Beijing

北京機場 -> 岳秀服裝市場 -> 天壇 -> 天安門廣場、人民英雄紀念碑、人民大會堂 -> 2008年北京奧運開幕倒數計時牌 -> 王府井大街、新東方廣場、東華門小食街 -> 【滋補茶葉宴】 -> 乘車夜遊長安大街

香港機場

由於係 "早機去，晚機返" 既關係，我地要係比早機還要早既時間出門口，前一晚先開始執行李，再加上驚唔知醒，唯有成晚都無訓．好耐都無試過成晚無訓（仲要第二日日間都無訓），相信對上一次要數副學士做 Project 既年代．而更加難得係想訓都訓唔著，可以講話係 "未出發，先興奮" ！去到機場先六點幾，食完早餐，七點鐘再集合．見到我地既團友，OH !!! 十個失望！全部都係 Uncles + Aunties ！

入左禁區，見到我地要搭既飛機：


去到登機閘口，即係呢個 17 號閘，聽到廣播，奇怪點解會有 3 部機開始登機，但係就算計埋隔離個部，都係得兩部飛機．而最靈異既係 3 部機都係去北京，仲要係 8:30 出發，包括我地本身搭既 CA 118 （如圖示），仲有港龍既 KA 1118 同埋國泰既 CX 6118 ．


上到機，聽到廣播，原來呢個叫做 "航機代號共享" 計劃，大概係國泰同港龍既轉機客過晒黎我地部機，所以要用番佢地既代號，所以一部機有三個代號！

航機起飛，雙腳離地既感覺，好似將條命交左俾機長咁，亦都好希望部機下一次著地係o係北京機場．

經過差唔多 3 個鐘自己嚇自己既航程，終於都到左北京既上空，但奇怪既係一直航程從機上面望落去既景物，到左呢個首都都竟然係差唔多，一樣係小屋，小屋同埋小屋．



一直神秘失蹤既領隊叔叔，經過我地落機，搭接駁巴士去機場大樓，直到辦完入境手續，終於係儸完行李後重現．而齊人之後，我地成班要橫跨兩條路，先到我地部旅遊巴士．好彩部車都極新淨：



而最好既安排就係呢部車同司機叔叔，呢幾日都只係負責我地呢團，所以一來我地可以將D野擺係部車上面，二來唔駛等司機碴部車返黎．

北京市貌



岳秀服裝市場

呢個景點其實都唔咪係我地既行程裡面，不過當地導遊姐姐諗住我地食完個 D 難食夾唔飽既飛機餐會肚餓，所以車左我地去呢個商場食野，唔食野都可以睇下野．去到 D 餐廳，一來唔咪好肚餓，二來 D 野同香港一樣價錢，所以都係無食野．去到買野既地方，基本上同去 "羅湖商業城" 無咩分別，個間格係大同小異．落到地庫，竟然見到 iPod ，而飾櫃裡面個兩部 iPod 竟然分別有 Sony 同 iPod 字樣係部機身上面，完全係 CrossOver Version．

天壇

去完呢個 "北京商業城" 之後，終於入番正題，就係去天壇．落左車之後，要依住一條長長既長廊行，因為當時既皇帝同大臣，都係跟住呢條長廊徒步行去天壇舉行祭祀儀式．



行左十幾分鐘，終於到天壇．天壇因為建於一塊好大既廣場上面，所以更見宏偉．離遠睇都好佩服當時既人點解可以起得咁圓．





天安門廣場、人民英雄紀念碑、人民大會堂

行完天壇之後，就緊接搭車去天安門廣場，其實呢三個景點都係係同一個地方．天安門廣場好大，又好多人，除左等睇降旗禮既遊客之外，仲有好多公安同保安，據聞便衣既公安都好多，所以導遊係落車前都叫我地唔好亂講野．不過，係呢片咁嚴肅既地方，有當地既居民，竟然係度玩西瓜波！







2008年北京奧運開幕倒數計時牌

呢個計時牌其實同天安門廣場只有一路之隔，我地仲諗住行完天安門廣場就當行埋呢個計時牌，仲趕時間隔路同個牌影相．點知原來我地都 "有幸" 去到呢個計時牌作近距離接觸，本來都唔咪好想同個牌影相架喇，但係咁岩個牌顯示仲有 668 日到奧運，咁吉利既 Number 就影一幅啦！



王府井大街、新東方廣場、東華門小食街

跟住就坐車去左好出名既王府井大街，王府井既來源簡單黎講就係王府個井啦，至於再深入 D 既故事，我都唔知．下面呢張就係王府井大街街頭既井蓋喇：



如果要形容一下王府井大街，就差唔多等於銅鑼灣 Sogo 同世貿一帶既地方，都係一樣咁多商場．而新東方廣場，外型好似新城市廣場，但係入面就似九龍城廣場，一樣都係無咩好睇．最吸引我就係呢 D 熟悉既名字，最強烈推介： "耐克" ， "銳步" 同埋 "暇步士"：



"王府井大街" 夜觀


北京版 izzue.com


很 Cutie 既意大利雪糕代言人：企鵝仔


王府井小食街


【滋補茶葉宴】 -> 乘車夜遊長安大街

跟住就食左一餐 "茶葉宴" ，入面全部送菜都係加左茶葉黎煮既，其中最 Impress 就係一碟茶葉炒蝦，D 茶葉脆，D 蝦又好香茶葉味，的確係 10X正！

跟住就坐車返酒店，乘機途經埋長安大街，重遇人民大會堂，已經發緊光．



跟住去到酒店，據聞係 5 星級既，都名符其實．由於呢間酒店係係郊區（郊區既意思只係唔咪市中心，未至於係 "山卡啦" 既地方），所以都幾闊落架！



終於有得訓 Lu ！

ps. 係遊覽天壇既時候，收到商務既電話 Offer Job 俾我，終於見得成工喇！

>>October 24, 2006 at 5:33:24 PM GMT+8

2006 年 10 月 9 日 星期一 【陰】

Title：北望神州

　　小弟今日夥同好友何亨到北京一遊，14 號就會返黎，See ya ！！

>>October 9, 2006 at 5:30:12 PM GMT+8

2006 年 10 月 8 日 星期日 【陰】

Title：精選遊覽團

新歌：軟硬天師 -- Fantastic，Encore @ Long Time No See
　　　新歌：藍奕邦 -- 蓬萊，盲年@潮騷
　　　舊歌：陳奕迅 -- 想哭
　　　舊歌：戴佩妮 -- 你要的愛
　　　舊歌：蔡依琳 -- 好想你
　　　舊歌：劉浩龍 -- 記得
　　　VCD：Ice Age 2 （粵語版）
　　　新歌：周杰倫 -- 紅磨坊，聽媽媽的話@依然范特西

>>October 9, 2006 at 7:04:12 PM GMT+8

2006 年 10 月 7 日 星期六 【陰】

Title：中六合彩... 160 蚊

　　前兩日去投注站，見無聊儸張飛劃下既六合彩，竟然中獎！！之前買左咁多次，連 20 蚊都未中過，今次竟然中 160 蚊，真係開心！

　　話說我係網上面對下有無中獎，見到中左三個字，有 20 蚊收下都算好開心，話晒都係第一次有錢收，之後 Check 下個戶口，點解多左百幾蚊，原來除左中三個字，仲中埋特別號碼，即係三個半字，係六獎，認真喜出望外！

>>October 9, 2006 at 6:49:19 PM GMT+8

2006 年 10 月 5 日 星期四 【晴】

Title ：Secondary Interview !!

　　今日終於到 Secondary Interview 既大日子，一朝早整裝待發出門口，落到街發覺無帶八達通，又無帶散子包，100 蚊就有，但係無錢搭小巴，一路行一路猶豫應唔應該搭的士出去火車站，最尾都係決定行快兩步出去．好彩去到火車站站，等左一陣就有車，仲要無咩人，可以吹下冷氣．

　　去到大埔，雖然行都行到去（大約兩三個字），但係都係決定搭的士，唔駛行到成身汗．去到 Reception ，未有其他 Candidates ，登記左就去 Toilet ．出返黎就見到上次同我一齊 In 既男仔坐左係度，我就坐埋佢身邊．再等多陣，上次 In 個位女仔都出現埋，即係我地上次三個 Candidate 都過晒關，另外對面都有三位 Candidate ，即係總共有六位 Candidate ！

　　等左一陣，Reception 姐姐就帶左我地上去 Conference Room 做 Presentation ，等左一陣，上次個位 Interviewer 就出現，跟住有兩位分區經理就坐，最後有位大粒副經理就坐，就開始 Presentation ．大粒經理是但點一邊 Candidate 開始先，即係我變左尾二個個．我本來都叫自己唔好緊張，但係都幾緊張．見佢地 Present 都唔駛用 "貓紙" ，而我就 "有備而來" ，心諗： "我雖然要用貓紙，但係我要以質量取勝，人地國家元首都用貓紙啦！"

　　好唔容易等到我 Present ，一開始都有 D 驚．好彩有 D Points 都可以睇番張 "貓紙" 讀番出黎．跟住再過幾張 Slide ，發覺貓紙既內容同張 Slide 唔同（事後諗返有 D Slide 係自己搞掂，貓紙無 Mention ），咁無理由花時間搵番係邊，於是後半 Part 係靠自己記憶同臨場應變，好彩都講到我原本諗到既 Points ．

　　之後既答問環節，都算 Handle 得幾好，起碼個腦都轉得好快，諗到 D 幾突出既問題同答案，見到佢地既反應都幾 Positive ．之後，佢地話要下星期先有 Final Decision ，同埋諗下派我地去邊間分店，所以要等到下星期先有消息．

>>October 9, 2006 at 6:43:04 PM GMT+8